Pagtukod sa Katuyoan sa Zion

Gikan sa Kinabuhi ni Joseph Smith

Niadtong unang mga adlaw sa Hunyo 1831, mga semana lamang human ang panagpundok gikan sa New York ngadto sa Ohio nakompleto, ang mga Santos nanagpundok didto sa Kirtland alang sa komperensya sa Simbahan. Pagka-Hunyo 7, ang adlaw human ang komperensya matapos, si Joseph Smith nakadawat og pagpadayag nga nakapadala sa mga hunahuna sa mga miyembro paingon sa Zion: “Ang sunod nga komperensya … himoon sa Missouri, diha sa yuta diin ako mopahinungod ngadto sa akong mga katawhan” (D&P 52:2).

Ang mga Santos hilabihan ka interesado sa pagtukod sa Zion— usa ka balaan nga siyudad, usa ka malinawon nga dangpanan alang sa mga matarung nga molikay sa kadautan niini nga kalibutan. Aron sa pag-andam sa mga Santos, ang Ginoo mibalikbalik sa pagtambag kanila sa “paningkamot sa pagdala ug pagtukod sa katuyoan sa Zion” (D&P 6:6; 11:6; 12:6; tan-awa usab sa 14:6). Karon ang mga lider sa Simbahan mobiya dayon aron sa pagtino sa nahimutangan sa Zion. Sila si Joseph Smith, Sidney Rigdon, ug uban misugod sa 900-ka milyas [1,448-km] nga biyahe ngadto sa Balangay sa Jackson, Missouri, niadtong Hunyo 19, mibiyahe pinaagi sa tubig, karwahe, ug sa daghang mga milya pinaagi sa paglakaw. Ang biyahe malisud ug mahago, apan ang propeta mibati sa mapanalipuron nga pag-amuma sa Ginoo: “Bisan pa sa mga kadunot ug mga pagkasalawayon sa mga panahon, ug sa dautan nga espiritu nga gipadayag ngari kanato sumala sa atong pagtuo diha sa Basahon ni Mormon, sa daghang mga dapit ug tali sa nagkalain-laing mga tawo, bisan pa niana, ang Ginoo mipadayon sa Iyang maampingon nga pag-amuma ug mahigugmaon nga kalooy nganhi kanato sa matag adlaw; ug gihimo nato kini nga lagda sa panahon nga adunay kahigayunan, sa pagbasa og usa ka kapitulo diha sa Biblia, ug pag-ampo, ug niini nga mga higayon sa pagsimba ang naghatag kanato og mahinungdanon nga kahupayan.”¹

Pagka tunga-tunga sa Hulyo, ang Propeta miabut didto sa kasadpang Missouri, usa ka maanindot nga dapit sa hanayhay, tabunok nga kapatagan, nga puno sa mga bulak. Didto, agi og tubag sa iyang pangamuyo aron masayud sa piho nga nahimutangan sa Zion, ang Ginoo mipadayag nga “ang dapit nga karon gitawag og Independence mao ang tunga-tunga nga dapit; ug ang dapit alang sa templo, nga nahimutang sa kasadpan nga bahin, diha sa usa ka lote nga dili layo gikan sa balay sa hukmanan” (D&P 57:3) ug kana nga luna sa yuta kinahanglan nga paliton. Niadtong Agosto 2, si Joseph Smith ug uban nagkita aron sugdan ang pagtukod sa Zion. Ang Propeta mi-rekord: “Akong gitabangan ang Colesville branch sa Simbahan sa pagpahimutang sa unang troso alang sa usa ka balay, isip pundasyon sa Zion didto sa lungsod sa Kaw, napulog duha ka milya sa kasadpan sa Independence. Ang troso gidala ug gipahimutang sa napulog duha ka mga tawo, agi og pasidungog sa napulog duha ka mga tribo sa Israel. Sa sama nga higayon, pinaagi sa among pag-ampo, ang yuta sa Zion gipahinungod ni Elder Sidney Rigdon alang sa panagpundok sa mga Santos. Panahon kini sa hingpit nga kalipay ngadto niadtong anaa, ug nakahimo sa pag-aninaw sa umaabot, diin ang kahigayunan sa pagkakaron mopadayag sa katagbawan sa mga matinud-anon.”² Sa pagkasunod adlaw, ang Propeta mipahinungod sa luna sa templo.

Ang mga Santos gikan sa Colesville, New York, maoy una sa mga miyembro sa Simbahan nga nanimuyo didto sa Missouri. Gihimo nila ang makabudlay nga pagbiyahe gikan sa New York ngadto sa Kirtland, Ohio, apan nakapuyo lang og kadali didto sa Ohio sa wala pa sugoa sa pagbiyahe ngadto sa Missouri. Si Polly Knight, usa ka miyembro sa Colesville branch, mibiyahe ngadto sa yuta sa Zion, aron lamang mamatay didto paglabay sa usa ka semana. Bisan tuod og aduna siya’y maluyahon nga panglawas, determinado siya nga magpakabuhi. Misulat ang iyang anak nga lalaki: “Hilum kaayo siya nga nakatulog ngadto sa kamatayon, nagmaya diha sa bag-o ug walay katapusan nga pagkigsaad sa ebanghelyo ug nagdayeg sa Dios nga nabuhi pa siya aron makita ang yuta sa Zion…. Si Brother Joseph Smith mitambong sa lubong sa akong inahan ug mipakigpulong kanamo sa maayo kaayo ug makahupay nga paagi.”³ Bisan tuod kon ang Propeta mibalik dayon ngadto sa Kirtland ug mipadayon sa pagpangulo sa Simbahan gikan didto hangtud sa 1838, daghan nga mga Santos ang mipadayon sa paglalin ngadto sa Missouri.

Ang mga Santos makugihon nga nagtrabaho aron sa pagtukod sa Zion, apan sa paghinapos sa 1833, giabog sila gawas sa ilang mga panimalay didto sa Balangay sa Jackson pinaagi sa hilabihan nga pagpanggukod, biniyaan ang ilang mga damgo sa pagtukod og Zion ug sa pagtukod og templo didto. Pinaagi ni Propeta Joseph Smith, ang Ginoo mipadayag nga ang mga kahimtang alang sa pagtubos sa Zion niana nga yuta wala pa matuman ug nga ang pagtukod og Zion kinahanglan gayud nga “mohulat sa mubo nga panahon” (D&P 105:9).

Mga Pagtulun-an ni Joseph Smith

Ang Ginoo mitudlo sa Balangay sa Jackson, Missouri, isip ang yuta sa Zion—usa ka dapit diin ang mga Santos sa panahon ni Joseph Smith magpundok ug diin ang balaan nga siyudad sa Zion sa kaulahian pagatukuron.

“Akong nadawat pinaagi sa langitnon nga panan-awon, ang usa ka sugo niadtong Hunyo [1831], sa pagbiyahe ngadto sa kasadpang mga utlanan sa Estado sa Missouri, ug didto itudlo ang mao gayud nga lugar nga pagahimoon nga sentro nga dapit alang sa pagsugod sa panagpundok niadtong mohangup sa kahingpitan sa walay katapusan nga Ebanghelyo. Tungod niana, mibiyahe ako, uban sa mga gikasaligan sa akong mga kaigsoonan, ug human sa taas ug makaluya nga pagbiyahe, nga nag-antus sa daghang mga kalisdanan ug kakulang sa nag-unang mga kinahanglanon, miabut sa Balangay sa Jackson, Missouri, ug human sa pagsuhid sa nasud, nagtinguha sa makugihon nga paagi diha sa mga kamot sa Dios, nagpakita Siya sa Iyang kaugalingon ngari kanamo, ug gitudlo, kanako ug sa uban ang mao gayud nga lugar diin Iyang giplano aron pagsugod sa buhat sa pagpundok, ug ang pagtukod sa usa ka ‘balaan nga siyudad,’ nga kinahanglan pagatawgon og Zion—Zion, tungod kay usa kini ka dapit sa pagkamatarung, ug ang tanan nga motukod niana ang mosimba sa tinuod ug buhi nga Dios, ug ang tanan magtuo sa usa ka doktrina, gani ang doktrina sa atong Ginoo ug Manluluwas nga si Jesukristo. ‘Ang tingog sa imong mga magbalantay! ila nga gipatugbaw ang ilang tingog, nanagdungan sila sa pag-awit; kay sila makakita sa mata ug mata, sa diha nga ang Ginoo mobalik na sa Zion’ [Isaias 52:8].”⁴

Niadtong sayo pa sa mga 1830, ang mga Santos misulay sa pagpahimutang og pundasyon sa Zion didto sa Balangay sa Jackson, Missouri, ingon sa gisugo sa Ginoo, apan wala makabuhat sumala sa giingon tungod kay dili pa sila espirituhanon nga andam. Ang Propeta nga si Joseph Smith nagsulti sa mosunod mahitungod sa panahon sa dihang ang Zion pagatukuron: “Wala akoy nahibaloan nga bisan unsa nga komunikasyon pinaagi sa Espiritu ngari kanako, nga ang Zion wala nay tinguha sa iyang pangangkon sa usa ka celestial nga korona, bisan pa man sa pagtugot sa Ginoo nga siya pagasakiton, gawas lamang niadtong pipila ka mga tawo kinsa naglakaw sa pagkadili masulundon, ug mitalikod sa bag-o nga pakigsaad; nga ang ingon nga mga tawo mapadayag pinaagi sa ilang mga buhat sa tukma nga panahon. Kanunay gayud nga gidahum nako nga ang Zion moantus og daghang kasakitan, gikan sa akong nakat-unan sa mga kasugoan nga gihatag. Apan pahinumduman ko kamo sa usa ka piho nga bahin sa kasabutan nga nag-ingon, kay human sa daghan nga kalisdanan moabut ang mga panalangin [tan-awa sa D&P 58:4]. Pinaagi niini, ug usab sa uban, ug ang usa usab nga ulahing makadawat, nasayud ako nga ang Zion, sa tukma nga panahon sa Ginoo, matubos; apan pila pa kaha ka mga adlaw ang Zion makasinati og paghinlo, kalisdanan, ug kasakitan, ang Ginoo mitago niini sa akong mga mata; ug sa dihang nagpakisayud ako kabahin niini nga hilisgutan, ang tingog sa Ginoo mao ang: Humilum kamo ug ilhon ninyo nga ako mao ang Dios! Ang tanan niadtong kinsa nag-antus tungod sa akong ngalan magamando uban kanako, ug siya nga motugyan sa iyang kinabuhi alang kanako makakaplag niini pag-usab…. Hinaut unta nga ang Dios motugot niana bisan pa man sa [atong] dako nga mga kalisdanan, wala unta’y bisan unsa nga butang nga makapahimulag kanato gikan [sa] gugma ni Kristo [tan-awa sa Mga Taga-Roma 8:35–39].”⁵

Gitukod nato ang katuyoan sa Zion pinaagi sa pagkahimo nga mga tawo kinsa mga putli sa kasinakasing ug pinaagi sa makugihon nga pagtrabaho uban sa usa ka kasingkasing ug hunahunha.

“Ang pagtukod sa Zion mao ang katuyoan nga nakapaikag sa katawhan sa Dios sa matag panahon; usa kini ka tema diin ang mga propeta, mga pari ug mga hari nagpakabuhi uban sa talagsaon nga kahimuot; ila kining gilauman uban sa malipayon nga pagpaabut sa adlaw diin kita magpuyo; ug gidasig uban sa langitnon ug mahimayaon nga mga pagpaabot nga ilang giawit ug gisulat ug gipanagna kining atong panahon; apan namatay sila nga wala makakita sa mga panghitabo sa atong kapanahonan; kita ang gikahimut-an nga mga katawhan nga gipili sa Dios aron sa pagdala sa Ulahing mga adlaw nga kahimayaan; anaa ra kanato ang pagtan-aw niini, pag-apil ug pagtabang sa pagpalambo sa Ulahing mga adlaw nga kahimayaan.”⁶

“Bisan asa nga dapit diin ang mga Santos nagpundok mao ang Zion, diin ang matag matarung nga tawo magtukod og dapit sa kaluwasan alang sa ilang mga anak.”⁷

“Atua didto sa nagkalain-laing dapit ang usa ka Stake [sa Zion] alang sa panagpundok sa mga Santos… Didto ang inyong mga anak mapanalanginan, ug kamo sa taliwala sa inyong mga kahigalaan mapanalanginan. Ang pukot sa Ebanghelyo mopundok sa nagkalain-lain nga matang.

“… Maoy atong tinguha nga matukod ang Zion isip atong pinakamahinungdanon nga katuyoan. … Ang panahon nagkaduol na, diin ang tawo dili makakaplag og kalinaw gawas lamang diha sa Zion ug sa mga stake niini.”⁸

“Kabahin sa pagtukod sa Zion, kinahanglan nga buhaton kini pinaagi sa tambag sa Ginoo, pinaagi sa mga pagpadayag sa langit.”⁹

“Kon ang Zion dili maghinlo sa kaugalingon niini, aron matugotan sa tanang mga butang, diha sa Iyang panan-aw, mangita Siya og laing mga katawhan, kay ang Iyang buhat magpadayon hangtud nga ang Israel mapundok, ug sila kinsa dili maminaw sa Iyang tingog, kinahanglan gayud nga mobati sa Iyang kasuko. Tugoti nga mosulti ako kaninyo, pagtinguha sa paghinlo sa inyong mga kaugalingon, ug usab ang tanan nga lumulupyo sa Zion, kay kon dili ang kasuko sa Ginoo mahaling diha sa kapintas. Paghinulsol, paghinulsol, mao ang tingog sa Dios sa Zion; ug maingon og kahibulongan kini nga tan-awon, gani tinuod kini, ang mga katawhan mamugos sa pagpangatarungan sa kaugalingon hangtud nga ang tanan nila nga kadautan mapadayag, ug ang ilang kinaiya nga hilabihan na kadautan maisip nga wala nay katubsanan, ug kadtong gihambin sa ilang mga kasingkasing mapadayag sa panan-aw sa mga katawhan. Ako moingon nganha kaninyo (ug kon unsay akong isulti kaninyo akong isulti sa tanan,) paminawa ang pasidaan nga tingog sa Dios, kay kon dili mapukan ang Zion, ug ang Ginoo manumpa sa Iyang kasuko nga ang mga lumulupyo sa Zion dili makasulod ngadto sa Iyang kapahulayan.”¹⁰

“Samtang ang pagkadili matarung nga mga buhat gitugotan diha sa Simbahan, dili kini mabalaan, ni matubos ang Zion.”¹¹

“Himoa nga ang matag usa maghago aron pag-andam sa iyang kaugalingon alang sa ubasan, maggahin og gamay nga panahon aron sa paghupay sa mga nagbangutan; sa pagpalig-on sa nag-masulub-on; pagpabalik sa nagpakasala pag-usab; sa pagdala og balik sa nahisalaag; sa pagdapit pag-usab ngadto sa gingharian sa mga tawo nga nahimulag, pinaagi sa pag-awhag kanila sa pagpaningkamot samtang may panahon pa, ug mobuhat sa pagkamatarung, ug, uban sa usa sa kasingkasing ug usa sa hunahuna, mangandam aron pagtabang sa pagtubos sa Zion, kanang maayo nga yuta sa saad, diin ang mauyunon ug masulundon mapanalanginan….

“[Kami] nag-ampo ngadto sa atong langitnong Amahan nga kamo unta hilabihan ka mainampoon, hilabihan ka mapainubsanon, ug hilabihan ka manggihatagon; makugihon nga magtrabaho, sa espirituhanon ug temporal nga paagi, alang sa katubsanan sa Zion, nga ang putli og kasingkasing unta makabalik uban sa mga awit sa walay katapusan nga kalipay aron sa pagtukod sa iyang biniyaan nga mga dapit, ug mosugat sa Ginoo sa panahon nga Siya moabut diha sa Iyang kahimayaan [tan-awa sa D&P 101:18].”¹²

Zion, ang Bag-o nga Jerusalem, pagatukuron diha sa kayutaan sa Amerika.

Mga Artikulo sa Hugot nga Pagtuo 1:10: “Kami nagtuo sa tinuod nga panagtigum sa Israel ug sa pagpahiuli sa Napulo ka mga Tribo; nga ang Zion (ang Bag-ong Jerusalem) pagatukuron diha sa kayutaan sa Amerika.”¹³

“Ang siyudad sa Zion nga gisulti ni David, diha sa usa ka gatus ug ikaduha nga Salmo, pagatukuron diha sa yuta sa Amerika, ‘Ug ang mga linukat sa Ginoo mobalik ug moanha uban ang pag-awit alang sa Zion; ug ang kalipay nga walay katapusan anha sa ibabaw sa ilang mga ulo’ [Isaias 35:10]; ug dayon sila pagaluwason gikan sa nag-awas nga kasuko nga molabay sa tibuok yuta. Apan ang Judah makabaton og kaluwasan diha sa Jerusalem. [Tan-awa sa Joel 2:32; Isaias 26:20–21; Jeremias 31:12; Salmo 1:5; Ezequiel 34:11–13.] Kini mao ang mga pagpamatuod nga ang Maayong Magbalantay mopahiluna sa Iyang kaugalingong karnero, ug pagawason sila gikan sa tanang kanasuran diin sila gitibulaag sa usa ka mapanganuron ug mangi-ub nga panahon, ngadto sa Zion, ug ngadto sa Jerusalem.”¹⁴

“Magsugod ako pinaagi sa pagkutlo gikan sa panagna ni Enoch, nga nagsulti kabahin sa katapusang mga adlaw: ‘Pagkamatarung ako mopakanaog gikan sa langit, ug kamatuoran ako mopadala gikan sa yuta, aron sa pagpamatuod sa akong Bugtong Anak, ang Iyang pagkabanhaw gikan sa patay [kini nga pagkabanhaw sa akong pagsabut nga mao ang tinuod nga lawas]; oo, ug usab ang pagkabanhaw sa tanan nga mga tawo; ug pagkamatarung ug kamatuoran ako mosugo nga mosilhig sa yuta ingon sa usa ka lunop, aron pagpundok sa akong pinili gikan sa upat ka mga suok sa yuta, ngadto sa usa ka dapit nga Ako moandam, usa ka Balaan nga Siyudad, nga ang akong katawhan mobakus sa ilang mga bat-ang, ug magpaabot sa panahon sa akong pag-anhi; kay diha ang akong tabernakulo, ug kini pagatawgon og Zion, usa ka Bag-ong Jerusalem’ [Moises 7:62].

“Karon akong nasabtan nga pinaagi niini nga kinutlo, ang … pagkamatarung ug kamatuoran mosilhig sa yuta ingon sa usa ka lunop. Ug karon, mangutana ako, sa unsa nga paagi ang pagkamatarung ug kamatuoran mosilhig sa yuta nga ingon sa usa ka lunop? Akong tubagon. Mga tawo ug mga anghel mao ang isig ka mga trabahador nga modala sa pagpahinabo niining mahinungdanon nga buhat, ug ang Zion kinahanglan nga andamon, gani usa ka bag-o nga Jerusalem, alang sa mga pinili nga pagapundukon gikan sa upat ka mga suok sa yuta, ug pagatukuron nga usa ka balaan nga siyudad, tungod kay ang tabernakulo sa Ginoo magauban kanila….

“… ‘Ug tan-awa, kini nga mga katawhan Ako motukod dinhi niini nga yuta, ngadto sa katumanan sa pakigsaad diin ako mihimo uban sa inyong amahan nga si Jacob; ug kini mahimo nga usa ka Bag-o nga Jerusalem.’ [3 Nephi 20:22.] Karon atong nakat-unan gikan sa Basahon ni Mormon ang nailhan kaayo nga kayutaan ug lugar diin ang Bag-o nga Jerusalem mobarug, ug kinahanglan gayud nga motukma sumala sa panan-awon ni John didto sa isla sa Patmos.

“Karon daghan ang gusto nga moingon, nga kining Bag-o nga Jerusalem nga gihisgutan, mao ang Jerusalem nga gitukod sa mga Judeo didto sa silangang kayutaan. Apan makita ninyo, gikan sa Pagpadayag 21:2, nga dihay Bag-ong Jerusalem nga nanaog gikan sa Dios sa kalangitan, gidayandayanan isip usa ka pangasaw-onon alang sa iyang bana; nga pagkahuman niini, ang Tigpadayag gidala diha sa Espiritu, ngadto sa usa ka dako ug taas nga bukid, ug nakita ang bantugan ug balaan nga siyudad nga nanaog gawas sa kalangitan nga gikan sa Dios. Karon adunay duha ka mga siyudad nga gihisgutan dinhi. Maingon nga ang tanang butang niini nga hilisgutan dili masulat diha sa usa ka sulat, moingon ako sa lakbit, nga adunay usa ka Bag-ong Jerusalem nga pagatukuron niini nga kayutaan, ug usab ang Jerusalem pagatukuron pag-usab didto sa kasadpan nga kayutaan [tan-awa sa Ether 13:1–12]. ‘Tan-awa, si Ether nakakita sa mga adlaw ni Kristo, ug siya namulong usab mahitungod sa balay ni Israel, ug ang Jerusalem diin si Lehi nagagikan; human kini pagalaglagon kini pagatukuron pag-usab, usa ka balaan nga dakbayan ngadto sa Ginoo; busa, kini dili mahimo nga usa ka Bag-o nga Jerusalem, kay kini nahimo sa panahon nga karaan.’ [Ether 13:4–5.]”¹⁵

“Ang mga Propeta misulti kabahin sa Zion sa katapusang mga adlaw: sa unsa nga paagi ang himaya sa Lebanon moabut diha kaniya; ang mga kahoy nga haya, ang mga pino, ug ang mga boje nga nagtipon, aron sa pagpatahum sa dapit sa Iyang balaang puloy-anan, nga himoon Niya ang dapit sa Iyang mga tiil nga mahimayaon [tan-awa sa Isaias 60:13]. Diin ang puli sa tumbaga, Siya magadala og bulawan, ug alang sa puthaw, Siya magadala og salapi, ug sa kahoy, tumbaga, ug alang sa mga bato, puthaw [tan-awa sa Isaias 60:17]; ug diin ang kombira sa matambok nga mga butang ihatag ngadto sa matarung [tan-awa sa Isaias 25:6]; oo, sa diha nga ang himaya sa Ginoo mosantup sa atong hunahuna alang sa kaayohan sa Iyang katawhan, ang mga pagduhaduha sa mga tawo ug ang kawang nga mga himaya sa kalibutan mahanaw, ug kita mosinggit, ‘Gikan sa Zion, ang pagkahingpit sa katahum nagsidlak ang Dios.’ [Salmo 50:2.]”¹⁶

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii

Niini nga hugna, timan-i kon giunsa ni Propeta Joseph Smith paggamit ang pulong Zion aron pagpasabut sa piho nga mga dapit ug ngadto sa katawhan sa Ginoo. Sa unsa nga paagi kining mga paggamit sa pulong makatabang kaninyo sa pagsabut kon unsay kahulugan sa pagtukod og Zion? (Samtang naghunahuna kamo kabahin o sa paghisgot niini nga pangutana, hunahunaa ang pagbasa sa Doktrina ug mga Pakigsaad 97:21.)
Sa paragrap nga nagsugod sa ubos nga bahin sa pahina 219, si Joseph Smith nagsulti sa iyang tinguha nga masayud kon kanus-a ang Zion matukod didto sa Balangay sa Jackson, Missouri. Unsay atong makat-unan gikan sa tubag sa Ginoo ngadto sa mga pag-ampo ni Joseph Smith?
Basaha ang tibuok ikaduhang paragrap sa pahina 221, ug dayon ilha ang pipila ka mga dapit diin ang mga Santos magpundok. Sa unsa nga paagi kita makatukod og Zion niini nga mga dapit?
Ribyuha ang tibuok nga ikatulo ug ikaupat nga paragrap sa pahina 221, ug hunahunaa kon sa unsa nga paagi ang mga stake sa Simbahan naghatag og siguridad ug kalinaw. Sa unsa nga mga paagi kamo napanalanginan samtang nagkapundok kamo uban sa mga miyembro sa inyong stake?
Sa unsa nga mga paagi ang tambag sa Propeta mahitungod sa pagtukod og Zion magamit diha sa atong mga panimalay?
Ang Propeta nagtudlo nga isip kabahin sa paningkamot sa pagtukod og Zion, kinahanglan gayud nga ang usag usa maglimpyo sa atong mga kaugalingon. Unsay pipila ka mga paagi nga atong masunod kini nga tambag? (Alang sa pipila ka mga ehemplo, tan-awa sa mga pahina 221–23.) Ngano sa inyong hunahuna nga ang usag usa kinahanglan gayud nga putli sa dili pa tukuron ang Zion?
Ribyuha ang mga panagna ni Joseph Smith mahitungod sa duha ka balaan nga siyudad (mga pahina 223–26). Unsa nga bahin ang atong himoon alang sa katumanan niini nga mga panagna?

May Kalabutan nga mga Kasulatan:Pagpadayag 21:1–27; D&P 45:65–71; 97:18–25; 103:1–7; Moises 7:16–21, 62–69