Tsir 11
Nephi hu Ewuradze no Sunsum na onya nkwadua no ho enyido-adzehu—Ohu Nyankopɔn ne Ba no ne nã nye mbrɛ Nyankopɔn si kotow—Ohu Nyame Eguambaa no n’enuma, ne somdwumadzi na ne mbeamudua mu bɔ—Ohu Eguambaa no n’Asomafo Duebien no hɔn frɛ na hɔn som dwuma. Bɛyɛ mfe 600–592 Ansaana wɔbɔwo Christ.
1 Na ɔbaa dɛ ekyir yi a minyaa pɛ dɛ muhu ndzɛmba a m’egya hunii no; na minyaa gyedzi dɛ Ewuradze botum ada no edzi akyerɛ me; aber a metse hɔ rodwendwen ho wɔ m’akoma mu no, Ewuradze no Sunsum hwiim me kɔree, nyew ɔdze me kɔr bepɔw tsentsen bi a munnhun ne saso na m’anan so nsii bi do da do.
2 Na Sunsum no see me dɛ: Hwɛ, ebɛnadze na erohwehwɛ?
3 Na mesee dɛ mepɛ dɛ muhu dza m’egya hunii no.
4 Na Sunsum no see me dɛ ana egye dzi dɛ w’egya hun dua no a ɔakã ho asɛm no?
5 Na mesee dɛ: Hwɛ ɔwoara inyim dɛ megye m’egya ne nsɛm nyinara dzi.
6 Na ber a mekãa dɛm nsɛm yi no, Sunsum no dze ndze kɛse tseaa mu see dɛ: Hosanna nkã Ewuradze, ɔsorsor Nyankopɔn; osiandɛ Ɔno nye Nyame wɔ asaase nyinara do, nyew, ɔbɔ adze nyinara do. Na nhyira akã ɔwo, Nephi, osiandɛ egye ɔsorsor Nyankopɔn ne Ba no dzi; dɛm ntsi, ibohu ndzɛmba a erohwehwɛ no.
7 Na hwɛ wɔdze dɛm sɛnkyerɛdze yi bɛma wo, dɛ ehu dua no a ɔsow eduaba no a w’egya dzii no, ibohu nyimpa bi a ofi sor risian, na no ho na ebɛgye dase; na agye no ho dase ewie no, akyerɛw ato hɔ dɛ ɔno nye Nyankopɔn ne Ba.
8 Na ɔbaa dɛ Sunsum no see me dɛ: Hwɛ! Na mohwɛe na muhun dua no; na ɔtse dɛ dua no a m’egya hunii no; na ne fɛw wɔnnka, nyew, ɔsen adze fɛɛfɛw biara; na ɔyɛ fitaayɛ bor esukwankyɛba ne fitaayɛ koraa.
9 Na ɔbaa dɛ aber a muhun dua no ekyir no mesee Sunsum no dɛ: Mehu dɛ edze dua no a ɔsombo kyɛn adze nyinara no akyerɛ me.
10 Na ɔsee me dɛ: Ebɛnadze na erohwehwɛ?
11 Na mesee no dɛ: Nkyɛ meehu dɛm adze yi ne nkyerɛase—na mekasaa kyerɛɛ no dɛ mbrɛ nyimpa rekasa; osiandɛ muhun dɛ ɔwɔ nyimpadua su; naaso nna minyim dɛ ɔyɛ Ewuradze no Sunsum; na ɔkasaa kyerɛɛ me dɛ mbrɛ nyimpa kasa kyerɛ ne nyɛnko.
12 Na ɔbaa dɛ ɔsee me dɛ: Hwɛ! na meyɛɛ dɛ morohwɛ no, na mennhu no; nna ɔayew wɔ m’enyi do.
13 Na ɔbaa dɛ mohwɛe na muhun Jerusalem kuropɔn no na nkuropɔn binom so. Na muhun Nazareth kuropɔn no; na Nazareth kuropɔn no mu no muhun ɔbaabun bi a no ho yɛ fɛw na ɔyɛ fitaa so.
14 Na ɔbaa dɛ muhun dɛ ɔsorsor ebue; na sor ɔbɔfo siaan famu begyinaa m’enyim; na ɔsee me dɛ: Nephi, ebɛnadze na ehu yi?
15 Na mesee no dɛ: Ɔbaabun a, na no ho yɛ fɛw sen mbaabun nyinara.
16 Na ɔsee me dɛ: Ana inyim mbrɛ Nyankopɔn si kotow?
17 Na mesee no dɛ: Minyim dɛ ɔdɔ ne mba; na mbom minnyim ndzɛmba nyinara ase.
18 Na ɔsee me dɛ: Hwɛ, ɔbaabun no a ihun no no yɛ Nyankopɔn ne Ba ne nã wɔ honam afamu.
19 Na ɔbaa dɛ muhun dɛ Sunsum no dze no kɔ; na aber a Sunsum no dze no kɔree ekyir ma mber kakra guu mu no, sor ɔbɔfo no kasaa kyerɛɛ me, see dɛ: Hwɛ!
20 Na mohwɛe na muhun ɔbaabun no bio, na otur abofra wɔ n’abaw mu.
21 Na sor ɔbɔfo no see me dɛ: Hwɛ Nyame Eguambaa, nyew, Onnyiewiei Egya ne Ba no! Ana dua no a w’egya hunii no inyim ase?
22 Na miyii no ano see dɛ: Nyew, ɔyɛ Nyame no dɔ no a ɔhɛnhɛn adasamba akoma mu no; dɛm ntsi ɔyɛ adze pa a ɔsom bo kyɛn adze nyinara.
23 Na ɔkasaa kyerɛɛ me see dɛ: Nyew, na ɔma ɔkra enyigye mbordo.
24 Na ɔkãa dɛm nsɛm yi ekyir no, ɔsee me dɛ: Hwɛ! Na mohwɛe, na muhun Nyankopɔn ne Ba no dɛ orisian adasamba mu; na muhun dɛ dodowara etwa ahwe n’ananadze na wɔrosom no.
25 Na ɔbaa dɛ muhun dɛ dadze poma no a m’egya hunii no yɛ Nyame n’asɛm a ɔkɔbɔ nkwa nsunyiwa no mu, anaaso n’ano pem nkwadua no a dɛm nsu no gyina hɔ ma Nyame no dɔ no; na muhunii so dɛ nkwadua no gyina hɔ ma Nyame no dɔ.
26 Na sor ɔbɔfo no see me bio dɛ: Hwɛ na hu mbrɛ Nyankopɔn si kotow!
27 Na mohwɛe na muhun wiadze Pomfo no, nyia m’egya akã noho asɛm no; na afei so muhun nkɔnhyɛnyi no a ɔrebɛba ebesiesie n’akwan no. Na Nyame Eguambaa no kɔree ma onumaa no; na onumaa no wiei no, muhun dɛ sor ebue, na Sunsum Krɔnkrɔn no fi sor ba besi no do wɔ ebubur su do.
28 Na muhun dɛ ɔnam nyimpa no mu resom hɔn wɔ tum nye enyimnyam kɛse mu; na dɔm pii etwa no ho ehyia ritsie no; na muhun dɛ woeyi no edzi efi hɔn mu.
29 Na muhun afofor duebien bi so a wodzi n’ekyir. Na ɔbaa dɛ Sunsum no bɛfaa hɔn fii m’enyido kɔree. Na mennhu hɔn bio.
30 Na ɔbaa dɛ sor ɔbɔfo no kasaa kyerɛɛ me bio, see dɛ: Hwɛ! na mohwɛe, na muhun dɛ sor ebue bio, na muhun sor abɔfo dɛ worisian ba adasamba do; na wɔsoom hɔn.
31 Na ɔkasaa kyerɛɛ me bio dɛ: Hwɛ! Na mohwɛe na muhun Nyame Eguambaa no dɛ orisian adasamba mu. Na muhun dɔm pii a wɔyar, na hɔn a yarba ahorow, na mbɔnsam na esunsum fĩ rehaw hɔn; na sor ɔbɔfo no kasae na ɔdaa iyi nyinara edzi kyerɛɛ me. Na Nyame Eguambaa no tum no saa hɔn yarba; na wotuu mbɔnsam na sunsum fĩ nyinara fii hɔn mu.
32 Na ɔbaa dɛ sor ɔbɔfo no kasaa kyerɛɛ me bio dɛ: Hwɛ! Na mohwɛe na muhun Nyame Eguambaa no, dɛ dɔm no akyer no; nyew, Nyame a ɔwɔ hɔ daapem ne Ba no, wiadze buu no atsɛn; na muhunii na midzii ho dase.
33 Na emi, Nephi, muhun dɛ wɔama no do asɛn mbeamudua do na woeku no ama wiadze bɔn.
34 Na wokum no wiei no, muhun asaase no do dɔmtutuw dɛ wɔaboa hɔn ano dɛ wɔrokõ tsia Eguambaa n’asomafo no; na dɛm na Ewuradze no sor ɔbɔfo no dze frɛɛ duebien no.
35 Na asaase no do dɔmtutuw no boaboaa hɔn ano; na muhun dɛ wɔwɔ dan kɛse pontonn bi mu, tse dɛ dan no a m’egya hunii no Na Ewuradze no sor ɔbɔfo no kasaa kyerɛɛ me bio dɛ: Hwɛ wiadze na no mu nyansa nyinara; nyew, hwɛ Israel fifo aboaboa hɔn ano dɛ wɔrobɔkõ etsia Eguambaa n’asomafo duebien no.
36 Na ɔbaa dɛ muhunii na midzii ho dase dɛ dan kɛse pontonn no yɛ wiadze ahantan; na ɔhwee ase, na n’asehwe no yɛɛ kɛse. Na Ewuradze no sor ɔbɔfo no kasaa kyerɛɛ me bio dɛ: Dɛm na wɔbɛsɛɛ aman, ebusuafo nyina, kasa horow, na nyimpa a wɔbɔkõ etsia Eguambaa n’asomafo duebien no.