« 37. Te mau titi, te mau pāroita ’e te mau ’āma’a ta’a ’ē » Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei (2020).

« 37. Te mau titi, te mau pāroita ’e te mau ’āma’a ta’a ’ē », Buka arata’i rahi.

Te mau titi, te mau pāroita ’e te mau ’āma’a ta’a ’ē

37.0

’Ōmuara’a

E nehenehe te peresideni titi e ani ’ia ha’amauhia te mau titi, te mau pāroita, ’e te mau ’āma’a ta’a ’ē nō te tāvini i te mau melo. Nō te mau ha’amāramaramara’a nō ni’a i te ha’amaura’a i te mau ’āmuira’a ta’a ’ē i roto i te misiōni, hi’o 36.3.

E ha’amata te peresideni titi i te hō’ē anira’a ’āpī i ni’a Boundary and Leadership Proposals (Te mau anira’a nō te ’ōti’a ’e nō te fa’aterera’a). Mai te mea e’ita tāna e nehenehe e fa’a’ohipa i te rāve’a ’itenati, e nehenehe tāna e fa’auta uira mai i te mau parau nā roto i te patara’a i ni’a i te rēni tūreiara’a. Te Peresidenira’a Mātāmua ana’e te nehenehe e fa’ati’a i te anira’a.

Nō te pāturura’a i roto i te mau Hau ’Āmui nō Marite ’e Canada, ’a niuniu i te 1-801-240-1007. I rāpae i te fenua Marite ’e Canada, e niuniu i te piha tōro’a o te ārea.

37.1

Te reo o te mau pāroita ’e te mau ’āma’a

E nehenehe te peresideni titi e ani ’ia ha’amauhia hō’ē paroita ’aore rā hō’ē ’āma’a reo nō te mau melo o te titi (1) ’aita e paraparau i te reo tumu o te fenua ’aore rā, (2) ’o tē fa’a’ohipa i te reo vāvā.

E nehenehe ato’a te peresideni titi e ani ’ia ha’amauhia hō’ē pāroita ’aore rā, hō’ē ’āma’a reo nō te mau melo nō roto mai i te mau titi tāpiri mai. E fa’anaho ’e e fa’a’au māite te mau peresideni titi i te parau fa’ati’a. E riro te hō’ē o te mau titi ’ei ha’apa’o nō te reira pāroita ’aore rā, nō te reira ’āma’a.

Te mau tītaura’a raro roa nō te ha’amau i te hō’ē pāroita ’aore rā, ’āma’a reo i roto i te hō’ē titi

	Pāroita	’Āma’a
Rahira’a melo (itoito ’e te mea paruparu)	Pāroita 125	’Āma’a ’Aita e fāito raro roa
Rahira’a taea’e itoito tei mau i te Autahu’ara’a a Melehizedeka, tē ’aufau ra i te tuha’a ’ahuru ti’a, ’e e nehenehe e tāvini i roto i te mau ti’ara’a fa’atere	Pāroita 1 nō e 20 melo (itoito ’e te mea paruparu). ’Ia vai te hō’ē fāito raro roa e 15.	’Āma’a 4

Te ’ōti’a o te mau ’āmuira’a reo, ’o te mau ’ōti’a ïa o te mau pāroita, te mau ’āma’a, ’e te mau titi e vai ra.

E ’āmui te mau tamari’i ’e te feiā ’āpī o te hō’ē ’āmuira’a reo i te mau piha ha’api’ira’a o te ’āmuira’a tumu, mai te mea e hina’arohia (hi’o 29.10).

Hi’o 36.3 nō te mau ’āma’a reo i roto i te hō’ē misiōni. Hi’o 36.4.2 nō te mau arata’ira’a nō te topara’a i te i’oa o te pāroita ’e o te ’āma’a.

37.1.1

Rahira’a melo i roto i te hō’ē pāroita ’aore rā, hō’ē ’āma’a reo

Tītauhia i te mau melo ’ia ora i roto i te mau ’ōti’a o te pāroita ’aore rā, o te ’āma’a reo.
E nehenehe te mau melo e mā’iti ’ia riro ’ei melo nō te ’āmuira’a reo ’aore rā, nō tō rātou ’āmuira’a tumu.
E tu’uhia te parau melora’a o te ta’ata tāta’itahi i roto i te ’āmuira’a tāna e haere.

37.1.2

Te fa’aterera’a i roto i te hō’ē pāroita ’aore rā, te hō’ē ’āma’a reo

Te ti’ara’a mau, e pi’ihia te ’episekōpo ’aore rā, te peresideni ’āma’a ’e tōna nā tauturu i roto i te mau ’ōti’a o te ’āmuira’a reo. E nehenehe e fa’ati’a i te feiā fa’atere ’aita e ora ra i roto i te mau ’ōti’a o te ’āmuira’a, mai te mea tē ora ra rātou i roto i te titi e ha’apa’o ra i te reira.
E tītauhia te parau fa’ati’a a te Peresidenira’a Mātāmua hou ’a pi’i ai i te hō’ē ’episekōpo.
Te ti’ara’a mau, e pi’ihia te tahi atu feiā fa’atere ’e te mau ’orometua i rotopū i te mau melo o te pāroita ’aore rā, o te ’āma’a.

37.2

Te mau pāroita ’e te mau ’āma’a feiā ’āpī pa’ari ’ōtahi i roto i te hō’ē titi tumu

E nehenehe te hō’ē peresideni titi e ani ’ia ha’amauhia hō’ē pāroita ’aore rā, hō’ē ’āma’a feiā ’āpī pa’ari ’ōtahi (nō te mau melo 18–30 matahiti) mai te mea ’ua nava’i te feiā ’āpī pa’ari ’ōtahi i roto i te titi ’o tē hina’aro e haere atu i reira.

E nehenehe ato’a te hō’ē peresideni titi e ani ’ia ha’amauhia hō’ē pāroita ’aore rā, hō’ē ’āma’a nō te mau melo nō te mau titi tāpiri mai. E fa’anaho ’e e fa’a’au māite te mau peresideni titi i te parau fa’ati’a. E riro te hō’ē o te mau titi ’ei ha’apa’o nō te reira pāroita ’aore rā, nō te reira ’āma’a.

Hō’ē titi tumu tei nā ni’a iho tōna mau ’ōti’a i te hō’ē titi a te feiā ’āpī pa’ari ’ōtahi, te tanora’a, ’eiaha te reira titi e ha’amau i tāna iho ’āmuira’a feiā ’āpī pa’ari ’ōtahi.

Te mau tītaura’a raro roa nō te ha’amau i te hō’ē ’āmuira’a feiā ’āpī pa’ari ’ōtahi i roto i te hō’ē titi

	Pāroita	’Āma’a
Rahira’a melo itoito	Pāroita 125	’Āma’a 50
Rahira’a taea’e itoito tei mau i te Autahu’ara’a a Melehizedeka, tē ’aufau ra i te tuha’a ’ahuru ti’a, ’e e nehenehe e tāvini i roto i te mau ti’ara’a fa’atere	Pāroita 1 nō e 20 melo (itoito ’e te mea paruparu). 15 a’e fāito raro roa.	’Āma’a 4

Tei mātauhia, ’eiaha te mau melo o te hō’ē pāroita feiā ’āpī pa’ari ’ōtahi ’ia hau atu i te 225 melo itoito.

Hi’o 36.4.2 nō te mau arata’ira’a nō te topara’a i te i’oa o te pāroita ’e o te ’āma’a.

37.2.1

Rahira’a melo i roto i te hō’ē pāroita ’aore rā, hō’ē ’āma’a feiā ’āpī pa’ari ’ōtahi i roto i te hō’ē titi tumu

E mau melo feiā ’āpī pa’ari ’ōtahi (18-30 matahiti) e ora ra i roto i te mau ’ōti’a o te pāroita ’aore rā, o te ’āma’a feiā ’āpī pa’ari ’ōtahi.
E nehenehe te feiā ’āpī pa’ari ’ōtahi e mā’iti ’ia riro ’ei melo nō te ’āmuira’a feiā ’āpī pa’ari ’ōtahi ’aore rā, nō tā rātou ’āmuira’a tumu.
E tu’uhia te parau melora’a o te ta’ata tāta’itahi i roto i te ’āmuira’a tāna e haere.
Mai te mea e feruri te peresideni titi ē, e tauturu te reira i te hō’ē feiā ’āpī pa’ari ’ōtahi i roto i tāna titi, e nehenehe ’oia e fāri’i ’ia tauihia te parau melora’a i roto i te ’āmuira’a feiā ’āpī pa’ari ’ōtahi. ’Ia itoito ana’e mai te melo paruparu, e nehenehe ’oia e mā’iti e haere ānei ’oia i roto i te ’āmuira’a feiā ’āpī pa’ari ’ōtahi ’aore rā, e fa’aea noa i roto i te ’āmuira’a tumu.
Te mau metua feiā ’āpī pa’ari ’ōtahi (18-30 matahiti) e tamari’i tā rātou i te fare, e fa’aea noa rātou i roto i tā rātou ’āmuira’a tumu. Terā rā, e nehenehe te mau metua e ’āmui atu i roto i te mau ’ohipa ri’i a te ’āmuira’a a te feiā ’āpī pa’ari ’ōtahi.
’Eiaha te mau melo e haere i roto i te hō’ē ’āmuira’a feiā ’āpī pa’ari ’ōtahi ’ia fa’aipoipo ana’e rātou ’aore rā, ’ua ti’a tō rātou matahiti i te 31. Hi’o 37.5 nō te mau melo feiā pa’ari ’ōtahi 31–45 matahiti.

37.2.2

Ti’ara’a melo i roto i te hō’ē pāroita ’aore rā, hō’ē ’āma’a feiā ’āpī pa’ari ’ōtahi i roto i te hō’ē titi tumu

E ta’ata fa’aipoipohia te ’episekōpo ’aore rā, te peresideni ’āma’a, ’e e ta’ata ferurira’a pa’ari ’e te mau ’ite rau. E tītauhia te parau fa’ati’a a te Peresidenira’a Mātāmua hou ’a pi’i ai i te hō’ē ’episekōpo.
’Ei mau tāne taure’are’a ’aore rā, ta’ata pa’ari fa’aipoipohia nā tauturu o te ’episekōpo, ’e ’ei nā tahu’a rahi. Te ti’ara’a mau, ’ei ta’ata ’ite rau te tauturu hō’ē. ’Ei mau tahu’a rahi ’aore rā, ’ei mau peresibutero te hō’ē peresideni ’āma’a ’e tōna nā tauturu.
Te ti’ara’a mau, e pi’ihia te ’episekōpo ’aore rā, te peresideni ’āma’a ’e tōna nā tauturu i roto i te mau ’ōti’a o te ’āmuira’a feiā ’āpī pa’ari ’ōtahi. E mea ta’a ’ē ri’i nō te mau ’āmuira’a feiā ’āpī pa’ari ’ōtahi nō te fare ha’api’ira’a tuatoru ’e te tuarua.
E pi’ihia te tahi atu feiā fa’atere ’e te mau ’orometua i rotopū i te feiā ’āpī pa’ari ’ōtahi e melo nō te ’āmuira’a.

37.3

Te mau titi feiā ’āpī pa’ari ’ōtahi ’e tō rātou mau pāroita ’e te mau ’āma’a

I te vāhi e mea rahi roa te feiā ’āpī pa’ari ’ōtahi e noho ra i reira, tei mātauhia, tei pīha’i iho i te mau fare ha’api’ira’a tuatoru ’aore rā tuarua, e nehenehe e ha’amauhia hō’ē titi ’aore rā hau atu, nō te feiā ’āpī pa’ari ’ōtahi.

Te mau tītaura’a raro roa nō te fa’ati’a i te hō’ē titi, hō’ē pāroita, ’aore rā, hō’ē ’āma’a feiā ’āpī pa’ari ’ōtahi

Te titi feiā ’āpī pa’ari ’ōtahi	1 500 rahira’a melo (itoito ’e te mea paruparu) 5 pāroita
Pāroita feiā ’āpī pa’ari ’ōtahi i roto i te hō’ē titi feiā ’āpī pa’ari ’ōtahi	125 melo (itoito) 1 taea’e itoito, tei mau i te Autahu’ara’a a Melehizedeka, e ’aufau i te tuha’a ’ahuru ti’a, e nehenehe e tāvini i roto i te hō’ē ti’ara’a fa’atere nō te rahira’a e 20 melo (itoito ’e te mea paruparu). 15 a’e fāito raro roa.
’Āma’a feiā ’āpī pa’ari ’ōtahi i roto i te hō’ē titi feiā ’āpī pa’ari ’ōtahi	50 melo (itoito) 4 taea’e itoito tei mau i te Autahu’ara’a a Melehizedeka ’e e ’aufau i te tuha’a ’ahuru ti’a, e nehenehe e tāvini i roto i te mau ti’ara’a fa’atere

E nehenehe hō’ē ’āmuira’a feiā ’āpī pa’ari ’ōtahi i roto i te hō’ē titi tumu, e tu’uhia i roto i te hō’ē titi feiā ’āpī pa’ari ’ōtahi mai te mea ē :

E mea piri noa tōna mau ’ōti’a i tō te titi feiā ’āpī pa’ari ’ōtahi.
E fa’ati’a nā peresideni o nā titi e piti i te reira fa’anu’ura’a.

Hi’o 36.4.1 ’e 36.4.2 nō te mau arata’ira’a nō te topara’a i’oa o te titi ’e o te pāroita.

37.3.1

Rahira’a melo i roto i te hō’ē titi feiā ’āpī pa’ari ’ōtahi ’e tōna mau pāroita ’aore rā, te mau ’āma’a

E mau melo feiā ’āpī pa’ari ’ōtahi (18-30 matahiti) e ora ra i roto i te mau ’ōti’a o te pāroita ’aore rā, o te ’āma’a feiā ’āpī pa’ari ’ōtahi.
Te mau feiā ’āpī pa’ari ’ōtahi ato’a, te mea itoito ’e te mea paruparu, i roto i te mau ’ōti’a o te titi, ’aita e ora ra i te fare i pīha’i iho i tō rātou mau metua, e melo rātou nō te titi feiā ’āpī pa’ari ’ōtahi, maori rā, e mā’iti rātou e haere noa i roto i tā rātou ’āmuira’a tumu.
Te feiā ’āpī pa’ari ’ōtahi e ora ra i pīha’i iho i tō rātou mau metua, e nehenehe rātou e mā’iti ’ia riro ’ei melo nō te ’āmuira’a feiā ’āpī pa’ari ’ōtahi ’aore rā, nō tā rātou ’āmuira’a tumu.
E tu’uhia te parau melora’a o te ta’ata tāta’itahi i roto i te ’āmuira’a tāna e haere.
Te mau metua feiā ’āpī pa’ari ’ōtahi (18-30 matahiti) e tamari’i tā rātou i te fare, e fa’aea noa rātou i roto i tā rātou ’āmuira’a tumu. Terā rā, e nehenehe te mau metua e ’āmui atu i roto i te mau ’ohipa ri’i a te ’āmuira’a a te feiā ’āpī pa’ari ’ōtahi.
’Eiaha te mau melo e haere i roto i te hō’ē ’āmuira’a feiā ’āpī pa’ari ’ōtahi ’ia fa’aipoipo ana’e rātou ’aore rā, ’ua ti’a tō rātou matahiti i te 31. hi’o i te 37.5 nō te mau melo pa’ari ’ōtahi (31–45 matahiti).

37.3.2

Te fa’aterera’a i roto te hō’ē titi feiā ’āpī pa’ari ’ōtahi ’e tōna mau pāroita ’aore rā, mau ’āma’a

Te peresidenira’a titi, te mau melo ’āpo’ora’a teitei, te pātereāreha o te titi, te ’episekōpora’a, te peresidenira’a ’āma’a, ’e te peresidenira’a Sōtaiete Tauturu, ’ei mau melo fa’aipoipohia rātou, ma te ferurira’a pa’ari ’e te ’ite rau, e ti’a ai. E tītauhia te parau fa’ati’a a te Peresidenira’a Mātāmua hou ’a pi’i ai i te hō’ē ’episekōpo.
E nehenehe nā tauturu o te ’episekōpo ’aore rā, o te peresideni ’āma’a, ’ei mau pīahi fa’aipoipohia ’aore rā, ’ei tāne taure’are’a ’aore rā, pa’ari ri’i i fa’aipoipohia. ’Ei mau tahu’a rahi ’aore rā, ’ei mau peresibutero rātou e ti’a ai. Te ti’ara’a mau, ’ei ta’ata ’ite rau te tauturu hō’ē. ’Ei mau tahu’a rahi ’aore rā, ’ei mau peresibutero te hō’ē peresideni ’āma’a ’e tōna nā tauturu.
E nehenehe e pi’i i te peresidenira’a titi, te mau melo ’āpo’ora’a teitei, te pātereāreha titi, te mau ’episekōpora’a, te mau peresidenira’a ’āma’a, ’e te peresidenira’a Sōtaiete Tauturu i roto i te hō’ē tuha’a fenua rahi atu i te mau ’ōti’a o te titi, ’ia au i te fa’aotira’a a te Peresidenira’a Ārea. Te feiā e hōro’a i te reira mau pi’ira’a, e fārerei atu rātou i te peresideni titi o te ta’ata nā mua, nō te fāri’i i te parau fa’ati’a. Nō te mau arata’ira’a, hi’o pene 30.
E tītauhia te parau fa’ati’a a te Tino ’Ahuru Ma Piti hou ’a pi’i ai i te hō’ē pātereāreha.
I roto i te mau pāroita ’e te mau ’āma’a, e pi’ihia te tahi atu mau feiā fa’atere ’e te mau ’orometua i rotopū i te feiā ’āpī pa’ari ’ōtahi e melo nō te ’āmuira’a.

37.4

Te mau titi ’e te mau pāroita nō te pīahi i fa’aipoipohia

E nehenehe e fa’ati’a i te mau titi ’e te mau pāroita nō te pīahi i fa’aipoipohia nō te tāvini i te mau melo pīahi i fa’aipoipohia e ora ra i pīha’i iho i te fare ha’api’ira’a tuatoru ’aore rā, te fare ha’api’ira’a tuarua.

Te mau tītaura’a raro roa nō te ha’amau i te hō’ē titi ’aore rā, hō’ē pāroita nō te pīahi i fa’aipoipohia

Titi nō te pīahi i fa’aipoipohia	1 500 rahira’a melo (itoito ’e te mea paruparu) 5 pāroita
Pāroita nō te pīahi i fa’aipoipohia	125 rahira’a melo (itoito ’e te mea paruparu) 1 taea’e itoito, tei mau i te Autahu’ara’a a Melehizedeka, e ’aufau i te tuha’a ’ahuru ti’a, e nehenehe e tāvini i roto i te hō’ē ti’ara’a fa’atere nō te rahira’a e 20 melo (itoito ’e te mea paruparu). 15 a’e fāito raro roa.

Hi’o 36.4.1 ’e 36.4.2 nō te mau arata’ira’a nō te topara’a i te i’oa o te titi ’e o te pāroita.

37.4.1

Te ti’ara’a melo i roto i te mau titi ’e te mau pāroita nō te pīahi i fa’aipoipohia

Te mau melo, ’ei mau pīahi tei fa’aipoipohia e ora ra i roto i te mau ’ōti’a o te pāroita nō te pīahi i fa’aipoipohia.
E nehenehe te mau pīahi tei fa’aipoipohia e mā’iti ’ia riro ’ei mau melo nō te pāroita nō te pīahi i fa’aipoipohia ’aore rā, nō tā rātou ’āmuira’a tumu.
E tu’uhia te mau parau melora’a i roto i te ’āmuira’a e haerehia ra e te ’utuāfare.

37.4.2

Te fa’aterera’a i roto i te mau titi ’e te mau pāroita nō te pīahi i fa’aipoipohia

Hi’o 37.3.2 ’e ’a fa’a’ohipa ato’a i te reira mau arata’ira’a.

37.5

Te mau pāroita a te feiā pa’ari ’ōtahi

Te ti’ara’a mau, e tāvini-maita’i-hia a’e te mau melo pa’ari ’ōtahi (31- 45 matahiti) i roto i te mau ’āmuira’a tumu. ’Ei ta’a-’ē-ra’a, e nehenehe te hō’ē peresideni titi e ani ’ia ha’amauhia hō’ē pāroita feiā pa’ari ’ōtahi.

E nehenehe ato’a te hō’ē peresideni titi e ani ’ia ha’amauhia hō’ē pāroita nō te feiā pa’ari ’ōtahi, nō roto mai te mau melo i te mau titi tāpiri mai. E fa’anaho ’e e fa’a’au māite te mau peresideni titi i te parau fa’ati’a. E riro te hō’ē o te mau titi ’ei ha’apa’o nō te reira pāroita.

Te mau tītaura’a raro roa nō te ha’amau i te hō’ē pāroita feiā pa’ari ’ōtahi i roto i te hō’ē titi

Rahira’a melo (itoito ’e te mea paruparu)	125
Rahira’a taea’e itoito tei mau i te Autahu’ara’a a Melehizedeka, tē ’aufau ra i te tuha’a ’ahuru ti’a, ’e e nehenehe e tāvini i roto i te mau ti’ara’a fa’atere	1 nō e 20 melo (itoito ’e te mea paruparu). 15 a’e fāito raro roa.

Hi’o 36.4.2 nō te mau arata’ira’a nō te topara’a i te i’oa o te pāroita.

37.5.1

Te ti’ara’a melo i roto i te hō’ē pāroita feiā pa’ari ’ōtahi

E mau melo feiā pa’ari ’ōtahi (31–45 matahiti) e ora ra i roto i te mau ’ōti’a o te pāroita feiā pa’ari ’ōtahi.
E nehenehe te feiā pa’ari ’ōtahi e mā’iti ’ia riro ’ei melo nō te pāroita feiā pa’ari ’ōtahi ’aore rā, nō tā rātou ’āmuira’a tumu.
E tu’uhia te parau melora’a o te ta’ata tāta’itahi i roto i te ’āmuira’a tāna e haere.
Te mau metua feiā pa’ari ’ōtahi (31–45 matahiti) e tamari’i tā rātou i te fare, e fa’aea noa rātou i roto i tā rātou ’āmuira’a tumu. E nehenehe te mau metua e haere i te mau ’ohipa ri’i a te pāroita feiā pa’ari ’ōtahi.
’Eiaha te mau melo e haere i roto i te pāroita feiā ’āpī pa’ari ’ōtahi mai te mea ’ua fa’aipoipohia rātou ’aore rā, e 46 matahiti tō rātou.

37.5.2

Te fa’aterera’a i roto i te hō’ē pāroita feiā pa’ari ’ōtahi

’Ei feiā fa’aipoipohia te ’episekōpo ’e tōna nā tauturu, e ’ei mau tahu’a rahi ferurira’a pa’ari ’e te ’ite rau. E tītauhia te parau fa’ati’a a te Peresidenira’a Mātāmua hou ’a pi’i ai i te hō’ē ’episekōpo.
E pi’ihia te tahi atu feiā fa’atere ’e te mau ’orometua i rotopū i te mau ta’ata pa’ari ’ōtahi melo nō te pāroita.

37.6

Te mau pāroita ’e te mau ’āma’a nō te mau melo e orara’a ta’a ’ē tō rātou

E nehenehe te hō’ē peresideni titi e ani ’ia ha’amauhia te mau pāroita ’aore rā, te mau ’āma’a nō te mau melo e orara’a ta’a ’ē tō rātou, mai ia rātou tei roto i te mau pū ’atu’atura’a, i roto i te mau fa’anahora’a utuutura’a, ’aore rā, i roto i te mau fare tāpe’ara’a.

Te ti’ara’a mau, te feiā fa’atere e pi’ihia nō te tāvini i roto i teie mau ’āmuira’a, tē ora ra rātou i roto i te titi ha’apa’o i te ’āmuira’a.

Hi’o 36.3 nō te mau ha’amāramaramara’a nō ni’a i te mau ’āma’a i roto i te hō’ē misiōni nō te feiā ’āpī pa’ari ’ōtahi ’aore rā, te ta’ata pa’ari ’ōtahi ; te mau melo ’aita e paraparau i te reo tumu o te fenua ; te mau melo i roto i te mau pū ’atu’atura’a, te mau fa’anahora’a utuutura’a, ’aore rā, te mau fare tāpe’ara’a ; ’aore rā, te mau melo i roto i te nu’u fa’ehau.

Hi’o 36.4.2 nō te mau arata’ira’a nō te topara’a i te i’oa o te pāroita ’e o te ’āma’a.

37.7

Te mau pupu i roto i te mau titi, te mau misiōni, ’e te mau ārea

Te mau pupu, e mau putuputura’a na’ina’i o te mau melo tei ha’amanahia, tei ha’apa’ohia ’e te hō’ē ’episekōpo, peresideni ’āma’a, ’aore rā, peresideni misiōni. E nehenehe te peresideni titi ’aore rā, te peresideni misiōni e ani ’ia ha’amauhia te hō’ē pupu mai te au i te mau huru tupura’a i muri nei :

E mea fifi te rāterera’a nō te mau melo nō te putuputu i roto i te hō’ē pāroita ’aore rā, hō’ē ’āma’a.
E paraparau te tahi mau melo i te hō’ē reo ta’a ’ē atu i te reo tumu o te pāroita ’aore rā, o te ’āma’a.
E tāvini-maita’i-hia a’e te mau melo i roto i te ’āua fa’ehau nā roto i te vaira’a i roto i te hō’ē pupu (hi’o 38.10).

Nō te ani ’ia ha’amauhia te hō’ē pupu, e fa’atae te peresideni titi ’aore rā, te peresideni misiōni i te hō’ē anira’a i te Peresidenira’a Ārea. Te Peresidenira’a Ārea ana’e te nehenehe e ha’amana i te anira’a.

Tītauhia e piti a’e melo i roto i te pupu. Hō’ē e tahu’a ti’amā i roto i te Autahu’ara’a a Aarona ’aore rā, hō’ē taea’e ti’amā tei mau i te Autahu’ara’a a Melehizedeka.

I roto i te mau titi, e fa’aue te peresideni titi i te hō’ē ’episekōpo ’aore rā, hō’ē peresideni ’āma’a ’ia fanahonaho ’e ’ia ha’apa’o i te pupu. I roto i te mau misiōni, e fa’aue te peresideni misiōni i te hō’ē peresideni ’āma’a ’ia fa’anahonaho ’e ’ia ha’apa’o i te reira.

Te ti’ara’a mau, e nehenehe e ha’amau i te hō’ē pupu nō te tāvini i te mau melo e ora ra i roto i te hō’ē ’āmuira’a ’aore rā, hau atu, i roto i te hō’ē titi ’aore rā, hō’ē mata’eina’a. ’Ua fa’ata’ahia te ti’ara’a melo i roto i te pupu, nō te feiā e ora ra i roto i te mau ’ōti’a o te ’āmuira’a ’aore rā, o te mau ’āmuira’a e ’āmui mai. ’Aita te mau pupu e tāpū i te mau ’ōti’a o te titi ’aore rā, o te mata’eina’a.

E pi’i te peresideni titi, misiōni, te ’episekōpo ’aore rā te peresideni ’āma’a i te hō’ē tīa’i pupu ’e e fa’ata’a iāna. E fa’anaho ’e e arata’i te tīa’i pupu i te mau rurura’a a te pupu, ’e tae noa atu te fa’aterera’a i te ’ōro’a mo’a.

’Aita te fa’atere pupu e mau i te mau tāviri autahu’ara’a, ’e ’aita ’oia e fa’ati’ahia :

’Ia fāri’i i te mau tuha’a ’ahuru ’e te mau ō.
’Ia a’o i te mau melo nō ni’a i te mau hara rahi.
’Ia hōro’a i te mau ’ōpanira’a nō te ti’ara’a melo.
’Ia rave i te tahi atu mau ’ohipa e tītau i te mau tāviri autahu’ara’a.

Tei mātauhia, e fa’a’ohipa te mau pupu i te fa’anahora’a niu nō te ’āmuira’a (hi’o 36.6).

E tāpe’ahia te parau melora’a o te mau melo o te pupu i te pāroita ’aore rā, i te ’āma’a e ha’apa’o i te pupu.

’Aita te pū fa’aterera’a o te ’Ēkālesia e hōro’a i te hō’ē nūmera ’āmuira’a nō te mau pupu.

E nehenehe te peresideni titi ’aore rā, te peresideni misiōni e ani ’ia riro mai hō’ē pupu ’ei ’āma’a mai te mea ’ua ti’a te mau tītaura’a ato’a.

37.8

Te mau ’āmuira’a a te ’Ēkālesia i te ’āua fa’ehau

Nō te mau arata’ira’a nō ni’a i te ha’amaura’a i te mau pāroita, te mau ’āma’a ’e te mau pupu melo fa’ehau e putuputu i roto i te ’āua fa’ehau, hi’o 38.10.4.