“Sopwun 3: Nesen 3—Ewe Kapas Allimen Kraist,” Afanafana Ai Kapas Allim: Eu Emwen ren ach sipwe Aporausa ewe Kapas Allimen Jises Kraist (2023)
“Sopwun 3: Nesen 3,” Afanafana Ai Kapas Allim
Sopwun 3: Nesen 3
Ewe Kapas Allimen Jises Kraist
Sasing
Ewe Oruen Niwinsefanito, seni Harry Anderson
Meni Aramas Repwe Ekieki
Ion Jises Kraist? Ifa ussun An epwe tongeni anisiei me ai famini?
Met wewen an epwe wor ach nuku non Jises Kraist? Ifa ussun awora nuku non I a tongeni efeiochu manauei?
Ifa ussun wewen ach sipwe aier?
Ifa ussun ai upwe tongeni mefi An Kot kinamwe me omusomus mwirin ai uwa fen fori mochen mi ngaw?
Ifan ewe popun papatais?
Met ewe niffangen ewe Ngun mi Fel?
Met wewen ach sipwe nikitu tori soponon?
Ewe kapas allimen Jises Kraist ina ussun sia feitto ren Kraist. A chok naf mecheresin an emon semirit a tongeni weweiti. Ei nesen a anonga ekiek won ewe kapas allim me afanafanen Kraist, pachenong nuku non Jises Kraist, aiersefan, papatais, ewe niffangen ewe Ngun mi Fel, me nikitu tori soponon. A pwan anonga ekiek ren ifa ussun ewe kapas allim a efeiochu meinisin noun Kot semirit.
Ewe kapas gospel a wewen “porous allim.” Ewe kapas allimen Jises Kraist a porous allim pokiten a awora ewe afanafanen Kraist—ewe ennet ese much—a murinno sipwe feitto ren I pwe sipwe manau (nengeni 1 Nephi 15:14). Ewe kapas allim a aitikich ifa ussunn ach sipwe nom non murinon, weweochun manauach. Ewe porous allimen ewe kapas allim a awora ewe an fan itach ach sipwe musono seni kewe tipis, epinipinino, me niwino mwen mesen Kot.
Ekkoch Ekiek ren Osukun
Ei kinikin a awora ew minen awewen aninisochun emwen ne amonata noum taropwe an epwe anisuk ne apomata om kopwe osukun. A pwan pachenong minen awewe ren ekkewe kapas eis me tingor kopwe aea.
Nupwen ka amonata om kopwe osukun, ekieki fiti iotek an emon me emon aramas osukosuk me osupwang non pekin ngun. Ekieki met epwe kon auchea kopwe osukuna. Amonata om kopwe awewei nonomun taman pwe meni kewe aramas resap weweiti. Kokkot anongonong won ifa ukukun fansoun kopwe ani, chemeni om kopwe omocha ekkewe nesen.
Fini ekkewe pukefel kopwe nounou nupwen ka osukun. Ewe “Nongonongun Afanafan” kinikinin ewe nesen a pachenong chommong aninisochun ekkewe pukefel.
Ekieki menni kapaseis kopwe eis nupwen ka osukun. Ota ekkewe tingor kopwe anapano minne epwe pesei emon me emon aramas an epwe mokutukut.
Pesei auchean an Kot kewe feioch mi pwonei, me apasa om kapasen pwarata ren met en ka osukuna.
Sasing
misineri ra osukuna famini.
Met Ita Kopwe Osukuna Ngeni Aramas non 15–25 minich
Fini ew ika chommong ekkewe nongonong mi tettenitiw om kopwe osukuna. Ewe nongonongun afanafan ren ew me ew nongonong a kawor mwirin ei auchean emwen non etettenin om nesen
Ewe Misin An Jises Kraist seni Nang
Kot a tinato Noun we Anamon, Jises Kraist, ngeni Fonufan an epwe angasano kich seni tipis me mano.
Pokiten an Jises ewe asosren achasefan, sia tongeni nimenimoch seni ach kewe tipis me epinipinino nupwen sia aier.
Mwirin an Jises ewe mano, I a manausefan. Pokiten An Manausefan, kich meinisin sipwe manausefan mwirin sia mano. Wewen ei pwe ngunun me inisin emon me emon aramas repwe chusefan fengen, me emon me emon kich sipwe manau feinfeino non ew inis mi unusoch.
Nuku non Jises Kraist
Nuku ina ewe aewin nongonongun ewe kapas allimen Jises Kraist.
Nuku non Jises Kraist a pachenong awora nukunuk pwe I ewe Noun Kot me nuku non I pwe ach Chon Amanau me Chon Angasano.
Nuku non Jises Kraist ew nongonongen mokutukut me manaman.
Sia apochokuna ach nuku ren iotek, kaeo ekkewe pukefel, me anneasosichi ekkewe annuk.
Aier
Nuku non Jises Kraist a emweni kich ngeni aier. Aier ina ewe angangen kun ngeni Kot me kun seni tipis. Nupwen sia aier, ach mokutukut, mochen, me ekiek ra siwin ngeni ar repwe kon nom non kinamwe fiti an Kot mochen.
Nupwen sia ennetin aier, Kot a omusakicheno. Omusano a tufich pokiten Jises Kraist a achasefani ach kewe tipis.
Nupwen sia aier, sia mefi kinamwe nupwen ach mwan me netipengaw ra chikar.
Aier ew nakatamen foffor non manauach. Kot a etiwasefanikich iteiten sia aier. I esap tongeni epwe fangetanikich.
Papatais: Ach Aewin Pwon mi Pin me Kot
Papatais ina ussun sia aewin tonong non ew pwonen marar ngeni Kot.
Papatais a wor ruu kinikinin: papatais ren konik me ren ewe Ngun. Nupwen sia papatais me kopunguno, sia nimenimoch seni ach kewe tipis, a ngenikich ew minefon poputa non manau.
Sia papatais ren mwono non konik, tapweno mwirin an Jises minen apiru.
Semirit rese papatais tori ar repwe wanu ier. Semirit ion a mano me mwen ena ier ra ngaseno meren ewe Achasefan an Jises Krasit.
Sia angei ewe sakrament iteiten wik pwe achechemenien an Jises asor me asofosefani ach kewe pwon mi pin ngeni Kot.
Ewe Niffangen ewe Ngun mi Fel
Ewe Ngun mi Fel i ewe ounumonun ewe Unumon non Kot.
Mwirin papatais, sia angei ewe niffangen ewe Ngun mi Fel seni ewe angangepinin kapunguno.
Nupwen sia angei ewe niffangen ewe Ngun mi Fel, sia tongeni chiechi ngeni I non unusen manauach ika sia nikitu.
Ewe Ngun mi Fel a epinono kich, emweni kich, oururu kich, me anisi kich ach sipwe sinei ewe ennet.
Nikitu tori ewe Nesoponon
Nikutu a pachenong soposopono ne anganga nuku non Kraist iteiten ran. Sia sopweno ne aponueta ach kewe pwon mi pin ngeni Kot, aier, kukuta ewe chiechi fengen me ewe Ngun mi Fel, me angei ewe sakrament.
Ika sia nikitu ne kukuta ach sipwe tapweno miwirin Jises Kraist, Kot a pwon pwe sipwe angei manau ese much.
Ewe Kapas Allimen Jises Kraist a Efeiochu Meinisin Noun Kot Semirit
Manaueni ewe kapas allim a anononueno ach pwapwa, pesei ach foffor, me anapano ach chiechi fengen nefinach.
Sipwe kon pwapwa—non ir me ruu ren emon me emon me famini—nupwen sia manaueni ekkewe osukun an Jises Kraist.
Seni ewe kapas allimen Jises Kraist, kewe famini ra feioch non ei manau me tongeni repwe chufengen feinfeino me nonnom ren Kot.
Kapas Eis Kopwe Eisini Aramas
Ekkewe kapas eis mi tetenitiw ir minen awewen met kopwe tongeni eisini aramas. Ekkei kapas eis ra tongeni anisuk an epwe wor om weweochun aporous me weweiti an emon mochen me nonomun.
Met ka sinei ussun Jises Kraist?
Met wewen ngonuk an epwe wor nuku non Jises Kraist?
Met ekkesiwin ka mochen an epwe fis non manauom?
Met om weweiti ussun aier?
Met om weweiti ussun papatais? Met ka tongeni fori iei om kopwe monneta ren papatais?
Ifa ussun an ewe Ngun mi Fel a tongeni anisuk non om sai ne niwin sefan ngeni mwen mesen Kot?
Met sossot en ika om famini oua mesengeni? Am mi tongeni aea ngeni kemi ekkoch aan ewe kapas allimen Jises Kraist a tongeni aninis ngeni?
Ekkewe Tingor Kopwe Otoura
Kopwe tingorei Kot non iotek an epwe anisuk om kopwe sinei pwe met sia fen kaeo mi ennet? (Nengeni “Osukuna Onononun Auchean: Iotek” non ewe omuchunon kinikinin ewe nesen 1.)
Kopwe fiti fan non ei Raninifen om kopwe anapano om kaeo ussun met sia fen osukuna?
Sipwe tongeni forata ew fansoun ren ach chufengen mwirin?
Nongonongun Afanafanen Kraist
Ei kinikin a awora afanafanen kraist me pukefel fan itom om kopwe kaeo an epwe apochokunono om wewe me kapasen pwarata ussun ewe kapas allim me anisuk ne osukun.
Sasing
Ekkei Engon me Ruemon Jises a Tinireno, seni Walter Rane
Ewe Misin seni Nang an Jises Kraist
Samach non Nang a tinato Noun we Anamon, Jises Kraist, ngeni fonufan an epwe fori tufichin meinisin ar repwe mefi pwapwa non ei fonufan me manau esemuch non ewe fonufan epwe etto. “Me iei ewe kapas allim, ewe porousoch, … pwe [Jises Kraist] a feitiw non ewe fonufan … epwe mwarei choun tipisin ewe fonufan, me epinono ewe fonufan, me enimenima seni meinisin rese wenechar, pwe meren i meinisin repwe manau” (Doctrine and Covenants 76:40–42).
Ren kich aramas, kich meinisin mi tipis, me kich meinisin sipwe mano. Tipis me mano repwe epeti kich seni ach sipwe angei manau ese much ren Kot me nukun chok ika a wor emon Chon Angasano (nengeni 2 Nifai 9). Me mwen ewe fonufan a foruta, Samach non Nang a finata Jises Kraist an epwe angasano kich. Non ew tekian napanapen pwarano ussun tong, Jises a feito fonufan me aponueta ei misin seni nang. I a fori an epwe tufich ngeni kich ach sipwe ngasano seni ach kewe tipis, me I a tumunuochu pwe kich meinisin sipwe manausefan mwirin sia mano.
Jises a manaueni eu manau ese tipis. Nesoponon An ewe angangen afanafan non an manau, I a wata won I ach kewe tipis ren An riaffou non Gethsemane me nupwen I a irapengesino (nengeni 1 Nifai 11:33). An Jises riaffou a fokkun wachemuk a efisata “an epwe chechech pokiten metek, me a kus cha seni pwangen inisin meinisin” (Doctrine and Covenants 19:18). Mwirin An Irapengesino, Jises a manausefan, a okufu mano. Chufengen, ekkei mettoch a fis ir ekkewe Achasefan an Jises Kraist.
Ach kewe tipis ra fori ach sipwe nimengaw non pekin ngun, me “ese wor mettoch mi nimengaw epwe tongeni nonnom ren Kot” (1 Nifai 10:21). Non kapachetan, ewe annukun punguoch a auchea epwe pwarata ussun ach kewe tipis.
An Jises asoren achasefan a awora ewe an fan itach ach sipwe winiti nimenimoch seni tipis me epinipinino nupwen sia aier. A pwan awora ewe an ngeni menemenochun ewe mochenin punguoch (nengeni Alma 42:15, 23–24). Ewe Chon Amanau a apasa, “Ua … fen riaffouni ekkei mettoch fan iten meinisin, pun resap riaffou ika repwe aier; nge ika resap aier repwe riaffou ussun chok Ngang” (Doctrine and Covenants 19:16–17). Ika esap punun Jises Kraist, tipis epwe awesano meinisin epinukunuk ren ew fansoun mwach ne nonnom ren Samach non Nang.
Non an fangeno Inisin pwe epwe ew assor fan itach, Jises ese awesano wisach won pusin winikapach. A auchea epwe wor ach nuku non I, aier, me achocho ne anneasosichi ekkewe annuk. Nupwen sia aier, Jises epwe tingor fan itach An pungun umoumoch seni Saman we (nengeni Moronai 7:27–28). Pokiten an ewe Chon Amanau affor, Samach non Nang a omusakicheno, angasakicheno seni ewe chou me muan ren ach kewe tipis (nengeni Mosaia 15:7–9). Sia nimenimoch non pekin ngun me nesoponon sia tongeni ketiw me mwen mesen Kot.
An Jises misin seni nang pun epwe pwan amanaua kich seni mano. Pokiten I a manausefan, kich meinisin sipwe manausefan mwirin sia mano. Wewen ei pwe ngunun me inisin emon me emon aramas repwe chusefan fengen, me emon me emon kich sipwe manau feinfeino non ew inis mi unusoch. Ika esap pokiten Jises Kraist, mano epwe awesano meinisin epinukunuk ren ew fansoun mwach ne nonnom ren Samach non Nang.
Nuku non Jises Kraist a pachonong awora nukunuk pwe I ewe Noun Kot Anamon. A pachenong pochokunen nuku non I ussun ach Chon Amanau me Angasano—pwe I chok ach ewe aan ngeni mwen mesen Kot (nengeni Fofor 4:10–12; Mosaia 3:17; 4:6–8). Sia kokoto ach sipwe anganga “pochokunen nuku non I, unusen anukunuk won ekkewe nimenimochun fofforun i ewe mi manaman ne amanaua kich“ (2 Nifai 31:19).
Nuku non Jises Kraist a pachonong achifoua pwe I a riaffou ren ach tipis non An osoren achasefan. Pokiten an Jises ewe asor, sia tongeni nimenimoch me ngaseno nupwen sia aier. Ei enimenim a anisi kich ach sipwe kuna kinamwe me epinukunuk non ei manau. A pwan mut ngenikich ach sipwe angei ew unusochun pwapwa mwirin ach mano.
Nuku non Jises Kraist a pachenong achifoua pwe seni I, meinisin sipwe manausefan mwirin ach mano. Ei nuku a tongeni anisikich oururu kich non ekkewe fansoun sia netipengaw. Ewe netipengawen mano a tongeni epwe wesino ren ewe pwonen ewe Manausefan.
Nuku non Jises Kraist a pachonong nuku me achifoua pwe I a wata won Inisin ach kewe metek me apwangapwang (nengeni Isaiah 53:3–5) I a sinei ren An a mefi ifa ussun umoumoch a anisi kich non ekkewe sosotun ei manau (nengeni Alma 7:11–12; Doctrine and Covenants 122:8). Nupwen sia omokutu nuku, I a anisi kich ne feinno mwach ren ekkewe riaffou.
Ren ach nuku non I, Jises a tongeni echikara kich non pekin inis me ngun. I a moneta fansoun meinisin an epwe anisi kich nupwen sia chemeni An tingor ach sipwe “nenenong non ngang non ekiek meinisin; kosap tipemwaramwar, kosap nuokus” (Doctrine and Covenants 6:36).
Ew Nongonongen Mokutukut me Manaman
Nuku non Jises Kraist a emwen ngeni mokutukut. Sia pwarano ach nuku ren ach anneasosichi ekkewe annuk me fofforoch iteiten ran. Sia aier seni ach kewe tipis. Sia wenechar ngeni I. Sia achocho ngeni ach sipwe ussun chok I.
Nupwen sipwe omokutu nuku, sia tongeni mefi an Jises manaman non unusen manauach. I epwe anapano ach pusin tiniken. I epwe anisikich ach sipwe marita me u ngeni sossot.
Apochokunano Ach Nuku
Ewe soufos Alma a aitikich pwe forata nuku a tongeni poputa fiti ew mecheresin “mochen ne nuku” (Alma 32:27) Mwirin, ren ach nuku non Jises Kraist an epwe marino, a auchea sipwe tumunu ren ach kaeo An kewe kapas, aponueta An kewe osukun, me anneasosichi An kewe annuk. Alma a aitikich pwe nupwen sia nikitu, achocho tumunu ewe kapasen Kot non netipach, “epwe puk waran [me winiti ussun] efoch ira a marita ngeni manau ese much”—pwan apochokunano ach nuku (Alma 32:41; nengeni uwokisin 26–43).
Itenapen Kapas Allim: “Jises Kraist,” “Achasefan an Jises Kraist,” “Nuku non Jises Kraist”
Omusomus
Met Aier?
Aier ewe oruen nongonongun ewe kapas allim. Nuku non Jises Kraist me ach tong fan Itan a emwen ngeni kich ach sipwe aier (nengeni Ilamen 14:13). Aier ewe fofforun kun ngeni Kot me kun seni tipis. Nupwen sia aier, ach mokutukut, mochen, me ekiek ra siwin ngeni ar repwe kon nom non kinamwe fiti an Kot mochen. Omusomusen tipis a fori an epwe tufich ren Jises Kraist me An asoren achasefan.
Aier a kon watte seni tufichin nemenem an epwe siwini ew nikinikin manau ika okufu ew apwangapwang. Aier iei ennetin kun ngeni Kraist, ewe a ngeni kich ewe manaman ach sipwe mefi ew “pochokunen siwin non netipach (Alma 5:12–14). Nupwen sia mefi ei ekkesiwinin netip, sia upusefan non pekin ngun (nengeni Mosaia 27:24–26).
Seni aier, sia forata ew minefon nikinikin ach kuna Kot, pusin inisich, me ewe fonufan. Sia mefi sefani An Kot tong fan itach ussun Noun semirit—me ach Chon Amanau tong ngeni kich. Ewe tufichin ach sipwe aier iei ew me nein ekkewe amwararen niffang Kot a fen ngeni kich seni Noun we.
Angangen Aier
Nupwen sia aier, sia esinna ach kewe tipis me mefi niamam sefan. Sia pwarata ach kewe tipis ngeni Kot me tingor An omusomus. Sia pwan pwarata ekkewe tipis mi wesewesen watte an epwe wor mumuta ren ekkewe sou emwenin Mwichefen, ekkewe repwe anisi kich nupwen sia aier. Sia fori met sia tongeni ne fori niwinsefanin, wewen, sipwe sotuni ne opungu ekkewe osukosuk ach mokutukut ra efisata. Ennetin aier a murinno a pwano meren mokutukut mi pung non fansoun nakatam.
Aier ew nakatamen foffor non manau. “Meinisin ra tipis, iwe ra towaw seni ewe ningen Kot” (Rome 3:23). Sipwe chok soposopono ne aier, chechemeni pwe sia “tongeni fori mettoch meinisin ren Kraist minne a opochokuna” kich (Philippi 4:13). Ewe Samon a afata ngeni kich pwe “fan chommongun an nei kewe aramas repwe aier upwe omusano ar kewe atai annuk ngeniei (Mosaia 26:30).
Feiochun Aier
Aier ew nongonong mi murinno a wato pwapwa me kinamwe. A wato rech “ewe manamanen ewe Chon Angasano, ewe amanauen [ngunuch] kewe” (Ilaman 5:11).
Nupwen sia aier, ach mwan me netipengaw ra chikar non fansoun mi chok soposopono. Sia mefi ukukun watten amemefin ewe Ngun. Ach mochen ne tapweno mwirin Kot a pochokunono.
Sasing
Preseten Russell M. Nelson
“Chommong aramas ra ekieki pwe aier ew niwinin tipis—fan ekkoch a wor omonungaw seni. … Nge ei memmefin efeiengaw mi feito seni Setan. A achocho ne eppetikich seni ach nenengeni Jises Kraist, ewe a uta fiti poun kewe mi sukuno, a anean me mochen epwe echikara, omusano, enimenima, apochokuna, nimeti, me epinano kich.” (Russell M. Nelson, “We Can Do Better and Be Better,” Ensign ika Liahona, May 2019, 67).
Itenapen Kapas Allim: “Aier,” “Angangen Achasefan an Jises Kraist”
Sasing
fopun a papatais
Papatais: Ach Aewin Pwon mi Pin ngeni Kot
Nuku non Jises Kraist me aier mi ammonakicheta ren ekkewe angangepinin papatais me kopunguno. Papatais iei ewe aewin amanauen angangepinin ewe kapas allimen Jises Kraist. Nupwen sia angei ei apwapwan angangepinin epinukunuk, sia fori ach aewin pwon mi pin ngeni Kot.
Ew angangepin iei ew angang mi pin ika a fis fofforun seni ewe mumutan ewe pristut. Ekkoch angangepin, ussun papatais, ra auchea ngeni ach angangen amanaua.
Seni ekkewe angangepin, sia fori ekkewe pwon mi pin ngeni Kot. Ekkei pwon mi pin kewe pwon nefinen kich me Kot. I a pwon pwe epwe efeiochukich nupwen sia aponueta ach kewe pwon ngeni I. Epwe wor ach pochokunen mochen ne aponueta ach kewe pwon ngeni Kot.
Kot a fen awora angangepin me pwon mi pin an epwe anisikich ach sipwe feitto ren I me manaueni manau ese much. Nupwen sia angei angangepin meren pristut me aponueta ekkewe pwon mi pin mi akoko ngeni, sia tongeni sinei “ewe manamanen ussun kot” non manauach (Doctrine and Covenants 84:20).
Ewe Pwonen Papatais
Ewe Chon Amanau a afanafana pwe papatais a auchea ren ach sipwe tonong non ewe muun nang (nengeni John 3:5). A pwan auchea ren kich ach sipwe winiti chon ewe Mwichefenin Jises Kraist. Ach Chon Amanau a fori eu minen apiru ren an a papatais (nengeni Matthew 3:13–17).
Nupwen sia papatais me aponueta ach pwon, Kot a pwon pwe epwe omusano ach kewe tipis, (nengeni Foffor 22:16; 3 Nifai 12:1–2). Ei wachemuken feioch a tufich seni ewe asoren achasefan an Jises Kraist, ewe a “tongei kich, me nimeti kich seni ach kewe tipis non pusin chaan” (Pwarata 1:5). Kot a pwan pwon pwe epwe efeiochukich ren ewe chiechi ngeni ewe Ngun mi Fel pwe sipwe tongeni efeioch, emwen, me ourur.
Non ach kinikin ren ewe pwonen papatais, sia pwarata pwe sia mochen wata won inisich ewe iten Jises Kraist. Sia pwan pwon pwe sipwe chechemeni I fansoun meinisin me aponueta An kewe annuk. Sia pwon pwe sipwe tongei me anisi ekkoch, “oupwe netipeta ren ekkewe ra netipeta; … oururu ekkana ra mochen repwe ourur, me oupwe uta o pwarata ussun Kot non fansoun meinisin me non mettoch meinisin, me ” (Mosaia 18:9; nengeni uwokisin 8–10, 13). Sia pwarano eu pochokunen ekiek pwe sipwe angang ngeni Jises Kraist tori muchun manauach (nengeni Doctrine and Covenants 20:37; Mosaia 2:17).
Ach nukucharen pwon mi pin a akoko ngeni papatais ir eu wis mi wachemuk. Ra pwan awora pochokunen epinukunuk me pwapwa. Ra fori eu auchean marar nefinen kich me Samach Kot non Nang seni minne I a achowano An tong ese much.
Papatais ren Mwono Non Konik
Jises a afanafana pwe a auchea sipwe papatais ren mwono non konik ren omusomusen ach kewe tipis (nengeni Doctrine and Covenants 20:72–74). Papatais ren mwono non konik a esisinata ewe mano, peiasano me Manausefanitan Jises Kraist (nengeni Rome 6:3–6).
Papatais ren mwo non konik a pwan wor an pochokunen esisin ren pusin kich. A esisinata ewe manon manauach me nom, ewe ireiirenon ena manau, me ach fofforun pwano non ach upusefan non pekin ngun. Nupwen sia papatais, sia poputani ewe fofforun upusefan me winiti noun Kraist at me nengin non ngun (nengeni Mosaia 5:7–8; Rome 8:14–17).
Semirit
Semirit rese papatais tori ar repwe tori ewe ier mi affat, wanu ier (nengeni Doctrine and Covenants 68:27). Semirit ion a mano me mwen ena ier ra ngaseno meren ewe Achasefan an Jises Krasit (nengeni Moronai 8:4–24; Doctrine and Covenants 137:10). Me mwen semirit ra papatais, epwe wor osukun ngeni ewe kapas allim pwe repwe moneta ren ei auchean mokutukut non manauer ar repwe fori pwon mi pin ngeni Kot.
Ewe Sakrament
Samach Kot won Nang a mochen kich sipwe nikitu ngeni ekkewe pwon sia fori ngeni I. An epwe anisi kich ach sipwe fori ei, I a annuk ngeni kich pwe sipwe mwimwich fengen ach sipwe angei ewe sakrament. Ewe sakrament eu angangepin an pristut ewe Jises a aiti ngeni Noun Chon Kaeo me mwen chok An we Angangen Achasefan.
Angei ewe sakrament ina ewe nukanapan chochon popun mwichen sakrament iteiten wik. Pinewa me konik ra efeioch me ainetiu ngeni chon ewe mwich. Ewe pinewa a esisinata an ewe Chon Amanau asorano Inisin fan itach. Ewe konik a esisinata Chan a sukuseni fan itach.
Sia angei ekkei esisin non achechemenen an ewe Chon Amanau asor me ach sipwe asorosefani ach kewe pwon ngeni Kot. Sia angei sefani ewe pwon pwe ewe Ngun epwe nom rech.
A wor ruu kinikinin papatais. Jises a afanafana pwe a auchea sipwe “uputiw ren konik me ren ewe Ngun” pwe sipwe tonong non ewe muun Kot (John 3:5; ouchean mi kapacheta). Joseph Smith a afanafana, “Papatais ren konik a chok nesopun eu papatais, me ese murinno ika ese pwan wor ewe pwan eu nesopun—ewe papatais ren ewe Ngun mi Fel” (Afanafan seni ekkewe Presetenin ewe Mwichefen, Joseph Smith [2007], 95).
Papatais ren ewe Ngun epwe tapw mwirin papatais ren konik an epwe unus. Nupwen sia angei ir me ruu papatais, sia nimenimooch seni ach kewe tipis me sia upusefan non pekin ngun. Mwirin sia poputani eu minefon manau non pekin ngun ussun noun Kraist chon kaeo.
Sia angei ewe papatais ren ewe Ngun seni eu angangepin a iteni kopunguno. Ei angangepin a fis meren emon ika chommong mi wor rer ewe pristut repwe wata pour won mokurach. Akkom ra opungano pwe kich sia choni ewe Mwichen, iwe mwirin ra wata woch ewe niffangen ewe Ngun mi Fel. Iei chok pwan ewe angangepin mi mak non ewe Testamen Sofo me ewe Puken Mormon (nengeni Foffor 8:14–17; 3 Nifai 18:36–37).
Ewe Ngun mi Fel I ewe eunumenun kewe Unumon non Kot. I a angang fengen me Samach won Nang me Jises Kraist. Nupwen sia angei ewe niffangen ewe Ngun mi Fel, sia tongeni chiechi ngeni I non unusen manauach ika sia nikitu.
Ifa Ussun ewe Ngun mi Fel a Efeiochu Kich
Ewe niffangen ewe Ngun mi Fel eu me nein an Samach won Nang wachemuken niffang. Ewe Ngun mi Fel a nimeti me epinikicheno, fori an epwe napano ach pin, napano ach sipwe unusono, napano ussun Kot (nengeni 3 Nifai 27:20). I a anisi kich ach sipwe siwin me marita non pekin ngun nupwen sia kukkuta ach sipwe tapweno mwirin an Kot annuk.
Ewe Ngun mi Fel a anisi kich ach sipwe kaeo me esinna ennet (nengeni Moronai 10:5). I a pwan opungano ennet ngeni netipach me ach ekiek. Non kapachetan, ewe Ngun mi Fel a anisi kich ne osukuna ennet (nengeni Doctrine and Covenants 42:14). Nupwen sia kaeo me osukuna ennet seni ewe manamanen ewe Ngun mi Fel, A uwei ngeni netipach (nengeni 2 Nifai 33:1).
Nupwen sia tekisoson ne kukuta emwen seni ewe Ngun mi Fel, I epwe emweni kich (nengeni 2 Nifai 32:5). Ei a pachenong amef ngeni kich ifa ussun sipwe angang ngeni ekkoch.
Ewe Ngun mi Fel a awora pochokun non pekin ngun an epwe anisi kich sipwe ngas seni ach apwangapwang. I a anisi kich ach sipwe nikitu ngeni sossot. I a tongeni awora kapasen esinesin ngeni kich ren feiengaw non pekin ngun me inis
Ewe Ngun mi Fel epwe anisi kich non ekkewe sossotun manau. I epwe oururu kich non fansoun sossot me netipengaw, amasowa kich ren epinukunuk. (nengeni Moronai 8:26). Me ren ewe Ngun mi Fel, sia tongeni mefi an Kot tong ngeni kich.
Itenapen Kapas Allim: “Ngun mi Fel,” “Niffang non Pekin Ngun”
Sasing
Jises mi komoch semirit
Nikitu tori ewe Nesoponon
Nupwen sia papatais me kopunguno, sia tonong non eu pwon mi pin ngeni Kot. Me nein ekkoch mettoch, sia pwon pwe sipwe aponueta An kewe annuk me angang ngeni tori ach mano (nengeni Mosaia 18:8–10, 13; Doctrine and Covenants 20:37).
Mwirin sia tonong non ewe anen ewe kapas allim ren papatais me kopunguno, sia achocho ngeni ach sipwe nom won. Nupwen sia tou seni ewe an ika mo ekis chok, sia anganga nuku non Kraist ach sipwe aier. Ewe feiochun aier a mut ngeni kich ach sipwe niwin ngeni ewe anen ewe kapas allim me sopweno ekkewe feiochun ach kewe pwon mi pin ngeni Kot. Nupwen sia ennetin aier, Kot a mochen epwe omusakicheno me etiwasefanikich fansoun meinisin.
Nikitu tori soponon wewen sipwe nom non ach nikitu ngeni Kot tori soponon manauach—non fansoun mi murinno me fansoun mi weires, non fansoun wouoch me fansoun riaffou. Fiti tekisoson sia mut ngeni Kraist epwe fori manauach me fori ach sipwe ussun chok I. Sia nengeni Kraist fiti nuku, achifoua, me epinukunuk inamo ika met a feitto non manauach.
Nikitu tori soponon esap wewen pwe sipwe komochuno won tori ach mano. Iwe nge, wewen pwe sipwe anonga ach ekiek won manauach, ekiek, me ach mokutukut on Jises Kraist. A pachenong soposopono ne omokutu nuku non Kraist eu me eu ran. Sia pwan sopweno ne aier, aponueta ach kewe pwon mi pin ngeni Kot, me kukuta ewe chiechi fengen me ewe Ngun mi Fel.
Nikitu tori soponon pachenong “feino chok mwach fiti tipepos non Kraist, awora eu unusochun saramen epinukunuk, me eu tongen Kot me aramas meinisin.” Samach won Nang a pwon pwe nupen sia nikitu tori soponon, kich “sipwe weri manau ese much” (2 Nifai 31:20).
Ewe Kapas Allimen Jises Kraist a Efeiochu Meinisin Noun Kot Semirit
Ewe Kapas Allimen Jises Kraist fan iten meinisin Noun Kot semirit. Ekkewe pukfel ra aitikich pwe “meinisin ra nonno meren Kot” inamo ika met sokkun manauach ika nonomuch. I a tingor “meinisin sipwe feitto ngeni i me angei seni an kirekiroch, me ese amam mo emon mi feitto ngeni i” (2 Nifai 26:33).
Ewe kapas allim a efeiochu kich non unusen ach manau me unusen fansoun esemuch. Sia kon pwapwa—non ir me ruu ussun emon me emon kich me ussun famini—nupwen sia manaueni ekkewe osukun an Jises Kraist (nengeni Mosaia 2:41; “Ewe Famini: Eu esinesin ngeni ewe Fonufan,” ChurchofJesusChrist.org). Manaueni ewe kapas allim a anononueno ach pwapwa, pesei ach foffor, me anapano ach chiechi nefinach.
Manaueni ewe kapas allimen Jises Kraist a tongeni pwan epeti kich seni ach sipwe fori ach mochen minne epwe efeiengawa kich non pekin inis ika ngun. A anisi kich ach sipwe kuna pochokun me ourur non fansoun sossot me riaffou. A awora ewe an ngeni eu manau apwapwan manau ese much.
Eu me nein ekkewe auchean porousen ewe niwinsefaniton ewe kapas allim ina pwe kich meinisin sia pachonong non an Kot famini. Kich noun achengicheng at me nengin. Ina mo ren nonomun ach famini me won fonufan, emon me emon kich a choni ewe faminien Kot.
Pwan eu auchean kinikinin ach porous pwe ekkewe famini ra tongegni chufengen ren fansoun ese much. Ewe famini a kefinita meren Kot. An Samach won Nang kokkotun pwapwa a otufichi marar nefinen famini an epwe soposopono pekinon mano. Angangepin mi pin non tempel me pwon mi pin ra fori tufichin ekkewe famini ar repwe chufengen feinfeino.
Seni ewe saramen ewe kapas allim, ekkewe famini ra tongeni awesano ar kewe wewengaw, anini, me u fengen. Ekkewe famini ra paras fesen ren tipesefenin nefiner a tongeni chikar seni aiersefan omusomus, me nuku non ewe manamanen ewe Achasefan an Jises Kraist.
Ewe kapas allimen Jises Kraist a anisi kich ach sipwe forata pochokunen maram non famini. Ewe imw ina ewe murinon neni ne osukun me kaeo ekkewe nongonongun ewe kapas allim. Eu imw a foruta won ewe nongonongun ewe kapas allim epwe eu nenien op me tumun. Epwe eu neni ikewe ewe Ngunun Kot a tongeni etiwa.
Ewe aninisochun emwen mi affatetiw eu minen awewen met kopwe tongeni osukuna ngeni emon ika a chok wor eu mochomochen fansoun. Nupwen aea ei aninisochun emwen, fini eu ika chommong nongonong kopwe osukuna. Ewe nongonongun afanafanen Kraist ren eu me ew nongonong a kawor me mwan non ei nesen.
Nupwen ka osukun, kapas eis me ausening. Anapano tingor minne epwe anisi aramas ar repwe kaeo ifa ussun an epwe marino ar arap ngeni Kot. Eu auchean tingor fan iten ewe aramas epwe chursefanuk. Ewe tamen ewe nesen epwe anongonong won ekkewe ka eis me ewe rongorong ka fori.
Sasing
misineri ra osukuna kewe fefin
Met Kopwe Tongeni Osukuna Ngeni Aramas non 3-10 Minich
Kot a tinato Noun we Achengicheng, Jises Kraist, ngeni fonufan an epwe angasano kich seni tipis me mano.
Nuku non Jises Kraist eu nongonongen mokutukut me manaman. Nuku a anisi kich ach sipwe sinei pwe an ewe Chon Amanau pochokunen manaman non manauach.
Nuku non Jises Kraist a emweni kich ngeni aier. Aier ina ewe fofforun kun ngeni Kot me kun seni tipis. Nupwen sia aier, ach mokutukut, mochen, me ekiek ra siwin ngeni ar repwe kon nom non kinamwe fiti an Kot mochen.
Nupwen sia aier, Kot a omusakicheno. Omusano a tufich pokiten Jises Kraist a achasefani ach kewe tipis.
Papatais a wor ruu kinikinin: papatais ren konik me ren ewe Ngun. Nupwen sia papatais me opungano, sia nimenimoch seni ach kewe tipis, a ngenikich ew minefon poputa non manau.
Murin ach papatais, sia angei ewe niffangen ewe Ngun mi Fel me non ew angangepin sia eita ngeni opungano.
Ika sia nikitu ne tapweno non ewe anen ewe kapas allim tori soponon manauach, Kot a pwon pwe sipwe ani manau ese much.