Pagdawat sa mga Ordinansa ug mga Panalangin sa Templo

Ang templo mao ang dapit diin ang Dios mahimong “mopadayag ngadto sa Iyang katawhan sa mga ordinansa sa Iyang balay ug sa himaya sa Iyang gingharian, ug pagtudlo sa katawhan sa paagi sa kaluwasan.”

Gikan sa Kinabuhi ni Joseph Smith

Gikan sa unang panahon sa Pagpahiuli, ang Ginoo mitudlo ni Propeta Joseph Smith sa ka mahinungdanon sa pagtukod og mga templo. Bisan kon ang Propeta napugos sa pagbalhin ug makadaghang higayon ug kanunay nag-atubang og dinalian nga mga buluhaton sa iyang panahon ug atensyon, wala gayud siya makalimot sa panginahanglan sa pagtukod og balay sa Ginoo. Usa ka dapit alang sa usa ka templo gipahinungod sa Independence, Missouri. Usa ka maanindot nga templo nahuman ug gipahinungod sa Kirtland, Ohio. Sa Far West, Missouri, mga tukurang bato alang sa usa ka templo gipahimutang na, aron biyaan lamang. Karon, samtang ang mga miyembro sa Simbahan nagsugod sa pagtukod og usab sa ilang mga kinabuhi sa Nauvoo—daghan kanila ang walay igo nga pagkaon, kapasilongan, o trabaho—si Joseph Smith nasayud nga ang labing importante nga buhat sa mga Santos mao ang pagtukod pag-usab og templo.

Agi og tubag sa sugo sa Ginoo, ang Propeta ug ang mga Santos milihok dayon kutob sa mahimo sa pagpadayon sa pagtukod og balay ngadto sa Ginoo. Apan ang Propeta nakaamgo nga ang pagtukod mokabat og mga katuigan, ug siya nasayud nga ang mga Santos nagkinahanglan sa hingpit nga panalangin sa templo. Ang sangputanan, pagka Mayo 4, 1842, bisan kon ang templo wala makompleto, si Joseph Smith nangalagad sa endowment ngadto sa gamay nga pundok sa matinud-anon nga kaigsoonan.

Ang pundok nagtigum sa usa ka dako nga kwarto taas sa Red Brick Store sa Propeta, nga “gipahimutang aron magrepresentar sulod sa templo sumala sa gitugot sa sitwasyon.”¹ Si Franklin D. Richards, sa Korum sa Napulog Duha ka mga Apostoles, misulat: “Diha nga ang espiritu miaghat ni [Joseph Smith] nga ang iyang buluhaton sa kinabuhi hapit na matapos, ug diha nga iyang nakita nga ang iyang panahon sa yuta mahimong matapos sa dili pa mahuman ang templo, nagtawag siya og pipila ka pinili, ug gihatag kanila ang mga ordinansa sa balaan nga mga endowment, aron ang balaan nga mga bahandi diha sa iyang hunahuna dili mawala sa kalibutan uban sa iyang kamatayon.”²

Ang kasaysayan sa Propeta nag-rekord: “Akong gigahin ang adlaw diha sa ibabaw nga bahin sa tindahan, … sa konseho uban ni Heneral James Adams, sa Springfield, Patriarch Hyrum Smith, mga Bishop Newel K. Whitney ug George Miller, ug Presidente Brigham Young ug mga Elder Heber C. Kimball ug Willard Richards, nagtudlo kanila sa mga baruganan ug kapunongan sa Priesthood, mihimo sa mga paghugas ug mga pagdihog, mga endowment ug ang pagtugyan sa mga yawe kalabut sa Aaronic Priesthood, ug hangtud ngadto sa pinakataas nga kapunongan sa Melchizedek Priesthood, nagpresentar sa han-ay mahitungod sa Karaan nga mga Panahon, ug ang tanan niadto nga mga plano ug mga baruganan diin si bisan kinsa makahimo sa pag-angkon sa kahingpitan niadtong mga panalangin nga giandam na alang sa Simbahan sa Unang Natawo, ug moduol ug mag pabilin diha sa presensya sa Elohim diha sa mahangturong mga kalibutan. Niini nga konseho gipalihok ang karaang paghan-ay sa mga butang sa pinaka-unang higayon niining katapusang mga adlaw.

“Ug ang mga pamahayag nga akong gihimo dinhi niini nga konseho mao ang mga butang nga espirituhanon, ug mga butang nga madawat lamang sa mga espirituhanon og panghunahuna: ug walay laing gipahibalo niining mga tawhana kon dili unsa ang ipahibalo ngadto sa tanan nga mga Santos sa ulahing mga adlaw, sa labing madali kon sila andam na sa pagdawat niini, ug usa ka tukma nga dapit ang giandam aron paghatag niini, bisan ngadto sa pinakahuyang sa mga Santos; busa himoa nga ang mga Santos, magmakugihon sa pagtukod sa Templo, ug sa tanan nga mga balay diin sila nagagikan, o sukad karon mahimo nga, mandoan sa Dios nga motukod.”³

Samtang ang kadaghanan sa mga Santos makadawat sa endowment sa templo human ang templo sa Nauvoo makompleto, limitado nga gidaghanon sa mga lalaki ug mga babaye nakadawat niini nga panalangin sa mga bulan human sa miting niadtong Mayo 1842. Si Mercy Fielding Thompson usa niini. Sa panahon nga siya midawat sa iyang endowment, ang Propeta miingon ngadto kaniya, “Kini maoy modala kanimo pagawas sa kangitngit ngadto sa talagsaon nga kahayag.”⁴

Mga Pagtulun-an ni Joseph Smith

Ang mga Santos gimandoan sa Dios sa pagtukod og mga templo.

Pagka Enero 1833 sa Kirtland, Ohio, ang Propeta misulat: “Kami gimandoan sa Ginoo didto sa Kirtland, sa pagtukod og balay sa Dios; … kini ang pulong sa Ginoo kanamo, ug kami kinahanglan, oo, ang Ginoo magtabang kanamo, kami mosunod: tungod sa matang sa among pagkamasulundon siya misaad kanamo og mahinungdanong mga butang; oo, gani usa ka bisita gikan sa langit aron pagpasidungog kanamo uban sa Iyang presensya. Kami nahadlok kaayo atubangan sa Ginoo kay tingali og kami mapakyas sa pagdawat niining daku nga pasidungog, nga gisugyot sa atong Agalon nga ihatag kanamo; kami nagtinguha alang sa mapainubsanon ug hugot nga pagtuo kay tingali og kami maulaw diha sa Iyang presensya.”⁵

Pagka Septyembre 1840, ang Propeta ug ang iyang mga counselor diha sa First Presidency misulti nga ang panahon miabut na aron pagtukod og Templo sa Nauvoo: “Nagtuo nga ang panahon miabut na, og kinahanglang magtukod og usa ka balay sa pag-ampo, usa ka balay sa kahusay usa ka balay sa Dios [tan-awa sa D&P 88:119], kun asa ang mga ordinansiya pagahimuon nga mauyonon sa Iyang balaang kabubut-on, niining rehiyon sa nasud—sa pagpatuman niini, daghan nga paningkamot kinahanglan nga buhaton, ug mga kahimanan ang gikinahanglan—ug tungod kay ang buhat kinahanglan nga madali diha sa katarung; angay lang sa mga Santos sa paghatag og gibug-aton sa kamahinungdanon niining mga butanga, sa ilang mga hunahuna, sa tanan nila nga mga buhaton, ug dayon magsugod kay gikinahanglan aron kini mapalihok; ug mangandam sa ilang kaugalingon uban sa kaisug, modisider sa pagbuhat sa tanan nilang mahimo, ug mobati sa ilang mga kaugalingon nga labing interesado nga ingon og ang tanan nga kakugi nag-agad lamang sa ilang mga kaugalingon. Sa pagbuhat niini, sila mosunod sa mahimayaong mga buhat sa mga katigulangan, ug maangkon ang mga panalangin sa langit diha sa ilang mga kaugalingon ug sa ilang kaliwatan ngadto sa bag-ong henerasyon.”⁶

Pagka Enero 1841, ang Propeta ug ang iyang mga counselor sa First Presidency misulat: “Ang Templo sa Ginoo anaa na sa proseso sa pagtukod dinhi [sa Nauvoo] diin ang mga Santos moadto aron sa pagsimba sa Dios sa ilang mga katigulangan, sumala sa pagkahan-ay sa Iyang balay ug sa mga gahum sa Balaang Priesthood, ug itukod aron paghimo sa tanan nga mga kalihokan sa Priesthood nga tukma ang pagkahimo, ug diin ang mga panudlo gikan sa Labing Halangdon madawat, ug gikan niining dapita mopadayon ngadto sa layo nga mga yuta. Nan itingub dayon nato ang atong mga gahum … ug maningkamot nga masunod ang lihok sa karaang mga katigulangan sa pakigsaad ug mga patriyarka, niadtong mga butang nga ingon ka dako kaayo og importansya niini ug sa tanang nagsunod nga henerasyon.”⁷

Sa sinugdanan niadtong 1841, si Joseph Smith mitudlo sa mosunod, nga gi-rekord ni William P. McIntire: “Si Joseph miingon nga ang Ginoo nagsulti nga kita kinahanglan motukod sa atong balay sa Iyang pangalan, nga kita mahimong mabunyagan alang sa patay. Apan kon kita dili mobuhat niini, kita angay nga isalikway, ug ang atong mga patay uban kanato, ug kini nga Simbahan dili madawat [tan-awa sa D&P 124:32].”⁸

Pagka Abril, 1841, ang Propeta miingon: “Ang Simbahan wala pa hingpit nga ma-organisar, sa husto nga pagkahan-ay niini, ug dili pa mahimo, hangtud nga ang Templo makompleto, diin mga dapit pagahimoon alang sa pagpahigayon sa mga ordinansa sa Priesthood.”⁹

Pagka Hulyo 1842, ang Propeta namahayag: Ang Ginoo miingon kanato sa pagtukod sa [Nauvoo] Templo … ; ug kana nga mando sama ka bililhon diha kanato ingon sa ubang mando; ug ang tawo kinsa dili mobuhat niining mga butanga ingon usab ka malapason sama og siya nakalapas sa laing mga kasugoan; siya dili usa ka tigbuhat sa kabubut-on sa Diyos, siya dili usa ka tigtuman sa Iyang mga sugo.”¹⁰

Pagka Oktubre 1843, ang Propeta mipahimangno sa mga Santos: “Dalia ang buhat diha sa Templo, dugangi ang inyong mga paningkamot aron mapadayon ang tanang buhat sa katapusang mga adlaw, ug maglakaw sa atubangan sa Ginoo nga maligdong ug matarung.”¹¹

Pagka Marso 1844, ang Propeta nakigkita sa Napulog Duha ug sa komite sa Templo sa Nauvoo sa paghisgot kon unsaon sa pagbahin sa gamay nga tinubdan sa Simbahan. Niini nga miting, ang Propeta miingon: “Atong gikinahanglan ang templo labaw sa bisan unsa nga butang.”¹²

Sa templo kita makat-on sa mga butang sa kahangturan ug makadawat og mga ordinansa alang sa kaluwasan sa atong kaugalingon ug sa atong mga katigulangan.

“Unsa ang katuyoan sa pagpundok sa … katawhan sa Dios sa bisan unsa nga panahon sa kalibutan? … Ang unang katuyoan mao ang pagtukod ngadto sa Ginoo og usa ka balay diin Siya mopadayag ngadto sa iyang katawhan sa mga ordinansa sa Iyang balay ug sa himaya sa Iyang gingharian, ug sa pagtudlo sa katawhan sa paagi sa kaluwasan; kay adunay piho nga mga ordinansa ug mga baruganan nga kon kini itudlo ug lihokon, gikinahanglan nga buhaton sa usa ka dapit o balay nga gitukod alang niana nga katuyoan.

“… Ang mga ordinansa nga gitukod sa mga langit sa wala pa gihimo ang kalibutan, diha sa priesthood, alang sa kaluwasan sa katawhan, dili mabalhin o mausab. Ang tanan kinahanglan maluwas diha sa sama nga mga baruganan.

“Alang sa sama nga katuyoan nga ang Dios mopundok sa Iyang katawhan sa katapusang mga adlaw, aron sa pagtukod ngadto sa Dios og usa ka balay aron sila maandam alang sa mga ordinansa ug mga endowment, paghugas ug mga pagdihog, ug uban pa. Usa sa mga ordinansa sa balay sa Ginoo mao ang bunyag alang sa mga patay. Ang Dios nagmando sa wala pa ang katukuran sa kalibutan nga ang mga ordinansa kinahanglan buhaton diha sa usa ka bunyaganan nga gi-andam alang niana nga katuyoan diha sa balay sa Ginoo….

“Ang doktrina sa bunyag alang sa patay dayag kaayo nga makita diha sa Bag-ong Tugon; … kini mao ang hinungdan ngano nga si Jesus miingon ngadto sa mga Judeo, ‘Makapila nga buot kong tigumon ang imong mga anak, ingon sa usa ka himungaan nga nagatigum sa iyang mga piso sa ilalum sa iyang mga pako, apan nagadumili kamo!’ [Mateo 23:37]—nga sila unta motambong sa mga ordinansa sa bunyag alang sa patay ingon man sa ubang mga ordinansa sa priesthood, ug makadawat og mga pagpadayag gikan sa langit, ug mahingpit sa mga butang sa gingharian sa Dios—apan sila wala nagadumili. Ingon niini ang nahitabo sa adlaw sa Pentecostes: kadtong mga panalangin gibubo ngadto sa mga disipulo nianang higayona. Ang Dios nagbuot nga Siya moluwas sa patay, ug buhaton kini pinaagi sa pagpundok sa Iyang mga katawhan….

“… Ngano nga pundukon ang mga tawo niining dapita? Alang sa mao gihapon nga katuyoan nga si Jesus buot nga mopundok sa mga Judeo—aron makadawat sa mga ordinansa, mga panalangin, ug sa mga himaya nga gitagana sa Dios alang sa Iyang mga Santos. Ako karon mangutana niini nga pundok ug sa tanang mga Santos kon kamo karon motukod niini nga balay ug modawat sa mga ordinansa ug mga panalangin nga ang Dios mitagana alang kaninyo; o wala ba kamo motukod ngadto sa Ginoo niini nga balay, ug pasagdan lang Siya nga molabay ug mohatag niini nga mga panalangin diha sa laing mga tawo?”¹³

“Kon ang [Nauvoo] templo ug ang bunyaganan maandam na kami naghunahuna sa paghatag sa mga Elders sa Israel sa ilang mga paghugas, ug mga pagdihog, ug mobuhat niadtong katapusan ug labaw nga madanihon nga mga ordinansa, nga kon wala kini dili nato maangkon ang celestial nga mga gingharian. Apan kinahanglan gayud adunay balaan nga dapit nga andamon alang niana nga katuyoan. Dihay usa ka proklamasyon nga gihimo sulod sa panahon nga kana nga pundasyon sa Templo ipahimutang diha, tungod og alang niana ug dihay mga pagpangandam nga gihimo hangtud mahuman ang trabaho, aron ang mga tawo mahimong modawat sa ilang mga endowment ug mahimong mga hari ug mga pari ngadto sa Labing Halangdon nga Dios…. Kinahanglan, hinoon, nga adunay dapit nga itukod alang ra gayud niana nga katuyoan, ug alang sa mga tawo nga mabunyagan alang sa ilang patay….

“Ang Ginoo mihimo og balaod kalabut nianang butanga: kinahanglan nga adunay usa ka piho nga dapit alang sa kaluwasan sa atong patay. Ako nagtuo gayud nga adunay mahimong usa ka dapit, ug sa ingon ang mga tawo nga buot moluwas sa ilang patay makaduol ug magdala sa ilang pamilya, himoon ang ilang buhat sa pagpabunyag ug pagbuhat sa ubang mga ordinansa alang sa ilang patay.”¹⁴

Ang pangutana kanunay nga gipangutana, ‘Dili ba kita maluwas kon dili mag-agi nianang tanang mga ordinansa, ug uban pa?’ Ako motubag, Dili, dili ang hingpit nga kaluwasan. Si Jesus miingon, ‘Sa balay sa akong Amahan adunay daghang puy-anan, ug moadto ako aron sa pag-andam og luna alang kaninyo’ [tan-awa sa Juan 14:2.] Ang ginganlan og Balay dinhi angay unta nga mahubad og gingharian; ug bisan kinsang tawo nga nabayaw ngadto sa kinatas-ang mansyon kinahanglan nga matuman sa celestial nga balaod, ug sa tibuok balaod usab.”¹⁵

“Kon ang usa ka tawo makakuha sa kinatibuk-an nga priesthood sa Dios, kinahanglan nga iya kining makuha sa samang paagi nga si Jesukristo nakaangkon niini, ug kana mao ang paghupot sa tanang mga sugo ug pagtuman sa tanang mga ordinansa diha sa balay sa Ginoo….

“Ang tanang tawo kinsa mahimong manununod sa Dios ug mga isigka manununod uban ni Jesukristo kinahanglan nga modawat sa kahingpitan sa mga ordinansa sa iyang gingharian; ug kadtong dili modawat sa tanang mga ordinansa mapakyas sa pagdawat sa kahingpitan niana nga himaya.”¹⁶

“Ato bang mabasa ug masabtan ang tanan nga nakasulat gikan sa mga panahon ni Adan, sa relasyon sa tawo ngadto sa Dios ug mga anghel sa umaabot nga kahimtang, gamay ra gayud ang atong nahibaloan mahitungod niini. Ang pagbasa sa kasinatian sa uban o sa pagpadayag nga gihatag ngadto sa uban, dili gayud makahatag kanato og usa ka malukpanon nga pagtan-aw sa atong kahimtang ug tinuod nga relasyon ngadto sa Dios. Ang kahibalo niining mga butanga maangkon lamang pinaagi sa kasinatian ngadto sa mga ordinansa sa Dios nga gihan-ay alang niana nga katuyoan. Kon ikaw makatutok ngadto sa langit og mga lima ka minuto, ikaw masayud og daghan kay sa mobasa sa tanan nga sukad nahisulat mahitungod niana nga hilisgutan…. Akong ipaniguro sa mga Santos nga ang kamatuoran … makahimo ug mahimong mahibaloan pinaagi sa mga pagpadayag sa Dios pinaagi sa Iyang mga ordinansa, ug agi og tubag niana nga pag-ampo.”¹⁷

“Ang pagkahan-ay sa balay sa Dios nahimo, ug nagpadayon kini, nga mao gihapon, bisan human sa pag-anhi ni Kristo; ug human sa katapusan sa liboan ka mga tuig kini mao ra gihapon; ug sa katapusan kita makasulod na gayud sa Celestial nga Gingharian sa Dios, ug magpahimulos niini sa kahangturan.”¹⁸

Ang templo usa ka dapit nga balaanon diin kita modawat sa labing mahinungdanon nga mga panalangin nga giandam sa Dios alang sa Iyang mga anak.

Kabahin sa pagpahinungod nga pag-ampo alang sa Templo sa Kirtland, nga gihatag ngadto ni Joseph Smith pinaagi sa pagpadayag ug sa kaulahian gi-rekord sa Doktrina ug mga Pakigsaad 109, ang Propeta nag-ampo: “Ug karon, Balaan nga Amahan, kami nangamuyo … nga ang imong ‘himaya unta mokunsad nganha sa imong katawhan, ug dinhi niini nga balay, diin kami karon mopahinungod nganha kanimo, aron kini unta mabalaan ug mapahinungod ug mahimo nga balaan, ug aron ang imong balaan nga pagtambong magpadayon unta dinhi niini nga balay; ug aron ang tanan nga katawhan kinsa mosulod diha sa ganghaan sa balay sa Ginoo unta mobati sa imong gahum ug aron mapugos sa pag-ila nga ikaw mibalaan niini ug nga kini mao ang imong balay, usa ka dapit sa imong pagkabalaan.

“Ug himoa nga ikaw motugyan, Balaan nga Amahan, nga tanan kadto kinsa mosimba dinhi niini nga balay matudloan unta sa mga pulong sa kaalam gikan sa labing maayo nga mga basahon, ug aron sila unta maninguha sa pagkat-on pinaagi sa pagtuon, ug usab pinaagi sa hugot nga pagtuo, ingon nga ikaw misulti; ug aron unta sila magtubo diha kanimo, ug modawat sa usa ka kahingpitan sa Espiritu Santo, ug motukod sumala sa imong mga balaod ug makaandam sa pag-angkon sa matag gikinahanglan nga butang; ug aron kini nga balay mahimo unta nga usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa himaya ug sa Dios, gani imong balay….

“Ug kami mangayo kanimo, Balaan nga Amahan, nga ang imong sulugoon makasulod unta niini nga balay sinangkapan sa imong gahum, ug ang imong ngalan unta maanaa diha kanila, ug ang imong himaya maglibut kanila, ug ang imong mga anghel mobantay kanila; ug gikan niini nga dapit sila makadala sa mahinungdanon kaayo ug mahimayaon nga mga balita, diha sa kamatuoran, ngadto sa tanang dapit sa yuta, aron sila masayud nga kini mao ang imong buhat, ug nga ikaw mibutang sa imong kamot, aron pagtuman sa imong gipamulong pinaagi sa ba-ba sa mga propeta, mahitungod sa katapusang mga adlaw.

“Kami mangayo kanimo, Balaan nga Amahan, sa pagpanalipod sa mga katawhan nga nagsimba, ug madungganon nga naghupot og usa ka ngalan ug katungdanan dinhi niini nga ang imong balay, sa tanan nga mga kaliwatan ug alang sa kahangturan; aron walay hinagiban nga mahimo batok kanila nga mouswag; nga siya nagkalot og usa ka lungag alang kanila siya ang mahulog niini; aron walay pundok sa mga dautan nga makaangkon og gahum nga mabantugan, ug mobuntog sa imong mga katawhan nga tungod kanila ang imong ngalan mabutang dinhi niini nga balay.”¹⁹

Mga Sugyot alang sa Pagtuon ug Pagtudlo

Hunahunaa kini nga mga ideya samtang kamo magtuon niini nga hugna o samtang kamo mangandam sa pagtudlo. Alang sa dugang nga tabang, tan-awa sa mga pahina vii–xiii.

Ribyuha ang katapusang duha ka paragrap sa pahina 501. Sa unsa nga mga paagi nga ang buhat sa templo “makadala [kanato] gawas sa kangitngit ngadto sa talagsaon nga kahayag”? Sa inyong pagtuo unsa ang gipasabut sa “espirituhanon og panghunahuna”? Ngano nga kita kinahanglan nga espirituhanon og panghunahuna” aron makadawat sa kahayag nga anaa alang kanato diha sa templo?
Sa diha nga ang mga Santos sa Nauvoo nagtrabaho sa pagtukod og templo, si Propeta Joseph Smith misulti kanila, “Kita nagkinahanglan sa templo labaw pa kaysa bisan unsa” (pahina 504). Ribyuha ang mga pahina 499–504, sa pagpangita og mga rason ngano nga kini nga mga gipamulong tinuod. Sa unsa nga mga paagi nga ang gipamulong sa Propeta tinuod diha sa imong kinabuhi?
Tun-i ang mga pagtulun-an ni Joseph Smith kabahin sa mando sa pagtukod og mga templo (mga pahina 502–04). Sa inyong pagtuo ngano nga ang Simbahan dili “hingpit nga ma-organisar” kon walay mga templo ug mga ordinansa sa templo? Unsa ang atong mahimo karon aron sa “pagdali sa buhat diha sa templo?” Ngano nga gikinahanglan nga kita “motimbang-timbang sa kamahinungdanon” sa buhat sa templo?
Ribyuha ang mga Pagtulun-an sa Propeta mahitungod sa sagrado nga mga ordinansa sa templo ug unsa ang atong makat-unan gikan niini (mga pahina 502-04). Hain niini nga mga pagtulun-an ang piho nga makatabang kaninyo sa pagsabot sa kaimportante sa mga ordinansa sa templo?
Basaha ang ikatulong paragrap sa pahina 507. Kon kamo nakadawat na og mga ordinansa sa templo, hunahunaa kon sa unsa nga paagi nga ang inyong mga kasinatian nakatudlo kaninyo kabahin sa inyong “kahimtang ug tinuod nga relasyon ngadto sa Dios.” Kon wala pa kamo makaadto sa templo o kon kamo taudtaud na nga wala pa makabalik, paghunahuna kon unsaon ninyo sa pag-andam nga motambong sa templo.
Unsa ang ubang mga panalangin nga atong madawat kon kita motambong sa templo? (Alang sa ubang mga ehemplo, tan-awa sa mga pahina 508–09.) Gikan sa imong nabasa niini nga hugna, unsaon man ninyo paghimo nga ang inyong pagtambong sa templo mas makahuluganon?

May kalabutan nga mga Kasulatan: Salmo 24:3–5; Isaias 2:2–3; D&P 124:25–28, 39–41