“From Wanem Yumi Stadi Ol Skripja?” Ol Skripja Stadi Aedia (2021)
“From Wanem Yumi Stadi Ol Skripja?” Ol Skripja Stadi Aedia
From Wanem Yumi Stadi Ol Skripja?
Taem yumi stadi ol skripja wetem tru tingting, yumi kam moa kolosap long Jisas Kraes mo kam blong andastanem gud moa gospel blong Hem mo sakrifaes blong Atonmen blong Hem. Be profet Nifae i leftemap tingting blong yumi long wei ia:
“ Taswe, yufala i mas wokbaot i go fored wetem strong bilif long Kraes, wetem wan stret mo klin hop,mo wan lav blong God mo blong evri man. Taswe, sapos yufala i gohed strong i go, mo stap kakae gud long toktok blong Kraes, mo stap strong kasem en, luk, olsem ia nao Papa i talem: Bae yufala i kasem laef we i no save finis” (2 Nifae 31:20).
Ol tijing long ol skripja bae i helpem yumi blong gobak long Papa blong yumi long Heven. Ol lata-dei profet blong yumi oli bin askem yumi blong stadi olgeta skripja evri dei yumi wanwan mo sapos i posibol, olsem ol famli. Oli bin invaetem yumi blong lanem aot long ol eksperiens blong olgeta insaed long ol skripja mo blong laef folem ol stori blong skripja mo ol tijing blong hem long laef blong yumi tedei, olsem we Nifae i kaonselem yumi blong mekem long 1 Nifae 19:23. Tugeta, ol profet blong bifo mo tedei oli invaetem yumi blong stadi ol skripja mo blong “kakae gud long ol toktok blong Kraes” (2 Nifae 32:3).
Presiden Russell M. Nelson i tijim tu se impoten tru tok ia abaot “kakae gud” long ol skripja:
“Blong kakae gud i minim se i moa bitim blong testem. Blong kakae gud i minim blong laekem blong kakae. Yumi laekem blong kakae ol skripja taem yumi stadi long olgeta wetem wan spirit we i glad blong faenem niu samting, mo wetem spirit blong stap fetful blong obei. Taem yumi kakae gud long ol toktok blong Kraes, nao yumi ‘raetem long tingting blong [yumi]’ [2 Korin 3:3]. Oli kam pat fulwan blong fasin blong yumi” (“Living by Scriptural Guidance,” Ensign, Nov. 2000, 17).
Taem yumi oltaem tekpat long wanwan skripja stadi mo famli skripja stadi, yumi mo ol famli blong yumi i save folem, stap sef, mo stap strong agensem plante jalenj blong yumi tedei.