“Fas Toktok,” Ol Pikinini mo Ol Yut blong Jos Ia blong Jisas Kraes blong Ol Lata-dei Sent: Wan Presentesen Gaed blong Ol Papa mo Ol Mama, mo Ol Lida (2019)
“Fas Toktok”
Fas Toktok
Taem oli stap wok tugeta, ol papa mo mama, mo ol lida, oli stap helpem ol pikinini mo ol yut blong mekem ol moa dip jenis long laef blong olgeta, blong oli kam ol disaepol blong Lod Jisas Kraes we oli klin inaf, mo blong oli kam ol man mo ol woman we oli gat wan strong mo tru fasin tru long:
-
Fasin blong stap lanem gospel we i givim insperesen blong wanwan i komitim hemwan.
-
Seves mo ol aktiviti we oli givhan long bodi mo long spirit.
-
Fasin blong stap developem wanwan we i mekem se wanwan i groap long wan wei we i mekem hem i glad long hemwan.
Ol prinsipol we oli lidim wok ia mo ol jeneral rol we oli putum i stap long aotlaen long buklet ia, oli save stretem folem situesen. I no gat wan stret wei nomo blong stap mekem olgeta. Sam aedia mo eksampol oli stap onlaen long ChildrenandYouth.ChurchofJesusChrist.org. Lukaotem insperesen blong save wanem i bes blong wanwan man o woman (luk long “Jenisim mo Stretem”).
Jeneresen Ia we I Stap Kam Antap
Ol profet oli bin talem se jeneresen ia blong ol pikinini mo ol yut, oli olgeta ia we oli ol beswan we Lod i bin sendem olgeta i kam long wol ia (luk long Russell M. Nelson, “Hope of Israel,” wol yut divosen, 3 Jun 2018, 16). Oli gat wan paoa we oli save kasem, we bae oli yusum blong mekem bigfala jenis long wol ia. Oli bin invaetem olgeta blong help blong mekem Isrel i kam tugeta long tugeta saed blong vel. I nid blong gat wan rod we i moa hae mo tabu blong yumi kea mo givhan long olgeta. Rod ia bae i helpem ol pikinini mo ol yut:
-
Blong oli save aedentiti mo stamba tingting blong olgeta, we i no save finis.
-
Mekem oli mekem ol moa dip jenis long laef blong kam long Jisas Kraes, blong karem gospel blong Hem i go insaed long hat blong olgeta, mo blong givim insperesen long olgeta blong jusum blong folem Hem.
-
Tekpat tugeta long wok ia blong fasin blong sevem man.
-
Developem olgetawan, wetem sapot blong papa mo mama, mo wetem ol lida we oli help taem we i gat nid.
-
Stap klin inaf blong kam long tempol mo gat glad we i stap gogohed long rod ia blong kavenan.
Taem we ol pikinini mo ol yut oli kasem revelesen blong laef blong olgeta, taem oli bildimap ol rilesensip we oli stanap long gospel, mo taem oli stap praktisim fridom blong mekem joes taem we oli stap groap, bambae oli gat sakses blong stap mekem ol stamba tingting ia oli kamtru.
Traehad blong Stap Folem Sevya
Long yangfala taem blong Hem, Jisas i bin nidim blong lanem tabu aedentiti mo misin blong Hem, semmak olsem wanwan pikinini blong God i mas mekem. “Jisas i stap groap moa long bodi blong hem mo long waes blong hem tu. Mo oltaem God i glad tumas long hem, mo ol man tu oli glad tumas long hem” (Luk 2:52). Hem i groap long wan laef we i gat balens long hem, mo i semmak tu long evri pikinini mo yut.
Helpem ol pikinini mo yut blong oli tekem Sevya i kam insaed long evri saed blong laef blong olgeta—i no jes long Sabat dei. Taem oli traehad blong mekem Jisas Kraes i stap long senta blong laef blong olgeta, Sevya i promesem blong sendem Tabu Spirit i kam givhan mo lidim olgeta.
Wanem bae i gud tumas, i we, fasin blong stap folem Sevya i stat insaed long hom. Ol lida blong Jos oli save provaedem wan bigfala sapot long wanwan man, woman mo famli.
Hom i Senta
Ol papa mo mama oli mekem plan blong gat ol famli eksperiens mo ol storian blong tijim gospel blong Jisas Kraes, mo blong oli mitim wan nid we i blong wanwan nomo long wanwan pikinini. Hemia i hapen taem we ol famli oli stap wok mo plei tugeta long ol wei we i tijim ol stamba skil, i bildimap fasin, mo i givim ol janis blong stap gro.
Leftemap Tingting blong Stap Gro
-
Prea blong kasem daereksen. Papa long Heven i save ol pikinini blong yu mo bae i helpem yu blong tijim olgeta.
-
Helpem ol pikinini blong yu blong lukaotem mo luksave paoa blong Tabu Spirit.
-
Soemaot lav mo talem gud toktok long ol pikinini blong yu plante taem, long saed blong hadwok blong olgeta blong mekem gud, mo from ol kwaliti we oli olsem hemia blong Kraes we yu yu stap luk insaed long olgeta.
-
Lukaotem ol janis blong givim seves long ol narawan olsem wan famli.
Givim Help blong Lidim Olgeta
-
Helpem ol pikinini blong yu blong oli luk olsem wanem oli save yusum gospel long evri saed blong laef blong olgeta.
-
Lidim ol pikinini blong yu mo leftemap tingting blong olgeta blong putum ol gol blong olgetawan mo ol plan blong olgetawan.
-
Helpem olgeta blong kamap wetem ol ansa blong olgetawan long ol problem.
-
Givim sapot, help, mo leftemap tingting folem rod ia.
Toktok wetem Ol Lida
Toktok wetem ol tija mo ol lida blong faenemaot olsem wanem oli save sapotem ol pikinini blong yufala. Lukaotgud blong no brekem eni tras wetem ol pikinini blong yu, o blong no mekem olgeta oli sem.
Jos i Sapotem
Hom i Senta (Famli)
Jos i Sapotem (Ol Lida)
Insaed long rol blong Jos, hem i blong tijim gospel blong Jisas Kraes mo blong sapotem hom. Ol lida mo ol tija oli sapotem ol papa mo mama taem oli stanemap ol rilesensip we oli strong mo i fidim olgeta wetem ol pikinini mo ol yut we oli stap givim seves long olgeta.
Toktok wetem Ol Papa mo Mama
-
Long nomol storian, toktok wetem ol papa mo mama blong faenemaot olsem wanem blong sapotem ol pikinini blong olgeta. Serem ol samting we yu luk se oli strong long olgeta.
-
Askem wanem nao oli hop se bae ol pikinini blong olgeta bae oli gotru long hem, mo wanem bae oli lanem long klas mo long ol aktiviti.
Taem ol papa mo mama oli no ol aktiv memba blong Jos:
-
Eksplenem long ol papa mo mama wanem i hadwok ia blong sapotem ol pikinini mo ol yut, mo askem sapos, mo olsem wanem oli wantem blong ol pikinini oli stap insaed long hem.
-
Askem ol pikinini mo ol yut long wanem kaen sapot nao bae oli wantem kasem.
-
Toktok wetem wod kaonsel long ol defren wei blong yusum ol papa mo mama.
Sapotem Ol Pikinini mo Ol Yut
-
Helpem ol pikinini mo ol yut blong oli luksave paoa blong Tabu Spirit.
-
Askem olgeta wanem oli wantem blong lanem mo gat eksperiens long hem insaed long klas mo long ol aktiviti.
-
Leftemap tingting blong olgeta blong oli tekem fas step blong mekem ol plan mo lidim ol aktiviti.
Stap Lanem Gospel
Long Hom
Skripja stadi blong wanwan mo famli skripja stadi bambae i helpem ol pikinini mo ol yut blong oli filim mo luksave paoa blong Tabu Spirit, mo blong oli lanem blong lavem Sevya. Oli leftemap tingting blong wanwan man, woman mo famli blong yusum Kam Folem Mi—Blong Wanwan Man, Woman mo Famli, wetem ol toktok blong ol profet we oli stap laef, blong stap stadi long gospel blong Jisas Kraes.
Long Jos
Ol pikinini mo ol yut oli mit tugeta blong lanem gospel blong Jisas Kraes. Ol pikinini oli lanem gospel tru long instraksen long klas mo long singsing taem blong Praemeri. Ol yut oli lanem doktrin insaed long ol klas mo insaed long ol kworom. Oli invaetem ol pikinini mo ol yut blong oli serem wanem we oli lanem insaed long hom mo blong oli praktisim blong yusum gospel insaed long laef blong olgeta.
Seves mo Ol Aktiviti
Long Hom
Ol seves mo aktiviti oli stanemap ol stret mo gud evri dei fasin, oli bildimap ol famli rilesensip, oli tijim ol skil blong laef, oli developem ol fasin olsem hemia blong Kraes, mo oli helpem ol pikinini mo ol yut blong groap. Ol famli seves mo aktiviti oli save lukluk nomo long ol nid blong wanwan man, woman mo famli, mo oli givim ol janis blong praktisim ol prinsipol blong gospel insaed long ol eksperiens blong evri dei.
Long Jos
Seves mo aktiviti we i hapen oltaem oli givim ol janis blong kam tugeta, blong lanem ol niu skil, blong mekem ol wok we oli had, blong bildimap ol rilesensip we oli lukluk nomo long gospel, hemia wetem ol fren mo ol lida. Olgeta aktiviti ia, oli mas helpem ol pikinini mo ol yut blong oli groap long saed blong spirit, sosol laef, long saed blong bodi, mo waes tingting, mo help blong givim seves long ol narawan long wan wei we i gat mining. JustServe (JustServe.org) i wan bigfala risos blong faenem ol janis blong givim ol komuniti seves.
Ol maltidei aktiviti blong ol yut, i gat, Ol konfrens blong “Blong Ol Yut Oli Kam Strong (BYS), ol yut konfrens, ol kamp, mo ol nara taem blong kam tugeta. Olgeta aktiviti ia, oli save helpem ol yut blong oli gat moa dip tingting insaed long hat blong folem Sevya, blong karemaot olgeta long ol nomol samting evri dei, mo blong helpem olgeta blong luk se oli pat blong wan grup blong yut we i bigwan moa, we oli serem ol semfala stret mo gud gol.
Divelopmen blong Yuwan
Long Hom
Ol pikinini mo ol yut oli jusum wanem we oli save mekem blong oli groap mo blong oli lanem blong folem Sevya. Ol papa mo mama oli save help blong luksave olsem wanem nao oli stap groap finis, mo weaples nao oli nid blong kam antap long hem. Evri aktiviti, wetem hemia long jos, skul, ol frensip, ol spot, ol art, ol wok, mo ol nara intres blong wanwan man mo woman, i save helpem ol pikinini mo ol yut blong folem Jisas Kraes.
Long Jos
Ol lida oli lavem mo oli givim seves long wanwan pikinini mo yut, mo oli kam blong save ol nid mo ol intres blong olgeta. Tru long rilesensip blong lav blong olgeta, ol lida oli save wan spesel mo strong paoa o fos blong save sapotem mo leftemap tingting blong ol pikinini mo yut taem oli stap groap.
Jenisim mo Stretem
Wanwan man, woman, famli mo kongregesen i spesel, i no gat wan moa i semmak. Wanem i wok gud blong wan, maet bae i no wok nating long wan narawan. Mekem wanem we i wok insaed long famli blong yu, insaed long klas, kworom o wod blong yu. Tokbaot ol janis mo ol wari blong yu, mo lukaotem revelesen blong faenemaot wei blong stretem niu wok ia blong helpem wanwan pikinini mo yut blong oli kasem ful tabu paoa blong olgeta.
Eksampol. Ol pikinini mo yut bae oli folem ol defren rod long wei we oli stap groap: wanem kaen gol, hamas gol, mo hamas taem oli setem gol, mo tu, hamas sapot oli nidim, evri samting ia, bae oli mas faenemaot folem wanwan pikinini o yut. Ol klas mo ol kworom oli save stretem sam samting blong i mitim ol nid we oli stap. Antap long hemia, wanem kaen aktiviti mo hamas taem aktiviti i tekem ples bae i save defdefren, bae i folem ol situesen we i stap.
Kipim i simpol. Mekem wanem we bae i wok.
Pusum Wan blong Mekem Wok mo Luksave Wok
Pusum Wan blong Mekem Wok
Bae ol pikinini mo ol yut bae oli pusum tingting blong olgetawan blong mekem wok o samting sapos oli filim se man i lavem olgeta, taem oli stap kam antap, kam gud moa, mo taem oli stap filim Tabu Spirit insaed long laef blong olgeta. Taem we fasin blong jenis mo blong stap groap i kam had long olgeta, leftemap tingting blong olgeta blong lukaotem sam wei blong oli winim ol jalenj blong olgeta, o blong jenisim ol plan blong olgeta. Taem i gat oli gat ol rilesensip we oli strong mo i gat tras insaed long hem wetem ol papa mo mama, ol lida mo ol fren, hemia i save givim paoa long olgeta blong save gohed blong traem.
Luksave Wok
Taem we oli pikinini mo ol yut oli stap progres, presem ol hadwok blong olgeta mo leftemap tingting blong olgeta. Givim olgeta ol janis blong serem wanem we oli stap lanem, mo selebretem wanem oli bin mekem blong kam antap. Antap long hemia, evri pikinini mo yut oli save kasem ol samting olsem wan ring, o wan smol medol blong rimaenem olgeta se oli pat blong wan wol grup we i stap traehad blong folem Jisas Kraes. Taem we ol pikinini mo ol yut oli stap mekem ol gol blong olgeta long saed blong spirit, sosol laef, long saed blong bodi mo waes oli kamtru, nao oli save kasem sam moa samting we i soemaot wanem oli bin kasem.