« 8. Pupu peresibutero », Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te Mau Mahana Hope’a nei (2020).
« 8. Pupu peresibutero », Buka arata’i rahi.
8.
Pupu peresibutero
8.1
Te fā ’e te fa’anahonahora’a
E tauturu te autahu’ara’a a Melehizedeka i te mau tamari’i a te Atua ’ia fa’aineine nō te ho’i i mua i tōna aro. Tē mau nei ’oia i « te mau tāviri nō te mau ha’amaita’ira’a pae vārua ato’a o te ’Ēkālesia » (Te Ha’api’ira’a Tumui ’e te mau Fafaura’a 107:18).
Te mau tōro’a i roto i te autahu’ara’a a Melehizedeka ’o te peresibutero ïa, te tahu’a rahi, te patereareha, te Hitu ’Ahuru, ’e te ’āpōsetolo. Tē vai ra i roto i teie pene te ha’amāramaramara’a nō ni’a i te mau peresibutero ’e te mau pupu peresibutero.
8.1.1
Fā
E nehenehe te mau tāne ti’amā 18 matahiti ’e hau atu e fāri’i i te autahu’ara’a a Melehizedeka ’e ’ia fa’atōro’ahia i te tōro’a peresibutero. E rave te hō’ē tāne tei fa’atōro’ahia i terā tōro’a i te fafaura’a mo’a ’ia tauturu i te Atua ’ia fa’atupu i tāna ’ohipa (hi’o Te Ha’api’ira’a Tumu ’e te mau Fafaura’a 84:33–44).
E tuha’a te peresibutero tāta’itahi nō te hō’ē pupu tei fa’anahohia nō te feiā e mau ra i te autahu’ara’a ’e ’o tei pi’ihia te pupu peresibutero. E ’ohipa ’āmui te mau melo o te pupu peresibutero nō te tauturu i te fa’atupura’a i te ’ohipa nō te fa’aorara’a ’e nō te fa’ateiteira’a. E tāvini rātou ia vetahi ’ē, e rave i te mau hōpoi’a a te autahu’ara’a, e fa’atupu i te hō’ēra’a, ’e e tuatāpapa ’e e ora i te ha’api’ira’a tumu.
8.1.2
Te mau melo i roto i te pupu peresibutero
Hō’ē pupu peresibutero nō te pāroita tāta’itahi. Tei roto te mau taea’e i muri nei :
Te mau peresibutero ato’a i roto i te pāroita.
Te mau taea’e ato’a e tano ’ei peresibutero i roto i te pāroita (hi’o 8.4).
Te mau tahu’a rahi ato’a i roto i te pāroita, maori rā ’o rātou ’o tē tāvini nei i roto i te hō’ē peresidenira’a titi, i roto i te hō’ē ’episekōpora’a, te hō’ē ’āpo’ora’a teitei, ’aore rā ’ei patereareha. ’Ua riro teie nā feiā fa’atere ’ei mau melo nō te pupu tahu’a rahi o te titi. Nō te ha’amāramaramara’a nō ni’a i te pupu tahu’a rahi o te titi, hi’o 5.1.1.3 ’e 29.3.4.
E nehenehe te hō’ē taure’are’a tāne e ha’amata i te haere i te mau purera’a a te pupu peresibutero ’ia ti’a iāna i te matahiti 18, noa atu ē, ’aita ā ’oia i fa’atōro’ahia ’ei peresibutero. E paraparau ’oia i tōna nā metua ’e i te ’episekōpo nō te rave i teie fa’aotira’a. I te 19ra’a o te matahiti ’aore rā, hou ’a fa’aru’e ai i te fare, mai te haerera’a i te fare ha’api’ira’a tuatoru ’aore rā te tāvinira’a i te hō’ē misiōni, e fa’atōro’ahia ’oia ’ei peresibutero mai te mea ’ua ti’amā ’oia. Hi’o 10.6.
E mau taea’e e tano ’ei peresibutero te mau tāne ’o tei fa’aipoipohia i raro mai i te 18 o te matahiti ’e e mau melo ato’a rātou nō te pupu peresibutero.
Nō te ha’amāramaramara’a nō ni’a i te mau metua ’ōtahi i raro mai i te 18 matahiti, ’a hi’o 38.1.5.
I roto i te tahi mau pāroita, tē vai nei e rave rahi taea’e itoito e mau nei i te autahu’ara’a a Melehizedeka. Nō teie mau pāroita, e nehenehe te peresidenira’a titi e fa’anaho i te tahi atu ā pupu peresibutero (hi’o Te Ha’api’ira’a Tumu ’e te mau Fafaura’a 107:89). Te pupu tāta’itahi tāna peresidenira’a. Mai te mea e nehenehe, e tu’uhia i roto i te pupu tāta’itahi te mau melo nō te mau matahiti rau ’e te mau ’ite rau.
8.2
’Āmuira’a i roto i te ’ohipa nō te fa’aorara’a ’e te fa’ateiteira’a.
Tē ani nei te Atua i te mau ta’ata ato’a ’ia haere mai i te Mesia ra ’e ’ia ’āmui mai i roto i te ’ohipa nō te fa’aorara’a ’e te fa’ateiteira’a nā roto i :
Te orara’a i te ’evanelia a Iesu Mesia.
Te utuutura’a i te feiā nava’i ’ore.
Te anira’a i te mau ta’ata ato’a ’ia fāri’i i te ’evanelia.
Te tāhō’ēra’a i te mau ’utuāfare nō te tau mure ’ore.
E fa’anaho te feiā fa’atere o te pupu peresibutero i te mau purera’a i te sābati, te mau ’ātivite, te aupurura’a, te tāvinira’a, ’e te tahi atu mau ’ohipa rau nō te tauturu i te mau taea’e ’ia ’āmui mai i roto i te ’ohipa o te fa’aorara’a ’e te fa’ateiteira’a. E ha’a te mau melo nō te pupu peresibutero ’e te Sōtaiete Tauturu nā roto i te hō’ēra’a nō te fa’aoti i teie ’ohipa.
Nō te ha’amāramaramara’a hau atu nō ni’a i te ’ohipa nō te fa’aorara’a ’e te fa’ateiteira’a, ’a tuatāpapa i te pene 1.
8.2.1
Te orara’a i te ’evanelia a Iesu Mesia
E tauturu te feiā fa’atere o te pupu peresibutero i te mau melo ’ia ora i te ’evanelia a Iesu Mesia. E tūra’i rātou i te parau nō te fa’a’ohipara’a i te fa’aro’o, te tātarahapara’a, te fa’arahira’a i te fa’arava’ira’a iāna iho, ’e te ravera’a i te mau fafaura’a ’e te Atua nā roto i te fāri’ira’a i te mau ’ōro’a. Tei roto te ’ōro’a hiero i teie mau ’ōro’a. Hi’o 1.2.1.
8.2.1.1
Te ha’api’ira’a i te ’evanelia i te fare
’Ia ha’api’i ana’e ’e ’ia ora ana’e te mau melo i te ’evanelia i te fare, e hōhonu atu ā tō rātou fa’afāriura’a i te Metua i te ao ra ’e ia Iesu Mesia. E fa’aitoito te feiā fa’atere o te pupu peresibutero i te mau taea’e ’ia tuatāpapa i te mau pāpa’ira’a mo’a ’e i te mau parau a te mau peropheta ora, te ta’ata hō’ē ’e tō rātou ’utuāfare ato’a. E fa’ananea te Mai, peʼe mai—nō te ta’ata hō’ē ʼe te ʼutuāfare ’e te tahi atu mau rāve’a tauturu i tā rātou tuatāpaparaʼa.
Te mau purera’a pō ’utuāfare ’o te hō’ē ïa rāve’a faufa’a roa nō te ha’api’i i te ’evanelia i te fare. E mea mātauhia ’ia fa’atupu te reira i te hepetoma tāta’itahi, i te sābati, i te pō monire, ’aore rā, i te tahi atu taime. E nehenehe tā rātou e rave ato’a i te pure, te tuatāpapara’a ’evanelia, te mau ’itera’a pāpū, te mau hīmene ’e te mau ’ātivite ’ārearea.
8.2.1.2
Te ’apora’a i te ’evanelia i roto i te mau rurura’a a te pupu autahu’ara’a
E ruru te mau pupu peresibutero i te mau sābati nō te mau ’ōpuara’a i muri nei :
Ha’apūai i te fa’aro’o.
Patu i te hō’ēra’a.
Ha’apūai i te mau ’utuāfare ’e te mau nohora’a.
Ha’amau i te mau fa’anahora’a nō te tauturu i te rave-fa’aoti-ra’a i te ’ohipa o te fa’aorara’a ’e te fa’ateiteira’a.
E fa’atupuhia te mau rurura’a i te piti ’e te maha o te sābati o te ’āva’e. 50 minuti te maoro. Nā te peresidenira’a o te pupu peresibutero e fa’anaho i teie mau rurura’a. Nā te hō’ē melo nō te peresidenira’a e arata’i.
E ha’amata te rurura’a nā roto i te arata’ira’a a te hō’ē melo o te peresidenira’a i te mau ’ohipa ato’a a te pupu autahu’ara’a. ’Ei hi’ora’a, e nehenehe te pupu e paraparau ’āmui nō ni’a i te huru ravera’a i te ’ohipa nō te fa’aorara’a ’e te fa’ateiteira’a. E vaiihohia ma’a taime rava’i maita’i nō te tahi ha’api’ira’a ’evanelia au mau ’e te ’āparaura’a.
E fa’atumu te mau rurura’a a te pupu autahu’ara’a i ni’a i te mau tumu parau o te hō’ē ’aore rā e rave rahi a’ora’a, nō roto mai i te ’āmuira’a rahi i tupu a’enei. E mā’iti te peresidenira’a pupu peresibutero nā roto i te pure, i te mau a’ora’a e tuatāpapa, ’ia au i te mau hina’aro o te mau melo. E nehenehe e hīmene i te mau hīmene nō te ha’afaufa’a i te hō’ē ha’api’ira’a. E mea ti’a i te mau rurura’a ’ia fa’aotihia nā roto i te hō’ē pure.
Nō te ha’amāramaramara’a hau atu, ’a hi’o ComeFollowMe.ChurchofJesusChrist.org.
8.2.1.3
Te mau ’ātivite
E nehenehe te mau peresidenira’a pupu peresibutero e fa’anaho i te mau ’ātivite. E ha’apūai teie mau ’ātivite i te mau melo o te pupu autahu’ara’a ’e e hōro’a ia rātou i te mau rāve’a nō te tāvini ’āmui. E fa’atupuhia te rahira’a o te mau ’ātivite i te mau taime ta’a ’ē atu i te mau sābati ’e i te mau pō monirē.
Nā te peresideni o te pupu peresibutero e hi’opo’a i teie mau ’ātivite. E nehenehe ’oia e ani i te hō’ē tauturu ’aore rā i te tahi atu melo o te pupu ’ia arata’i i te reira fa’anahora’a ’e te fa’atupura’a i te reira (hi’o 8.3.5). E paraparau te mau peresidenira’a nō te mau ’ātivite ’e te ’episekōpo, i roto i te fa’aineinera’a i te reira.
8.2.2
Ha’apa’ora’a i te feiā nava’i ’ore
’Ei feiā pe’e ia Iesu Mesia, e hōpoi’a nā te mau melo o te pupu peresibutero ’ia toro i te rima ma te here i te feiā i roto i te fifi. ’Ei ta’ata hō’ē ’e ’ei pupu, e ’imi rātou i te mau rāve’a nō te tāvini ia vetahi ’ē i roto i te pāroita ’e te huira’atira. I te vahi e vai ra, e fa’a’ite mai te JustServe.org i te mau rāve’a tāvinira’a i te huira’atira.
Nō te tahi atu ha’amāramaramara’a e nāhea te mau melo o te pupu peresibutero ’e te Sōtaiete Tauturu e ha’apa’o i te feiā i roto i te fifi, ’a hi’o 22.2.4.
8.2.2.1
Te aupururaʼa
Te aupurura’a, ’o te ha’apa’ora’a ïa ia vetahi ’ē mai tā te Fa’aora e nā reira. E fāri’i te mau melo o te pupu peresibutero i te mau fa’auera’a nō te aupurura’a mai roto mai i te peresidenira’a pupu. Nō te tahi atu ha’amāramaramara’a, ’a hi’o pene 21.
8.2.2.2
Te mau hina’aro tau poto
E ’imi te mau taea’e aupuru ’ia māramarama ’e ’ia pāhono i te mau hina’aro o te feiā tā rātou e tāvini ra. E tītau paha te mau melo i te tauturu tau poto noa, i te taime nō te ma’i, te fānaura’a, te pohera’a, te ’erera’a i te ’ohipa, ’e te tahi atu mau fifi o te orara’a.
Mai te mea e tītauhia, e ani te mau taea’e aupuru i te tauturu i te peresidenira’a pupu peresibutero. Nā roto i te parau fa’ati’a a te ’episekōpo, e pi’i te peresidenira’a i te hō’ē ti’a’au nō te ’ohipa tāvinira’a, nō te fa’anaho i taua mau tauto’ora’a (hi’o 8.3.5).
E tauto’o ’āmui te pupu peresibutero ’e te Sōtaiete Tauturu nō te pāhono i te mau hina’aro tau poto (hi’o 22.2.4.1). E nehenehe te ’episekōpo e hōro’a i te tauturu ha’apaera’a mā’a rū mai te mea e tītauhia.
I te tahi mau vāhi, e rāve’a tā te mau ’episekōpo nō te fa’afāna’o i te mau melo i roto i te fifi, te parau poro’ira’a tao’a a te ’episekōpo, nō te mā’a ’e nō te tahi atu mau tauiha’a tumu. I te rahira’a o te taime, e fa’aue te ’episekōpo i te peresideni o te Sōtaiete Tauturu ’ia fārerei i te mau melo ’e ’ia fa’a’ī i te parau poro’ira’a tao’a. Terā rā, e nehenehe ato’a tāna e fa’aue i te peresideni o te pupu peresibutero. E nehenehe te hō’ē tauturu i roto i te peresidenira’a o te Sōtaiete Tauturu ’aore rā pupu peresibutero e fa’auehia mai te mea e’ita te peresideni e vata. E fa’atae atu teie ta’ata fa’atere tei fa’auehia i te parau poro’ira’a tao’a tei fa’a’īhia i te ’episekōpo ra nō tāna parau fa’ati’a.
Nō te ha’amāramaramara’a hau atu, ’a hi’o 22.6.4.3 ’e te « Mau rāve’a tōtauturu » i roto i te fa’anahora’a nō te mau ti’a fa’atere ’e te mau pāpa’i parau (DDG).
8.2.2.3
Te mau hina’aro tau maoro ’e te fa’arava’ira’a iāna iho
I raro a’e i te arata’ira’a a te ’episekōpo, e tauturu te mau peresidenira’a o te pupu peresibutero ’e te Sōtaiete Tauturu i te mau melo i roto i tō rātou mau hina’aro tau maoro ’e te fa’arava’ira’a ia rātou iho. E ha’api’i rātou i te mau parau tumu o te fa’arava’ira’a iāna iho, i te pae tino ’e i te pae vārua. ’A hi’o te pene 22 ’e « Te fa’arava’ira’a iāna iho » i roto i te fa’anahora’a Vaira’a buka ’evanelia.
Mai te mea e hina’aro te hō’ē ta’ata ’aore rā te hō’ē ’utuāfare i te tauturu, e paraparau ’āmui te mau peresideni o te pupu peresibutero ’e te Sōtaiete Tauturu i raro a’e i te arata’ira’a a te ’episekōpo nō ni’a i te huru e tauturu atu (hi’o 22.6.3).
E tauturu te peresideni pupu peresibutero, te peresideni o te Sōtaiete Tauturu, ’aore rā te tahi atu ta’ata fa’atere i te ta’ata ’aore rā i te ’utuāfare ’ia ha’amau i te hō’ē ’ōpuara’a fa’arava’ira’a iāna iho. E nehenehe ato’a te mau taea’e ’aore rā te mau tuahine aupuru e tauturu i teie ’ōpuara’a. Pinepine te tahi atu mau melo o te pupu peresibutero ’aore rā o te Sōtaiete Tauturu e vai ra tō rātou ’aravihi ’e tō rātou ’ite ’o tē nehenehe e tauturu. Te mau ta’ata ato’a e tauturu mai, ’ia tāpe’a ’ōmo’e maita’i rātou i te mau ’ohipa e tupu e ti’a ai. Nō te ha’amāramaramara’a hau atu, ’a hi’o 22.2.4.2 ’e 22.2.4.5.
8.2.2.4
’Ia pohe te hō’ē melo o te pāroita
’Ia pohe te hō’ē melo o te pāroita, e fa’atae te mau peresidenira’a o te pupu peresibutero ’e te Sōtaiete Tauturu i te tāmāhanahanara’a ’e te tauturura’a. I raro a’e i te fa’aterera’a a te ’episekōpo, e nehenehe rātou e tauturu i te ’ōro’a hunara’a.
Mai te mea e nehenehe, e hunahia te mau ta’ata pohe tei fāri’i i tō rātou ’ōro’a hiero i roto i tō rātou ’ahu hiero. E ani te ’episekōpo i te peresideni pupu peresibutero ’ia fa’aue i te hō’ē taea’e ’o tei fāri’i i tōna ’ōro’a hiero ’ia fa’a’ahu ’aore rā ’ia hi’opo’a i te fa’a’ahura’a o te taea’e haere hiero tei pohe. Nō te tahi atu ha’amāramaramara’a, ’a hi’o 27.3.9.
E tāmau noa te mau peresidenira’a pupu peresibutero ’e te Sōtaiete Tauturu, te mau taea’e ’e te mau tuahine aupuru, ’e vetahi i te fa’atae i te tāmāhanahanara’a ’e te tauturura’a i muri mai i te ’ōro’a hunara’a.
8.2.3
Anira’a i te mau ta’ata ato’a ’ia fāri’i i te ’evanelia
E hōpoi’a nā te mau taea’e tei mau i te autahu’ara’a a Melehizedeka ’ia ani i te mau ta’ata ato’a ’ia fāri’i i te mau ha’amaita’ira’a o te ’evanelia a Iesu Mesia (hi’o Te Ha’api’ira’a Tumu ’e te mau Fafaura’a 53:3). Tē rave nei rātou i te reira nā roto i te fa’a’itera’a i te ’evanelia, te ha’apūaira’a i te mau melo ’āpī, ’e te haerera’a e fa’aitoito i te feiā paruparu.
I roto i te mau rurura’a peresidenira’a ’e te pupu autahu’ara’a, e paraparau te peresidenira’a pupu peresibutero i te mau rāve’a e nehenehe ai te mau taea’e e ani i te mau ta’ata ato’a ’ia fāri’i i te mau ha’amaita’ira’a o te ’evanelia.
E fa’aue te peresideni o te pupu peresibutero i te hō’ē melo nō te peresidenira’a ’ia tauturu i te arata’i i te ’ohipa misiōnare i roto i te pāroita. E ’ohipa ’oia ’e te melo o te peresidenira’a Sōtaiete Tauturu ’o tei fa’auehia e fa’aau i teie mau tauto’ora’a.
E ti’a i teie melo o te peresidenira’a pupu peresibutero ’ia rave i te ’ohipa a te fa’atere misiōni pāroita. Mai te mea ’ua pi’i te ’episekōpora’a i te hō’ē fa’atere misiōni pāroita, e hi’opo’a teie melo nō te peresidenira’a i tāna ’ohipa. Hi’o 23.1.1 ’e te 23.1.3.
E arata’i te melo o te peresidenira’a pupu peresibutero tei fa’auehia, ’e te fa’atere misiōni pāroita (mai te mea ’ua pi’ihia), i te mau ’āparaura’a ri’i poto nō te fa’aau i te ’ohipa tītaura’a i te mau ta’ata ato’a ’ia fāri’i i te mau ha’amaita’ira’a o te ’evanelia. E fa’atupuhia teie mau ’āparaura’a i te hepetoma tāta’itahi. E ’āmui ato’a mai te melo nō te peresidenira’a o te Sōtaiete Tauturu, te mau misiōnare pāroita, hō’ē tauturu nō te pupu tahu’a, hō’ē melo nō te peresidenira’a piha feiā ’āpī tamāhine pa’ari a’e, ’e te mau misiōnare rave tāmau.
8.2.4
Tāhō’ēra’a i te mau ’utuāfare nō te tau mure ’ore
E pāturu te feiā tei mau i te autahu’ara’a a Melehizedeka i te mau melo i roto i te tāhō’ēra’a i te mau ’utuāfare nō te tau mure ’ore. ’Oia ho’i :
Te ravera’a i te mau fafaura’a ’e te Atua nā roto i te fāri’ira’a i te mau ’ōro’a, tae noa atu te ’ōro’a hiero.
Te ravera’a i te ’ohipa hiero ’e te ’ā’amu ’utuāfare (hi’o 1.2.4).
I roto i te peresidenira’a ’e te mau rurura’a a te pupu, e paraparau te peresidenira’a pupu peresibutero i te mau rāve’a e nehenehe ai i te mau taea’e ’ia ’āmui mai i roto i teie mau tauto’ora’a.
E fa’aitoito te peresidenira’a i te mau melo o te pupu ’ia tuatāpapa i tō rātou ’ā’amu ’utuāfare, nā reira ato’a te mau fafaura’a ’e te mau ’ōro’a o te hiero. E fa’aitoito ato’a rātou i te mau taea’e ’ia haere tāmau noa i te hiero, i te mau vāhi e nehenehe.
E fa’aue te peresideni o te pupu peresibutero i te hō’ē melo nō te peresidenira’a ’ia tauturu i te arata’i i te ’ohipa hiero ’e te ’ā’amu ’utuāfare i roto i te pāroita. E ’ohipa ’oia ’e te melo o te peresidenira’a o te Sōtaiete Tauturu ’o tei fa’auehia nō te fa’aau i teie mau tauto’ora’a.
E nehenehe teie melo o te peresidenira’a pupu peresibutero e amo i te ti’ara’a o te ti’a fa’atere nō te ’ohipa hiero ’e te ’ā’amu ’utuāfare o te pāroita. Mai te mea ’ua pi’i te ’episekōpora’a i te hō’ē ti’a fa’atere nō te ’ohipa hiero ’e te ’ā’amu ’utuāfare, e hi’opo’a teie melo nō te peresidenira’a i tāna ’ohipa. Hi’o 25.4.1.
E arata’i te melo o te peresidenira’a pupu peresibutero tei fa’auehia, ’e te ti’a fa’atere nō te ’ohipa hiero ’e te ’ā’amu ’utuāfare o te pāroita (mai te mea ’ua pi’ihia), i te mau ’āparaura’a ri’i poto nō te fa’aau i te ’ohipa hiero ’e te ’ā’amu ’utuāfare. E rave tāmauhia teie mau ’āparaura’a. E ’āmui ato’a mai te melo o te peresidenira’a Sōtaiete Tauturu tei fa’auehia, hō’ē tauturu o te pupu tahu’a, hō’ē melo nō te peresidenira’a Feiā ’Āpī Tamāhine pa’ari roa a’e, ’e te mau tauturu o te ’ohipa hiero ’e te ’ā’amu ’utuāfare.
8.3
Te feiā fa’atere nō te pupu peresibutero
8.3.1
Te peresidenira’a titi ’e te ’episekōpo
Tei raro a’e te peresideni pupu peresibutero i te ti’a’aura’a a te peresidenira’a titi. E fārerei tāmau ’oia i te hō’ē melo o te peresidenira’a nō te fāri’i i te arata’ira’a ’e te mau parau fa’a’ite nō ni’a i tāna mau hōpoi’a.
E fāri’i ato’a te peresideni pupu peresibutero i te arata’ira’a nō ’ō mai i te ’episekōpo ra, ’o ’oia ho’i te fa’atere peresideni i roto i te pāroita. E fārerei pinepine rāua. E ’āparau rāua i te ’ohipa nō te fa’aorara’a ’e te fa’ateiteira’a, ’e tae noa atu i te ’ohipa aupurura’a a te mau taea’e. E ’āparau ato’a rāua (1) te haerera’a i mua ’e te mau hina’aro o te mau melo o te pāroita ’e (2) te mau rurura’a a te pupu peresibutero, te ha’api’ira’a ’e te mau ’ātivite.
8.3.2
Te melo ’āpo’ora’a teitei
E fa’aue te peresidenira’a titi i te hō’ē melo o te ’āpo’ora’a teitei ’ia mono ia rātou i roto i te pupu peresibutero tāta’itahi. ’Ua fa’ata’ahia tāna mau hōpoi’a i roto i te 5.3.1.
8.3.3
Peresidenira’a pupu peresibutero
8.3.3.1
Te pi’ira’a i te hō’ē peresidenira’a pupu peresibutero
I muri a’e i te ’āparaura’a i te ’episekōpo, e pi’i te peresideni titi i te hō’ē peresibutero ’aore rā i te tahu’a rahi nō te tāvini ’ei peresideni pupu peresibutero.
Mai te mea ’ua nava’i te pupu, e hōro’a te peresideni pupu peresibutero i te peresideni titi hō’ē ’aore rā piti i’oa peresibutero ’e ’aore rā tahu’a rahi, nō te tāvini ’ei tauturu nōna. E rave ’oia i te reira nā roto i te ’āparaura’a i te ’episekōpo. E hi’opo’a te peresidenira’a titi i te mau anira’a. E fa’atae atu te hō’ē melo o te peresidenira’a titi ’aore rā te melo ’āpo’ora’a teitei, i te mau pi’ira’a.
E tītauhia te parau fa’ati’a a te peresidenira’a titi ’e a te ’āpo’ora’a teitei nō te mau anira’a ato’a nō te pi’i i te mau melo o te peresidenira’a pupu peresibutero.
E vauvau atu te hō’ē melo o te peresidenira’a titi i te mau melo o te peresidenira’a pupu peresibutero i roto i te hō’ē purera’a ’ōro’a nō te pāturura’a. E nehenehe ato’a te peresideni titi e fa’ata’a i te hō’ē melo nō te ’āpo’ora’a teitei ’ia rave i te reira ’ohipa.
E vauvau te hō’ē melo nō te peresidenira’a pupu peresibutero i te mau taea’e tei pi’ihia i te tahi atu mau pi’ira’a pupu nō te pāturura’a i roto i te hō’ē rurura’a a te pupu (hi’o 8.3.4 ’e 8.3.5).
Nā te peresideni titi e fa’ata’a i te peresideni pupu peresibutero ’e e hōro’a iāna i te mau tāviri nō tōna pi’ira’a. Nō te tahi atu ha’amāramaramara’a nō ni’a i te mau tāviri o te autahu’ara’a, ’a hi’o 3.4.1. Nā te hō’ē melo nō te peresidenira’a titi ’aore rā nō te ’āpo’ora’a teitei e fa’ata’a i te mau tauturu.
8.3.3.2
Mau hōpoi’a
Teie i muri nei te mau hōpoi’a a te peresideni pupu peresibutero. E tauturu tōna nā tauturu iāna.
E tāvini ’oia i roto i te ’āpo’ora’a pāroita. E tāvini ’oia ’ei (1) melo nō te ’āpo’ora’a ’o tē tauturu i te pāhonora’a i te mau hina’aro i roto i te pāroita ’e ’o te ’imi mai i te mau rāve’a ’e (2) ’ei ti’a nō te pupu peresibutero (hi’o 7.6.1).
E arata’i ’oia i te mau tauto’ora’a a te pupu nō te ’āmui mai i roto i te ’ohipa o te fa’aorara’a ’e te fa’ateiteira’a (hi’o pene 1).
E fa’anaho ’e e hi’opo’a ’oia i te ’ohipa aupurura’a a te mau taea’e. E fa’aau ’oia i te mau ’ohipa aupurura’a ’e te peresidenira’a Sōtaiete Tauturu, ma te ruru ia rātou i te tau toru ’āva’e ato’a. E tītau ’oia i te parau fa’ati’a a te ’episekōpo nō te mau fa’auera’a aupurura’a. E rave ’oia i te mau uiuira’a aupurura’a hō’ē a’e taime i te tau toru ’āva’e. Hi’o pene 21.
I raro a’e i te fa’aterera’a a te ’episekōpo, e ’āparau ’oia i te mau melo pa’ari o te pāroita nō ni’a i te mau ’ohipa ta’a ’ē atu i te hōpoi’a a te ’episekōpo, mai te ti’a-mā-ra’a, te hāmani-’ino-ra’a, ’e te parau fa’ati’a ’ia fa’a’ohipa i te moni ha’apaera’a mā’a. Hi’o CounselingResources.ChurchofJesusChrist.org.
’Āpitihia mai e te peresidenira’a Sōtaiete Tauturu, e tauturu ’oia ’ia arata’i i te mau tauto’ora’a i roto i te pāroita nō te ani manihini i te mau ta’ata ato’a ’ia fāri’i i te mau ha’amaita’ira’a o te ’evanelia (hi’o 9.2.3). E ha’apa’o ’oia i te fa’atere misiōni pāroita mai te mea ē, ’ua pi’ihia te hō’ē ta’ata.
’Āpitihia e te peresidenira’a Sōtaiete Tauturu, e tauturu ’oia i te arata’ira’a i te ’ohipa hiero ’e te ’ā’amu ’utuāfare i roto i te pāroita (hi’o 9.2.4). E ha’apa’o ’oia i te fa’atere ’ohipa hiero ’e te ’ā’amu ’utuāfare mai te mea ē, ’ua pi’ihia te hō’ē ta’ata.
E fa’aau ’oia i te mau tauto’ora’a a te pupu peresibutero nō te ha’apūai i te mau taea’e feiā ’āpī pa’ari, te ta’ata ’ōtahi ’e tei fa’aipoipo.
E fārerei ’oia i te melo tāta’itahi o te pupu, hō’ē a’e taime i te matahiti. E ’āparau ’oia i te mau hōpoi’a a te autahu’ara’a ’e i te maita’i o te melo ’e tōna ’utuāfare.
E ha’api’i ’oia i te mau melo o te pupu i tā rātou mau ’ohipa nō te autahu’ara’a (hi’o Te Ha’api’ira’a Tumu ’e te mau Fafaura’a 107:89). Tei roto ato’a te ha’api’ira’a ia rātou nāhea ’ia fa’a’ohipa i tō rātou autahu’ara’a nō te ravera’a i te mau ’ōro’a ’e te mau ha’amaita’ira’a.
E ha’apa’o ’e e tauturu ’oia i te ha’amaita’ira’a i te ha’api’ira’a i roto i te pupu (hi’o pene 17).
E fa’anaho ’e e fa’atere ’oia i te mau rurura’a a te pupu.
E ha’apa’o ’oia i te mau ’ātivite a te pupu peresibutero (hi’o 8.2.1.3).
E tauturu ’oia i te feiā ’āpī tamāroa ’e te mau taea’e e tano ’ei peresibutero ’ia fa’aineine nō te fāri’i i te autahu’ara’a a Melehizedeka (hi’o 8.4).
E ha’apa’o ’oia i te mau pāpa’a parau a te pupu, te mau parau fa’a’ite, ’e te mau faufa’a moni (hi’o LCR. ChurchofJesusChrist.org). E nehenehe te hō’ē pāpa’i parau e tauturu (hi’o 8.3.4).
Nā te peresidenira’a titi ’e te mau melo o te ’āpo’ora’a teitei tei fa’ata’ahia e ha’api’i i te peresidenira’a pupu peresibutero nō ni’a i teie mau hōpoi’a. E nehenehe tā rātou e rave i te reira i roto i te mau rurura’a feiā fa’atere autahu’ara’a a te titi ’e te mau rurura’a peresidenira’a pupu (hi’o 29.3.3).
Nā roto i tāna tāvinira’a, e turu te peresideni pupu peresibutero i te ’episekōpo nō te fa’atumu i ni’a i te feiā ’āpī ’e i ni’a i te mau hōpoi’a hō’ē roa a te ’episekōpo.
8.3.3.3
Rururaʼa a te peresideniraʼa
E ruru tāmau te peresidenira’a pupu peresibutero ’e te pāpa’i parau. Nā te peresideni e arata’i i te reira rurura’a. E ’āmui ato’a mai te melo ’āpo’ora’a teitei i fa’auehia, i terā taime ’e terā taime.
Teie te mau mea e nehenehe e tu’uhia i roto i te tāpura ’ohipa :
Fa’anaho nāhea ’ia ha’apūai i te mau melo o te pupu (’oia ato’a te mau taea’e e tano ’ei peresibutero) ’e tae noa atu i tō rātou ’utuāfare.
Fa’anaho nāhea ’ia tauturu i te rave-fa’aoti-ra’a i te ’ohipa o te fa’aorara’a ’e te fa’ateiteira’a.
Fa’aau i te ’ohipa misiōnare ’e te ’ohipa hiero ’e te ’ohipa ’ā’amu ’utuāfare.
Pāhono i te parau a’o ’e te mau fa’auera’a a te ’episekōpo.
Pāhono i te mau fa’auera’a nō roto mai i te mau rurura’a ’āpo’ora’a pāroita.
Feruri nā roto i te pure i te mau fa’auera’a aupurura’a.
Hi’o fa’ahou i te mau parau fa’a’ite nō roto mai i te mau uiuira’a aupurura’a. Fa’anaho i te mau rāve’a nō te ’ite mai i te mau vāhi pūai ’e e tauturu i te pāhonora’a i te mau hina’aro. (Hi’o pene 21).
Feruri i te mau taea’e nō te tāvini i roto i te mau pi’ira’a ’e te mau fa’auera’a.
Fa’anaho i te mau rurura’a pupu autahu’ara’a ’e te mau ’ātivite.
8.3.4
Pāpa’i parau
Nā roto i te parau fa’ati’a a te ’episekōpo, e pi’i te hō’ē melo nō te peresidenira’a pupu peresibutero i te hō’ē melo nō te pupu ’ia riro ’ei pāpa’i parau nō te pupu. E tu’u ’oia iāna nō te pāturura’a i roto i te hō’ē rurura’a pupu autahu’ara’a ’e e fa’ata’a iāna.
Teie te tahi o te mau hōpoi’a a te pāpa’i parau i muri nei :
Fa’aineine i te mau tārena nō te mau rurura’a a te peresidenira’a ’e te mau rurura’a pupu autahu’ara’a.
Pāpa’i i te mau mea e paraparauhia i roto i te mau rurura’a ’e ’ia hi’opo’a i te mau fa’auera’a ’ohipa.
Fa’aineine i te mau uiuira’a aupurura’a (hi’o 21.4).
Fa’aineine ’e e hāpono i te mau parau fa’a’ite tau toru ’āva’e nō te taera’a mai o te mau ta’ata i te mau rurura’a ’e te rahira’a uiuira’a aupurura’a i ravehia.
Tauturu ’ia fa’aineine i te hō’ē tāpura faufa’a nō te matahiti ’e ’ia hi’opo’a i te mau ha’amāu’ara’a (hi’o 34.7).
8.3.5
Te tahi atu mau pi’ira’a
E riro paha te mau pi’ira’a i muri nei i te tauturu i te ’ohipa. E ’āparau te ’episekōpo ’e te peresideni pupu peresibutero e mea tītauhia ānei te reira.
Te mau ’orometua ha’api’i nō te pupu peresibutero, nō te ha’api’i i roto te mau rurura’a a te pupu i te sābati
Te ta’ata fa’anaho tāvinira’a, nō te tauturu ’ia fa’anaho ’e ’ia fa’atupu i te ’ohipa tāvinira’a i te mau ta’ata i roto i te fifi (hi’o 8.2.2.2). E nehenehe te mau rima tauturu ’e te mau melo tōmite e pi’i-ato’a-hia.
Te ta’ata fa’anaho i te ’ātivite, nō te tauturu ’ia fa’anaho ’e ’ia fa’atupu i te mau ’ātivite a te pupu peresibutero (hi’o 8.2.1.3). E nehenehe te mau rima tauturu ’e te mau melo tōmite e pi’i-ato’a-hia.
Te mau tauturu pāpa’i parau, nō te tauturu i te pāpa’i parau o te pupu peresibutero
Te mau pāpa’i parau nō te ’ohipa aupurura’a, nō te fa’anaho i te mau uiuira’a aupurura’a ’e nō te tauturu ’ia fa’aineine i te mau parau fa’a’ite nō te tau toru ’āva’e
Mai te mea e hina’arohia te reira ’e ’aore rā te tahi atu mau pi’ira’a, e tu’u te peresidenira’a pupu peresibutero i te i’oa o te mau taea’e nō te tāvini. E fa’atae rātou i teie mau i’oa i te ’episekōpora’a. Mai te mea e ha’amana te ’episekōpora’a, e pi’i te hō’ē melo o te peresidenira’a o te pupu ia rātou. E tu’u ’oia ia rātou nō te pāturura’a i roto i te hō’ē rurura’a pupu autahu’ara’a ’e e fa’ata’a ia rātou.
Mai te mea e hina’arohia, e nehenehe te peresidenira’a pupu peresibutero e fa’ata’a i te mau taea’e nō te tauturu i te mau tauto’ora’a a te pupu peresibutero nā roto i te tahi atu mau rāve’a. Nō te mau taea’e e fa’auera’a tau poto, ’aita e faufa’a ’ia pi’ihia ’e ’ia fa’ata’ahia.
8.4
Tauturura’a i te mau taea’e e tano ’ei peresibutero ’ia fāri’i i te autahu’ara’a a Melehizedeka
Te taea’e e tano ’ei peresibutero ’o te hō’ē ïa tāne e melo nō te ’Ēkālesia ’o tei ’ore i fāri’i i te autahu’ara’a a Melehizedeka ’e (1) e 19 matahiti tōna ’aore rā hau atu ’e ’aore rā (2) e mea ’āpī a’e i te 19 matahiti ’e ’ua fa’aipoipo.
Te tauturura’a i te mau taea’e e tano ’ei peresibutero ’ia fa’aineine nō te fāri’i i te autahu’ara’a a Melehizedeka ’o te hō’ē ïa o te mau ’ohipa mātāmua roa a’e a te peresidenira’a pupu. E hōro’a te peresidenira’a i te mau rāve’a i te mau taea’e e tano ’ei peresibutero nō te tāvini ’e nō te fa’a’ite i tō rātou vāhi pūai. E ti’a i te mau taea’e aupuru itoito ’ia fa’ata’ahia nō te mau taea’e e tano ’ei peresibutero.
E ha’api’i te peresidenira’a pupu ’e te mau taea’e aupuru i te mau taea’e e tano ’ei peresibutero nō ni’a i :
Te mau ’ohipa a te hō’ē peresibutero, ’oia ato’a te ’ohipa o te aupurura’a (hi’o Te Ha’api’ira’a Tumu ’e te mau Fafaura’a 20:38–45 ; 42:44 ; 107:11–12). E nehenehe te mau taea’e e tano ’ei peresibutero, e tōro’a ha’api’i ’aore rā e tahu’a rātou, ’ia tāvini ’ei mau taea’e aupuru.
Te mau fā o te mau ’ōro’a ’e te mau ha’amaita’ira’a o te autahu’ara’a, ’e nāhea ’ia rave i te reira (hi’o pene 18).
Nāhea te mau tāne ’e te mau vahine ’ia ha’a ’āmui nō te fa’aoti i te ’ohipa a te Atua.
Nō te ha’amāramaramara’a nō ni’a i teie mau tumu parau, hi’o « Te autahu’ara’a a Melehizedeka », « Te autahu’ara’a », ’e « Te mau vahine i roto i te ’Ēkālesia » (Gospel Topics [Mau tumu parau o te ’evanelia), topics.ChurchofJesusChrist.org).
E nehenehe teie ha’api’ira’a e fa’atupuhia nō te ta’ata hō’ē ’aore rā, nō te hō’ē piha ha’api’ira’a, i rāpae i te mau rurura’a i te sābati.
I te taime iho ā, ’a fa’aoti ai te ’episekōpo ’e te peresideni titi ē, ’ua ineine ’e ’ua ti’a mā te hō’ē taea’e e tano ’ei peresibutero, e nehenehe ’oia e fa’atōro’ahia ’ei peresibutero i roto i te autahu’ara’a a Melehizedeka.
8.5
Te tahi atu ā mau arata’ira’a ’e mau fa’aturera’a
8.5.1
Te mau melo huma
E ha’apa’o ta’a ’ē te peresidenira’a pupu peresibutero i te mau melo huma. Nō te ha’amāramaramara’a nō ni’a i te tauturura’a i teie mau melo, ’a hi’o disability.ChurchofJesusChrist.org ’e te 38.8.31.