Mang Gachalpen Yesus Kristus ni Gubin e Yafos Rom

Bo’or kanawo’en ni rayag ni ngad daged e t’ufeg rodaed ngak Got. Rayag ni ngad fol gaed ko fapi motochiyel rok’ (muguy ko John 14:15, 21). Rayag ni ngad ted ni’ir e bay u mm’on ulan e yafos rodaed, ma gadaed be pigeddaed ngak. Rayag ni ngad ted e tin ni gadaed ba’adag, tafney rodaed, nge tin ni bay ulan gum’ircha’endaed ni bay ngak (muguy ko Alma 37:36). Rayag ni nge falfalaen’ daed ko fapi tawa’ath ni be pii’ ngodaed—min tawa’ath nag e gidii’ ko boch e pi tawa’ath ney (muguy ko Mosiah 2:21–24; 4:16–21). Meybil nge pigpig rodaed ngak e gidii’, era dag me gel nag e t’ufeg rodaed ngak.

Ku woed boch e motochiyel, fare motochiyel ni nge t’uf Got rodaed e biney e fan ngodaed. N’en nib t’uf rodaed era mel’eg e n’en ni gadaed be gay. Pi n’en ni gadaed be gay era mel’eg e tin ni ngad rrin’ed nge tin ni ngad tafney niged. Nge n’en ni gadaedra tafney nag era mel’eg ko gadaed mini’—nge mini’ e gadaedra mang.

T’ufeg rodaed ngak e gidii’ e ku bang ko t’ufeg rodaed ngak Got. Fare Tathapeg e ke fil nogdaed kanawo’en ni bo’or ni ngan t’ufeg e gidii, (muguy ko ni wod, Luke 10:25–37 nge Matthew 25:31–46). Bing gum’ircha’en daed ngoraed nge yafos rodaed. Daged e t’ufeg ni gadaed be pigpig—ni gadaed be pii’ e ayuw ko rogon nrayag rodaed. Rayag ni ngad t’ufeged e gidii’ ni gadaed be fanay fapi tawa’ath nike yib ku Got ngan tawa’ath nagraed.

T’ufeg e gidii’ e mu’un e gumaen’ ngay, gol ngoraed, nge yul’yul’ ngay. Nib mu’un e man’agfan ngay ni gubin ngiyal’. Kube yipfan ni ngan tayfan gubin mit e gidii’.

Napan ni gadaedra t’ufeg bee’, ma facha’ nge gadaed e yira tawa’ath nag. Mara sug gum’ircha’en daed, yafos rodaed, me gel e falfalaen’ rodaed.

Fagli motochiyel ni rib gaa’— ni ngan t’ufeg Got nge bogoliyiror rodaed—e irreram fagli def ko fapi motochiyel ku Got (muguy ko Matthew 22:40). Napan ni gadaedra t’ufeg Got ni’ir e somm’on, min t’ufeg e gidii’, ma gubin ban’en ulan e yafos rodaed era yean nib mat’aw. Biney e t’ufeg era thilyeg rogon e sap rodaed, rogon ni gadaed be fanay e time rodaed, nge pi n’en ni gadaed be laek wo’en, nge pin’en ni gadaed be yarmiy rogon nib ga’fan ngodaed.

U powchen Got, kireb nag fare motochiyel ko falan e dowef e rib gel e kireb riy (muguy ko Exodus 20:14; Ephesians 5:3). Ma dariy fan nag fare gelngin nib thothup ni nge sunmiy e yafos. Machane ra ul’ul’ nge t’ufeg daed ni demuturug ko kad gathayed e biney e motochiyel. Ke pinning daed ni ngad kalngan’gaed ngan be’ech nagdaed u dakean fare bayul ku Yesus Kristus. Ma fapi gafgow ni bachan e denen e rayag ni yib e gapas ku Got ko man’agfan nge yibi yon’ loen (muguy ko Doctrine and Covenants 58:42–43).

Got e ke pii’ ngodaed e motochiyel ko ayuweg falan e dowef ni nge tawa’ath nag daed nge fapi ya’el ko bitir ni bayi pii’ nga fayleng. Fol ko biney e motochiyel e rib ga’fan ko gapas rodaed nge t’ufeg, pagaen’, nge tha’ ko tabinaew rodaed u ta’abang.

Nap’an ni yibe fol ko fare motochiyel ko falan e dowef, biney era bing wo’en ni nge yib e ayuw ko fare Kan ni Thothup ngom. Ma kura palog nag daed ko amith nge gafgow nima yib ni bachan e tiney e tha’. Mara gel nag e pagaen’ rodaed ngak Got (muguy ko Doctrine and Covenants 121:45). Mara bing wo’en e ayuw ko fare Kan ni Thothup. Mara fal’ag rogon daed ko fapi m’ag nib thothup u temple nira m’ag e tabinaew rodaed nga ta’abang ni manemus.

siasing/Llecheklel

Widow’s Mite, ku Sandra Rast

Rogon ni Yima Fanay e Salpiy ko Tithing

Salpiy ko tithing e ba thothup. Gadaed ma pii’ e tithing rodaed ngak reb e member ko bishofric, fa yuyang e rayag ni ngan pii’ pilwon u online. Napan nira thapeg fare bishofric fare tithing, mi yaed pii’ nge yean ko headquarters ko Galasia.

Fare council ni bay fare bin Somm’on e Presidency riy, fare Ulung ko fare Ragag nge L’agruw e Apostles, nge fare Presiding Bishofric e bayra duugliyed rogon nib t’uf ningan fanay fare salpiy ko tithing nifan e muruwel ku Got (muguy ko Doctrine and Covenants 120: 120). Tiney ni yima fanay ngay e mu’un:

• Fapi temple ni yibe toey ma ki yibe ngongliy nge tigil’ e mo’olung ko galasia.

• Pilyeg thin nge publish nag fapi chep nib thothup.

• Ayuweg e gosgos nge pin’en u lane mo’olung ko Galasia.

• Ayuweg e muruwel ko tamachib nibe buch u dakean e fayleng.

• Ayuweg cheppen e muruwel ko tabinaew.

• Pii’ e ayuw ko pilwon e sukul.

Tithing e dayma fanay e salpiy riy ni nge pii’ pilwon e tiyugang’ ko Galasia ni ga bay riy. Yaed e yaed be pigpig ni yead roraed e yaed ba’adag ni ngar rrin’ed e biney ni dariy pilwon.

Napan ni gadaedra pii’ pilwon e tithing, ma Got e ke micheg bugi tawa’ath nib ga’ ko tiney ni gadaed be pii’. Ma ra “bing e … pi winda nu tharmiy, mug puʼoeg … e tawaʼath nga dakeanmed, ni dariy tagilʼ ni ngan tay ngay (Malachi 3:10; muguy ko verses 7–12). Tiney e tawa’ath e bay nib thothup fa tin nu fayleng ban’en.

Dogur rodaed e ba tawaʼath nib thothup nike yib rokʼ Got. Rib t’uf ni ngad thapegned e dogur ni ngayag ni ngad boded ir. Dogur rodaed e rib ga’fan ni fapi chep nib thothup e ke ta’areb nag rogon ko fapi tempel (muguy ko 1 Corinthians 6:19–20).

Somoel e ba’dag ni ngad ayuweged ma gadaed tayfan e dogur rodaed. Ra nge ayuwegdaed ni ngan rrin’ e biney, arram fan nike pii’ fare motochiyel ni kanog e Thin ko Gonop ngay. Biney e yi’iy e kan pii’ ni nge fil ngodaed mornga’agen i kay e ggan nib mangil ma dabin fanay bugi ban’en nira kireb nag e dogur rodaed—ni wod e rom, tamagow, tea fa coffee.

Fare thothup ko Thin ko Gonop, profet e daba’ e kar chiliy ngodaed mornga’agen i fanay bugi ban’en nib kireb ngodaed, nib illegal, fa yira ‘ar’ar nag mab momaw’ i pag. Profet e ke chiyliy nag ngodaed mornga’agen i fanay e falay ni demuturug rogon. (Mission president rom e rayag ni nge fulweg taban e duwer rom ko mit i mang falay e dabiyag i fanay ko ggin ni gabay riy.)

Somoel e ke pii’ ngodaed fare Thin ko Gonop nifan e dogur nge thothup rodaed. Ke micheg nira tawa’ath nag daed ni fa’an gadaedra fol ko fapi motochiyel rok’. Pi tawa’ath ney e mu’un e dogur rodaed ngay, gonop, nge llowaen’, nge pin’en ni yira yiroriy daed riy (muguy ko Doctrine and Covenants 89:18–21).

Fol ko Thin ko Gonop era ayuwegdaed ngad rung’agned e pin’en nibe thogthog nag e Kan ni Thothup ngodaed. Rayag ni kura yib e m’ar ngodaed, machane fol ko biney e motochiyel era ayuweg e dogur rodaed nge par nib gel, nge man’aey rodaed, nga thothup rodaed.

Gidii’ ni nge tawfe e rib tu’uf ni nge fol ko fare Thin ko Gonop.

Mornga’agen rogon ni ngan ayuweg e gidii’ nibe gafgow ko ‘ar’ar ni dani fel’, muguy ko fare guruy 10.

Fare rran ni Madnom e ba rran nib thothup nike tay Got nifan ngodaed ni gubin e wik ni ngaed toffan gaed riy ko fapi muruwel roraed ma gadaed liyoer ngak. Reb ko fapi Ragag i Modochiyel nin pii’ ngak Moses e ngan “tayed u wun’med fare rran ni madnom, ni ngam tayed nib thothup” (Exodus 20:8; ngkum guy verses 9–11).

Yi’iy nikan thogthog nag ko tiney e rran, e Somoel ni ku be micheg biyay ni fare rran ko Madnom e “ba rran ni ngam toffan riy ko fapi muruwel rom, mag liyoer ngak e en Tha’bi Tolang” (Doctrine and Covenants 59:10). Maki yoeg ni fare rran ni Madbom e susun niba rran nib sug ko falfalaen’, meybil, me yibe og nag e magar (muguy ko verses 14–15).

Kabang ko liyoer rodaed ko fare rran ni Madnom, e ngad uned ko fare mo’olung ko sakrament ni gubin e wik. Napan e biney e moʼolung, ma gadaed be liyoer ngak Got ma gadaed fek fare sakrament ni nge yib ngaen’ daed Yesus Kristus nge fare Bayul rokʼ. Napan ni gadadra fek fare sakrament, ma arram ni kad be’ech niged biyay fapi m’ag rodaed ngak Got ma gadaed be dag ni ngaed kalngaen’ gaed ko fapi denen rodaed. Fare gam’ing ko ngiyal’ ne sakrament e irreram e bin th’abi ga’fan ko fare rran ni Madnom.

U galasia ma kagdaed ma un ko fapi klass ni rayag ni ngaed filed boch mornga’agen fare gospel ku Yesus Kristus riy. Ma fapi mich rodaed era gel ni gadaed be fil mornga’agen fapi chep nib thothup u ta’abang. Ma t’ufeg rodaed era gel ko napan ni gadaed be pigpig ma gadaed be ayuwegdaed.

Ul’ul’ ngay ni yibe toffan ko re rran ney ni Madnom, susun ni dabin yean nga kanttin fa ni rrin’ bugi ban’en ni gowa wod ni reb fapi rran ni yima murwel riy. Talagned e tin nu fayleng ban’en ma gadaed sapeg ngonglen daed nge pi tafney rodaed ko tin nib thothup ban’en.

Rrin’ ban’en nib mangil ko fare rran ni Madnom e rib ga’fan ni ku woed ni dabin rrin’ bugi ban’en ni bachan e ngan tay nge par nib thothup. Filed mornga’agen fare gospel, gel nag e mich, gel nag e tha’, pii’ e pigpig, fa ni un ko boech ban’en nifan e tabinaew fa tafagar ni rayag ni nge ayuwegdaed.

siasing/Llecheklel

l’agruw nii’ ni yow be be’eg fapi chep nib thothup

Tay fare rran ko Madnom nib thothup e arram rogon ni gadaed be dag e liyoer rodaed ngak e Chitamangiy nu Tharmiy nge Yesus Kristus. Fa’an gadaedra tay e pin’en ni ngad rrin’ed ko Madnom ni ta’ab rogon ko tirok’ Got nifan fare rran, ma gadaedra thamiy e falfalaen’ nge gapas. Ma yira gel nag daed ko thothup mara toffan fithik’ i dow daed. Ma kagdaedra chuchugur gaed ngak Got mara gel e tha’ rodaed ngak fare Tathapeg. Ma gadaedra ayuwegdaed “ko pin’en nu fayleng” (Doctrine and Covenants 59:9). Mara par fare rran ko Madnom ni “gimed ra pir’eg e felfelan’” riy (Isaiah 58:13; ngkum guy ko verse 14).

Balaynag e abich e rayag ni nge ayuwegdaed nge gumaen’ nagdaed, me chuchugur nagdaed ngak Got, min be’ech nagdaed nib thothup. U mm’on ni tabab nag fare machib rok, Yesus Kristus e balaynag e abich rok’ Matthew 4:1–2). Fapi chep nib thothup e bo’or babyoren e profet riy ni balaynag e abich roraed ni ngeyag ni nge gel gelngin raed nib thothup min tawa’ath nagraed ko tin tawa’ath ni yaed be athapeg nifan raed fa boch e gidii’.

Balaynag e abich nge meybil e l’agruw nima yean u ta’abang. Napan ni gadaedra balaynag e abich min meybil ni bay e mich, mara mom ni ngad thapegned e tin ni yira thogthog nagdaed nifan ngodaed. Mara mom ni ngad nangfaned ma gadaed guy e tin nib riyul’ min nangfan fapi gagiyeg rok’ Got.

Napan ni gadaedra balaynag e abich, ma kagdaed ma pii’ e salpiy ko Galasia ni nge ayuweg e gidii’ nib tu’uf e ayuw roraed. Biney e kanog fare fast offering ngay. Kan pinning daed ni ngad pii’ed ni wod ni ta’ab rogon urngin ko ggan ni dawrin kay. Ma ki yibe pii’ e athamgil ngodaed ni ngad pii’ed ni bo’or ni fa’an nrayag rodaed. Pii’ e fast offering e reb kanawo’en ni gadaed be pigpig ngak e gidii’.

Fapi fast offerings e yima fanay ni ngan pi’ e gaan nge tin nib tu’uf ngak e gidii’ nibe gafgow, nib mu’un e gidii’ ngay nibay rodaed fa u dakean e fayleng. Ko boch mornga’agen rogon ni rayag ni ngan fanay e fast offering, muguy ko “Donating Tithes and Other Offerings” ulan e biney e lesson.

Yesus Kristus e be powi’iy fare Galasia nibe rrin’ e tiney u dakean fapi profet nge apostle. Pi tiyugang’ ney e Got e ke mel’eg raed, ke yibliy raed, make pii’ fare gelngin e priesthood ngoraed ni ngar muruwel gaed u dakean fithingan fare Tathapeg.

Napan e kakrom, Kristus e pii’ mat’won ere priesthood ney ngak fapi Apostles rok’, ni’ir e gelngin niyag nira powi’iyed fare Galasia rok’ u tomuren ni thap nga tharmiy. Yibi buch ni biney e mat’woy e chuw ko napan ni fekyath e gidii’ ko fare gospel nge napan ni yim’ fapi Apostle.

Reb e angel nu tharmiy e yibe fulweg fare priesthood ko napan e 1829 u dakean fare profet Joseph Smith, maki ayliy biyay Somoel fare Galasia rok’ ni bay fapi apostle nge profet riy. (Muguy ko lesson 1.)

Fapi bishof nge stake president, e bay mat’won fare priesthood roraed ni ngar gagiyeg niged fapi Galasia.

Napan ni yira pinning e pumo’on nge bpin ni ngan yibliy raed ni ngar pigpig gaed ulan e Galasia, ma arram ni yibe pii’ mat’won raed nibe yib ku Got ni ngar rrin’ed e biney e muruwel. Biney e mat’won e yima pii’ ngak fapi missionarires, fapi tiyugang’, nge fapi sensey, nge ku boch e gidii’ nge mada’ ko ngiyal’ nikan pag raed ko fare pigpig. Yima rrin’ e tiney u tan pa’ fapi gidii’ ni bay fapi kiy ko priesthood roraed.

Mat’won e priesthood e karimus ni rayag ni ngan fanay ko tin nib mat’aw ban’en (muguy ko Doctrine and Covenants 121:34–46). Biney e mat’won e ba thothup ko yul’yul’ ni ngan muruwel u dakean fithingan fare Tathapeg. Fa e biney e bachan e nge yibliy me ayuyweg e gidii’.

siasing/Llecheklel

pagal nib fel’yangren ko sunday school.

Fare Aaronic Priesthood nge fare Melchizedek Priesthood

Ulan e Galasia, fare priesthood e mu’un fare Aaronic Priesthood ngay nge fare Melchizedek Priesthood. U tan paa’ e pi’in ni bay fapi kiy ko priesthood rok’, e rayag ni ngar pii’ed fare Arononic nge Melchizedek Priesthood ngak fapi pumo’on ko Galasia nib fel’ thawingraed. Tomuren nikan pii’ e bin nib puluw e priesthood, ma facha’ e yira yibliy ni nge mang reb e office nibay ko fare priesthood, ni wod ni’ir reb e deacon fa elder. Thingarni yibliy ni cha’en nira yibliy e bay mat’won ni rayag ni nge rrin’ e biney.

Napan nira thapeg fare pagal ni fel’yangren fa reb e mo’on nira thapeg fare priesthood, ma arram ni nge ngongliy reb e m’ag ngak Got nira rrin’ fapi muruwel rok’, ni nge pigpig ngak e gidii’, me pii’ e ayuw ko Galasia.

Pagal ni fel’yangren e rayag ni nge thapeg fare Aaronic Priesthood min yibliy ni nge mang reb e deacon ko fare puul ko Januray ulan fare duw nira gaman 12 e duw rok’. Ma rayag ni ngan yibliy raed ni ngar manged fapi teachers ulan fare duw nira gaman 14 e duw roraed nge priest ulan fare duwn nira gaman e 16 e duw roraed. Pumo’on nike un ko Galasia nike gaman ko duw roraed e rayag ni nge thapeg fare Aaronic Priesthood u tomuren nikan tawfe nag make thpaeg fare thothup. Pi’in ni bay e Aaronic Priesthood roraed e rayag ni ngar rrin’ed fapi gam’ing ni wod e sakrmanet nge tawfe.

Tomuren nikan pigpig boch ni gur reb e priest ulan fare Aaronic Priesthood, reb e mo’on nib fel’ thawingraed nike gaman e 18 e duw rok’ e rayag ni nge thapeg fare Melchizedek Priesthood min ordain nag ni’ir reb e elder. Pumo’on nike thapeg fare Melchizedek Priesthood e rayag ni nge rrin’ fapi gam’ing ko priesthood ni wod e yibliy ko fosag nge gapas nifan be’ u tabinaew fa fan ngak boch e gidii’.

Muguy ko General Handbook, 38.2.9.1, ko boch mornga’agen e members nib be’ech ni nge thapeg fare priesthood.

Quorum ko Priesthood. Quorum e ba ulung ni bay fapi mo’on riy nibay e priesthood roraed. Ra reb e ward ma bay reb fapi elders quorum riy nifan e pumo’on. Deacons, fapi sensey, nge fapi quorums ko pirest e fan e pagal ni fel’yangren.

Relief Society. Fare Relief Society e mu’un e bpin ngay ni 18 e duw roraed ngalang. Members ko fare Relief Society e yaed ma pii’ gelngin e tabinaew, gidii’, nge fare binaew.

Bpin ni fel’yangren. Bpin ni fel’yangren e yaed ma un ko fare ulung ko Young Women u mm’on ko fare puul ko Januray ulan fare duw nira gaman 12 e duw roraed.

siasing/Llecheklel

bee’ nib bpin nibe machib nag e klass

Primary. Bitir ni dalip nge mada’ ko ragag nge ta’areb e duw rok’ e kabang ko fare ulung ko Primary.

Sunday School. Gubin e pil’aal nge fal’yangren ni ngar uned ko fare Sunday School, ni ngar mada’ gaed ni ngar filed fapi chep nib thothup u ta’abang.

Ko boch mornga’agen fare priesthood, muguy ko General Handbook, guruy 3.

Ko boch mornga’agen fapi quorum ko priesthood nge fapi ulung ko Galasia, muguy ko General Handbook, fapi guruy ko 8–13.

Mabgol u thilin e pumo’on nge bpin e ke yibliy Got. Biney e bay ni’ir e lukungun fare wo’en e mon’og nib manechubog nifan pifak.

Fare tha’ u thilin reb e mabgol e susun ni’ir fare tha’ ni ngar cha’ariyew ni th’abi fel’ ni bay u fayleng. Bay e muruwel rorow nib thothup ni ngar yul’yul’ gow ngorow mi yow yul’yul’ gow ko fare m’ag ko mabgol rorow.

Figirngiy nge le’engiy e yow l’agruw ni ta’ab rogon row u mit Got. Susun ni dariy bagyow nib ga’ lungun ngak’ bagyow. Tin ni yowra duugliy e susun ni ngar rrin’ew u ta’abang nge fithik’ e t’ufeg, yow l’agrow ngay.

Fa’an ni yowra t’ufeg row mi yow muruwel u ta’abang, ma fare mabgol rorow e rayag ni nge mang fare falfalaen’ rorow nib gel. Ma rayag ni ngar ayuwegew row nge pifak row ni ngar mon’og gaed i yean ko fare yafos ni manechubog.

Wod e mabgol, Got e ke yibliy e tabinaew ma bay ni’ir e lukungun wo’en e falfalaen’ ni manemus. Tabinaew rodaed e rayag nira falflalaen’ ni fa’an gadaedra fol ko fapi machib ku Yesus Kristus. Galibithir e nge machib ngak pifak raed fare gospel ku Yesus Kristus mi yaed dag wo’en ni ngar fol gaed riy. Tabinaew e ma pii’ wo’en ngodaed ni ngad daged e t’ufeg nge pigpig nifan ngodaed.

Galibithir e susun ni ngar ted ni tabinaew roraed e irerram e bin th’abi tolang e muruwel ni ngar tiyan’raed ngay. Biney e ba tawa’ath nib thothup nge ba muruwel nifan e galibithir ni ngar chodowaliyed fapi bitir nikar fakiyed fa kar pofed.

Gubin e tabinaew ma bay e tin ni yaed be mo’owar riy. Napan ni gadaedra sap ku Got ni nge ayuweg daed ma yibe ayuweg fapi motochiyel rok’, ma fapi mo’owar ko tabinaew rodaed era ayuwegdaed ngad mon’og gaed. Bochingiyal’ ma pin’ey nib mo’omow’ e rayag ni nge ayuwegdaed ko kalngan’ nge n’agfan.

siasing/Llecheklel

matam nibe machib ko tabinaew

Tiyugang’ ko Galasia e kar pii’ed e athamgil ngak e members ni ngan tay e mo’olung nifan e tabinaew ko gubin e wik. Galibithir e ngar fanayed e ngiyal’ ney ni ngar machib niged fare gospel ngak pifak raed, mi yaed gel nag e tha’ ko tabinaew roraed. Tiyugang’ ko Galasia e kar pii’ed reb e proclamation nibe machiib nag fapi n’en nib riyul’ ni mornga’agen e tabinaew (muguy ko “Fare Tabinaew: Bugithin ngak e Fayleng,” ChurchofJesusChrist.org).

Boch kanawo’en ni rayag ni ngan gel nag e tabinaew e wod e meybil nifan e tabinaew, fil fapi chep nib thothup, min yean nga Galasia u ta’abang. Krayag ni ngad sap niged mornga’agen cheppin e tabinaew, kunuy nga ta’abang mornaga’agen e tabinaew, nge ku boch e gidii’.

Boch e gidii’ e momaw’ ni nge mabgol fa yag reb e tabinaew ngak. Boch e gidii’ e ke dar e mabgol rok’ fa bay boch ban’en nibe gafgow e tabinaew roraed riy. Machane, fare gospel e ma tawa’ath nagdaed ni demuturug rogon e pin’en nibe buch ko tabinaew rodaed. Ma fa’an gadaedra yul’yul’, ma Got era pii’ kanawo’en ngodaed fapi tawa’ath ko tabinaew, ni bay nira yib ko biney e yafos fa bin migid e yafos.

Fare temple e ir fare na’un rok fare Somoel. Urom e ggin ni gadaedra ngongliy fapi m’ag u thiliy nge Got ko napan ni gadaed be thapeg fapi gam’ing rok’ nib thothup. Fa’an gadaedra ayuweg e pi m’ag ney, ma gadaedra thapeg gelngin nira yib i m’ug ulan e yafos rodaed (muguy ko Doctrine and Covenants 84:19–22; 109:22–23).

Reb e gam’ing ni rayag ni ngaed thapegned ulan e temple e fare endowment. Fare bugithin ni endowment e be yip fan “ba tawa’ath.” Fare tawa’ath ko gelngiy nge llowaen’ e ma yib rok’ Got. Napan e ngiyal’ ko endowment, ma arram nikad m’aged daed ngak Got nge fare Fak, ni Yesus Kristus (muguy ko guruy 1).

Gidii’ nib ilaal e bay ni rayag ni ngar thapagned e biroraed e endowment ko temple u tomuren nikar manged e member ko Galasia. Ko boch mornga’agen fare endowment, muguy ko General Handbook, 27.2.

Fare wo’en e falfalaen’ e ke fal’ag rogon e tha’ ko tabinaew ni nge ul’ul’ u tomuren e yam’. Ulan e temple e gin ni rayag ni ngad mabgol gaed riy nifan e ngiyal’ ney nge manechubog. Biney e ke bing wo’en ko tabinaew ni rayag ni ngar pired u ta’abang ni manemus.

Tomuren nike thapeg fagli mabgol e birorow e endowment ko temple, ma arram nikan seal nagrow fa kar mabgol ni manechubog. Ma pifak row e rayag ni ngan seal nagraed ngorow.

Figirngiy nge le’engiy nike seal ulan e temple e thingar ayuwegnew fapi m’ag nikar fal’agnew ni ngeyag ni ngar thapagnew fapi tawa’ath nifan e mabgol ni manechubog.

siasing/Llecheklel

l’agruw i mabgol ni yow be yean u kanawo’