O Matafaioi ma Tiutetauave Paia o Tamaitai

Faaali atu le valoaga lenei mai ia Peresitene Spencer W. Kimball (1895–1985) ma fai atu i se tamaitiiti aoga e faitau leotele:

Ata

Peresitene Spencer W. Kimball

“O le tele o le faatupulaia ua oo mai i le Ekalesia i nei aso e gata ai, o le a oo mai ona o le toatele o tamaitai lelei o le lalolagi … o le a tosina mai i le Ekalesia i ni vaega toatele. O le a tupu lenei mea i se maualuga e faapea ona atagia mai ai i tamaitai o le Ekalesia le amiotonu ma le tulaga lelei i o latou olaga … o ni tamaitai iloga ma le tulaga ese—i ni tulaga fiafia—mai tamaitai o le lalolagi” (Aoaoga a Peresitene o le Ekalesia: Spencer W. Kimball [2006], 222–23).

• Aisea e te manatu ai o tamaitai amiotonu o le Au Paia o Aso e Gata Ai o le a avea ma mafuaaga mo le faatupulaia autu i le Ekalesia?

Ina ia faalautele i lenei manatu, fai i tamaiti aoga e suesue le Mataupu Faavae ma Feagaiga 25:1–3, 10, 13–16, ma vaavaai mo upu ma fuaitau na e faaalia ai pe faapefea e tamaitai o le Au Paia o Aso e Gata Ai ona mafai ona “iloga ma tulaga ese le fiafia” mai tamaitai o le lalolagi. Fesoasoani i tamaiti aoga e malamalama i le tusiga o lenei faaaliga i le faamatalaina atu o se faaaliga patino mo Ema Samita, ae e faatatau foi i tamaitai uma o le Ekalesia.

• O a mea e mafai ona tatou aoao mai nei fuaiupu i uiga faaalia e tatau ona sailia e tamaitai amiotonu?

• O le a faapefea ona e faamatalaina se aoaoga po o se mataupu faavae ua aoaoina i le Mataupu Faavae ma Feagaiga 25? (Ao tali mai tamaiti aoga, faasino atu o lenei mataupu faavae: I le avea ai ma soo o le Alii, e mafai e tamaitai ona faaaoga a latou meaalofa paia ma taleni e fesoasoani ai i le fausia o le malo o le Atua.)

Faaali atu le saunoaga lenei a Peresitene Spencer W. Kimball ma Elder M. Russell Ballard o le Korama a Aposetolo e Toasefululua:

Ata

Peresitene Spencer W. Kimball

“O le avea ma se tamaitai amiotonu o se mea viia lea i soo se tupulaga. O le avea ma se tamaitai amiotonu i le taimi faaiu i lenei lalolagi, a o lumanai le afio mai faalua o lo tatou Faaola, o se valaauga e faapitoa lona tamalii. O le malosi ma aafiaga o tamaitai amiotonu i aso nei e mafai ona faasefuluina [le tulaga] e oo i ai i taimi e sili atu ona filemu.Aoaoga: Spencer W. Kimball, 217).

Ata

Elder M. Russell Ballard

Tuafafine, o la outou lio o faatosinaga o se lio tulaga ese—o se lio e le mafai ona kopiina e tagata. E leai se tasi e mafai ona puipuia lo tatou Faaola mai ni isi faatauanau po o le mana nai lo outou, o afafine o le Atua,—o loo i ai se malosiaga ma le talitonuga i totonu. O le mana o le siufofoga o se tamaitai liliu mai e le mafuatiaina, ma o le Ekalesia e manaomia tou leo ua sili atu nei nai lo se isi lava taimi” (M. Russell Ballard, “Alii ma Tamaitai ma le Mana o le Perisitua,” Liahona, Set. 2014, 33).

Fesili i tamaitai i lau vasega po o a manatu ma lagona ua latou maua ao latou mafaufau i le uunaiga e mafai ona latou maua i o latou aiga, i le Ekalesia, ma o latou alalafaga. Faamamafa atu matafaioi taua o loo i ai i tamaitai o ni taitai i le Ekalesia.

E mafai ona e fai atu i alii i lau vasega e faasoa mai pe o faapefea ona latou vaaia le malosiaga ma le uunaiga o tamaitai i a latou uarota po o paranesi i le aumaia o tagata ia latalata atili i le Tama Faalelagi.

Valaaulia se tamaitiiti aoga e faitau leotele le saunoaga lenei mai ia Elder M. Russell Ballard o le Korama a Aposetolo e Toasefululua:

Ata

Elder M. Russell Ballard

“O alii ma tamaitai e eseese meaalofa, eseese malosiaga, ma eseese vaaiga po o manatu ma lagona. O se tasi lea o mafuaaga autu tatou te manaomia ai le tasi ma le isi. E manaomia se alii ma se tamaitai e fausia se aiga, ma e manaomia alii ma tamaitai e faataunuuina le galuega a le Alii” (“Alii ma Tamaitai ma le Mana o le Perisitua,” 32).

• E ese mai nisi eseesega iloga faaletino, o a nisi o auala ua e matauina e masani ona eseese ai alii ma tamaitai mai le tasi ma le isi?

Faamatala atu e ese mai nei eseesega masani, o alii ma tamaitai e eseese foi matafaioi paia, e pei ona faamatalaina i le “O le Aiga: O Se Folafolaga i le Lalolagi” (tagai i le parakalafa lona fitu). Faaali atu le saunoaga lenei a Elder Russell M. Nelson o le Korama a Aposetolo a Toasefululua:

Ata

Elder Russell M. Nelson

“Ae o outou tuafafine, sa muai filifilia outou a’o le’i faavaeina le lalolagi e fanauina ma tausia fanau a le Atua; o le faia o lena mea, ua outou faamamaluina ai le Atua (tagai MF&F 132:63)” (“O Le a Le Mea o Le a E Filifilia?” Liahona, Ian. 2015, 19.

• E mafai faapefea e tamaitai ona viia le Atua ao latou fanauina ma tausia fanau a le Atua? (Ao faasoa mai e tamaiti aoga o latou manatu, fesoasoani ia i latou ia malamalama i lenei mataupu faavae: Ao taliaina e tamaitai lo latou matafaioi atofaina paia o ni tina e fanauina ma tausia fanau a le Atua, latou te viia o Ia ma avea atili faapei o o tatou Matua Faalelagi. Faamatala atu o le aumaia o fanau i le lalolagi o se vaega taua o le fuafuaga o le faaolataga a le Tama Faalelagi.)

Faasoa atu le saunoaga lenei a Elder Neil L. Andersen o le Korama a Aposetolo e Toasefululua:

Ata

Elder Neil L. Andersen

“O le tele o leo i le lalolagi i le taimi nei o loo tuuitiitia ai le taua o le fanauina o se fanau pe o fautua mai ina ia tolopo pe faaitiitia ia fanau i totonu o se aiga. Talu ai nei na faasino ai au e la’u fanau teine i se uepisaite na tusia e se tina Kerisiano (e le auai i le tatou faatuatuaga) e toalima le fanau. Sa ia faaalia ai ni ona manatu: ‘[O le tuputupu ae] i lenei aganuu, ua matua faigata ai ona maua se vaaiga faaletusipaia e uiga i le tulaga faatina. … O fanau e lei oo ina faatauaina kolisi. E lei taitai faitaulia i femalagaaiga i le lalolagi. E lei oo i le taimi e tatau ai ona o e tafafao i po. … E lei oo foi i soo se galuega e te mauaina pe faamoemoe e maua.’ Ona ia toe faaopoopo mai lea: “O le tulaga faatina e le o se mea e te faia e fai ma mea e te fiafia i ai, ae o se valaauga’” (“Tamaiti,” Ensign po o le Liahona, Nov. 2011, 28).

• O le a le uiga o le “tuuitiitia” le taua o le fanauina o fanau?

• O a faigata ua e vaaia i tamaitai e “tuuitiitia” le taua o le fanauina o fanau?

• O a mea e mafai e talavou o le Ekalesia ona fai e faatumauina ai se vaaiga sao i le taua o le fanauina o fanau?

Ia faamautinoa i tamaiti aoga o filifiliga e uiga i le mauaina o fanau po o le aofai o fanau e mauaina o ni mataupu patino i le va o le tane ma le ava ma le Atua. O se lesona o i luma o le a talanoaina atili ai nei mataupu.

Valaaulia tamaiti aoga e faitau ma faatusatusa le 2 Timoteo 1:5; 3:14–15 ma le Alema 56:47–48; 57:21, ma vaavaai mo le uunaiga amiotonu a tina e mafai ona maua e a latou fanau. (O le aoao e faatusatusa fuaitau o mau o se tomai faalesuesuega o tusitusiga paia e mafai e tamaiti aoga ona faaaoga i o latou olaga atoa.)

• O a mea ua aoaoina mai e nei fuaitau e uiga i le matafaioi a se tina? (Faamamafa atu le mataupu faavae lenei: Afai e aoao atu e tina le talalelei ia latou fanau, ua latou fesoasoani ia latou fanau ia maua le faatuatua ma saunia i latou ia ola amiotonu.)

• E mafai faapefea e nei fuaitau ona fesoasoani e faamatala pe aisea ua matuai galue malosi ai Satani e tuuitiitia le taua o le matafaioi a tina?

• O a uiga faaalia o tamaitai e mafai ona fesoasoani ia i latou ia faamanuiaina ai i o latou matafaioi o ni tina?

Ia faaeteete i le meamoni faapea o nisi o tamaitai i lau vasega atonu e le faaipoipo lava, ma afai latou te faaipoipo, atonu e le mafai ona latou maua ni fanau. Faaaoga le faamatalaga lenei a Sister Sheri L. Dew, o se fesoasoani talu ai i le au peresitene aoao o le Aualofa, e fesoasoani i au tamaiti aoga ia malamalama ai o le matafaioi a le tina o se tofi paia a tamaitai uma lava:

Ata

Sheri L. Dew

“E faapei ona muai faauuina alii agavaa latou te umia le perisitua i le olaga nei, e faapena foi ona faaeeina i tina amiotonu i le muai olaga, le matafaioi paia o le tulaga faatina. O le tulaga faatina o se mea e sili atu nai le fanauina o fanau. O le fatu o le tulaga po o ai i tatou i le avea ai ma ni tamaitai. O loo faamalamalama mai ai lo tatou faasinomaga moni, lo tatou tulaga ma le natura paia ma uiga tulaga ese na tuuina mai e lo tatou Tama. …

“… O nisi tina e manaomia le faatalitali mo ni fanau. … Peitai o le faasologa lava ia o taimi a le Alii mo i tatou taitoatasi, e le aveeseina ai lo tatou natura. O lona uiga, o nisi o i tatou, e tatau ona sailia nisi auala e faatina ai [i fanau a isi]. Ua matua siomia i tatou ia i latou o loo manaomia le alofa ma le taitaiga” (“Pe Le o Tatou Uma Ea Oni Tina?” Liahona, Ian. 2002, 112-114).

• E faapefea ona fesoasoani le saunoaga a Sister Dew e faalautele ai lou malamalama i le tulaga faatina?

Fesili i tamaiti aoga pe i ai se tasi o i latou e fia faasoa mai o latou manatu ma lagona e uiga i le aafiaga amiotonu a o latou lava tina.

Faaali atu le saunoaga lenei a Sister Julie B. Beck, le peresitene aoao talu ai o le Aualofa, lea na saunoa i tamaitai e uiga i lo latou manaomia ona faataunuuina matafaioi ua tuuina atu e le Atua ia i latou. Fai i se tamaitiiti aoga e faitau leotele, ma valaaulia tamaiti aoga e mafaufau i le mea e tupu pe a le faataunuuina e tamaitai o latou matafaioi.

Ata

Julie B. Beck

© Busath.com

“Ma afai tatou te le faia la tatou vaega, e leai se isi na te faia mo i tatou. … E le mafai ona tatou faamatuuina atu [o la tatou vaega i le fuafuaga o le fiafia a le Tama Faalelagi]. E le mafai ona tatou tuuina atu i se isi tagata. E patino ia i tatou. E mafai ona tatou teenaina, e mafai ona tatou faafitia, ae o la tatou vaega lava, ma tatou te tali atu mo lea tulaga. O le a i ai se aso o le a tatou manatuaina uma ai mea na tatou iloaina ae tatou te lei fananau mai. O le a tatou manatua sa tatou tau i se taua tele mo lenei avanoa. E faapefea ona tatou ausia lenei tiutetauave? Tatou te tuuina i aso taitasi o tatou malosi i le galuega tulaga ese lea tatou te faia” (“Malamalama i Matafaioi Paia a Tamaitai,” Liahona, Fep. 2009, 67).

• O a ni ou manatu ma lagona e uiga i le fuaitau “Afai tatou te le faia la tatou vaega, e leai se isi e faia mo i tatou”?

• O le a le mea o le a leiloa mai le aiga, mai lau uarota po o le paranesi, po o le lalolagi pe afai e le faia lava e tamaitai la latou “vaega”?

• O a nisi o auala e mafai ai e tamaitai talavou matutua ona faataunuu a latou matafaioi paia o ni tamaitai i le malo o le Tama Faalelagi?

Molimau atu i le paia ma le manaomia o matafaioi a tamaitai ia avea ma ava ma tina amiotonu, ma faamamafa atu faapea o lo tatou Tama Faalelagi o le a i ai se aso e tuuina mai ai faamanuiaga uma lava i Ana fanau amiotonu. Valaaulia tamaiti aoga e mafaufau e tau atu i se tina latou te iloa lo latou talisapaia o ia mo le ala ua ia faataunuuina ai lana matafaioi paia .

Faaiu i le fesili atu i tamaiti aoga pe i ai nisi o i latou e fia faasoa mai a latou molimau i faamanuiaga e oo mai pe a iloa e tamaitai pe o ai i latou i le fuafuaga o le faaolataga a le Tama Faalelagi ma faatinoina lena malamalama.