Paghimo og dinasig nga mga pagpili

Diha sa Alang sa Kalig-on sa mga Kabatan-onan, inyong makit-an ang mga pagtulon-an ni Jesukristo ug sa Iyang mga propeta. Gamit niining mga kamatuoran isip inyong giya, kamo makahimo og dinasig nga mga pagpili nga mopanalangin kaninyo karon ug sa tibuok kahangtoran.

Si Jesukristo mao ang dalan ngadto sa mahangtoron nga kalipay. Samtang mogamit kamo sa inyong kagawasan sa pagpili sa pagsunod ni Jesukristo, kamo anaa sa dalan padulong ngadto sa mahangtoron nga kalipay. Himoa si Jesukristo nga inyong sumbanan, ang inyong lig-on nga bato nga pundasyon. Tukora ang inyong kinabuhi diha sa Iyang mga pagtulon-an, ug sukda ang inyong mga pagpili pinaagi niini. Ang mga pakigsaad nga inyong gihimo sa bunyag, atol sa sakramento, ug diha sa templo mao ang mga bloking igtutukod sa inyong lig-on nga pundasyon diha ni Kristo. Mag-atubang gihapon kamo og mga panglimbasog ug mga tintasyon, apan ang Langitnong Amahan ug ang Maluluwas motabang kaninyo latas niining tanan.

Kamo mga minahal nga espiritu nga anak sa Dios. Ang iyang mahinungdanon nga laraw sa kalipay nakapahimo niining posible alang kaninyo aron motubo sa espirituhanong paagi ug molambo ang inyong balaan nga potensiyal. Mao kini ang hinungdan kon nganong gipadala Niya si Jesukristo nga mamahimo nga inyong Manluluwas.

Ang inyong Amahan sa Langit misalig kaninyo. Siya mihatag kaninyo og talagsaong mga panalangin, lakip ang kahingpitan sa ebanghelyo ug ang sagradong mga ordinansa nga nagbugkos kaninyo ngadto Kaniya ug gihatag ang Iyang gahom sa inyong kinabuhi. Uban niadtong mga panalangin anaay gidugang nga responsibilidad. Siya nasayod nga kamo makahimo og kalainan sa kalibotan, ug kana nagkinahanglan, sa daghang kahimtang, nga molahi gikan sa kalibotan. Tinguhaa ang giya sa inyong Langitnong Amahan samtang kamo mohimo og mga pagpili. Siya mopanalangin kaninyo uban sa inspirasyon pinaagi sa Espiritu Santo.

Ang katuyoan sa Alang sa Kalig-on sa mga Kabatan-onan dili ang paghatag kaninyo og “oo” o “dili” mahitungod sa matag posible nga pagpili nga lagmit ninyong atubangon. Hinoon, ang Ginoo nagdapit kaninyo sa pagpakabuhi diha sa usa ka mas halangdon ug mas balaan nga pamaagi—ang Iyang pamaagi. Kini nga giya motudlo kaninyo kabahin sa Iyang pamaagi. Kini mopasabot sa mga kamatuoran nga Iyang gipadayag. Himoa kini nga mga kamatruoran nga inyong giya alang sa paghimo og mga pagpili—dinagko nga mga pagpili, sama sa paghimo og mga pakigsaad diha sa templo ug pagserbisyo og misyon, ingon man sa inadlaw adlaw nga mga pagpili, sama sa unsaon pagtratar ang mga tawo o unsaon sa paggamit sa inyong panahon.

Samtang ang uban makatabang kaninyo, ang inyong espirituhanong pagtubo personal. Tali ra kini kaninyo ug sa Ginoo. Siya nasayod sa inyong kasingkasing, ug Siya lamang ang mahimong kataposang Maghuhukom. Buhata ang inyong labing maayo nga molambo sa matag adlaw, tumana ang mga sugo sa Dios ug pasidunggi ang inyong mga pakigsaad, ug motabang sa uban nga mas mapaduol ngadto sa Manluluwas.

Tan-awa sa Mosiah 4:29–30 (ang mga paagi sa paghimo og sala hilabihan ka daghan, busa kita kinahanglan gayod nga magbantay sa atong kaugalingon); Helaman 5:12 (tukora ang inyong pundasyon diha ni Kristo); Doktrina ug mga Pakigsaad 45:57 (dawata ang Balaang Espiritu alang sa inyong giya); 82:15 (bugkosa ang inyong kaugalingon ngadto sa Ginoo pinaagi sa mga pakigsaad).

Imahe

mga tawo nga naggamit og usa ka icon sa mapa

Giunsa pag-organisar kini nga giya

Ang matag hilisgotan adunay tulo ka bahin:

1. Mahangturon nga mga kamatooran, o doktrina sa gipahiuli nga ebanghelyo ni Jesukristo

2. Mga pagdapit sa paglihok nianang mga kamatuoran

3. Gisaad nga mga panalangin nga gitanyag sa Ginoo niadtong kinsa mosunod sa Iyang mga pagtulun-an