Na Noda Veidinadinati vua na Kalou

Ni’u vakasamataka na veivakalougatataki eso sa solia vei keda na Kalou kei na ka totoka e vuqa ena kosipeli i Jisu Karisito, au sa siqema rawa ni da na tarogi ena ilakolako oqo meda cakava eso na cau vakaisosomi, na cau ni gauna se na ilavo se na ivurevure tale eso. Oqo era sa yaga taucoko ka veiganiti, ia era sega ni vakadeitaka na taucoko ni noda isolisoli kivua na Kalou. Me kena itini, na ka ena gadreva vei keda na Tamada mai Lomalagi e sa levu cake mai na cau; sa ikoya na veidinadinati vakaoti, na solibula vakataucoko, na veika taucoko baleti keda kei na veika eda rawa ni vakataka.

Yalovinaka kila vakamatata ni’u sega ni vosa wale tikoga me baleta e dua na veidinadinati ki na Lotu se itaviqaravi eso, dina ga ni dodonu me na dau vaqaqacotaki oya. Sega, au vosa vakatabakidua tiko ena dua na veidinadinati e vakaraitaki voli ena noda ivalavala yadua, ena noda bula dodonu, ena noda veidokai e vale kei na matavuvale kei na itikotiko, vakakina ena Lotu. …

Me’u taleva lesu totolo mada e dua vei ira na ivakaraitaki maucokona mai na ivolanikalou ka ratou a tutaka kina e tolu na tamata gone sara na nodratou ivakavuvuli ka tautauri matua ki na nodratou bula dodonu, dina ga ni a vakilai vakaidina na nodratou dinata voli ena rawa ni vakavuna na nodratou mate.

Voleka ni 586 na yabaki ni bera ni sucu na Karisito, a curuma yani na siti o Jerusalemi o Nepukanesa na tui Papiloni, ka taura vakaivalu. A kurabui vakalevu okoya ena ituvaki kei na nodra vuli voli na gone ni Isireli ka kauta mai eso vei ira ki na vanua ni gagade ni tui [e Papiloni].

A basika mai vei ira na kai Isireli na leqa ena siga a bulia kina o Nepukanesa e dua na matakau koula ka vakarota na tamata taucoko ena yasai Papiloni mera cuva kina, na ivakaro ratou a sega ni vakadonuya—e tolu na gone ni Isireli—o Setareki, Mesaki, kei Apeti-niko. Sa sivia na “cudru kei na yalovakatani” ni tui ka vakadreta me ratou kau mai kivei koya. (Tan. 3:13.) A tukuna vei ratou o koya ni kevaka eratou na sega ni cuva sobu ki na matakau koula ena gauna lokuci, “ena tikinisiga ko ya dou na biu ga ki na loma ni lovo ni buka waqa.” Ia me via yalovakacegu kina a taroga okoya, “Ia ko cei na Kalou ko ya me na vakabulai kemudou mai na ligaqu?” [Tan. 3:15.]

Ratou sauma na cauravou e tolu ena vakarokoroko ia ka sega ni wawa:

“Ke sa vakaoqori, ratou a kaya, “[mo sa vakarerei keitou ena mate,] ko koya na neitou Kalou o koya keitou sa qarava sa rawata me vakabulai keitou mai na lovo ni buka waqa, ia ena vakabulai keitou mai na ligamuni, na tui.

“Ia ke sega [kevaka ena inaki cavaga sa digitaka kina o koya me kakua ni vakabulai keitou mai na kama], mo ni kila, koi kemuni na tui, ni keitou sa bese ni qarava na nomuni kalou, keitou sa bese talega ni vakarokoroko ki na matakau koula ko ni sa vakaduria.” [Tan. 3:17–18.]

E dina sa qai cudru ga vakalevu o Nepukanesa ka vakarota me vakatakatari e dua na lovo ka me vakavitutaki na kena katakata. Sa qai vakarota okoya me ratou kolotaki na cauravou yaloqaqa e tolu oqo kei na nodratou isulu ki na loma ni lovo. E dina, ena nona sasagaka na tui kei na katakata sivia ni yameyame era a bale mate na sotia ka laveti Setareki, Mesaki, kei Apeti-niko mai na cawa ni lovo ni ra viritaki iratou yani na nodra kaivesu.

Sa qai yaco e dua vei ira na cakamana vakaitamera e sa dau nodra ga na yalododonu me vaka na loma ni Kalou. Ratou a duri ka veilakoyaki malua voli na cauravou e tolu oqo ena loma ni lovo ka sega ni kama. Ia, ni ratou sa kacivi tani mai na lovo mai vua na tui ena nona kidacala, a sega ni vakacacani na nodratou isulu, na kulidratou a galala mai na kama, ka sega ni dua na drauniuludratou a yali. E sega mada ga ni basika mai na iboi ni kama kivei ratou na cauravou yaloqaqa, dinamati oqo.

“Me vakacaucautaki ko koya na Kalou i Setareki, kei Mesaki, kei Apeti-niko,“ a kaya na tui, o koya sa … vakabulai iratou na nona tamata eratou sa vakararavi vua, … [ka sa] bese ni solia na yagodratou, me qarava se vakarokoroko vua e dua tale na kalou, na nodratou Kalou duaduaga.

“ … Ia sa qai vakayacori Setareki, kei Mesaki, kei Apeti-niko ko koya na tui ena yasana vaka-Papiloni.” (Tan. 3:28, 30.)

Na sasaga ni nona tutaka e dua na nona ivakavuvuli, me bula ena bula dodonu kei na vakabauta e vakatau ki na ka e vakadinata e dua—oya na ka e vinakati, oya na kedrau duidui na cau kei na veidinadinati. Na veivakadeitaki oya ki na ivakavuvuli dina—ena noda bula yadua, ena noda itikotiko kei na matavuvale, kei na veivanua taucoko eda sota kina ka vakayarayarataka na tamata tale eso—na veivakadeitaki oya e sa ka e kerei keda tiko kina vakaoti na Kalou. …

E dua na bula rawaka, na bula vinaka, na bula yalododonu va-Karisito sa gadreva cake e dua tale na ka mai na cau, dina ga ni sa yaga na cau taucoko. E gadreva vakaoti na veidinadinati—ena yalo taucoko, tauri vakabibi, na veidinadinati karoni tawamudu ki na ivakavuvuli eda kila ni dina ena ivunau eso sa solia na Kalou. …

Kevaka meda na dina ka yalododonu ki na noda ivakavuvuli, veidinadinati ki na dua na bula ni yalodina kei na bula dodonu, sa na sega ni rawa ni vakaduavatataki keda na tui se veisivisivi se lovo bukawaqa. Me baleta na rawaka ni matanitu ni Kalou e vuravura, meda sa duri vaka nona ivakadinadina “ena veigauna kecega, ena veika kecega kei na veivanua kecega [eda] sa tiko kina, me yacova na mate.” (Mosaia 18:9.)⁵

Na gauna a tukuni kina vei Josua me vakarusa na koro o Jeriko ka koto e matadra [na yavusa ni Isireli], na veibai lelevu ni koro a duri tu vaka e dua na ilati dredre vakayago ki na nodra rawaka na Isireli—se sa vaka no ya na kena irairai. Ni sega ni kilai na ka me caka, ia sa vakadeitaki ki na kena icavacava, a vakayacora o Josua na ivakasala eso a soli kivua mai na dua na italai ni Turaga. Na nona veidinadinati oya sa ki kina talairawarawa vakataucoko. Na lomana oya me cakava vakamatata saraga na ivakasala a soli kivua, ni na vakayacori taucoko na yalayala ni Turaga. A vaka me matalia toka na ivakasala, ia na nona vakabauta ena kena icavacava a tosoi koya voli. Na vatuka, vakaidina, oya e dua tale ena ituvatuva balavu ni cakamana era a sotakaya na Isireli ena nodra a liutaki voli ena vuqa na yabaki mai vei Mosese, Josua, kei na vuqa tale na parofita ka ra a veidinadinati mera muria na ivunau kei na vakatulewa ni Turaga.

Ni sa yacovi Jeriko yani o Josua kei ira na nona tamata, a vakamuri vakamatata sara na ivakasala ni Turaga, ka me vaka e tukuni ena ivolanikalou, “a sa bale sara na bai, ka ra lako cake na tamata ki na koro, ko ira na tamata yadua ena tikina sa dui donui koya, a ra sa rawata na koro.” (Jos. 6:20.)

E tukuna na ivolatukutuku ni oti na nodra cegu taumada na Isireli mai na veivaluvaluti kei na nodra meca, o Josua, ka sa qase sara oqo, a kacivi Isireli taucoko vata mai. Ena nona vosa ni veitalaci a vakananumi ira okoya ni ra a qaqa voli mai baleta ni a vala me baleti ira na Kalou, ia kevaka mera sa cegu oqo ni qarava na Turaga ka muria na nona lawa era na vakarusai. …

A qai vakamasuta na iliuliu vakayalo ka vakaivalu levu oqo e dua na veidinadinati, ka cakava e dua vakaikoya ka vakakina ki na nona matavuvale: “Mo ni digitaki koya edaidai kemuni na qarava; … ia koi au kei ira na noqu lewe ni vale, keitou na qaravi Jiova.” (Jos. 24:15.)

Oqo e dua na malanivosa levu ni veidinadinati vakaoti ni dua na tamata kivua na Kalou; ni dua na parofita ki na gagadre ni Turaga; nei Josua na qaqa kivua na nona Kalou, ka sa dau vakalougatataka vakavuqa eliu na nona talairawarawa. E a tukuna tiko okoya vei ira na Isireli se vakacava ga na nodra lewa, ena cakava okoya na ka e kila sa dodonu. E a kaya tiko ni nona vakatulewa me qarava na Turaga a duadua tu ga mai na veika era sa navuca; ni ka eso era cakava ena sega ni ra-wa na nona; ni nona veidinadinati me cakava na loma ni Kalou ena sega ni veisautaki mai na dua na ka era na cakava se duatani tale. Sa qarava vagumatua o Josua na nona itavi ka sa coba na matana ki na ivunau ni Turaga. A sa veidinadinati okoya ki na talairawarawa.⁶

Ni cava na kena mai kilai vakamatata na lawa ni kosipeli kei na loma ni Turaga mai na wiliki kei na vulici ni ivolanikalou eso kei na nodra vosa na parofita, sa qai basika mai na kilai matata tomani ni inaki vuni e dau kilai tani kina na talairawarawa me imatai ni lawa vakalomalagi kei na vuna e sa gadrevi kina na talairawarawa meda vakabulai. Oqo e kauti keda mai ki na veivakatovolei cecere duadua. Sa lomada li meda na talairawarawa vakataucoko ki na lawa ni Kalou? Ena yaco mai e dua na gauna ena noda bula me na caka kina e dua na vakatulewa tudei.⁷

E taleitaka vakaidina na Turaga, vakalevu cake mai na ka tale eso, e dua na igu tawavakatitiqa ni talairawarawa ki na nona ivakasala. Sa ra vakaivolataki vakaidina na veika era sotakaya na parofita lelevu ena Veiyalayalati Makawa me vukei keda ni kila vakamatata na bibi ni kena digitaki tiko na salatu ni talairawarawa vakaoti. Sa na rairai yalomarau na Turaga ni oti na nona ciqoma o Eparama, na idusidusi ni nona cabori na luvena tagane duabau ga, o Aisake, ka vakayacora me vaka a vakasalataki kina, ka sega ni taroga ka sega ni vakatitiqa. E vakamacalataka na ivolatukutuku ni a tukuna na Kalou kivei Eparama:

“Mo kauta mada na luvemu, na luvemu e duabau ga, ko Aisake ko sa lomana, ka lako ki na vanua ko Moraia; ka vakacabori koya kina me isoro kama ena dua na ulunivanua ka’u na vakatakila vei iko.” (Vakate. 22:2.)

Na tikina e tarava e vakamacalataka vakarawarawa:

“A sa sou ena mataka ko Eparama … ka kauti … Aisake na luvena … ka lako vaka ki na yasana ka vosa kina vua na Kalou.” (Vakate. 22:3.)

Vica na yabaki e muri, ni a tarogi o Repeka ke na lako vata kei na italai nei Eparama me na laki wati Aisake, ka sega ni vakatitiqa voli ni kila ni tiko na veivakalougatataki ni Turaga ena ilesilesi ni italai, a tukuna ga okoya, “Au na lako.” (Vakate. 24:58.)

Ni oti e dua na itabatamata mai na gauna oya, ni a vakasalataki o Jekope me lesu tale ki na vanua o Kenani, sa kena ibalebale me na biuta tu mai na ka taucoko e a cakacakataka tu ena vuqa na yabaki, a kacivi Rejeli kei Lia okoya ki na were era tu kina na nona manumanu ka vakamacalataka na ka a tukuna na Turaga. Na nona sauma lesu o Rejeli [kei Lia] e rawarawa ka vakadodonu ka sa ivakaraitaki ni [nodrau] veidinadinati: “Ia mo kitaka ga na ka kece sa kaya vei iko na Kalou.” (Vakate. 31:16.)

Sa tiko vei keda, oqo, na ivakaraitaki eso mai na ivolanikalou ena iwalewale e dodonu meda raica ka vakadikeva kina na ivunau ni Turaga. Kevaka eda digitaka meda vakataki Josua, kei Eparama, kei Repeka, kei Rejeli [kei Lia], na noda isau ni taro ena, rawarawa sara, meda lako ka kitaka na ka sa vakarota na Turaga.

Sa tiko na inaki vinaka meda cakava na noda vakatulewa oqo ni qarava na Turaga. Ena mataka ni Sigatabu oqo [ni koniferedi raraba], na gauna e sa na kautani kina na veika drakidrakita kei na veitemaki ni bula, ka sa tiko vei keda na gauna kei na vatavatairalago levu cake meda taura e dua na raitayaloyalo tawamudu, eda na rawa ni dikeva vakamatata cake na ka ena kauta mai vei keda na marau levu duadua ni bula. Sa dodonu meda navuca oqo, ena rarama ni mataka, na iwalewale eda na cakava ni sa yaco mai na butobuto ni bogi kei na cagitataba ni veitemaki.

Au masuta ni na tiko vei keda na kaukauwa meda navuca oqo ni cakava na ka e dodonu meda cakava. Au masuta ni da na navuca oqo meda qarava na Turaga.⁸

Ni vosa tiko kivei ira na lewe vuqa, a kaya na iVakavuvuli: “Ena sega ni curu ki na matanitu vakalomalagi ko ira kecega sa kaya vei au, Turaga, Turaga; ko koya ga sa cakava na loma i Tamaqu sa tiko mai lomalagi.” (Mac. 7:21.)

Ni’u vakarogoca na veivosa oqo, e vaka vei au ni tukuna tiko na Turaga, “Baleta ga ni na vakatakila rawa e dua na tamata na noqu dodonu ni vakatulewa se vakadinata na noqu bula vakalou, se vakaraitaka nona vakabauta na noqu ivakavuvuli, se na veisorovaki au a cakava, e sega ni kena ibalebale ni na curu ki na matanitu vakalomalagi se rawata e dua na ivakatagedegede cecere ni bula vakalou.” Ena kena ivakamacala e tukuna tiko okoya, “Na vakadinata vakaikoya e sega ni rauta.” Qai kuria ni tukuna, “ … ko koya ga sa cakava na loma i Tamaqu,” oya, o koya e cakacaka ka samaka na were ni vaini me rawa ni vuataka na vua vinaka. …

Na veika bula taucoko, ka sa nona na Kalou, sa vaka me vakaraitaka na ivakavuvuli vata oqo. Na oni ena sega ni “cakava” sa na vakau tani mai na burena. Ni’u vakasaravi ira na kadi ogaoga ena nodra ilakolako ka wavolita na yavusa kadi, au sa kurabui vakaidina ni ra sa daucakacaka ka sega ni dauvakadinata walega. Na voroki ni yaloka e sega ni vakawai kina na toa, ka sa dodonu kina me sausauvaki. E dua na tobu ka sa vavaku tu na kena duka me sa laki drokadroka tu ka veitakavi na kena irairai baleta ni sa sega tu ni vakayagataki, sa itakataka sara ga ni mate eso ena vanua lolobo, ia na uciwai makare ni ulunivanua e drodro ovaca na veivatu ka sirova sobu yani na veidelana e sa veisureti sara ga meda gunu.

Na vosa eso ni iVakavuvuli me baleta na vale e sega na kena yavu e tukuna vei au ni sega ni rawa me na tiko vua e dua na tamata na nanuma vovodea ka veilecayaki ni sa rauti koya ga vakataki koya ka sa rawa ni taracake ga na nona bula ena dua ga na yavu ka sa rawarawa tu ka veivakadonui [raica na Maciu 7:26–27]. Me totoka rawa tu ga na draki, ena rairai sega beka ni vakilai na nona yalowai, ia dua na siga ena basika mai na waluvu, na wai soso ni so na gagadre vakasauri, na dobui ni veitemaki tawaraici. Kevaka e sega ni dei na yavu ni nona ivalavala mai na levu ni vosa walega, na kena ituvaki taucoko vakaikoya sa na karusa.⁹

A kaya o Jemesa, “Na lotu savasava ka sega ni cala e mata ni Kalou ko Tamada sa vakaoqo, Me sa dau raici ira na luveniyali kei ira na yada ni ra sa rarawa, me sa qarauni koya talega me kakua ni tauvi koya na duka ni ka vakavuravura” (Jemesa1:27).

Ena kena ivosavosataki tale, na lotu e sa levu cake mai na kena kilai na Kalou se na dua na vakatutusa ni vakabauta, ka sa levu cake mai na cioloji. Na lotu sa ikoya na cakacakataki ni vosa ni Kalou. Sa ikoya na noda ivakatawa voli kivei ira na tacida, mai na veika tale eso. …

Sa rawa ni da daulotu ena sokalou ena siga ni Vakacecegu, ka sa rawa ni da daulotu ena noda itavi eso ena ono tale na siga ni macawa. … [Wacava] na kena bibi ni noda nanuma taucoko, na veivosa eda tukuna, noda ivalavala, ivakarau, veimaliwai kei ira eda veitikivi, veika vakabisinisi, kei na noda itavi taucoko ni veisiga me na veiraurau vata kei na noda vakabauta vakalotu. Ena vosa nei Paula, “Se cava na ka dou sa kitaka, mo dou kitaka kecega me vakarokorokotaki kina na Kalou” (1 Korinica 10:31). Sa rawa li meda kauta laivi na lotu mai na noda qaravi tavi ena loma ni macawa ka vakamamadataka ki na siga ni Vakacecegu duadua ga? E sega vakaidina, kevaka eda muria na ivakasala nei Paula.¹⁰

A vakatakila na Turaga ena ikau ki na Vunau kei na Veiyalayalati ni oqo na “lotu dina duadua ga e vuravura.” Qai kuria okoya, “raica oqo na lotu au sa vakadonuya ko i au na Turaga, ia na noqu vosa sa baleti kemuni kece na noqu isoqosoqo lewenilotu ka sega ni baleta na tamata yadua” (V&V 1:30). Oqo e sa dodonu me vakavurea e dua na taro ka na tara sara vakalevu na noda vakasama baleta na veika tawamudu: Eda sa kila ni oqo na lotu dina ka bula voli vakaveivulici, ia au sa dua li na lewenilotu dina ka bula voli vakaiau?

… Ni’u taroga, “Au sa dua li na lewenilotu dina ka bula voli?” na noqu taro na, au sa tutaka li vakalevu ka vakataucoko na muri ni veiyalayalati au a cakava vata kei na Turaga? Au sa dinata vakaoti li na bulataki ni kosipeli ka sa dau muria na vosa ka kakua ni rogoca walega? Au sa bulataka li na noqu lotu? Au na dina li tikoga? Au dau duri vaqaqaco tu li mai na veitemaki i Setani? …

Me saumi vakadodonu na taro, “Au sa dua li na lewenilotu bula voli?” e sa vakadeitaka na noda veidinadinati. Sa kena ibalebale ni da na lomana na Kalou kei ira na wekada me vakataki keda ena gauna oqo ka vaka tu ga kina. Sa kena ibalebale ni veika eda cakava ena vakatakila o cei o keda kei na ka eda vakabauta. Sa kena ibalebale ni da sa lotu va-Karisito ena veisiga, ka lako voli me vaka e gadreva o Karisito meda na lako vakakina.

O ira na lewenilotu bula voli sai ira era saga mera rawata na veidinadinati vakaoti. …

O ira na lewenilotu bula voli era vakila na nodra itavi mera toso ki liu. Era sa papitaiso me vaka na imatai ni kalawa ki na nodra itosotoso bula. E sa dua na ivakaraitaki kivua na Kalou, kivei ira na agilosi, kei lomalagi ni ra na muria na loma ni Kalou. …

O ira na lewenilotu bula voli era vakatudaliga ki na Yalotabu, ka sa vakusara na bula eloma. Era vakasaqara wasoma na vanua e mua kina. Era masuta na veivakaukauwataki ka uabaleta na dredre eso. Na lomadra e sa sega ni tiko ena veika ni vuravura oqo ia ena ka e vakalou. Na veivakavoui vakayalo e sega ni sorovaki ki na veivakamarautaki vakayago.

O ira na lewenilotu bula voli era biuti Karisito vakailiu ena nodra bula, ni kilai na ivurevure cava sa lako mai kina na nodra bula kei na rawaka. Sa dau kena ivakarau tu me biuti koya na tamata ena loma ni maliwalala ka namaki ira tale eso mera duavata kei na veika e vinakata ka gadreva. Ia na veika vakayago e sega ni doka na nanuma veicalati oya. Na usutu ni tavi ni bula e sa nona na Kalou. Sa dodonu meda sasagataki keda mai meda veiraurau kei na lomana, ka qai tomana na noda rawaka vaka e dua na lewenilotu bula voli, ka sega ni kerei koya tiko me cakava na ka vei keda. …

O ira na lewenilotu bula voli, ni ra sa saumaki rawa, era vakamuria na ivunau mera vakataudeitaki ira na tacidra kei na ganedra [raica na Luke 22:32]. Era sa guta mera wasea na nodra reki kivei ira tale eso, ka ra sega ni vakayalia na gagadre oqo. …

O ira na lewenilotu bula voli era vakila na gagadre mera vakacakacakataka na nodra vakabauta. O ira na Yalododonu oqo era sa gumatua ena cakacaka vinaka ka vakaturaga ka ra vakayacora na ka era kila ni dodonu [raica na V&V 58:27]. …

O ira na lewenilotu bula voli era veilomani vakaiira. Era dauraici ira na luveniyali kei ira na yada ni ra sa rarawa. Era sa qarauni ira talega me kakua ni tauvi ira na duka ni ka vakavuravura [raica na Jemesa 1:27]. …

Sa tiko vei keda na vakabauta qaqaco ena malanivosa ni oqo na lotu dina ka bula ni Kalou dina ka bula voli. Na taro sa vo tiko meda sauma oya: “Au sa dau gumatua li ka veicuqeni, e dua na lewenilotu dina ka bula voli?

Meda sa qai duri qaqaco tu ka da lewe ni Lotu dina ka bula voli ka ciqoma na icocovi yalataki meda tiko maliwai ira ka tukuni ena Vunau kei na Veiyalayalati “era sa lako mai ki na ulunivanua ko Saioni, na nona koro na Kalou bula, io ena iwase ni lomalagi sa uasivi sara” (V&V 76:66).¹¹

• Railesuva na ivakavuvuli nei Peresitedi Hunter me baleta na kedrau duidui na “cau” kei na “veidinadinati vakaoti” (iwasewase e 1). Na duidui cava e yaco ki na noda bula ni da sa veidinadinati vakaoti kei na Kalou? Na cava soti e rawa ni vakatavulica vei keda na italanoa kei Setareki, Mesaki kei Apeti-niko?

• Railesuva na itukutuku nei Peresitedi Hunter me baleti Josua ena iwasewase e 2. Na cava o rawa ni vulica mai na itukutuku oqo me baleta na veidinadinati vakataucoko voli kei na Kalou? E rawa vakacava ni da taracake e dua na veidinadinati meda talairawarawa vua na Kalou veitalia se cava era cakava eso tale? E rawa vakacava ni da vukei ira na gonelalai kei na itabagone mera taracake na veidinadinati oqo?

• Na cava na nomu nanuma ni ko talevalesu na italanoa eso ni ivolanikalou ena iwasewase e 3? Na cava tale na ivakaraitaki eso ni ivolanikalou me baleta na talairawarawa e sa vakayarayarataki iko? Cava na vuna o nanuma kina “na Turaga e taleitaka … e dua na gugumatua tawavakatitiqa me talairawarawa ki na nona ivakasala”?

• Vakasamataka vagumatua na ivakavuvuli nei Peresitedi Hunter ena iwasewase e 4. Cava na vuna e “sega ni rauta” kina na vakabauta duadua ga? E dau vukei keda vakacava ni vakavakarau ki na gauna ni leqa eso na qaravi ni loma ni Tamada Vakalomalagi? Eda rawa ni tutaka vakacava na ivakavuvuli nei Peresitedi Hunter me baleta na bulataki ni noda lotu?

• Railesuva yadua na ivakamacala nei Peresitedi Hunter me baleta e dua na “lewenilotu bula voli” ena iwasewase e 5. Eda na taracake vakacava na ivakarau ni bula eso oqo ni “lewenilotu bula voli”? Navuca na iwalewale o na rawa ni dua kina na “lewenilotu dina ka bula voli” vinaka cake ena Lotu.

1 Samuela 15:22–23; Same 1:1–3; Jemesa 2:14–26; 2 Nifai 32:9; Omanai 1:26; Mosaia 2:41; Alama 37:35–37; 3 Nifai 18:15, 18–20; V&V 58:26–29; 97:8; Eparama 3:24–26

Wilika vata e vica na malanivosa mai na iwase. Ni wiliki oti na malanivosa yadua, kerei ira na lewe ni kalasi mera wasea na ivakaraitaki eso mai na ivolanikalou kei na veika era a sotakaya ka semati ki na ivakavuvuli ena malanivosa.