Hugna 11

Mag-ampo aron Makadawat sa mga Panalangin sa Langit

Kon mag-ampo kita pinaagi sa pagtuo, giandam nato ang atong mga kaugalingon aron makadawat sa mga panalangin nga giandam sa Langitnong Amahan kanato.

Gikan sa Kinabuhi ni Wilford Woodruff

Niadtong Marso 1835, samtang nagserbisyo sa iyang unang misyon, si Wilford Woodruff mibiyahe agi sa mga sapa ug mga katubigan sa habagatang silangang Estados Unidos. Aron makalabang sa mga katubigan, siya ug ang iyang kompanyon miputol og kahoy ug gihimo og sakayan. Luwas silang namugsay og mga 150 ka milya sa wala pa biyai ang sakayan ug nanglakaw. Si Presidente Woodruff nahinumdom nga misubay sila og dalan nga “diha sa katubigan, ug kasagaran niini natabunan sa lapok ug tubig, mga usa ka gatus ug setenta ka mga milya. Nanglakaw kami og mga kwarenta ka milya sa usa ka adlaw nga miagi sa lapukon ug tubigan nga kutob sa tuhod ang giladmon. Marso 24 kadto, human makabiyahe og mga napulo ka milya agi sa kalapukan, nagtakiang ako tungod sa grabing kasakit sa akong tuhod. Milingkod ko sa usa ka troso.’

Niining higayona sa biyahe, ang iyang kompanyon, kinsa naluya sa trabaho ug nakahukom nga mopauli, mibiya kaniya didto, nga naglingkod sa usa ka troso sa katubigan nga dunay mga buaya. Wala matandog, si Wilford Woodruff midangop sa Ginoo. Miingon siya, “Miluhod ako diha sa lapok ug nag-ampo, ug ang Ginoo miayo kanako, ug mipadayon ako sa paglakaw nga nagmalipayon.”¹

Milabay ang mga katuigan, si Presidente Woodruff mipakita sa iyang hugot nga pagtuo sa dihang siya, ang iyang asawa, ug ang uban mibiyahe sakay sa barko aron magserbisyo didto sa England. “Nagbiyahe na kami sulod sa tulo ka adlaw ug gabii sa kusog nga unos, ug gipadpad balik sa agi,” miasoy siya. “Sa katapusan akong gitawag ang akong mga kompanyon sa pagsulod sa kabin uban kanako, ug giingnan nako sila nga mag-ampo aron ang Ginoo mousab sa hangin. Wala ako mahadlok nga malunod; pero dili ako gusto nga ibalik ngadto sa New York, kay gusto ako nga mopadayon sa akong biyahe. Mihalad kami og pareho nga pag-ampo, ang mga lalaki ug mga babaye; ug sa dihang migawas kami ug walay usa ka minuto morag may usa ka tawo nga mikuha og espada ug mitigbas sa unos, ug nga kon moitsa kag panyo ug dili na gayud kini paliron.”²

Mga Pagtulun-an ni Wilford Woodruff

Katungdanan nato ang pag-ampo pinaagi sa hingpit nga pagtuo alang sa panabang nga atong gikinahanglan.

Adunay pahimangno sa atong Manluluwas nga kinahanglang sundon sa tanang mga Santos sa Dios, pero, nahadlok ako, nga wala kita magbuhat sa atong buluhaton, ug kana mao ang, pag-ampo kanunay ug dili magkaluya [tan-awa sa Lucas 18:1; D&P 88:126]. Nahadlok ako, nga isip mga katawhan, wala kaayo kita mag-ampo ginamit ang pagtuo. Kay kon dili niya kita panalipdan ug tubson ug luwason, walay laing gahum ang makahimo. Busa ang atong mga pag-ampo kinahanglang moabut ngadto sa mga dunggan sa atong Langitnong Amahan adlaw ug gabii.³

Ang mga lumulupyo sa yuta wala makaamgo unsay epekto ug kaayohan sa pag-ampo. Ang Ginoo maminaw ug motubag sa mga pag-ampo sa mga lalaki, mga babaye ug mga bata. Ang pag-ampo adunay dakong gahum, hilabihan gayud, aron mahatag ang mga panalangin sa Dios, kay sa bisan unsang butang.⁴

Kon ang kalibutan mobatok sa gingharian sa Dios niining katapusang mga adlaw, angay bang mahadlok ang mga Santos? … Kinahanglang dili kita mahadlok. Adunay usa ka butang nga atong buhaton, ug kana mao ang, pag-ampo ngadto sa Dios. Ang tanang matarung nga tawo nakahimo niini; bisan si Jesus ang Manluluwas, ang Bugtong Anak sa Amahan sa unod, kinahanglang magampo, gikan sa kamalig ngadto sa krus, sa tanang panahon; kada adlaw kinahanglan siyang motawag sa iyang Amahan sa paghatag kaniya og grasya aron katabangan siya sa iyang takna sa kasakit ug makapahimo niya sa pag-inom sa mapait nga kopa. Mao usab ang iyang mga tinun-an.⁵

Unsay kinahanglan natong madawat ug matagamtaman, katungdanan nato nga pangayoon kini sa Ginoo. Kinahanglan moduol kita Kaniya sa sekreto nga mga dapit ug ipahibalo ang atong gusto, aron ang atong mga pag-ampo madungog ug matubag. Ania dinhi ang atong kusog. Ang atong pagsalig sa Dios, ug dili sa tawo.⁶

Katungdanan sa kada Santos sa Dios … nga moabut ang iyang mga pag-ampo ngadto sa dunggan sa Ginoo sa Kasundalohan [Lord of Sabaoth], adlaw ug gabii sa tukmang panahon, sa nagpundok nga pamilya ug sa pribado nga mga dapit, kay ang Ginoo mopaluyo sa iyang mga katawhan, sa pagtukod sa Zion ug sa pagtuman sa iyang mga saad. …

… Mas dako ang akong pagtuo sa pag-ampo atubangan sa Ginoo kay sa laing baruganan dinhi sa yuta. Kon wala kitay pagtuo sa pag-ampo ngadto sa Dios, wala kitay makuha kaniya o sa ebanghelyo. Kinahanglang mag-ampo kita ngadto sa Ginoo, mangayo kaniya unsay atong gusto. Himoa nga ang mga pag-ampo niini nga katawhan moabut sa Ginoo kanunay sa tukma nga panahon, ug ang Ginoo dili mobaliwala niini, pero kini pagadunggon ug pagatubagon, ug ang gingharain ug ang Zion sa Dios mobarug ug mosanag, iyang isul-ob ang iyang matahum nga mga saput ug sininaan uban sa himaya sa iyang Dios, ug motuman sa tumong sa iyang organisasyon dinhi sa yuta [tan-awa sa D&P 82:14].⁷

Isip mga katawhan kinahanglang mobarug kita nga may pagtuo ug gahum sa atubangan sa Dios ug ipahibalo ang atong gusto, ug itugyan ang atong kapalaran sa Iyang mga kamot. Anaa sa Dios ang atong kapalaran. Magpabilin kini dinha.⁸

Kinahanglang mag-ampo kita aron makasabut sa kabubut-on sa Ginoo ug makadawat sa Iyang paggiya.

Akong gibati nga kinahanglang atong bayawon ang atong mga kasingkasing sa pag-ampo ngadto sa Dios nga atong Langitnong Amahan alang sa Iyang kalooy, ug nga Siya mogiya ug motudlo kanato pinaagi sa inspirasyon sa Espiritu Santo, aron ang atong mga hunahuna malamdagan, ug ang atong panabut mabuksan aron masabtan ang Iyang hunahuna ug kabubut-on mahitungod sa Iyang mga katawhan.⁹

Kon kamo nagduhaduha mahitungod sa bisan unsang katungdanan o buluhaton nga inyong himoonon, ayaw gayud padayon sa pagbuhat og bisan unsa hangtud nga nahimo ug naningkamot kamo sa pag-ampo ug makaangkon sa Espiritu. Kon ang Espiritu momando kaninyo sa pagpadayon o sa pagbuhat, husto kana; ug, pinaagi sa pagsunod sa iyang mga pagmando, mogawas kamo nga husto.

Pagadad-on kita ngadto sa daghang mga dapit panahon sa atong pagpangalagad sa mga nasud sa yuta, diin atong gihunahuna ang usa ka pamaagi kon husto ba; pero, kon wala kita masayud, mas maayo nga mag-ampo kita sa Ginoo, ug mangutana pinaagi sa hugot nga pagtuo aron kita matudloan sa pamaagi sa kinabuhi.¹⁰

Maningkamot kita sa matinud-anon ug mag-ampo ngadto sa Ginoo alang sa kaalam kada adlaw, aron kita makabaton og gahum ug magdaugon.¹¹

Ang mga ginikanan adunay sagrado nga mga katungdanan sa pagtudlo sa ilang mga anak sa pag-ampo ug sa pagsiguro nga ang pamilya mag-ampo.

Maoy hunahuna ug kabubut-on sa Dios nga ang matag lalaki ug babaye nga misulod sa pakigsaad sa kaminyoon, ug adunay mga anak nga gihatag ngadto kanila, inig ka dako na sa mga anak, kinahanglang tudloan sa pag-ampo.

Katungdanan sa mga Santos sa Ulahing mga Adlaw ang pagtudlo sa ilang mga anak sa pag-ampo samtang gagmay pa; sa pagtudlo kanila nga makasabut sa baruganan ug kaayohan sa pag-ampo, aron sila makaampo alang sa ilang mga ginikanan ug sa tanan nga gikinahanglan. Kon inyong sugdan niining paagiha ang mga bata, ug inyong bansayon sila diha sa kahadlok sa Ginoo, dili sila mobiya gikan niini. Ang pangulo sa pamilya kinahanglang dili mohimo sa tanang pag-ampo nga siya lang, pero kinahanglang motawag sa mga miyembro sa iyang pamilya sa pag-ampo, ug sa pagpangayo og panalangin diha [sa] lamesa.¹²

Kon magsunod kita sa ebanghelyo, ang atong mga pag-ampo pagatubagon uban sa usa ka panalangin.

Kita isip mga katawhan kinahanglang magmapainubssanon, magmainampoon, magmasinugtanon ngadto sa mga gahum sa Dios, aron kita makadawat sa mga panalangin sa atong Langitnong Amahan.¹³

Kinahanglang magpakabuhi kita sa paagi nga makaadto kita sa atubangan sa Ginoo ug mangayo niadtong mga panalangin, pinaagi sa hugot nga pagtuo ug pinaagi sa gahum, nga atong gikinahanglan aron mapadayon nato ang mga katuyoan sa Dios. … Gikinahanglan kini alang sa atong pag-uswag. …¹⁴

Tuyo sa Dios nga Iyang ihatag ngadto sa Iyang mga Santos ang maayong mga butang sa yuta, ingon man usab ang mga panalangin sa langit, kon sila maayo nang mogamit niini …

… Kadaghanan kaninyo nakahibalo sa pag-ampo; dayon napakyas sa pagpadangat sa inyong pag-ampo ngadto sa dalunggan sa Dios sa mga Kasundalohan [Lord of Sabaoth]; ug Siya maminaw kaninyo. … Pero ang mga panalangin sa langit maangkon lamang ug madumala pinaagi sa mga baruganan sa pagkamatarung.¹⁵

Kinahanglang wala kitay usikan nga panahon sa pag-andam sa atong mga kaugalingon sa mga butang nga moabut dinhi sa yuta; ug kinsa ang may gusto nga mawad-an sa iyang korona, sa iyang himaya, ug paglaum sa kinabuhing dayon nga iyang naangkon kaniadto pinaagi sa pagdawat sa ebanghelyo ni Jesukristo? Wala gayuy tawo ang adunay bahin sa Espiritu sa Ginoo. Mobarug kita ug mopalambo sa atong calling, ug maningkamot atubangan sa Ginoo hangtud nga atong maangkon ang Espiritu Santo, ug hangtud nga ang atong mga pag-ampo molahus sa tabil sa kahangturan ug moabut sa mga dalunggan sa Dios sa Kasundalohan [God of Sabaoth] ug pagatubagon pinaagi sa pagpanalangin kanato.¹⁶

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Ribyuha ang mga istorya nga anaa sa mga pahina 119–21]. Palandonga o hisguti ang nagkalain-laing paagi nga posibling buhaton ni Elder Woodruff sa kada usa niini nga mga sitwasyon. Unsa ang atong makat-unan niini nga tubag?
Unsay nakapadani ninyo samtang nagbasa kamo sa mga pagtulun-an ni Presidente Woodruff mahitungod sa atong katungdanan sa pag-ampo? (Tan-awa sa mga pahina 121–122.) Unsay gipasabut nga mag-ampo pinaagi sa pagtuo? Nganong magampo kita aron makadawat sa mga panalangin nga atong gikinahanglan? Unsa ang ubang mga katuyoan sa pag-ampo?
Basaha ang tibuok nga ikatulong paragrap sa pahina 121. Ngano nga ang Manluluwas kinahanglan pa nga mag-ampo? Unsa ang atong makat-unan gikan sa Iyang pag-ampo? (Tan-awa s Mateo 26:39; Juan 11:41; 3 Nephi 13:9–13.)
Sa unsang paagi nga ang pag-ampo makatabang kanato kon aduna kitay himoonon nga mga desisyon o kon kita adunay mga pangutana mahitungod sa atong mga katungdanan? (Tanawa sa pahina 122.)
Unsa ang pipila ka mga paagi nga gitubag sa Langitnong Amahan ang inyong mga pag-ampo? Unsay atong itubag kon ang tubag sa pag-ampo lahi sa tubag nga atong gipaabut nga madawat?
Unsa nga kasiguroan ang gihatag ni Presidente Woodruff sa mga ginikanan kinsa motudlo sa ilang mga anak sa pag-ampo? (Tan-awa sa pahina 123–24.) Unsa ang ubang mga baruganan sa pag-ampo nga kinahanglang itudlo sa mga ginikanan ngadto sa ilang mga anak? Sa unsang paagi nga ang mga ginikanan makatabang sa ilang mga anak sa paghimo nga ang pag-ampo mahimong kabahin sa ilang mga kinabuhi?
Sa pag-ampo sa pamilya, nganong importante nga ang tanang mga miyembro sa pamilya adunay kahigayunan sa pag-ampo? (Tan-awa sa pahina 123–24.) Sa unsa nga paagi nga ang pagampo nakapalig-on sa pamilya?
Tun-i ang katapusang seksyon sa kapitulo (mga pahina 123–25), pangita sa mga hiyas nga gisulti ni Presidente Woodruff nga kinahanglang atong mahuptan. Ngano nga kining mga butanga gikinahanglan samtang kita mag-ampo ug samtang mangita sa tubag sa atong mga pag-ampo?

May Kalabutan nga mga Kasulatan: Mateo 7:7; Santiago 1:5–6; 5:16; 2 Nephi 32:8–9; Alma 33:3–11; 34:17–28; 37:36–37; 3 Nephi 18:19–21; D&P 10:5; 68:28; 112:10