“Kova long Fored,” Ol Pikinini mo Ol Yut blong Jos Ia blong Jisas Kraes blong Ol Lata-dei Sent: Wan Presentesen Gaed blong Ol Papa mo Ol Mama, mo Ol Lida (2019)
“Ol Rol”
Ol Rol
Hom mo Ol Papa mo Mama
?Wanem nao rol blong mi?
Blong stap wan stret mo gud eksampol long ol pikinini blong yu. Tijim olgeta olsem wanem blong stap groap long evri eria blong laef blong olgeta. Faenem ol wei blong helpem olgeta blong lanem glad ia blong stap kipim olgeta kavenan, blong stap faenem ol niu talen, mo blong stap mekem ol samting we oli had. Helpem ol famli blong yu blong groap kolosap moa long Papa long Heven mo Jisas Kraes mo blong stap laef folem gospel long evri dei laef.
?Wanem nao bae mi mekem?
Letem ol pikinini oli save hamas nao yu yu lavem olgeta. Tekempat insaed long laef blong olgeta. Wetem prea, faenemaot nid blong wanwan long olgeta, mo mekem plan blong gat stadi long gospel mo ol aktiviti blong lukluk long ol nid ia. Plante taem, serem testemoni blong yu wetem olgeta. Toktok wetem ol lida abaot wei we oli save help blong sapotem ol pikinini blong yufala.
?Wea nao bae mi stat?
Gohed blong toktok wetem mo lisin long ol pikinini blong yu. Prea abaot wei we yu save sapotem olgeta. Helpem olgeta blong faenemaot mo stat blong wok long ol eria blong lanem samting we oli gat intres long hem. Stat o gohed blong mekem famli prea, stadi long gospel, givim janis blong givim seves, mo gat ol aktiviti blong helpem ol pikinini blong yu blong groap.
Ol Praemeri Lida mo Ol Tija
?Wanem nao rol blong mi?
Lavem mo mekem ol pikinini oli kam strong moa. Helpem ol papa mo mama blong stap helpem ol pikinini blong oli filim lav we Papa long Heven i gat long olgeta, blong oli andastanem gospel blong Jisas Kraes, blong oli filim mo luksave paoa blong Tabu Spirit, mo blong oli rere blong mekem mo kipim ol tabu kavenan.
?Wanem nao bae mi mekem?
Meksua se ol klas blong Praemeri mo singsing taem i helpem ol pikinini blong oli filim Spirit, kam antap wetem fet, mo filim glad blong gospel blong Jisas Kraes insaed long laef blong olgeta. Wetem ol eria blong mekem pikinini i groap long hem oli stap long Luk 2:52 olsem wan gaed, mekem plan blong gat ol seves mo ol aktiviti we oli gud mo mekem wan i wantem mekem samting; ol seves mo aktiviti ia oli sapos blong bildimap ol testemoni, mekem ol famli oli kam strong moa, mo oli sapos blong mekem se i gat yuniti mo wanwan i groap.
Wea nao bae mi stat?
Kam blong save ol pikinini wetem ol famli blong olgeta, mo givhan long ol nid blong olgeta. Olsem wan Praemeri presidensi, wetem prea, askem olsem wanem yu save helpem ol tija blong yu, ol miusik lida blong yu, mo ol aktiviti lida blong oli helpem ol pikinini blong folem Sevya.
Ol Yang Woman Lida
?Wanem nao rol blong mi?
Stap helpem ol papa mo mama, mo bisoprik blong stap lidim mo givim insperesen long ol yang woman blong oli andastanem aedentiti blong olgeta olsem ol gel blong God, blong oli rere blong mekem ol kavenan long tempol, mo blong oli mekem ol tabu stamba tingting we i blong olgeta. Gaedem ol presidensi blong ol klas taem oli stap lidim, givhan mo givim seves long ol memba blong klas blong olgeta.
?Wanem nao bae mi mekem?
Stap olsem wan eksampol blong stap wan disaepol blong Jisas Kraes. Gaedem ol presidensi blong klas taem we oli stap prea mo mekem plan, mo help blong tijim ol lesen we oli stap long Come, Follow Me—For Young Women. Leftemap tingting blong olgeta blong oli lidim ol plan mo kareaot ol seves mo aktiviti we bae i helpem ol yang woman blong groap long evri eria blong laef blong olgeta. Givim sam moa sapot long ol yang woman we oli nidim.
Wea nao bae mi stat?
Kam blong save gud wanwan long ol yang woman. Toktok wetem ol yang woman, papa mo mama blong olgeta, mo wetem bisoprik abaot wei we yu save sapotem ol yang woman blong stap groap. Prea blong save olsem wanem yu save helpem ol presidensi blong klas blong yu blong oli gat sakses long ol koling blong olgeta.
Ol Yang Man Lida
?Wanem nao rol blong mi?
Stap helpem ol papa mo mama, mo bisoprik blong stap mekem ol yang man oli rere blong kasem odinesen long ol ofis blong prishud, blong oli mekem ol kavenan long tempol, givim seves long ol misin, mo blong oli mekem tabu rol blong olgeta. Givim insperesen long olgeta blong oli andastanem stamba tingting mo aedentiti blong olgeta olsem ol boe blong God. Gaedem ol presidensi blong ol kworom taem oli stap lidim, givhan mo givim seves long ol memba blong kworom blong olgeta.
?Wanem nao bae mi mekem?
Stap olsem wan eksampol blong stap wan disaepol blong Jisas Kraes. Gaedem ol presidensi blong klas taem we oli stap prea mo mekem plan, mo help blong tijim ol lesen we oli stap long Come, Follow Me—For Young Men. Helpem olgeta blong oli mekem ol plan mo blong oli kareaot ol seves mo aktiviti we bae i helpem ol yang man blong groap long evri eria blong laef blong olgeta. Letem olgeta oli lidim ol narawan. Givim sam moa sapot long ol yang man we oli nidim.
Wea nao bae mi stat?
Spendem taem wetem ol yang man. Kam blong save gud mo lavem olgeta wanwan. Toktok wetem bisoprik, ol yang man, mo papa mo mama blong olgeta blong oli disaed olsem wanem oli save sapotem olgeta taem oli stap groap blong kam moa olsem Sevya. Prea blong save olsem wanem yu save helpem ol presidensi blong kworom blong yu blong oli gat sakses long ol koling blong olgeta.
Ol Sandei Skul Tija
?Wanem nao rol blong mi?
Wok had blong helpem ol yut blong oli kam long Kraes taem we oli stap lanem mo stap folem doktrin blong Hem. Stap tijim ol yut blong andastanem, serem mo stap laef folem gospel blong Jisas Kraes.
?Wanem nao bae mi mekem?
Soem eksampol blong stap wan disaepol blong Jisas Kraes, mo helpem ol yut blong oli bildimap fet blong olgeta. Leftemap tingting blong olgeta blong stadi long ol skripja long hom—blong oli stadi olgetawan mo wetem famli blong olgeta. Helpem olgeta blong stap rere mo tijim ol prinsipol blong doktrin. Invaetem olgeta blong praktisim wanem we oli stap lanem long divelopmen blong olgetawan.
Wea nao bae mi stat?
Wok had blong tij olsem we Sevya i bin mekem. Kam blong save gud wanwan long ol yut. Prea blong save olsem wanem yu save helpem olgeta blong stap gro blong kam moa olsem Sevya. Mekem ol memba blong klas, mo papa mama blong olgeta oli kam strong moa long semtaem we oli stap lanem mo tijim gospel long Jos mo insaed long hom blong olgeta.
Bisoprik mo Ol Presidensi blong Klas mo Kworom
?Wanem nao rol blong olgeta?
Bisoprik, hem i presidensi blong Aronik Prishud insaed long wod, mo hem i responsibol long ol yang woman mo ol yang man. Ol presidensi blong kworom blong Aronik Prishud oli wok wetem ol ki we oli bin givim taem oli bin setem apat ol presiden blong ol kworom. Ol presidensi blong ol klas blong Ol Yang Woman oli wok anda long prishud atoriti afta we wan memba blong bisoprik i setem olgeta apat.
?Wanem nao oli stap mekem?
Ol presidensi oli mas traehad blong stap ol tru disaepol blong Jisas Kraes taem oli stap helpem wanwan memba blong klas o kworom blong oli filim se oli lavem olgeta, mo blong oli faenem glad ia blong stap laef folem gospel. Anda long daereksen blong bisoprik, oli lidim klas o kworom blong mekem Isrel i kam tugeta long tugeta saed blong vel, mo blong oli stap kea long olgeta we oli stap long nid.
?Wea nao bae oli stat?
Ol presidensi oli lanem diuti blong olgeta long Lod mo long ol lida blong olgeta. Oli stap prea from ol memba blong klas o kworom blong olgeta, mo oli kam blong save ol nid blong olgeta. Oli sapotem olgeta blong oli kam ol disaepol blong Jisas Kraes. Oli kaonsel tugeta abaot wijwan lesen, aktiviti, mo seves bae i blesem mo mekem ol yut oli kam strong moa mo blong oli tekem yuniti i kam long klas blong olgeta o long kworom blong olgeta.