Sapta 3: Lesin 2—Plwacn in Molwelah luhn Pahpah Inkuhsrao
“Sapta 3: Lesin 2—Plwacn in Molwelah luhn Pahpah Inkuhsrao,” Luti Wosasuc Luhk: Kolyuck in Akacsruhi ke Wosasuc luhn Jisus Kraist (2023)
“Sapta 3: Lesin 2,” Luti Wosasuc Luhk
Sapta 3: Lesin 2
Plwacn in Molwelah luhn Pahpah Inkuhsrao
Petsac
Ma sruhlwaclah luhn Kraist
Mwet uh Sahp ac Nuhnkuh
Meac srihpac luhn moul uh?
Nga tuhkuh oyac?
Kuh oasr God se suc luhngse nga? Nga kuh in puhla fuhkah lah El luhngse nga?
Nga kuh in luhlahlfongi fuhkah ke God finne ma koluk pukantwen sikyak?
Efuh moul uh arlac upac kuhtuh pacl? Nga kuh in konwacack fuhkah ahkkweyeyuck ke pacl inge?
Nga kuh in ahkwoyeyuc sifacna fuhkah?
Meac ac sikyak tukun nga misac?
Wosasuc fohlohkyak luhn Jisus Kraist el kahsre kuht in topuk kihsensiyuck yohk srihpac luhn nguhnasr. Nuh ke wosasuc uh, kuht etwaclah ke ohiyac muhtahl lasr ac sihpac ma pahtpaht oacna tuhlihk nuhtin God. Wosasuc uh use nuh sesr finsrak ac kahsre kuht puhla mihslac, engan, ac kahlwem. Moulkihnyacn wosasuc kahsre kuht in kapkapwack ac sokwack fokoko ke kuht sun elyah upac.
God El kena ma wo emet nuh sin tuhlihk Nahtuhl ac kena in use nuh sesr mwe insewowo wolacna emet Lal, suc pa moul suhkawihl ac moul ma pahtpaht (liye Moses 1:39; Doctrine and Covenants 14:7). Ke srihpen El luhngse kuht, El oraclah placn se nuh sesr in eis mwe insewowo inge. Ke ma suhmuhslah, plwacn se inge pahngpahng plwacn in molwelah, plwacn wolacna luhn engan, ac plwacn in iwaclah (liye Alma 42:5, 8, 11, 13, 15, 16, 31).
Ke plwacn luhn God, kais sie sesr wi fuhfahsryucsr se muhtwacwacack ke moul met liki facluh, isuslac, moul kawihl, misac, ac moul tukun misac. God El oraclah ma kuht enenuh nuh ke fuhfahsryucsr se inge pa oruh ke kuht misac, kuht kuh in sie pacl fohlohk nuh Yohrohl ac eis fohnlah luhn engan.
Jisus Kraist El pa infulwacn plwacn luhn God. Nuh ke Iwaclah ac Sifilpac Moulyak Lal, Jisus El oruh tuh kuht kais sie in eis moul suhkawihl ac moul ma pahtpaht.
Ke moul lasr fin facluh, kuht tiac esam moul lasr met liki facluh. Ac kuht tiac kahlwem ke moul lasr tukun kuht misac. Tuhsruhk, God El ahkkahlwemye ma pwacye puhkantwen ke ip inge ke fuhfahsryucsr ma pahtpaht lasr. Ma pwacye inge use etwacack fal nuh sesr in kahlwem ke srihpen moul uh, in puhla engan, ac in eis finsrak ke ma wo ma ac tuhkuh. Etwacack inge pa ma sacohk muhtahl se in kol kuht ke kuht oasr fin facluh.
Mwe Kahsruh nuh ke Luti
Sifac srihsrihk inge ahkuhtweyac kuhtuh inkacnek ma e kahsre kom in ahkolah luti. El oacyacpac nwacnwack kuhtuh kihsensiyuck ac nguhsr/solsol ma kom kuh in orekmakihn.
Ke kom ahkolah in luti uh, pruhe in etuh elyah ac enenuh luhn nguhn luhn kais sie mwet. Sulaclah lah piyac mwe luti wowo se in orekmakihn. Ahkolah in ahkuhtweyac kahs ma mwet ingacn tiac kahlwem kac. Plwacnelah in wo puhlan pacl kom e orekmakihn, esam in oruh in fototo lesin an.
Orekmakihn ma suhmuhslah ke kom luti an. Sactin kuh ip se ke “Pwelucng ke Wuhlweacng” ke lesin uh nwacnwack mwe rit puhs ma sang kahsruh.
Motko lah kihsensiyuck fuhkah kom e siyuck ke kom luti an. Plwacnelah atacn solsol ma kom e sang ma e pahtok kais sie in ahkfahsrye.
Ahkkahlwemye in kahlwem mwe insewowo God el olwelah, ac akacsruhi luhlahlfongi lom ke ma kom luti ingacn.
Petsac
misinacri luti sucu se
Meac Kom E Sang Luti Mwet uh ke Miniht 15-25
Sulaclah sie kuh puhs liki sie mwe luti tahklac inge ke plwacn in molwelah in luti. Pwelucng ke wuhlweacng nuh ke kais sie mwe luti inge sihmlac tukun ma inge.
Moul Met Liki Facluh: Srihpac ac Plwacn luhn God nuh Sesr
Kuht nuhkwewa pa tuhlihk in nguhn nuhtin God. El oraclah kuht ke luhmah Lal.
Kuht moul yurun God met liki kuht isuslac fin facluh. Kuht wi mwet ke sucu Lal. El etwekuht ac luhngse kuht kais sie.
God El oraclah plwacn se nuh ke engan ac kapwack lasr ke moul se inge ac nwe tok ma pahtpaht.
Ke moul lasr met liki facluh, kuht tuh sulaclah in ukwe plwacn luhn God. Pa oruh kuht tuhkuh nuh facluh kuht in muh kuh in fahsr nuh met ke kapkapwack ma pahtpaht lasr.
Jisus Kraist El infulwacn plwacn luhn God. El oruh tuh kuht kuh in eis moul kawihl ac moul ma pahtpaht.
Oreklac
Ye kohkoh luhn God, Jisus Kraist El oraclah facluh.
Puhtatlac lal Adam ac Eve
Adam ac Eve pa emet sin tuhlihk nuhtin God in tuhkuh nuh facluh. God El oraclah mahnolos ac fihlihltahluh in Imac luhn Eden.
Adam ac Eve elos tahfonglac, lihsyucklac elos liki imac ah, ac srweyucklac liki God. Ma se inge pahngpahng Puhtatlac sac.
Tukun Puhtatlac sac, Adam ac Eve kuh in misac. Oacna mwet kawihl, elos kuh in etwaclah, kapwack, ac oswe tuhlihk. Elos oacyacpac puhlakihn ahsor, ma koluk, ac misac.
Puhtatlac uh el step se nuh met luhn mwet uh.pa ip nuh sin mwet uh. Puhtatlac uh oruh tuh kuht kuh in isuslac fin facluh ac kapwack ke plwacn luhn Pahpah Inkuhsrao.
Moul Lasr fin Facluh
Ke plwacn luhn God, kuht enenuh in tuhkuh nuh facluh ac eis mahno luhn ikwoac, lutlut, ac kapwack.
Fin facluh, kuh etwaclah in fahsr ke luhlahlfongi. Tuhsruhk, Pahpah Inkuhsrao El tiac som liki kuht kuht in muhkwena. El use mwe sang ac mwe kahsruh puhs in kahsre kuht fohlohk nuh Yohrohl.
Iwaclah luhn Jisus Kraist
Kais sie sesr oruh ma koluk, ac kais sie sesr fah misac. Ke srihpen God El luhngse kuht, El suhpwacma Wen Nahtuhl, Jisus Kraist, nuh facluh in molikuhtlac liki ma koluk ac misac.
Ke srihpen kihsac in iwaclah luhn Jisus, kuht kuh in eis nuhnak muhnahs ac ahknwacsnwacsyeyucklac liki ma koluk lasr. Insiacsr kuh in ahkwoyeyucklac ke kuht auliyak. Ma inge oruh tuh kuht kuh in fohlohk nuh yurun God ac eis fohnlah luhn engan.
Ke srihpen Sifilpac Moulyak luhn Jisus, kuht nuhkwewa ac sifilpac moulyak tukun kuht misac. Pa inge kalmac tuh nguhn ac mahno luhn kais sie mwet ac fohlohkweni, ac kais sie sesr ac moul ne tok ma pahtpaht ke mahno suwohs, sifil moulyak se.
Jisus Kraist El use ahkkweyeyuck, finsrak, ac onweyuck. Kihsac in iwaclah Lal pa ma ahkkahlwemye emet luhn luhngse Lal. Ma nuhkwewa ma suhfal nuh ke moul uh kuh in ahkpwacyeiyucklac ke Iwaclah luhn Jisus Kraist.
Facluh luhn Nguhn
Ke pacl se mahno lasr uh misac uh, nguhn lasr uh moul na ke facluh luhn nguhn. Pa pacl fototo in etwaclah ac ahkolah met liki Sifil Moulyak uh.
Wosasuc luhn Jisus Kraist lutiyuck ke facluh luhn nguhn, ac kuht kuh in kalweni in kapwack ac fahsr nuh met.
Sifil Moulyak, Molwelah, ac Moul Ma Pahtpaht
Tukun pacl lasr ke facluh luhn nguhn, Sifil Moulyak uh pa ma se tukun fuhfahsryucsr ma pahtpaht lasr.
Sifil Moulyak uh pa fohlohkweni luhn nguhn ac mahno lasr. Kais sie sesr ac sifilpac moulyak ac eis mahno fas se. Kuht ac moul ne tok ma pahtpaht. Ma inge kuh in sikyak ke srihpen Iwaclah ac Sifilpac Moulyak luhn Mwet Lahngo.
Nuhnuhnkweyuck ac Tohkohsrahi luhn Wolacna
Ke kuht sifilpac moulyak, Jisus Kraist pa mwet in nuhnuhnkuh lasr. Sahyacna ma ma suhkwac sikyak, tuhlihk nuhtin God nuhkwewa fah eis sie acn ke tohkohsrahi luhn wolacna.
Finne kuht nuhkwewa ac ahkmoulyeyuckyak, kuht nuhkwewa fah tiac eis wolacna ma pahtpaht sepacna. Jisus El fah nuhnuhnkwe kuht fal nuh ke luhlahlfongi, orekma, ac auliyak lasr ke moul lasr ac ke facluh luhn nguhn. Kuht kuh in fohlohk moul yurun God kuht fin oaru ke luhlahlfongi.
Kihsen Siyuck Ma Kom Kuh in Siyuck Sin Mwet
Kihsen siyuck inge mwe srihkasrak ma kom kuh in siyuck sin mwet. Kihsen siyuck inge kuh in kahsre kom oruh in oasr srihpen sramsram lom an ac kahlwem ke mwe enenuh ac nuhnak luhn mwet se.
Puhla lom meac srihpen moul uh?
Meac oruh kom puhla engan?
Meac ma upac kom enenuh God Elan kahsrekom kac?
Meac kom etwaclah ke ma upac kom sun ingacn?
Meac kom etuh kacl Jisus Kraist? Moul ac orekma Lal ekuhllah moul lom fuhkah?
Solsol Ma Kom Kuh in Oruh
Kom kuh in pruhe ac siyuck sin God Elan kahsre kom etuh lah ma kuht luti inge pwacye? (Liye “Mwet Luti Fokoko: Pruhe” ke sactin/ip sahflah ke lesin se inge 1.)
Kuh kom kuh in wi kuht alu ke Sacnri uh ac etwaclah yohk ke ma kuht luti inge?
Kom kuh in riti Puk Luhn Mormon ac pruhe in etuh lah kahs luhn God? (Sahp kom ac sang kuhtuh sapta kuh fuhs an.)
Kuht kuh in oraclah sie pacl in fohlohk muhtwacta tok?
Petsac
sroal ke plwacn in molwelah
Pwelucng ke Ma Pwacye
Sactin se inge sang ma pwacye ac ma suhmuhslah nuh sum in lutlut ac ahkweye etwacack ac luhlahlfongi luhn wosasuc in kahsre kom luti.
Petsac
galaxies
Moul Met liki Facluh: Srihpac ac Plwacn luhn God nuh Sesr
Kuht Tuhlihk Nuhtin God, ac Kuht Moul Yohrohl Met liki Isuslac Lasr
El pa Pahpah tuhmwacn nguhn lasr. Kuht tuhlihk na pwacye Nahtuhl, oreklac ke Luhmahl. Kais sie sesr oasr srihpac muhtahl la ke srihpen kais sie sesr pa tuhlihk nuhtin God. Etwacack se inge kuh in kahsre kuht nuh ke pacl upac ac kuh in ahkweye kuht in ahkwoye moul lasr.
Kuht moul yurun God oacna tuhlihk in nguhn Nahtuhl met liki kuht isuslac fin facluh. Kuht wi mwet luhn sucu Lal.
Petsac
Prestuhn M. Russell Ballard
“Oasr ohiyac lasr ma kuht tuhkweni akacsruhi ingena ac nwe tok ma pahtpaht, ma kuht in tiac muhlkuhnlah, ac ma se kuht in sruikihn. Ma se inge tuh kom ingena ac nwe tok wen kuh acn nuhtin God ke ohiyacn nguhn lom som ne tok ma pahtpaht.
“… In kahlwem ke ma pwacye inge—kahlwem na pwacye ac sruok—ekuhllah moul lom. Use nuh sum ohiyac wolacna sifacna ma tiac kuh in itucklac liki kom. Tuh yohk liki ma ingacn, usot nuh sum in puhla lah kom arulacna sacohk ac yohk srihpen moul lom. Sahflah, ac usot nuh sum srihpac muhtahl, wo, ac suwohs ke moul lom.” (M. Russell Ballard, “Children of Heavenly Father” [Brigham Young University devotional, Mahs. 3, 2020], 2, speeches.byu.edu).
Kuht Sulaclah in Tuhkuh nuh Facluh
Pahpah Inkuhsrao El luhngse kuht ac kena tuh kuht in eklac oacna El. El mwet suc eis moul ma pahtpaht se ac oasr mahno ahkmuhtahlyeyuck Lal.
Ke moul lasr met liki facluh, kuht etwaclah tuh oasr plwacn luhn God nuh sesr in eklac in oacna El. Sie ip ke plwacn Lal pa kuht in som liki lohm inkuhsrao lasr ac tuhkuh nuh facluh in eis mahno luhn ikoac. Kuht oacyacpac enenuh in puhlakihn moul uh ac ahkyohkye luhlahlfongi ke pacl se ma kuht tiac oasr yurun God. Kuht ac tiac esam moul lasr yurun God. Tuhsruhk, El ac use ma kuht enenuh in fohlohk muhta Yohrohl.
Sukohsohk in sulaclah, kuh sukohsohk ac kuh in sulaclah, pa ip se ma enenweyuck ke plwacn luhn God nuh sesr. Ke moul lasr met liki facluh, kais sie sesr tuh sulaclah in ukwe plwacn luhn God ac tuhkuh nuh facluh kuht in muh kuh in eis ip se tok ke fuhfahsryucsr ma pahtpaht lasr. Kuht kahlwem lah ke kuht oasr inge, kuht ac eis pacl puhs sasuc in kapwack ac puhla engan. Kuht kahlwem pac lah kuht ac sun ma lain kuht. Kuht ac puhlakihn mwe sruhf, ma upac, ahsor, ac misac.
Ke kuht sulaclah in tuhkuh nuh facluh, kuht luhlahlfongi ke kahsruh ac luhngse luhn God. Kuht luhlahlfongi plwacn Lal nuh ke molwelah lasr.
Pahpah Inkuhsrao El Sulaclah Jisus Kraist in Molikuhtlac
Jisus Kraist El infulwacn plwacn luhn God. Met liki kuht tuhkuh nuh facluh, kuht etuh tuh kuht tiac kuh in fohlohk nuh yurun God ke orekma lasr sifacna. Pahpah Inkuhsrao El sulaclah Jisus Kraist, Wen lahp Nahtuhl, in oruh tuh kuht kuh in fohlohk nuh Yohrohl ac eis moul ma pahtpaht.
Jisus El insese nuh kac. El insese in tuhkuh nuh facluh ac molikuhtlac nuh ke iwaclah in kihsac Lal. Iwaclah ac Sifilpac Moulyak Lal pa oruh srihpac luhn God nuh sesr in sikyak.
Sifac ke Wosasuc: “Moul Met liki Facluh,” “Plwacn in Molwelah”
Petsac
tihli luhn faht meoa
Oreklac
Plwacn luhn Pahpah Inkuhsrao oruh tuh oasr oreklac luhn facluh, acn se ma tuhlihk in nguhn Lal ac eis mahno in ikoac ac eis etwacack. Moul lasr fin facluh enenweyuck nuh sesr in kapwack in eklac in oacna God.
Ye kolyuck luhn Pahpah Inkuhsrao, Jisus Kraist El oraclah facluh ac ma moul nuhkwewa. Na Pahpah Inkuhsrao El oraclah mukul ac muhtwacn ke Luhmahl sifacna. Oreklac uh ahkkahlwemye luhngse luhn God ac kena Lal nuh sesr in eis pacl in kapwack.
Adam ac Eve pa emet sin tuhlihk in nguhn nuhtin God in tuhkuh nuh facluh. God El oraclah mahno in ikoac lalos ke Luhmahl sifacna ac fihlihltahluh ke Imac luhn Eden. Ke imac uh elos tiac etuh ma wo liki ma koluk, ac God El sang mwe enenuh lalos.
Ke Adam ac Eve muhta ke imac uh, God El sapkihn nuh selos in tiac kang fukun sahk se ke sahk luhn etwacack ke ma wo ac ma koluk. Fin elos ahkos masap se inge, elos kuh in muhta ke imac sac. Tuhsruhk, elos tiac kuh in kapwack fin elos tiac lotwelah mwe lain ac ma upac ke moul uh. Elos tiac kuh in etuh engan pwacye ke srihpen elos tiac kuh puhla ahsor ac ngal.
Setuhn el srihfaclos Adam ac Eve in kang fukun fahk soko ah, ac elos sulaclah in oruh oacna. Ke srihpen sulaclah inge, lihsyucklac elos liki imac ah ac srweyucklac elos liki God. Ma tuh sikyak inge pa pahngpahng Puhtatlac Sac.
Tukun Puhtatlac Sac
Tukun Puhtatlac Sac, Adam ac Eve kuh in misac. Elos tilac nihkihn ma uh, elos kahlwem ac puhlakihn kwewa ma wo ac ma koluk. Elos kuh in orekmakihn sukohsohk in sulaclah lalos in sulaclah inmahsrloh. Ke srihpen Adam ac Eve sun ma lain ac ma upac, elos kuh in etuh ma uh ac kapwack. Ke srihpen elos puhla ahsor, elos kuh pac in puhla engan. (Liye 2 Nephi 2:22–25.)
Finne oasr ma upac lalos, Adam ac Eve nuhnkuh lah moul kawihl pa mwe insewowo yohk se. Sie mwe insewowo pa elos kuh in oswe tuhlihk. Ma inge oraclah inkacnek se nuh sin tuhlihk in nguhn nuhtin God sahyac in tuhkuh nuh facluh ac eis mahno ikoac.
Ke mwe insewowo luhn Puhtatlac Sac, Adam ac Eve kwewana engankihn. Eve el fahk lah fin tiac ke tahfonglac lalos elos el tiac kuh in eis [tuhlihk], ac tiac etwaclah ma wo ac ma koluk, ac engan luhn molwelah lalos, ac moul ma pahtpaht ma God El sang nuh sin mwet ahkostwen nuhkwewa. (liye Moses 5:11; liye pac fuhs 10).
Sifac ke Wosasuc: “Fall of Adam and Eve,” “Agency and Accountability”
Moul Lasr fin Facluh
Puhkantwen mwet nuhnkuh, “Efuh nga oasr fin facluh?” Moul lasr fin facluh yohk srihpac nuh ke plwacn luhn God ke kapwack ma pahtpaht lasr. Srihpac yohk emet lasr pa in ahkolah in fohlohk nuh yurun God ac eis fohnlahiyacn engan. Ahkuhtweyucki ten ke kuhtuh ohiyac ma moul fin facluh ahkoekuhtlac nuh ke ma inge.
Petsac
tuhlihk mukul fuhsr isrwacsr
Eis Mahno luhn Ikoac
Sie srihpac kuht tuhkuh nuh facluh pa in eis mahno luhn ikoac ma nguhn lasr kuh in muhta loac. Mahnosr muhtahl, oreklac wolacna sin God. Ke mahno luhn ikoac, kuht kuh in mukwikwi, etwaclah, ac puhlakihn ma puhkantwen nguhn lasr tiac kuh in oruh. Kuht kuh in kapwack ke ohiyac puhs ma nguhn tiac kuh in oruh.
Ke srihpen mahno lasr uh kuh in misac, kuht puhla ngal, kweok, ac ma upac sahyac. Ma kuht puhla inge kahsre kuht etwaclah muhtweng, kuhlwacng, ac ohiyac muhtahl sahyac. Kuh pac in ip se ke inkacnek lasr nuh ke engan pwacye. Sulaclah ma pwacye finne upac in oruh pwacnwacng luhlahlfongi, finsrak, ac luhngse pwacye ip se in kuht.
Etwaclah in Orekmakihn Sukohsohk in Sulaclah ke Ma Wo
Sie pac srihpen moul uh pa in etwaclah in orekmakihn sukohsohk in sulaclah lasr ke ohiyac wo—in sulaclah ma pwacye. Etwaclah in orekmakihn sukohsohk in sulaclah lasr ke ohiyac wo enenweyuck in eklac oacna God.
Pahpah Inkuhsrao ac Jisus Kraist luti kuht ma wo ac use nuh sesr masap in kol kuh nuh ke engan. Setuhn el srihfe kuht in oruh ma koluk, el kena tuh kuht in ahsor oacna el. Kuht sun lain inmahsrlon ma wo ac ma koluk, ma kuht enenuh in etwaclah in orekmakihn sukohsohk in sulaclah lasr. (liye 2 Nephi 2:11).
Ke kuht ahkos God, kuht kapwack ac eis olwelah uliyuck Lal. Ke kuht tiac ahkos, kuht fahsr Luhkwel ac eis ma sikyak ke ma koluk. Finne kuhtuh pacl ma inge luhman tiac pwacye, ma koluk kwacna kol nuh ke suhpwacr. Inkaiyacn pacl uh mwe insewowo luhn seahkostwen—ac ma tuhkuh ke ma koluk—tiac sa in sikyak kuh liyeyuck. Tuhsruhk kwacna sikyak, ke srihpen God El suwohs.
Finne kuht sang kuhiyacsr, kuht nuhkwewa oruh ma koluk ac “tia sun lupan wolana se ma God El akoo” (Mwet Rome 3:23). El etuh ma inge, Pahpah Inkuhsrao El use inkacnek nuh sesr in auliyak kuht in muh kuh in fohlohk nuh Yohrohl.
Auliyak uh use kuh luhn Mwet in Molwelah lasr, Jisus Kraist, nuh ke moul lasr (liye Helaman 5:11). Ke kuht auliyak, kuht nwacsnwacslah liki ma koluk ke kihsac muhtahl sel Jisus Kraist ac ke mwe sang luhn Nguhn Muhtahl (liye 3 Nephi 27:16–20). Ke kuht auliyak uh, kuht puhlakihn engan. Inkacnek in fohlohk nuh yurin Pahpah tuhmasr Inkuhsrao ikack nuh sesr, ke srihpen El pahkotwen. (Liye “Auliyak” ke lesin 3.)
Etwaclah in Fahsr ke Luhlahlfongi
Sie pac srihpen moul se inge pa in eis etwacack ma kuh in tuhkuh muhkwena nuh ke srweyucklac lasr liki Pahpah Inkuhsrao. Ke srihpen kuht tiac Liyacl, kuht enenuh in luti in fahsr ke luhlahlfongi (liye 2 Corinth 5:6–7).
God El tiac som liki kuht in muhkwena ke fuhfahsryucsr se inge. El use Nguhn Muhtahl in kol, ahkkweye, ac ahkmuhtahlye kuht. El oacyacpac use ma suhmuhslah, mwet pahluh, pruhe, ac wosasuc luhn Jisus Kraist.
Ip nuhkwewa ke moul lasr facluh—engan ac ahsor, kuhtanglah ac kuf—kuh in kahsre kuht kapwack ke kuht ahkolah in fohlohk nuh yurin God.
Ke srihpen Puhtatlac lal Adam ac Eve, kuht nuhkwewa puhlakihn ma koluk ac misac. Kuht tiac kuh in kuhtanglah ma koluk ac sifacna misac. Ke plwacn in molwelah luhn Pahpah tuhmasr Inkuhsrao, El oraclah inkacnek se in kuhtanglah ma tuhkuh ke srihpen Puhtatlac Sac kuht in muh kuh in fohlohk nuh Yohrohl. Met liki facluh oreklac ah, El sulaclah Jisus Kraist in Mwet in Molwelah ac Mwet Lahngo lasr.
Jisus Kraist El muhkwena kuh in molikuhtlac liki ma koluk ac misac. El pa Wen pwacye nuhtin God. Wacngihn ma koluk Lal, ahkostwen suwohs nuh sin Pahpah Tuhmwacl. El ahkolah ac luhngse in oruh kena luhn Pahpah Inkuhsrao.
Iwaclah luhn Mwet Lahngo pa kweok Lal Gethsamane, kweok ac misac Lal fin sahksin soko, ac Sifilpac Moulyak Lal. Keok Lal tiac kuh ahkuhtweyucki—upac oruh pat nuhkwewa Kacl srah kahk kacl (liye Doctrine and Covenants 19:18).
Iwaclah luhn Jisus Kraist pa ma wolacna emet ke ma nuhkwewa ma sikyak ke sramsram mahtuh emet me luhn mwet. Sin kihsac in iwaclah Lal, Jisus El oruh tuh plwacn luhn Pahpah Tuhmwacl kuh in sikyak. Wacngihn ma kuh in kahsre kuh fin tiac ke Iwaclah luhn Jisus Kraist ke srihpen kuht tiac kuh in molikuhtlac sifacna liki ma koluk ac misac (liye Alma 22:12–15).
Kihsac luhn Mwet Lahngo lasr pa mwe ahkkahlwemye yohk emet ke luhngse nuh sin Pahpah Tuhmwacl ac nuh sesr. “Sralapa, lusa, fulata ac loaliyen” luhngse luhn Kraist yohk liki kuh in luhmweyac sesr. (Mwet Ephesus 3:18; liye pac fuhs 19).
Petsac
Srihpsrihpyak, sel Harry Andersen
Jisus Kraist El Kuhtanglah Misac nuh sin Mwet Nuhkwewa
Ke Jisus Kraist El misac fin sahksin soko, Nguhnal som liki Mahnol. Ke lwen ahktolu, Nguhnal ac Mahnol fohlohkweni, tiac sifwilpac fahsrwelihk. El sikyang nuh sin mwet puhs, ahkkahlwemye nuh selos lah oasr mahno in ikoac ac sri Kacl. Fohlohkweni se luhn mahno ac nguhn uh pahngpahng Sifilpac Moulyak.
Ekihn mwet fin facluh, kais sie sesr ac misac. Tuhsruhk, ke srihpen Jisus El kuhtanglah misac uh, mwet nuhkwewa suc isuslac fin facluh fah sifilpac moulyak. Sifilpac Moulyak sac pa mwe sang se nuh sin mwet nuhkwewa, ituckyang sin pahkomuhta ac luhng kuhlwacng in molwelah luhn Mwet Lahngo. Nguhn ac mahno luhn kais sie mwet ac fohlohkweni, ac kais sie sesr fah moul ne tok ke mahno fas, ac moulyak se. Fin tiac ke Jisus Kraist, misac fah ahksahfye finsrak nuhkwewa in sulpac moul yurun Pahpah Inkuhsrao (liye 2 Nephi 9:8–12).
Jisus El Oruh tuh Kuht in Kuh in Ahknwacsnwacsyeyucklac liki Ma Koluk Lasr
In kahlwem ke finsrak kuht kuh in eis sin Kraist, kuht enenuh in kahlwem ke masap luhn nuhnuhnkuh. Pa inge masap se ma wacngihn eklac kac ma use ma e sikyak tukun ma kuht oraclah. Ahkostwen nuh sin God use ma wo puhs, ac seahkostwen use ma koluk. (Liye Alma 42:14–18.) Ke kuht oruh ma koluk, kuht fohkfohklah in nguhn, ac wacngihn ma fohkfohk kuh in muhta yurun God (liye 3 Nephi 27:19).
Petsac
Jisus El Pruhe fin acn Gethsemane, sel Harry Anderson
Ke kihsac in iwaclah luhn Jisus Kraist, El tu ahol kuht, kweok, ac molwelah mwactan ma koluk lasr (liye 3 Nephi 27:16–20). Plwacn luhn God sang kuh nuh sel Jisus Kraist in oruh iwaclah nuh sesr—tu infulwacsr ac nuhnuhnkuh suwohs (liye Mosiah 15:9). Ke srihpen kihsac in iwaclah luhn Jisus, El kuh in eis suwohs Lal ke pahkotwen ke srihpacsr ke kuht orekmakihn luhlahlfongi nuh ke auliyak (liye Moroni 7:27; Doctrine and Covenants 45:3–5). “Ac ohinge pahkotwen kuh in ahkfalye mwe enenweyuck luhn nuhnuhnkuh suwohs, ac kuhluhskuhtyak ke langweyucklac” (Alma 34:16).
Nuh ke mwe sang luhn Iwaclah luhn Mwet Lahngo muhkwena ac auliyak lasr kuht kuh in fohlohk in moul yurun God. Ke kuht auliyak, kuht eis nuhnak muhnahs ac ahknwacsnwacsyeyucklac in nguhn. Kuht sukohsohklah liki toasriyacn mwactan ma koluk lasr. Nguhn kihnet lasr fah eis onweyuck. Kuht sesseslah ke engan (liye Alma 36:24).
Finne kuht sesuwohs ac fah sulpac puhtatlac, oasr yohk luhng kuhlwacng, luhngse, ac pahkomuhta ke Jisus Kraist liki tahfonglac, ma muhnahs, kuh ma koluk lasr. God El kwacna ahkolah ac luhngse in ahkkweye kuht ke kuht foracng nuh Sel ac auliyak (liye Luke 15:11–32). Wacngihn ma ac wacngihn mwet “fah ku in srikutla liki lungse lun God, su ma lasr ke Christ Jesus Leum lasr.” (Romans 8:39).
Jisus Kraist El Eis nuh Facl Ngal, Kweok, ac Mas Lasr
Ke kihsac in iwaclah Lal, Jisus Kraist El eis nuh Facl ngal, kweok, ac mas lasr. Ke srihpen ma inge, El etuh “fal nuh ke mahno lah El ac kahsruh fuhkah mwet Lal fal nuh ke mas lalos” (Alma 7:12; liye pac fuhs 11). El suli, “Fahsru nu yuruk,” ac ke kuht oruh, El use nuh sesr monglac, finsrak, kuh, liyactwen, ac onweyuck (Matthew 11:28; liye pac fuhs 29–30).
Ke kuht luhlahlfongi Jisus Kraist ac Iwaclah Lal, El kuh in kahsre kuht muhtweng ma upac, mas, ac kweok lasr. Kuht kuh in sesseslah ke engan, mislac, ac ahkkweyeyuck ke kuht ahsor. Ma nuhkwewa ma suhfal nuh ke moul uh kuh in ahkpwacyeiyucklac ke Iwaclah luhn Jisus Kraist.
Puhs mwet nuhnkuh, “Meac sikyak tukun nga misac?” Plwacn in molwelah use top yohk srihpac nuh ke kihsen siyuck se inge.
Misac uh pa ipin “plwacn in pahkomuhta” luhn God nuh sesr (2 Nephi 9:6). Sahyacna sahflahiyacn moul lasr, misac uh pa ip se tukun fuhfahsryucsr ma pahtpaht lasr. In eklac oacna God, kuht enenuh in puhlakihn misac ac tok eis mahno suwohs, sifilpac moulyak.
Ke pacl se mahnosr misac uh, nguhn lasr uh moul na ke facluh luhn nguhn. Pa pacl fototo in etwaclah ac ahkolah met liki Sifil Moulyak ac Nuhnuhnkuh Sahflah uh. Etwacack lasr ke moul facluh srwackna oasr yohrohsr.
Ke facluh luhn nguhn, mwet suc eis ac moulkihn wosasuc luhn Jisus Kraist “eisyuck nuh ke sie acn engan, ma pahngpahng pacruhtais” (Alma 40:12). Tuhlihk srihsrihk oacyacpac eisyuck nuh ke pacruhtais ke elos misac.
Nguhn ma oasr ke pacruhtais ac puhla mihslac liki ma toasr ac mwe ahsor lalos. Elos ac kampare nuh met ke kapwack in nguhn lalos, oruh orekma luhn God ac kuhlwacnsap nuh sin mwet sahyac. Elos ac luti wosasuc nuh selos suc tiac eis ke moul facluh lalos (liye Doctrine and Covenants 138:32–37, 57–59).
Ke facluh luhn nguhn, mwet suc tiac kuh in eis wosasuc fin facluh, kuh sulaclah in tiac ukwe masap uh, e srihklac ma elos eis (liye Doctrine and Covenants 138:6–37; Alma 40:6–14). Tuhsruhk, ke srihpen God El suwohs ac pahkotwen, ac oasr pacl lalos in lutiyuck ke wosasuc luhn Jisus Kraist. Fin elos insese ac auliyak, elos ac moliyucklac liki ma koluk lalos (liye Doctrine and Covenants 138:58; liye pac 138:31–35; 128:22). Painyuck elos nuh ke mihslac luhn pacruhtais. Ke sie pacl elos fah eis acn se ke sie tohkohsrahi luhn wolacna fal nuh ke sulaclah lalos ke moul facluh ac ke facluh luhn nguhn.
Kuht ac oan na fin facluh luhn nguhn ne ke pacl se kuht sifilpac moulyak.
Plwacn luhn God oruh tuh kuht in kapwack ac eis moul ma pahtpaht. Tukun pacl lasr ke facluh luhn nguhn, Sifilpac Moulyak sac pa ip se tok ke kapwack sacn.
Sifilpac Moulyak uh pa fohlohkweni luhn mahno ac nguhn lasr. Kais sie sesr fah sifilpac moulyak. Ma inge kuh in sikyak ke srihpen Iwaclah ac Sifilpac Moulyak luhn Mwet Lahngo. (Liye Alma 11:42–44.)
Ke kuht sifilpac moulyak, ac oasr mahno fas se lasr, sukohsohk liki ngal ac mas. Kuht ac tiac sulpac misac, moul ne tok.
Molwelah
Ke srihpen kuht nuhkwewa ac sifilpac moulyak, kuht nuhkwewa ac moullac—kuh eis moliyucklac—liki misac luhn mahno. Mwe sang se inge utuckuh nuh sesr ke luhngkuhlwacng luhn Jisus Kraist.
Kuht kuh in moliyucklac—kuh eis molwelah—liki ma tuhkuh sikyak ke ma kuht oraclah ma masap luhn nuhnuhnkuh enenuh nuh ke ma koluk lasr. Mwe sang se inge kuh in sikyak ke orekma ac pahkomuhta luhn Jisus Kraist ke kuht auliyak. (Liye Alma 42:13–15, 21–25.)
Moul Ma Pahtpaht
Moul ma pahtpaht, pa ohiyac emet in engan ac wolacna ke tohkohsrahi celestial. Moul ma pahtpaht el mwe sang wolacna eisyuck se Prestuhn Russell M. Nelson el luti, “Ma enenweyuck sacn pa luhlahlfongi ke Leum, auliyak, pacptais, eis Nguhn Muhtahl, ac kampare in luhlahlfongi ke akwuck ac olwelah luhn tempuhl uh” (“Salvation and Exaltation,” Ensign or Liahona, Mei 2008, 9).
Kalmacn moul ma pahtpaht pa muhta yurin God ne tok ke sucu ne tok ma pahtpaht. Pa in etuh kacl God ac Jisus Kraist, eklac oacna Elos, ac puhlakihn moul se ma Elos engankihn.
Mwe kahsruh: Ke pacl se met kom luti ke tohkohsrah luhn wolacna, luti ke ohiyac fihsrwacsr se fal nuh ke mwe enenuh ac kahlwem luhn mwet se.
Ke kuht sifilpac moulyak, Jisus Kraist El pa mwet nuhnuhkuh wo ac suwohs lasr. Sahyacn na mwet na suhpuhs, kais sie sesr fah eis acn se ke tohkohsrahi in wolacna se. Finne mwet nuhkwewa ac sifilpac moulyak, kuht ac tiac eis wolacna ma pahtpaht sepacna (liye Doctrine and Covenants 88:22–24, 29–34; 130:20–21; 132:5).
Mwet ma tiac eis pacl la in kahlwem na pwacye ac ahkos masap luhn God ke moul facluh lalos fah eis pacl sacn ke facluh luhn nguhn. Jisus El fah nuhnuhkuh kais sie mwet fal nuh ke luhlahlfongi, orekma, kena, ac auliyak lal ke moul lal ac ke facluh luhn nguhn (liye Doctrine and Covenants 138:32–34, 57–59).
Ma suhmuhslah luti ke tohkohsrahi luhn wolacna celestial, terrestrial, ac telestial. Kais sie selos ahkkahlwemye luhngse, nuhnuhnkuh, ac pahkomuhta luhn God.
Elos suc orekmakihn luhlahlfongi ke Kraist, auliyak ke ma koluk lalos, eis akwuck luhn wosasuc, karihngihn olwelah lalos, eis Nguhn Muhtahl, ac kampare nuh ke sahflah fah eis moul ma pahtpaht ke tohkohsrah celestial. Tohkohsrah se inge weacng mwet suc suc tiac eis pacl in eis wosasuc ke moul facluh lalos tuh ac eis ke insiaclos nuhkwewa fin kuh ac oruh ke facluh luhn Nguhn (liye Doctrine and Covenants 137:8; liye pac fuhs 7). Tuhlihk suc misac met liki matwac fal in nuhnuhnkweyuck (yac alkosr) ac moliyucklac pac ke tohkohsrahi celestial (liye Doctrine and Covenants 137:10).
Ke ma suhmuhslah, tohkohsrahi celestial kapsreyuck nuh ke wolacna kuh kahlwemiyacn faht ah. (Liye Doctrine and Covenants 76:50–70.)
Mwet suc moul suwohs tuh tiac eis luhlahlfongi ke Jisus ke moul in ikoac lalos, tuh eis tok fah eis acn se ke tohkohsrahi terrestrial (Doctrine and Covenants 76:74). Ma se inge pwacye pac nuh selos suc tiac kampare ke luhlahlfongi lalos ke Jisus. Tohkohsrahi se inge kapsreyuck nuh ke wolacnaiyacn mahlwem. (Liye Doctrine and Covenants 76:71–80.)
Elos suc srwackna oruh ma koluk ac tiac auliyak ke moul se inge kuh eis wosasuc luhn Jisus Kraist ke facluh luhn nguhn fah eis opi lalos ke tohkohsrahi telestial. Tohkohsrahi se inge kapsreyuck nuh ke wolacnaiyacn itu uh. (Liye Doctrine and Covenants 76:81–86.)
Outline se ten inge atac se ma kom kuh in luti nuh sin mwet fin kihtin pacl na pa oasr yurum uh. Fin orekmakihn outline se inge, sulaclah sie kuh puhs mwe luti kom in orekmakihn. Pwelucng ke ma pwacye ke kais sie mwe luti inge oreklac tari oasr ke lesin met ingacn.
Ke kom luti an, siyuck kihsen siyuck ac lihpsre. Oruh nguhsr kuh solsol ma e kahsruh mwet ingacn in lotwelah in puhla fototoi nuh sin God. Sie solsol kuh nguhsr yohk srihpac ah pa ngac komtacl ac sifil ohsun uh. Lusen lesin se ingacn e fahsr fal nuh ke kihsensiyuck ma kom siyuck ac puhlan pacl kom lihpsre an.
Meac Kom E Sang Luti Mwet ke Mihnit 3-10
Kuht nuhkwewa tuhlihk nguhn nuhtin God. Kuht nuhkwewa wi sucu Lal. El etwe kuht ac luhngse kuht kais sie.
God El oraclah plwacn se nuh sesr ke engan ac kapwack lasr ke moul se inge ac ne tok ma pahtpaht.
Ke plwacn luhn God, kuht enenuh in tuhkuh nuh facluh in eis mahno luhn ikwoac, etwaclah, ac kapwack.
Jisus Kraist El infulwacn plwacn luhn God. El oruh fihsrwacsr nuh sesr in eis moul ma pahtpaht
Ye kolyuck luhn God, Jisus El oraclah facluh.
Ma kuht puhlakihn fin facluh oreklac in kahsre kuht ahkolah in fohlohk nuh yurun God.
Kais sie sesr oruh ma koluk, ac kais sie sesr fah misac. Ke srihpen God El luhngse kuht, El suhpwacma Wen Nahtuhl, Jisus Kraist, nuh facluh in molikuhtlac liki ma koluk ac misac.
Ma nuhkwewa ma suhfal nuh ke moul uh kuh in ahkpwacyeiyucklac ke Iwaclah luhn Jisus Kraist.
Ke mahno in ikoac lasr misac, nguhn lasr srwackna moul. Tukun lusen pacl kuht nuhkwewa fah sifilpac moulyak. Pa inge kalmac tuh nguhn ac mahno luhn kais sie mwet ac fohlohkweni, ac kais sie sesr ac moul ne tok ma pahtpaht ke mahno suwohs, sifil moulyak se.
Ke kuht sifilpac moulyak, Jisus Kraist pa mwet in nuhnuhnkweyuck lasr. Sahyacna ma ma suhkwac sikyak, tuhlihk nuhtin God nuhkwewa fah eis sie acn ke tohkohsrahi luhn wolacna. Kuht kuh in fohlohk in moul yurun God kuht fin oaru ke luhlahlfongi.