Mulimuli i le Faataitaiga a Iesu Keriso

O le avea ma se malamalama o le avea lea ma se faataitaiga—o se tasi e faia se faataitaiga ma o se ata faataitai mo isi e mulimuli ai. … [Ua tatou osifeagaiga] e mulimuli ia Keriso, le faataitai sili. Ua ia i tatou le tiutetauave e aoao e uiga ia te ia, o mea sa ia aoao mai ma mea sa ia faia i le taimi o lana misiona i le lalolagi. O le aoaoina o nei lesona, ua tatou noatia ai i lalo o le poloaiga e mulimuli i ana faataitaiga, ma o nisi nei o faataitaiga sa ia faia mo i tatou:

1. Sa usiusitai Keriso ma lototoa i le muai olaga, o lea na maua ai le avanoa paia e sau ai i le lalolagi ma maua ai se tino o aano ma aivi.

. Na papatisoina o ia ina ia tatala ai le faitotoa i le malo selesitila.

3. Sa ia umia le perisitua ma mauaina sauniga faaola uma ma le faaeaina o le talalelei.

4. Pe tusa ma le tolu tausaga na faatino ai e Iesu i se galuega o le aoao atu o le talalelei, molimau atu i le upumoni, ma le aoaoina o tagata i mea e tatau ona latou fai e maua ai le olioli ma le fiafia i lenei olaga ma le mamalu e faavavau i le lalolagi a sau.

5. Sa ia faatinoina sauniga e aofia ai le faamanuiaina o tamaiti, papatisoga, faamanuiaina o e mamai, ma faauuga i le perisitua.

6. Sa ia faatinoina vavega. I Lana upu na pupula ai tauaso, faalogo e tutuli, savavali e pipili, ma toe ola mai e ua oti

7. I le fuatasi ai ma le mafaufau ma le finagalo o le Tama, sa soifua ai Iesu i se olaga atoatoa e aunoa ma se agasala ma sa ia mauaina uma uiga paia faale-Atua.

8. Sa Ia faatoilaloina le lalolagi; o lona uiga, sa ia pulea lagona malolosi uma ma sa tulai ae i luga atu o le faaletino ma sa ia soifua ma savali e pei ona taialaina ai e le Agaga.

9. Sa Ia faataunuuina le Togiola, o lea ua togiolaina ai tagata mai le oti [faaleagaga ma le faaletino] na afua mai i le pa’u o Atamu.

10. O lenei la ua toetu ma ua faamamaluina, ua ia maua le mana uma i le lagi ma le lalolagi, ua ia maua le atoaga ma ua tasi o Ia ma le Tama.

Afai tatou te mananao e mulimuli i le faataitaiga a Keriso ma savavali i ona tulagaaao, e tatau ona tatou saili e faia le mea e tasi e tusa ma le mamanu na ia faatuina.⁵

E taua le manatua na mafai lava ona agasala Iesu, semanu e mafai lava ona gauai atu i faaosoosoga, semanu foi e le taulau le fuafuaga o le olaga ma le faaolataga, ae na tumau faamaoni o ia. Pe ana faapea e leai se avanoa e gauai atu ai i faatosinaga a Satani, semanu e leai se suega moni, leai se manumalo moni e tulai mai. Pe ana faapea e le ia te ia le gafatia e agasala ai, semanu e aveesea lona faitalia. O ia lea na sau e puipuia ma faamautinoa le faitalia o le tagata. Sa tatau ona ia tausisia le gafatia ma le tomai e agasala ai, pe ana faapea e manao ai.⁶

Na oo lava i le iuga o lona soifuaga faaletino, sa faaalia ai lava e Iesu le malualii o lona agaga ma le maoae o lona malosi. E oo lava i nai toe taimi o lona soifua, Na te lei mafaufau lava ma le manatu faapito i ona faanoanoaga pe mafaufau foi i tiga o le a oo mai. Sa ia faatino ma le naunautai manaoga i le taimi nei ma le lumanai o ona soo pele. Sa silafia e ia lo latou lava saogalemu, o ni tagata taitoatasi ma le ekalesia, lea e na o lo latou alolofa le faatuaoia i le tasi ma le isi e faalagolago i ai. O lona malosi atoa sa foliga mai na taulai atu i o latou manaoga, o lea sa ia aoao atu ai e ala i faataitaiga mea sa ia aoaoina i le mataupu. Sa ia tuu atu ia i latou upu faamafanafana ma le poloaiga ma le lapataiga.⁷

O le faia o lana auaunaga faaletino i lana lafu mamoe i le Nuu Paia ma lana auaunaga ina ua mavae lona maliu, i ana mamoe na faasalalauina i le Lalolagi i Sisifo, na faaalia ai e le Alii lona alofa ma le popole mo tagata taitoatasi.

I le lolofi mai o le motu o tagata, sa ia lagonaina le pa’i tasi mai a se fafine sa sailia se mapusaga mo se ma’i sa mafatia ai o ia mo le sefulu ma le lua tausaga. (Tagai Luka 8:43–48.) I se tasi taimi, sa mamao lana silasila i tua atu o le faailoga tagata o ni tagata faaoosala ma le agasala a le sa tuua’ia. Atonu ona o le lagonaina o lona naunau e salamo, o lea sa filifili ai Keriso e silasila i le taua o le tagata ma auina ese atu ai o ia ma ia aua nei toe agasala. (Tagai Ioane 8:1–11.) I se tasi taimi, na “ia ave a latou fanau laiti, taitoatasi, ma faamanuia i latou, ma tatalo atu i le Tama mo i latou.” (3 Ni. 17:21; faaopoopo le faatusilima.)

Ina ua vave ona oo mai tofotofoga i Ketesemane ma Kalevario, faatasi ai ma le avega tele ua mamafa i lona mafaufau, na faaavanoa ai e le Faaola se taimi e matau ai le fafine ua oti lana tane, a o lafo atu lana tupe iti. (Tagai Mareko 12:41–44.) E faapena foi, na ia matauina foi Sakaio puupuu, o le sa le mafai ona iloa atu [Iesu] ona o le tumutumu o le motu o tagata sa lolofi atu i le Faaola, na ia a’e ai i le laau o le sukamoro mo se vaaiga i le Alo o le Atua. (Tagai Luka 19:1–5.) A o tautau ai ma le tiga i luga o le satauro, sa lei manatu o ia i ona lava mafatiaga ae sa aapa atu ma le alofa ma le popole i le fafine sa tagi lotulotu, o le sa tuuina atu ia te ia le ola. (Tagai Ioane 19:25–27.)

Se faataitaiga ina a matagofie mo i tatou e mulimuli ai! Na oo lava i le o’oo’o o lona faanoanoaga patino ma le tiga, sa aapa atu ai lo tatou Faataitaiga e faamanuia olaga o isi. … E lei taulai atu lava Lona soifua i mea na te lei maua. O se soifua o le aapa atu e auauna i isi.⁸

O se tasi o fesili aupito taua na faia i tagata, o le fesili lea na fai e le Alo o le Atua lava ia, le Faaola o le lalolagi. I se vaega o soo i le Lalolagi Fou, o se vaega sa naunau ina ia aoaoina e ia, ma sa sili foi ona naunau ona e le o toe mamao ona tuua lea o i latou, sa ia fesili, “O a ituaiga tagata e tatau ona i ai outou?” Ona ia tuuina atu lea o le tali lenei i lena lava taimi: “E pei lava o a’u nei“ (3 Ne. 27:27).

Ua tumu le lalolagi i tagata o loo naunau e ta’u mai ia i tatou, “Fai le mea ou te fai atu ai.” E moni e le misi ona i ai le au faufautua mo mataupu taitasi. Ae e matuai itiiti lava ua saunia e fai mai, “Fai e pei ona ou faia.” Ma ioe, e na o le Toatasi i le talafaasolopito o le tagata soifua e mafai ona faia lena tautinoga ma le sa’o ma le lelei. E maua i le talafaasolopito le tele o faataitaiga o alii ma tamaitai lelei, ae e oo lava i tagata aupito silisili, e i ai lava o latou sasi. E leai se tasi e mafai ona avea o se faataitaiga atoatoa pe avea ma mamanu e talitonuina, tusa lava po o le a le lelei o o latou faamoemoega.

Ua na o Keriso lava e mafai ona avea ma o tatou “fetuao pupula”(Faaa. 22:16). Ua na o Ia lava e mafai ona faapea mai e aunoa ma sefaatuai, “Mulimuli mai ia te au, aoao e uiga ia te au, [ma] fai mea ua outou vaai mai o o’u faia. Ina feinu ia i le vai ma le areto ou te avatu. O au le ala, le upumoni, ma le ola. O au le tulafono ma le malamalama. Vaavaai mai ia te au e ola ai outou. Ia outou fealofani e faapei ona ou alofa atu ia te outou” (tagai Mata. 11:29; 16:24; Ioane 4:13–14; 6:35, 51; 7:37; 13:34; 14:6; 3 Ni. 15:9; 27:21).

Oka, se valaau ina a manino ma leotele! O se tulaga mautinoa ma o se faataitaiga i taimi o le le mautonu ma le leai o se faataitaiga. …

… E ao ina tatou lotofaafetai ua auina mai e le Atua lona Alo Pele e Toatasi i le lalolagi … e aumai se faataitaiga atoatoa o le olaga sa’o, o le agalelei ma le alofa mutimutivale ma le lotoalofa, ina ia iloa ai e tagata uma le ala e ola ai, iloa le ala e faaleleia ai, ma iloa le ala e avea atili ai faaleatua.

Ina tatou mulimuli ia i le Alo o le Atua i ala ma savaliga uma o le olaga. Ia tatou faia o ia ma a tatou faataitaiga ma o tatou taiala. E tatau ona tatou fesili ifo ia i tatou lava i avanoa uma e maua, “Mata o le a le mea e faia e Iesu?” ona lototetele atili lea e faatino le tali. E tatau ona tatou mulimuli ia Keriso, i le mea sili e tusa ma le upu. E tatau ona tatou faia lana galuega e faapei ona ia faia le galuega a lona Tama. E ao ina tatou taumafai e avea faapei o ia, e pei ona pepese ai tamaiti o le Peraimeri, “Taumafai” (Tusipese a Tamaiti, i. 34). I le mamao e mafai ai e lo tatou malosiaga faaletino, e ao ina tatou faia taumafaiga uma e avea ai faapei o Keriso—le faataitaiga atoatoa e tasi e leai se agasala ua vaai i ai lenei lalolagi. ⁹

I le taimi o le galuega a le Alii i le tino sa ia tuu faafia mai ai le valaau lea na avea o se valaaulia ma se lu’i. Ia Peteru ma lona uso o Aneterea, na fetalai Keriso, “Mulimuli mai ia te au, o le a ou faia oulua ma faifaiva i tagata.” (Mata. 4:19.) I le alii talavou mauoa, o le na fesili po o le a se mea e tatau ona ia fai ina ia maua ai le ola e faavavau, na tali atu ai Iesu, “Alu ma faatau uma au mea, ma avatu ai i e matitiva … ona e sau lea ma mulimuli mai ia te au.” (Mata. 19:21.) Ma ia i tatou taitoatasi ua fetalai mai Iesu, “A fia auauna mai se tasi ia te au, ia mulimuli mai o ia ia te au.” (Ioane 12:26.)¹⁰

Sei o tatou suesue i aoaoga uma a le Matai, ma tuuto atu i tatou lava ma le atoatoa i lana faataitaiga. Sa Ia tuuina mai ia i tatou “o mea uma e oo ai i le ola ma le amio Atua.” Ua Ia “valaau mai ia i tatou i lona lelei e silisili lava” ma “ua ia folafola mai o mea silisili ese ma le aoga: ina ia tofusia faatasi ai [tatou] i le amio Atua(2 Pete. 1:3–4).¹¹”

O i latou o e mulimuli ia Keriso e saili ia mulimuli i lana faataitaiga. O ona mafatiaga mo a tatou agasala, sese, faanoanoaga ma ma’i e ao ina faaosofia ai i tatou ia faapena foi ona tatou aapa atu i le alofa mama ma le lotoalofa ia i latou o loo siomia ai i tatou. …

… Saili avanoa mo le auauna atu. Aua le soona popole i tulaga. Pe o outou manatua le apoapoaiga a le Faaola e tusa ai ma le “mea sili e taoto ai i faigaai”po o “nofoa sili i sunako”? “A o le sili ia te outou e fai lea ma a outou auauna.” (Mata. 23:6, 11.) E taua le talisapaia. Ae e tatau ona tatou taulai atu i le amiotonu, ae le o le faalauiloa; i le auauna atu, ae le o tulaga. O le faiaoga asiasi faamaoni, o le e alu filemu e fai lana galuega i lea masina ma lea masina, e tutusa lava le taua i le galuega a le Alii e pei o i latou ua manatu nisi e sili atu ona lauiloa o latou tofiga i le Ekalesia. E le faatusalia le vaaiga faaletagata ma le taua.¹²

O le valaaulia a le Alii e mulimuli ia te ia e mo tagata taitoatasi ma e patino foi, ma o se uunaiga. E le mafai ona tatou tutu e faavavau i le va o manatu e lua. E tatau ona taitasi i tatou ma faasaga atu i le fesili taua: “Pe se a la outou upu ia te au?” (Mata. 16:15.) E faalagolago le faaolataga o le tagata i lo tatou tali atu i lena fesili ma la tatou tautinoga i lena tali. O le tali na faaalia e Peteru o le “O oe o le Keriso, le Alo o le Atua soifua”Mata. 16:16 E tele naua molimau e mafai ona tuuina atu se tali faapena i le mana lava e tasi, ma ou te auai atu faatasi ma i latou ma le lotofaafetai maualalo. Ae e tatau ona tatou tofu tali atu mo i tatou lava—a le o le taimi nei, o se taimi mulimuli ane; aua i le aso gataaga, o le a tootutuli tulivae uma ma ifo atu, o laulaufaiva uma foi o le a tautau atu o Iesu o le Keriso. O la tatou lu’i o le tali sa’o atu lea ma ola e tusa ai manu e lei faavavau tele le tuai. Talu ai e moni lava o Iesu o le Keriso, o le a se mea e tatau ona tatou fai?

O le taulaga maualuga a Keriso e mafai ona fua tele mai i o tatou olaga pe afai tatou te taliaina e mulimuli ia te ia [tagai MF&F 100:2].} O lenei valaau e le faapea e le talafeagai, pe le tonu, pe faapea e le mafai. Ina ia mulimuli i se tagata o lona uiga o le vaavaai toto’a atu lea ia te ia pe faalogo ia te ia; ia talia lana pule, avea o ia o se taitai, ma usiusitai ia te ia; lagolago ma talia ona manatu; ma avea o ia o se ata faataitai. E mafai e i tatou taitoatasi ona talia lenei lu’i. Fai mai Peteru, “Sa tigaina lava Keriso o le sui o outou, ua tuuina mai ai e ia le faaa’oa’o mo outou, ina ia outou mulimuli atu i ona tulagaaao” (1 Pete. 2:21).} E pei lava o aoaoga e le ogatusa ma le aoaoga faavae a Keriso, e faapena foi i se olaga e le ogatusa ma le faataitaiga a Keriso e taitai seseina, ma e ono le oo i lona taunuuga maualuga e mafai ona oo i ai. …

O le amiotonu e tatau ona amata i o tatou lava olaga taitoatasi. E tatau ona faatino i le olaga faaleaiga. Ua i ai i matua le tiutetauave e mulimuli i mataupu faavae o le talalelei a Iesu Keriso ma aoao atu i a latou fanau [tagai MF&F 68:25–28]. E tatau ona avea le lotu o se vaega o o tatou olaga. E tatau ona avea le talalelei a Iesu Keriso ma faatosinaga faaosofia i mea uma tatou te fai. E tatau ona tele ina uunaia i totonu ina ia mafai ai ona mulimuli i le faataitaiga sili ua faatuina e le Faaola pe afai tatou te mananao ia avea atili e faapei o ia. E avea lenei mea o se lu’i tele mo i tatou. ¹³

Afai e mafai ona tatou mamanuina o tatou olaga i le Matai, ma avea ana aoaoga ma faataitaiga o se mamanu maualuga mo o tatou lava olaga, o le a le faigata ia i tatou ona faifai pea ma lotonuu i mea uma o le olaga, aua o le a tatou tautino atu i se tulaga faatonuina paia se tasi, o le amio ma le talitonuga. Pe o le fale po o le maketi, pe o le aoga pe ua leva foi ona uma le aoga, pe o tatou faatinoina na o i tatou lava po o se konaseti ma se anoano o tagata, o le a manino lo tatou faamoemoe ma o le a iloagofie o tatou tulaga faatonuina. O le a tatou naunau, e faapei ona fai mai le perofeta o Alema, “e tutu o ni molimau a le Atua i taimi uma ma i mea uma, ma i nofoaga uma atonu [tatou te] i ai, seia oo lava i le oti.” (Mosaea 18:9.)¹⁴

I lena po i Peteleema sa leai se avanoa mo ia i le faletalimalo, ma e le na o le pau lea o le taimi i le tolusefulu-tolu tausaga sa soifua ai i le olaga nei, na leai ai se avanoa mo ia. Sa auina atu e Herota ia fitafita e fasioti tamaiti. Sa leai se avanoa mo Iesu i le puleaga a Herota, o lea na ave ai o ia e ona matua i Aikupito. I le taimi o lana misiona, e toatele i latou sa lei i ai ni avanoa mo ana aoaoga—leai se avanoa mo le talalelei sa ia aoaoina atu. Sa leai se avanoa mo vavega, mo ana faamanuiaga, leai se avanoa mo upumoni faaleatua na ia fetalai i ai, leai se avanoa mo lona alofa po o le faatuatua. Na fetalai o Ia “E fai lua o alope e fai foi mea e momoe ai manu felelei a o le Atalii o le tagata e leai se mea e moe ai o ia”(Mataio 8:20).

E oo lava i o tatou taimi, e ui ua mavae atu le lua afe tausaga, e toatele o loo ta’ua lea lava mea e tasi na faaleo i lena po i Peteleema. “E leai se avanoa, leai se avanoa” [tagai Luka 2:7). Tatou te faia avanoa mo meaalofa, ae o nisi taimi e leai se avanoa mo le tagata e foai atua. E maua o tatou avanoa mo mea faapisinisi i le Kerisimasi e oo lava i le sailiga faamalieloto i le aso Sapati, ae e i ai taimi e leai ai se avanoa mo le tapuaiga. E tumu o tatou mafaufauga i isi mea—e leai se avanoa. ¹⁵

E ui o le a avea o se vaaiga matagofie le matamata i moli o le Kerisimasi, … ae e sili atu ona taua le faafeilafi o olaga o tagata soifua i le taliaina o ia, o le malamalama o le lalolagi [tagai Alema 38:9; MF&F 10:70]. E tatau lava ona tatou tuuina i luga o ia e fai ma o tatou taiala ma faataitaiga.

I le po o lona soifua mai, sa pepese ai agelu, “O le manuia i le lalolagi ma le finagalo alofa i tagata” (Luka 2:14). Afai e mulimuli tagata i lana faataitaiga, o le a filemu le lalolagi ma i ai le alofa i tagata uma.¹⁶

O le a lo tatou tiutetauave i le aso o ni tagata o Le Ekalesia a Iesu Keriso o le Au Paia o Aso e Gata Ai? O le vaaia lea o atagia mai i o tatou olaga taitoatasi i upu ma galuega le talalelei sa aoao mai e lo tatou Faaola, o Iesu Keriso. O mea uma tatou te fai ma tautala ai, e ao ina mamanu i le faataitaiga a le tagata e toatasi e leai se agasala na savalia le lalolagi, o le Alii ia o Iesu Keriso.¹⁷

• Iloilo le mau auala ua faatuina ai e le Faaola le faataitaiga mo i tatou, e pei ona otooto mai i le vaega 1. O faatosinaina faapefea oe i le faataitaiga a le Faaola? O le a se mea o mafai ona tatou aoao mai Lana faataitaiga i le vaega mulimuli o Lona soifua i le tino?

• Ua fautua mai Peresitene Hunter e “fesili ifo ia i tatou lava,” ‘Mata o le a le mea o le a faia e Iesu?’ ona lototoa lea e faatino le tali” (vaega e 2). Mafaufau pe mafai faapefea ona tele lou lototoa e mulimuli i le faataitaiga a le Faaola E mafai faapefea ona tatou aoao atu lenei mataupu faavae i o tatou aiga?

• O le a se mea e mafai e aoaoga i le vaega e 3 ona fesoasoani tatou te malamalama ai e uiga i le mulimuli ia Iesu Keriso? Mata e ese faapefea lou olaga pe ana fai e te le maua le faatosinaga a aoaoga ma le faataitaiga a le Faaola? E mafai faapefea ona tatou faia ia avea la tatou tapuaiga o se vaega o lo tatou olaga i aso taitasi?

• Mafaufau i saunoaga a Peresitene Hunter e uiga i le “leai o se avanoa” mo le Faaola (vaega e 4). E mafai faapefea ona tatou faia ni avanoa mo le Faaola i o tatou olaga? Ua faamanuiaina faapefea oe a o e faaavanoaina le tele o ou taimi mo Ia?

Mataio 16:24–27; Ioane 10:27–28; 14:12–15; 1 Peteru 2:21–25; 2 Nifae 31:12–13; 3 Nifae 12:48; 18:16; 27:20–22; MF&F 19:23–24

Tufa ia tofu le tagata ma le tusipese. Valaaulia tagata uma e sue ma faasoa mai se viiga e fesootai ma parakalafa sa latou faitauina i le mataupu.