Teivaki ni Dua na iVakarau ni Bula Marau kei na Yalo ni Nuidei

Sa tiko e dua na mate ni yalo tawavakabauta ena vanua. Sa voleka ni veitakavi raraba. Eda sa kovuti raraba tiko ena dua na veivakalolovirataki e tudei ka gaga, vaqara cala, ka vosa veivakacacani. …

Au tu oqo … ena vakamamasu meda sa kakua ni vakasaqara na cagilaba ka marautaka ga na rarama ni matanisiga. Au vakatura tiko meda sa tu ka yalonuidei. Au kerea tiko meda raica vakatitobu cake na veika vinaka, ka sogota na gusuda mai na veirukaki kei na veicavilaki, ka meda sa qai vakacaucautaka ga vakalevu na caka dodonu kei na sasaga.

Au sega ni kerea tiko me sa kua na vosa vakadodonu. Ena yaco na tubu ena veivakadodonutaki. Na kaukauwa e lako vata kei na veivutuni. Sa vuku sara e dua na tagane se yalewa, e caka cala ka vakadodonutaki mai vei ira eso, ka sa veisautaka na nona ilakolako. Au sega ni vakatura tiko me sa veivakalomavinakataki kece tu ga na noda vosa. Na vosa vakavuku e dina ka dodonu sa dua na kila-ka meda sa vakasaqara ka teivaka. Na ka au vakatura ka kerea tiko o ya meda sa gole tani mai na tawavakabauta sa teteva tiko na noda itikotiko raraba ka raica yani na veika totoka ni noda vanua kei na veigauna eda bula tiko kina oqo, ka meda tukuna yani vakalevu cake na nona bula dodonu e dua tale ka sega ni tukuna na nona ca e dua tale, ka me sa sosomitaki na tawavakabauta ena yalonuidei. Na noda vakabauta me sosomitaka na noda rere.⁸

Sa kena inaki taucoko meda nuidei tiko ena vuravura oqo Sa tu voliti keda tu na ka rarawa, e dina. Sa tu na leqa ena veiyasana kecega, e dina. Ia … e sega ni rawa, ka sega ni dodonu, mo buli cake ena tawavakabauta se vakatitiqa. O na rai yani ena nuidei, cakacaka ena vakabauta, ka yaco na veika oqori.⁹

Kakua ni veilecayaki. Kakua ni guce. Curuma yani na o ka raica na rarama ni siga Ena tadola ga vei iko na veimadigi vinaka. Kakua ni vakatarai ira na dauvosa rusa mera vakarerea na nomu rawa ni rawata.¹⁰

Teivaka e dua na ivakarau ni bula mamarau. Teivaka e dua na yalo ni nuidei. Lako ena vakabauta, rekitaka voli na totoka ni veika ni bula, mai na nodra veika vinaka o daulomana, ena ivakadinadina e tiko e yalomu me baleta na veika sa vakalou.¹¹

Na ituvatuva ni Turaga e ituvatuva ni marau. Ena mamada cake na sala, ena lailai sobu na lomaleqa, ena lailai sobu na dredre ni duidui kevaka eda teivaka e dua na yalo ni marau.¹²

Sa ka cecere noda sa vakalougatataki tiko. Meda sa qai vakavinavinaka kina vakalevu. … Mo teivaka e dua na yalo ni vakavinavinaka ni veivakalougatataki ni bula kei na isolisoli totoka kei na madigi eda dui marautaka. Sa kaya oti na Turaga ni o ira sa yalomalumalumu era na taukena na vanua. (Raica na Maciu 5:5). Meu na vakadewataka kina eke ni yalomalumalumu e tukuna tiko na yalo ni vakavinavinaka ka veisaqasaqa ki na dua na ivakarau ni bula ni boletaki koya ga, ia me kila ni tiko e dua na kaukauwa cecere cake mai vei koya, na yalo e kila na Kalou, kei na nona ciqoma na Nona ivakaro. Sai koya oqo na itekitekivu ni vuku. Mo lako ena vakavinavinaka tiko vei Koya sa solia mai na bula kei na isolisoli vinaka kecega.¹³

A sega mada ni bau dua na gauna cecere vakaoqo ena itukutuku kei vuravura meda bula voli e vuravura me vakataka na kena oqo. Eda sa qai vakavinavinaka mai na yaloda yadua ni da mai bula voli ena gauna totoka oqo vata kei na veivakalougatataki talei sa tu vei keda.¹⁴

Niu vakasamataka na veivakurabuitaki sa mai yaco ena gauna ni noqu bula—vakalevu cake mai na kena e yaco ena itukutuku taucoko ni kawatamata—au tu ka vakarokoroko ka vakavinavinaka. Au vakasamataka na motoka kei na waqavuka, na kompiuta, na misini ni fax, imeli, kei na Initaneti. Era sa veivakurabuitaki taucoko ka totoka dina. Au vakasamataka na rawa-ka lelevu ni veiqaravi vakavuniwai kei na qaravi ni yago. … Kei na veika kece oqo sa mai yaco na kena vakalesui mai na kosipeli savasava i Jisu Karisito. O iko kei au daru sa tiki ni cakamana kei na veivakurabuitaki ni inaki kei na matanitu cecere oqo ka sa robota tiko yani na vuravura taucoko ka sa vakalougatataka tiko na nodra bula na tamata ena vanua cava ga e yaco yani kina. Sa vakavinavinaka vakalevu kina na yaloqu.¹⁵

Eda sa bula tiko oqo ena taucoko ni gauna. Mo nanuma tiko na vosa o ya. Raica tiko na vosa taucoko. E vakatakilakilataka tiko [na] vinaka taucoko sa vakasokomuni [mai] ena veigauna sa oti ka vakalesui mai ki vuravura ena iotioti ni itabagauna oqo.

Sa vakasinaiti … na yaloqu ena vakavinavinaka vua na Kalou sa Cecere. Mai na isolisoli ni Luvena, ka sai koya na Kalou ni vuravura oqo, eda sa mai vakalougatataki vakatotoka sara. E voqa e yaloqu na qaqani noda serenilotu, “Nomu kalougata mo wilika ga. Na loloma ni noda Kalou” (Sere ni Lotu, naba 144).¹⁶

Mai na vakavinavinaka ni yaloda, meda sa qai kakua ni vakamosiulu ena vica walega na leqa eda sotava. Meda sa qai wilika ga na noda kalougata ena yalo cecere ni vakavinavinaka, e vakauqeti ena vakabauta e cecere, ka meda tu yani ka tara cake na matanitu ni Kalou ena vuravura oqo.¹⁷

Me yaco na yalomuni dauvakavinavinaka me veidusimaki ka vakalougatataka na nomuni veisiga kei na veibogi. Mo cakacakataka yani. O na raica ni na salamuria mai na veika totoka.¹⁸

E kaya na Turaga: “Mo reki ka marau, ia mo nanuma tiko na veiyalayalati ko sa cakava” [V&V 25:13]. Au vakabauta ni tukuna tiko vei keda yadudua, meda bula marau. Na kosipeli e ka ni reki. E vakarautaka vei keda e dua na inaki meda bula marau kina.¹⁹

Kakua ni guilecava o iko o cei. … Sai iko e dua dina na luve ni Kalou. … Sai Koya na Tamamu Tawamudu E lomani iko o Koya. … E gadreva o Koya mera bula marau na Luvena tagane kei na yalewa. Na ivalavala ca a sega vakadua ni bula marau. Na caka cala a sega vakadua ni bula marau. Na talaidredre a sega vakadua ni bula marau. Na sala ni bula marau e kune ena ituvatuva ni Tamada mai Lomalagi kei na talairawarawa ki na ivakaro ni Luvena Daulomani, na Turaga o Jisu Karisito.²⁰

Se cava na ituvaki ni iwalewale ni nomu ivakarau ni bula taumada, au solia vei kemuni e dua na bolebole … mo vakatudonutaka na nomu bula ki na ivakavuvuli ni kosipeli, ka raica na Lotu oqo ena loloma kei na veidokai ka vakavinavinakataka ni sa tina ni nomu vakabauta, ka mo bulataka nomu bula mo ivakaraitaki ni cava ena cakava na kosipeli i Jisu Karisito me kauta mai na bula marau ki vua e dua na tamata.²¹

iVakatakilakila

Na Hinckley kei ira na gonelalai

Na veivutuni sa dua vei ira na imatai ni ivakavuvuli ni kosipeli. Na veivosoti sa ivakatakilakila vakalou. E tiko na nomu inuinui. Sa tu e matamu na nomu bula, ka sa rawa me vakasinaiti ena bula marau, dina ga ke a vakacacani na nomu bula sa sivi ena ivalavala ca. Oqo na cakacaka ni veivakabulai kei na nodra vukei na tamata era vakaleqai tu. Na cava na inaki ni kosipeli?²²

Au sa sotava e vuqa na tamata era dau kudruvaka na bibi ni nodra itavi. E dina oqori ni levu sara na kena veivakaogai. Sa levu, ka rui levu sara, na ka me caka. E tiko na bibi ni leqa vakailavo ka laki kuria na veivakaogai oqo, ka mai salavata kina na noda sa kudruvaka, vakawasoma e vale, ka vakavuqa e tautuba. Moica donu mai na nomu vakasama. Na kosipeli sa itukutuku vinaka. Na tamata, me ra rawata na marau [raica na 2 Nifai 2:25]. Mo dau marau! Me na serau mai matamu na marau oqo ka me vosa ena nomu ivakadinadina. Mo namaka na leqa ena yaco mai. E dau yaco na leqa ena so na gauna. Ia e ramase tu ena loma ni veika kece oqo na vakamamasu ni Turaga:

“Dou lako mai vei au koi kemudou vakaaduaga sa oca ka colata na icolacola bibi ia kau na vakacegui kemudou.

“Vakataqara vei kemudou na noqui vua, ka vuli vei au, niu sa yalomalua ka yalomalumalumu: dou na kunea kina na vakacegu ni yalomudou.

“Ni sa rawarawa na noqu ivua ka sa mamada na noqu icolacola.” (Maciu 11:28–30.)

Au marautaka na vosa nei Jenkins Lloyd Jones au a taura mai ena dua na tikina ena Deseret News ena vica na yabaki sa oti. Meu na solia mada vei kemuni. … A kaya kina:

“O koya e nanuma ni bula dina na bula mamarau tudei sa na vakaotia na nona gauna ena veiciciyaki ka kakaila wavoki ni sa butakoci.

“E vuqa na polo era na sega ni curu rawa. E vuqa na lewe ni bulumakau e kaukauwa. E vuqa na gone era tubu cake mera laki tamata vinaka. E vuqa na vakamau gugumatua e gadrevi kina na veivosoti e cecere sara. E vuqa na cakacaka era vakavucesa. …

“Na bula oqo sa vaka e dua na ilakolako makawa ni sitima ni vanua—ena vakataotaki, muri tani, kuvu ni idini, kuvu ni qele, qilaiso boko, kei na ladelade, ka vakakina na rairai totoka ni vanua kei na totolo vakasauri ni sitima ni vanua.

“Na kena ki ga o ya mo vakavinavinakataka na Turaga ni ko sa vodo tiko.” (Deseret News, 12 June 1973.)

Meu tokaruataka, taciqu kei na ganequ, na kena ki o ya mo vakavinavinakataka na Turaga ni ko sa mai vodo tiko kina; ka dina sara, e sega beka ni vodo totoka dina? Marautaka! Mo matadredredre! Lagata na kena sere! Nanuma tiko na vosa nei koya a vola na Vakaibalebale:

“A loma daumarau sa wai yaga: ia na yalo sa mavoa sai vakamamaca ni sui.” (Vakaibalebale 17:22.)²³

Me tiko ena nomu bula e dua na ka e veivakamarautaki. Me tiko kina na matadredredre kei na mamarau, na yalo ni veilasamaki, kei na dredrevaka na veika lasa e dau yaco.²⁴

Ena veituvaki kece ni bula mo mamarau ka daudredre. Na bula e dodonu me rekitaki, ka sega walega ni gumatuataki tiko.²⁵

Au tu eke nikua niu tamata nuidei me baleta na cakacaka ni Turaga. Au sega ni vakabauta ni sa mai tauyavutaka na Kalou na Nona cakacaka me qai mai kasura. Au sega ni vakabauta ni sa malumalumu tiko mai. Au kila ni sa kaukauwa cake tikoga mai. … Sa noqu vakabauta rawarawa sara ka vakalou ni na qaqa na dodonu ka gugumatua na dina.²⁶

E dau vakauqeti au na kedrau italanoa o Kelepi kei Josua kei ira tale eso na yamata ni Isireli. A liutaki ira na luvei Isireli o Mosese ki na lekutu. Ena ikarua ni yabaki ni nodra lako voli, a digitaka o koya e dua na mata mai vei ira yadua na yavusa tinikarua mera laki vakadikeva na vanua o Kenani ka kauta lesu mai na itukutuku me baleta na ituvaki ni ivurevure e kea kei ira na kena tamata. A matataka na yavusa o Juta o Kelepi, kei Josua mai na yavusa o Ifereimi. E ratou a gole yani na tinikarua oqo ki na vanua o Kenani. E ratou a raica ni qele bulabula vinaka tu. E ratou a gole tu ena vasagavulu na siga. E ratou a kauta lesu mai eso na “vua ni vaini taumada” me ivakadinadina ni bulabula vinaka na qele o ya (Tiko Voli mai na Lekutu 13:20.)

E ratou sa mai tu e matai Mosese kei Eroni kei ira taucoko na ivavakoso luvei Isireli ka ratou kaya me baleta na vanua o Kenani, “Sa dina sara sa dave kina na wai-ni-sucu kei na oni; ia oqo na vuana” (t.27).

Ia e tini vei iratou na yamata oqo e ratou a sotava na vakatitiqa kei na rere e lomadratou. E ratou a mai solia e dua na itukutuku lasu ni kedra iwiliwili kei na ituvaki ni tamata e Kenani. E ratou a qai kaya ni “ra sa kaukauwa ia koi keda eda sa malumalumu” (t.31). E ratou kaya ni ra sa vodre ni vakatauvatani ki na veitamata yagolevu e ratou a raica ena vanua o ya. E ratou sa dui vakarerei iratou ga.

Rau sa qai tu o Josua kei Kelepi e matadra na tamata ka kaya, “Na vanua keitou a lakova, me keitou raica vakavinaka, sa vanua vinaka vakaidina.

“Kevaka sa rekitaki keda ko Jiova, ena vakayacori keda ki na vanua ko ya, ka solia vei keda; a vanua sa dave kina na sucu kei na oni.

“Ia ni kakua ni talaidredre vei Jiova, ni kakua talega ni rerevaki ira na lewenivanua, ni ra sa keda madrai: sa lako tani vei ira na nodra kaukauwa, a sa tiko kei keda ko Jiova: ni kakua ni rerevaki ira” (14:7–9).

Ia era sa vinakata cake na tamata mera vakabauti iratou na tini na dauvakatitiqa ka sega ni o Kelepi kei Josua.

Sa mani yaco me lewa na Turaga mera sa na veilakoyaki voli tikoga na luvei Isireli ena lekutu me vasagavulu tale na yabaki me yacova ni ra sa takali yani na nodra kawa o ira na dauvakatitiqa kei na daurere. E volai ena ivolanikalou ni “ko iratou na tamata ko ya, e ratou a ciba e na mate levu ena mata i Jiova.

“Ia e rau sa bula tikoga ko Josua … kei Kelepi … , na tamata ka laki raica na vanua” (t. 37–38). Sai rau ga ena ilawalawa o ya rau a bula tikoga ena loma ni vasagavulu na yabaki ni veilakoyaki voli ka yaco me rau laki curuma na vanua yalataki me baleta tiko na soli itukutuku ena qaqa.

Eda raica eso era voliti keda tu era duidui nanuma baleta na veisiga ni mataka ni cakacaka oqo, era sega ni kauwai, era veivakataotaki, era daurere, era vakayagataki gauna ena vakekeli ka ra vakavola na nodra malumalumu ka kena dina ni sega ni yaco kina e dua na ka. Era vakatitiqa baleta na veika sa yaco oti, ka sega vei ira na rai ki na veisiga ni mataka.

Sa dina sara na vosa makawa oqo, “Ni sa sega na ivakavuvuli, era sa rusa na tamata” (Vakaibalebale 29:18). E sega na tikina ena cakacaka oqo vei ira era vakabauta walega na kosipeli ni rusa kei na rarawa. Na kosipeli sa itukutuku vinaka. Sa itukutuku ni qaqa. Oqo e dua na inaki me ciqomi ena marau.

A sega ni kaya na Turaga ni na sega na leqa. Era sa sotava na wekada na veimataqali veivakararawataki sa vakakina sa yaco kivei ira era saqata na cakacaka oqo. Ia e laurai na vakabauta ena loma ni nodra rarawa taucoko. Na cakacaka oqo sa tudei tiko na kena toso tiko ki liu ka se bera vakadua ni bau vakasukasuka vakatekivu mai ena kena tauyavu. …

… Oqo na cakacaka ni Kalou Cecere. Na noda toso ki liu sa na vakatau sara tikoga kivei keda yadua. Ia na Lotu ena sega ni guce mena toso tiko ki liu. …

Ena gauna sa kauti Mosese kina na Turaga ki Vua, a qai kaya vei Josua, “Mo kaukauwa ka qaqa; mo kakua ni rere, se yalolailai: ni sa tiko vata kei iko ko Jiova na nomu Kalou e na veiyasana kecega ko sa lako kina” (Josua 1:9). Oqo na Nona cakacaka. Kakua ni guilecava. Ciqoma ena marau kei na yalololoma.²⁷

E ka ni rarawa ni yaco tiko ena noda vuravura oqo mera veitabaki sobu tiko na tamata. Ko ni kila tiko beka ni sega ni gadrevi na kaukauwa vakavuku me cavuti na vosa eso e rawa ni vakamavoataka e dua? Tovolea mada na kena veibasai. Tovolea mo vosavinaka mada. …

E ka ni rarawa ni tiko talega ena noda itikotiko raraba e vuqa vei keda eda vakayalolailaitaki keda ga. Eso eda sota kaya era vaka mera boletaki ira tikoga, ia na ka dina ni vuqa vei keda eda dauyalolailai. Na ka bibi ga mo kakua ni vakanananutaka. … Na ka bibi ga mo bula marautaka na veika kece sa tu vei keda.

Kakua ni vakaoti gauna ena vakalomalomani iko. Kakua ni vakayalolailaitaki iko. Kakua ni guilecava ni ko sa luvena na Kalou. Sa vakalou na nomu sucu mai. Sa tu vei iko na ituvaki dina sara ni Kalou.²⁸

Eda lagata “Au Luve ni Kalou,” (Sere ni Lotu, naba 185). Oqori e sega ni ka buli, e bulia o daunivucu—oqo na ka dina sara. E tiko vei keda e dua na ituvaki vakalou e dodonu me teivaki, e gadrevi me buroro cake mai, ka gadrevi me vakaveikilaitaki. Oi kemuni na tama kei na tina, ni vakavulica vei ira na luvemuni ni sai ira dina, vakamatata sara, na luvena tagane kei na yalewa na Kalou. E sega ni tiko e dua na dina levu cake mai na kena oqo e vuravura taucoko—ni da vakasamataka sa tu vei keda na ituvaki sa vakalou.²⁹

Vakabauti iko. Vakabauta na kemu ituvaki mo na cakava na veika cecere ka vinaka. Vakabauta ni sega na ulunivanua cecere cake mo na sega ni kabata rawa. Vakabauta ni sega na cava e kaukauwa cake mo na sega ni vorata rawa. … O iko o luvena na Kalou, sa tawamudu na kemu ituvaki.³⁰

Mo tu qaqa cake, tu vakacecere sara, ka mo vinaka cake sara. Vakuria na nomu sasaga. O na marau cake vakalevu. O na kila e dua na vakacegu vou, e dua na marau ki yalomu.³¹

E dina ni na yaco mai eso na leqa ena ilakolako oqo. Me na uabaleti na dredre ena yaco mai. Ia era na sega ni tiko vakadede. Ena sega ni [biuti] iko na Kalou. …

Rai ki na nuidei. Mo kila tiko ni sa wanonovi iko tiko o Koya, ka sa rogoca tiko na nomu masu ka na sauma mai, ka sa lomani iko o Koya ka na matanataka mai na loloma oqo.³²

Sa levu sara tu na veika kamica kei na ka savasava ka totoka meda na vakayavutaki kina. Eda sa votai ena kosipeli i Jisu Karisito. Na kosipeli sa “itukutuku vinaka!” Na itukutuku ni Turaga sa baleta na inuinui kei na veivakabulai! Na domo ni Turaga sa domo ni itukutuku vinaka! Na cakacaka ni Turaga sa cakacaka ni lagilagi kei na rawa-ka!

Ena auwa e butobuto ka veivakaleqai a kaya kina na Turaga vei ira e lomana: “Me kakua ni rarawa na yalomudou se rere.” (Joni 14 : 27.)

Na malanivosa cecere ni nuidei oqo sa bikeni kivei keda yadua. Kivei koya ga eda sa nuitaka tiko. Ni sa sega ni druka o koya kei na nona yalayala.³³

• Vakasamataka na ivakasala nei Peresitedi Hinckley meda “rai vakatitobu cake” ki na vinaka ka “teivaka e dua na ivakarau ni bula marau [kei] na yalo ni nuidei” (iwasewase 1). Na cava eda gadreva kina nikua na ivakasala oqo? Eda na teivaka vakacava e dua na ivakarau ni bula marau?

• A kaya o Peresitedi Hinckley ni na “salamuria mai na veika totoka” ena gauna eda “vakatara kina na yalo ni vakavinavinaka me dusimaki [keda]” (iwasewase 2). Na cava o nanuma e yaco me “salamuria mai na veika totoka”? O sa vakalougatataki vakacava ni tiko vei iko na yalo ni vakavinavinaka?

• Na cava nomu nanuma baleta na ibalebale ni bula ni sa vakataka na “ilakolako makawa ni sitima ni vanua”? (Raica na iwasewase e 3.) E veivakauqeti vakacava na “itukutuku vinaka” ni kosipeli ena nomu raica na ilakolako o ya?

• Na cava o nanuma ena vakayagataki vakacava ki na noda bula na kedrau italanoa o Kelepi kei Josua? (Raica na iwasewase e 4.) Na ivakaraitaki cava o sa bau raica vei ira na tamata era sa ciqoma na kosipeli ena marau? Keda vakila ni da sa yalolailai mai, eda na rawata lesu vakacava na yalo ni nuidei? Na veika cava sa vakalevutaka na yalomu nuidei me baleta na cakacaka ni Turaga?

• Na cava o nanuma sa yaco tikoga kina na veitabakisobu ena keda maliwa? E rawa beka vakacava me da lakosivita na itovo oqo? Na cava eda rawa ni cakava, oi keda yadua kei na matavuvale, meda vukei ira na tamata mera “tu qaqa cake” ka “tu vakacecere sara”? (Raica na iwasewase e 5.)

Joni 16:33; Filipai 4:13; Mosaia 2:41; Alama 34:38; Ica 12:4; V&V 19:38–39; 128:19–23

“Na cakacakataki ni veika ko sa vulica ena vakaikuritaka ka vakarabailevutaka na kilaka (raica na Joni 7:17)” (Vunautaka na Noqu Kosipeli [2004], 21). Navuca ni vakatarogi iko se o na vakayagataka vakacava na vulici ni kosipeli e vale, ena vale ni cakacaka, kei na nomu itavi eso vaka-Lotu.