Guruy ni 3: Fil ni 2—Fare Wo’en e Thap ku Chitamangiy nu Tharmiy
“Guruy ni 3: Fil ni 2—Fare Wo’en e Thap ku Chitamangiy nu Tharmiy,” Machib Nag E Gospel Rog: E Fonow ni ngam Weliy fare Gospel ku Yesus Kristus (2023)
“Guruy ni 3: Fil ni 2,” Machib Nag E Gospel Rog
Guruy ni 3: Fil ni 2
Fare Wo’en e Thap ku Chitamangiy nu Tharmiy
siasing/Llecheklel
Statue ko Kristus
Gidii’ ea ra’un Laemniged
Mang fan ea biney ea yafos?
Ngan ea kuguub riy?
Bay e Got nima ba’adag nigeg? Uw rogon ni nggu thamey nima ba’adag nigeg?
Uw rogon ni nggu bay e mich u waen’ Got napan ma buch bo’or e pi’nen nib kireb?
Mangfan ni yofas ea rib momaw’ bochingyal’? Uw rogon ni nggu pir’eg gelngig u lane tiney ea rran.
Uw rogon ni nggu mang reb bea’ nib mangil?
Mang era buch u tomuren ning gura yim’?
Fare gospel ku Yesus Kristus nikan sulweg yarmen era fulweg ea duwer rodaed ko mornga’agen ea ya’al. Gadad ea bitir ea gadma fil mornga’agen dad nge rogon nrayog ninngad mo’noged rogon dad uu fathik ea gospel ku Got. Fare gospel ea ma ayuwegdad ngad pir’egned e gapas, falfalaen’, nge fanow. Ran parr ko gospel mara ayuwegdad ngad pir’eged gelngindad napan nira yib ea sikeng ko yofas ngodaed.
Got ea ba’adag ninge yog ea tinni rib mangil ngak p’fak, ma riba’adag u gumircha’en ninge tawa’athiy raed nrib fal’ rogon, woed ni dabram’ad ba’id fa yog ea yafos ni manechubog (muguy ko Moses 1:39; Doctrine and Covenants 14:7). Bochane nribaba’adag dad, ke pi ngodaed e wo’en rayog ni ngad thapeged ea tawa’ath riy. Ulan e pi chep nib thothup, ea kan pii’ wo’en ni kanoeg fare wo’en e thap, fare wo’en e falfalaen’ nib gel, nge fare wo’en e bayul (muguy ko Alma 42:5, 8, 11, 13, 15, 16, 31).
Ulan e wo’en rok’ Got, gadad gubin ma daread ufithik’ e yafos nganib nga fayleng, bay ea gargal, yafos, yam’, nge yafos uu tomuren e yam’. Got ea kea pii’ maPWPamngin ea tin nib tu’uf ngodaed nifan e milekag ni ngad ted ko biney ea yofas, ni bochan nra tomuren a rran marayog ni ngad suloed nga p’oewchen mea yog ea falfalaen’ nib polo’ ngodaed.
Yesus Kristus ea ir kenginn e kanawo’ rok Got. Udakaen ea Bayul nge Fas ko yam’ Rok’, Yesus ea ke bing wo’en ngodaed ko rogon ni dabda m’ad riy bingyal’ nge rogon ea yafos ni manechubog.
Dabiyog ni ngu’un pog’uwran e yafos u m’on ni badad nga fayleng napan gadbay u dakaen ea fayleng. Mea dawrud ninged fan mornga’agen ea yofas ko tomuren ea yam’. Machane, Got e ke daag yuyang nib bo’or ea tin riy’ul ko mornga’agen ea kanawo’ ko yofas ni manechubog. Tiney nib riyul’ ea ma pii’ ngodad e ganop ni ngad nanged fan ea yafos, thapeged e falfalaen’, nge tin nigadbe athapeg ninge yib nib mangil. Biney ea ganop ea tawa’ath nib thothup nima powi’iydad napan nigadba fas uroey u fayleng.
Fapi Rogon Nrayag ni Ngan Michib Nag
Yuyang ii ginney ea ma pii’ boch rogon ni ngan ayuwegem ni ngam t’aer midleam ko machib ningam ta’. Bayri’ rogon ni ngam fil ea duwer mag pining ea girdii’.
Napan ni ngam sensey, mag meybil nag mornga’agen e pin’en nib tu’uf ko ya’al nge tin ko fayleng rok’ gubin e girdii’. Mu mel’eg ea machib ko bin rib ga’fan ngam sensey nag. T’aer midlem ni ngam weliy e sabathin ni danur nangfan. Gonpeg rogon e awa rom napan ni be machib, dabi nu’uw yang e tin ngan sensey nag.
Mel’eg e pi chep nib thothup ko tin ni ngam sensey nag. Fare yang ni “Dayif ko Machib” bo’or mornga’agen e chep nib thothup u roeq ni ra pii’ ea ayuw.
Mu leamnag e pii duwer ningam fith napan ni ngam e sensey. Pining ea girdii’ mag bea pii’ boch ea athamgil nga laeniyan’rad ngar ngongoliyed e tin nib mangil.
Gan’ag mornga’agen fare tawa’ath ku Got, mag weliy e mich rom ko pin’en ni gabe machib nag.
siasing/Llecheklel
missionary nibe sensey nag e tabinaw
Pi’nen Nrayag ni Ngam Machib Nag Ngak Bea’ ko 15-25 pi Minut
Mel’eg ta’areb fa boech e pi kenggin mornga’agen e wo’en e thap ni ngam sensey nag. Bay e daef ko machib nifan gubin e pi kenggin ko tomuren biney e babyor.
Yafos Umon e Fayleng: Fan rok’ Got nge Tanom ni fan Dad
Gadad gubin e bitir ku Got. Ke sunmeg daed u lane Biroek e Owchef’.
Kad pared rok Got u’mon ni ngad bad nga fayleng. Gadad e chongin e Tabinaw Rok’. Ir e manang ma gadad ba tu’uf rok.
Got e kea pii’ e kanawo’ nifan e falfalaen’ nge mon’og rodad u lane biney e yafas nge manechubog.
Uu mo’on ni ngad bad nga fayleng migad mel’eg Got nge birok e fanow. Biney e bea yip’ fan e tatawo’ nigadra fek ko fan e yofas ko manechubog.
Yesus Kristus e kenggin e kanawo’ rok Got. Ir e ke n’anggin ke yag ngodad e dowef ni manemus nge yafos ni manechubog.
Fare Sunmiy
Utan pa’ Got, Yesus Kristus e sunmiy fare fayleng.
Fare Mul rok Adam nge Eve
Adam nge Eve e yow e bitir nibay e ya’al rorow ku Got nirbow nga fayleng so’omon. Got e sunmiy e doewef rorow ma ta’ row nga dakaen fare milaey’ ni kanoeg ea Milaey’ ku Edan.
Napan Adam nge Eve kar denen gow, man chuweg row uu lan fare milay’, mikiyochuw u po’owchean Got. Biney e kanoeg fare Mul.
Napan nima’ fare Mul, ma Adam nge Eve e kab doewngin row niyow ra yim’ bingyal’. Napan ni yib doewngin row, kar filed mornga’agen e yo’or, nge rogon ni yima mo’onog, nge rogon i fak e bitir. Ma ngorow amithngin e kirbaen’, denen nge yam’.
Fare Mul e ni ta’ ni fane tatawo’ ko gubin ea gidii’. Fare Mul e ke fal’eggin kanawngin rogon u mo’on ni ngad bad nga fayleng ngayog ni nge mo’onog rodad u fithik wo’en chitamangdad nu tharmiy.
Yafos Rodad u Fayleng
U lane wo’en Got, ma rib t’uf ningad baed nga fayleng ngayog e dowef ngodad, migad fil bo’or binen’ nib mangil, me mon’og nagdad.
U fayleng, e gadaed ma fil rogon ni nga’ud daered u dakaen e mich rodad. Machane, dabi pagdaed Chitimangindad nu Tharmiy. Ke pii’ nib bo’or ea tawa’ath nge fapi kanawngin rogon ningad suloed nga p’owchen.
Fare Bayul ku Yesus Kristus
Gad gubin ea gadma denen, ma kagadad gubin ni gadara yim’. Bachan ni ri baga’ e t’ufeg rok Got, ke pii’ Fak, ni Yesus Kristus, nga fayleng ni nge bayuliy ngodad nifan ko pi denen nge yam’.
Ni bochan fare maligach ni ta’ Yesus, ran na’agfan man chuweg e pii denen rodaed. Rayag ni ngad thilyegned gumircha’andad nib mangil napan gadad ra kalngaen’. Rayog e biney kanawngin ni ngad suled ngak Got ngeyog e falfalaen’ ni rib polo’.
Bochan Yesus ni faskoyam’, gadaed gubin ni gadaed ra fos biyay u tomuren kad m’aed. . Bae yip’ fan urngin e ya’al nge dowef rok’ bea’ era sul nga ta’abang, ma gadad gubin nigadara sul ulane e dowef nib machalbog.
Yesus Kristus e ma pii’ e gapas, athap, nge golnag. Maligach rok ni yan u fathik e rogon nibe daeg e adag rog. Gubin benen da’ani ta’aborgon ma ran falaeggin u lan fare tabiyuul rok Yesus Kristus.
Fare Tafean e Ya’al
Napan gadra yim’ u doewdaed, ma ya’al rodad a re ul’ul’ ko gin nima paer e ya’al riy. Ireray e tafean ko fil nge t’aer midlen umon fare Faskoyam’.
Me fil fare gospel ku Yesus Kristus ulan fare tafean e ya’al, nge rayog gadad ra ul’ul’ e ilal’ nge mon’og dad.
Fare Foskoyam’, Thap, nge Liyoer nag
Napan rani taw ko tomur u lane fayleng ko ya’al, ma fare Faskoyam’ era bin magid tatawo’ ulane milekag nib manechubog.
Fare Faskoyam’ i’ir e ngiyal’ ni ra suloed nga ta’abong fare ya’al nge dowef. Gadad gubin nira fasgad ko yam’ nge thapeged e dowef nib machalbog. Gadad gubin ni gadra par nib manechubog. Rayog e biney ni bachane fare tabiyuliy nge Faskoyam’ ku Somoel.
Pufthin nge Fapi Gil’ilungun e Fla’ab
Napan gadad ra fas gad ko yam’, Yesus Kristus nira mang e tapufthin rodad. Ni bay kemus buchuw iiyad, ma gubin ea bitir ku Got nira dared ulan e gulil’ungun e fla’ab.
Gadad gubin nigadra fas gad ko yam’, machane dabda thapeged ta’abrogon e fel’ngin nib thothup. Yesus ra pufthin nagdad u rogon e mich, ngongol, nge kalngan’ rodad ulan e yafos u lan tafean e ya’al. Rayog ni ngad suloed ngad paer ko gin bay Got ri’ fa’an gadadra yul’yul’ ngak’.
Fapi Duwer Nrayag ni Ngam Fith ngak Bee’
Pi duwer ney e yad be susun nag e pin’en e rayog ni ngam fith ngak e bee’. Pi duwer ney nira ayuwegem fal’eg e sabathin nib fel’ nge nangfan tafney nge tin ni ba t’uf rok’ bee’.
Mang gabe thamiy roem ko fan e yofas?
Mang e ma pii’ ngom e falfalaen’?
Mang e magawon rom nib t’uf e ayuw rom rii’ rok’ Got.
Mang e kam fil ko pii magawon ni i yib ngom?
Mang e ga ma nang ni morngaʼagen Yesus Kristus? Uragon e yafos Rok’ nge machib rok’ nike thilyeg e yafos rom?
Pinning ngak e Gidii’ Ninge Yib
Rayog ni ngam fith ngak’ Got ufithik’ e meybil fa’an e pin’en ni kug filew ngom e ba riyul’? (Muguy ko “Gonop ko Sensey nag: Meybil” ulan bin tomur e yang ko fil ni 1.)
Rayog ni ngam muub ko misa ko biney e Madnam ngam boech mornga’agen biney e machib?
Rayog ni ngam bi’eg fare Babiyor ku Mormon mag meybil ngam nang ko fa’an ir e ra thin rokʼ Got. (Rayog ni ngam pii’ bochi pi guruy fa pi verse.)
Rayog ni nggu mel’eg reb e rran nifan bin magid e machib?
siasing/Llecheklel
sasing ko wo’en e thap
Daef ko Machib
Biney e yang nima pii’ e machib nge pi chep bin thothup rangam bi’eg ni nge gelnag e ganop nge mich rom mornga’agen fare gospel nge ayuwegem ni ngam sensey nag.
siasing/Llecheklel
kunuy ko pi tu’uf
Yafos Umon e Fayleng: Fan rok’ Got nge fapi plan ni fan Dad
Gadad e Bitir Rok’ Got, Gadad Pired rok u mo’on ni ngan Gargelegdad
Got e Chitamangin e ya’al rodad. Gadad e bitir Rok’, ke sunmiy daed ni ta’aborgon nga owchen. Gadad gubin ma bay rogon nib thothup ni bochan gadad e bitir rok’ Got. Biney e gonop e ma ayuwegdad ufithik’ e ngiyal’ nib mo’omaw nge pii’ athamgil ngodad ni ngad manged e gidii’ nib fel’ rogon.
Kad pared ngak Got u mo’on ni ngan gargael nag dad nga fayleng. Gadad ea chongin ko tabinaw rok’ Got.
siasing/Llecheklel
President M. Russell Ballard
“Bay ta’areb e rogon ni bay rodad daban nge gubinfen, ta’areb thingari paggad, nge ta’areb thingarda moeged e kammagar ni fan. Iraray e bin riyul’ i gur ma aram rogom ni gubin ngiyal’ fak nib pumo’on fa bpin rok’ Got nibay e ya’al rom nib gel.
“… Nanged fan ea pin’ey nib riyul’—nanged fan nib ga’ nge ba’adag biney—me thilyeg e yafos. Nira pii’ ngom e nangfan nib thabi’ ga’ ma dabiyog e bea’ rayog ni nge fek. Machane me rib ga’, thingari pii’ ngom e thamiy nib ga’ ko puluwan’ riy rom nge nangfan ni gubin e puluwan’ riy. Bin tomor, nira pii’ ngom e fan nib thothup, nib mangil, nge nib ga’fan ko yafos” (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).
Kad mel’eged ni ngadbad nga Fayleng
Chitamangdad nbay u Tharmiy e gadaed ba tʼuf rok’ ma ribba’adag ni ngad woeded Ir. Ir e bea’ nib thothup ni bay e dowen nib fel’ngin.
Ulan e yafos umon e fayleng, kad fil’ed Got nike fal’eg e wo’en rayog ni ngad manged boed Ir. Bay ko plan rok ni ngad chuwgad u tharmiy ngadbad nga fayleng nge yog e yofas nge downgindad. Ma ba t’uf ningad ngongaliyed rogon dad nge mo’onog e mich rodad napan nigad palog u po’owchan Got. Dabi yib nga wun’dad ni ku’ud piired rok Got bingyal. Machane, Ir ra pii’ ngodad e pin’en nib batu’uf ngondad ngeyog ni ngad suloed ngad pared Ngak’.
Pin’en ni be mel’eg, e puuf mat’owam nge rogon i dugliy an’um, rib t’uf ko wo’en rok Got. Ulan e yafos umon e fayleng, gadad gubin kad mel’eged ni ngad fol e wo’en rok Got nge dared nga fayleng ere gadad ra thapeged bin magid e yang nifan e mon’og rodad nib manechubog. Kad nanged napan gadadra par uroe’, bay bo’or e pi rogon ni ngad rin’ed ngad thamiyed ea falfalaen’. Ma kad nanged gadaed ra fek e togopluw. Ma kagdaed feked e lumel, pi sikeng, kirbaen’, nge yam’.
Bochaen ni kad mel’eged nira yib nga fayleng, kad pagaen’raed ulane tu’uf nge ayuw rok’ Got. Kad pagaen’dad ulan e wo’en Rok’ nifan e thap rodad.
Chitamangiy nu Tharmiy e Mel’eg Yesus Kristus ni nge Bayuuliydad
Yesus Kristus e i’ir fare lukungun ko fare wo’en rok’ Got. Umon ni kad dared nga fayleng, kad nanged dabiyog ni gadadra sulod ngak ko gin bay Got riy udakaen e gelingdad. Chitimangiy nu Tharmey ke mel’eg Yesus Kristus, bin ba ilal i Fak nib Mo’on, nira fal’eg e rogon ma rayog ni ngad sulod ngak nge thapeg e yafos ni manemus.
Yesus e rin’ e tin ni Kan Noeg Ngak. Ba’adag ni nge yib nga fayleng nge bayuuliydad ufithik’ e maligach nib bayuul Rok’. Bayul nge Foskoyam’ rok’ me bing e wo’en e fan rok’ Got nira fulweg.
General Handbook, 1.1: “Wo’en e Falfalaen’ Rok’ Got”
Pin’en Marnga’agen e Gospel: “Yafos umon e Yafos u Fayleng,” “Wo’en ko Thap”
siasing/Llecheklel
thigeayal’ u maday
Napan Ni Sunmeg
Wo’en rok’ Chitimangiy nu Tharmiy e sunmeg e fayleng, ni’ir tafean e pi bitir nib ya’al nira thapeged e dowef nge thapeged e ganop. Yafos rodad u fayleng e th’abi ga’fan ni ngad mon’og gad ngad manged boech Got.
Utan pa’ Chitimangiy nu Tharmiy, Yesus Kristus nike sunmiy fare feyleng nge gubin e pin’en nima fas. Chitimangiy nu Tharmiy e sunmiy e pumo’on nge bpin u fathik owchen. Fare Sunmiy e ma dag ngodad e t’uf rok’ Got nge a’adag Rok’ ni ngad thapeged e rogon ningad mo’onog gad.
Chuwgow u lan Farengi Milay’ nu Eden, yib rok’ Joseph Brickey
Fare Mul ni ta’ Adam nge Eve
Umon fare Mul
Adam nge Eve e yow somm’on e bitir rok Chitimangindad nu Tharmiy nirobow nga fayleng. Got ni ke sunmiy e dowef rorow ulan nga p’oewchen Rok’ mea tayrow nga Milay’ nu Eden. Ulan fare milay’ ma dariy thibngin row, me Got e ke pii’ gubin e pin’en nib t’uf rorow.
Napan Adam nge Eve e kar parew ulan fare milay’, Got e pii’ ngorow e motochiyal ni dabri kayew fare wa’amngin e gakiy ko lowan’ e tin nib fel’ nge tin kireb. Fa’anra yowra fol kore motochiyel ney, ma yowra par ulan fare milay’. Machane, dabra mon’ogow ufithik’ e ganop nima yib, togopluw nge sikeng ko yafos. Dabiyog ni ngar nangew e falfalaen’ maku dabiyog ni ngar fekew e gafgow nge amith.
Mo’oniyan’ eke lumel aen’ Adam nge Eve ni ngar kayew fare wa’amngin, mar kayew. Bochane ni kar mel’egew, kar chuwgow u lan farengi milay’ makun chuwegrow u po’owchen Got. Biney e kanog e kanoeg fare Mul nga.
Tomuren fare Mul
Tomuran fare Mul, me Adam nge Eve e thapegew e doewef. kar ningew e tin nib mangil nge tin nib kireb. Rayog ni ngar mel’egew u thilinrow. Bachane Adam nge Eve ea kar fekew fapi togopluw nge sikeng, kar thapegew a rogon ni ngar filew ngar mon’oggow. Bachane kar fekew e kirbaen’, rayog ni ngar thapegew e falfalaen’. (Muguy ko 2 Nephi 2:22–25.)
Dariy’fan e magawon rorow, Adam nge Eve ea kar lemnagew rib mangil e tawa’ath ni kar thapegew e doewrow ni ra yim’. Rebe tawa’ath nii rayog ngorow e rayog ningar fakayew e bitir. Ni bochan e biney, bitir ko ya’al nibay rok Got e rayog ngarbad nga fayleng kiyog e dowef ngorad.
Marnga’agen e pi tawa’ath ko fare Mulgow , Adam nge Eve kar falfalaen’ gow. Keyoeg Eve ni fa’anra dab gurrin’ fare kireb rog, ma dabgu fakew e [bitir], ma dabgu nangew e pin’en nib fel’ nge kireb, nge fare falfalaen’ nifan e bayul rodad, nge fare yafos ni manechubog nike micheg Got ngak e gidii’ nib tafol. (Moses 5:11; ma kumguy ko verse 10).
Pin’en Marnga’agen e Gospel: “Mulgow ko Adam nge Eve,” “Agency nge Pi’in nib Bung Rogon i Pufthin”
Yafos Rodad u Fayleng
Bo’or e gidii’ nima lemnag, “Mangfan nigubay uro’ u fayleng?” Yafos rodad u fayleng ea nib ga’ nifan e wo’en rok’ Got ko mon’og nib manechubug rodad. Fan rodad nib tha’bi ga’ ni ngad t’aer midlen dad ni gadad ra suloed nga p’owchen Got nge thapeged ea falflaen nib polo’. Bay boech e pin’en utanggin ney ni bay boech e pi rogon e yafos u fayleng ma t’aer midlen dad.
siasing/Llecheklel
Pagal nib falfalean’
Thapeg e Dowef
Ta’arebfan ni kadbad nga fayleng ni nge yog e dowef ngodad mea par e ya’al u lamun. Doewdad e riba thothup, nib ma’ang’ang e pin’en nike sunmiy Got. Ni bochan doewdad, ma rayog ni ngad rrin’ed e pin’en, migad filed, nge nanged bo’or e pin’en ni ya’al rodad e dabiyog ni ngar rrin’ed. Rayog gadad ma mon’og ulan e rogon dabiyog ni nge rrin’ed e ya’al rodad.
Bochane e dowdad nra yim’, gadad ma feked amith, m’ar, nge reb e pi magawon. Tiney nira ayuwegdad ni ngad fil’ed e gum’aen’, rrunguy, nge reb ea pii rogon nib thothup. Tiney e yuyang ko kanawo’ rodad ko falfalaen’. Mel’eg e pin’en nib mataw napan ni rib mo’omaw’ ma tay e mich, athap, nge t’ufeg nga dakaen e papngin rodad.
Fil Urogon ni ngad Mel’eged Ufithik e Ganop
Reb e fan ko yafos e ngan fil urogon ni ngad mel’eged ufithik e ganop—migdad mel’eg e tin nib mat’aw. Fil urogon ni ngad mel’eg ufithik e ganop e ba ga’fan ni ngad manged woed rogon Got.
Chitamangiy nu Tharmiy nge Yesus Kristus ma fil ngodad e tin nib mat’aw me pi ngodad fapi motochiyl nira powi’iydad ngad falfalaen’gad. Mo’oniyan e ma lumel nagdad ni ngad rrin’ed e tin kireb, ir e riba’adag nigadad manged ir nib kirbaen’. Gadad ma fek’ed e togopluw uthilin e tin mangil nge kireb, rib tu’uf ni ngad ninged rogon ko tin ngad mel’eged (muguy ko 2 Nephi 2:11).
Napan gadadra fol ngak Got, ma gadad ra mon’og ngad thapeged e pi tawa’ath nike michmicheg ngodad. Napan dabda folgad, ma gadadra faked e gagyeg ko denen ma ra yib papngin nib tagan. Dariy fan ni be m’ug nib thil rogon, denen era fek daed ko gin ni dariy ea falfalaen’ riy. Bo’or ngiyal’ fapi tawa’ath ko fol—nge pin’en ko denen—dabiyib rib papay ni ngad fek’ed fa sapgad. Machane yad ra yib, bochane ba’ Got nib mat’aw.
Demturug rogon nigad be athamgil, ma gadad gubin ma “gadma dened ma’i so’obuut e ngongol rodad ngak Got” (Romans 3:23). Chitamangiy nu Tharmiy e ma nang ni ra buch e pin’ey ere ke fal’eg rogon ni ngad kalngan’gad ngeyog ngad suled Ngak.
Kalngan’uy nira fek e gelngin rok’ e Tabayul, Yesus Kristus, ulan e yafos rodad (muguy ko Helaman 5:11). Napan gadad ra kalngan’, gadad ra be’ech nagdad ko denen udakaen e bayul ni maligach rok Yesus Kristus nge tawa’ath ko fare Kan ni Thothup (muguy ko 3 Nephi 27:16–20). Udakaen e kalngan’uy, gadad ma thapeged e falfalaen’. Rogon ea kanawo’ ngak Chitamangiy nu Tharmiy e mab ngodad, bay e murnguy rok ngodad ni rib gel. (Muguy ko “Kalngan’uy” ulan fil ni 3.)
Filed Rogon ningad Daread u dakaen e Mich.
Reb fan ea biney e yafos e ngan thapeged e ganop kemus gadad ma feked udakaen’ e ki’iy ko chitamangiy nu Tharmiy. Bochane dawrudugiyed Ir, thingarda fil’ed urogon ni ngad dared u but’ ko mich (see 2 Corinthians 5:6–7).
Got e dowri digeydad kore milekag ney. Ke pii’ e Kan ni Thothup ni nge pow’iy dad, gelnag dad, nge machalbog nagdad Ke fapi chep nib thothup, pi profet, meybil nge fare gospel rok’ Yesus Kristus.
Gubin yang ko yafos rodad—tin nib falfalaen’ nge kirbaen’, tin ni fel’ rogon nge tin ni dabi buch—nira ayuwegdad ni ngad ilal’gad napan gadad ma t’aer midlen nifan e sul ngak Got.
Bochane ea Mul rok’ Adam nge Eve, rig gadad gubin ni gadra yim’. Dabiyog ni gadra gelnagniged e pin’en ko denen nge yam’ ni yigo’og dad. Ulan e kanowa’an ko thap rok’ e Chitamangdad nu Tharmiy, Ke fal’eg rogon ni ngad gelniged e pin’en ko fare Mul ngayog ningad sulod Ngak. Umon nin sunmiy e fayleng, me mel’eg Yesus Kristus ni Ir e mang ea Tathapeg nge Tabiyul rodaed.
Kemus ni Yesus Kristus e rayog ni nge thapegdaed ko denen nge yam’. I’ir fare Pagal ni Fak Got. Dariy ea denen u lane yofas rok, marib tafol ngak e Chitimangin. Ma ke t’aer midlen mea tay u wan’ ni nge rin’ e murwel ko Chitmangin.
Bayul Rok’ Fare Tathapeg ni tay e gafgow ulan Gethsemane, amith nge yim’ nga dakaen e kuruth, nge fare Faskoyam’ rok’. Dabda nanged e amith nike fek—bo’or ni’ii po’ u doew ni yo’or yang (muguy ko Doctrine nge Covenants 19:18).
Bayul rok’ Yesus Kristus e ir tha’abi ga’fan e ban’en nike buch ufithik’ gubin e chepin rok’ e gidii. Dakaen e bayul ni maligach Rok’, Yesus e tabab nag e kanawo’ rok’ Chitimangiy. Dabi yib fare athimgil nga lani’yan dad ni fa’anra dariy fare Bayul ku Yesus Kristus bochane dabda thapeged ngodad ko pi denen nge yam’ (muguy ko Alma 22:12–15).
Maligach rok’ fare Tathapeg me dag ngodad fare t’ufeg rok’ e Chitamangiy nibay u Tharmiy nifan dad. “Feni ga’ radan nge feni n’uw nge feni tolang nge feni to’ar rogon” nifan e t’uf rok’ Kristus me ga’nag e tamilngaen’ rodad (Ephesians 3:18; mu kum guy ko verse 19).
siasing/Llecheklel
Fare Kuruthnag, ni keb rokʼ Harry Anderson
Yesus Kristus ni Gel ko Yam’ nifan Gubindad
Fini ke yim’ Yesus Kristus nga dakaen e kruth, ya’al Rok ke tha’ab ko dowef Rok’. Ulan bin dalip e rran, ya’al Rok’ nge dowef ni kar sul u ta’abong, ma dabi tha’ab bayay. Ke mu’ug ngak bo’or e gidii’, me dag ngorad ni bay fare dowef ni yalech nge yil nib machalbog. Re sulweg e ya’al ko downgin e kan noeg fare Foskoyam’.
Gadad e gidii’, e gadad gubin ni gadadra yim’. Machane, bachane Yesus nike gelnag e yam’, gubin e gidii’ ni kan gargel ko fayleng ran fas ko yam’. Foskoyam’ ir e tawa’ath nib thothup nifan gubin dad, ma thapeged udakaen e runguy nge bayuliy nib fala’ab rok’ fare Tathapeg. Urngin e ya’al nge dowef rok’ bee’ ra sul nga ta’abang, nge gadad gubin ni ra fasgad ulan e dowef nib machalbog. Fa’an da’ani moe’ Yesus Kristus, yam’ e ra tileag gubin e athap nifan reb e yafos ngak Chitamangiy nu Tharmiy (muguy ko 2 Nephi 9:8–12).
Yesus e ke fal’agin Rogon ni Ngad Be’ech niged gadad ko Denen Rodad.
Fa’an gadadra nanged fan e athap nira thapeged ko Kristus, thingarda nanged fan e motochiyl ko pufthin. I’ir e motochiyl ni dabi thilyeg nira fek e wo’en ko ngongol rodad. Fol ngak Got ma fekdad e wo’en nib mangil, ma fa’an damur fol gad ma gamed ra feked e wo’en nib kireb. (Muguy ko Alma 42:14–18.) Napan gadadra denen, ma ya’al rodad ea ra woed nike alit, ma dariy ban’en nib alit ni rayog ni nge par uu p’oewchen Got (Muguy ko 3 Nephi 27:19).
siasing/Llecheklel
Yesus nibe Meybil u Gethsemane, Harry Anderson
Napan e bayul ni maligach rok’ Yesus Kristus, Ke sakiy’ nifan dad, fek amith, make pii’ puluwdad nifan e denen rodad (muguy ko 3 Nephi 27:16–20). Wo’en rok’ Got ma pii’ e gelngin ngak Yesus Kristus e rayog ni nge wenig nag nifan dad—ni nge sakiy uthilin dad nge justice (musap ko Mosiah 15:9). Bochane e bayul ni maligach rok’ Yesus Kristus, nge fek rok’ e mat’awon ko murnguy ni ke tay ngak’ e gidii’ napan gadadra thapeged e mich nge kalgaed ngaen’dad (Muguy ko Moroni 7:27; Doctrine and Covenants 45:3–5). “Aray rogon ni murnguy e rayog ni nge ayliy e pin’en nibe yoeg e justice, me gacholpiy [dad] nge pa’ ninge ayuweg dad” (Alma 34:16).
Kemus udakaen e tawa’ath rok’ nge bayul rok’ fare Tathapeg nge kalngan’ rodad e rayog ni ngad sulod ngad fasgad ku Got. Napan gadad ma kalgad ngaen’dad, gadad ma thapeged a n’agfan mara be’ech e ya’al rodad. Gadad ra paged e gafgow nifan e kireb rodad ko pi denen rodad. Ra ma’ e amith u gumicha’en dad. Ra yo’or e falfalaen’ rodaed (muguy ko Alma 36:24).
Gadad gubin nigad machalbog machane kagdad ma denen boch ngiyal’, Arfan nibay nib bo’or e murunguy, t’uf, nge runguy ulan Yesus Kristus ko mathmit, kireb, fa denen rodad. Got e ke par nibe sap ngodad be soen nagdad ningad suled ngak napan gadra kalngan’ (muguy ko Luke 15:11–32). Dariy ban’en fa bee’ nira “yib nga thalindad ko adag rok Got nibay u fathik Kristus ni Yesus nifare pilung rodaed” (Romans 8:39).
Yesus e ke Fek nga Dakaen fapi Amith, pi Magawon, nge M’ar Rodad
Ulan e bayul ni maligach Rok’, Yesus Kristus ni ke fek nga dakaen fapi amith, pi magawon, nge m’ar rodad. Bochane biney, Ir manang “u rogon ni nge ayuweg e gidiiʼ rokʼ u rogon ko pii’ moʼowaer roraed” (Alma 7:12; ngkam guy ko verse 11). Be pinningdad, “bad ngog”, napan gadadra yib ngak, ma ra’i pii’ ngodad e tofan, athap, gelngin, sap, nge fasaeg (Matthew 11:28; ngkam guy ko verses 29–30).
Napan ni gadaed ra taga’ ko Yesus Kristus nge Bayul Rok’, ma rayag nra ayuwegdaed ko pi mo’owar rodaed, nge gubin mit e m’ar, nge amith. Ma rayag nran suguy daed ko falfalaen’, gapas, nge cham ningan taleg. Gubin ban’en nib momaw’ man sikeng ko yafos e rayog ni ngan fal’eg u dakean fare Bayul rok Yesus Kristus.
Bo’or e gidii’ nima lemnag, “Mang e ra buch u tomuren nigura yim’? Fare tanom ko fas ko yam e ma fulweg e thin ni mornga’agen e pi duwer ney.
Yam’ e bang ko “tunom nib sug ko murnguy” rok’ Got ni fan ngodad (2 Nephi 9:6). Ma gathi ra tileg e yafos, yam’ e bin magid e yang nifan e mon’og rodad nib manechubog. Fa’an gadad ra manged boed Got, thingarda feked e yam’ nge reb e rran be thapeged e dowef nib machalbog, nib faskoyam’.
Napan ra yim’ e dowdad, ya’el rodad nira ul’ul’ ni nge paer ko gin nima paer e ya’al riy. U tafean e ni fil riy man t’aer midlen umon fare Faskoyam’ nge Bin Tomur e Pufthin. Tini kad filed rodad ko yafos e ra par rodaed.
Ulan fare tafean e ya’al, gidii’ ni fek me fol ko fare gospel ku Yesus Kristus “yaedra thap nga bang ni tagil’ e falfalaen” (Alma 40:12). Bitir e yadra yannga tagil’ e falfalaen’ napan niyidra yim’.
Fapi ya’al ulan e tagil’ e falfalaen’ nira thapeged e gapas ko pi magawon nge gafgow. Yad ra ul’ul’ e ilal’ ko ya’al rorad, me rrin’ed e muruwel’ rok’ Got migad awuyeg boech e gidii’. Yad ra machib gad e gospel ngak fapi gidii’ ni dar thapeged napan ni kar fasgad (muguy ko Doctrine and Covenants 138:32–37, 57–59).
Ulan fare tafean e ya’al, pi’in ni dar thapeged e gospel udakaen e fayleng, fa kar mel’eg ni dar folgad e pi motochiyl, dabi thapeged gubin e pin’en (muguy ko Doctrine and Covenants 138:6–37; Alma 40:6–14). Machane, bachane Got ir nib mangil e ba mat’aw mab wureng, yad ra thapeged e rogon ni ngar filed fare gospel ku Yesus Kristus. Fa’anra yadra ba’adag ea tiney mar kalgaed ngaen’raed, yira bayuliyraed nifan ea pii denen rorad (muguy ko Doctrine and Covenants 138:58; kum muguy ko 138:31–35; 128:22). Ran pining rad ko gospas nga tagil e fal’falean’. Yad ra thapeged e bangi ban’en u tafean ko gil’ilungn ulan e rogon ni kar mel’eged napan ni kar fasgad nge ulan e tafean e ya’al.
Gadad ba pared ulan fare tafean e ya’al madako’ ni ngad fos gad ko yam’.
Tanom rok’ Got nima ke n’anggin ke yag ngodad ni ngad ilal’gad nge thapeged e yafos ni manechubog. Tomuren e ngiyal’ ulan fare tafean e ya’al, fare Faskoyam’ ir bin magid e yang nifan e ilal’ ney.
Fare Faskoyam’ i’ir e ngiyal’ ni ra suloed nga ta’abong fare dowef nge ya’al rodad. Gadaed gubin ni rayag ni ngaed fos gaed ko yam’. Ni ra buch bochaen fare Bayul nge Faskoyam’ rok Tathapeg. (Muguy ko Alma 11:42–44.)
Napan gadad ra fosgad ko yam’, gadad ra thapeged e dowdad nib machalbog, ma dabki fek amith nge m’ar. Gadad gubin ni ra manged ni dab ki yim’ bayay, ma fasgad ni gubinfen.
Tamilangeg Rogon Min Thap
Bochane gadad gubin ra fos gad ko yam’, ma rayog ni ngad thap gaed—fa thapeged e thap—nifan e yam’. Ren’ey e tawa’ath nima yib ngodad bochane murungy rok’ Yesus Kristus.
Ma rayog ni ngad thap gaed—fa thapeged e thap—ko gubin e pi wengan ni ma athpeg e motochiyl ko pufthin bochane e pi denen rodad. Ren’ey e tawa’ath nima yib ngodad udakaen e ngongol nge murungy rok’ Yesus Kristus napan gadad ra kalgad ngaen’ dad. (Muguy ko Alma 42:13–15, 21–25.)
Ngalang nib Tolang
Ngalang nib Tolang, fa yafos ni manemus, ir e falfalaen’ nge fel’ngin nib thabi tolang ulan fare gil’ilungun ni celestial. Ngalang nib Tolang ir e tawa’ath ra ngam thapeged napan ni ngam rrin’ e pin’en. President Russel M. Nelson e ke fil, “Tiney ni tay e bu’un mich ulan fare Somoel, kalngan’uy, tawfe, thapeg fare Kan ni Thothup, nge dab chuw e pi gam’ing nge micheg ni ke fal’eg ulan fare temple” (“Salvation and Exaltation,” Ensign or Liahona, May 2008, 9).
Ngalang nib Tolang ba yip’ fan ni ma fas ngak Got ni gubinfen ni bay e tabinaw nib manimus. Ma arame ni ngad nanged Got nge Yesus Kristus, ni ngad manged boed Yow, ngad thapeged e yafos ni woed ko birorow.
Pin’en Marnga’agen e Gospel: “Fas ko Yam’,” “Thap”
siasing/Llecheklel
yal’ nibe yib u e maaguleng
Pufthin nge Fapi Gil’ilungun e Fla’ab
Babyoren e Ayuw: Napan ni ngam tabab e machib mornga’agen e pi gil’ilungun e fla’ab, machib nib moem u rogon niyib ba’adag man nangfan ko cha’an nigbe machib nag.
Napan gadad ra fas gad ko yam’, Yesus Kristus nira mang e tapufthin nib mat’aw nge wurengaen’ rodad. Ni bay kemus buchuw e girdii’, machane gadad gubin nira dared ulan e gil’ilungun e fla’ab. Gadad gubin nigadra fos ko yam’, dabda thapeged ta’abrogon e fla’ab nib thothup (muguy ko Doctrine and Covenants 88:22–24, 29–34; 130:20–21; 132:5).
Pi’in ni dar thapeged e rogon ni ngar nanged nib fel’ nge folgad e pi motochiyl rok’ Got napan ni kar fasgad rayog ni ngar fek e rogon ulan fare tafan e ya’al. Yesus ra pufthin nagdad u rogon e mich, ngongol, ba’adag, nge kalngan’ rodad ulan e yafos nge tafean e ya’al (muguy ko Doctrine and Covenants 138:32–34, 57–59).
Fare pi chep nib thothup ea ma fil morunga’agen e celestial, terrestrial, nge telestial gil’ilungun e fal’ab. Ya tiney e ma dag e t’uf, justice, nge murunguy rok’ Got.
Pi’in ni bay e mich ulan Kristus, kalngan’ ko pi denen rorad, thapeged fapi gam’ing ko fare gospel, thapeged e pi micheg rorad, thapeged fare Kan ni Thothup, nge athamgil nga mada’ ko tomur ni gimed ra thap ulan fare gil’ilungun nib celestial. Gil’ilungun e bay e pi’in ni dar thapeged e rogon ni ngar thapgad fare gospel napan ni kar fasgad machane “ni ma thapeged ko gubin e gum’ircha’rad” nge ni kar rrin’ed ulan fare tafean e ya’al (Doctrine and Covenants 137:8; mu kum guy ko verse 7). Pi bitir ni ma yim’ umon ni kar mang e duw ni ra nanged e pi’nen nib mat’aw nge kireb (meruk e duw) e yad ma thapeged e gil’ilungun nib celestial (muguy ko Doctrine and Covenants 137:10).
Ulan fare pi chep nib thouthup, fare gil’ilungun nib celestial e ba susun nag ni woed rogon e fla’ab nge tamilang ko fare yaal’. (Muguy ko Doctrine and Covenants 76:50–70.)
Picha’ ni kar fasgad nib fel’ rogon “me dar thapeged a mich ulan Yesus napan bay e dowen, machane tomur ni kar thapeged” nira yag gil’ u lane gil’ilungun nib terrestrial (Doctrine and Covenants 76:74). Ta’ab rogon nib riyul’ nifan e gidii’ ni dani gel e mich roraed ngak Yesus. Ren’ey e gil’ilungun e ba susun nag ni woed rogon e fla’ab ko pul. (Muguy ko Doctrine and Covenants 76:71–80.)
Picha’ ni yad be ul’ul’ ko pi denen rorad ma dar kalgad’ ngan’ rad u yafos ney fa thapeged e gospel ku Yesus Kristus ulan fare tafean e ya’al nira feked e tawa’ath u lan e gil’ilungun nib telestial. Ren’ey e gil’ilungun e ba susun nag ni woed rogon e fla’ab ko t’uf. (Muguy ko Doctrine and Covenants 76:81–86.)
Babyor ko Machib nib Achichig fa rib Fel’ N’umngin
Fapi thin ney e susun mornga’agen e pin’en gara sensey nag e bea’ fa’an ni kemus buchuw e ngiyal’ rom. Napan gara thapeg e pi thin ney, gara mel’eg ta’areb fa bochi e pi kenggin ni ngam sensey nag. Bay e daef ko machib nifan gubin e pi kenggin umon e fil ney.
Napan ni ngam sensey nag, mu fith e pi duwer nge motoyil’. Pii’ fapi pinning ngak e bee’ nira ayuweg e cha’ney me fil’ed urogon ni ngar chuchugur nag nga Got. Ta’areb e pinning nib ga’fan ko bee’ ir e yaedra mada’ ngom bayay. Ma n’umngin e ngiyal’ ko fare machibl. ngom machib mornga’agen e pi duwer ni ngam fith nge motoyil’ rom.
Pi’nen nrayag ni ngam machib nag ngak bee’ ko 3-10 minut
Gadad gubin e bitir ku Got. Gadad e pii gubin e chongin ku tabinaw rok’ Got. Ir ee manang ma gadad ba t’uf rok.
Got ni ke pii’ e kanawo’ nifan e falfalaen’ nge mon’og rodad u lane biney e yafas nge manechubog.
Ulan e kanawo’ rok’ Got, thingarda yib nga fayleng ni ngad thapeged e dowef rodad, fil’ed, ngan ilal’ dad.
Yesus Kristus e i’ir fare lukungun ko fare wo’en rok’ Got. Irma ke n’anggin ke yag ngodad e yafos ni manechubog.
Utan pa’ Got, Yesus ee yog ni nge sunmiy fare fayleng.
Fapi pin’en gadad ma thapgeg me t’aer midleln dad ni ngayag ni ngad suled Ngak.
Gadad gubin ni gadma denen, ma gad gubin ni gadadra yim’. Bochan ni ri gab t’uf ko Got, me pii’ Fak, ni Yesus Kristus, nga fayleng ni nge bayuliy ngodad nifan ko pi denen nge yim’.
Gubin ban’en nib momaw’ ko yafos e rayog ni ngan fal’eg u dakean fare Bayul rok Yesus Kristus.
Napan ra yim’ e dowdad, ya’al rodad nira ul’ul’ ni nge paer. Borran gadaed gubin ni rayag ni ngaed fos gaed ko yam’. Ba yip’ fan urngin e ya’al nge dowef rok’ bee’ ra suloed uta’abong, nge gadad gubin ni ra fasgad ulan e dowef nib machalbog.
Napan gadad ra fas gad ko yam’, Yesus Kristus nira mang e tapufthin rodad. Ni bay kemus buchuw e bee’, gubin e bitir ku Got nira dared ulan e gulil’ungun e fla’ab. Rayog ni ngad suloed nga paer ko gin bay Got riy fa’an gadad ra yul’yul’ ngak’.