Lapas sa Tabil: Kinabuhi sa Kahangturan

“[Ang mga matarung nga nangamatay] mabuhi pag-usab nga magpuyo diha sa mahangturon nga kahayag sa walay kinutuban nga himaya, nga walay kasubo, pag-antus, o wala nay kamatayon, nga sila mahimo nga mga manununod sa Dios ug isigkamanununod ni Jesukristo.”

Gikan sa Kinabuhi ni Joseph Smith

Ang gihimo ni Joseph Smith nga paghubad sa Biblia midangat ngadto sa usa ka talagsaon nga panan-awon sa kinabuhi sa mga kahangturan. Niadtong Pebrero 16, 1832, ang Propeta naghubad didto sa panimalay ni John Johnson sa Hiram, Ohio, kauban si Sidney Rigdon nga nag-alagad isip iyang tigsulat. Siya naghubad sa ebanghelyo ni Juan.” Gikan sa nagkalain-lain nga mga pinadayag nga nangadawat,” ang propeta sa wala madugay miingon, “tin-aw kaayo nga daghang mga importanting mga kasayuran mahitungod sa kaluwasan sa tawo natangtang gikan sa Biblia, o nawala sa wala pa kini mahugpong nga libro. Makita nga napamatud-an sa nahibilin nga kamatuoran nga anaa pa gihapon, nga kon ang Dios moganti sa matag usa sumala sa ilang binuhatan, ang pulong nga ‘Langit’, nga giandam alang sa mahangturon nga pinuy-anan sa mga Santos, kinahanglan nga maglakip og daghan nga gingharian nga kapin sa usa.”¹

Ang Propeta mihubad sa Juan 5:29, nga naghulagway unsaon sa tanan nga “mobangon” sa pagkabanhaw—sila nga nanagbuhat og maayo mobangon nga binanhaw ngadto sa kinabuhi, ug sila nga nanagbuhat og mangil-ad, mobangon nga binanhaw ngadto sa pagkahinukman sa silot.” Samtang siya ug si Sidney namalandong niini nga kasulatan, usa ka talagsaon nga panan-awon ang gipakita ngadto kanila. Sigun sa gisulat sa Propeta: “Pinaagi sa gahum sa Espiritu ang among mga mata nabuksan ug ang among mga panabut nalamdagan, aron makakita ug makasabut sa mga butang sa Dios—bisan kadto nga mga butang nga gikan sa sinugdanan sa wala pa ang kalibutan, nga gi-orden sa Amahan, pinaagi sa iyang Bugtong Anak, kinsa anaa sa dughan sa Amahan, gani gikan sa sinugdanan” (D&P 76:12–13).

Niini nga mahimayaon nga panan-awon, ang Propeta ug si Sidney Rigdon nakakita sa Anak sa Dios nga diha dapit sa tuo nga kamot sa Amahan ug “nakadawat sa iyang kahingpitan” (D&P 76:20). Sila nakakita sa tulo ka mga gingharian sa himaya nga giandam sa Dios alang sa Iyang mga anak ug nakat-unan kon kinsa ang mahimo nga makapanag-iya niini nga mga gingharian. Sila nakakita usab ni Satanas nga gihinginlan gikan sa atubangan sa Dios ug ang mga pag-antus niadtong mitugot sa ilang kaugalingon nga mabuntog ni Satanas.

Kini nga panan-awon wala madugay nahimo nga seksyon 76 sa Doktrina ug mga Pakigsaad. Ang Propeta mipasabut: “Walay labaw nga makapalipay sa mga Santos niadtong tungora sa gingharian sa Ginoo, nga makalabaw niadtong kahayag nga midan-ag sa kalibutan pinaagi niadtong nakita nga panan-awon. Ang matag balaod, matag kasugoan, matag saad, matag kamatuoran ug ang matag butang nga may kalabutan sa padulngan sa tawo, gikan sa Genesis ngadto sa Pinadayag, nga ang kadalisay sa kasulatan nagpabilin nga walay pagkausab bisan sa kabuang sa mga tawo, … nagpamatuod sa katinuod nga kadto nga dokumento usa ka sinulat gikan sa mga rekord sa mahangturon nga kalibutan. Ang dili makab-ot nga mga ideya; ang katin-aw sa pinulongan; ang gilapdon sa buluhaton; ang pagpadayon sa kadugayon hangtud nga mahuman, nga aron unta ang makapanag-iya sa kaluwasan moangkon sa Ginoo ug moluhod ang tuhod; ang mga ganti sa pagkamatinud-anon, ug ang mga pagsilot tungod sa mga sala, dili gayud masabtan sa kahiktin sa panghunahuna sa katawhan, nga ang matag matinud-anon nga tawo maikag sa pagbutyag: “Kini gikan sa Dios:’”²

Mga Pagtulun-an ni Joseph Smith

Ang Dios nag-andam og tulo ka ang-ang sa himaya alang sa Iyang mga anak.

“Ang akong hisgutan mao ang mahitungod sa pagkabanhaw sa namatay, nga imong mabasa sa ika-14 nga kapitulo sa Juan—‘Sa balay sa akong Amahan anaay daghang puy-anan.’ [Juan 14:2.] Ingon gayud niini—‘Sa gingharian sa akong Amahan may daghan nga gingharian,’ aron nga kamo mahimong manununod sa Dios ug isigka-manununod kanako…. Adunay mga mansyon alang niadtong nagtuman sa celestial nga balaod, ug adunay lain nga mga mansyon alang niadtong wala makatuman sa balaod, ang matag tawo mahiadto asa siya angay.”³

“ ‘Apan,’ adunay moingon, ‘ako mituo nga adunay alang sa tanan nga langit ug impiyerno, nga padulngan sa tanan, ug ang tanan managsama, ug pareho nga mag-antus o pareho nga malipayon.’

“Unsa! diin nga ang tanan kauban nga magpunsisok—ang dungganan, matarung, ug mga mamumuno, ug mga makighilawason, nga nahisulat man nga sila pagahukman sigun sa ilang binuhatan sa buhi pa. Apan si San Pablo nagsulat kanato og tulo ka mga himaya ug tulo ka mga langit. Siya may nailhan nga tawo nga gibayaw ngadto sa ikatulong langit [tan-awa sa 1 Mga Taga-Corinto15:40–41; 2 Mga Taga-Corinto12:2–4]…. Si Jesus miingon ngadto sa Iyang mga disipulo, ‘Sa balay sa akong Amahan anaay daghang puy-anan; kon dili pa, moingon ba unta ako kaninyo nga moadto ako aron sa pag-andam ug luna alang kaninyo, moanhi ako pag-usab ug pagadawaton ko kamo nganhi uban kanako, aron nga diin gani ako atua usab kamo.’ [Tan-awa sa Juan 14:2–3.]”⁴

“Sige ug basaha ang panan-awon nga anaa sa [Doktrina ug mga Pakigsaad 76]. Niana tin-aw nga gihulagway ang himaya ibabaw sa himaya—may usa ka kahayag ang adlaw, may lain nga kahayag ang buwan, ug may kahayag ang mga bitoon; ug ang usa ka bitoon may kalainan sa ubang bitoon sa kahayag, mao usab sila didto sa telestial nga kalibutan managlahi ang himaya, ug matag tawo nga maghari sa celestial nga himaya maoy usa ka Dios sa iyang mga giharian nga dapit….

“Si Pablo miingon, ‘Lain ang kasanag sa adlaw, ug lain usab ang kasanag sa bulan, ug lain ang kasanag sa mga bitoon; kay ang usa ka bitoon lahi man ug kasanag sa laing bitoon. Maingon man usab niana ang pagkabanhaw sa mga patay.’ [1 Mga Taga-Corinto 15:41–42.]”⁵

Kinsa kadto nga midawat sa pagpamatuod ni Jesus, midawat sa mga ordinansa sa ebanghelyo, ug magmadaugon pinaagi sa hugot nga pagtuo makapanag-iya sa celestial nga gingharian.

Si Propeta Joseph Smith nakakita niini nga mosunod nga panan-awon, nga sa wala madugay gi-rekord sa Doktrina ug mga Pakigsaad 76:50–59, 62, 68–70: “Ug usab kami magpamatuod—kay kami nakakita ug nakadungog, ug kini mao ang pagpamatuod sa ebanghelyo ni Kristo mahitungod kanila kinsa motungha diha sa pagkabanhaw sa mga makiangayon—sila mao sila kinsa nakadawat sa pagpamatuod ni Jesus, ug mituo sa iyang ngalan ug gibunyagan subay sa paagi sa iyang paglubong, gilubong diha sa tubig sa iyang ngalan, ug kini sumala sa sugo diin siya mihatag—nga pinaagi sa paghupot sa mga sugo sila unta mahugasan ug malimpyohan gikan sa tanan nila ng mga sala, ug makadawat sa Balaan nga Espiritu pinaagi sa pagpandong sa mga kamot kaniya kinsa gi-orden ug gibugkos ngadto niini nga gahum; ug kinsa nakabuntog pinaagi sa hugot nga pagtuo, ug gibugkos pinaagi sa Balaan nga Espiritu sa saad, diin ang Amahan mipadala diha sa tanan niadto kinsa mga makiangayon ug matarung.

“Sila mao sila kinsa mao ang simbahan sa Unang Natawo. Sila mao sila ngadto kansang mga kamot ang Amahan nakahatag sa tanan nga mga butang—sila mao sila kinsa mga pari ug mga hari, kinsa nakadawat sa iyang kahingpitan, ug sa iyang himaya; ug mga pari sa Labing Halangdon, subay sa kapunongan ni Melchizedek, nga subay sa kapunongan ni Enoch, nga subay sa kapunongan sa Bugtong Anak.

“Busa ingon nga kini nahisulat, sila mga dios, gani ang mga anak sa Dios—busa, ang tanan nga mga butang ila, gani kinabuhi o kamatayon, o mga butang karon, o mga butang nga moabut, ang tanan ila ug sila kang Kristo, ug si Kristo sa Dios….

“Kini sila mopuyo diha sa atubangan sa Dios ug sa Iya nga Kristo hangtud sa kahangturan…. Kini mao sila kansang mga ngalan nahisulat sa langit, diin ang Dios ug si Kristo mao ang maghuhukom sa tanan. Kini mao sila kinsa mga makiangayon nga mga tawo nga nahimo nga hingpit pinaagi ni Jesus ang tigpataliwala sa bag-o nga pagkigsaad, kinsa nagbuhat niining hingpit nga pag-ula pinaagi sa pagpaagas sa iyang kaugalingon nga dugo. Kini mao sila kansang mga lawas mga celestial, kansang himaya ingon niana sa adlaw, gani ang himaya sa Dios ang labing halangdon sa tanan, kansang himaya sama sa adlaw sa kawanangan ingon sa nahisulat sa kasulatan.”⁶

Si Propeta Joseph Smith nagtudlo niini niadtong Mayo 1843, nga sa wala madugay gi-rekord sa Doktrina ug mga Pakigsaad 131:1–4: “Sa celestial nga himaya adunay tulo ka mga langit o mga ang-ang; ug aron makabaton sa labing taas, ang tawo kinahanglan mosulod ngadto niini nga kapunongan sa pagkapari [ang gipasabut mao ang bag-o ug walay katapusan nga pakigsaad sa kaminyoon]; ug kon dili siya mosulod, siya dili makabaton niini. Siya mahimo nga mosulod ngadto sa lain, apan mao na kana ang katapusan sa iyang gingharian; dili siya makabaton og mga anak.”⁷

“Mao kini, ang kinabuhing dayon—nga makaila sa bugtong maalamon og tinuod nga Dios; ug nga kamo kinahanglan makakat- on unsaon nga makahimo sa inyong kaugalingon nga dios, ug aron mahimo nga mga hari ug mga pari ngadto sa Dios, … nga makahimo sa usa ka gamay nga pagtubo, ngadto-ngadto ug magsugod sa gamay ngadto sa pagdako; gikan sa grasya ngadto sa grasya, gikan sa kahimayaan ngadto sa kahimayaan, hangtud nga moabut ang imong pagkabanhaw gikan sa kamatayon, ug makahimo sa pagpuyo diha sa mahangturon nga mga kahayag, nga mahimayaon nga maghari, uban niadtong mga maghari nga may mahangturon nga gahum….

“… [Ang mga matarung nga nangamatay] mabuhi pag-usab nga magpuyo diha sa mahangturon nga mga kahayag sa walay kinutuban nga himaya, nga walay kasubo, pag-antus, o wala nay kamatayon, nga sila mahimo nga manununod sa Dios, ug isigkamanununod ni Jesukristo. Unsa man kini? Ang pagkamanununod sa sama nga gahum, sa sama nga himaya, ug sa sama nga kahimayaan, hangtud nga kamo moabut sa kahimtang nga usa ka dios, ug moabut ngadto sa trono sa mahangturon nga gahum, sama kanila nga nakaagi na niini kaniadto.”⁸

“Sila nga makabaton og mahimayaon nga pagkabanhaw gikan nga namatay, pasidunggan nga labaw sa tanan nga mga binuhat, mga gahum mga trono, nga minandoan, ug mga anghel, ug tin-aw nga gipahayag nga mahimong manununod ni Jesukristo, nga ang tanan adunay mahangturon nga gahum [tan-awa sa Mga Taga Roma 8:17].”⁹

Ang “dungganan nga mga tawo sa yuta,” sila kadto nga wala mobarug nga maisugon sa kamatuoran nga gipadayag ni Jesus, makapanag-iya sa terrestrial nga gingharian.

Si Propeta Joseph Smith nakakita niini nga mosunod nga panan-awon, nga sa wala madugay gi-rekord sa Doktrina ug mga Pakigsaad 76:71–79: Ug usab, kami nakakita sa kalibutan nga terrestrial, ug tan-awa ug sud-onga, kini mao sila kinsa anaa sa terrestrial kansang himaya lahi gikan nianang simbahan sa Unang Natawo kinsa nakadawat sa kahingpitan sa Amahan, gani ingon sa bulan nga lahi gikan sa adlaw diha sa kawanangan.

“Tan-awa, kini mao sila kinsa namatay nga wala masayud sa balaod; ug usab sila kinsa mao ang mga espiritu sa mga tawo nga gibutang sa bilanggoan, kinsa giduaw sa Anak, ug misangyaw sa ebanghelyo ngadto kanila, nga sila unta mahukman samala sa mga tawo diha sa unod, apan sa pagkahuman midawat niini.

“Kini mao sila kinsa mga dungganan nga mga tawo sa yuta, kinsa nabutaan pinaagi sa pagkamalimbungon sa mga tawo. Kini mao sila kinsa nakadawat sa iyang himaya, apan dili sa iyang kahingpitan. Kini mao sila kinsa nakadawat sa pagduaw sa Anak, apan dili sa kahingpitan sa Amahan.

“Busa, sila ang mga lawas nga terrestrial, ug dili mga lawas nga celestial, ug lahi diha sa himaya ingon sa bulan nga lahi gikan sa adlaw. Kini mao sila kinsa dili mga maisug diha sa pagpamatuod ni Jesus; busa, sila dili makabaton og korona diha sa gingharian sa atong Dios.”¹⁰

Kadto sila nga mga dautan ug wala modawat sa ebanghelyo sa kamatuoran ni Jesus, makapanag-iya sa telestial nga gingharian.

Si Propeta Joseph Smith nakakita niini nga mosunod nga panan-awon, nga sa wala madugay gi-rekord sa Doktrina ug mga Pakigsaad 76:81–85, 100–106, 110–12: Ug usab, kami nakakita sa himaya sa telestial, kansang himaya ingon niana sa ubos nga gingharian, gani ingon sa himaya sa mga bitoon nga lahi gikan niana nga himaya sa bulan diha sa kawanangan.

“Kini mao sila kinsa wala modawat sa ebanghelyo ni Kristo, ni sa pagpamatuod ni Jesus. Kini mao sila kinsa wala molimud sa Balaan nga Espiritu. Kini mao sila kinsa gitambug ngadto sa impyerno. Kini mao sila kinsa dili matubos gikan sa yawa hangtud sa katapusan nga pagkabanhaw, hangtud ang Ginoo, gani si Kristo nga Kordero, makahuman sa iyang buluhaton….

“Kini mao sila kinsa moingon nga sila pipila sa usa ug pipila sa lain—ang pipila kang Kristo ug ang pipila kang Juan, ug ang pipila kang Moises, ug ang pipila kang Elias, ug ang pipila kang Esaias, ug ang pipila kang Isaias ug ang pipila kang Enoch; apan wala modawat sa ebanghelyo, ni sa pagpamatuod ni Jesus, ni sa mga propeta, ni sa walay katapusan nga pakigsaad.

“Katapusan sa tanan, kining tanan mao sila kinsa dili pagapundukon uban sa mga santos, nga pagasakgawon ngadto sa simbahan sa Unang Natawo, ug dawaton ngadto sa panganod.

“Kini mao sila kinsa mga bakakon, ug mga barangan, ug mga mananapaw, ug mga nagbaligya sa dungog, ug kinsa naghigugma ug naghimo og bakak. Kini mao sila kinsa nag-antus sa kaligutgut sa Dios dinhi sa yuta. Kini mao sila kinsa nag-antus sa panimalos sa walay katapusan nga kalayo. Kini mao sila kinsa gisalikway ngadto sa impyerno ug nag-antus sa kaligutgut sa Makagagahum nga Dios, hangtud sa kahingpitan sa mga panahon, sa higayon nga si Kristo makabuntog sa tanan nga mga kaaway ubos sa iyang mga tiil ug makahingpit sa iyang buluhaton….

“Ug [kami] nakadungog sa tingog sa Ginoo nga nag-ingon: Kining tanan moluhod, ug matag dila mokumpisal ngadto kaniya kinsa naglingkod diha sa trono hangtud sa kahangturan; kay sila pagahukman sumala sa ilang mga buhat, ug ang matag tawo makadawat sumala sa iyang kaugalingon nga mga buhat, alang sa iyang kaugalingon nga kamandoan, diha sa mga mansyon nga giandam; ug sila mahimo nga mga sulugoon sa Labing Halangdon; apan diin ang Ginoo ug si Kristo nagpuyo sila dili makaadto, mga kalibutan nga walay katapusan.”¹¹

Ang pag-antus sa mga dautan mao ang pagkahibalo nga sila napakyas sa pagpanag-iya sa himaya nga unta ilang maangkon.

“Ang Dios nagmando nga ang tanan nga wala magpatalinghug sa Iyang tingog dili makalingkawas sa panghimaraot sa impyerno. Unsa ang panghimaraot sa impyerno? Nga maoy makauban ang katilingban nga wala makatuman sa Iyang mga kasugoan…. Ako nahibalo nga ang tanan nga tawo mahimo nga masilotan kon sila dili mosubay sa dalan nga Iyang gibuksan, ug mao kini ang dalan nga gilatid pinaagi sa pulong sa Ginoo.”¹²

“Ang hilabihan nga pag-antus sa mipanaw na nga mga espiritu ngadto sa kalibutan sa mga espiritu, nga maoy ilang padulngan human mamatay, mao ang pagkaamgo nga napakyas sila sa pagkab-ot sa himaya nga naangkon sa uban ug nga unta maangkon usab nila, ug sila ang motulisok sa ilang mga kaugalingon.”¹³

“Walay kasakit nga makalilisang nga mas labaw pa sa pagkawalay kasiguroan. Mao kini ang silot sa mga dautan; ang ilang pagduhaduha, kahigwaos ug ang pagkawalay kasiguroan makapahiagum og paghilak, pagdanguy-ngoy ug pagpangagot sa mga ngipon.”¹⁴

“Ang tawo maoy mopaantos sa iyang kaugalingon ug mosilot sa kaugalingon. Sigun sa panultihon, sila adto padulong sa linaw sa nagdilaab nga kalayo ug asupre [tan-awa sa Pinadayag 21:8]. Ang pag-antus sa pagkapakyas nga anaa sulod sa hunahuna sa tawo ingon kapait sa linaw sa nagdilaab nga kalayo ug asupre. Ako nag-ingon, ingon niini ang pag-antus sa tawo….

“… Ang uban mabanhaw ngadto sa mahangturon nga mga kahayag sa Dios, kay ang Dios nagpuyo sa mahangturon nga mga kahayag, ug ang uban mabanhaw ngadto sa pagkasinilutan sa ilang kaugalingon nga kahugawan, nga usa ka mapait nga pag-antus nga ingon sa linaw sa kalayo ug asupre.”¹⁵

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Si Joseph Smith ug Sidney Rigdon namalandong kabahin sa usa ka bersikulo sa kasulatan sa dihang nadawat nila ang pagpadayag nga gi-rekord sa Doktrina ug mga Pakigsaad 76 (mga pahina 259–62; tan-awa usab sa D&P 76:15–19). Unsang personal nga mga kasinatian ang nakatabang kanimo sa pagsabut nga ang pagpamalandong makahatag kanimo og nagtubo nga panabut? Sa imong pagtuon o pakighisgutay niini nga hugna, maingon man sa uban nga mga hugna paggahin og panahon sa pagpamalandong kabahin sa mga kamatuoran nga imong nabasa.
Basaha ang Juan 14:2–3 ug 1 Mga Taga-Corinto 15:40–41. Unsa ang gikatabang sa pagtulun-an niini nga hugna sa pagsabut niini nga bersikulo?
‘Sa paghulagway og kon kinsa ang makapanag-iya sa celestial, terrestrial, ug telestial nga himaya, ang pinili nga mga pulong “ang kamatuoran nga gipadayag ni Jesus” gigamit sa lima ka higayon (mga pahina 263–68). Unsa nga mga kinaiya sa usa ka tawo kinsa” maisug diha sa pagpamatuod ni Jesus”? Unsa ang mga saad nga gihatag niadtong kinsa maisug sa pagpamatuod ni Jesus?
Basaha ang ikaduha nga paragrap sa pahina 220, hatagi og espesyal nga pagtan-aw ang pinili nga mga pulong “magmadaugon pinaagi sa hugot nga pagtuo.” Unsa ang ubang mga butang nga tingali kinahanglan nato nga buntugon? Unsaon nga ang hugot nga pagtuo ngadto ni Jesus makatabang kanato nga magmadaugon batok sa mga problema niini nga kinabuhi?
Basaha ang tibuok-katapusan nga paragrap sa pahina 264. Sa atong mahangturon nga progreso, sa imong pagtuo ngano nga kinahanglan kita sa pagtubo “gikan sa usa ka gamay nga pagtubo sa ngadto-ngadto”? Unsa nga mga kasinatian nimo nga naghulagway sa atong kinahanglan aron makat-unan ug motubo sa ingon nga paagi?
Ribyuha ang ikaduha nga paragrap sa pahina 266, nga naghulagway sa uban nga mga tawo nga makapanag-iya sa terrestrial nga gingharian, Unsaon nato sa paglikay nga “mabutaan pinaagi sa pagkamalimbungon sa mga tawo”? Unsay atong ikatabang sa uban aron malikayan nga malimbungan?
Sa pahina 268, pangitaa ang mga pulong ug pinili nga mga pulong [phrases] ni Joseph Smith nga gigamit sa paghulagway sa kahimtang sa mga dautan sa sunod kinabuhi. Unsay gipasabut nini nga mga pulong ug pinili nga mga pulong nganha kaninyo? Unsaon nga ang usa ka tawo ‘maoy mopaantus sa iyang kaugalingon ug mosilot sa kaugalingon”?

May Kalabutan nga mga Kasulatan: Alma 41:2–8; D&P 14:7; 76:20–49; 88:15–39