“28. Kain̄i ko an Tampeļ n̄an eo Emej,” Bok in Bōk Meļeļe: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata (2020).
“28. 28. Kain̄i ko an Tampeļ n̄an eo Emej,” Bok in Bōk Meļeļe.
28.
28. Kain̄i ko an Tampeļ n̄an eo Emej
28.0
Kadkad in
Kobaik baam̧le ko n̄an indeeo ej m̧ōttan jerbal in lo̧mo̧o̧r eo an Anij im mour ijo eutiej tata (lale 1.2). Kain̄i ko kar kōm̧m̧ani ilo tampeļ ko rej kōm̧m̧an bwe en pidodo n̄an baam̧le ko n̄an ippān doon n̄an indeeo im en̄jake juon tarlep in lan̄lōn̄ ilo im̧aan mejān Anij.
N̄an ajri ro nejin Jemedwōj Ilan̄ n̄an bar ro̧o̧l n̄an Ippān, kajjojo iaer rej aikuj ukweļo̧k, erreo n̄an bōk kain̄i ko an lo̧mo̧o̧r im mour āinwōt Anij, im kautiej bujen ko rej ippān kajjojo kain̄i. Kain̄i ko an lo̧mo̧o̧r im mour āinwōt Anij rej:
-
Peptaij.
-
Kapen im menin letok eo an Jetōb Kwojarjar.
-
Leļo̧k eo an Melkisedek Priesthood eo im ekkapit n̄an juon opiij (n̄an em̧m̧aan ro)
-
Bōk menin letok kwojarjar an tampeļ (ekoba initiatory).
-
Liāp ilo tampeļ.
Jemedwōj llan̄ ekar jeļā bwe elōn̄ iaan ajri ro Nejin reban kar bōk kain̄i kein ilo tōreen mour ko aer ilo mour in. E ekar letok bar juon iaļ n̄an er n̄an bōk kain̄i ko im kōm̧m̧ani bujen ko Ippān, Ilo tampeļ ko, kain̄i ko maron̄ kōm̧m̧ani jān kōm̧m̧an ilo etan. Menin ej meļeļein bwe juon armej emour ej bōk kain̄i ko ilo etan juon eo me emej. Ilo laļ eo an jetōb, armej ro rekar mej remaron̄ kāālet n̄an bōk ak jab bōk kain̄i ko me rekar kōm̧m̧ani n̄an er (lale Katak im Bujen Ko 138:19, 32–34, 58–59).
Kain̄i ko an lo̧mo̧o̧r im mour ijo eutiej tata rejjab aikuj ak kōm̧m̧an n̄an ro me ekar ejjeļo̧k ruweer ilo mour in 18.1, 28.3.4, im 28.3.3).
Membōr in Kabun̄ in kar kōketak er n̄an kile ak pukot ro nukier rekar mej me rejjan̄in kar bōk kain̄i ko an lo̧mo̧o̧r im mour āinwōt Anij. Innām membōr ro rej kōm̧m̧ani kain̄i ko ilo etan ro nukier. (Lale Malakai 4:5–6; 1 Korint 15:29; Katak im Bujen Ko 2:1–3; 128:15–18; lale barāinwōt 25.1 ilo bōk meļeļe in.)
Eļan̄n̄e membōr ro rekar jab kōpooj āt ko etan baam̧le eo n̄an jerbal in tampeļ (lale 28.1.1), āt ko etan armej ro remej me rej aikuji kain̄i ko naaj kōpooji ilo tampeļ eo.
Membōr ro rej kōketak er n̄an etal n̄an tampeļ emakijkij in n̄e jekjek ko aer rej kōtļo̧k, men̄e rej kōm̧m̧ani kain̄i ko ilo etan ro nukier make ak n̄an armej ro me etaer rej liļo̧k ilo tampeļ eo.
Membōr in Kabun̄ in rej jeraam̧m̧an n̄e rej kōm̧m̧ani kain̄i ko an tampeļ n̄an eo emej. Ilo aer kōm̧m̧ani kain̄i ko ilo etan, rej maron̄ in kejekļo̧kjeņ kōn bujen ko an tampeļ ko aer make im kallim̧ur eo aer n̄an kōjparok bujen ko.
Stake būreejtōn ro im bisop ro rej jipan̄ membōr ro pojak n̄an bōk en̄jake ko rem̧m̧an ilo kōm̧m̧ani kain̄i ko an tampeļ. Rej kōm̧m̧an menin kōn katakin pedped in katak ko an jerbal in tampeļ im kanooj lale bwe membōr ro rej meļeļe unin tōl ko n̄an jerbal in. Lale jepta 25 kōn elōn̄ļo̧k meļeļe.
28.1
Unin Tōl ko Reļļap n̄an Kōm̧m̧ani Kain̄i ko Ilo Etan Ro Remej (Proxy)
Armej ro remej me dettaer rekar 8 ak rūttoļo̧k ilo iien mej eo aer maron̄ kōm̧m̧ani kain̄i ko ilo etaer. Ijello̧kin n̄e ej kōmeļeļeiki ilo 28.3, kain̄i in ribōk jikin ko maron̄ kōm̧m̧ani n̄an aolep armej ro remej m̧ōkaj in wōt 30 raan ko ālkin raan in mej eo aer eļan̄n̄e men kein ruo rej:
-
Juon nukun eo epaake nukin armej eo emej (ripālele eo ekar jab jepel, ro ilōn̄in 18 iiō, pāāren, ak jein ak jatin) ej jilkinļo̧k āt eo n̄an kain̄i ko an tampeļ.
-
Mālim eo n̄an kōm̧m̧ani kain̄i ko kar bōk jān juon nukun eo epaak an rimej eo (eo pālele ejjan̄in kar jepel, juon ajri erūtto, jinen ak jemen ak eo jein ak jatin).
Eļan̄n̄e ejjeļok juon iaan jekjek ko itulōn̄ rejjab jerbal, kain̄i in ribōk jikin ko an tampeļ maron̄ in kōm̧m̧ani 110 iiō ko ālkin an armej eo emej kar ļotak.
N̄an eļapļo̧k meļeļe ko, lale enaan kein ilo FamilySearch.org (n̄an loi ennaan kein kwoj aikuj deļo̧n̄e FamilySearch.org):
28.1.1
Kōpooj Āt ko Etan Armej ro Remej n̄an Kain̄i ko an Tampeļ
Elōn̄ kein jipan̄ ko rej pād n̄an jipan̄ membōr ro kile ro nukier remej me rej aikuji kain̄i ko n̄an kōm̧m̧ani ilo etaer (lale 25.4 im 28.3). Ritōl rein rej jipan̄ membōr ro ekkatak ekōjkan kōpooj āt ko etan ro uwaan baam̧le eo aer remej n̄an kain̄i ko an tampeļ:
-
Būreejtōnji ro an doulul eo an Elder ro im Doulul eo an Kōrā ro (lale 25.2.2).
-
Ritōl eo an ward tampeļ im menmenbwij an baam̧le (lale 25.2.3).
-
Rikapilōk ro an tampeļ im menmenbwij an baam̧le an ward (lale 25.2.4).
Ijo emaron̄, meļeļe eo n̄an kile ro uwaan baam̧le eo remej raikuj in kadeļo̧n̄i ilo FamilySearch.org m̧okta jān an kain̄i ko an tampeļ kōm̧m̧an (lale 25.4.2).
28.1.1.1
Jilkinļo̧k Etan Ro Uwaan Baam̧le eo
N̄e jilkinļo̧k āt ko n̄an kain̄i ko an tampeļ ilo etan ro remej (proxy), membōr ro rej aikuj ekkā wōt aer jilkinļo̧k āt ko etan armej ro me rej nukier.
28.1.1.2
Jilkinļo̧k Āt ko Etan Ribun̄bun̄ ro im Kumi ko Jab Kōmālim
Ilo m̧ool, membōr in Kabun̄ in rej aikuj jab jilkinļo̧k āt ko n̄an FamilySearch.org jān kumi kein rej ellaajrak:
-
Armej ro rebun̄bun̄
-
Āt ko kar aini jān jekjek ko kipel kar jab kōmālim (extraction project)
-
Rijorrāān ro jān Jewish Holocaust
N̄an meļeļe ko reļļapļo̧k, lale unin kōnono in ilo FamilySearch: “Can I do temple work for victims of the Jewish Holocaust (Imaron̄ ke kōm̧m̧an jerbal in tampeļ n̄an rijorrāān ro an Jewish Holocaust eo)?”
28.1.2
Wōn eo Emaron̄ Bōk Koņaan ilo Kain̄i ko n̄an Eo ekar Mej
Aolep membōr ro me ewōr juon aer mālim n̄an deļo̧n̄e tampeļ ekāāl emaron̄ bōk koņaan ilo peptaij ko im kapene ko n̄an eo emej. Membōr ro em̧ōj aer bōk menin letok kwojarjar eo ewōr an mālim n̄an deļo̧n̄e tampeļ ekāāl emaron̄ bōk koņaan ilo aolep kain̄i ko n̄an eo emej. Lale 26.3.
28.1.3
Membōr ro rej Bōk koņaan ro me Ewōr Ippāer Utam̧we ko ilo Ānbwin im Ļōmņak
Membōr ro ewōr utam̧we ko ippāer maron̄ kōm̧m̧an jerbal in tampeļ n̄an eo ekar mej eļan̄n̄e rej:
-
Kabwijer juon mālim n̄an deļo̧n̄e tampeļ (lale 28.1.2).
-
Ebwe jeļā eo aer n̄an meļeļe kain̄i eo.
-
Maron̄ lale er make ak rej itok ippān juon nukun ak m̧ōttan me ejjeļo̧k oktak jān e me ewōr juon an mālim n̄an deļon̄e tampeļ im emaron̄ leļo̧k jipan̄ eļan̄n̄e eaikuji.
28.1.4
Jikejuuļ
Membōr ro remaron̄ aikuj in kōm̧m̧an iien loļo̧k m̧okta jān kōm̧m̧ani kain̄i ko n̄an eo ekar mej. Lale temples.ChurchofJesusChrist.org n̄an kajjojo meļeļe ko an tampeļ kōn kepaak im men ko aikuji n̄an jikejuuļ.
28.1.5
Rijipan̄ Ukook ak Ukōt Ainikien
Lale 27.1.4.
28.1.6
Nuknuk ko n̄an Kōņaki n̄an juon Tampeļ
Lale 27.1.5.
28.1.7
Kōjparok ajri
Lale 27.1.6.
28.2
Kōm̧m̧ani Kain̄i ko an Tampeļ n̄an Armej ro raar Mej
Jekjōn kein rej kōmeļeļeik kain̄i ko me rej kōm̧m̧an ilo etan (proxy) n̄an ro remej ilo tampeļ ko. N̄an kōm̧m̧ani kain̄i ko ilo etan ro remej (proxy), juon membōr emaron̄ jerbal āinwōt ilo etan (proxy) n̄an juon armej eo ekar mej me ejja āinwōt membōr eo, n̄e em̧m̧aan enej jerbal ilo etan em̧m̧aan eo ak n̄e kōrā enej jerbal ilo etan kōrā eo.
Kain̄i ko an tampeļ n̄an eo emej ekka aer kōm̧m̧an ilo ellaajrak in:
-
Peptaij
-
Kapen
-
Ekkapit n̄an Melkisedek Priesthood eo (n̄an em̧m̧aan ro)
-
Jerbal in Ijjino eo (initiatory)
-
Bōk Menin Letok Kwojarjar
-
Liāp ko
Eļan̄n̄e kain̄i ko n̄an ro remej rej dedeļo̧k jāņ juon ellaajrak, rejjab aikuj in bar kōm̧m̧an. Rej erom jetjet kitier n̄e kaini ko kar kajjitōk kaki im̧aanļo̧k rej dedeļo̧k.
28.2.1
Peptaij ko im Kapene kōn ro Remej
Jabdewōt membōr eo ewōr juon an peba in mālim an tampeļ ekāāl maron̄ kajjitōk ippān n̄an jerbal ilo juon ak elōn̄ļo̧k jerbal in peptaij ko. Jet iaan ijjitōn̄ ko maron̄ koba:
-
N̄an bōk jikin etan ro remej (proxy) n̄an peptaij.
-
Jerbal āinwōt juon rikam̧ool n̄an ilo etan ro remej (proxy) ilo iien peptaij ko.
-
N̄an bōk jikin etan ro remej (proxy) n̄an kapene ko.
-
Jipan̄ patrion ro.
-
Elleļo̧k nuknuk im to̧o̧l ko.
-
Jipan̄ rekooti kain̄i ko an peptaij im kapene ilo computer system eo.
Eļan̄n̄e rej kōņaan, membōr ro me rej jerbal āinwōt ribōk jikin ro remej (proxies) maron̄ kāālet n̄an kōm̧m̧ani wōt peptaij ko ak kapene ko.
Rikabwijer Melkisedek Priesthood ro im pris ro ilo Priesthood eo an Aron maron̄ kajjitōk ippāer n̄an kōm̧m̧ani peptaij ko n̄an eo emej. Rikabwijer Melkisedek Priesthood ro maron̄ barāinwōt kajjitōk ippāer n̄an bōk eddo in kapen ko n̄an eo emej.
Em̧m̧aan ro wōt kar bōk menin letok kwojarjar eo maron̄ kajjitōk ippāer n̄an:
-
Jerbal āinwōt eo ej rekoot ilo jikin peptaij eo.
-
Jerbal āinwōt eo ej rekoote kapen eo.
Kumi ko kar ejaaki ko āinwōt baam̧le ko, ward ko, im stake ko me rej kōņaan bōk koņaer ilo kain̄i ko an peptaij kar jikejuuļi ippān tampeļ eo im̧aanļo̧k (lale 28.1.4). Juon ak lōn̄ļo̧k rūtto ro kōn mālim in deļo̧n̄e tampeļ ko rekāāl aikuj etal ippān kumi kein.
28.2.2
Bōk Menin Letok Kwojarjar (ekoba jerbal in ijjino (initiatory) eo)
N̄e kōm̧mane menin letok kwojarjar ko ilo etan (proxy) n̄an eo ekar mej, jidik in initiatory eo an menin letok kwojarjar eo ej jenolo̧k rekoote (lale 27.2). Jabdewōt membōr kar bōk menin letok kwojarjar eo ippān juon mālim in delo̧n̄e tampeļ emaron̄ jerbal āinwōt ilo etan ro remej (proxy) n̄an bōk kain̄i kein.
28.2.2.1
Etale KaKien ko Rej Menin Aikūj n̄an Bōk Menin Letok Kwojarjar eo
Armej eo emej aikuj in kar peptaij im kapen, jim̧or ilo mour in ak kōn ilo etan ro remej (proxy), m̧okta jān menin letok kwojarjar eo, ekoba jidik in initiatory eo, ej kōm̧m̧an ilo etan armej eo.
Jet iien, ālkin an juon armej emej kar bōk menin letok kwojarjar eo kōn ilo etan ro remej(proxy), tokālik ej lo bwe peptaij eo im kapen armej eo raar bōke ke ekar mour wōt jab maron̄ kam̧oole. Ilo jekjek in, armej eo ej aikuj in peptaij im kapen kōn ilo etan eo emej (proxy). Ejjab menin aikuj n̄an bar kōm̧m̧an menin letok kwojarjar ālkin peptaij eo im kapen eo ilo etan armej eo emej (proxy).
28.2.3
Liāp eo n̄an Ripālele eo im Liāpe eo an Ajri ro n̄an Pāāren ro
Ilo tampeļ eo, armej ro raar mej maron̄ liāp n̄an ro pāleer me raar m̧areik er ilo mour in (lale 38.4.1.3 eļan̄n̄e juon iaan ripālele ro ej mour wōt im 38.4.1.7 eļan̄n̄e ripālele ro jim̧or rej mej). Armej ro raar mej maron̄ barāinwōt kōm̧m̧an bwe ajri ro nejier remour ak remej liāp n̄an er (lale 38.4.2.2). Juon membōr eo ekar bōk menin letok kwojarjar eo kōn mālim n̄an deļo̧n̄e tampeļ ekāāl emaron̄ jerbal āinwōt ilo etan eo emej (proxy) n̄an kain̄i ko an liāp.
Kain̄i ko an peptaij, kapene, jerbal in ijjino (initiatory) eo, im menin letok kwojarjar eo ekkā aer kōm̧m̧an, jim̧or ilo mour in ak kōn ribōk jikin (proxy) m̧okta jān an juon armej mej ej liāp n̄an eo pāleen ak n̄an ro jinen im jemen (lale 28.2). Mekarta, juon armej eo ekar mej m̧okta jān an 8 iiō dettan ak eo me ekar jab wōr ruwōn ilo mour in ejjab aikuj in bōk jabdewōt bar kain̄i ko m̧okta jān an liāp n̄an ro jinen im jemen (lale 18.1, 28.3.2, im 28.3.3).
28.3
Jekjek ko Rein Juon
Jekjōn in ej kōmeļeļeik jekjek ko me jet iaan unin tōl ko ilo 28.1 maron̄ jab jerbal.
28.3.1
Ajri Jibun̄ ro Raar Mej m̧okta jān Ļotak (Ajri ro rejjan̄in ļotak im Ajri ro rej Mej Loje)
Kain̄i ko an tampeļ rejjab aikuji ak kōm̧m̧an n̄an ajri ro me remej m̧okta jān ļotak. N̄an meļele ko rellōn̄ļo̧k, lale 38.7.3
28.3.2
Ajri ro Rekar Mej m̧otka jān Ralitōk Iiō
Ajri jiddik ro rej lo̧mo̧o̧r kōn Pinmuur eo an Jisōs Kraist im “remour ilo aelōn̄ selestial in lan̄” (Katak im Bujen Ko 137:10). Kōn unin in, ejjeļo̧k peptaij ak menin letok kwojarjar ej kōm̧m̧an n̄an juon ajri eo ekar mej m̧okta jān an 8. Ijo wōt ke, liāp ko n̄an pāāren ro emaron̄ kōm̧m̧an n̄an ajri ro me raar jab ļotak ilo bujen eo ak kar jab bōk kain̄i jab eo ilo mour in (lale 18.1).
28.3.3
Armej ro Remej Ewōr Utam̧we ilo Kōļmenļo̧kjeņ
Kain̄i ko an tampeļ maron̄ kōm̧m̧ani n̄an armej eo ekar mej me kar jeļā bwe ejeļā em̧m̧an im nana (lale Katak im Bujen Ko 20:71). Kain̄i ko an tampeļ maron̄ barāinwōt kōm̧m̧ani n̄an armej ro me kar jab jeļā bwe rejeļā em̧m̧an im nana.
Eļan̄n̄e ealikkar aer jeļā bwe armej eo ekar mej ewōr utam̧we ko ilo kōļmenļo̧kjeņ im ekar jab jeļā em̧m̧an im nana, kain̄ eo de eo kōm̧m̧an ej an liāp eo n̄an pāāren ro (lale 38.2.4). Menin ej kōm̧m̧an wōt eļan̄n̄e armej eo ekar jab ļotak ilo bujen eo ak ekar jab liāp n̄an ippān ro pāāren ro an ke rekar mour wōt. Kain̄i ko jet an tampeļ rejjab aikuj ak kōm̧m̧an jekdo̧o̧n eļan̄n̄e armej eo ekar mour n̄an 8 iiō dettan.
28.3.4
Armej ro Me Rej Ļōmņak Remej
Kain̄i ko an tampeļ maron̄ kōm̧m̧ani n̄an armej eo me ļōmņake emej. Kain̄i ko rejjab maron̄ kōm̧m̧an m̧ae 10 iiō ko rej eļļāļo̧k jān iien eo armej eo kar ļōmņak emej ak kar kwaļo̧k ke emej. Kakien in ej jerbal n̄an armej ro me rej jim̧or:
-
Rej jako ilo aer mour ak rej jako ilo lom̧aļo.
-
Jakoļo̧k ilo jekjek ko ijo mej ej alikkar bōtaab ejjeļo̧k ānbwin nan̄in de kar loe.
Ilo aolep jekjek ko an armej ro rejako, kain̄i ko an tampeļ maron̄ kōm̧m̧an 110 iiō ko ālkin ļotak eo an armej eo.
Stake būreejtōn eo emaron̄ kepaakļo̧k Temple Department eo eļan̄n̄e ewōr an kajjitōk ko kōn kakien in.
28.3.5
Armej ro me Rekoot ko Aer ilo Kabun̄ in Kar Bukweļo̧k ak Em̧ōj Joļo̧ki
Eļan̄n̄e armej ro aer membōr in Kabun̄ in kar joļo̧k ak kar bōk membōr eo aer m̧okta jān aer kar mej, mālim eo an Būreejtōnji eo Kein Kajuon ej menin aikluj m̧okta jān kain̄i ko an tampeļ, ekoba kōjepļaaktok kōjeraam̧m̧an ko n̄e rej jetjet, maron̄ kōm̧m̧ani n̄an er. Juon uwaan baam̧le eo emaron̄ pukōt kōmālim in ilo juon leta n̄an Opiij eo an Būreejtōnji eo Kein Kajuon ālkin an eļļāļo̧k juon iiō jān iien eo armej eo ekar mej. Leta in ej aikuj kōmeļeļeik jekjek ko. Peba in kane ko rejjab menin aikūj. Bisop ak stake būreejtōn eo remaron̄ jipan̄ kōn kajjitōk in eļan̄n̄e aikuji.
28.3.5.1
Bar Kadeļo̧n̄ Armej ro rekar Mej Me Raar Jab Bōk Menin Letok Kwojarjar
Armej ro raar mej me raar jab bōk menin letok kwojarjar eo bōtaab ro uwaan Kabun̄ in eo aer raar bukweļo̧k etan jān kabun̄ in emaron̄ bar kadeļo̧n̄e kōn peptaij im kapen. Mālim eo an Būreejtōnji eo Kein Kajuon ej menin aikuj, āinwōt kar je ilo 28.3.5. Armej rein raar mej rejjab aikuj in bar liāp n̄an ro jineer im jemeer eļan̄n̄e raar ļotak ilo bujen eo ak liāp n̄an pāāren ro aer ilo mour in.
28.3.5.2
Bar Kōjepļaaktok Kōjeraam̧m̧an ko an Tampeļ n̄an Armej ro Me Raar Bōk Menin Letok Kwojarjar
Armej ro raar mej me raar bōk menin letok kwojarjar eo bōtaab kar joļo̧k etaer jān Kabun̄ in ak kar bukweļo̧k etaer jān kabun̄ in im raar tokālik bar kadeļo̧n̄ kōn peptaij im kapene maron̄ bōk kōjeraam̧m̧an in priesthood eo im tampeļ ko aer kōn wōt ilo kain̄i eo an kōjeraam̧m̧an ko an bar kōjepļaaktok. Armej rōt eo ejjab ekkapit n̄an ippān opiij in tōl ko an priesthood ak bar bōk naan in kain̄i eo aer, kōnke kōjeraam̧m̧an kein emōj kōm̧m̧ani kain̄i in.
Āinwōt kar je ilo 28.3.5, mālim eo an Būreejtōnji eo Kein Kajuon ej menin aikuj n̄an kōm̧m̧ane kain̄i in n̄an armej ro raar mej. N̄an meļeļe ko kōn kōm̧m̧ani kain̄i in kōn ro rej mour, lale 32.17.2