« ផ្តោតជីវិតរបស់បងប្អូននៅលើព្រះយេស៊ូវគ្រីស្ទ » ប្រធានបទ និង សំណួរ ( ឆ្នាំ ២០២៣ )
ការស្វែងរកចម្លើយចំពោះសំណួររបស់បងប្អូន
ផ្តោតជីវិតរបស់បងប្អូននៅលើព្រះយេស៊ូវគ្រីស្ទ
សេចក្ដីជំនឿលើព្រះយេស៊ូវគ្រីស្ទគឺសំខាន់ណាស់ ចំពោះការស្វែងរកចម្លើយទៅនឹងសំណួរដ៏លំបាកបំផុតក្នុងជីវិតរបស់យើង ។ ជាញឹកញាប់ យើងតែងតែគិតថាសេចក្ដីជំនឿគឺជាការជឿដ៏រឹងមាំមួយ ។ ប៉ុន្តែសេចក្ដីជំនឿគឺលើសពីការជឿទៅទៀត ។ វាពាក់ព័ន្ធទៅនឹងការទុកចិត្ត ភាពជឿជាក់ និងភក្ដីភាព ។ នៅពេលយើងមានសំណួរ ឬការព្រួយបារម្ភ នោះយើងតែងតែអាចបែរទៅរកព្រះយេស៊ូវគ្រីស្ទជានិច្ច ។ សេចក្តីជំនឿរបស់យើងនឹងរីកចម្រើនពេលយើងស្ដាប់ព្រះបន្ទូលរបស់ទ្រង់ ធ្វើតាមការបង្រៀនរបស់ទ្រង់ ហើយព្យាយាមស្រឡាញ់អ្នកដទៃតាមរបៀបដែលទ្រង់ស្រឡាញ់ ។
ប្រធាន រ័សុល អិម ណិលសុន បានបង្រៀនថា « មេត្រីភាពអាចកើតមានដល់ព្រលឹងអ្នក ពេលអ្នកស្ថាបនាក្ដីជំនឿលើម្ចាស់នៃមេត្រីភាព » ។១ ទាំងនេះជារឿងមួយចំនួនដើម្បីចងចាំ ៖
-
ព្រះយេស៊ូវគ្រីស្ទគឺជាគ្រឹះដ៏រឹងមាំសម្រាប់សេចក្ដីជំនឿរបស់យើង ។ នៅក្នុងជីវិតប្រចាំថ្ងៃរបស់យើង យើងដាក់សេចក្តីជំនឿរបស់យើងទៅលើមនុស្ស និងស្ថាប័ននានា ។ ទាំងនេះរួមមានទាំងសមាជិកគ្រួសារ មិត្តភក្តិ រដ្ឋាភិបាល និងនិយោជក ។ ប៉ុន្ដែព្រះយេស៊ូវគ្រីស្ទគឺជាអង្គតែម្នាក់គត់ដែលយើងអាចទុកចិត្តបានទាំងស្រុង ចំពោះសេចក្ដីសង្ឃឹម សេចក្ដីសុខសាន្ត និងសេចក្ដីសង្គ្រោះរបស់យើង ។ សាសនាចក្របានបង្កើតឡើងដើម្បីនាំមនុស្សមកកាន់ទ្រង់ ។ បងប្អូនអាចទុកចិត្តលើព្រះយេស៊ូវគ្រីស្ទបានយ៉ាងពេញលេញ ទោះបីជាបងប្អូនកំពុងពុះពារជាមួយនឹងរឿងផ្សេងៗទៀតនៃសេចក្ដីជំនឿរបស់បងប្អូនក៏ដោយ ។
-
ព្រះយេស៊ូវគ្រីស្ទមានសេចក្តីអាណិតអាសូរយ៉ាងល្អឥតខ្ចោះ ។ ការសាកល្បងដ៏ធំបំផុតរបស់យើងអាចធ្វើឲ្យយើងខិតទៅជិតព្រះអង្គសង្គ្រោះ ។ គ្មាននរណាម្នាក់ក្រៅពីព្រះគ្រីស្ទដែលអាចយល់យ៉ាងពេញលេញចំពោះការតស៊ូរបស់យើងឡើយ ។ ទ្រង់ព្រះកន្សែងជាមួយអស់អ្នកទាំងឡាយដែលទ្រង់បានបម្រើ ។ ទ្រង់បានមានបទពិសោធន៍ភាពឯកោ សេចក្តីវេទនា និងសូម្បីតែការឃ្លាតឆ្ងាយពីវត្តមានរបស់ព្រះវរបិតារបស់ទ្រង់ក៏ដោយ ។ បងប្អូនអាចបែរទៅរកទ្រង់ ហើយស្វែងរកការយល់ដឹង និងសេចក្ដីអាណិតអាសូរបាន ។
-
ផែនការនៃសេចក្ដីសង្គ្រោះរបស់ព្រះផ្តល់នូវទស្សនវិស័យ ។ សំណួររបស់យើងជាច្រើនហាក់ដូចជាខុសៗគ្នា នៅពេលយើងគិតពីផែនការរបស់ព្រះវរបិតាសួគ៌ ។ ប្រធាន ដាល្លិន អេក អូក បានបង្រៀនថា « ដោយសារតែចំណេះដឹងរបស់យើងអំពីផែនការនេះ យើងចាប់ផ្តើមជាមួយនឹងការសន្មតដែលខុសពីអស់អ្នកដែលគ្មានចំណេះដឹងដូចយើង ។ ជាលទ្ធផល នោះយើងឈានដល់ការសន្និដ្ឋានផ្សេងគ្នានៅលើប្រធានបទសំខាន់ៗជាច្រើន » ។២ ការពិនិត្យសំណួររបស់យើងដោយគិតពីផែនការនៃសេចក្ដីសង្គ្រោះ អាចជួយយើងឲ្យមើលឃើញកង្វល់របស់យើងដោយមានទស្សនៈដ៏អស់កល្បជានិច្ច ។
-
មានសំណួរចម្បង និងបន្ទាប់បន្សំ ។ ពេលខ្លះយើងមានសំណួរ ឬការព្រួយបារម្ភដែលទាក់ទងទៅនឹងព្រឹត្តិការណ៍ប្រវត្តិសាស្ត្រ ការបង្រៀន និងគោលនយោបាយរបស់សាសនាចក្រ ឬភាពបរាជ័យរបស់មនុស្ស ។ ការស្វែងរកភាពសុខសាន្តជាមួយនឹងសំណួរបែបនេះតម្រូវឲ្យមានការខិតខំដ៏ស្មោះត្រង់របស់យើង ។ ប៉ុន្តែវាជាការសំខាន់ក្នុងការរកឃើញសេចក្តីពិតដ៏សំខាន់នៃដំណឹងល្អចេញពីអ្វីដែលមិនសូវសំខាន់ ។ យ៉ូសែប ស្ម៊ីធ បានបង្រៀនថា « រឿងផ្សេងទៀតគឺជារឿងបន្ទាប់បន្សំប៉ុណ្ណោះ »ចំពោះសេចក្ដីពិតនៅជុំវិញបេសកកម្មសង្គ្រោះរបស់ព្រះអង្គសង្គ្រោះ ។៣
-
ជ្រើសរើសសេចក្តីជំនឿ ។ ការទទួលបានចំណេះដឹងខាងវិញ្ញាណតម្រូវឲ្យ « យើងដើរដោយជំនឿមិនមែនដោយមើលឃើញទេ » ។៤ ប្រសិនបើយើងរង់ចាំរហូតដល់យើងមានភស្តុតាងជាក់ស្តែងអំពីរឿងខាងវិញ្ញាណ នោះយើងនឹងមិនចាប់ផ្ដើមដំណើរការនៃការអភិវឌ្ឍសេចក្តីជំនឿទៅលើព្រះយេស៊ូវគ្រីស្ទឡើយ ។ អែលឌើរ ឌែល ជី រិនឡាន់ បានបង្រៀនថា « ដើម្បីឲ្យសេចក្តីជំនឿរីកចម្រើន នោះមនុស្សម្នាក់ត្រូវតែជ្រើសរើសមានសេចក្តីជំនឿ ។ មនុស្សម្នាក់ត្រូវមានបំណងចង់មានសេចក្ដីជំនឿ ។ មនុស្សម្នាក់ត្រូវធ្វើសកម្មភាពដោយសេចក្ដីជំនឿ » ។៥
-
ប្រកាន់ខ្ជាប់ទៅនឹងអ្វីដែលបងប្អូនដឹង ។ នៅពេលដែលបងប្អូនមានអារម្មណ៍មិនច្បាស់អំពីសេចក្តីជំនឿរបស់បងប្អូន សូម « ប្រកាន់ខ្ជាប់ទៅនឹងអ្វីដែលបងប្អូនបានដឹងរួចហើយ » យោងតាមការណែនាំរបស់អែលឌើរ ជែហ្វ្រី អ័រ ហូឡិន « ហើយឈរយ៉ាងរឹងមាំរហូតដល់ចំណេះដឹងបន្ថែមទៀតមកដល់ » ។៦ សូមទុកចិត្តលើបទពិសោធន៍ខាងវិញ្ញាណពីអតីតកាលរបស់បងប្អូន ។ បទពិសោធន៍ទាំងនោះជាភស្តុតាងដែលបញ្ជាក់ថា ព្រះប្រទានរង្វាន់ដល់សេចក្ដីជំនឿរបស់បងប្អូនទៅលើព្រះយេស៊ូវគ្រីស្ទដោយមានការធានាខាងវិញ្ញាណ ។
ព្រះគម្ពីរសំខាន់ៗ ៖ រ៉ូម ៨:៣៥, ៣៧-៣៩; នីហ្វៃទី២ ៤:៣៤-៣៥; ម៉ូសាយ ៤:៩; ហេលេមិន ៥:១២