Ol Aedia blong Kam Antap long Skripja Stadi blong Yuwan

Ol skripja oli holem tok blong God. Taem yu stap stadi long skripja, askem Papa blong yu long Heven blong gaedem yu mo kasem Spirit blong Hem blong helpem yu andastanem olgeta.

Ol skripja oli tijim yumi se evri samting i stap testifae abaot Kraes (luk long 2 Nifae 11:4; Moses 6:63), so i gud blong lukaotem Hem insaed long samting we oli bin hapen, long ol stori mo ol tijing insaed long ol skripja. Tingting blong notem daon, o makem olgeta ves we oli stap tij abaot Sevya mo olsem wanem blong folem Hem.

Maet bae yu faenem se samfala toktok mo sentens insaed long ol skripja oli mekem yu sapraes, olsem se oli raetem blong yu nomo. Maet bae yuwan yu filim se i stret long yu mo i givim insperesen mo i pusum yu blong mekem samting. Tingting blong makem olgeta insaed long skripja, o raetemdaon olgeta long wan stadi jenol blong yu.

Samtaem ol trutok blong gospel (plante taem yumi singaotem doktrin o prinsipol), oli talemaot klia, mo samtaem oli kamkamaot tru long wan eksampol o wan stori. Askem yuwan: “?Wanem ol trutok blong gospel we oli stap tijim insaed long ol ves ia?”

Luklukgud long ol tingting mo filing blong yu, iven sapos yu luk se oli no go wetem wanem we yu stap ridim. Olgeta tingting mo filing ia, maet oli ol stret samting ia we Papa blong yu long Heven i wantem yu blong lanem mo filim.

Pikja

woman i stap stadi long ol skripja 2

Tingting long olsem wanem nao ol stori mo ol tijing blong ol skripja, we yu stap ridim i go wetem laef blong yu. Eksampol. Yu save askem yuwan: “?Wanem eksperiens nao mi bin gat we oli semmak long wanem mi stap ridim?” o “?Olsem wanem nao mi save folem eksampol blong man o woman ia insaed long ol skripja?”

Blong stap askem ol kwestin abaot gospel i save helpem yu blong disaed long wanem blong stadi. Taem yu stadi ol skripja, bae ol kwestin i save kam long maen blong yu. Olgeta kwestin ia, maet bae i go wetem wanem yu stap ridim, o wetem nomol laef blong yu. Tingting hevi long ol kwestin ia mo lukaotem ol ansa taem yu stap gohed blong stap stadi ol skripja. Afta long stadi blong yu, askem wanem moa God i wantem yu blong lanem mo wajem ol ansa long ol aoa mo dei we bae i kam.

Blong gat moa tingting long ol ves we yu stap ridim, yusum ol futnot, Topical Guide, Bible Dictionary, Gaed long Ol Skripja (olskripja.ChurchofJesusChrist.org), mo ol nara stadi help.

Yu save faenem sam tingting we i gat mining abaot wan skripja sapos yu tingting hevi long ol toktok blong hem —ol situesen o ples, we oli tokbaot insaed long skripja. Eksampol: Blong save bakgraon mo ol bilif blong ol pipol we wan profet i toktok long olgeta, i save helpem yu blong andastanem tingting biaen long ol mesej blong profet ia.

Pikja

man i stap stadi ol skripja

I gat plante wei blong raetemdaon ol filing we yu kasem taem yu stap stadi. Eksampol. Yu save makem wan toktok, o sentens we i gat mining long yu, mo raetemdaon ol tingting blong yu olsem wan not insaed long ol skripja blong yu. Mo tu, yu save kipim wan jenol we yu raetem ol niu tingting, ol filing, mo ol samting we i kam long maen blong yu. O yu save raetemdaon ol kwestin we yu bin askem bifo yu statem stadi blong yu, folem wetem ol ansa we yu bin kasem.

Ridim wanem ol lata-dei profet mo aposol oli bin tijim abaot ol prinsipol we yu faenem insaed long ol skripja. Ol mesej blong olgeta i stap long “Jeneral Konfrens,” “Ol Magasin,” mo ol nara koleksen insaed long Gospel Laebri.

Ridim ol stori insaed long ol skripja, lukaotem blong andastanem olgeta samting insaed (taem, ples, man we i toktok, mo ol man we i stap lisin). Ol skripja stori we i soem oli ol gudfala risos blong hemia, speseli blong ol pikinini mo ol memba we oli no save gud ol skripja.

Blong stap toktok raon long ol tingting blong yu we yu bin kasem long stadi blong yuwan, i wan gud wei blong tijim ol narawan mo blong help blong mekem andastaning blong yu i kam moa strong abaot wanem yu bin ridim.

Skripja stadi i save givim insperesen long yumi, mo lidim yumi blong jenisim wei we yumi stap laef long hem. Lisin long wanem Spirit i talem long yu blong mekem taem yu stap rid, mo afta, mekem komitmen blong tekem aksen folem ol kwaet toktok ia.