“Pasiuna,” Kabataan ug Kabatan-onan sa Ang Simbahan ni Jesukristo sa mga Santos sa Ulahing mga Adlaw: Usa ka Pasiunang Giya alang sa mga Ginikanan ug mga Lider (2019)
“Pasiuna”
Pasiuna
Magtambayayong, ang mga ginikanan ug mga lider motabang sa kabataan ug kabatan-onan nga mapalig-on ang ilang pagkakabig, mahimong takus nga mga disipulo ni Ginoong Jesukristo, ug mahimong mga tawo nga ligdong pinaagi sa:
-
Pagkat-on sa ebanghelyo nga nagdasig og personal nga pasalig.
-
Pagserbisyo ug mga kalihokan nga naglig-on sa lawas ug espiritu.
-
Personal nga kalamboan nga nagmugna og makatagbaw nga pag-uswag.
Ang makagiya nga mga baruganan ug kinatibuk-ang mga tahas nga gilatid dinhi niini nga booklet mahimong mapahaum. Walay usa ka saktong paagi sa paggamit niini. Ang pipila ka ideya ug mga ehemplo anaa sa internet diha sa ChildrenandYouth.ChurchofJesusChrist.org. Pagtinguha og inspirasyon aron masayud unsa ang labing maayo alang sa matag indibidwal (tan-awa sa “Ipahiangay ug Ipahaum”).
Ang Nagtubo nga Henerasyon
Ang mga propeta miingon nga kini nga henerasyon sa kabataan ug kabatan-onan mao ang usa sa labing maayo nga gipadala sa Ginoo sa yuta (tan-awa sa Russell M. Nelson, “Hope of Israel [Paglaum sa Israel],” tibuok kalibutan nga debosyonal alang sa kabatan-onan, Hunyo 3, 2018, 16). Aduna silay potensyal nga makaimpluwensya pag-ayo sa kalibutan. Gidapit sila nga motabang sa pagpundok sa Israel sa matag habig sa tabil. Ang mas taas, mas balaan nga pamaagi ang gikinahanglan sa pag-atiman ug pagpangalagad ngadto kanila. Kini nga pamaagi makatabang sa kabataan ug kabatan-onan nga:
-
Mahibalo sa ilang mahangturong pagkatawo ug katuyoan.
-
Mapalig-on ang ilang pagkakabig ngadto ni Jesukristo, mapatuhop ang Iyang ebanghelyo diha sa ilang mga kasingkasing ug magdasig kanila nga mopili sa pagsunod Kaniya.
-
Motuman sa mga katungdanan sa Aaronic nga Pagkapari.
-
Makighiusang moapil sa buhat sa kaluwasan.
-
Magpalambo sa personal nga paagi uban sa suporta sa ginikanan ug sa mga lider nga motabang kon gikinahanglan.
-
Mahimong takus nga motambong sa templo ug makaangkon og malungtarong kalipay diha sa dalan sa pakigsaad.
Samtang ang kabataan ug kabatan-onan makadawat og pagpadayag alang sa ilang mga kinabuhi, mag-ugmad og mga relasyon nga nakasentro sa ebanghelyo, ug mogamit sa kabubut-on samtang magtubo sila, magmalampuson sila sa pagkab-ot niini nga mga katuyoan.
Magtinguha nga Mosunod sa Manluluwas
Sa Iyang kabatan-on, si Jesus kinahanglang makakat-on sa Iyang balaang pagkatawo ug misyon, sama sa buhaton sa matag anak sa Dios. Siya “mitubo sa kaalam ug sa gidak-on, ug sa kahimuot kaniya sa Dios ug sa tawo” (Lucas 2:52). Nagdako siya sa balanse nga paagi, ug mao usab ang tanan nga kabataan ug kabatan-onan.
Tabangi ang kabataan ug kabatan-onan nga madala ang Manluluwas ngadto sa tanang aspeto sa ilang kinabuhi—dili lang sa Igpapahulay. Samtang maningkamot sila sa paghimo kang Jesukristo nga sentro sa ilang kinabuhi, misaad Siya nga mopadala sa Espiritu Santo aron ilang maghuhupay ug giya.
Sa gimithing paagi, ang pagsunod sa Manluluwas magsugod sa panimalay. Ang mga lider sa Simbahan makahatag og importanting suporta alang sa mga indibidwal ug mga pamilya.
Nakasentro sa Panimalay
Ang mga ginikanan magplano og mga kasinatian sa pamilya ug mga pag-istoryahanay nga matudlo ang ebanghelyo ni Jesukristo ug matubag ang talagsaong panginahanglan sa matag bata. Mahitabo kini samtang ang mga pamilya magdungan sa pagtrabaho ug pagdula sa mga paagi nga magtudlo og importanting mga kahanas, makalig-on sa kinaiya, ug makahatag og mga oportunidad sa paglambo.
Iawhag ang Pag-uswag
-
Mag-ampo alang sa giya. Ang Langitnong Amahan nakaila sa inyong mga anak ug motabang kaninyo sa pagtudlo kanila.
-
Tabangi ang inyong mga anak sa pagtinguha ug pag-ila sa impluwensiya sa Espiritu Santo.
-
Pagpahayag og gugma ug dayega kanunay ang inyong mga anak sa ilang mga paningkamot nga mobuhat og maayo ug sa Kristohanon nga mga kinaiya nga inyong nakita diha kanila.
-
Pangita og mga oportunidad nga makaserbisyo sa uban isip tibuok pamilya.
Paghatag og Giya
-
Tabangi ang imong mga anak nga makasabut kon unsaon nila sa paggamit ang ebanghelyo diha sa tanang aspeto sa ilang kinabuhi.
-
Giyahi ang inyong mga anak ug awhaga sila sa paghimo og kaugalingon nilang mga tumong ug mga plano.
-
Tabangi sila nga makahunahuna og ilang kaugalingong mga solusyon sa mga problema.
-
Pagtanyag og suporta, tabang, ug pagdasig samtang magbuhat sila niini.
Pakigsulti sa mga Lider
Pakigsulti sa mga magtutudlo ug mga lider sa pagtino kon unsaon nila nga labing maayong makasuporta sa inyong mga anak. Pagmatngon nga dili mabutyag ang kompidensyal nga impormasyon sa inyong mga anak o maulawan sila.
Gisuportahan sa Simbahan
Nakasentro sa Panimalay (Pamilya)
Gisuportahan sa Simbahan (Mga Lider)
Ang tahas sa Simbahan naglakip sa pagtudlo sa ebanghelyo ni Jesukristo, pagpahigayon sa mga ordinansa, ug pagsuporta sa panimalay. Ang mga lider ug mga magtutudlo mosuporta sa mga ginikanan pinaagi sa pag-establisar og lig-on, makaamuma nga mga relasyon uban sa kabataan ug kabatan-onan nga ilang serbisyohan.
Pakigsulti sa mga Ginikanan
-
Pakigsulti sa mga ginikanan sa dili pormal nga paagi aron masuta unsaon sa pagsuporta sa ilang mga anak. Ipaambit ang mga kalig-on nga imong namatikdan.
-
Pangutan-a kon unsay ilang gilauman nga masinati ug makat-unan sa ilang mga anak diha sa mga korum sa Aaronic nga Pagkapari, sa mga klase sa Young Women, ug sa mga kalihokan.
Kon ang mga ginikanan dili aktibong mga miyembro sa Simbahan:
-
Ipasabut sa mga ginikanan kini nga paningkamot sa pagsuporta sa kabataan ug kabatan-onan, ug pangutan-a kon gusto ba nila ug sa unsang paagi nila gusto nga moapil ang ilang mga anak.
-
Pangutan-a ang kabataan o kabatan-onan unsa nga matang sa suporta ang ilang gusto.
-
Pakigsulti sa konseho sa ward mahitungod sa paagi nga malakip ang mga ginikanan kutob sa mahimo.
Suportahi ang Kabataan ug Kabatan-onan
-
Tabangi ang kabataan ug kabatan-onan nga makaila sa impluwensiya sa Espiritu Santo.
-
Pangutan-a sila kon unsay gusto nilang makat-unan ug masinati diha sa mga korum ug mga klase ug sa mga kalihokan.
-
Awhaga sila nga maoy mangulo sa pagplano ug pagpahigayon og mga kalihokan.
-
Suportahi ang mga naghupot sa Aaronic nga Pagkapari sa pagtuman sa mga responsibilidad sa korum.
Pagkat-on sa Ebanghelyo
Diha sa Panimalay
Ang personal ug tibuok pamilya nga pagtuon sa kasulatan ug pag-ampo makatabang sa kabataan ug kabatan-onan nga mobati ug moila sa impluwensya sa Espiritu Santo ug makat-on sa paghigugma sa Manluluwas. Ang mga indibidwal ug mga pamilya giawhag sa paggamit sa Dali, Sunod Kanako––Alang sa mga Indibidwal ug mga Pamilya ug sa mga pulong sa buhing mga propeta sa pagtuon sa ebanghelyo ni Jesukristo.
Diha sa Simbahan
Ang kabataan ug kabatan-onan magpundok aron magkat-on sa ebanghelyo ni Jesukristo. Ang mga bata makakat-on sa ebanghelyo pinaagi sa pagpanudlo sa klase ug panahon sa pagpanganta sa Primary. Ang kabatan-onan magkat-on sa doktrina diha sa mga klase ug sa mga korum. Ang kabataan ug kabatan-onan gidapit sa pagpaambit sa unsay ilang nakat-unan sa panimalay ug sa paggamit sa ebanghelyo diha sa ilang kinabuhi.
Pagserbisyo ug mga Kalihokan
Diha sa Panimalay
Ang pagserbisyo ug ang mga kalihokan moestablisar og matarung nga inadlaw nga mga kinaiya, mag-ugmad og mga relasyon sa pamilya, motudlo og mga kahanas sa kinabuhi, mopalambo og Kristohanong mga hiyas, ug motabang sa kabataan ug kabatan-onan nga molambo. Ang pagserbisyo ug ang mga kalihokan sa pamilya mahimong motutok sa mga panginahanglan sa indibidwal ug pamilya ug mohatag og mga oportunidad sa paggamit sa mga baruganan sa ebanghelyo diha sa inadlaw-adlaw nga mga kasinatian.
Diha sa Simbahan
Ang pagserbisyo—lakip ang pagpahigayon sa ordinansa sa sakramento sa mga naghupot sa Aaronic nga Pagkapari—ug regular nga mga kalihokan naghatag og mga oportunidad sa pagpundok, pagkat-on og bag-ong mga kahanas, paghimo sa lisud nga mga buluhaton, ug pag-ugmad og mga relasyon sa mga higala ug mga lider nga nakasentro sa ebanghelyo. Kini nga mga oportunidad motabang sa kabataan ug kabatan-onan nga molambo sa espiritwal, sosyal, pisikal, ug intelektwal nga paagi ug mohatag og makahuluganong serbisyo ngadto sa uban. Ang JustServe (JustServe.org) maoy usa ka bililhong kapanguhaan alang sa mga oportunidad sa pagserbisyo sa komunidad.
Ang mga kalihokan alang sa kabatan-onan nga molungtad og pipila ka adlaw naglakip sa mga komperensya sa For the Strength of Youth (FSY), mga komperensya sa kabatan-onan, mga kamping, ug uban pang panagpundok. Kini nga mga kalihokan makatabang sa kabatan-onan nga mapalig-on ang ilang tinguha nga mosunod sa Manluluwas, mobira kanila gikan sa ilang naandan nga mga buluhaton, ug motabang kanila nga makasabut nga parte sila sa mas dakong pundok sa kabatan-onan kinsa adunay managsamang matarung nga mga tumong.
Personal nga Kalamboan
Diha sa Panimalay
Ang kabataan ug kabatan-onan mopili sa unsay ilang mabuhat aron molambo ug magkat-on sa pagsunod sa Manluluwas. Ang mga ginikanan makatabang kanila sa pag-ila kon sa unsang paagi na sila naglambo ug diin sila kinahanglan nga molambo pa. Ang tanang kalihokan, lakip sa simbahan, eskwelahan, panaghigalaay, mga dula, mga art, trabaho, ug ubang indibidwal nga mga interes makatabang sa kabataan ug kabatan-onan sa pagsunod kang Jesukristo.
Diha sa Simbahan
Ang mga lider nahigugma ug moserbisyo sa matag bata ug batan-on ug mahibalo sa ilang mga panginahanglan ug mga interes. Pinaagi sa mahigugmaong mga relasyon, ang mga lider makahatag og talagsaon ug gamhanang impluwensya sa pagsuporta ug pagdasig sa kabataan ug kabatan-onan sa ilang indibidwal nga serbisyo ug pag-uswag.
Ipahiangay ug Ipahaum
Ang matag indibidwal, pamilya, ug kongregasyon talagsaon. Ang unsay labing epektibo alang sa usa ka tawo tingali dili epektibo sa lain. Buhata ang unsay epektibo alang sa inyong pamilya, klase, korum, o ward. Hisguti ang inyong mga oportunidad ug mga kabalaka, ug pagtinguha og pagpadayag kon unsaon sa pagpahaum niini nga inisyatibo aron sa pagtabang sa tagsa-tagsa ka mga bata ug mga batan-on nga makab-ot ang ilang balaanong potensyal.
Sama pananglit, ang kabataan ug kabatan-onan magkalahi kon unsa ang paagi sa ilang personal nga pag-uswag: ang matang, gidaghanon, ug kasagad sa mga tumong, ingon man kon unsa ka dako ang gikinahanglan nilang suporta, kinahanglang tinoon sa tagsa-tagsa. Ang mga klase ug mga korum mopahiangay usab aron matubag ang mga panginahanglan. Agig dugang, ang matang ug kasagad sa mga kalihokan mahimong magkalahi sumala sa lokal nga mga kahimtang.
Himoa kining yano. Buhata ang unsay epektibo.
Pagdasig ug Pag-ila
Pagdasig
Ang kabataan ug kabatan-onan natural nga madasig samtang mobati sila nga gihigugma, nagtubo, naglambo, ug mobati sa Espiritu Santo diha sa ilang kinabuhi. Kon ang kausaban ug pag-uswag mahimong lisud alang kanila, awhaga sila sa pagpangita og mga paagi sa pagbuntog sa mga hagit o sa pag-usab sa ilang mga plano. Ang lig-on ug masaligon nga mga relasyon uban sa mga ginikanan, mga lider, ug mga kaedad makahatag kanila og kalig-on nga magpadayon sa pagpaningkamot.
Pag-ila
Samtang nag-uswag ang kabataan ug kabatan-onan, dayega ang ilang mga paningkamot ug dasiga sila. Hatagi sila og mga oportunidad sa pagpaambit sa unsay ilang nakat-unan, ug sauloga ang ilang pag-uswag. Agig dugang, ang tanang kabataan ug kabatan-onan mahimong modawat og mga butang sama sa singsing o medalyon sa pagpahinumdom kanila nga parte sila sa usa ka grupo sa tibuok kalibutan nga naningkamot sa pagsunod ni Jesukristo. Samtang ang kabataan ug kabatan-onan mokab-ut sa espiritwal, sosyal, pisikal, ug intelektwal nga mga tumong, mahimo silang makadawat og dugang nga mga simbolo.