iVakamacala Taumada

Eratou sa tauyavutaka na Mataveiliutaki Taumada kei na Kuoramu ni iApositolo Le Tinikarua na veivola eso ena Nodra iVakavuvuli na Peresitedi ni Lotu me vukei iko mo toro voleka yani vua na Tamamu Vakalomalagi ka vakatitobutaka na nomu kila vakamatata na veika me baleta na kosipeli vakalesui mai i Jisu Karisito. Ni vakaikuritaka tiko na Lotu eso tale na itukutuku ena ivola oqo, o sa na taracake tiko e dua na ivakasokumuni ni ivoladusidusi ni kosipeli ena nomu itikotiko. Era sa vakarautaki na ivoladusidusi oqo mera vakayagataki ena vuliyadudua ka me idusidusi ena Sigatabu. Era na rawa talega ni vukei iko ena nomu vakarautaka na lesoni ni lotu vakamatavuvale, vakarautaka na lesoni se vosa tale eso, ka sauma na vakatataro me baleta na ivunau ni Lotu.

Na ivola oqo e tu kina na ivakavuvuli nei Peresitedi Howard W. Hunter, ka a veiqaravi vaka-Peresitedi ni Lotu i Jisu Karisito ni Yalododonu Edaidai mai na ika 5 ni June, 1994, ki na ika 3 ni Maji, 1995.

iVakatakilakila

Howard W. Hunter

iVakatakilakila

saini

Vuli Yadudua

Masulaka na veivakauqeti ni Yalo Tabu ni ko vulica tiko na ivakavuvuli nei Peresitedi Howard W. Hunter. Na taro eso ena mua ni wase yadua ena vukei iko mo vakasamataka vagumatua, kila vakamatata, ka tutaka na ivakavuvuli nei Peresitedi Hunter. Na vakasama eso oqo ena rawa talega ni veivuke:

Vola na vakasama kei na nanuma eso e yaco mai vei iko mai vua na Yalo Tabu ni o vuli tiko.
Lainitaka na ruku ni veimalanivosa o vinakata mo nanuma. Navuca mo cavuqaqataka na veimalanivosa oqo se toqai ira ena nomu ivolanikalou tikiva na tikina veisemati.
Wilika vakavica e dua na wase se malanivosa me rawa kina ni o kila vakamatata vakatitobu cake.
Tarogi iko ena so na taro vakaoqo, E vakalevutaka vakacava na noqu kila vakamatata na ivakavuvuli ni kosipeli na ivakavuvuli nei Peresitedi Hunter? Na cava e vinakata na Turaga meu vulica mai na ivakavuvuli eso oqo?
Tarogi iko se na vukei iko vakacava ena nomu bolebole kei na kauwai eso na ivakavuvuli ena ivola oqo.
Wasea na veika o vulica vei ira na lewe ni matavuvale kei na itokani.

Veivakavulici mai na iVola Oqo

Na idusidusi eso oqo ena vukei iko ni vakatavuvuli mai na ivola oqo, se ena itikotiko se valenilotu.

Vakavakarau mo Veivakavulici

Vakasaqara na veidusimaki ni Yalo Tabu ni ko sa vavakarau mo veivakavulici. Vulica ena masumasu na wase mo yalodei kina ni kila vakamatata na ivakavuvuli nei Peresitedi Hunter. Ko na veivakavulici ena kaukauwa levu cake ni sa vakayarayarataki iko na nona vosa (raica na V&V 11:21).

Levu na wase e tiko kina e levu na ka ni vuli ka o na sega ni rawa ni veivosakitaka ena dua na soqoni. Digitaka ena masumasu na ivakavuvuli eso o nanuma ena veivuke vakalevu sara.

Vakayaloqaqataki ira o vakavulica mera vulica rawa tiko mai na wase me rawa ni ra na vakarau vakavinaka cake ni vakaitavi ena veiwasei kei na veivakavukui vakaiira.

Ena nomu vakavakarau mo vakaitavitaki ira o vakavulica tiko, solia vakatabakidua na nomu vakasama ki na “Vakatutu ni Vuli kei na Veivakavulici” ena mua ni iwase yadua. O na raica ena wasewase oya na taro kei na ivolanikalou eso, kei na dua na veivuke ni vuli se veivuke ni veivakavulici. Era veisemati na taro kei na ivolanikalou eso vata na veika ena wase. Na vuli kei na veivakavulici e veivuke vakarabailevu sara ena vulici kei na vakatavulici ni kosipeli.

Vakamacalataka na Wase

Ni ko vakamacalataka na wase, sa ga mo tauyavutaka e dua na ituvaki e rawa ni tatara kina na Yalotabu ki na yalodra kei na nodra vakasama na vakaitavi. O na gadreva beka mo vakayagataka e dua se sivia mai na veivakasama oqo:

Wilika se talevalesu na iwasewase ka kena ulutaga “Na Bula nei Howard W. Hunter” mai na itekivu ni iwase, ka qai veivosakitaka.
Veivosakitaka e dua na vosacavuti, iyaloyalo, se ivolanikalou mai na wase.
Lagata vata e dua na sere ni lotu.
Wasea vakalekaleka e dua na ka o sotakaya me baleta na ulutaga.

Vakayaloqaqataka na Veivosaki me baleta na iVakavuvuli nei Peresitedi Hunter

Ni ko sa veivakavulici mai na ivola oqo, sureta tale eso mera wasea na nodra vakasama, vakatataro, vakadinadina, ka veivakavulici vakaiira. Ni ra sa vakaitavi rawa, era sa na vakarau vakavinaka cake ni vuli ka ciqoma na nodra ivakatakila.

Vakatara me tomani na veiwasei vinaka ka kua ni sagai me vakayacori kece na veivakavulici. Dusimaka na veivosaki me rawa ni ra vakanamata ki na ivakavuvuli nei Peresitedi Hunter.

Na taro eso ena itinitini ni wase yadua sa ra ivurevure yaga ki na vakavure veivosaki. Sa rawa talega ni o tuva eso na nomu taro ka me vakatabakidua kivei ira o vakavulica tiko. Eso tale na vakasama ni vakavure veivosaki era toka oqo e ra:

Kerei ira na vakaitavi mera wasea na ka era sa vulica mai na nodra vakadikeva vakaiira na wase. Ena rairai veivuke mera tarai rawa tu e vica vei ira ka kerei ira me ra vakarautaki ira mai ni wasea na veika era sa vulica.
Lesia na taro digitaki eso ena mua ni wase vei ira yadudua se vakailawalawa lalai. Kerei ira na vakaitavi mera vakaraica na ivakavuvuli e tiko ena wase e semati ki na taro. Qai sureti ira me ra wasea nodra vakasama kei na rai.
Wilika vata eso na ivakavuvuli nei Peresitedi Hunter ena wase. Kerei ira na vakaitavi mera wasea na ivakaraitaki eso mai na ivolanikalou ka vakakina mai na veika era sa sotakaya ka semati ki na veivakavuvuli oqori.
Kerei ira na vakaitavi mera digitaka e dua na wasewase ka wilika lo toka. Sureti ira mera sokomuni vakailawalawa ni rua se tolu na tamata ka ra a digitaka na wasewase vata ga ka veivosakitaka na veika era sa vulica.

Vakayaloqaqataka na kena Tutaki kei na Veiwasei

Ena vakaibalebale sara vakalevu na ivakavuvuli nei Peresitedi Hunter ni ra sa tutaka na tamata vakayadua ka wasea vei ira tale eso. O na rairai vinakata mo vakayagataka e dua se sivia mai na veivakasama oqo:

Tarogi ira na vakaitavi ena iwalewale e rawa ni ra tutaka kina na ivakavuvuli nei Peresitedi Hunter ena nodra qaravitavi e vale, ena Lotu, kei na so tale na ituvaki. Me ivakaraitaki, sa rawa ni o sureti ira mera vakasamataka vagumatua ka veivosakitaka na iwalewale e rawa ni ra tutaka kina na nona ivakavuvuli vakatama, tina, itubutubu, cauravou, goneyalewa, dauveituberi vakavuvale se dauveisiko.
Sureti ira na vakaitavi mera wasea na veika era sa sotakaya ena kena tutaki na veika era sa vulica.
Vakayaloqaqataki ira na vakaitavi mera wasea eso na ivakavuvuli nei Peresitedi Hunter kivei ira na lewe ni matavuvale kei na veitokani.

Tinia na Veivosaki

Vakamacalataka vakalekaleka na lesoni se kerea e dua se rua tale me cakava. Vakadinadinataka na ivakavuvuli o sa veivosakitaka. Ko na rairai vinakata mo sureta tale eso mera wasea na nodra ivakadinadina.

iVakamacala me baleta na iVurevure ni iYaya Eso

Na ivakavuvuli eso ena ivola oqo sa ra vosacavuti vakadodonu mai na vunau kei na itukutuku volai eso nei Peresitedi Howard W. Hunter. Na vosacavuti eso mai na ivurevure ni tabaivola e se vakayagataka tikoga na ivakatakilakila ni cegu, na tuvaidonu ni matanivola ni dua na vosa, na matanivolalevu, kei na parakaravutaki ni ivurevure taumada vakavo ke sa ganiti me caka na veisau ni veivakadodonutaki se na kena taipataki me vakavinakataka na kena wiliki. Baleta ni ra okati tu vakamareqeti na vosacavuti ki na ivurevure ni tabaivola, o na rawa ni siqema eso na vosa duidui lailai eso ena ivola. Me ivakaraitaki, na isosomi vakavosa e vakaibalebaletaki kivua na Kalou era matanivolalalai ena so na vosacavuti ka matanivolalelevu ena so tale.

E dau vakayagataka vakavuqa o Peresitedi Hunter na vosa tamata, tagane, kei na matatamata me vakaibalebaletaka ki na tamata taucoko, na tagane kei na yalewa. Dau vakayagataka wasoma talega o koya na vosa o koya, nona, kei na koya me vakaibalebaletaka ki na tagane kei na yalewa. Na veituvaki ni vosa oqo a sa matau tu ena nona gauna, ka sa dau vakaibalebaletaka dei tu ga ki na yalewa kei na tagane ena gauna e vakayagataka kina.