Pagpadayag ug ang Buhi nga Propeta

Mga Artikulo sa Hugot nga Pagtuo 1:9: “Kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.”⁴

“Dili gayud kita makasabut sa mga butang sa Dios ug sa langit, kondili pinaagi sa pagpadayag. Mahimo nga kita mopadayag sa mga butang nga may pagka-espirituhanon ug mopadayag og mga hunahuna sa mga kahangturan, apan wala kanay pagtugot.”⁵

“Ang doktrina sa pagpadayag mas mopatigbabaw pa kay sa walay pagpadayag nga doktrina, kay ang usa ka kamatuoran nga gipadayag gikan sa langit maoy bililhon kay sa tanan nga sekta nga panabut nga anaa.”⁶

“Walay kaluwasan kon walay pagpadayag; kawang lamang ang pangalagad ni bisan kinsa kon wala niini…. Walay tawo nga mahimong alagad ni Jesukristo gawas kon siya nagpamatuod ni Jesus; ug mao kini ang espiritu sa pagpadayag [tan-awa sa Pagpadayag 19:10]. Matag higayon nga ang kaluwasan mapahigayon, pinaagi gayud kini sa pagpamatuod. Ang mga tawo karon mopamatuod sa langit ug impyerno, ug wala gani gayud makakita niini; ug ako moingon nga walay tawo nga nasayud niini nga mga butang kon wala kini.”⁷

“Si Jesus sa Iyang mga pagtulun-an miingon, ‘Ug sa ibabaw niining bato pagatukuron ko ang akong Iglesia ug ang mga gahum sa kamatayon dili gayud makabuntog kaniya.’ [Mateo 16:18.] Unsa nga bato? Pagpadayag.”⁸

“Ang Simbahan ni Jesukristo sa mga Santos sa Ulahing mga Adlaw natukod pinaagi sa laktud nga pagpadayag, isip tinuod nga Simbahan sa Dios sukad pa kaniadto, sumala sa mga Kasulatan (Amos 3:7, ug Mga Buhat 1:2); ug pinaagi sa kabubut-on ug mga panalangin sa Dios, ako nahimong instrumento diha sa Iyang mga kamot, hangtud karon, sa pagpalambo sa katuyoan sa Zion.”⁹

Ang Propeta namulong sa usa ka komperensya sa Simbahan niadtong Abril 1834: “Si Presidente Joseph Smith, Jun., mibasa sa ikaduhang kapitulo sa panagna ni Joel, miampo, ug mipakigpulong sa komperensya ingon sa mosunod:… ‘Lahi ra ang atong pagkabutang kay sa bisan kinsa nga mga tawo nga nabuhi niini nga yuta; tungod niana kadtong nangagi nga mga pagpadayag dili angay sa atong mga kahimtang, gihatag kini sa laing mga tawo, nga nag-una kanato, apan sa katapusang mga adlaw, ang Dios mopundok sa salin sa mga anak sa Israel nga pagaluwason, ingon man usab didto sa Jerusalem ug Zion [tan-awa sa Joel 2:32]. Karon kon ang Dios dili na mohatag og mga pagpadayag, asa na man nato pangitaa ang Zion ug kini nga mga salin? …’

“Ang Presidente mihatag dayon og asoy sa pagbaton ug paghubad sa Basahon ni Mormon, ang pagpadayag sa Priesthood ni Aaron, ang pagtukod sa Simbahan niadtong 1830, ang pagpadayag sa High Priesthood, ug ang gasa sa Espiritu Santo nga gibu-bu diha sa Simbahan, ug miingon: ‘Kuhaa ang Basahon ni Mormon ug ang mga pagpadayag, ug asa na man ang atong relihiyon? Wala kita’y relihiyon.’”¹⁰

“Si Jesus … mihan-ay sa simbahan ang una mga Apostoles, ug ikaduha mga propeta, alang sa buhat sa pangalagad, alang sa pagsangkap sa mga balaan, ug uban pa; … ang pinakamahinungdanong lagda sa langit [mao] nga dili magbuhat sa bisan unsa dinhi sa yuta, gawas kong ang iyang tinago ipadayag niya sa iyang mga alagad, ang mga manalagna, nga nahiuyon sa Amos 3:7.”¹¹

Niadtong Septyembre 1830 si Joseph ug Emma Smith mibalhin gikan sa Harmony, Pennsylvania, ngadto sa Fayette, New York. Sa diha nga miabut sila, ilang nakit-an nga pipila sa mga Santos gipang-ilad pinaagi sa mga pangangkon og bakak nga mga pagpadayag: “Sa hilabihan namong kasubo,… amo dayong nadiskubrehan nga si Satanas naghulat aron sa pagpangilad, ug nagtinguha kon kinsa ang mahimo niya nga tukbon. Si Brother Hiram Page nagkupot og usa ka bato, diin nabatonan niya ang piho nga ‘mga pagpadayag’ kabahin sa pagtukod sa Zion, ang paghan-ay sa Simbahan, ug uban pa., ang tanan diin hingpit nga may kalainan uban sa han-ay sa balay sa Dios, sama sa gilatid diha sa Bag-ong Tugon, ingon man usab sa among bag-ong mga pagpadayag. Ingon nga usa ka miting sa komperensya gitagal sa ika- 26 nga adlaw sa Septyembre, akong gihunahuna nga maalamon ang dili kaayo pagbuhat og daghan kay sa pagpakigsulti sa mga kaigsoonan kabahin sa hilisgutan, hangtud nga moabut ang komperensya. Hinoon, nakita, nga kadaghanan, ilabi na sa pamilya Whitmer ug Oliver Cowdery, ang nanagtuo og daghan sa mga butang nga gihan-ay niini nga bato, gihunahuna namo nga pinakalabing maayo ang pagpangutana sa Ginoo kabahin sa importante kaayo nga butang, ug sa wala pa magsugod [ang] komperensya, among nadawat ang mosunod:

“Pagpadayag ngadto ni Oliver Cowdery, gihatag sa Fayette, New York, Septyembre, 1830.

“ ‘… Tan-awa, sa pagkatinuod, sa pagkatinuod, Ako moingon nganha kanimo, walay usa nga itudlo sa pagdawat og mga sugo ug mga pagpadayag niini nga Simbahan gawas sa akong sulugoon nga si Joseph Smith, Jun., kay siya modawat kanila gani sama kang Moises. Ug ikaw magmasulundon ngadto sa mga butang diin Ako mohatag ngadto kaniya….

“ ‘Ug ikaw dili momando kaniya kinsa imong pangulo ug ang pangulo sa simbahan, kay Ako mihatag kaniya og mga yawe sa mga misteryo, ug mga pagpadayag nga sinilyohan, hangtud nga Ako motudlo ngadto kanila og lain diha sa iyang dapit….

“ ‘Ug usab, ikaw modala sa imong igsoon, si Hiram Page, tali kaniya ug kanimo lamang, ug sultihi siya nga kadtong mga butang nga siya misulat gikan niana nga bato dili gikan kanako ug nga si Satanas, milingla kaniya; kay, tan-awa, kini nga mga butang wala pa ikatudlo ngadto kaniya, ni bisan unsa nga butang itudlo ngadto ni bisan kinsa niini nga simbahan nga supak sa mga pakigsaad sa simbahan.

“ ‘Kay ang tanan nga mga butang kinahanglan gayud himoon sa kahusay, ug pinaagi sa pag-uyon sa tanan diha sa simbahan, pinaagi sa pag-ampo sa hugot nga pagtuo.’ [D&P 28:2–3, 6–7, 11–13]….

“Sa katapusan ang among komperensya nagkapundok. Ang hilisgutan kabahin sa bato nga gihisgutan nang daan gituki, ug human sa makuti nga pagsusi, si Brother Page, ingon man usab ang tibuok Simbahan nga kinsa mitambong, misalikway sa giingon nga bato, ug sa tanang mga butang nga kabahin niadto, sa hilabihan sa among tinagsa nga katagbawan ug kalipay.”¹²

“Ang mga Presidente o [Unang] Kapangulohan mao ang pinakalabaw sa Simbahan, ug ang mga pagpadayag sa hunahuna ug kabubut-on sa Dios ngadto sa Simbahan, kinahanglan nga moabut gikan sa Kapangulohan. Kini mao ang mando sa langit, ug ang gahum ug katungod sa [Melchizedek] Priesthood. Katungod usab niini sa bisan kinsa nga opisyal sa Simbahan ang pagbaton og mga pagpadayag, nga may kalabutan lamang sa iyang partikular nga calling ug katungdanan sa Simbahan.”¹³

Dili kita maghunahuna sa atong mga kaugalingon nga obligado nga makadawat og bisan unsang pagpadayag gikan sa bisan kinsang lalaki o babaye nga walay iyang legal nga pagkatinugyanan ug gi-orden ngadto niana nga awtoridad, ug maghatag og igong kamatuoran niini.

“… Supak kini sa mga lagda sa Dios alang ni bisan kinsa nga miyembro sa Simbahan, o ni bisan kinsa, sa pagdawat og mga panudlo alang niadtong may awtoridad, nga mas taas pa kay sa ilang kaugalingon; busa inyong makita ang pagkadili angay sa pagsunod kanila, apan kon bisan kinsa nga tawo makabaton og panan-awon o pagbisita gikan sa langitnong mensahero, alang ra gayud kini sa iyang kaugalingong kaayohan ug panudlo; kay ang sukaranan nga mga baruganan, pangagamhanan, ug doktrina sa Simbahan gitugyan diha sa mga yawe sa gingharian.”¹⁴

Si Heber C. Kimball, samtang nagserbisyo isip magtatambag ni Presidente Brigham Young, mi-report: “Si Brother Joseph Smith sa daghang mga higayon miingon ngadto ni Brother Brigham ug sa akong kaugalingon, ug ngadto sa uban, nga siya usa ka tinugyanan sa Dios ngari kanato, sa pagtudlo ug pagdumala kanato ug sa pagbadlong sa mga nagbuhat og kasaypanan.”¹⁵

Si Wilford Woodruff, ang ikaupat nga Presidente sa Simbahan, mi-report: “Akong hisgutan ang usa ka gikatakda nga miting nga akong gitambongan didto sa lungsod sa Kirtland sa akong unang mga adlaw. Niana nga miting pipila ka mga hilisgutan ang gihimo … nga may kalabutan sa buhi nga mga orakulo ug kabahin sa gisulat nga pulong sa Dios…. Usa ka inila nga tawo sa Simbahan mibarug ug misulti kabahin sa hilisgutan, ug miingon: ‘Nakuha ninyo ang pulong sa Dios dinhi sa inyong atubangan diha sa Biblia, Basahon ni Mormon, ug Doktrina ug mga Pakigsaad; aduna kamo’y nasulat nga pulong sa Dios, ug kamo nga kinsa naghatag og mga pagpadayag kinahanglan nga mohatag og mga pagpadayag sumala niadto nga mga libro, ingon sa gisulat niadto nga mga libro nga mao ang mga pulong sa Dios. Kinahanglan nga atong ipunting ang atong mga kaugalingon niadto nga mga libro.’

“Sa diha nga nahuman na siya, si Brother Joseph milingi ngadto ni Brother Brigham Young ug miingon, ‘Brother Brigham, gusto ko nga motindog ka ug sultihi kami sa imong mga baruganan kabahin sa buhi nga mga orakulo ug sa mga nasulat nga pulong sa Dios.’ Si Brother Brigham mitindog, ug iyang gikuha ang Biblia, ug gipahimutang kini, ug iyang gikuha ang Basahon ni Mormon, ug gipahimutang kini, ug iyang gikuha ang libro sa Doktrina ug mga Pakigsaad, ug gipahimutang kini sa iyang atubangan, ug siya miingon: ‘Adunay gisulat nga pulong sa Dios nganhi kanato, kabahin sa buhat sa Dios sukad pa sa pagsugod sa kalibutan, kasagaran, sa atong panahon. Ug karon, siya miingon, ‘kon itandi uban sa [buhi] nga mga orakulo kadto nga mga libro walay bili alang kanako; kadto nga mga libro wala maghatag og pulong sa Dios nga gilaktud sa ato karon, sama sa gibuhat sa mga pulong sa usa ka Propeta o sa usa ka tawo nga naghupot sa Balaan nga Priesthood sa atong panahon ug henerasyon. Mas gusto ko pang maangkon ang buhi nga mga orakulo kay sa tanang gisulat diha sa mga libro.’ Mao kadto nga tumong ang iyang gitinguha. Sa diha nga nahuman na siya, si Brother Joseph miingon ngadto sa katiguman: ‘si Brother Brigham misulat kaninyo sa pulong sa Ginoo, ug iya kamong gisultihan sa kamatuoran.’”¹⁶

Si Brigham Young, ang ikaduhang Presidente sa Simbahan, nahinumdom: “Daghan na nga mga tuig ang milabay si Propeta Joseph misulti nga kon ang katawhan nakadawat sa mga pagpadayag nga diha kaniya ug maalamon nga mobuhat niini, sama sa isugo sa Ginoo, tingali sila sa ilang gahum sa pagbuhat ug pagsabut nag-una pa unta sa milabay’ng katuigan kay sa ila unta nga mahimo diha sa ilang kasarang sa pagbuhat ug sa pagsabut.”¹⁷

Si Joseph Smith mi-rekord nga ang mosunod nahinabo diha sa pagpahinungod sa Templo sa Kirtland niadtong Marso 27, 1836: “Mihimo ako niadto og mubo nga pakigpulong, ug mitawag sa pipila ka mga korum, ug sa tanang katiguman sa mga Santos, aron sa pag-ila sa [Unang] Kapangulohan isip mga Propeta ug mga Manalagna, ug ituboy sila pinaagi sa ilang mga pag-ampo. Nakigsaad silang tanan pinaagi sa pagpanindog.

“Ako dayon nga gitawag ang mga korum ug kongregasyon sa mga Santos sa pag-ila sa Napulog Duha ka mga Apostoles, nga anaa, isip mga Propeta, mga Manalagna, mga Tigpadayag, ug linain nga mga saksi ngadto sa tanang kanasuran sa yuta, nga naghupot sa mga yawe sa gingharian, aron buksan kini, o tuyuon aron mahimo, tali kanila, ug ituboy sila pinaagi sa ilang mga pag-ampo, diin ilang giuyonan pinaagi sa pagpanindog.

“Akong gisunod sa pagtawag diha sa mga korum ug kongregasyon sa mga Santos aron sa pag-ila sa mga presidente sa mga Seventy … ug ituboy sila pinaagi sa ilang mga pag-ampo, diin ilang gihimo pinaagi sa pagtindog….

“Hiniusa sila nga mibotar sa matag higayon, ug ako nanagna ngadto sa tanan, nga tungod kay ilang gituboy kini nga mga tawo diha sa ilang daghang mga katungdanan,… ang Ginoo mopanalangin kanila, oo, diha sa pangalan ni Kristo, ang mga panalangin sa langit nga maangkon gayud nila.”¹⁸

“Sama niadtong kinsa mipataas sa mga kamot ni Moises [tan-awa sa Exodo 17:8–13], mao nga atong ipataas ang mga kamot niadtong kinsa gitudlo aron sa pagdumala sa mga buluhaton sa Gingharian, aron nga sila unta malig-on, ug makahimo sa pagtapos sa ilang mahinungdanon nga mga plano, ug mahimong instrumento sa pagpahinabo sa mahinungdanong buhat sa katapusang mga adlaw.”¹⁹

“Karon alang sa mga tawo nga mobuhat sa mga butang, tungod kay gisugo lamang sila sa pagbuhat niini, ug gani magbagulbol samtang nagabuhat sila niini, walay kapuslanan ang tanan, maayo pa nga dili na lang nila kini buhaton. Adunay kinsa nangangkon nga mga Santos nga hilig kaayo nga magbagulbol, ug mangita og sayop, kon hatagan og bisan unsa nga tambag, nga supak sa ilang mga pagbati, bisan kon sila, sa ilang mga kaugalingon, mangayo og tambag; ilabi na kon ang tambag nga gihatag wala pangayoa, nga wala mahiuyon sa ilang panan-aw sa mga butang, apan mga kaigsoonan, naglaum kita sa mas labaw ka maayo nga mga butang sa kadaghanan kaninyo; misalig kami nga nagtinguha kamo og tambag, sa matag karon ug unya, ug nga masadyaon kamo nga mouyon niini, bisan kanus-a ninyo madawat kini gikan sa tukma nga tinubdan.”²⁰

Si Eliza R. Snow mi-rekord: “Si [Joseph Smith] miingon, kon ang Dios mitudlo kaniya, ug mipili kaniya isip usa ka instrumento sa pagpangulo sa Simbahan, nganong dili man siya tugotan nga mangulo hangtud mahuman ang iyang pagkatudlo? Nganong supakon man kon gitudlo siya sa pagbuhat og usa ka butang? Kinsa ang nasayud sa hunahuna sa Dios? Dili ba Siya mopadayag og mga butang nga lahi kay sa atong gidahum? [Ang Propeta] miingon nga padayon niyang gibuntog, bisan tuod kon anaa kaniya ang tanang butang nga mobitad kaniya paubos, mobabag sa iyang agianan, ug mosupak, bisan pa man sa tanan niining mga pagsupak, sa katapusan kanunay gayud siya nga mogawas nga husto….

“Gibadlong niya kadtong mahilig nga mangita og sayop kabahin sa pagdumala sa mga buluhaton sa Simbahan, nag-ingon nga ang Dios mitawag kaniya aron mangulo sa Simbahan, ug dumalahon niya kini sa husto; kadtong mosulay sa pagpanghilabut maulawan sa dihang ang ilang kaugalingong kabuang mapahayag.”²¹

“Bisan pa man niana, sa tinud-anay nga pagkasulti, nga ang tanang kahibalo nagagikan sa Dios, gani kon mapadayag na kini, ang mga tawo dili motuo niini isip pagpadayag nianang panahona….

“Si Noah maoy usa ka hingpit nga tawo, ug ang iyang kahibalo o pagpadayag kon unsay mahitabo diha sa yuta naghatag kaniya og gahum aron sa pagpangandam ug pagluwas sa iyang kaugalingon ug pamilya gikan sa pagkalaglag sa lunop. Kini nga kahibalo, o pagpadayag,…wala tuohi sa mga lumulupyo sa yuta. Nasayud sila nga si Adan mao ang unang tawo, gibuhat diha sa dagway sa Dios; nga siya usa ka maayong tawo; ug naglakaw si Enoch kuyog sa Dios totolo ka gatus ug kan-uman ug lima ka tuig, ug gibayaw ngadto sa langit nga wala makatilaw og kamatayon. Apan wala sila makalahutay sa bag-o nga pagpadayag: ang karaan among gituohan tungod kay mituo ang among mga amahan, apan gisalikway ang bag-o nga mga pagpadayag. Ug ang baha mibanlas kanila….

“Ang sama nga baruganan … maoy tataw nga gipakita tali sa mga Judeo sa dihang ang Manluluwas miabut diha sa unod. [Sila] nanghambog sa karaan nga mga pagpadayag, gidayandayanan ang mga lubnganan sa patay, mihatag og mga ikapulo sa yerbabuena ug sa anis, naghimog tag-as nga mga pag-ampo sa pagpakaaron ingnon, ug milabang sa dagat ug yuta aron sa pag-angkon og mga kinabig, apan gani sa diha nga ang bag-o nga pagpadayag moabut nga presko pa gikan sa ba-ba sa Halangdon nga Ako Mao sa iyang kaugalingon, dili sila makalahutay niini— hilabihan ra kaayo kini. Mipakita kini sa mga pagkadunot niana nga henerasyon, sama sa uban nga nag-una, ug sila misinggit, pahawaa siya; ilansang mo siya sa krus! …

“Sa makausa pa, ang sama nga tunong ug pinulongan ang gigamit sa diha nga ang Basahon ni Mormon mitunga niini nga henerasyon. Ang karaan nga pagpadayag, ang karaan nga mga patriarch, mga pilgrim ug mga apostoles, ang gipanalanginan. Mituo kami niini, apan ang mga kabag-ohan dili kami mahimong mosunod.”²²

“Kanunay nga masaypan sa kalibutan ang bakakon nga mga propeta nga ingon og mga tinuod, ug kadtong mga propeta nga gipadala sa Dios, ilang gihunahuna nga bakakon nga mga propeta, ug mao nga ilang gipamatay, gibato, gisilotan ug gibilanggo ang tinuod nga mga propeta, ug kinahanglan nga motago sa ilang mga kaugalingon didto sa ‘mga disyerto ug mga lungib ug mga langub sa yuta’ [tan-awa sa Mga Hebreohanon 11:38], ug bisan tuod ang pinakahalangdon nga mga tawo sa yuta, ang kalibutan mihingilin kanila gikan sa ilang katilingban isip mga libudsuroy. samtang ilang gihambin, gitahud ug gisuportahan ang mga walay baruganan, mga libudsuroy, mga tigpakaaron-ingon, mga impostor, ug ang labing ubos sa mga tawo.”²³

“Wala kanako ang pinakaubos nga ideya, kon si Kristo moanhi sa yuta ug mosangyaw sa ingon ka estrikto nga mga butang sama sa Iyang pagsangyaw ngadto sa mga Judeo, apan kini nga henerasyon mosalikway Kaniya tungod sa hilabihan ka estrikto….Daghang mga tawo ang moingon, ‘Dili gayud ako mobiya kanimo, apan mopaluyo kanimo sa tanang higayon.’ Apan sa higayon nga tudloan nimo sila og pipila sa mga misteryo sa gingharian sa Dios nga gipabilin didto sa kalangitan ug nga ipadayag ngadto sa mga anak sa tawo kon andam na sila niini, sila maoy una nga mobato kaninyo ug mopatay kaninyo. Mao kini ang sama nga baruganan nga nakapalansang sa Ginoong Jesukristo, ug makaingon sa mga tawo nga mopatay sa mga propeta niini nga henerasyon.

“Daghang mga butang ang [dili masabut] ngadto sa mga anak sa tawo diha sa katapusang mga adlaw: sama pananglit, nga ang Dios mopabangon sa patay; [makalimot sila] nga ang mga butang gitago sukad pa sa wala pa matukod ang kalibutan, nga igapadayag ngadto sa mga masuso sa katapusang mga adlaw.

“Adunay daghan usab nga bantugang maalamon nga mga lalaki ug mga babaye sa taliwala kanato kinsa maalamon ra kaayo nga matudloan, mao nga kinahanglan gayud silang mamatay sa ilang ka ignorante, ug sa pagkabanhaw ilang makaplagan ang ilang sayop. Daghan ang misilyo sa ganghaan sa langit pinaagi sa pag-ingon, Kon ang Dios mopadayag sa bisan unsa nga butang gawas sa piho nga katuyoan dili ako motuo….

“Kanunay gayud kini nga kon sa diha nga usa ka tawo ipadala sa Dios uban sa priesthood ug magsugod siya sa pagsangyaw sa kahingpitan sa ebanghelyo, nga gisalikway siya sa iyang mga higala, kinsa andam sa pag-ihaw kaniya kon magtudlo siya og mga butang nga gihunahuna nila nga sayop; ug si Jesus nalansang tungod niini nga baruganan.”²⁴

“Alaut, alaut kana nga tawo o han-ay sa mga tawo kinsa mibakyaw sa ilang mga kamot batok sa Dios ug sa Iyang saksi niining katapusang mga adlaw: tungod kay hapit nila malingla ang matag mga pinili!

“… Kon ang usa ka tawo managna, ug momando sa mga tawo sa pagsunod sa iyang mga pagtulun-an, siguro usa siya ka tinuod o bakakon nga propeta. Ang bakakon nga mga propeta sa kanunay mobarug aron sa pagbatok sa tinuod nga mga propeta ug sila managna og hapit duol kaayo sa kamatuoran mao nga hapit na nila malingla ang mga pinili gayud.”²⁵

“Agi og sangputanan sa pagsalikway sa Ebanghelyo ni Jesukristo ug sa mga Propeta kinsa gipadala sa Dios, ang mga paghukom sa Dios maanaa diha sa mga tawo, mga siyudad, ug mga nasud, sa nagkalain-laing panahon sa kalibutan, nga maoy nahitabo sa mga siyudad sa Sodom ug Gomorrah, nga gipang-laglag tungod sa pagsalikway sa mga Propeta.”²⁶

Si William P. McIntire mi-report: “Si [Joseph Smith] nanagna nga ang tanan niadtong magtagad nga dili mahinungdanon sa mga pagpadayag nga gihatag, ug sa kaniya ug sa iyang mga pulong, sa dili madugay maghilak ug magminatay,… nga mag-ingon, O! nga naminaw pa unta kita sa mga pulong sa Dios ug sa mga pagpadayag nga gihatag.”²⁷