Wase 9

Na iSolisoli Talei ni iVakadinadina

“Eda vosataka na duivosavosa. Eda bula donuya na veimataqali ivakarau. Ia ena lomada yadua e tukituki voli kina e dua na ivakadinadina matau.”

Na Bula nei Gordon B. Hinckley

“Na gauna sara eliu au vakila rawa kina na nanuma vakayalo e so,” a kaya o Peresitedi Gordon B. Hinckley, “oya niu se qai yabaki lima, ka dua sara na gonetagane lailai. Au a tagi voli ena mosi ni daligaqu. … A vakarautaka o tinaqu e dua na taga masima ka biuta ena sitovu me vakatakatari. A tabaka vakamalua na uluqu o tamaqu ka vakalougatataki au, ni vakasava voli na mosi kei na baca mai na dodonu ni lewa ni matabete tabu kei na yaca i Jisu Karisito. A qai tauri au cake vakamalua o koya ena ligana ka biuta na taga masima katakata ki na daligaqu. A ruru na mosi ka yali sara. Au a moce sara ena iroqo ni loloma i tamaqu. Niu moce voli, a ciri koto ena noqu vakasama na vosa e so ni nona veimasulaki. Oya na nanuma vakailiu sara e tiko vei au me baleta na cakacakataki ni dodonu ni lewa ni matabete ena yaca ni Turaga.

“E muri vakaitabagone, au a moce vata kei taciqu ena dua na rumu ni moce sega ni vakatakatari rawa ena vulaibatabata. … Ni bera na davo yani ena dua na imocemoce katakata, keirau a tekiduru ena masu. Keirau a talaucaka na neirau vakavinavinaka cecekia. … Au nanuma na noqu ladeva na noqu imocemoce ni oti ga na noqu vakaemeni, ka vakaitutuvi ki na domoqu, ni vakananumi na ka au se qai cakava oti ena noqu veivosaki vata kei na Tamaqu mai Lomalagi ena yaca ni Luvena. Au a sega ni taukena e dua na kilaka levu vakosipeli. Ia a tiko e so na mataqali veivakacegui kei na veivakadeitaki ena veitaratara vata kei lomalagi ena vuku ni Turaga o Jisu. …

“Na ivakadinadina oya a tubu e lomaqu vaka-daukaulotu niu wilika na Veiyalayalati Vou kei na iVola i Momani, ka rau kuria na Nona vakadinadinataki. A yaco me yavu ni noqu bula na kilaka oya, ka vakadeitaki tu ena veimasu saumi kece ni noqu bula vagone. Sa tekivu mai kea na tubu voli ni noqu vakabauta. Au sa mai dua na Nona iApositolo, digitaki me cakava na Lomana ka vakatavulica na Nona vosa. Au sa mai dua na Nona ivakadinadina ki vuravura.”¹

Vakataka na Yalododonu Edaidai, eda sa duavata ena noda ivakadinadina me baleti Jisu Karisito.

iVakavuvuli nei Gordon B. Hinckley,

Sa vu kaukauwa levu ni Lotu na ivakadinadina ka sa ivurevure savasava ni vakabauta kei na itaviqaravi.

Sa yaco meda dua na matavuvale levu ka robota taucoko na vuravura oqo. Eda vosataka na duivosavosa. Eda bula donuya na veimataqali ivakarau. Ia ena lomada yadua e tukituki voli kina e dua na ivakadinadina matau: O sa kila vata kei au ni bula tiko na Kalou ka sa liutaka voli na Nona cakacaka tabu oqo. Eda kila ni sa noda Dauveivueti o Jisu, ka sa duri tu me ulu ni Lotu oqo e sa vakayacani vei Koya. Eda kila ni sa parofita o Josefa Simici ka sa dua na parofita e duri tu ena ulu ni icavacava ni itabagauna oqo. Eda kila ni a vakalesui mai ki vua na matabete ka sa sirovi keda mai edaidai ena dua na isema e tawacavuka rawa. Eda kila ni iVola i Momani e sa dua na ivakadinadina bula me baleta na ituvaki dina kei na ilesilesi vakalou i Jisu Karisito.²

Na ka oqo eda vakatoka me ivakadinadina sa vu kaukauwa levu ni Lotu. E sa ivurevure savasava ni vakabauta kei na itaviqaravi. … E sa ka dina ka kaukauwa sara me vaka e dua na ilawalawa e vuravura. A vakamacalataka na Turaga ena Nona vosa vei Nikotimo ka kaya, “Sa liwa na cagi ki na yasana sa digitaka, ia ko sa rogoca na kena rorogo, ka sega ni kila na yasana sa lako mai kina, se na yasana sa lako yani kina: sa vaka talega kina ko koya yadua sa sucu ena Yalo Tabu” (Joni 3:8). Na ka oqo eda vakatoka me ivakadinadina sa dredre me vakamacalataki, ia sa matata deivaki tu na vuana. Sa ikoya na Yalo Tabu ka vakadinadinataka vei keda.³

Na ivakadinadina sa dua na domo malumu ka veivakauqeti, e tokoni keda ni da lako voli ena vakabauta ka vakamasuti keda meda cakacaka.

Na noda ivakadinadina sa ile ka vukici ira na tamata mai na nodra itovo ni bula ni ra lako mai ki na Lotu oqo. Oqo sa vu ni ka e vakayaloqaqataki ira na lewenilotu mera vakanadakuya na ka kecega ena veiqaravi kivua na Turaga. Oqo na domo malumu ka veivakauqeti, e tokoni ira tawacegu rawa na lako voli ena vakabauta ki na icavacava ni siga ni nodra bula.

E sa dua na ka veivakurabuitaki ka totoka, e dua na isolisoli mai vua na Kalou ki na tamata. E ulabaleta na iyau se bula vakaloloma ni dua sa kacivi me veiqaravi. Na ivakadinadina oqo ka sa tiko ena lomadra na wekada sa vakayaloqaqataka e dua na qaravitavi veivakamasuti. E sa kune vei ira na itabagone kei na qase. E sa kune vua na gonevuli ni semineri, ena daukaulotu, vua na bisopi kei na peresitedi ni iteki, vua na peresitedi ni kaulotu, vua na sisita ni iSoqosoqo ni Veivukei, ena Vakaitutu Raraba kece sara. E sa rogoci mai vei ira ka sega ni vakailesilesi ka ra lewenilotu ga. E sa ilutua saraga ni cakacaka oqo. Sa ikoya na ka e tosoya tiko ki liu na cakacaka ni Turaga e vuravura taucoko. E veivakamasuti me cakacakataki. E cikeva meda cakava na ka e tukuni vei keda. E kauta vata mai na veivakadeitaki ni sa vakainaki na bula, ni so na ka e sa bibi vakalevu cake mai na ka tale e so, ni da sa tiko ena dua na ilakolako tawamudu, ka da na saumitaro kivua na Kalou. …

Sa ikoya na vu ni ka oqo, malumalumu ka rairai wamalai vakailiu, e tosoi ira na dauvakatataro ki na igolegole ni saumaki. E biligi ira na sa saumaki ki na dei ni vakabauta. …

Na vanua cavaga e tauyavutaki kina na Lotu e na vakilai na kena kaukauwa. Eda duri ena yavada ka kaya ni da sa kila. … Na ka dina taucoko oya ni da sa kila ni bula na Kalou, ni o Jisu na Karisito, ka sa ikoya oqo na nodrau sasaga kei na nodrau matanitu. Era rawarawa na vosa; na ivakaraitaki e lako mai na lomada. E sa dau cakacaka ena vanua cavaga e tauyavutaki kina na Lotu, na vanua cavaga era vakatavulica voli kina na kosipeli na daukaulotu, na vanua cavaga era wasea voli kina na nodra vakabauta na lewenilotu.

Sa ikoya na ka e sega ni rawa ni vakalasui. Era na rairai wilika na vosanikalou na dauveisaqa ka veibataka tawayalani na ivunau. Sa rawa ni ra matai sara ka veirawai. Ia na gauna e kaya kina e dua, “Au kila,” sa sega tale ni dua na kena veiba. Ena rairai sega beka na veivakadonui, ia o cei e rawa ni vakalasuya se cakitaka na domo malumu ni yalo eloma ni vosa voli ena veivakadeitaki?⁴

“Rarama ki na neitou bula”

O [David Castañeda], na watina, o Tomasa, kei na luvedrau a vakaitikotiko ena dua na loma ni vanua ni teitei lailai ka mamaca volekati Torreón [e Mexico]. Ratou taukena e 30 na toa, 2 na vuaka, kei na 1 na ose lila. Era vakalutuka e vica na yaloka na toa me tokoni iratou ka vakavurea na sasaga ni rawailavo vagauna. Ratou a bula voli vakaloloma. A qai sikovi iratou yani na daukaulotu. A kaya o Sisita Castañeda, “Rau a kauta tani na daukaulotu na veika a vakamatabokotaka tu na matai keitou ka kauta mai na rarama ki na neitou bula. Keitou a sega ni kila e dua na ka me baleti Jisu Karisito. Keitou a sega ni kila e dua na ka me baleta na Kalou me yacova na nodrau basika mai.”

A vuli o koya me rua na yabaki, o watina e sega. Rau a vakatavulici iratou na daukaulotu, ka yaco sara me ratou papitaiso. … Ratou a taracake vakamalua e dua na bisinisi rawati koya ka a cakacaka kina o tama kei na lima na luvena tagane. Ena vakabauta walega ratou a sauma na nodratou ikatini. Ratou biuta na nodratou veivakabauti kivua na Turaga. Ratou bulataka na kosipeli. Ratou veiqaravi ena vanua cavaga ratou sa kacivi kina, A kaulotu e va na luvedrau tagane kei na tolu na luvedrau yalewa. … Ratou a vakatotogani mai vei ira na nodratou dauvakaucaca. Sa nodratou isaunitaro na ivakadinadina ni kaukauwa ni Turaga ena nodratou bula.

Rauta ni 200 na nodratou matavuvale kei na itokani era sa lewena na Lotu mai na nodratou veivakayarayarataki. Sivia e 30 na luve tagane kei na yalewa ni matavuvale kei na itokani era sa veiqaravi oti vakaulotu. Era a solia na vanua ka sa toka kina oqo e dua na valenilotu.

Era dau veisau na gone, ka sa matua mai oqo, kei na itubutubu ni lako yani ki Mexico City ena veivula, mera cakacaka e kea ena valetabu. Era duri tu mera ivakadinadina bula ena kaukauwa levu ni cakacaka oqo ni Turaga me laveta ka veisautaka na tamata. Era sa tautauvata e udolu vaka-udolu e vuravura taucoko ka sa sotava na cakamana ni vakabauta vaka-Momani me ivakadinadina ni cakacaka vakalou e lako mai ki na nodra bula.⁵

“E sa dina, se vaevei? Na cava tale sa qai vo?”

Au a sotava e dua na vakailesilesi ni mataivalu e wai mai na dua na matanitu yawa, e dua na turaga gone vuku ka a kau mai ki Amerika me baleta na vakatorocaketaki ni veituberi. E so na nona ilawalawa ena Mataivalu e Wai ni Amerika, ka a maleleti koya na nodra itovo, a wasea vei koya ena nona kerekere na nodra vakabauta vakalotu. A sega ni lotu va-Karisito o koya, ia a makututaka. Era a tukuna vua me baleta na iVakabula kei vuravura, o Jisu Karisito, ka sucu e Peceliema, ka a solia na nona bula me baleta na kawatamata kecega. Era a tukuna vua me baleta na rairai mai ni Kalou, na Tamada Tawamudu, kei na Turaga sa tucaketale kivua na gonetagane o Josefa Simici. Era tukuni ira na parofita ena gauna oqo. Era vakatavulici koya ena kosipeli ni Vakavuvuli. A tara na utona na Yalotabu, ka sa mani papitaiso.

A vakatakilai vei au o koya ni bera toka na nona lesu tale ki na nona vanua dina. Keirau a veitalanoataka na veika oqo, kau qai kaya: “Era sega ni lotu va-Karisito o ira na nomu tamata. Na cava ena yaco ni ko sa lesu ki vale ka sa lotu va-Karisito, ka, vakabibi cake, e dua na Momani lotu va-Karisito?”

A vakaturubuto na matana, ka sauma lesu, “Ena rarawa na noqu matavuvale. Eratou na vakasavi au tani beka ka wiliki au me vaka niu sa mate. Me baleta na noqu veisiga ni mataka kei na noqu bula, sa na tasogo beka vei au na madigi kece sara.”

Au taroga, “O sa tu vakarau beka mo sotava na veika kece oqori ena vuku ni kosipeli?”

Na yaloka ni matana buto, ka tonawanawa ena wainimata, a seraka mai na totoka ni rairai ni matana ena nona sauma, “E dina, se vakaevei?”

Ena noqu madua ni taroga voli na taro, au a sauma lesu, “Io, e dina.”

Ka a sauma kina o koya, “Na cava tale sa qai vo?”

Oqo na veitaro au sa via biuta toka mai vei iko: “E dina, se vaevei? Na cava tale sa qai vo vakaidina?”⁶

Dua na iyaloyalo vou ni bula

Au a rogoca ena dua na gauna na ka a sotava e dua na idinia ka se qai lewena walega na Lotu. A sikova yani na nona itikotiko o rau na daukaulotu, ka a sureti rau eloma na watina. A tautauri vagumatua sara o koya ki na nodrau itukutuku, ni sa vakila o vunituraga ni sa dreti mai na ka e dau lomana voli. Dua na bogi a vakaraitaka o vunimarama ni sa vinakata me papitaiso. A cudru saraga vakalevu o vunituraga. E sega li ni kila o koya na ka ena vakavuna oqo? Oqo ena vakavuna na gauna. Oqo ena vakavuna na saumi ni ikatini. Oqo ena vakavuna na vakayali ni nodrau itokani. Oqo ena vakavuna me sega tale na vakatavako. A daramaka o koya na nona kote ka gole ki tautuba ena lomaloma ni bogi, ni sogota vakaukauwa na katuba e dakuna. A lakova o koya na gaunisala, ka vosacataka voli na watina, vosacataki rau voli na daukaulotu, vosacataki koya voli ni vakatara me rau vakatavulici rau. Ni sa wawale mai sa malumu sobu na nona cudru, ka vaka me basika mai ki lomana e dua na yalo ni masumasu. A masu o koya ni lako voli. A vakamasuta na Kalou ena dua na isaunitaro ki na nona taro. Ka qai dua na ka matalia, e matata ka sega ni wasei rawa, a lako mai voleka ni vaka ga e dua na domo e vosataka na veivosa e kaya, “E dina.”

“E dina,” a kaya ki vua o koya ka kaya tale. “E dina.” A curuma na lomana na vakacegu. Ni sa gole lesu ki vale o koya, na veivakataotaki, na cikecike, na veika e vinakati ka a dau yalokatakata tu kina o koya sa tekivu rairai mai me vaka na madigi e so. Ni dolava o koya na katuba, a raici watina o koya ni tekiduru voli ena masu.

… Kivei ira na ivavakoso a tukuna kina o koya na ka oqo, a vosataka o koya na yalomarau e sa lako mai ki na nodrau bula. A sega ni dua na leqa na ikatini. Na wasei ni veika e tu vei rau vata kei na Kalou, ka sa solia kece kivei rau, sa vaka me lailai ga. A sega ni dua na leqa na gauna ni veiqaravi. Oqo a gadrevi ga kina e dua na qaqarauni lailai ni vakayagataki aua ena veimacawa. A sega ni dua na leqa na qaravitavi. A basika mai kina na tubu kei na dua na yaloyalo vou ni bula. Na turaga kilaka oqo ka dauveituberi, na idinia ka sa matau tu vua na tutaki ni veika vakayago ni vuravura eda bula tu kina, a vakadinadinataka ena mata tagitagi na cakamana e sa mai yaco ki na nona bula.⁷

“O cei e rawa ni vakalasuya se cakitaka na domo malumu ni yalo eloma ni vosa voli ena veivakadeitaki?”

“Na ka uasivi duadua ena noqu bula“

Ena vica na yabaki sa oti a vosa e dua na marama gone kilai levu vakavuli e Berchtesgaden, Jamani, ki na dua na koniferedi ni tamata ena mataivalu era a lewe ni Lotu. Au a tiko ekea ka rogoci koya. E a dua na metia o koya ena mataivalu, e vuniwai, ka dua na kenadau e dokai sara vakalevu ena nona qaravitavi. E kaya o koya:

“Mai na levu ni veika tale e tu e vuravura au sa vinakata meu qarava na Kalou. Ia se vakacava na levu ni noqu sasaga au sega ni rawa ni kunei koya. Na cakamana ni ka kece oqo oya ni a kunei au o koya. Dua na yakavi ni Vakarauwai ena Sepiteba 1969 au a tiko e vale e Berkeley, California, ka rogoca ni taqiri na lali ni noqu katubalevu. E a tu ekea e rua na cauravou, vakaisulu vinaka tu, ena sote vulavula kei na neketai. A seru vinaka tu na uludrau. Au a kurabuitaki rau sara ga ka mani kaya: ‘Au sega ni kila na ka drau volitaka tiko, ia au na volia.’ A kaya e dua vei rau na cauravou: ‘Keirau sega ni volitaka tiko e dua na ka. Keirau na daukaulotu ni Lotu i Jisu Karisito ni Yalododonu Edaidai, ka keirau via veivosaki vata kei iko.‘ Au a sureti rau mai ki loma, ka rau wasea na nodrau vakabauta.

“Oqo e sa itekitekivu ni noqu ivakadinadina. Au sa vakavinavinaka ena vosa tawatukuni rawa ki na madigi kei na veidokai ni mai lewena tu na Lotu i Jisu Karisito ni Yalododonu Edaidai. Na reki kei na vakacegu e kauta mai ki na lomaqu na kosipeli marautaki oqo e sa lomalagi e vuravura. Na noqu ivakadinadina ni cakacaka oqo e sa ka taleitaki vakaoti ena noqu bula, sa dua na isolisoli mai vua na Tamaqu Vakalomalagi, kau na dau vakavinavinakataka me tawamudu.”⁸

Sa vakakina kivei ira na drau vakaudolu ena vuqa na vanua—turaga kei na marama kilai levu ka dauveituberi, ena bisinisi kei na cakacaka tale e so, era gugumatua, [tamata] dausasaga ka ra cakava na veika ena cakacaka ni vuravura, ka sa bue e lomadra e dua na ivakadinadina lo ni sa bula na Kalou, ni sa Karisito o Jisu, ni sa ka-vakalou na cakacaka oqo, ni sa vakalesui mai ki vuravura me vakalougatataki ira taucoko ka na vakayagataka na kena veimadigi.⁹

Sa rawa ni da rawata yadua e dua na ivakadinadina me baleta na veika dina ni Kalou kei na Luvena Daulomani kei na vakalesui mai ni Nodrau cakacaka.

Na ivakadinadina oqo, na ivakadinadina oqo, sa rawa ni ka taleitaki duadua ena isolisoli taucoko ni Kalou. E sa dua na veivakatikori vakalomalagi ni sa tiko na sasaga dodonu. E sa madigi, e sa itavi ni turaga kei na marama kecega ena Lotu oqo me rawata vakaikoya e dua na veivakadeitaki me baleta na dina ni cakacaka levu oqo edaidai ka vakakina o ira ka veiliutaki, io na Kalou bula kei na Turaga o Jisu Karisito.

A dusia o Jisu na sala me baleta na rawati ni ivakadinadina vakaoya ena Nona kaya: “Sa sega ni noqu na noqu ivakavuvuli, sa nona ga ka talai au mai.

“Kevaka e dua na tamata sa via cakava na lomai koya, ena kila se sa ka mai vua na Kalou na ivakavuvuli, seu vosa vakai au ga” (Joni 7:16–17).

Eda tubu ena vakabauta kei na kilaka ni da veiqaravi, ni da vuli, ni da masu.

Ni vakani ira na 5,000 o Jisu era a vakila ka vakilakila na cakamana a vakayacora o Koya. E so era lesu tale mai. Kivei ira oqo a vakatavulica o Koya na ivunau ni Nona bula vakalou, me baleti Koya ni sa Madrai ni Bula. A beitaki ira o Koya ena nodra sega ni maleleta na ivunau ia ena vakacegui walega ni walokai ni yagodra. E so, ni rogoci Koya voli kei na Nona ivunau, a kaya, “A vosa dredre oqo; ko cei sa vakabauta rawa?” (Joni 6:60). O cei e rawa ni vakabauta na ka e vakatavulica voli na tamata oqo?

“A ka oqo era sa suka tani kina e le vuqa vei ira na nona tisaipeli, a ra sa sega tale ni lako vata kaya.

“Sa qai kaya ko Jisu vei ira na lewe tinikarua [noqu vakasama ena nanuma e so ni yalolailai], Dou sa via lako tani talega koi kemudou?

“Sa qai kaya vua ko Saimoni Pita, Kemuni na Turaga, keitou na lako vei cei? Sa tu ga vei kemuni na vosa ni bula tawamudu.

“Ia keitou sa vakabauta ka kila ni sai kemuni na Karisito, na Luve ni Kalou bula” (Joni 6:66–69).

Oqo na taro levu, kei na isau vakakina, sa dodonu meda na sotava taucoko. Ke sega vei Kemuni, qai “Kemuni na Turaga, keitou na lako vei cei? Sa tu ga vei kemuni na vosa ni bula tawamudu. Ia keitou sa vakabauta ka kila ni sai kemuni na Karisito, na Luve ni Kalou bula.”

Sa ikoya na veidinadinati oqo, na veivakadeitaki lo eloma oqo ni ituvaki vakaidina ni Kalou bula, na ka vakalou ni Luvena Daulomani, na vakalesui mai ni nodrau cakacaka ena gauna oqo, kei na veivakatakilai lagilagi e sa muria mai ka sa yaco oqo me noda yavu ni vakabauta yadua. Sa yaco oqo me noda ivakadinadina.

… Au a talevi Palmyra, e Niu Ioka wale tikoga oqo [volekata na vanua a ciqoma kina na imatai ni raivotu o Josefa Simici]. Ena veika a yaco ena yasana oya, sa muataka e dua me kaya: “Era a yaco se era sega ni yaco. Ena sega ni rawa ni dua na yasana dravu, sega na tikina eloma.”

Sa qai vakasolokakana na domo ni vakabauta: “E a yaco taucoko. E a yaco me vaka ga a kaya o koya ni yaco.”

Na Ulunivanua o Kumora e volekata tu. Mai kea a basika mai kina na ivolatukutuku makawa ka a vakadewataki kina na iVola i Momani. Sa dodonu me vakadonuya se vakacala e dua na kena yavu vakalou. Na veidutaitaki ni vakadinadina sa dodonu me muataka na turaga kei na marama ka sa wilika ena vakabauta me kaya, “E sa dina.”

Ka sa vakakina ena vu ni ka tale e so ka veivakurabuitaki oqo eda sa vakatoka na vakalesui mai ni kosipeli makawa, na matabete makawa, kei na Lotu makawa.

Sa yaco na ivakadinadina oqo, me vaka tu ga kina mai liu, me dua na itukutuku, me dua na veivakadeitaki vakadodonu ni dina me vaka eda sa kila.¹⁰

Sa dodonu meda bulataka na noda ivakadinadina ka wasea kivei ira tale e so.

A kaya o Paula vei Timoci: “Vakaraici iko vinaka”—rogoca oqo—“kei na ivakavuvuli; tudei kina, ni ko sa kitaka vakaoqo ko na vakabulai iko kei ira talega era sa rogoci iko.” (1 Timoci 4:16). Sa dua na ivakasala totoka e solia o Paula vei Timoci.

A vakuria o koya ena nona kaya: “Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma, kei na yalomatua“ (2 Timoci 1:7). Sa sega ni solia mai vei keda na Kalou na yalo ni rere, a yalo ni kaukauwa ga—na kaukauwa ni itukutuku; kei na yalololoma—na loloma me baleti ira na tamata, na loloma ena ka meda solia; na yalomatua—na ivakavuvuli rawarawa kilai vakamatata tu ni kosipeli vakalesui mai i Jisu Karisito.

“O koya mo qai kakua ni maduataka na kena itukutuku ni noda Turaga” (2 Timoci 1:8). Kakua, kemuni na taciqu kei na ganequ, ni maduataka na kena itukutuku na noda Turaga. … Oqo e dua na ivakaro levu, e dua na ivunau e sa vakataqari kivei keda: “Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma, kei na yalomatua. O koya mo qai kakua ni maduataka na kena itukutuku ni noda Turaga.”¹¹

Oqo na cakacaka tabu ni Kalou. Oqo na Nona Lotu kei na matanitu. Na raivotu ka a yaco ena Veikau Vakatabui sa ikoya saraga na ka e kaya o Josefa a vakakina. Sa tiko e lomaqu e dua na dina ni kena kilai vakamatata na bibi ni veika a yaco ekea. Na iVola i Momani e sa dina. E sa vakadinadinataka na Turaga o Jisu Karisito. Sa vakalesui mai na Nona matabete ka sa tiko vei keda. Na idola ni matabete oya, ka sa lako mai vei ira na tamata vakalomalagi, e sa cakacakataki me baleta na noda veivakalougatataki tawamudu. Sa vakakina na noda ivakadinadina—nomu kei na noqu—e dua na ivakadinadina meda na bulataka ka wasea kivei ira tale e so. Au biuta mai na ivakadinadina oqo, noqu veivakalougatataki, kei na noqu loloma kivei kemuni yadua kei na noqu veisureti meda tomana voli meda tiki ni cakacaka mana levu oqo edaidai sa vakatokai Na Lotu i Jisu Karisito ni Yalododonu Edaidai.¹²

Vakatutu ni Vuli kei na Veivakavulici

Taro

Ena sala cava soti e veivuke kina na nomu ivakadinadina ki na vaqaqacotaki ni Lotu? (Raica na iwasewase e 1.)
E vakadreta o Peresitedi Hinckley ni ivakadinadina e tokoni keda ka “vakamasuti [keda] meda cakacaka” (iwasewase e 2). E sa tokoni iko vakacava na nomu ivakadinadina? E sa vakayarayarataki iko vakacava na nomu ivakadinadina mo cakacaka? Na cava na ka e so o rawa ni cakacakataka mai na italanoa ena iwasewase e 2?
Na cava e rawa ni da vulica mai na ivakavuvuli nei Peresitedi Hinckley me baleta na rawati ni dua na ivakadinadina? (Raica na iwasewase e 3) Na cava soti o sa sotava ka sa vukei iko mo rawata na nomu ivakadinadina? Na cava eda rawa ni cakava meda vaqaqacotaka kina na noda ivakadinadina?
Cava na vuna o nanuma kina ni qaqaco vakalevu cake na noda ivakadinadina ni da wasea? O sa ulabaleta vakacava na vakanananu e so ni rere me baleta na wasei ni nomu ivakadinadina? O sa vakalougatataki vakacava mai na nodra ivakadinadina tale e so? (Raica na iwasewase e 4)

iVolanikalou Veisemati

1 Korinica 12:3; 1 Pita 3:15; Alama 5:43–46; 32:26–30; Moronai 10:3–5; V&V 8:2–3; 80:3–5

Veivuke ena Vuli

“Ni o sa mai kilai ira na tamata yadua, ena vinaka sara na itovo ni nomu vakavakarau ka vakavulica na lesoni e ganita na veika era dui gadreva me baleta na ituvaki ni tamata yadua. Na kila oqo ena vukei iko mo vakaqara na sala mera veitomani kina na lewenikalasi ena veivosakitaki ni lesoni kei na vakatovotovo tale e so” (Veituberi, Me iLutua ni Noda Bula [1999], 38).