Mataupu 16

Faaipoipoga—O Se Paaga e Faavavau

“O le [mafutaga] faapaaga aupito sili o le olaga o loo i ai lea i le faaipoipoga—o lena mafutaga e tumau ma faavavau lona taua.

Mai le Soifuaga o Howard W. Hunter

Ina ua 20 tausaga o Howard W. Hunter, sa la feiloai ma Claire Jeffs i se siva a le Ekalesia i Los Angeles, Kalefonia, a o tafafao faamasani o ia ma se tasi o uo [a Howard]. Ina ua maea le siva, sa o nisi o le au talavou matutua e feausi i le sami. Sa leiloa le fusiua o Howard, ma sa ofo atu Claire la te savavali i le matafaga e sue. Na faamatala e Howard mulimuli ane, “O le isi taimi na matou tafafao ai, sa ou aveina ai Claire, ae o [la’u uo] ma se isi tamaitai.”¹

O le tausaga na sosoo ai, na amata ai ona faateteleina a la’ua evaga faamasani, ma i se afiafi o le tautotogo pe toeitiiti atoa le tolu tausaga mulimuli ane talu ona la feiloai, sa ave ai e Howard ia Claire i se nofoaga matagofie e iloa atu ai le vasa. Sa ma [matamata] i galu o fafati mai le Pasefika ma fesasaa’i i luga o papa i le susulu o le masina,” na ia tusia ai. O le po lena na faamalamalama ai Howard ia [Claire] la te faaipoipo, ma sa taliaina ai e Claire. “Sa ma talanoa e uiga i a ma fuafuaga,” o lana tala lea, “[ma] sa ma faia le tele o faaiuga i lena po ma ni tonu malolosi e faatatau i o maua olaga,”²

Sa faaipoipo Howard ma Claire i le Malumalu o Sate Leki i le aso 10 o Iuni, 1931. I le isi 52 tausaga, sa faalolotoina lo la’ua alofa a o la tausia o la’ua atalii, galulue i le Ekalesia, ma feagai ma o la’ua luitau ma le faatuatua.

O lo la’ua fiafia o se ulugalii, sa iloa gofie i lo latou aiga. Fai mai Robert Hunter, le atalii ulumatua o se tasi o le la fanau: “Pe a ou mafaufau ia Tamamatua o Hunter, ou te mafaufau e sili atu i lo se isi lava mea, o se faataitaiga o se tane alofa. … E mafai lava ona e lagonaina se noataga alofa i le va o le toalua lena.³

O le alofa o Peresitene Hunter mo lona faletua sa sili ona iloagofie a o ia tausia o ia i le sefulu tausaga mulimuli o lona soifua, a o tauivi o ia ma ni faafitauli tuga o lona soifua maloloina. Ina ua maliu Claire i le aso 9 o Oketopa, 1983 o se ta nutimomoia lea ia Peresitene Hunter.⁴Sa ia tusia e faapea, ina ua ia taunuu atu i le fale i le aso sa maliu ai o ia, “sa foliga malulu le fale, ma a o ou savalivali solo, sa faamanatu mai e mea uma o ia ia te au.⁵

Ina ua mavae le toeitiiti fitu tausaga, sa toe faaipoipo Peresitene Hunter ia Inis Stanton ia Aperila 1990. Sa faatinoina e Peresitene Gordon B. Hinckley le sauniga i le Malumalu i Sate Leki. O Inis o se punavai o le mafanafana tele ma se malosiaga ia Peresitene Hunter i le taimi o lana auaunaga o se Peresitene o le Korama a le Toasefululua ma le Peresitene o le Ekalesia. Sa la malaga faatasi i le tele o ana malaga e feiloai ma le Au Paia i le lalolagi atoa.

Sa ta’ua e Elder James E. Faust o le Koama a le Toasefululua le avea o Inis ma faamanuiaga ia Peresitene Hunter: “Ina ua mavae le maliu o [Claire], sa avea o se taimi tuulafoaiina mo le tele o tausaga seia oo ina ua ia faaipoipo atu ia Inis. Sa la fefaasoaai faatasi le tele naua o ni manatuaga fiafia ma ni aafiaga.” Ona ia saunoa lea e faatatau ia Sister Hunter, “E le lava a matou upu e ta’u atu ai ia te oe Inis, lo matou faafetai tele, mo la oulua mafutaga ma lou alofa ma lau tausiga tuuto mo ia. Ua e faafiafia ia te ia ma e aumaia le olioli ia te ia i toe tausaga o lona soifua ma lana galuega.”⁶

“I totonu o le malumalu tatou te maua ai sauniga aupito maualuluga e avanoa mo alii ma tamaitai, o le faamauga o tane ma ava faatasi e faavavau.”

O aoaoga a Howard W. Hunter

O le faaipoipoga i le va o se tane ma se ava e faauuina e le Atua ma ua faamoemoe ia faavavau.

Ua fuafuaina e le Alii le faaipoipoga mo i tatou. Na ia fetalai ane “O le mea lea e tuua ai e le tane o lona tama ma lona tina ae faatasi ma lana ava: ona avea lea o i laua o le tino e tasi”(Mataio 19:5).⁷

O le [mafutaga] faapaaga aupito sili i le olaga o loo i ai lea i le faaipoipoga—o lena mafutaga e tumau ma faavavau lona taua.⁸

Faatasi ai ma le silafia i le fuafuaga o le faaolataga e fai ma faavae, o se alii e umia le perisitua e vaavaai atu i le faaipoipoga o se avanoa paia ma o se matafaioi. E le lelei ona mau toatasi se tane po o se fafine. E le atoa le tane e aunoa ma le fafine. E le mafai foi e se tasi ona faaatoa le mea na foafoaina ai o ia e aunoa ma le isi (tagai 1 Kori. 11:11; Mose 3:18). O le faaipoipoga i le va o le tane ma le fafine ua faauuina e le Atua (tagai MF&F 49:15–17). E na o le feagaiga fou e faavavau o le faaipoipoga e mafai ai ona la iloa le atoaga o faamanuiaga e faavavau (tagai MF&F 131:1–4; 132:15–19).⁹

O le faaipoipoga e tele ina faatatau i ai o se mafutaga faapaaga ma le Atua. Ua le na o se muagagana. Afai e tumau le malosi ma le olaola o lenei mafutaga faapaaga, o le a alofa le tane ma le fafine o le tasi i le isi, ma o le a oo ai i lo la’ua aiga se mafana ma le alofa, o le a manuia ai e faavavau. ¹⁰

O le uluai faaipoipoga na faatinoina e le Alii. O se faaipoipoga e faavavau aua sa leai se mea e igoa o se taimi ina ua faia lena sauniga. Sa faatinoina le sauniga mo se ulugalii e lei oo i ai le oti i lena taimi; ma o lea, ona o na tulaga sa i ai, o le a le muta ai lava le sootaga. Ina ua mavae le pa’u, sa tutuliesea o tatou uluai matua mai le Faatoaga. Ona oo ai lea o le oti ia te i la’ua, ae sa folafola atu ia te i la’ua le toetutu. E leai se taimi na fai mai ai faapea, e tatau ona muta la la’ua faaipoipoga e faavavau. ¹¹

I totonu o le malumalu tatou te maua ai sauniga aupito maualuluga e avanoa mo alii ma tamaitai, o le faamauga o tane ma ava faatasi e faavavau. Matou te faamoemoe o le a le taliaina e o tatou tupulaga talavou se mea e itiiti ifo nai lo se faaipoipoga i le malumalu. ¹²

Pei lava ona avea ai le papatisoga o se poloaiga a le Alii, e faapena foi i le faaipoipoga i le malumalu. Pei foi ona taua le papatisoga mo le ulufale mai i le Ekalesia, e faapena foi ona taua le faaipoipoga i le malumalu mo lo tatou faaeaga i le afioaga o le Atua. O se vaega o lo tatou taunuuga. E le mafai ona tatou faataunuuina o tatou faamoemoega tupito e aunoa ma lena mea. Aua nei faamalieina oe i se mea e i itiiti ifo.

O le a e le taliaina se faiga faalelalolagi o le papatisoga, e sa’o? E i ai lava le auala o le papatisoga a le Atua—e ala i le faatofuina e se tasi o i ai le pule. Mata la o le a e taliaina se faiga faalelalolagi o le faaipoipoga? Ua i ai foi Lana lava auala o le faaipoipoga: O le faaipoipoga i le malumalu.¹³

Ou te tatalo ia faamanuia i tatou e le Alii, ina ia tatou iloa le mafuaaga o lo tatou i ai iinei, ma le mea e tatau ona tatou fai e iloa ai le ala i le faaeaga ma le ola e faavavau. O se vaega o le fuafuaga e faavavau o le faaipoipoga lea tatou te tausisia le paia. Afai tatou te naunau e usitaia, o le a tumau sauniga e faavavau. Se mea ina a matagofie o le i ai o se malamalama ma le faailoa mai ia i tatou o nei upumoni.¹⁴

Pe a filifili po o ai e faaipoipo i ai, ia onosai, ia faatuatua, ma ola agavaa mo le mauaina o le fesoasoani mai le lagi.

Ou te manatu o le faaiuga aupito sili e tatau ona e faia … o le faaiuga lea e faatulaga ai lou olaga mo le faavavau, ma o lau faaipoipoga lea. Ou te talitonu o le a e ioe faatasi ma au o le a avea lea ma mea e aupito sili ona taua nai lo se isi lava mea e te faia i le olaga, aua o lau galuega ma lau matata po o le a lava foi le mea o le a e faia, e le taitai tutusa lona taua ma mea e faavavau lona taua. … [O le faaiuga e faatatau i le faaipoipoga o le] a aafia ai oe e oo i le faavavau; o le a aafia ai foi oe a o e ola ai i le lalolagi.¹⁵

Aua nei … e soona televave i se sootaga e aunoa ma le muai mafaufau i ai ma musumusuga. Ia saili ma le lototatalo mo le taitaiga a le Alii i lenei mataupu. Tumau le agavaa mo le mauaina o lena fesoasoani faalelagi.¹⁶

O le toatele o outou … e popole e eva faamasani, faaipoipo, ma amata se aiga. Atonu o le a e le iloaina le igoa o lou toalua i le lumanai i le faaaliga a Nifae po o le tusi a Faaaliga; atonu o le a le ta’uina atu ia te oe e se agelu po o lou epikopo foi. O nisi mea e tatau lava ona e galue ai oe lava. Ia faatuatua ma ia usiusitai, ona oo mai ai lea o faamanuiaga. Taumafai e onosai. Taumafai e aua le faatagaina mea e le o ia te oe, e taofia ai oe mai lou iloa o mea ua ia te oe. Afai e te popole tele i le faaipoipoga, e mafai ona faatamaia ai le tulaga e mafai ai. Ia ola atoatoa ma faamaoni o se tagata toatasi a o lei soona popole i le ola o ni tagata se toalua.¹⁷

A o faatalitali mo faamanuiaga ua folafola mai, e le tatau i se tasi ona tau na o le nofonofo ma faatalitali seia tupu le mea o manao ai, aua a oo ina le taulau, o le a toefoi e toe tau amata ona faatulaga. Ia punouai ma le naunau i galuega lelei, e aofia ai lou lava atinaega.¹⁸

“A o faatalitali mo faamanuiaga ua folafola mai, … ia punouai ma le naunau i galuega lelei, e aofia ai lou lava atinaega.”

E leai se faamanuiaga o le a taofia mai tagata taitoatasi e lei faaipoipo.

O le ekalesia lenei a Iesu Keriso, e le o se ekalesia a tagata ua faaipoipo po o le au nofofua foi, po o se isi lava vaega o tagata po o tagata taitoatasi. O le talalelei o loo tatou talai atu, o le talalelei lea a Iesu Keriso, lea e aofia ai sauniga faaola uma ma feagaiga e tatau ai e laveai ai ma faaea ai tagata uma o e e naunau e talia Keriso, ma tausi poloaiga na tuuina mai e ia ma lo tatou Tama i le Lagi. ¹⁹

E leai se faamanuiaga, e aofia ai le faaipoipoga e faavavau ma se aiga e faavavau, o le a taofia mai soo se tagata agavaa. E ui ina o le a umi atu se taimi e alu ai—atonu e oo lava i talaatu o le olaga faaletino—mo nisi e ausia ai lenei faamanuiaga, ae o le a le taofia ai lava. …

Ia, sei ou tuuina atu ni nai upu o se fautuaga ma le alofa.

Ia te outou na oalii e lei faaipoipo:Aua nei tolopoina le faaipoipoga ona e le o atoatoa se matata o e faigaluega ai, ma tulaga tautupe. … Manatua i le avea ai ma se o umia le perisitua, ua ia te oe le matafaioi e taimua ai i le sailiga o le soa e faavavau.

Ia te outou tamaitai e lei faaipoipo:O folafolaga a perofeta a le Atua i taimi uma e faapea, e silafia e le Alii oe; afai e te faamaoni, o faamanuiaga umao le a fai ma oe. O le aunoa ma se faaipoipoga ma se aiga i lenei olaga, ua na o se tulaga e le tumau, ae o le faavavau o se taimi umi. Ua faamanatu mai e Peresitene Benson ia i tatou e faapea, “o le taimi e na o le tagata ua atofa atu i ai. Ua i le Atua lou vaaiga e faavavau.” (Ensign, Nov. 1988, i. 97.) Faatutumu o outou olaga i gaoioiga aoga, ma le anoa.

Ia te outou ua tatala faaipoipoga: Aua nei avea se le fiafia po o se lagona o le toilalo, e punitia ai lou manatu faavae i le faaipoipoga po o le olaga. Aua nei aveesea lou faatuatua i le faaipoipoga pe faatagaina le oona e faatiga ai lou agaga ma faatamaia ai oe po o i latou e te alofa i ai, po o e sa e alofa i ai. ²⁰

O faaipoipoga manuia e manaomia ai a tatou taumafaiga sili e ola i mataupu faavae o le talalelei.

O le [faaipoipoga] … o se amio e aoaoina. O a tatou taumafaiga maelega, ae le o le natura, e fuafua ai le manuia. O le malosiaga faaosofia e afua mai i le agalelei, alofa faamaoni, ma le mafaufau mo le fiafia ma le soifua manuia o le tasi ma le isi.

A o lei faaipoipo tatou te vaai atu i le olaga i la tatou lava vaaiga, ae a uma loa ona laasia lea tulaga, ua tatou amata ona vaai mai foi i le itu a le isi tagata. E i ai le tulaga e tatau ai ona faia osigataulaga ma fetuunaiga o ni faailoga o le faamautinoaga ma le alofa.

E masani ona faapea o le faaipoipo fiafia ma le faamanuiaina, e masani lava e le faapea ona ua faaipoipo i le tagata sa’o nai lo le avea ma tagata sa’o. O faamaumauga faafuainumera atonu ua faaalia ai le tulaga maualuga o faaipoipoiga ua tatala, e ono ta’u mai ai ni filifiliga lē atamai o paaga. Ana faapea sa latou faaipoipo i isi tagata, semanu e ono aveesea le faafitauli patino, ae e mautinoa lava e i ai se isi faafitauli semanu e suitulaga ai. O se filifiliga atamai o se paaga, o se sao tele lea i se faaipoipoga faamanuiaina, ae o taumafaiga maelega e faia atoatoa le vaega a le tagata lava ia o le elemene aupito sili lea e saofaga i le tulaga manuia. ²¹

E ui e moni o le a maua e ulugalii agavaa le faaeaga i le malo selesitila, ae o alii taitasi ma tamaitai taitasi e faamauina i se sootaga e faavavau, e tatau ona agavaa le tagata lava ia mo lena faamanuiaga.

O se faaipoipoga e faavavau o le a fatuina e se alii agavaa ma se tamaitai agavaa, o e ua tofu papatisoina i le vai ma le Agaga; o e na o atu taitoatasi i le malumalu ma maua ai o la’ua lava faaeega paia; o e na tauto atu lo la faamaoni aiai i le Atua ma a la paaga i le feagaiga o le faaipoipoga; ma o e tausia e le tagata lava ia ana feagaiga, ma faia mea uma ua faamoemoeina e le Atua mai ia i la’ua.²²

O le ola ai i mataupu faavae o le talalelei e maua ai se faaipoipoga fiafia. … A mafai e ni tagata se toalua ona ola i mataupu faavae o le talalelei, e mafai ona suamalie le faaipoipoga ma e mafai ona fiafia.²³

E tatau i tane ma ava ona galulue faatasi e faamalolosia ia noataga o le faaipoipoga.

Alofa mama ma ia onosai i ni le atoatoa

O le toatele lava o paaga e i ai ni le atoatoa. … Na ta’ua e Richard L. Evans, “Atonu e mafai lava e soo se tasi o i tatou ona galue faatasi ma tagata e atoatoa, ae o la tatou galuega o le galulue faatasi ma tagata e le atoatoa”Richard Evans’ Quote Book (1971), 165]. Ua tatou malamalama i faaipoipoga, tatou te le o fegalegaleai ma tagata atoatoa; o loo tatou sailia le atoatoa ma o loo tatou malaga i le ala ma le faamoemoe e maua le atoatoa, ae e tatau ona tatou malamalama, tatou faia le mea sili, ma faia le olaga ia matagofie. …

… O loo ta’u mai e le Tusi Paia ia i tatou: “E onosai le alofa, e agamalu” (tagai 1 Korinito 13:4 ). O le ituaiga alofa lena, o le ituaiga e le manatu faatauvaa i ai, e le muta pe a uma le fiafia ona tiai lea pei se pepa palasitika, ae o le alofa e tatalia faatasi faigata uma o le olaga ma le faamoemoe e tasi, o le faaaliga maualuga lea o le fiafia o le tagata soifua.²⁴

Tasi le loto

E moni o faaipoipoga e sili ona fiafia, ia e faapea, o lou tiga, o lo’u tiga foi lea, o lou manu’a o lo’u manu’a foi lea, o lo’u manumalo o lou manumalo foi lea, o o’u atugaluga, o ou atugaluga foi ia. O le tasi o le loto, o le agaga, o le tino e foliga mai o se luitau tele nai lo le mea sa i ai muamua le lalolagi lea atonu o le fesili lea e tulai mai: “E faapefea ona ou manuia mai lenei mea?” Ua tele naua ulugalii faaipoipo ua avea le toalua na o se mea e mitamita ai, ae le o se vaega o le loto. ²⁵

A “alofa le tane ma le ava o le tasi i le isi e pei ona la alolofa i le Atua, … o le a oo mai i lo la’ua aiga le suamalie ma le faamama’i lea o le a maua ai le manuia e faavavau.”

Faamaoni i mafaufauga, upu, ma galuega

E faaalia e se alii o umia le perisitua le faamaoni aiai atoatoa i lona toalua ma na te le faia lava se mea e masalomia ai e lona toalua lona faamaoni. E tatau i se tane ona alofa i lana ava ma lona loto atoa ma pipii atu ia te ia ae le o se isi lava (tagai MF&F 42:22–26). Sa faamatala mai e Peresitene Spencer W. Kimball:

“O upu lava,leai se isi mea, e aveesea tagata uma ma mea uma. Ona avea ai lea o le toalua ma mea aupito maualuga i le olaga o le tane po o le ava, ma o le a leai ai lava se mea o le olaga faaagafesootai pe faalegaluega pe faaupufai po o se isi lava mea e fiafia i ai, po o se tagata po o se mea e sili atu nai lo le toalua faalesoa” (O Le Vavega o le Faamagalo Atu, Salt Lake City: Bookcraft, 1969, p. 250).

E le faatagaina e le Alii ma e tausalaina e lana ekalesia soo se sootaga militino i fafo atu o le faaipoipoga. O le le faamaoni o se tane e nutimomoia ai le loto o lana ava, ma lē toe talitonuina ai o ia e lana ava faapea lana fanau (tagai Iakopo 2:35).

Ia faamaoni i au feagaiga o le faaipoipoga i mafaufauga, upu, ma aga. O ponokarafi, faiamio, ma mafaufauga vale o feusuaiga, e faatamaia ai le tagata ma faavaivaia ai le faavae o se faaipoipoga fiafia. O le lotogatasi ma le faatuatuaina i totonu o se faaipoipga o le a faaumatiaina. O se e le puleaina ona mafaufauga ma ia faatino ai le mulilua i lona loto, afai e le salamo, o le a ia le maua le Agaga, ae faafitia le faatuatua ma o le a atuatuvale (tagai MF&F 42:23; 63:16).²⁶

O le agamalu ma le faaaloalo i sootaga patino

Ia tausisia outou i luga ae o ni amioga faatautala po o le le agavaa i sootaga mu’amu’a, ma patino i le va o le tane ma le ava. Talu ai o le faaipoipoga e faauuina e le Atua, o sootaga patino i le va o tane ma ava, e lelei ma e faamamaluina i le silafaga a le atua. Ua poloai mai o Ia ina ia avea i la’ua ma tino e tasi ma ia fanafanau ma uluuluola ia tumu ai le lalolagi (tagai Mose 2:28; 3:24). E tatau ona e alofa i lau ava e faapei ona alofa Keriso i le Ekalesia ma ofoina atu ia lava mo [le ekalesia].(tagai Efe. 5:25–31).

O le agamalu ma le faaaloalo—ae le o le manatu faapito—e tatau ona avea ma mataupu faavae taiala i le sootaga patino i le va o le tane ma le ava. E tatau ona tofu manatu le tasi o le paaga i le isi ma ia nofouta i mea emanaomia ma manaoga o le isi. Soo se amioga faatautala, mataga, pe le pulea i le sootaga patino i le va o se tane ma se ava, ua ta’usalaina e le Alii.

Soo se alii e faasaunoa pe ta’ufaatauvaaina lana ava faaletino, pe faaleagaga, ua tausalaina o ia i le agasala matuia ma e matua manaomia ai le salamo loloto faamao’i. E ao ina foia eseesega i le alofa ma le agalelei ma se agaga o le toe faaleleia atoatoa. E tatau i se alii ona tautala e le aunoa i lana ava ma le alofa ma le agalelei, ma taulima o ia ma le faaaloalo maualuga. O le faaipoipoga e pei o se fugalaau mu’amu’a … ma e tatau ona faafailele pea lava pea i uiga o le alofa ma le agalelei.²⁷

Faalogo ma le gauai

E tele faafitauli e mafai ona vave ona tali, ma e tele foi tulaga faigata e foia, pe afai e mafai ona tatou malamalama e tele taimi sa moomia ai ona tatou faalogo. I le aoga sa tatou aoaoina lesona pe a tatou faalogo, ae le mafai pe a tatou mumusu e gauai atu. I le faaipoipoga, e matuai leai lava se malamalama sei vagana ua tatou naunau e faalogo. … Ioe, e manaomia ona tatou talanoa, ae e tatau ona tatou faalogo i le isi itu ina ia mafai ai ona faateleina lo tatou malamalama ia lava e faia ai se faaiuga atamai. O se taliga e faalogo e mafai i le tele o taimi ona faia ai se eseesega. ²⁸

Le Manatu Faapito

E le mafai ona tumau faauoga pe afai e faavae i luga o le oneone o le manatu faapito. E le tumau faaipoipoga pe afai e leai ni faavae mautu vagana ai o faatosinaga faaletino, ma leai se faavae o se alofa loloto ma le faamaoni.²⁹

Matou te faamoemoe ia te outou ua faaipoipo, ia manatua lagona o le alofa sa taitai atu ai outou i le fatafaitaulaga i le maota o le Alii. E faanoanoa o matou loto i le iloa e toatele ua maalili le alofa pe ona o mafuaaga foi o le manatu faapito po o le solitulafono ua galo ai, pe ua faamamasagia ai feagaiga o le faaipoipoga sa latou faia i le malumalu. Matou te aioi atu i tane ma ava ina ia i ai le alofa ma le faaaloalo o le tasi i le isi. E moni, o le a avea ma o tatou faamoemoega faamama’i ia faamanuiaina aiga taitasi i se tina ma se tama o e ta’u atua le alofa o le tasi i le isi, o e e ese le tasi mai le isi, ae e galulue faatasi e faamalolosia a la’ua noataga o le faaipoipoga. ³⁰

Fautuaga mo Suesuega ma le Aoaoina Atu

Fesili

I le vaega 1, o loo faamamafa mai ai e Peresitene Hunter e faapea, o le faaipoipoga e faauuina e le Atua ma ua faamoemoe ia faavavau. E mafai faapefea e le iloa o lenei mea ona aafia ai lau sootaga ma lou toalua? O le a le uiga o le faapea o le faaipoipoga “o se paaga ma le Atua”? E mafai faapefea ona tatou fesoasoani i tamaiti ma talavou ia saunia e faaipoipo i totonu o le malumalu?
O a ni ou mafaufauga ma lagona a o e suesue i le fautuaga a Peresitene Hunter e uiga i le filifili po o ai e faaipoipo i ai? (Tagai vaega e 2.)
E mafai faapefea ona fesoasoani folafolaga ma fautuaga a Peresitene Hunter o i le vaega e 3 i tagata e lei faaipoipo? E mafai faapefea ona tatou faaaogaina le savali a Peresitene Hunter faapea “o le ekalesia lenei a Iesu Keriso, e le o se ekalesia a e ua faaipoipo po o le au nofofua”?
O le a sou manatu o le a le uiga o le saunoaga a Peresitene Hunter faapea o le faaipoipoga “o se amioga e aoaoina”? (Tagai vaega e 4.) O anafea na e vaai ai i le ola ai i mataupu faavae o le talalelei, ua aumaia ai le fiafia i se faaipoipoga? Afai ua e faaipoipo, mafaufau po o le a le mea e te ono faia ina ia faaali atoatoa atu ai lou alofa i lou toalua.
Mafaufau i le fautuaga a Peresitene Hunter i le vaega e 5. E mafai faapefea e taitoalua ona atinae se onosai tele mo vaivaiga o le isi? E mafai faapefea e taitoalua ona atinae le “tasi o le loto”? E mafai faapefea e taitoalua ona faaalia le faamaoni i le faaipoipoga e ala i mafaufauga, upu, ma galuega?

Mau Fesootai

Kenese 2:18, 21–24; Iakopo 2:27, 31–33; 4 Nifae 1:11; MF&F 42:22; Mose 3:19–24; tagai foi “O Le Aiga: O Se Folafolaga i le Lalolagi,” Ensign, Nov. 2010, 129

Fesoasoani mo Suesuega

“E sili atu ona aoga au suesuega faaletalalelei pe a e aoao atu e ala i le Agaga Paia. Ia amata au suesuega o le talalelei e ala i le tatalo mo le Agaga Paia e fesoasoani ia e aoao” (Talai La’u Talalelei [2004], 18).