Handbooks ac Kunohkohn
27. Akwuck Tempuhl nuh sin Mwet Moul

“27. Akwuck Tempuhl nuh sin Mwet Moul,” Ma Suleyucklac ke General Handbook (2023).

“27. Akwuck Tempuhl nuh sin Mwet Moul,” Ma Suleyucklac ke General Handbook

Petsac
mukul ac muhtwacn ahkolah in macruht

27.

Akwuck Tempuhl nuh sin Mwet Moul

27.0

Ikucslah

Tempuhl el lohm sin Leum. Kol kuht nuh yurun Mwet Lahngo, Jisus Kraist. Lin tempuhl, kuht wi ahkfahsrye oruh akwuck muhtahl ac oraclah olwelah nuh sin Pahpah Inkuhsrao ma kaprikuhti nuh Sel ac nuh sin Mwet Lahngo lasr. Olwelah ac akwuck inge ahkoekuhtlac in fohlohk weluhl Pahpah Inkuhsrao ac in kuh in tuhkweni sil ekihn sucu se nuh tok ma pahtpaht.

Ke olwelah ac akwuck luhn tempuhl uh, “kuh luhn God ahkkahlwemyeyuck” (liye Doctrine and Covenants 84:20).

Olwelah ac akwuck tempuhl uh elos muhtahl. Akucl ma kuhpahsr nuh ke olwelah tempuhl uh tiac enenuh in sruhmuhnyuck lihkihn tempuhl. Oacyacpac kuht tiac enenuh in sruhmuhn mwe ahkuhtweyac muhtahl kuht olwelah lin tempuhl in tiac sruhmuhn uh. Tuhsruhktuh, kuht kuh in sruhmuhn ma srihpac ac mwe luti ke olwelah ac akwuck tempuhl ac puhla muhtahl se oasr in kuht tempuhl ah.

Mwet kol ke ward ac stek elos sramsramkihn mwe ahkkahlwemye se ke sapta se inge nuh sin mempucr ma ahko in eis mwe sang muhtahl kuh akwuck in sil.

27.1

Eis Akwuck Tempuhl

27.1.1

Ahkolah in Eis Akwuck Tempuhl

Mempucr enenuh in ahkoeloslac ke nguhn in eis akwuck tempuhl ac in oruh ac karihngihn olwelah tempuhl.

Kunohkohn yohk se luhn pahpah ac ninac in kahsruh tuhlihk nahtuhlos in ahkolah in eis akwuck ke tempuhl. Mwet kol ke ward ac stek, tamuhlwel ac tahmtahel forfor luti, ac sucu luhlahp tahpuhk pahpah ninac ke kunohkohn se inge.

Mwe kahsruh ma kahsruh mempucr in ahkolah in eis akwuck tempuhl uh oasr ke temples.ChurchofJesusChrist.org.

Mempucr ma ahkolah in eis mwe sang muhtahl lalos kuh in sil nuh sin tuhma kuh kiyac elos kwacfeyuck in wi kuhlahs in ahkolah nuh tempuhl (liye 25.2.8).

27.1.3

Mempucr Ma Oasr Ma Suhfas ke Mahno

Mempucr suwohs ma oasr ma suhfas ke mahnol kuh in eis kwewa akwuck nuh tempuhl. Kwacfeyuck mempucr inge in fahsr nuh tempuhl wi sucu kuh kawuck ma oacna sie gender ma eis tari mwe sang muhtahl in kahsrelos. Fin mempucr koflah in wi mwet ke sucu kuh kawuck, elos kuh in sa pahngonwack tempuhl in liye lah kahsruh fuhkah kuh in oreklac.

27.1.4

Lweng kuh Kahsruh nuh ke Kahs

Fin mempucr enenuh lweng kuh kahsruh nuh ke lweng, elos enenuh in sa pahngonwack tempuhl liye lah kuh.

27.1.5

Nuknuk Nukumyuck Tempuhl

Fin som nuh tempuhl, mempucr enenuh in nukum nuknuk ma elos nukum nuh ke sackramacn miting.

Liye 27.3.2.6 mwe ahkkahlwemye nuh ke nuknuk nukumyuck nuh ke macruht kuh sil tempuhl.

Liye 38.5 mwe ahkkahlwemye nuh ke:

  • Nuknuk ma nukumyuck nuh ke alu in eis mwe sang muhtahl ac akwuck nuh ke sil.

  • Eis, nukum, ac karihngihn in muhtahl nuknuk ac garmacn tempuhl.

27.1.6

Karihngihn Tuhlihk

Mwet mahtuh se enenuh in muhta liye tuhlihk uh fin elos forfor inkucl tempuhl. Mwet orekma tempuhl elos mwesahs in liye tuhlihk inge ke pacl na ma inge sikyak uh:

  • Fin elos sil nuh sin ninac pahpah

  • Fin elos muhta liye sil luhn tuhlihk wiyaclos ma moul, tuhlihk fahsr nuh yohrohlos, kuh tuhlihk step wiyaclos

27.1.7

Ohsun nuh sin Mempucr tukun Elos Eis Mwe Akwuck Tempuhl

Kwacna oasr kihsensiyuck luhn mempucr tukun elos eis akwuck lalos tempuhl. Mwet in sucu ma eis tari mwe sang muhtahl, pisap, mwet kol sahyac ke ward, ac tamuhlwel ac tahmtahel ma forfor luti uh kuh in ohsun nuh sin mempucr in akacsruhi ke ma elos puhla etwaclah tempuhl.

Mwe kahsruh in sang topuk kihsensiyuck inge oasr ke temples.ChurchofJesusChrist.org.

27.2

Mwe Sang Muhtahl

Kahs se inge endowment pa “mwe sang.” Mwe sang muhtahl tempuhl ac mwe sang se tuhkuh yurun God suc ma El sang ahkinsewowoye tuhlihk Nahtuhl. Kuhtuh mwe sang ma mempucr eis ke mwe sang muhtahl tempuhl inge pa:

  • Etwacack yohk ke srihpac ac mwe luti luhn Leum.

  • Kuh in oruh ma nuh kwewa ma Pahpah Inkuhsrao El luhngse tuhlihk Nahtuhl in oruh.

  • Kolyuck suwohs ke kuhlwacnsuhpuh Leum, sucu lalos, ac mwet sahyac.

  • Ahkyohkye luhlahlfongi, ahkwo, ac mihs.

Mwe insewowo inge kuh in oreklac wiwina luhlahlfongi ke wosasuc luhn Jisus Kraist.

Mwe sang muhtahl ituck ke ip luo. Ke ip se omeet an, mwet eis fohnlahiyac mwe sang muhtahl inge pahngon ma fihsrwacsr se. Kalmacn initiatory pa owo ac akmuhsra (liye Exodus 29:4–9). El nwacnwack mwe insewowo na yohk srihpac ma som nuh ke ma mahtuh ac ma yohk srihpac luhn mwet sacn.

Ke pacl in owo ac akmuhsra se inge, ituckyang kuh nuh sin mempucr sacn in nokomwacng nuknuk nuh tempuhl. Nuknuk se inge ahkuhtweyac kuhpahsr la nuh sin God ac olwelah oreklac in ahkos wuhlweacng oreklac tempuhl. Ke mempucr uh tu na kuh ke olwelah lalos ac nukum wo garmacn se inge ke moul lalos, ac oacyacpac karuhnguhnuhlos. Mwe ahkkahlwemye nuh ke nukumyacn ac karihngihnyacn garmacn, liye 38.5.5.

Ke ip se ahkluo ke mwe sang muhtahl se inge, plwacn in molwelah el lutiyuck, wi pacna Oreklac, Puhtatlac lal Adam ac Eve, Iwaclah luhn Jisus Kraist, Forlah liki ma pwacye, ac Fohlohkihnyuckyak. Mempucr oacyacpac eis mwe ahkuhtweyac lah ac fohlohk fuhkah nuh yurun Leum.

Ke mwe sang muhtahl se inge, mempucr elos suliyuck in oraclah olwelah muhtahl ekahsr inge:

  • Moulkihn masap in ahkos ac kampare in karihngihn masap luhn Pahpah Inkuhsrao.

  • Ahkos masap in kihsac, kalmac pa kihsaclah in tahpuhk orekma luhn Leum ac auliyak ke inse pwacye ac nguhn nwacsnwacs.

  • Ahkos masap ke wosasuc luhn Jisus Kraist, suc masap fuhlwact se ma El luti ke El muhta facluh ah.

  • Moulkihn masap in kosro, kalmac pa mempucr se kuh in apuhsrali nuh sin mwet se na ma elac macruhtyak se in fal nuh ke masap luhn God.

  • Karihngihn masap in ahkmuhtahlyeyuck, kalmac pa mempucr se kihsackuhnlah pacl, talan, ac ma nuh kwewa lalos ma suc Leum El ahkinsewowoyaclos kac in sang muhsaheack Alu luhn Jisus Kraist facluh.

Fohlohkihnyac, Pahpah Inkuhsrao El olwelah nuh selos suc ma tu na kuh ke luhlahlfongi lalos ke olwelah lalos in tempuhl lah elos ac eis kuh lucng me (liye Doctrine and Covenants 38:32, 38; Luke 24:49; Doctrine and Covenants 43:16).

27.2.1

Suc Kuh in Eis Mwe Sang Muhtahl Inge

Mempucr mahtuh nuhkwewa ma kuh in sifacna ke Alu uh elos suliyuck in ahkolah ac eis mwe sang muhtahl lalos. Akwuck met nuh kwewa enenuh in ahkfahsryeyuck ac sihmihsyucklac met liki mempucr se eis mwet sang muhtahl inge (liye 26.3.1).

27.2.1.1

Mempucr Sasuc Ma Tuhfahna Pacptaislac

Mempucr sasuc matwac mahtuh kuh in eis mwe sang muhtahl lalos yac na fohn se tukun lwen se elos ahkkweyeyucklac.

27.2.1.2

Mempucr Ma Tuhmac kuh Kiyac Soena Eis Mwe Sang Muhtahl

Mempucr nwacsnwacs ma kiyac kuh tuhma sonna eis mwe sang muhtahl la kuh in sifacna eis mwe sang muhtahl lal fin ma ten inge oasr:

  • Tuhma kuh kiyac sang lwelah elan oruh.

  • Mempucr, pisap, ac stek prestuhn elos luhlahlfongi muh kunohkohn ma oreklac ke olwelah se tempuhl inge ac tiac ahkfohsye macruht sacn.

Ma inge orekmakihnyuck finne tuhma kuh kiyac el mempucr se ke Alu uh ke fin el tiacna.

27.2.1.3

Mempucr Ma Oasr Acn Muhnahs ke Mahnolos

Mempucr ma oasr acn muhnahs ke mahno kuh in eis mwe sang muhtahl fin:

  • Elos eis fal ma nuh kwewa met liki akwuck inge (liye 26.3.1).

  • Oasr etuh se selos in kahlwem, oraclah, ac karihngihn olwelah elos sun.

Pisap el ahkkweye mempucr ac, fin kuh, pahpah ac ninac kiacl ac tuhmwacl. El oacyacpac suk kolyuck luhn Nguhn. El eis kahs in kahsruh pac yurun stek prestuhn.

27.2.2

Sulaclah Lah Ngwac ac Eis Mwe Sang Muhtahl

Sulaclah se in eis mwe sang muhtahl el ma na nuh sum sifacna ac enenuh in pruhe siyuck. Mwe sang muhtahl el mwe insewowo ke kuh ac fwackyuck nuh sin nuh kwewa ma ahkolah in eis. Mempucr kuh in sulaclah in eis mwe sang muhtahl lalos sifacna fin elos sun kwewa ma enenweyuck inge:

  • Matwaclos in sahp oasr ke yac 18.

  • Elos in ahksahfyelah kuh tiac sifil wi lutlut high shool, elementary, kuh kuhtuh prokracm sahyac.

  • Yac na fohn se tukun elos eis ahkkweyeyucklac lalos.

  • Oasr kena se lalos in eis mwe sang muhtahl ac suhnakihn olwelah muhtahl tempuhl ke moul lalos.

Mempucr ma eis pahng in som misin kuh ahkolah in sil tempuhl kuh in eis mwe sang muhtahl.

Met liki ituckyang pwepuh in lwelah nuh tempuhl nuh sin mempucr se in eis mwe sang muhtahl lal, pisap ac stek prestuhn enenuh in puhla lah mwet se ingacn ahkolah in etuh ac kahlwem in ahkos olwelah muhtahl tempuhl. Lwelah se inge orek fal nuh sin kais sie mwet.

27.2.3

Plwacni ac Oraclah Pacl nuh ke Mwe Sang Muhtahl

27.2.3.1

Eis Lwelah nuh ke Akwuck luhn Mwet Moul

Mempucr se enenuh in eis lwelah in oruh akwuck kacn mwet moul in kuh in utyak nuh tempuhl ac eis mwe sang muhtahl. In etuh yohk ke lwelah inge, liye 26.5.1.

27.2.3.2

Pahngonwack Tempuhl

Mempucr ma plwacni in eis mwe sang muhtahl enenuh in sa pahngonwack tempuhl in oraclah pacl nuh ke akwuck inge.

27.2.3.3

Pen Mempucr ma Eis Mwe Sang Muhtahl

Mempucr ma eis mwe sang muhtahl lalos sifacna kuh in suli mempucr se ma eis tari ma oacna sie gender in pa pwacnuhlos ke toeni in eis mwe sang muhtahl se inge. Mwet pacpac se inge enenuh in oasr pwepuh in lwelah la nuh tempuhl. Tempuhl el kuh pac in kahsruh ke mwet in pacpac fin enenuh.

27.3

Sil luhn Mukul Tuhma ac Muhtwacn Kiyac

Sil tempuhl uh el oracni mukul se ac muhtwacn se in tuhkweni nuh tok ac ma pahtpaht. Elos ac eis mwe insewowo inge fin elos karihngihn olwelah elos oraclah tempuhl. Ke akwuck se inge, tuhlihk nahtuhlos elos ipin pacna sucu ma pahtpaht lalos.

Mwet kol ke Alu uh elos kwacfe mempucr in ahkolah in macruht ac sil tempuhl. Acn ma tiacna arulacna akihlenyuck tempuhl uh kac, mwet kol ke Alu uh ma oasr kuh la kuh mwet sahyac kuh in ahkfahsrye macruht se inge na sil tempuhl kuh in orek tok (liye 38.3). Pactuhn se inge kuh in ukweyuck fin macruht tempuhl se kuh in oruh pahpah ninac kuh sucu fototo puhla srenglah ke srihpen elos tiac kuh in wi nuh ke alu tempuhl an.

27.3.1

Suc Kuh in Sil lin Tempuhl

Mwet sonna macruht nuh kwewa ke Alu uh ma luhngse elos suliyuck in ahkolah nuh ke sil lin tempuhl. Elos suc ma macruhtlac ke lohm alu kuh acn sahyac nuh ingena kwacfeyuck in sil nuh tok ac ma pahtpaht lin tempuhl pacl na elos ahkolah an. Mempucr enenuh in eis mwe sang muhtahl met liki elos sil (liye 27.2).

Siyacnyacn ma sil tempuhl uh enenuh in (1) macruhtyak met liki elos sil kuh (2) macruht ac sil na ke toeni in macruht lin tempuhl an. Liye 27.3.2.

27.3.1.2

Mempucr ma Oasr Elyah lal ke Nuhnak

Mempucr ma oasr elyah la kuh nuhnak la uh kuh in sil nuh sin tuhma kuh kiyac, mwet elos ac pahyuck nuh se uh fin:

  • Elos oraclah kwewa enenuh lalos ke akwuck, som pacna nuh ke mwe sang muhtahl (liye 27.2.1.3).

  • Oasr etuh lalos in kahlwem, oraclah, ac karihngihn olwelah elos oraclah.

Pisap el sang kahs in kahsruh nuh sin mempucr ac tuhmwacl kuh kiacl, mwet se kuh luo ma ahkolah in macruht. El oacyacpac suk ke kolyuck luhn Nguhn. Pisap el eis kahsruh sin stek prestuhn.

27.3.2

Plwacni ac Oraclah Pacl nuh ke Macruht kuh Sil Tempuhl

27.3.2.1

Eis Lwelah nuh ke Akwuck luhn Mwet Moul

Mempucr se kuh in eis lwelah nuh sin mwet moul in oruh sil nuh sin kiyac kuh tuhma. Ke mwe etwacack yohk ke pwepuh in lwelah inge, liye 26.3.

27.3.2.2

Pahngonwack Tempuhl

Mempucr ma plwacni in macruht kuh sil nuh sin tuhma kuh kiyac enenuh in sa pahngonwack tempuhl ac oraclah pacl nuh ke akwuck inge.

27.3.23

Eis License in Macruht

Met liki macruhtlac, siyacnyacn se enenuh in eis pwepuh in macruht pwacye se fahk lah orek oyac macruht sacn. Fin siyacnyacn sacn plwacni in tuhkweni na macruht ac sil ke pacl in alu sacn na, elos enenuh in us license in macruht pwacye se inge nuh tempuhl.

Siyacnyacn ma sil tukun macruht fin facluh inge tiac enenuh in us license in macruht sacn nuh tempuhl. Tuhsruhktuh, elos ahkolah lwen ac pacl ke macruht lalos in ipin pwepuh in ahkpwacye se lalos.

27.3.2.4

Mwet in Pacpac luhn Mukul ac Muhtwacn Ma ac Macruht

Tahmtahel ma eis tari mwe sang muhtahl kuh in wi usack tuhlihk muhtwacn se wiacl ma ac macruht ingacn nuh ke infuhkihl in ayaol. Tamuhlwel ma eis tari mwe sang muhtahl oruh oacpacna nuh sin mukul se ma ac macruhtlac ingacn. Mwet pacpac inge enenuh in oasr pwepuh in lwelah lalos nuh tempuhl ma kuh in srwackna orekmakihnyuck. Tempuhl kuh in kahsruh mwet in pacpac fin enenweyuck.

27.3.2.5

Suc Ahkfahsrye Macruht ac Sil Tempuhl uh

Macruht kuh sil tempuhl uh ahkfahsryeyuck sin mwet sil ma srihsrngiyucki nuh tempuhl se ma siyacnyacn sacn ac macruhtlac kuh sil kac. Fin mwet se ke sucu se kuh mwet fototo nuh se sruok kuh in sil ac el srihsrngiyucki nuh ke tempuhl se ma siyacnyacn se ingacn ac macruhtlac kuh sil kac, elos kuh in solwacl in ahkfahsrye macruht kuh sil sacn.

27.3.2.6

Nuknuk Fal nuh ke Macruht kuh Sil Tempuhl

Nuknuk luhn Muhtwacn se Ma ac Macruht uh. Nuknuk ma muhtwacn se ac macruht ingacn nukum tempuhl uh enenuh in fasrfasr, atac ac pactuhn kac an tiacna okahrkahr ac los, ac tiacna puhslac mwe yucn kac. Enenuh pac in nohkohmlah garmacn. Puhla kac ah enenuh in tiac nguhnnguhn.

In etuh yohk ke nuknuk nukumyuck nuh tempuhl, muhtwacn se macruht inge enenuh in nukum nuknuk loes paho. Tiac enenuh in loes puhla ah sahyacn na fin kuh in lihmihnyuckyak kuh itucklac ke pacl in alu sil ah.

Tempuhl kuh in kahsruh sruhk nuknuk fin enenweyuck kuh luhngseyuck.

Nuknuk luhn Mukul se Ma ac Macruht uh Mukul se ma ac macruht inge nukum nuknuk fal nuh tempuhl ke alu in macruht kuh sil (liye 38.5.1 ac 38.5.2).

Nuknuk luhn Mwet Suliyuck Elos suc ma wi alu in macruht kuh sil enenuh in nukum nuknuk ma elos nukum ke miting in sackramacn. Mempucr ma tuhkuh suwohs me liki toeni in eis mwe sang muhtahl lalos nuh ke sil enenuh in nukum nuknuk fal nuh tempuhl.

Ros. Siyacnyacn sac ac mwet kacto lalos tiac orekmakihn ros pacl se orek aluiyacn macruht kuh sil sacn.

27.3.2.7

Ayaol Ring tukun Macruht kuh Sil Tempuhl

Ayaol ring tiacna ip se ke alu sil tempuhl. Tuhsruhktuh, siyacnyacn kuh in ayaol ring tukun tari alu sacn lin acn in sil sacn. Siyacnyacn tiac kuh in ayaol ring ke oacna sie pacl kuh acn lin tempuhl kuh raunweack tempuhl.

Siyacnyacn ma macruht ac sil ke toeni sefanna kuh in ayaol ring ke sie pacl tok in muh wi kuhtuh mwet in sucu lalos ma koflah in oraclah nuh ke macruht tempuhl uh. Ayaol se inge tiac enenuh in ekuhlah oacna sie ip ke macruht kuh sil ke alu sacn. Siyacnyacn sacn tiac enenuh in fahk ma elos olwelah inmahsrlolos tukun macruht kuh sil tempuhl.

Siyacnyacn ma macruhtlac sahyacn tempuhl met liki sil lalos tempuhl kuh in ayaol ring ke acn elos tuh macruhtlac we, ke sil lalos in tempuhl, kuh ke kwewana alu in macruht ingacn.

27.3.4

Suc Kuh in Wi Macruht kuh Sil Tempuhl uh

Siyacnyacn se kuh in suli sucu fototo lalos kuh kawuck nuh ke macruht ac sil tempuhl. Mwet ma wi inge enenuh in eis mwe sang muhtahl lalos ac oasr pwepuh in lwelah lalos nuh tempuhl.

Stek prestuhn el kuh in sang kuh nuh sin mwet ma sonna pacptaislac kuh eis mwe sang muhtahl la ke srihpen muhnahs luhn nuhnak lalos elos in kuh in wi liye macruht kuh sil tempuhl luhn tuhlihk wiyaclos. Mwet se inge enenuh in:

  • Matwacl in sun yac 18.

  • In kuh in muhta mihs tiac wohwohn ke pacl in alu.

Stek prestuhn el suhmuhslah lwacta se fahkwack lah mwet se ingacn oasr kuh lal in liye sil sacn. Lwacta se inge oreklac liyeyuck tempuhl.

27.4

Siliyac Tuhlihk Moul nuh sin Pahpah Ninac

Tuhlihk ma isuslac tukun ninac kiaclos sil nuh sin mukul tuhma lin tempuhl elos isuslac ke olwelah in sil se ingacn. Elos tiac enenuh in eis akwuck in sil nuh sin pahpah ninac.

Tuhlihk ma tiacna isuslac ke olwelah se ingacn kuh in tuhkuh ipin plwacn se ke moul ma pahtpaht fin elos sil nuh sin pahpah ninac na pwacye kiaclos kuh pahpah ninac ma nuhtweloslac. Tuhlihk ingacn eis pacna mwe se insewowo se ma tuhlihk isuslac ke olwelah inge eis uh.

27.4.2

Pahngonwack Tempuhl

Siyacnyacn ma luhngse tuhlihk nahtuhlos in sil nuh selos, kuh tuhlihk ma luhngse sil nuh sin pahpah ninac ma misac, enenuh in sa pahngonwack tempuhl in oraclah pacl nuh ke akwuck inge.