“Sopwun 3: Nesen 4—Winiti Chon Kuno Fochofoch noun Jises Kraist,” Afanafana Ai Kapas Allim: Eu Emwen ngeni ach sipwe Aporousa ewe Kapas Allimen Jises Kraist (2023)
“Sopwun 3: Nesen 4,” Afanafana Ai Kapas Allim
Sopwun 3: Nesen 4
Winiti Chon Kuno Fochofoch noun Jises Kraist
Asukuna Ei Nesen
Papatais ina eu angangepin mi apwapwa usun epinukunuk. Nupwen sia papatais, sia pwarano ach mochen sipwe tapweno mwirin Kot me tonong non ewe aan mi wenengeni manau esemuch. Sia pwan pwarano ach mochen sipwe winiti chon kuno fochofoch noun Jises Kraist.
Ei nesen mi tettenoch anongonong won ekkewe pwon mi pin sia fori atun papatais. Mi pachenong ekkewe popunapen kinikin mi makketiw fan, eu me eu ewe minne a wor kukkun kinikinin:
-
Ach Pwon mi pin Ach Sipwe Mochen Wata Iten Jises Kraist woch
-
Ach Pwon mi pin Ach Sipwe Aneasosichi ekkewe Annukun Kot
-
Ach Pwon mi pin Ach Sipwe Angang ngeni Kot me Ekkoch
-
Ach Pwon mi pin Ach Sipwe Nikitu tori Soponon
Anisi aramas ar repwe weweiti pwe ekkewe nongonong me annuk ka osukuna ir pekin ewe pwon mi pin repwe fori atun papatais. Pwar ngenir ifa usun eu me eu kinikinin ei nesen epwe anisir ar repwe “feito ren Kraist … me angei an ewe amanau” (Omni 1:26; nengeni pwan 1 Nifai 15:14).
Kopwe mochen kopwe osukuna ei nesen non fitu fansoun chufengen. Fan ekkoch chok eu chufengenin osukun epwe nap seni 30 minich. A murino an epwe wor mochomochen chufengen, nge fan chommong repwe awesano ekkewe kukkunutiwen kinikinin osukun.
Ota met kopwe osukuna, inet kopwe osukuna, me ifa ukukun fansoun kopwe ani. Ekieki met mi namot ngeni ekkewe aramas ka osukuner, me kutta emwen seni ewe Ngun. Mi wor reom ewe tufichin om kopwe osukun anongonong won met epwe anisiochu aramas ar repwe monneta ngeni papatais me kapunguno.
Ekkoch kinikin non ei nesen mi pachenong ekkoch tichikin tingor. Kutta ourour ne finata ifa usun me inet kopwe otoura ekkewe tingor. Kopwe ekiek och usun ukukun an emon me emon aramas weweoch. Anisi atewe ika neminewe an epwe ekis me ekis ne manaueni ewe kapas allim.
Ach Pwon mi pin Ach Sipwe Mochen Wata Iten Jises Kraist woch
Nupwen sia papatais, a wor ach pwon mi pin ach sipwe tapweno mwirin Jises Kraist “ren unusen netip.” Sia pwan pwarata pwe kich “sia mochen mwarei [woch] iten Kraist.” (2 Nifai 31:13; nengeni pwan Doctrine and Covenants 20:37).
Ach wata iten Jises Kraist woch wewen pwe sia chechemeni I me achocho ach sipwe manaueni usun Noun chon kuno fochofoch. Sia mut ngeni An saram epwe sarameno non kich ngeni ekkoch. Sia pwisin kuna kich pwe kich Noun me annomu I akkom non manauach.
Ekkewe kinikin mwirin ra anapanapa ru aanen ach sipwe chechemeni me tapweno mwirin Jises Kraist.
Iotek Iteitan
Iotek mi tongeni epwe eu chok ukukochun porous ngeni Samach won Nang ewe a feito seni ewe netip. Non iotek, sia kapas ngeni I non fatafatoch me wenechar. Sia affata ach tong ngeni I me kinisou ren ach kewe feioch. Sia pwan tingor aninis, tumun, me emwen. Nupwen sia osopwano ach iotek, sipwe awora fansoun ne kouno me ausening.
Jises a osukuna, “Oupwe fokkun iotek fansoun meinisin ngeni ewe Samon non itei” (3 Nifai 18:19, auchean mi kapacheta; nengeni pwan Moses 5:8). Nupwen sia iotek non itan Jises Kraist, sia chechemeni I me Samach won Nang.
Jises a awora ewe nenien appuru ngeni kich ach sipwe appuru nupwen sia iotek. Sia tongeni kaeo chommong usun iotek ren ach kaeo usun an ewe Chon Amanau kewe iotek non kewe pukefel (nengeni Matthew 6:9–13; John 17).
Ach iotek mi tongeni pachenong ekkewe kinikin mi mak fan:
-
Poputa ren om kapas ngeni Sam won Nang.
-
Apasa mefien netipach, usun ren kinisou ren ekkewe feioch sia fen angei.
-
Eis kapaseis, kutta emwen, me tingor ren feioch.
-
Osopwano ren ach apasa, “Non itan Jises Kraist, amen.”
Ekkewe pukefel ra pesei kich ach sipwe iotek nesosor me nepwin. Nge inamo, sia tongeni iotek inet chok fansoun me ekis meinisin. Ren pusin ach me ach famini iotek, mi tongeni epwe auchea ach sipwe fotopuku nupwen sia iotek. Sipwe awora iotek non netipach fansoun meinisin. (Nengeni Alma 34:27; 37:36–37; 3 Nifai 17:13; 19:16.)
Ach iotek repwe fiti murinon ekiek me epwe seni ewe netip. Nupwen sia iotek, sipwe kouno seni ach sipwe apasa ekkewe chok mettoch non ekkewe chok napanap.
Sia iotek ren nuku, fiti sufon, me ennetin mochen ach sipwe mokutukut won ponuwan kewe sia angei. Nupwen sia fori ei, Kot epwe emweni kich me anisi kich ne finioch. Sipwe mefi ach arap ngeni I. I epwe ngeni kich wewe me ennet. I epwe efeiochu kich ren ourur, kinamwe, me pochokun.
Kaeo Pukefel
Kaeo Pwan Ekkoch usun Ei Nongonong
Kaeo ekkewe Pukfel
Nifai a osukuna, “Kametip won ekkewe kapasen Kraist; pun [repwe] erenikemi mettoch meinisin met oupwe fori” (2 Nifai 32:3; nengeni pwan 31:20).
Ach kaeo ekkewe pukefel eu auchean anen ach sipwe chechemeni me tapweno mwirin Jises Kraist. Non ekkewe pukefel sia kaeo usun Manauan, an angang, me osukun. Sia pwan kaeo usun An kewe pwon. Nupwen sia aneani ekkewe pukefel, sia mefi An tong. Ngunuch ra watteno, ach nuku non I a napeno, me ach ekiek ra sarameno. Ach kapasen pwarata usun An misin a pochokununo.
Sia chechemeni me tapweno mwirin Jises nupwen sia nounou An kapas non manauach. Sipwe kaeo ekkewe pukefel iteiten ran, akkaewin ewe Puken Mormon.
Ekkewe pukefelin Ewe Mwichefenin Jises Kraist ren Aramas mi Pin non Fansoun Soponon ir ekkewe Paipen mi Pin, ewe Puken Mormon, ewe Doctrine and Covenants, me ewe Pearl of Great Price. Ra pwan iteni ekkewe “angang mi echipwer.”
Kaeo Pukefel
Kaeo Pwan Ekkoch usun Ei Nongonong
-
Emwen ngeni Pukefel, “Pukefel”
-
Itenapen Kapas Allim: “Pukefel”
Ach Pwon mi pin Ach Sipwe Aneasochisi ekkewe Annukun Kot
Esinesin: Mi wor chommong anen om kopwe osukuna ekkewe annuk non ei kinikin. Ren awewe, kopwe tongeni osukuner non ekoch fansoun chufengen. Ika en mi tongeni osukuna ekkoch me neir pwe kinikinin ekkewe akkomwen unungat nesen. Nupwen ka osukuna ekkewe annuk, tumunochu om kopwe apacha fengenir ngeni ekkewe annukun papatais mi pin me ewe kokkotun manau esemuch.
Nupwen sia papatais, sia awora pwon mi pin ngeni Kot pwe sipwe “aneasochisi an kewe annuk” (Mosaia 18:10; Alma 7:15).
Kot a fen ngeni kich annuk pokiten I a tongei kich. A mochen met mi murino fan itach, iei me non fansoun esemuch. Usun Samach won Nang, I mi sinei met mi auchea ngeni kich non pekin ngun me inis. I mi pwan sinei met epwe ngeni kich ewe watten pwapwa. Eu me eu annuk mi eu niffang seni ngang, a kawor an epwe emweni non ach finata, eppeti kich, me anisi kich sipwe marita.
Eu popun sia feito won fonufan pwe sipwe kaeo me marita ren ach aeaoch ach pungun finata (nengeni Abraham 3:25). Ach fini ne aneasochisi an Kot annuk—me aier nupwen sia tur—a anisi kich ne ota me emweni fetanin ei weiresin sai non fonufan.
Ekkewe annuk an Kot ir eu popunapen pochokun me feioch (nengeni Doctrine and Covenants 82: 8– 9). Ren ach aneasochisi ekkewe annuk, sia kaeo pwe esap ir annuk mi aweires minne ra ouku ach ngaseno. Ennetin ngaseno a feito seni ach aneasochisi ekkewe annuk. Aneasochis ina eu popun pochokun a ngeni kich saram me mirit me ren ewe Ngun mi Fel. A wato ngeni kich watten pwapwa me anisi kich sipwe tori ach tufich usun semirit noun Kot.
Kot a pwonei pwe epwe efeiochu kich nupwen sia aneasochisi An annuk. Ekkoch feioch ra wenengeni eu me eu annuk. An kewe omuchunon efeioch ir kinamwe non ei manau me manau esemuch non ewe fonufan epwe feitto. (Nengeni Mosaia 2:41; Alma 7:16; Doctrine and Covenants 14:7; 59:23; 93:28; 130:20–21.)
An Kot feioch ir pekin ngun me inis. Fan ekkoch, mi namot sipwe tipepos non ach ewitiwitir, epinukunuku pwe repwe feito anongonong won An mochen me fansoun (nengeni Mosaia 7:33; Doctrine and Covenants 88:68). Ach sipwe esinna ekkoch feioch, mi namot sipwe tumunoch me nengenochu non pekin ngun. Iei akkaewin ennetin feioch ra feito non napanap mi mecheres me ukukoch.
Ekkoch feioch repwe fatafatochuno chok mwirin. Ekkoch meni resap war tori mwirin ei manau. Inamo ewe fansoun ika napanapen an Kot feioch, sia tongeni apinukunuk pwe repwe feito nupwen sia achocho ne manaueni ewe kapas allimen Jises Kraist (nengeni Doctrine and Covenants 82:10).
Kot a unusochun tongei Noun kewe semirit. I mi tipepos ren ach apwangapwang, me I a omusakicheno nupwen sia aier.
Ekkewe Ru Annuk Mi Nap
Nupwen ra eisini Jises, “Menni nein ekkewe annuk a fakkun nap seni meinisin?” A ponuweni, “Kopwe tongei ewe Samon om Kot ren unusen nenukom, ren unusen ngunum o ren unusen om ekiek.”
Mwirin Jises a apasa ewe oruwen annuk mi usun chok ewe aewin: “Kopwe tongei monun unukum usun ka pwisin tongeok” (Matthew 22:36–39). “Ese pwan wor eu annuk epwe auchea nap seni ekkei” (Mark 12:31).
Kich noun Kot semirit non ngun, a wor ewe watten tufichin tong. Ina kinikinin pungun wisach non pekin ngun. Ach manaueni ekkewe ru annuk mi nap—ach sipwe tongei Kot akkom me tongei chon oruch—ina ew napanapen nikinikin chon kuno noun Jises Kraist.
Tongen Kot
Mi chommong anen ach sipwe tongeni pwarano ach tong ngeni Kot. Sia tongeni aneasosichi An annuk (nengeni John 14:15, 21). Sia tongeni annomu I akkom non manauach, fangeta ach mochen ngeni I. Sia tongeni anonga ach mochen, ekiek, me netipach won I (nengeni Alma 37:36). Sia tongeni nonnom non kinisou ren ekkewe feioch I a fen ngeni kich—me sipwe kisasew ne aea fengen ekkena feioch (nengeni Mosaia 2:21–24; 4:16–21). Seni iotek me angang ngeni ekkoch, sia tongeni pwarano me anonnonuono ach tong ngeni I.
Usun ekkoch annuk, ewe annuk ach sipwe tongei Kot ren fan iten ach tufich. Met sia tongei a apungano met sia kutta. Met sia kutta a apungano met sia ekieki me fori. Me met sia ekieki me fori a apungano ion kich—me ion sipwe winiti.
Tongen Ekkoch
Tongei ekkoch ina eu soposopwun ach tong ngeni Kot. Ewe Chon Amanau a aiti kich chommong anen ach sipwe tongei ekkoch (nengeni, ren awewe, Luke 10:25–37 me Matthew 25:31–46). Sia anisi me etiwerenong non netipach me manauach. Sia tong ren ach angang ngeni ekkoch—ren ach fang inisich non mwo kukkun napanap. Sia tongei ekkoch ren ach aea ekkewe niffang Kot a fen ngeni kich ne afeiochur.
Ach tongei ekkoch mi pachenong ach sipwe tipepos, kirekiroch, me wenechar. Mi pachenong fangafangoch ne omusano. Wewen sipwe angangoch ngeni aramas meinisin fiti sufon.
Nupwen sia tongei emon, kich me ena aramas sia feioch me ruemon. Netipach ra mar, manauach ra winiti mi auchea, me ach pwapwa a napeno.
Feioch
Ekkewe ru annuk mi nap—ach sipwe tongei Kot akkom me tongei chon oruch—ir ekkewe nongonongen an Kot kewe annuk meinisin (nengeni Matthew 22:40). Nupwen sia tongei Kot akkom, sia pwan tongei ekkoch, mettoch meinsin non manauach repwe mwokut ngeni pungun nenier. Ei tong epwe siwini ach nenengeni mettoch, ewe aean ach fansoun, ekkewe mochen sia tapweno mwirir, me tettenin met sia aucheani.
Kaeo Pukefel
Kaeo Pwan Ekkoch usun Ei Nongonong
-
Nengeni Pisekin Emwen ngeni ekkewe Pukefel: “Tong ennet,” “Tong”
-
Itenapen Kapas Allim: “Tong ennet,” “Tong”
Tapweno Mwirin ewe Soufos
Kot a kokkori soufos ar repwe Chon tupuni I won fonufan. Seni Noun soufos, A pwarano ennet me awora emwen me ourour.
Kot a kokkori Joseph Smith an epwe ewe akkomwen soufosun fansoun soponon (nengeni nesen 1). Ekkewe ra siwini mwirin Joseph Smith ir mi pwan kokko me ren Kot ar repwe emweni An Mwichefen, mi pachenong ewe soufos mi emweni ikenai. Sipwe angei eu nuku usun kokko seni nang ren ewe soufos mi manau me tapweno mwirin an afanafan.
Ekkewe afanafan an ekkewe soufos me aposel mi manau ra awora eu nukucharen ennet ese much non eu fonufanun auchea mi sisiwin. Nupwen sia tapweno mwirin noun Kot soufos, ewe fonufan mi aosukosuk me fitikoko esap achou kich. Sipwe kuna watten pwapwa non ei manau me angei emwen ren ei pekin ach sai esemuch.
Kaeo Pukefel
Kaeo Pwan Ekkoch usun Ei Nongonong
-
Emwen ngeni Pukefel: “Soufos,” “Fefin soufos,” “Osini, Osini”
-
Itenapen Kapas Allim: “Soufos,” “Osini”
Anneasosichi ekkewe Engon Annuk
Kot a pwari ekkewe Engon Annuk ngeni emon soufosun nom itan Moses an epwe emweni noun aramas. Ekkei annuk ir mi pwan fis ngeni non ach fansoun ikenai. Ra aiti kich ach sipwe fel ngeni me pwarano sufon ngeni Kot. Ra pwan aiti kich ifa usun sipwe angangoch fengen.
-
Ousap awora ekkoch kot me mwei (nengeniExodus 20:3). Ekkoch “kot” mi pachenong chommong mettoch, usun ren pisekich, nemenem, are mettoch mi itefouno.
-
“Ousap fori niosun och mettoch” (Exodus 20:4).
-
Ousap pan-muani iten ewe Samon om Kot ren och popun mi ngaw” (Exodus 20:7).
-
“Oupwe chechchemeni ewe ranin Sabbath, oupwe pinini” (Exodus 20:8).
-
“Oupwe afona sememi me inemi” (Exodus 20:12).
-
“Ousap ninni” (Exodus 20:13).
-
“Ousap nisou” (Exodus 20:14).
-
“Ousap sona” (Exodus 20:15).
-
“Ousap tipi muan ngeni emon” (Exodus 20:16).
-
“Ousap mochenia” (Exodus 20:17).
Kaeo Pukefel
Kaeo Pwan Ekkoch usun Ei Nongonong
-
Emwen ngeni ekkewe Pukefel: “Annuk, ekkewe Engon”
-
Itenapen Kapas Allim: “Engon Annuk”
Manaueni ewe Annukun Nimenimoch
Ewe annukun nimenimoch ina eu auchean kinikinin an Kot kokkoten ach amanau me manau tekia. Nisou fengen nefinen pupunu mwan me fefin mi epinipinio me ren Kot fan iten forutan semirit me fan iten pwaranon tong non pupunu. Ei foffor nefinen ruemon me ewe manamanen fori manauen aramas ra fis pwe repwe ning me pin.
An Kot annukun nimenimoch wewen kouno seni nisou fengen me nukun apupunu nefinen emon mwan me emon fefin. Ei annuk a pwan wewen unusen wenechar me nukuchar ngeni punuwan mwirin apupunu.
An epwe anisi kich ne aneasochisi ewe annukun nimenimoch, soufos ra fonou kich pwe sipwe nimenimoch non ach ekiek me kapas. Sipwe atowawakicheno seni sokkopaten napanapen sasing mi ngaw. Non ach aneasosichi ewe annukun nimenimoch, sipwe etikesona kich non ach mwokutukut me nikinikich.
Ekkewe repwe papatais repwe manaueni ewe annukun nimenimoch.
Aier me Omusomus
Non kunaien Kot, atai ewe annukun nimenimoch mi fokkun watte ngawan (nengeni Exodus 20:14; Ephesus 5:3). A aea ngawei ewe manaman mi pin I a fen awora ne foruta manau. Nge I a soposopono ne tongei kich inamo ika sia atai ei annuk. A tingorei kich sipwe aier me winiti mi nimenimoch me ren ewe asoren achasefan an Jises Kraist. Ewe riaffoun tipis a tongeni siwin ren ewe pwapwan kinamwen an Kot omusano (nengeni Doctrine and Covenants 58: 42– 43).
Feioch
Kot a fen awora ewe annukun nimenimoch an epwe efeiochu kich me ekkewe semirit ir ngun I a fen tinato ngeni fonufan. Aneasosichi ei annuk mi auchea ngeni an emon pwisin kinamwe me ach sipwe angei tong, epinukunuk, me tipew nefinen famini.
Nupwen sia manaueni annukun nimenimoch, sipwe tumun seni efeiengawen ngun ewe a feito seni nisou me nukun apupunu. Sipwe pwan atowawakicheno seni osukosuken netip me inis ekkewe ra soun fiti ena sokkun nefin. Sipwe mar non ach epinukunuk me mwen Kot (nengeni Doctrine and Covenants 121:45). Sipwe koon suk ngeni amemefien ewe Ngun mi Fel. Sipwe monneochuta ne fori pwon mi pin non ewe tempel ewe epwe ochufengeni ach famini ren fansoun esemuch.
Kaeo Pukefel
Kaeo Pwan Ekkoch usun Ei Nongonong
-
Emwen ngeni Pukufel: “Nimenimoch”
-
Itenapen Kapas Allim: “Nimenimoch”
Aneasosichi ewe Annukun Eu Na Engon
Eu watten feiochun choni ewe Mwichefen ina ewe tufichin moni eu na engon. Nupwen sia monatiw eu na engon, sia anisi ne sopweno an Kot angang me efeiochu Noun semirit.
Ewe annukun eu na engon a wor popun me non ekkewe fansoun ewe Testament Noom. Ren awewe, ewe soufos Abraham a monatiw eu na engonun meinisin pisekin (nengeni Alma 13:15; Genesis 14:18–20).
Ewe kapas tithe wesewesen wewen eu na engon. Nupwen sia monatiw eu na engon, sia awora eu na engonun ach moni tonong ngeni ewe Mwichefen (nengeni 8Doctrine and Covenants 119:3–4; interest sia weweiti pwe wewen ach moni tonong). Mettoch meinisin mi wor rech ir niffang seni Kot. Nupwen sia moni eu na engon, sia pwari kinisou ngeni I ren ach eniwini och kinikinin met I a fen ngeni kich.
Monatiw eu na engon eu napanapen nuku. Pwan eu anen ach asamonu Kot. Jises a aiti kich pwe sipwe kutta akkom ewe muun Kot (nengeni Matthew 6:33), me eu na engon ina anen ach fori ena.
Nounoun Monien Eu na Engon
Monien eu-na-engon ir mi pin. Sia ngeni emon chon ewe mwichen pisop ach eu na engon, ika non chommong area sia tongeni monatiw online. Nupwen ewe mwichen pisop a angei eu na engon, ra tinano ngeni ewe ofesinapen Mwichefen.
Eu mwich mi masoweni ewe Aewin Presetensi, ewe Mwichen ekkewe Engon me Ruemon Aposel, me ewe Chon Nemeni Mwichen Pisop ra apungano ifa usun nounoun monien eu na engon non an Kot angang (nengeni Doctrine and Covenants 120:1). Ekkei aean mi pachenong:
-
Kautan me tumunun tempel me imwen mwich.
-
Chiakun me forun pukefel.
-
Anisi mokutukutun urumot me angangen mwich non ewe Mwichefen.
-
Anisi angangen misineri non unusen ewe fonufan.
-
Anisi angangen uruon famini.
-
Awora monien sukun me kaeo.
Eu na engon ese nounou ne moni souemwenin Mwichefen non ewe neni. Ra pwisin finata ne angang rese kamo.
Feioch
Nupwen sia moni eu na engon, Kot a pwonei feioch minne ra nap seni met sia awora. I epwe sukano … ekkewe asamwachon nang, me ninau… eu feioch, ina esap naf nenian ren ami oupwe angei (Malachi 3:10; nengeni verses 7–12). Ekkei feioch ir pekin ngun me inis.
Kaeo Pukefel
Kaeo Pwan Ekkoch usun Ei Nongonong
-
Emwen ngeni kewe Pukefel: “Eu na engon”
-
Itenapen Kapas Allim: “Eu na engon”
Aneasosichi ewe Kapasen Emirit.
An ewe Samon Annukun Pochokunen Inis
Inisich ir niffang mi pin seni Kot. Emon me emon kich mi namot epwe wor in hiisich ach sipwe winiti usun I. Inisich mi fokkun auchea minne ekkewe pukefel ra anono ngenir tempel (nengeni 1 Corinth 6:19–20).
Ewe Samon a mochen kich sipwe tumunochu inisich fiti sufon. An epwe anisi kich ne fori ei, I a pwarano ewe annukun apochokunen inis a iteni ewe Kapasen Emirit. Ei pwarata a aiti kich usun mwongo och me ach sisap aea mettoch epwe efeiengawa inisich—akkaewin sakaw, supwa, me un mi pwich (wewen tii me kofi).
Non ewe ngunun ewe Kapasen Emirit, soufos ikenai ra fen fonou kich seni ach sisap aea ekkoch mettoch mi efeiengaw, ese mumuta, ika repwe oumwesikicheno. Soufos ra pwan fonou kich seni aeangawan safei mi mak seni tokter. (Noum presetenin misin epwe ponuweni kapaseis usun ika ekkoch mettoch non kinikinin neniom ousap aea.)
Feioch
Ewe Samon a awora ewe Kapasen Emirit fan iten ochun nonnomun inisich me ngunuch. I a pwonei watten feioch nupwen sia aneasosichi ei annuk. Ekkei feioch mi pachenong pochokunen inis, mirit, pisekisekin mirit, me eppet (nengeni Doctrine and Covenants 89:18–21).
Aneasosichi ewe Kapasen Emirit epwe anisi kich ach sipwe kon etiwetiwoch ngeni amemefien ewe Ngun mi Fel. Inamo ika kich meinisin mi weri osukosuken inis, ach aneasosichi ei annuk epwe anisi kich sipwe kon pochokun non inis, ekiek, me ngun.
Chon repwe papatais repwe aneasosichi ewe Kapasen Emirit.
Ren emwen usun aninisin aramas ekkewe ra weires ren mettoch mi oumwesireno, nengeni sopwun 10.
Kaeo Pukefel
Kaeo Pwan Ekkoch usun Ei Nongonong
-
Emwen ngeni ekkewe Pukefel: “Kapasen Emirit”
-
Itenapen Kapas Allim: “Pochokunen Inis,” “Kapasen Emirit”
-
Aninisin Manau: “Umwesino ngeni mettoch”
Tumunu ewe Ranin Sabbath epwe Pin
Eu Ranin Asoso me Fen ngeni
Ewe Sabbath eu ran mi pin Kot a eimueno fan itach iteiten wik ach sipwe asoso seni ach angang iteiten ran me fel ngeni I. Eu me nein ekkewe Engon Annuk a kawor ngeni Moses pwe sipwe “chechchemeni ewe ranin Sabbath, oupwe pinini” (Exodus 20:8; nengeni pwan uwokisin 9–11).
Non eu minafon pwarata, ewe Samon a apungano pwe ewe Sabbath eu ran mi kefinita ngonuk pwe kopwe asoso seni om angang, awora om sufon ngeni ewe mi Unusen Tekia (nengeniDoctrine and Covenants 59:10). A pwan apasa ewe Sabbath epwe eu ranin pwapwa, iotek, me kinisou (nengeni uwokisin 14–15).
Ren pekin ach fel ngeni non Sabbath, sia fiti mwichen sakrament iteiten wik. Non ei mwich, sia fel ngeni Kot me angei ewe sakrament ach sipwe chechemeni Jises Kraist me An Achasefan. Nupwen sia angei ewe sakrament, sia asofosefani ach pwon mi pin ren Kot me pwarano pwe sia mochen aier seni ach tipis. Ewe angangepinen ewe sakrament ina ionapen ach afona ranin Sabbath.
Non fan sia pwan fiti klas ikewe sia kaeo chommong usun ewe kapas allimen Jises Kraist. Ach nuku a mar nupwen sia kaeo ekkewe pukefel fengen. Ach tong a mar nupwen sia angang me apochokuna fengeni kich.
Non kapachetan ngeni asoso seni ach angang non ewe Sabbath, sipwe oukakicheno seni kamo mettoch me ekkoch pwan mwokutukut ewe epwe fori pwe usun nge eu chok ran. Sia eimueno ekkewe mwokutukutun ewe fonufan me anonga ach ekiek won mettochun ngun.
Eu Ranin Fofforoch
Fofforoch non ewe ranin Sabbath mi mwaren auchea usun ren met ewe sia oukakicheno seni ach sipwe fori pwe sipwe epini. Sia kaeo ewe kapas allim, apochokuna nuku, forata nefin, angang ngeni ekkoch, me fiti ekkoch urumot mi mwasangasang fiti famini me chiechiach.
Feioch
Aneasosichi ewe ranin Sabbath epwe pin ina eu esisinen ach nikitu ngeni Samach won Nang me Jises Kraist. Nupwen sia fori ach mwokutukutun Sabbath epwe mas ngeni mochenin Kot ren ewe ran, sipwe mefi pwapwa me kinamwe. Sipwe marita non pekin ngun me pochokun sefan non pekin inis. Sipwe pwan mefi ach arap ngeni Kot me anonnonueno nefinach ngeni ach Chon Amanau. Sipwe kon unusen tumunu inisich esap wor nimengawan seni ewe fonufan (Doctrine and Covenants 59:9). Ewe Sabbath epwe winiti “eu pwapwa” (Isaiah 58:13; nengeni pwan uwokisin 14).
Kaeo Pukefel
Kaeo Pwan Ekkoch usun Ei Nongonong
-
Itenapen Kapas Allim: “Ranin Sabbath”
-
Emwen ngeni kewe Pukefel: “Ranin Sabbath”
Aneasosichi me Afona ewe Annuk
Aramas mi Pin non Fansoun Soponon ra nuku ne aneasosichi ewe annuk me non ar repwe aramas och (nengeni Doctrine and Covenants 134; Nongonongen Achifoua 1:12). A wor pesepes ngeni Chon mwichefen ar repwe awora angangen aninis ar epwe ochueno nenier me muur. A pwan wor pesepes ngenir pwe repwe chon nenien appiru ren mettoch mi murino non neni me muu.
Chon mwichefen ra ketiw ar repwe fiti muun fonu me mwokutukutun anongonong won ewe annuk. Chon mwichefen mi wor wiser non muun fonu repwe mokutukut non ena sokkun wis usun ir chon ewe muu mi oureki, nge esap emon chon tupuni ewe Mwichefen.
Kaeo Pukefel
Kaeo Pwan Ekkoch usun Ei Nongonong
-
“Mwokutukutun Muu me Sopw” non kinikin 38.8 seni ewe Pukenapen Emwen
-
Itenapen Kapas Allim: “Wisen aramasen muu”
Ach Pwon mi pin Ach Sipwe Angang ngeni Kot me Ekkoch
Angang
Nupwen sia papatais, sia pwon mi pin ach sipwe angang ngeni Kot me angang ngeni ekkoch. Angang ngeni ekkoch ina eu me nein ekkewe akkaewin anen ach sipwe angang ngeni Kot (nengeni Mosaia 2:17). Ewe soufos Alma a aiti ekkewe ra mochen repwe papatais pwe repwe “mochen mwarei fengeni an emon me emon chou, … netipeta ren ekkewe ra netipeta, … me aururu ekkewe ra mochen aurur” (Mosaia 18:8–9).
Mwitir chok mwirin papatais, minafon chon mwichefen ra kan angei eu kokko ar repwe angang non ewe Mwichefen. Ekkei kokko ir repwe fis ren ach pwisin finata me esap kamo. Nupwen sia etiwer me achocho ne angang, sia mar non nuku, awatteno sineinap, me efeiochu ekkoch.
Pwan eu pekin ach angangen aninis non ewe Mwichefen ina ach sipwe emon “brother chon iamwir” ika emon “sister chon iamwir.” Non ei wis, sia angang ne anisi ekkewe aramas me famini mi ewis ngeni kich.
Usun chon kuno noun Jises Kraist, sia kutta fansoun meinisin ach sipwe angangen aninis iteiten ran. Usun I, sia “fein fetan ne fori angang mi murinno” (Foffor 10:38). Sia angangen aninis ngeni chon oruch me ekkoch non neniach we. Sia tongeni fiti ekkewe tufichin angangen aninis me non JustServe ikewe mi wor ie. Sia tongeni anisi an ewe Mwichefen pekin aninisin mi osupwang me fiti kaworen aninisin osukosuk watte.
Kaeo Pukefel
Kaeo Pwan Ekkoch usun Ei Nongonong
-
Emwen ngeni Pukefel: “Angang”
-
Itenapen Kapas Allim: “Angang”
Aporousa ewe Kapas Allim
Ren pekin ach pwonen papatais, sia pwon pwe sipwe “chon pwarata usun Kot” (Mosaia 18:9). Eu anen ach sipwe uta ussun chon pwarata ren ach sipwe afanafana ewe kapas allimen Jises Kraist. Anisi ekkoch ar repwe angei ewe kapas allim ina eu me nein ekkewe apwapwan sokkun angangen aninis sipwe tongeni awora Doctrine and Covenants 18:15–16). Ina eu pochokunen manamanen pwarano ach tong.
Nupwen sia weri ekkewe feiochun ach manaueni ewe kapas allim, sipwene chok mochen aea fengen ekkena feioch. Chochon famini, chiechiach, me ekkewe kich mi sisiner ra kan mochen sinei nupwen sia awora eu nenien appiru ren ach tupwon me ra kuna ifa usun ewe kapas allim a efeiochu manauach. Sia tongeni afanafana ewe kapas allim non pusin nonnomun me pusin napanapan (nengeni Pukenapen Emwen, sopwun 23).
Sia etiwa ekkoch repwe pachenong non angangen aninis, non ewe neni, pekin urumot, me mokutukutun Mwichefen. Sia tingorer repwe fiti eu mwichen Mwichefen ika eu angangen papatais. Sia tongeni tingorer repwe katon echo video online ewe a awewei ewe kapas allimen Jises Kraist, ar epwe aneani ewe Puken Mormon, ika churi ewe sukun eu tempel. Mi wor pukuwen tingor sia tongeni atoura ngeni ekkoch. Fan chommong, kokorato ekkoch a chok wewen ach apachanong ach famini, chienach, me chon oruch non met sia fen fori.
Ika sia tingor, Kot epwe anisi kich ne esinna tufich ach sipwe afanafana ewe kapas allim me ureni ekkoch ifa usun a efeiochu manauach.
Ren pwan ekkoch porous usun ach sipwe aea ekkewe nongonongen tong, aea fengen, me kokorireto, nengeni “Chufengen ngeni Chon Mwichefen” non sopwun 9.
Kaeo Pukefel
Kaeo Pwan Ekkoch usun Ei Nongonong
-
Emwen ngeni kewe Pukefel: “Angangen Misineri”
-
Itenapen Kapas Allim: “Angangen Misineri”
Echikifel me Asoren Echikifel
Kot a forata ewe annukun ewe echikipin pwe eu anen ach sipwe amari pochokunen ngun me ach sipwe anisi ekkewe mi osupwang.
Echikipin wewen sisap mwongo me ka ren ew fansoun. Ewe Mwichefen a sou eimueno ewe aewin Raninfelin iteiten maram pwe eu ranin echikipin. Eu ranin echikipin a kan pachenong ach sisap mwongo me ka ren eu kinikinin 24- awa ika inisich mi tongeni fori. Pwan ekkoch auchean kinikinin Raninfelin echikipin mi pachenong iotek me kapasen pwarata. A wor pesepes ngenikich ach sipwe echikipin non ekkoch pwan fansoun nupwen sia mefi pwe a namot.
Aueta Pochokunen Ngun
Echikipin a tongeni anisi kich sipwe tipetekison, arap ngeni Kot, me mefsefani ewe ngun. Me mwen nepoputan An angangen afanafan, Jises Kraist a echikipin (nengeni Matthew 4:1–2). Ekkewe pukefel ra rekotuni chommong uruon soufos me ekkoch ar ra echikipin pwe repwe anapeno ar pochokunen ngun me kutta auchean feioch fan iter ika ekkoch.
Echikipin me iotek fengen. Nupwen sia echikipin me iotek fiti nuku, sipwe kon mecheres ngeni ach sipwe angei pwisin ach pwarata. Sipwe pwan kon mochen etiwa ne esinna ennet me weweiti mochenin Kot.
Anisi Ekkewe mi osupwang
Nupwen sia echikipin, sia fangeno ewe moni ngeni ewe Mwichefen an epwe anisi ne tumunu aramas mi osupwang. Ei a iteni eu asoren echikipin. Sia kokoto ach sipwe awora eu asor ewe mi mwaren nonno ngeni ukukun mon ekkewe mwongo sise ani. Sia pesepes ach sipwe kisasew me awora nap seni ewe ukukun mon ekkei mwongo ika kich mi tongeni. Awora och monien asoren echikipin ina eu anen ach sia tongeni angang ngeni ekkoch.
Monien asoren echikipin ra nounou ne awora mwongo me ekkoch pisek auchea ngeni aramas mi osupwang, non pwisin neniach me unusen fonufan. Ren porous ren ifa usun sipwe aninis ren asoren echikipin, nengeni “Awora Eu ne engon me Ekkoch Asor” non ei nesen.
Kaeo Pukefel
Echikipin
Tumunu Ekkewe mi Osupwang
Kaeo Pwan Ekkoch usun Ei Nongonong
-
Emwen ngeni kewe Pukefel: “Echikipin”
-
Pukenapen Emwen: 22.2.2
-
Itenapen Kapas Allim: “Echikipin me Asoren Echikipin”
Ach Pwon mi pin Ach Sipwe Nikitu tori Nesoponon
Nupwen sia papatais, sia pwon mi pin ngeni Kot ach sipwe “nikitu tori nesoponon” ne manaueni ewe kapas allimen Jises Kraist (2 Nifai 31:20; pwan nengeni Mosaia 18:13). Sia achocho ach sipwe chon kuno fochofoch noun Jises Kraist.
Ewe soufosun Puken Mormon Nifai a awewei papatais pwe ina ewe tit minne sipwe tonong non ewe anen kapas allim (nengeni 2 Nifai 31:17). Mwirin papatais, sia sopweno ne “nikitu fiti tipepos non Kraist” (2 Nifai 31:20).
Nupwen sia “nikitu” won ewe anen chon kuno, sia monneta ne no ngeni ewe tempel. Ikena sipwe fori pwon mi pin ngeni Kot nupwen sia angei angangepinin tempel. Non ewe tempel, sipwe endow ren manaman me sia tongeni riri usun famini ren fansoun esemuch. Ach aneasosichi ekkewe pwon mi pin sia fori non ewe tempel epwe suki ewe asam ngeni tufichin ngun meinisin me feioch Kot a awora fan itach.
Nupwen sia soposopono ne nikitu won ewe anen kapas allim, nesoponon sipwe angei an Kot niffang mi nap—ewe niffangen manau esemuch (nengeni 2 Nifai 31:20; Doctrine and Covenants 14:7).
Ekkewe kinikin mwirin ra awewei ekkoch pekin met Kot a fen awora an epwe anisi kich ne nikitu tori nesoponon ach sai won fonufan—me kuna pwapwa non.
Pristut me Kinikinin Mwichefen
Ewe pristut ina ewe mumuta me manamanen Kot. Seni ewe pristut, Samach won Nang a awesi An angang an epwe apwonueta ewe manau fochofoch me manau esemuch an Noun semirit (Moses 1:39). Kot a fang mumuta me manaman ngeni Noun at me nengin won fonufan ar repwe awesi ei angang.
Ewe pristut a efeiochu kich meinisin. Angangepin usun papatais me ewe sakrament ra ketiw me ren ekkewe ir mi amwochu ofesin pristut. Sia pwan angei kewe efeiochun echikara, ekinamwei, me ourour.
Ewe Pristut me Souemwenin Mwichefen me Kokko
Ewe Mwichefen a emwen me ren Jises Kraist me ren noun soufos me aposel. Ekkei souemwen ra kokko me ren Kot, seikita, me kawor ngenir ewe mumuta ar repwe mokutukut non iten ewe Chon Amanau.
Me nom, Kraist a ngeni Noun Aposel ei chok pwan mumutan pristut, minne a mut ngenir ar repwe emweni An Mwichefen mwirin I a feita nang. Nesoponon ena mumuta a poutuno nupwen aramas rese etiwa ewe kapas allim me ekkewe Aposel ra mano.
Chon kuno seni nang ra eniwinato ewe pristut non 1829 me ren ewe Soufos Joseph Smith, me ewe Samon a forsefanieta An Mwichefen ren aposel me soufos. (Nengeni nesen 1.)
Ren ewe kinikin non neniach, a wor ren ekkewe pisop me presetenin steik ewe mumutan pristut ar repwe emweni mwicheichen Mwichefen.
Nupwen mwan me fefin ra kokko me ra efeioch ngeni wis ar repwe angang non ewe Mwichefen, a kawor ngenir ewe mumuta seni Kot ar repwe mokutukut non ena kokko. Ei mumuta mi kawor ngeni misineri, souemwen, sense, me ekkoch tori ar ra wes seni wiser. A ewis ngeni ekkoch fan emwenien ekkewe ra amwochu kewe kien pristut.
Mumutan pristut mi tongeni aea non chok wenechar (nengeni Doctrine and Covenants 121: 34– 46). Ei mumuta mi nukunuk non emon mi pin an epwe tupuni ewe Chon Amanau me foffor non Itan. A fen kokkotono pwe epwe efeiochu me angang ngeni ekkoch.
Aaronik Pristut me Melkisetek Pristut
Non ewe Mwichefen, ewe pristut mi pachenong ewe Aaronik Pristut me ewe Melkisetek Pristut. Fan emwenien ekkewe ra amwochu ekkewe kiien pristut, ewe Aaronik me Melkisetek Pristut ra kawor won mwan mi fich ngeni chon ewe Mwichefen. Mwirin ewe pristut mi fich a kawor, ewe aramas a seikita ngeni eu ofes non ena pristut, usun ren sounkowa ika elter. Mi namot i epwe seikita me ren emon mi wor ren ewe pungun mumuta.
Nupwen emon mwan ika emon anuon a angei ewe pristut, i a fori eu pwon mi pin ren Kot an epwe apwonueta wis mi pin, angang ngeni ekkoch, me aninnis ne aueta ewe Mwichefen.
Anuon mi tongeni angei ewe Aaronik Pristut me seikita ngeni sounkowa poputa non January non ewe ier repwene 12 ier. Ir mi tongeni seikita ngeni sense non ewe ier repwene 14 me ngeni prist non ewe ier repwene 16 ier. Mwan mi keran choni mwichefen ekkewe a tori ierir ra tongeni angei ewe Aaronik Pristut mwitir chok mwirin papatais me kapunguno. Chon amwochu ewe Aaronik Pristut ra fori angangepin usun ewe sakrament me papatais.
Mwirin an angang ren ew fansoun usun emon prist non ewe Aaronik Pristut, emon mwan nimenimoch ewe a mwaren 18 ier mi tongeni angei ewe Melkisetek Pristut me seikita ngeni an epwe emon elter. Mwan ekkewe ra angei ewe Melkisetek Pristut ra tongeni fori angangepinin pristut usun ren ar ngeni ekkoch efeiochun chikar me aurur ngeni chochon famini me ekkoch.
Nengeni Pukenapen Emwen, 38.2.9.1, ren porous usun an minafon chon mwichefen ra angei ewe pristut.
Mwich me Mwichen Aramas non Mwichefen
Mwichen pristut. Ew mwich ina eu tettenochun mwichen chon amwochu pristut. Eu me eu wart mi wor an mwichen elter ren mwan mi mwukeno. Sounkowa, sense, me mwichen prist ren anuon.
Relief Society. Ewe Relief Society mi pachenong fefin ier 18 me napeno. Chochon Relief Society ra apochokuna famini, emon me emon, me ewe neni.
Young Women. Fopun ra choni ewe mwichen Young Women poputa non January non ewe ier repwene 12 ier.
Kinter. Semirit ier 3 ngeni 11 ir kinikinin ewe mwicheichen Kinter.
Sunday School. Meinisin mi mwukono me serafo ra fiti Sunday School, ikewe re chufengen ar repwe kaeo fengen ekkewe pukefel.
Ren pwan ekkoch porous usun ewe pristut, nengeni Pukenapen Emwen, sopwun 3.
Ren pwan ekkoch porous usun mwichen pristut me kinikinin Mwichefen, nengeni Pukenapen Emwen, sopwun 8– 13.
Kaeo Pukefel
Kaeo Pwan Ekkoch usun Ei Nongonong
-
Pukenapen Emwen, sopwun 3: “Nongonongen Pristut”
-
Itenapen Kapas Allim: “Aaronik Pristut,” “Melkisetek Pristut,” “Pristut”
Pupunu me Famini
Pupunu
Pupunu nefinen emon mwan me emon fefin a epinipinino me ren Kot. Ina nukanapen An kokkot fan iten fefeitan Noun semirit esemuch.
Ewe ochufengenin emon mwan me fefin non pupunu epwe ina nefiner won fonufan repwe kon aucheani. Mi wor wiser mi pin ar repwe nukuchar fengen me nikitu ngeni pwonen ar apupunu.
Emon mwan me fefin ir pupunu ra nonopok me ne mesen Kot. Emon esap nemeni ewe pwan emon. Ar pekin finata epwe fis non tipew me tong, ren unusen ir me ruemon repwe fori.
Nupwen emon mwan me fefin ir pupunu ra tong fengen me angang fengen, ar pupunu mi tongeni epwe ewe popun ar watten pwapwa. Ra tongeni aninis fengen me nour semirit ar repwe fetan ngeni manau esemuch.
Ewe Famini
Usun pupunu, ewe famini mi epinipinino me ren Kot me ina nukanapen An kokkot ren ach pwapwa esemuch. Ach famini repwe wesewesen pwapwa nupwen sipwe manaueni ekkewe afanafanen Jises Kraist. Sam me in ra aiti nour semirit ewe kapas allimen Jises Kraist me awora eu nenien appiru non ar manaueni. Famini ra awora tufich ngeni kich ach sipwe tong me angang fengen.
Sam me in repwe fori pwe ar famini epwe ina akkaewin tettenin mettoch mi auchea. Mi eu tufich me wis mi pin ren an sam me in repwe tumunu ekkewe semirit ra tongeni nouniretiw ika muutir.
Meinisin famini mi wor ar weires. Nupwen sia kutta an Kot aninis me aneasosichi An annuk, weiresin famini mi tongeni anisi kich ach sipwe kaeo me mar. Fan ekkoch ekkei sosot ra anisi kich ach sipwe kaeo ne aier me omusano.
Souemwenin Mwichefen ra pesei chon mwichefen ar repwe efisi pwinin famini iteiten wik. Sam me in ra aea ei fansoun ne aiti nour semirit ewe kapas allim, apochokuna nefinen famini, me urumot fengen. Souemwenin mwichefen ra pwan atou eu esinesin pwe ewe a aiti kich auchean ennet usun ewe famini (nengeni “An ewe Famini: Esinesin ngeni ei Fonufan,” ChurchofJesusChrist.org).
Pwan ekkoch anen ach sipwe apochokuna ewe famini mi pachenong iotekin famini, kaeo pukefel, me fel ngeni Kot fengen non fan. Sia pwan tongeni kutta uruon famini, ionfengeni porousen famini, me angang ngeni ekkoch.
Chommong aramas a oukuk ar tufichin pupunu ika ren tongen nefinen famini. Chommong ra fen weri keimufesenin pupunu me weiresin nonnomun famini. Nge inamo, ewe kapas allim a efeiochu emon me emon kich ese nifinifin nonnomun ach famini. Me nupwen sia nikitu, Kot epwe awora eu anen ach sipwe angei ekkewe feiochun ach tongei famini, ika epwe non ei manau ika non ewe manau epwe feito.
Kaeo Pukefel
Pupunu
Famini
Kaeo Pwan Ekkoch usun Ei Nongonong
-
Emwen ngeni ekkewe Pukefel: “Famini,” “Apupunu, Pupunu”
-
Pukenapen Emwen, sopwun 2: “Anisi Emon me Emon me Famini non ewe Angangen Amanau me Manau Tekia”
-
Itenapen Kapas Allim: “Pupunu,” “Famini,” “Tumunu semirit”
Tempel me Angangen Uruon Famini fan iten Neuo mi Mano
Samach won Nang a tongei meinisin Noun semirit me mochen ar amanau me manau tekia. Nge pinionun aramas ra fen mano me nukun ar rese rong ewe kapas allimen Jises Kraist ika angei ekkewe angangepinin manau an ewe kapas allim. Ekkei angangepin mi pachenong papatais, kapunguno, angangepinin pristut ren mwan, ewe tempel endowment, me pupunu esemuch.
Me ren An chen me umoumoch, ewe Samon a fen awora pwan eu aan an ekkei aramas repwe angei ewe kapas allim me an kewe angangepinan. Non ewe fonufanen ngun, ewe kapas allim mi pwan afanafan ngeni ekkewe ra fen mano nge rese angei (nengeni Doctrine and Covenants 138). Non tempel, sia tongeni fori ekkewe angangepin fan iten ach kewe neuo mi mano me pwan ekkoch. Ekkei aramas mi mano non ewe fonufanen ngun ra tongeni etiwa ika resap etiwa ewe kapas allim me ekkewe angangepin a fis fan iter.
Me mwen sia tongeni fori ekkei angangepin, mi namot sipwe kutta ion kewe ach neuo ekkewe rese mwo angeir. Kutta ion kewe chochon ach famini pwe repwe tongeni angei angangepin mi eu nukanapen popun ach angangen uruon famini. Nupwen sia kuna porous usur, sia tongeni apachata ngeni an Mwichefen we nenien porous non FamilySearch.org. Mwirin kich (ika ekkoch) ra tongeni fori angangepin fan iter non ewe tempel.
Nupwen sia kutta ach kewe neuo me fori angangepin fan iter, ach kewe famini mi tongeni chufengen ren fansoun esemuch.
Kaeo Pukefel
Kaeo Pwan Ekkoch usun Ei Nongonong
-
Pukenapen Emwen, sopwun 28: “Angangepinen Tempel ren ekkewe mi Mano”
-
Itenapen Kapas Allim: “Papatais ren ekkewe mi Mano,” “Uruon Famini”
Tempel, ewe Endowment, Pupunu Esemuch, me Famini Esemuch
Tempel
Ewe tempel mi imwan ewe Samon. Mi eu neni mi pin ikewe sia tongeni fori pwon mi pin ren Kot nupwen sia angei An angangepin. Nupwen sia aneasosichi ekkei pwon mi pin, epwe wor ewe manamanen kot epwe pwano non manauach (nengeni Doctrine and Covenants 84:19–22; 109:22–23).
Ewe Endowment
Eu me nein ekkewe angangepin sia angei me non tempel a iteni ewe endowment. Ewe Kapas endowment wewen “eu niffang.” Ei niffangen mirit me manaman a feito seni Kot. Fansoun ewe endowment, sia fori pwon mi pin ren Kot ewe a foti kich ngeni I me Noun we, Jises Kraist (nengeni sopwun 1).
Kewe mi mukono ra tongeni tufichin angei ar pwisin tempel endowment mwirin mwaren eu ier seni an choni ewe Mwichefen. Ren pwan ekkoch porous usun ewe endowment, nengeni Pukenapen Emwen, 27.2.
Pupunu Esemuch me Famini Esemuch
An Kot kokkoten pwapwa mi atufichi nefinen famini repwe nikitu tori pekinon mano. Non ewe tempel sia tongeni pupunu ren fansoun iei me esemuch. Ei a otufichi ngeni famini ar repwe nom fengen feinfeino.
Mwirin pea pupunu ra angei ar tempel endowment, ra tongeni riri fengen ika pupunu ren fansoun esemuch. Nour semirit mi tongeni riri ngenir.
Emon mwan me fefin ir pupunu ekkewe rafen ririfengen non ewe tempel repwe aneasochisi ekkewe pwon mi pin ra fen fori ar repwe angei ekkewe feiochun pupunu esemuch.
Kaeo Pukefel
Kaeo Pwan Ekkoch usun Ei Nongonong
-
Pukenapen Emwen, sopwun 27: “Angangepinen Tempel ren ekkewe mi Manau”
-
Itenapen Kapas Allim: “Tempel,” “Angangepin,” “Pupunu”