Suc Jisus Kraist? El kuh in kahsrweyuc ac sucu luhk uh fuhkah?
Meac kalmac in oasr luhlahlfongi la kacl Jisus Kraist? Luhlahlfongi luhk kwacl Jisus Kraist e ahkinsewowoye moul luhkuh fuhkah?
Meac kalmeyac in auliyak?
Nga puhlah fuhkah mislac ac nuhnakmuhnahs lal God tukun nga orwaclah tahfonglac uh?
Meac srihpac luhn pacptais?
Meac mwe sang luhn Nguhn Muhtahl?
Meac kalmeyac in kampare nuh ke sahflah?
Wosasuc luhn Jisus Kraist pa inkacnek kuht eis in fahsr nuh yurin Kraist. Arulacna fihsrwacsr pwacnwacng finne sie tuhlihk srihsrihk kuh in kahlwem kac. Lesin se inge som yohk nuhke wosasuc ac mwe lutlut ke Kraist, weacng pac luhlahlfongi ke Jisus Kraist, auliyak, pacptais, mwe sang luhn Nguhn Muhtahl, ac kampare nuhke sahflah. El oacyacpac sruhmuhn lah wosasuc luhn Kraist ahkinsewowoye fuhkah nohfohn tuhlihk nuhtin God.
Kahs se wosasuc uh kalmac pa “pweng wo.” Wosasuc luhn Jisus Kraist el pweng wo ke sripen el use mwe luti—kahs pwacye ac moul—kuht enenuh in fahsr nuh yohrohl ac moliyucklac (liye 1 Nephi 15:14). Wosasuc uh el luti kuht ohiyacn moul wowo ma oasr kalmeyac. Pweng wo ke wosasuc use inkacnek nuh sesr in auliyak ke ma koluk lasr, ahknwacsnwacsyeyucklac, ac fohlohk nuh yohrohl God.
Kahsruh nuh ke Luti
Ip se inge use sie mwe srihkasrak nuhke ma tahklac in kahsrwekom in ahkolah in luti. Oasr pac kihsensiyuhk ac mwe suliyuck suc kom kuh in orekmakihn ma kom ac konwacack kac.
Ke kom ahkolah in luti uh, nuhnkuh ke kais sie ma mwet se el oasr kac ac enenuh nuhke nguhn. Pakiyac lah meac se e wo ac yohk kahsruh kac emet kom in luti uh. Ahkolah in ahkuhtweyac kahs ma mwet uh e sahp tiac kahlwm kac. Ahkolah fal nuhke pacl kom e mwesahs an, ac esam in oruh in fototo mwe lutlut an.
Sulaclah fohs ke ma suhmuhslah in orekmakihn ke pacl se kom e luti uh. Ke “Doctrinal Foundation” kom kuh in konwacack fohs puhkantwen ma e kuh in kahsruh luti an.
Motko kac lah piac kihsensiyuck kom e siyuck ke kom luti uh. Ahkolah in sang suliyuck ma e pahtok kais sie mwet in mukwiyak.
Ahkuhtweyac yohk ke mwe insewowo suc God el olwelah, ac ahkacsruhi ke luhlahlfongi lom ke ma kom luti an.
Petsac
misinacris elos luti sucu se
Meac kom kuh in sang luti mwet uh ke miniht 15-25
Sulaclah sie kuh luo sin mwe lutlut yohk inge in luti. Mwe luti yohk ke kais sie akwuck inge el utuckuh oasr tukun ma tahklac inge.
Orekma Muhtahl luhn Jisus Kraist
God el suhpwacma Wen Kuloh nahtuhl, Jisus Kraist, nuh facluh in molikuhtlac liki ma koluk ac misac.
Ke sripen Iwaclah lal Jisus Kraist, kuht e kuh in eis nuhnak muhnahs ke ma koluk ac ahknwacsnwacsyeyuhklac ke kuht auliyak uh.
Tukun Jisus Kraist el tuh srihpsrihpyak fin sahksin soko ah, El tuh sifilpac moulyak. Ke sripen sifilpac moulyak Lal, kuht e sifilpac moulyak tukun kuht misac. Kalmeac pa nguhn and mahno luhn kais sie mwet e fah fohlohkweni ma se fanna, ac kais sie sesr e fah moul ne tok ke mahno fohlohkyak wacngihn ma suhfal kac.
Luhlahlfongi kacl Jisus Kraist
Luhlahlfongi pa ip yohk se emeet ke wosasuc luhn Jisus Kraist.
Luhlahlfongi ke Jisus Kraist pa in etuh na pwacye lah El pa Wen nuhtin God ac luhlahlfongi muh El pa Mwet Lahngo ac Molwelah lasr.
Luhlahlfongi ke Jisus Kraist pa ip yohk nuh ke mukwikiwi ac kuh uh.
Kuht ahkfokoye luhlahlfongi lasr ke pruhe ac lutlutkihn ma suhmuhslah ac ahkos masap.
Auliyak
Luhlahlfongi kacl Jisus Kraist kol kuht in auliyak. Auliyak pa ohiyac in ngwet nuh yurin God ac forlah liki ma koluk. Ke kuht auliyak uh, mukwikwi lasr, kena lasr, ac nuhnak lasr eklac in wi kena ac luhngse luhn God.
Ke kuht auliyak na pwacye ke insiyacsr uh, God el nuhnak muhnahs nuh sesr. Nuhnak muhnahs uh kuh in utuckuh nuh sesr ke sripen Jisus Kraist el misac ac elah ma kulok lasr.
Ke kuht auliyak uh, kuht puhla mislac ke ma koluk ac ahsor lasr wacngihnlac uh.
Auliyak uh el ohiyac se ma orek ke lusen moul lasr fin facluh. God el eis kuht pacl nuhkwewa kuht auliyak uh. El fah tiacna fuhlweack in siskuhtlac.
Pacptais: Olwelah se emeet lasr sin God.
Pacptais pa muhtwacwacackiyen olwelah lasr sin God uh.
Oasr ip luo ke pacptais: pacptais ke kof ac pacptais ke nguhn. Ke kuht pacptaislac ac ahkkweyeyucklac uh, kuht ahknwacsnwacsyeyuhklac liki ma koluk lasr, pwacnwacng use nuh sesr kuht in muhtwacwcaack sasuc ke moul lasr uh.
Kuht pacptaislac ke tilli ac otyak liki kof, in ukwe srihkasrak lal Jisus.
Tuhlihk srihsrihk uh elos tiac pacptais neke elos yac alkosr. Tuhlihk ma misac met liki matwac se inge elos moliyucklac ke Iwaclah lal Jisus Kraist.
Kuht ipeis ke kuhfa luhn Leum ke kais sie wik in esamuhl Jisus ke kisackunlah Lal ac in ahksasucye olwelah lasr nuh sin God.
Mwe Sang luhn Nguhn Muhtahl
Nguhn Mutahl el mwet in kahsruh ahktolu ke Sifac ke God.
Tukun kuht pacptaislac uh, kuht eis mwe sang luhn Nguhn Muhtahl ke akwuck ac ahkkweyeyuck.
Ke kuht eis mwe sang luhn Nguhn Muhtahl, el ac kuh in wi kuht ke moul lasr kuht fin kampare ahkos.
Nguhn Muhtahl el ahknwacsnwacsye kuht, kol kuht, ahkkweye kuht, ac kahsrwe kuht in etuh ma pwacye.
Kampare nuh ke Sahflah
Kampare pa in tahfwelah na in ahkfokokoye luhlahlfongi lasr ke Kraist ke lwen nuhkwewa. Kuht tahfwelah in liyacacng olwelah lasr sin God, auliyak, suk nguhn muhtahl in wi kuht, ac eis kuhfa luhn Leum.
Ke kuht suk in ukwe Jisus Kraist, God el olwelah muh kuht e fah eis moul ma pahtpaht.
Wosasuc luhn Jisus Kraist ahkinsewowoye nohfohn tuhlihk nuhtin God.
Wosasuc luhn Jisus Kraist ahkyohkye engan lasr, kol kuht ke orekma lasr, ac ahkfokokoye kawuck lasr.
Fihsrwacsr kuht in engan—kuht sifacna ac oacyacpac sucu—ke kuht e moulkhin mwe lutlut lal Jisus Kraist uh.
Ke wosasuc luhn Jisus Kraist, sucu uh ahkinsewowoyeyuck ke moul se inge ac kuh in tuhkweni ne tok ac muhta yurin Pahpah Luhng.
Kihsen Siyuck Kom Kuh In Siyuck Sin Mwet
Kihsen siyuck inge el kuhtuh sin kihsen siyuck ma kom kuh in siyuck sin mwet uh. Kihsen siyuck inge kuh in kahsrwekom in sramsram sin mwet ac kahlwem ke enenuh ac liye luhn mwet se.
Meac kom etuh kacl Jisus Kraist?
Meac kalmac nuh sum in oasr luhlahlfongi lom ke Jisus Kraist?
Eklac fuhkah kom ke orwaclah ke moul lom an?
Meac kahlwem lom ke auliyak?
Meac kahlwem lom ke pacptais? Meac kom kuh in oruh ingena in ahkolah nuhke pacptais?
Nguhn muhtahl e fuhkah kahsrwekom ke fuhfahsryuhsr lom in fohlohkyang nuh yurin God?
Meac sie ma upac ma kom ac sucu lom an puhlakihn ingena? Kuht kuh in akacsruhi ke kuhtuh inkacnek ma wosasuc luhn Jisus Kraist kuh in kahsruh?
Solsol Kom Kuh In Oruh
Kom kuh in siyuck sin God ke pruhe lom in kahsrwekom etuh lah ma kuht luti uh pwacye? (Liye “Teaching Insights: Prayer” ke ip sahflah ke lesin 1.)
Kom kuh in wi kuht alu ke sacnri se inge in lotwelah yohk ke ma kuht luti kom kac inge?
Kom kuh in riti Puk luhn Mormon ac pruhe in etuh lah kahs luhn God? (Kom kuh in fahk kuh sruhkwack kuhtuh sapta kuh fuhs in sang kahsruh.)
Kuht kuh in orwaclah sie pacl ah lasr in sifil ohsun tok?
Pweluhng ke Mwe Luti
Ip se inge sruhmuhn ke mwe lutlut ac ma suhmuhslah ma kom kuh in lutlut kac in ahkfokokoye etuh lom ac luhlahlfongi lom ke wosasuc uh ac in kahsrwekom luti mwet uh.
Petsac
Mwet Singucul Luo Inge Jisus El Suhpwacoht, sel Walter Rane
Orekma Muhtahl luhn Jisus Kraist
Pahpah Luhng el suhpwacma Wen Kuloh Nahtuhl, Jisus Kraist, nuh facluh in oruh kuht nohfohn in kuh in puhlakihn engan fin facluh se inge ac in eis moul ma pahtpaht ke moul se tok uh. Ac pa inge wosasuc, pweng wo, lah Jisus Kraist el tuhkuh nuh fin facluh in elah ma koluk luhn facluh, ac in ahknwacsnwacsyelah facluh liki ma koluk nuhkwewa; lah kac mwet nuhkwewa kuh in moliyucklac (liye Doctrine and Covenants 76:40–42).
Ke kuht ekihn mwet uh, kuht nohfohn sun tahfonglac, ac kuht nohfohn misac. Ma koluk ac misac uh e tulokihn kuht in tiac eis moul ma pahtpaht sahyacn fin oasr Mwet in Molwelah se lasr (liye 2 Nephi 9). Met liki facluh se inge orweklac ah, Pahpah Luhng el sulacllah Jisus Kraist in molikuhtlac. Ke luhngse yohk, Jisus el tuhkuh nuh facluh ac ahkfalyelah orekma yohk ac muhtahl se inge. El oruh kuht kuh in moliyucklac liki ma koluk lasr, ac El orwaclah tuh kuht nohfohn in sifilpac moulyak tukun kuht misac.
Jisus Kraist el moulkihn sie moul wacngihn ma koluk. Ke sahflahiyacn luti Lal ke moul se inge, El eis ma koluk lasr nuh Facl ke El kweok ke imac in Gethsemane ac ke El srihpsrihpyak ah (liye 1 Nephi 11:33). Kweok lal Jisus arulacna yohk pwacnwacng El rarrar ke sripen waiok, ac srah kahklac liki Mahnol (liye Doctrine and Covenants 19:18). Tukun srihpsrihpyak Lal, Jisus el sifil moulyak, kuhtanglah misac. Ma inge tuhkweni na orwaclah Iwaclah luhn Jisus Kraist.
Ma koluk lasr pwacnwacng kuht fohkfohk in nguhn, ac “wacngihn ma fohkfohk kuh in wi muhta yohrohl God” (1 Nephi 10:21). In weacng pac, masap ke ma suwohs uh el pacl nuhkwewa oasr ma tuhkuh sikyak ke sripen ma koluk lasr.
Iwaclah lal Jisus use nuh sesr inkacnek se in ahknwacsnwacsyeyucklac liki ma koluk ke kuht auliyak uh. El use pac inkacnek nuh sesr in ahkwoyelah nguhsr enenuh nuhke suwohs ac pwacyeiyacn ma uh (liye Alma 42:15, 23–24). Mwet molwelah lasr el tuh fahk, Nga kweok ke ma inge luhn nohfohn, tuh elos in tiac kweok fin elos auliyak; tuhsruhk fin elos tiacna auliyak elos enenuh in kweok oacna ke nga tuh kweok ah (liye Doctrine and Covenants 19:16–17). Fin tiac kacl Jisus Kraist, ma koluk uh e tilokihnyac finsrak nuhkwewa nuhke moul se tok yohrohl Pahpah Luhng.
Ke el Kihsackuhnuhllah sifacna, Jisus el tiac ahkwacngihnyelah ma kunacsr. Kuht enenuh in luhlahlfongi Kacl, auliyak, ac kampare in ahkos masap. Ke kuht auliyak uh, Jisus el ahol Pahpah Tuhmwacl in nuhnak muhnahs nuh sesr. (liye Moroni 7:27–28). Ke sripen nguhsr lal Jisus kacsr, Pahpah Luhng el nuhnak muhnahs nuh sesr, ac eslah toasr lasr ac puhla koluk lasr ke tahfonglac lasr (liye Mosiah 15:7–9). Kuht ahknwacsnwacsyeyucklac in nguhn ac kuh in sifilpac fohlohk nuh yohrohl God.
Orekma yohk muhtahl lal Jisus pac pa in molikkuhtlac liki misac. Ke sripen sifilpac moulyak Lal, kuht e sifilpac moulyak tukun kuht misac. Kalmeac pa nguhn and mahno luhn kais sie mwet e fah fohlohkweni ma se fanna, ac kais sie sesr e fah moul ne tok ke mahno fohlohkyak wacngihn ma suhfal kac. Fin tiac kacl Jisus Kraist, ma koluk uh e tilokihnyac finsrak nuhkwewa nuhke moul se tok yohrohl Pahpah Luhng.
Liye mwe kahsruh nuhke ma suhmuhslah: “Jisus Kraist”
Sifac ke Wosasuc: “Jisus Kraist”
Luhlahlfongi kacl Jisus Kraist
Ip yohk se emet ac akwuck ke Wosasuc pa luhlahlfongi Luhlahlfongi ke Leum Jisus Kraist. Luhlahlfongi pa pweluhng nuhke ip yohk ac akwuck nuhke ke wosasuc uh.
Luhlahlfongi ke Jisus Kraist pa in etuh na pwacye lah El pa Wen Kuloh Sefanna nuhtin God. Kuht in luhlahlfongi lah El pa Mwet Lahngo ac Mwet Molwelah lasr—lah El pa inkacnek se fanna lasr in fohlohklac nuh yohrohl God (liye Acts 4:10–12; Mosiah 3:17; 4:6–8). Suliyuck kuht in ahkfokokoye “luhlahlfongi kuh in El, fungyang nohfohn nuh ke ohiyac wo Lal suc kuh in molwelah.” (2 Nephi 31:19).
Luhlahlfongi ke Jisus Kraist pa in etuh lah El kweok ke ma koluk lasr ke kisackuhnlah Lal. Ke sripen Iwaclah Lal Jisus Kraist, kuht e kuh in ahknwacsnwacsyeyucklac ac moullac ke kuht auliyak uh. Ahknwacsnwacsyeyucklac se inge kahsrwekuht in konwacack mislac ac finsrak ke moul se inge. Inkacnek se inge lwelah nuh sesr eis engan yohk tukun kuht misac uh.
Luhlahlfongi ke Jisus Kraist pa in etuh lah Kacl kuht nohfohn e tuhfah sifil moulyak tukun kuht misac uh. Luhlahlfongi se inge kuh in ahkkweye kuht ac ahkfokokoye kuht ke pacl ahsor kuh oasr mwet misac lasr. Ahsor ke misac kuh in ahkwacngihnyeyucklac ke olwelah luhn Sifil Moulyak.
Luhlahlfongi ke Jisus Kraist pa in etuh lah El eis nuh Facl ma upac lasr ac muhnahs lasr (liye Isaiah 53:3–5). El puhlakihn tari ma nuhkwewa pwacnwacng El etuh lah Elac kahsrwekuht fuhkah ke ma upac kuht puhlakihn ke moul se inge (liye Alma 7:11–12; Doctrine and Covenants 122:8). Ke kuht ahkfokokoye luhlahlfongi lasr uh, El kahsrwekuht in fahsr nuh met ke ma upac ma kuht oasr kac.
Ke luhlahlfongi lasr kacl, Jisus el kuh in onwekuhtlac ke moul in mahno ac nguhn lasr. El ahkolah in kahsrwekuht pacl nuhkewa ke kuht esam suliyuck Lal in ngwet nuh yohrohl ke nuhnak nuhkwewa; tiac tahfuh luo, tiac sahngweng (Doctrine and Covenants 6:36).
Akwuck nuhke Orekma ac Kuh
Luhlahlfongi kacl Jisus Kraist kol nuhke orekma. Kuht ahkkahlwemye luhlahlfongi lasr ke kuht ahkos masap ac oruh wo ke kais sie lwen. Kuht auliyak ke ma koluk lasr. Kuht pwacye nuh Sel. Kuht kampare in eklac oacna El.
Ke kuht ahkfokokoye luhlahlfongi lasr uh, kuht kuh in puhlakihn kuh lal Jisus lwen nuhkwewa ke moul lasr. El ac fah ahkyohkye orekma lasr ma kuht kampare kac. El fah kahsre kuht in kapwack ac kahingkihn mwe sruhf.
Ahkfokokoye Luhlahlfongi Lasr
Mwet pahluh Alma el tuh luti lah sramtweyacn luhlahlfongi uh kuh in muhtwacwacack na ke kihtin luhngse kuh kena in luhlahlfongi se (Alma 32:27). Na, in ahkkapye luhlahlfong lasr kacl Jisus Kraist, kuht enenuh in liyacacng ke kuht lutlut ke kahs Lal, moulkihn mwe lutlut Lal, ac ahkos masap Lal. Alma el luti kuht lah ke kuht mongfihsrwacsr ac karihngihn kahs luhn God ke insiacsr ac fah kapwack fokoko ac eklac oacna soko sahk ma kapwack som nuhke moul ma pahtpaht —pwacnwacng ahkfokokoye luhlahlfongi lasr (Alma 32:41; liye fuhs 26–43).
Sifac ke Wosasuc: “Jisus Kraist,” “Iwaclah luhn Jisus Kraist,” “Luhlahlfongi ke Jisus Kraist”
Auliyak
Meac auliyak?
Auliyak pa ip yohk ahkluo ke wosasuc uh. Luhlahlfongi ke Jisus Kraist ac luhngse lasr nuh Sel kol kuht in auliyak (liye Helaman 14:13). Auliyak pa ohiyac in ngwet nuh yurin God ac forlah liki ma koluk. Ke kuht auliyak uh, mukwikwi lasr, kena lasr, ac nuhnak lasr eklac in wi kena ac luhngse luhn God. Nuhnak muhnahs nuhke ma koluk uh kuh in sikyak kacl Jisus Kraist ac ke iwaclah Lal.
Auliyak uh el yohk liki na in ahkfokokoye kuh lasr in ekuhllah elah se kuh in kuhtanglah sie muhnahs lasr. Auliyak pa in ngwet nuh yohrohl Kraist ke insiom nohfohn, suc use nuh sesr kuh in puhlakihn eklac na fokoko ke insiacsr (Alma 5:12–14). Ke kuht puhlakihn eklac se ke insiacsr inge, kuht sifilpac isuslac ke nguhn (liye Mosiah 27: 24– 26).
Ke auliyak, kuht eis ngwetngwet sasuc kacl God, kacsr sifacna, ac ke facluh se inge. Kuht puhla luhngse luhn God nuh sesr—ac luhngse lal Kraist nuh sesr. Pacl wowo se in auliyak el sie mwe insewowo na yohk ma Pahpah tuhmasr Inkuhsrao El use nuh sesr ke mwe sang luhn Wen Nahtuhl.
Inkacnek nuhke Auliyak
Ke kuht auliyak uh, kuht akihlacnwack ma koluk lasr ac puhla auli kac. Kuht fahkwack ma koluk lasr nuh sin God ac siyuck ke nuhnak muhnahs Lal. Kuht oacyacpac fahkwack ma koluk yohk nuh sin mwet kol ke Alu uh, suc e fah ahkkweye kuht ke kuht e auliyak uh. Kuht ac oruh ma kuht kuh in ahksuwohsyelyah, kalmac pa srihke in ahksuwohsyelah elyah ke mukwikwi se ma kuht oraclah ah. Auliyak na pwacye el ahkkahlwemyeyuck yohk ke orekma wowo lasr ke lusen puhluhn pacl loeloes se.
Auliyak uh el ohiyac se ma orek ke lusen moul lasr fin facluh. “Mwet nuhkwewa orekma koluk, ac elos nukewa tia sun lupan wolana se ma God El akoo nu selos” (Romans 3:23). Kuht enenuh in tahfwelah na in auliyak, in esam na lah kuht kuh in oruh ma nuhkwewa in kraist suc ahkfokokoye kuht (Philippians 4:13). Leum el ahkpwacyei nuh sesr tari lah “mwet Luhk fin kwacna auliyak Nga fah nuhnak muhnahs nuh selos ke ma koluk lalos” (Mosiah 26:30).
Mwe Insewowo ke Auliyak
Auliyak el ip yohk wowo se ma use engan ac mislac. El pen kuht “nuh ke kuhn luhn Mwet in Molwelah, nuh ke molwelah luhn nguhn [lasr]” (Helaman 5:11).
Ke kuht auliyak uh, puhla koluk lasr ac ahsor lasr onweyucklac. Kuht puhla kohkoh luhn Nguhn Muhtahl yohkwelihk liki met ah. Kena lasr in fahsr tohkohl God kapwack fokokoi.
Petsac
Prestuhn Russell M. Nelson
Puhs mwet nuhnkuh na muh auliyak uh mwacta koluk se—sie ma enenuh in kahingkihnyuck … Tuhsruhktuh puhla se ke nuhnuhkweyuck inge tuhkuh sel Satan. El srihke in tulokihn kuht in ngwet nuhsel Jisus Kraist, suc tu ikacslah paho, finsrak ac kena in onwelah, nuhnakmuhnahs, ahkkweye, ahknwacsnwacsye, ac ahkmuhtahlye kuht (Russell M. Nelson, “We Can Do Better and Be Better,” Ensign or Liahona, May 2019, 67).
Sifac ke Wosasuc: “Auliyak,” “Iwaclah luhn Jisus Kraist”
Petsac
tuhlihk muhtwacn fuhsr se pacptaislac
Pacptais: Olwelah Se Emeet Lasr Yurin God.
Luhlahlfongi ke Jisus Kraist ac auliyak ahkoe kuhtlac nuh ke pacptais ac eis Nguhn Muhtahl. Pacptais pa akwuck se emeet ke wosasuc luhn Jisus Kraist ma e molikuhtlac uh. Ke kuht e eis akwuck na wolacna se inge, kuht orwaclah olwelah se lasr emeet sin God.
Akwuck uh el ohiyac muhtahl se ahkfahsryeyuck sin mwet oasr wal la ke pristut. Kuhtuh akwuhk uh, kain se ke pacptais uh, enenuh nuhke moul ma pahtpaht.
Ke akwuck inge, kuht orwaclah olwelah nuh sin God. Olwelah kuht orwaclah sin God inge arulacna muhtahl. El olwelah in ahkinsewowoye kuht fin kuht liyacacng olwelah lasr ma kuht orwaclah nuh Sel. Kuht enenuh kampare in liyacacng olwelah lasr nuh sin God.
God el use nuh sesr akwuck ac olwelah in muh kahsrwe kuht fahsr nuh Yohrohl ac in eis moul ma pahtpaht. Ke kuht eis akwuck luhn pristut ac liyacacng olwelah ma kuht orwaclah, kuht kuh in puhlakihn kuh luhn God ke moul lasr (Doctrine and Covenants 84:20).
Olwelah ke Pacptais
Jisus Kraist el luti lah pacptais uh enenweyuhk in ilyak nuhke tohkohsrai luhn God (liye John 3:5). Kuht enenuh pac in pacptaislac in ekihn mempucr ke Alu luhn Jisus Kraist. Mwet Lahngo El orwaclah srihkasrak nuh sesr ke El pacptaislac (liye Matthew 3:13–17).
Ke kuht pacptaislac ac liyacacng olwelah lasr, God el olwelah in nuhnank muhnahs ke ma koluk lasr (liye Acts 22:16; 3 Nephi 12:1–2) Mwe insewowo yohk se inge utuhkuh nuh sesr ke iwaclah lal Jisus Kraist, suc “lungse kut, ac ke srahl su sororla kacsr el tulekutlac liki ma koluk lasr” (Fwackyuk 1:5). God el oacyacpac olwelah in ahkinsewowoye kuht ke mwe sang luhn nguhn muhtahl kuht in muh kuh kin ahknwacsnwacsyeyuhklac, kolyuck, ac ahkkweyeyuck.
Ke ip lasr ke olwelah lasr ke pacptais, kuht ekihn mwet lohoh lasr sifacna in kena eis inel nuh facsr. Kuht oacyacpac olwelah in esamuhl pacl nuhkwewa ac liyacacng masap Lal. Kuht olwelah in luhngse ac kuhlwacnsapuh mwet sahyac, “ahsor weluhlos suc ahsor; … ahkenganyeyaclos suc enenuh in ahkenganyeyuck, ac in tu oacna mwet loh luhn God ke pacl nuhkwewa ac ke ma nuhkwewa, ac ke acn nuhkwewa” (Mosiah 18:9; liye fuhs 8–10, 13). Kuht kwacfweacng in kuhlwacnsapuh Jisus Kraist nuhke sahflahiyacn moul lasr (liye Doctrine and Covenants 20:37; Mosiah 2:17).
Orekma nuhke olwelah lasr ke pacptaisac lasr el kunohkohn na luhlahp se. Ac oacyacpac mwe engan nuh sesr. Orekma inge orwaclah kuhpahsr na wowo se kacsr ac Pahpah tuhmasr Inkuhsrao suc El ahsrwelah luhngse Lal nuh sesr.
Pacptaislac ke Tili Otyak
Jisus el luti lah kuht enenuh in pacptaislac ke tili otyak in elah ma koluk lasr (liye Doctrine and Covenants 20:72–74). Pacptais ke tili otyak el akucl se nuh ke misac, puckpucki, ac Sifil Moulyak luhn Leum (liye Rome 6:3–6).
Pacpatais ke tili otyak el oacyacpac akuhl nuh sesr sifacna. El aihlen misac luhn moul mah se lasr ah, puhkpuhki luhn moul se ingacn, ac ilyak lasr nuhke sie moul in nguhn sasuc. Ke kuht pacptaislac uh, kuht muhtwacwacack ke ohiyac ke sifilpac isuslac ac eklac tuhlihk mukul ac tuhlihk muhtwacn nuhtin Kraist (liye Mosiah 5:7–8; Rome 8:14–17).
Tuhlihk
Tuhlihk srihsrihk uh tiac enenuh in pacptais neke elos sun matwac ma etuh tari wo ac koluk, suc pa ke matwac yac alkosr uh (liye Doctrine and Covenants 68:27). Tuhlihk ma misac met liki matwac se inge elos moliyucklac ke Iwaclah lal Jisus Kraist (liye Moroni 8:4–24; Doctrine and Covenants 137:10). Met liki tuhlihk uh pacptaislac uh, enenuh in lutiyuck elos wosasuc uh elos in uh ahkolah nuhke step yohk se ke moul lalos inge in oruh olwelah nuh sin God.
Kuhfa luhn Leum
Pahpah Tuhmasr Inkuhsrao el kena kuht in pwacye nuhke olwelah ma kuht orwaclah nuh Sel uh. In kahsrwe kuht in oruh ma inge, El sapkihn nuh sesr in toeni in eis kuhfa luhn Leum. Kuhfa luhn Leum pa akwuck luhn pristut suc Jisus el sang nuh sin Mwet Sap Lal met liki Iwaclah Lal.
Eis ke kuhfa luhn Leum pa sripac yohk se ke toeni ke pacl se ke wik nuhkwewa uh. Fuhlao ac kof uh ahkinsewowoyeyucklac ac ituckyang nuh sin mwet alu an. Fuhlao ah el akucl nuhke kihsackuhnlah lal Jisus ke Mahnol ke ma koluk lasr. Kof sac ahkkahlwemye ke srah Lal ma sohrohrlah Kacl.
Kuht ipeis ke kuhfa luhn Leum ke kais sie wik in esam Mwet Lahngo ke Iwaclah ac in ahksasucye olwelah lasr nuh sin God. Kuht eis olwelah sasuc muh Nguhn e tuhfah wi kuht.
Oasr ip luo ke Pacptais Jisus el luti lah kuht enenuh in isuslac ke kof ac ke nguhn in ilyak nuhke tohkohsrahi luhn God (John 3:5; mwe ahkuhtweyac ituhkyang). Joseph Smith el luti lah, Pacptais ke kof el tahfuhn na pacptais se, ac wacngihn kalmeac fin tahfuh se sahyac ah tiac oreklac—suc pa pacptais ke Nguhn Muhtahl (Teachings of Presidents of the Church: Joseph Smith [2007], 95
Tukun pacptais ke kof enenuh pacptais ke nguhn in oreklac tohkohl in muh fohnlah pacptias sacn. Ke kuht pacptaislac ac ahkkweyeyucklac uh, kuht ahknwacsnwacsyeyucklac liki ma koluk lasr ac sifilpac isuslac ke nguhn. Kuht ingena muhtwacwacack sasuc ke moul lasr in mwet kuhlwacnsap lal Jisus Kraist.
Tukun kuht pacptaislac uh, kuht eis mwe sang luhn Nguhn Mutahl ke akwuck se pahngpahng ahkkweyelah. Ke sie akwuck pahngpahng ahkkweyeyucklac, mwet sruok wal luhn pristut luoyak ac fihliyac paholos fin sifacsr. Ma se met elos ahkkweye kuhtlac in ekihn mempucr ke Alu uh, na fah elos tuhfah use mwe sang luhn Nguhn Muhtahl nuh facsr. Akwuck se inge el oacpacna akwuck se ma sruhmuhnyuhk ke Olweacng Sasuc ac ke Puk luhn Mormon (liye Orekma 8:14–17; 3 Nephi 18:36–37).
Nguhn Mutahl el mwet in kahsruh ahktolu ke Sifac ke God. El orekma ma sefanna wi Pahpah luhng ac Jisus Kraist. Ke kuht eis mwe sang luhn Nguhn Muhtahl, El ac kuh in wi kuht ke moul lasr kuht fin kampare ahkos.
Nguhn Muhtahl Ahkinsewowoye Kuht Fuhkah
Mwe sang luhn Nguhn Muhtahl el sie mwe sang na yohk lal Pahpah luhng nuh sesr. Nguhn Muhtahl el ahknwacsnwacsye kuht, oruh kuht in wolac liki met ah, fohnlah liki met ah, eklac oacna God (liye }3 Nephi 27:20). El kahsrwe kuht in eklac ac kapwack in nguhn ke kuht suk in ukwe masap lal God uh.
Nguhn muhtahl kahsrwe kuht in etwaclah ac akihlen ma pwacye (liye Moroni 10:5). El oacyacpac ahkpwacyei ma pwacye uh nuhke insiacsr ac nuhnak lasr. Weacng pac, Nguhn muhtahl kahsrwe kuht in luti ma pwacye (liye Doctrine and Covenants 42:14). Ke kuht lotwelah ac luti ma pwacye ke kuh luhn Nguhn muhtahl, El sruokyac an lun insiyacsr (liye 2 Nephi 33:1)
Ke kuht inse puhsisacl in suk inkacnek pwacye sin Nguhn muhtahl uh, el ac tuhfah kol kuht (liye 2 Nephi 32:5). El oacyacpac kol kuht in kuhlwacnsapuh fuhkah mwet sahyac.
Nguhn muhtahl el use kuh nuh sesr in kuhtanglah muhnahs lasr. El kahsre kuht kahingkihn mwe sruhf. El kuh in sensenkackihn mwe ongaiyac nuh sesr.
Nguhn muhtahl e kahsrwe kuht ke ma upac nuhkwewa ma tuhkuh sun kuht ke moul se inge. El ac ahkkweye kuht ke pacl upac ac pacl ahsor, in use nuh sesr finsrak (liye Moroni 8:26). Kuht kuh in puhla luhngse luhn God nuh sesr kacl nguhn muhtahl.
Sifac ke Wosasuc: “Nguhn Muhtahl,” “Mwe Sang Muhtahl”
Petsac
Jisus el sruok tuhlihk srihsrihk
Kampare nuh ke Sahflah
Ke kuht pacptaislac ac ahkkweyeyucklac uh, kuht ilyak nuhke sie olwelah wi God. Sahyacn ma puhkantwe sahyac, kuht olwelah in liyacacng masap Lal ac Kuhlwacnsapwacl ke lusen moul lasr fin facluh (liye Mosiah 18:8–10, 13; Doctrine and Covenants 20:37).
Tukun kuht ilyak nuhke inkacnek luhn wosasuc ke pacptais ac ahkkweyeyuck, kuht sang kuhiyacsr nohfohn on muhta na ke inkacnek soko inge. Ke kuht kihlac liki inkacnek finne kuhtuhsrihk, kuht ahkfokokoye luhlahlfongi lasr in auliyak. Mwe insewowo nuhke auliyak fuhlwelah nuh sesr in fohlohk nuhke inkacnek luhn wosasuc ac sifilpac eis mwe insewowo ke olwelah lasr sin God. Ke kuht auliyak na pwacye, God el nuhnak muhnahs nuh sesr ac eis kuht pacl nuhkwewa.
Kalmeacn kampare nuhke sahflah pa in pwacye nuh sel God neke sahflahiyacn moul lasr fin facluh—ke pacl wo ac pacl upac, ke pacl insewowo ac pacl kweok. Kuht lwelah Kraist elan orekuhtlac in eklac oacna El. Kuht ngwet nuh ruhl Kraist ke luhlahlfongi ac finsrak finne mac kuh mac tuhkuh fungul kuht ke moul lasr uh.
Tiac kalmeacn kampare nuhke sahflah pa in sruokyac na insacn neke na kuht misac. Tuhsruhk, kalmac pa in fihliyac moul lasr, nuhnak lasr, ac orekma lasr kacl Jisus Kraist. Kampare pac in tahfwelah na in ahkfokokoye luhlahlfongi lasr ke Kraist ke lwen nuhkwewa. Kuht tahfwelah na in auliyak, liyacacng olwelah lasr sin God, ac suk Nguhn Muhtahl in wi kuht.
Kampare nuhke sahflah pa in “fahsr nuh met in tu na ke luhlahlfongi ke Kraist, in oasr finsrak na kahlwem, ac luhngse God ac mwet nuhkwewa.” Pahpah Luhng olwelah muh fin kuht kampare nuhke sahflah, kuht e fah eis moul ma pahtpaht (2 Nephi 31:20).
Wosasuc luhn Jisus Kraist Ahkinsewowoye Nohfohn Tuhlihk nuhtin God
Wosasuc luhn Jisus Kraist ahkinsewowoye nohfohn tuhlihk nuhtin God. Ma suhmuhslah uh luti lah mwet nuhkwewa oacna sie ye muhtahl God finne fuhkah ma kuht oasr kac uh. El suli “elos nuhkwewa in tuhkuh nuh Yohrohl ac ipeis ke wolacna Lal, ac wacngihn kuhtwena mwet El sruhngac suc tuhkuh nuh Yohrohl” (2 Nephi 26:33).
Wosasuc se inge ahkinsewowoye kuht ke lusen moul lasr fin facluh se inge ac ne tok ma pahtpaht. Fihsrwacsr kuht in engan—kuht sifacna ac oacyacpac sucu—ke kuht e moulkihn mwe lutlut lal Jisus Kraist uh (liye Mosiah 2:41; “The Sucu: Mwe Fahkwack nuh fin Facluh,” ChurchofJesusChrist.org). Wosasuc luhn Jisus Kraist ahkyohkye engan lasr, kol kuht ke orekma lasr, ac ahkfokokoye kawuck lasr.
Fin kuht moulkihn wosasuc luhn Jisus Kraist e kuh pac in karihngihn kuht in tiac oruh sulaclah ma kuht e kuh in ongaiyac kac kwewana ke moul in mahno ac nguhn lasr. El kahsrwe kuht in konwacack kuh ac ahkkweye kuht ke pacl upac ac pacl ahsor. El use nuh sesr inkacnek nuhke engan ma pahtpaht.
Sie mwe fahkwack yohk ke wosasuc se suc ma sifilpac fohlohkyak inge pa kuht nohfohn na ma tuhkuh ke sucu lal God. Kuht wen sacohk ac acn sacohk Nahtuhl. Sahyacn na sucu se lasr ma kuht oasr kac fin facluh se inge, kais sie sesr ma tuhkuh ke sucu luhn God.
Sie pac mwe fahkwack yohk ke wosasuc se inge uh pa sucu uh kuh in tuhkweni ne tok ma pahtpaht. Sucu uh ma ahkkweyeyucklac sin God. Plwacn luhn God nuh ke moul ma pahtpaht uh el sang nuh sin sucu uh in kuh in tahfwelah ke toeni lalos tukun elos misac uh. Akwuck muhtal ke tempuhl ac olwelah lasr lwelah nuh sin sucu uh in kuh in tuhkweni ne tok ma pahtpaht.
Ke kahlwem luhn wosasuc se inge, sucu uh kuh in ahkwoyelah tiac kahlwem lalos, fohs, ac ma upac. Sucu ma fahsrwelihk ke muhlat kuh in onweyuhklac ke auliyak, nuhnak muhnahs, ac luhlahlfongi ke kuh luhn Iwaclah luhn Jisus Kraist.
Wosasuc luhn Jisus Kraist kahsrwe kuht in sramtweack sucu lasr uh in fokoko inmahsrlosr. Lohm ah pa acn se ma wo emet in luti ac ac etwaclah ip yohk ke wosasuc uh. Sie lohm ma muhsahiyuhkyak fin akwuck ac ip yohk ke wosasuc e tuhfah sie acn in mislac ac wacngihn sensen we. E tuhfah sie acn ma Nguhn luhn Leum kuh in muhta oasr we.
Ma tahklac ten inge el kuhtuh sin ma kom kuh in luti sie mwet fin kihtin pacl na srihsrihk pa oasr lom uh. Ke kom orekmakihn ma tahklac inge uh, sulaclah sie kuh luo ip yohk in luti. Sifac luhlahp ke kais sie ip yohk inge el utuhkot tari ke lesin met ah.
Ke kom luti uh, siyuck kihsen siyuck ac lohng. Sang suliyuck ma e kahsruh mwet in lotwelah lah elos e fototoyang fuhkah nuh sin God. Sie suliyuck yohk sripac pa mwet se ingacn in sifilpac ohsun nu sum. Loesiyacn lesin se ingacn e wiwina kihsen siyuck kom siyuck ac lohng lom uh.
Petsac
misinacris elos luti muhtwacn se
Meac Kom E Sang Luti Mwet ke Mihniht 3-10
Leum el suhpwacma Wen kuloh nahtuhl, Jisus Kraist, nuh facluh in molikuhtlac liki ma koluk ac misac.
Luhlahlfongi ke Jisus Kraist pa ip yohk nuh ke mukwikiwi ac kuh uh. Luhlahlfongi uh kahsrwekuht in puhlakihn kuh lal Jisus Kraist ke moul lasr uh.
Luhlahlfongi kacl Jisus Kraist kol kuht in auliyak. Auliyak pa ohiyac in ngwet nuh yurin God ac forlah liki ma koluk. Ke kuht auliyak uh, mukwikwi lasr, kena lasr, ac nuhnak lasr eklac in wi kena ac luhngse luhn God.
Ke kuht auliyak na pwacye ke insiyacsr uh, God el nuhnak muhnahs nuh sesr. Nuhnak muhnahs uh kuh in utuckuh nuh sesr ke sripen Jisus Kraist el misac ac elah ma kulok lasr.
Oasr ip luo ke pacptais: pacptais ke kof ac pacptais ke nguhn. Ke kuht pacptaislac ac ahkkweyeyucklac uh, kuht ahknwacsnwacsyeyucklac liki ma koluk lasr, pwacnwacng use nuh sesr kuht in muhtwacwcaack sasuc ke moul lasr uh.
Tukun kuht pacptaislac ke kof uh, kuht eis mwe sang luhn Nguhn Mutahl ke akwuck se pahngpahng ahkkweyelah.
Ke kuht suk in ukwe inkacnek ke wosasuc nekena sahflahiyacn moul lasr, God el olwelah muh kuht e fah eis moul ma pahtpaht.