Buligan ka ni Jesucristo

Si Jesucristo amo ang imo kusog. Ginhimo Niya ang tanan nga kinahanglanon para makaangkon ka sang kalipay sa sining kabuhi kag sa katubtuban. Paagi sa pagpili sa Iya kag sa Iya ebanghelyo, ginapili mo ang wala katapusan nga kalipay.

Litrato

Larawan sang tawo nga ginatandog ni Jesus ang iya nagapiyong nga mata.

Bisan ginatinguhaan mo nga himuon ang imo masarangan para magpili sang maayo, kon kaisa makahimo ka sang mga sayop. Makahimo ka sang mga butang nga handum mo kuntani wala mo ginhimo. Ang tanan nagaeksperiyensya sini. Kon matabo ini, mahapos nga palangluyahan ukon magduda kon magakabagay ka pa ayhan. Pero may maayong balita—matahum, may paglaum nga balita! Tungod palangga ka sang Dios, ginpadala Niya ang Iya Anak, nga si Jesucristo, nga nagdala sa Iya Kaugalingon sang imo mga sala para makahinulsol ka kag magpadayon sa pag-uswag.

Mahimo ka pabakuron ni Jesucristo. Mabuligan ka Niya nga bag-uhon ang imo mga handum, ang imo panghunahuna, kag imo mga aksyon. Kon nagakabalaka ka, nahadlok, ukon ginabudlayan sa bisan ano nga paagi, paumpawan ka Niya. Buligan ka Niya sa tanan nga aspeto sang imo kabuhi.

Ang paghinulsol indi silot para sa kasal-anan; amo ini ang paagi sang Manluluwas para hilwayon kita sa sala. Ang paghinulsol nagakahulugan sang pagbag-o—sang pagtalikod sa sala kag pagliso sa Dios. Nagakahulugan ini sang pag-uswag kag pagbaton sang kapatawaran. Ini nga klase sang pagbag-o indi isahay lang; nagapadayon ini nga proseso.

Maghinulsol. Magliso sa Ginuo upod ang handum nga mag-uswag. Kon may nahimo ka nga indi amo, akua ini sa Dios kag, kon kinahanglan, sa imo bishop kag sa bisan sin-o nga basi imo nahalitan. Himoa ang imo masarangan para tadlungon ini.

Magkalipay sa dulot nga maghimo sang mas maayo kag mangin mas maayo. Bisan pa nga indi ini mahapos kag mas madugay ini himuon sangsa gusto mo, indi mag-untat sa pagtinguha. Padayon nga maggiho kag magsalig sa Ginuo. Buligan ka sang Manluluwas sa bug-os nga proseso.

Patawaron ka kag paayuhon ni Jesucristo kon maghinulsol ka. Buslan Niya ang imo kasal-anan sang kalinong kag kalipay. Kalimtan Niya ang imo mga sala. Sa Iya kusog, ang imo handum nga tumanon ang Iya mga kasuguan magadako.

Bag-uhon Niya ang imo tagipusuon kag ang imo kabuhi. Amat-amat, magatubo ka kag mangin mas pareho sa Iya. Ang imo koneksyon sa kasugtanan upod sa Iya magadala sa imo sang mas dako nga kahigayunan sa paglab-ot sa Iya gahum.

Litrato

icon sang mga pamangkot kag mga sabat

Mga pamangkot kag mga sabat

Paano ko mahibal-an kon ginpatawad na ako sang Dios? Nagpromisa ang Dios nga patawaron Niya ang mga nagahinulsol. Kon mabatyagan mo ang pagpasulhay halin sa Espiritu, mahibal-an mo nga ang nagabayad-sala nga gahum sang Manluluwas nagahikot sa imo kabuhi.

San-o ko kinahanglan ang bulig sang bishop sa paghinulsol? Ang imo bishop nagakapot sang mga yabi sang priesthood kag sang espirituhanon nga mga dulot nga makabulig sa imo nga maghinulsol. Pwede ka magpangayo sang iya bulig kag laygay bisan ano nga oras. Kon nakahimo ka sang seryoso nga mga sala, pareho sang paglapas sang layi sang sekswal nga katinlo, makigkita sa imo bishop. Indi ka niya paghusgaran. Sia ang representante ni Jesucristo kag buligan ka niya nga mahibal-an kon paano maghinulsol sing lubos kag mabaton ang nagapang-ayo kag nagapabakod nga gahum sang Manluluwas.

Nagatinguha ako nga maghinulsol, pero pirme ko nagakahimo ang amo man gihapon nga mga sala. Ano ang dapat ko himuon? Kinahanglan sang tiyempo ang pagpatubo sang maayo nga pangginawi kag pagkakas sang malaw-ay nga pamatasan, gani indi mag-ampo. Magliso kay Cristo. Bastante ang Iya grasya. Tilawi liwat. Wala ka nagaisahanon sa imo pagpaninguha nga mag-uswag. Kaupod mo pirme si Jesucristo.

Litrato

Larawan ni Jesus nga ginakaptan si Pedro sa tunga sang dalagko nga mga balod.

Tan-awa sa Enos 1:6 (ang kasal-anan sarang nga makakas); Mosias 4:3 (paagi sa Balaan nga Espiritu, ipahibalo sang Dios sa imo nga ginpatawad ka na); 26:30 (ang Manluluwas nagapatawad tagsa nga maghinulsol kita); Eter 12:27 (ang grasya sang Manluluwas sarang maghimo sang mahuyang nga mga butang nga mabakod); Moroni 6:8 (ang mga nagahinulsol ginapatawad); 10:32 (mangin perpekto kay Cristo); Doktrina kag mga Kasugtanan 1:32 (ang Ginuo nagapatawad sang mga nagahinulsol); 58:42–43 (ang paghinulsol nagalakip sang pagkumpisar kag pagsikway sang sala).

Litrato

icon sang templo

Mga pamangkot para sa temple recommend

May pagtuo ka bala kag testimonya parte sa Dios, ang Wala’y Katapusan nga Amay; sa Iya Anak nga si Jesucristo; kag sa Balaan nga Espiritu?

May testimonya ka bala sa Pagbayad-Sala ni Jesucristo kag sa Iya papel bilang imo Manluluwas kag Manunubos?