Mga Tahas

Pagpakita og matarung nga ehemplo ngadto sa imong mga anak. Tudloi sila unsaon sa pag-uswag diha sa tanang aspeto sa ilang kinabuhi. Pangita og mga paagi sa pagtabang kanila nga makakat-on sa kalipay sa pagsunod sa mga pakigsaad, pagdiskubre og bag-ong mga talento, ug pagbuhat sa lisud nga mga butang. Tabangi ang imong pamilya nga mas mapaduol ngadto sa Langitnong Amahan ug ni Jesukristo ug magsunod sa ebanghelyo sa inadlaw-adlaw nga kinabuhi.

Pahibaloa ang imong mga anak kon unsa nimo sila kamahal. Ilambigit ang imong kaugalingon sa ilang mga kinabuhi. Ilha sa mainampoong paagi ang ilang indibidwal nga mga panginahanglan ug pagplano og pagtuon sa ebanghelyo ug mga kalihokan nga motubag niadto nga mga panginahanglan. Ipaambit kanunay ang imong pagpamatuod ngadto kanila. Pakigsulti sa mga lider kon sa unsang paagi sila makatabang sa pagsuporta sa imong mga anak.

Padayon sa pagpakigsulti ug pagpaminaw sa imong mga anak. Pag-ampo kon unsaon nimo sa pagsuporta kanila. Tabangi sila sa pagdiskobre ug pagsugod sa pagpaningkamot sa mga aspeto sa pagkat-on nga interesado sila. Sugdi o ipadayon ang pag-ampo sa pamilya, pagtuon sa ebanghelyo, mga oportunidad sa pagserbisyo, ug mga kalihokan sa pagtabang sa imong mga anak nga mouswag.

Higugmaa ug lig-ona ang mga bata. Abagi ang mga ginikanan sa pagtabang sa mga bata nga mobati sa gugma sa Langitnong Amahan alang kanila, makasabut sa ebanghelyo ni Jesukristo, mobati ug moila sa impluwensya sa Espiritu Santo, ug mangandam sa paghimo ug pagtuman sa sagradong mga pakigsaad.

Siguroha nga ang mga klase ug panahon sa pagpanganta sa Primary makatabang sa mga bata nga mobati sa Espiritu, mapalambo ang pagtuo, ug mobati sa kalipay sa ebanghelyo ni Jesukristo diha sa ilang kinabuhi. Gamit ang mga aspeto sa pag-uswag nga gisugyot diha sa Lucas 2:52 isip usa ka giya, pagplano og makalingaw ug makapainteres nga pagserbisyo ug mga kalihokan nga mag-ugmad og mga pagpamatuod, molig-on sa mga pamilya, ug mopasiugda og panaghiusa ug personal nga pag-uswag.

Ila-ilaha ang mga bata ug ang ilang mga pamilya, ug pangalagari ang ilang mga panginahanglan. Isip kapangulohan sa Primary, pangutana sa mainampoong paagi unsaon nimo sa pagtabang ang inyong mga magtutudlo, mga lider sa musika, ug mga lider sa kalihokan sa pagtabang sa mga bata nga mosunod sa Manluluwas.

Tabangi ang mga ginikanan ug bishopric sa paggiya ug pagdasig sa batan-ong mga babaye nga makasabut sa ilang pagkatawo isip mga anak sa Dios, mangandam alang sa mga pakigsaad sa templo, ug motuman sa ilang balaanong mga katuyoan. Giyahi ang mga kapangulohan sa klase samtang sila mangulo, mangalagad, ug moserbisyo sa mga sakop sa ilang mga klase.

Pagpakita og ehemplo isip usa ka disipulo ni Jesukristo. Giyahi ang mga kapangulohan sa klase samtang mainampoon silang magplano ug motabang sa pagtudlo sa mga leksyon gikan sa Dali, Sunod Kanako—Alang sa Young Women. Awhaga sila nga mangulo sa pagplano ug pagpahigayon og pagserbisyo ug mga kalihokan nga makatabang sa batan-ong mga babaye nga mouswag sa tanang aspeto sa ilang kinabuhi. Pagtanyag og dugang suporta ngadto sa batan-ong mga babaye nga nagkinahanglan niini.

Ilha ang batan-ong mga babaye sa tinagsa-tagsa. Pakigsulti sa batan-ong mga babaye, sa ilang mga ginikanan, ug sa bishopric kon sa unsang paagi nga makasuporta ka sa pag-uswag sa batan-ong mga babaye. Pag-ampo aron masayud kon sa unsang paagi ka makatabang nga magmalampuson ang imong mga kapangulohan sa klase sa ilang mga calling.

Tabangi ang mga ginikanan ug ang bishopric sa pag-andam sa batan-ong mga lalaki alang sa pagkaorden ngadto sa mga katungdanan sa pagkapari, sa mga pakigsaad sa templo, mga misyon, ug balaanong mga tahas. Dasiga sila nga makasabut sa ilang katuyoan ug pagkatawo isip mga anak sa Dios. Giyahi ang mga kapangulohan sa korum samtang sila mangulo, mangalagad, ug moserbisyo sa mga sakop sa ilang mga korum ug samtang sila mopahigayon sa ordinansa sa sakramento.

Pagpakita og ehemplo isip usa ka disipulo ni Jesukristo. Giyahi ang mga kapangulohan sa korum samtang mogamit sila sa ilang mga yawe, mopahigayon sa ordinansa sa sakramento, ug mainampoong magplano ug motabang sa pagtudlo sa mga leksyon gikan sa Dali, Sunod Kanako—Alang sa Young Men. Tabangi sila sa pagplano ug pagpahigayon og pagserbisyo ug mga kalihokan nga makatabang sa batan-ong mga lalaki nga mouswag sa tanang aspeto sa ilang kinabuhi. Tugoti sila nga mangulo. Pagtanyag og dugang suporta ngadto sa batan-ong mga lalaki nga nagkinahanglan niini.

Paggahin og panahon uban sa batan-ong mga lalaki. Ilha ug higugmaa sila sa tinagsa-tagsa. Pakigsulti sa bishopric, sa batan-ong mga lalaki, ug sa ilang mga ginikanan aron sa pagtino kon sa unsang paagi ka makasuporta kanila samtang magdako sila nga mahimong mas sama sa Manluluwas. Pag-ampo aron masayud kon sa unsang paagi ka makatabang sa imong mga kapangulohan sa korum sa paggamit sa ilang mga yawe ug magmalampuson sa ilang mga calling.

Paningkamot sa pagtabang sa kabatan-onan nga moduol ngadto kang Kristo pinaagi sa pagkat-on ug pagsunod sa Iyang doktrina. Tudloi ang kabatan-onan nga makasabut, mopaambit, ug mosunod sa ebanghelyo ni Jesukristo.

Pagpakita og ehemplo isip disipulo ni Jesukristo, ug tabangi ang kabatan-onan sa paglig-on sa ilang pagtuo. Awhaga sila sa pagtuon sa mga kasulatan diha sa panimalay—sa tinagsa-tagsa ug uban ang ilang mga pamilya. Tabangi sila sa pag-andam ug pagtudlo sa mga baruganan sa doktrina. Dapita sila sa paggamit sa unsay ilang nakat-unan ngadto sa ilang personal nga paglambo.

Paningkamot sa pagtudlo sama sa gibuhat sa Manluluwas. Ilha ang kabatan-onan sa tinagsa-tagsa. Pag-ampo aron masayud unsaon nimo sila pagtabang nga motubo nga mahimong mas sama sa Manluluwas. Lig-ona ang mga sakop sa klase ug ang ilang mga ginikanan sa mga paningkamot sa pagkat-on ug pagtudlo sa ebanghelyo diha sa simbahan ug sa ilang mga panimalay.

Ang bishopric mao ang kapangulohan sa Aaronic nga Pagkapari sa ward ug maoy responsable alang sa batan-ong mga babaye ug batan-ong mga lalaki. Ang mga kapangulohan sa mga korum sa Aaronic nga Pagkapari molihok uban sa gitugyan nga mga yawe kon ang mga presidente sa korum gi-set apart. Ang mga kapangulohan sa mga klase sa Young Women molihok ubos sa awtoridad sa pagkapari human sila na-set apart pinaagi sa usa ka sakop sa bishopric.

Ang mga kapangulohan kinahanglang maningkamot nga mahimong tinuod nga mga disipulo ni Jesukristo samtang motabang sila sa matag sakop sa korum o klase nga mobati nga gihigugma ug makakaplag og kalipay sa pagsunod sa ebanghelyo. Ubos sa direksyon sa bishopric, ang mga kapangulohan sa mga korum mangulo sa mga naghupot sa Aaronic nga Pagkapari samtang mopahigayon sila sa ordinansa sa sakramento. Ang mga kapangulohan sa mga korum ug mga klase mangulo sa pagpundok sa Israel sa duha ka habig sa tabil ug sa pag-amuma niadtong nanginahanglan.

Ang mga kapangulohan makat-on sa ilang mga katungdanan gikan sa Ginoo ug gikan sa ilang mga lider. Mag-ampo sila alang sa mga sakop sa korum o klase ug motino sa ilang mga panginahanglan. Mosuporta sila kanila nga mahimong mga disipulo ni Jesukristo. Magtinambagay sila sa usag-usa kon unsa nga mga leksyon, mga kalihokan, ug pagserbisyo ang mopanalangin ug molig-on sa kabatan-onan ug magmugna og panaghiusa sa ilang mga korum o mga klase.