Nsɛmfua a wodzii kan kyerɛɛw no wɔ Greek nkyerɛwee no mu no n’asekyerɛ nye dɛ “fa bɔ mu” anaadɛ “fa hyɛ mu” mu. Nsumuhyɛ enuma a, obi a ɔwɔ tumdzi yɛ no nye asɛmpa no n’ayɛdze a odzi kan, na ohia dɛ nyimpa ne nsa kã ansaana ɔabɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne ba. Dza odzi ne kan nye gyedzi wɔ Jesus Christ mu na nnuho. N’ekyir no, otwar dɛ nyimpa ne nsa kã Sunsum Krɔnkrɔn n’akyɛdze no ansaana oedzi mu (2 Ne. 31:13–14). Nyimpa hia nsu na Sunsum mu enuma ansaana oetum ahɛn celestial ahenman no mu. Adam na wodzii kan numaa no (Moses 6:64–65). Jesus so wonumaa no dze hyɛɛ ndzeyɛtsenenee nyina mã na wɔdze kyerɛɛ kwan maa adasamba nyina (Matt. 3:13–17; 2 Ne. 31:5–12).
Ɔnam dɛ nnyɛ nyimpa nyina na wɔtse asɛmpa no wɔ ber a nna wɔtse nkwa mu no ntsi, Ewuradze ama kwan dɛ wɔmma binom ngyina ma wonnuma hɔn mma ewufo. Dɛm ntsi, hɔn a wɔgye asɛmpa no wɔ sunsum wiadze mu no botum afata dɛ wɔhɛn Nyankopɔn n’ahenman mu.