1 Ao e koro bukina bwa e taetae te anera nakoiu, ni kangai: Nooria! Ao I taraia ao I noori aaba ma abanuea aika a mwaiti.

2 Ao e taku te anera nakoiu: Tera ae ko nooria? Ao I kaeka: I noori aaba ma abanuea aika a mwaiti.

3 Ao e taku nakoiu: Aikai bon abaia ma abanueaia Tientaire.

4 Ao e koro bukina bwa I a noora te ekaretia ae korakora ae kateaki i aon abaia Tientaire.

5 Ao e taku te anera nakoiu: Noora aron katean te ekaretia ae korakora riki ribakina nakon taian ekaretia riki tabeua, ae e na tiringia ana aomata aika a itiaki te Atua, eng, ae e na bwainikirinia ao e kabaeiia inano ao e katoka i aoia te amo te biti, ao e kairia nakon te tautoronaki.

6 Ao e koro bukina bwa I a noora te ekaretia ae korakora aio man ribaki, ao I nooria naba ae bon te riaboro ae kateia.

7 Ao I noori naba taian koora, ma tirewa, ma tirika, ma kunnikai aika a uraura, ma rinen aika a raoiroi rarangakia, ma kunnikai riki tabeua aika moan te kakawaki; ao I a nooriia naba kabekaau aika a mwaiti.

8 Ao e taetae te anera nakoiu, ni kangai: Noora te koora, ma te tirewa, ma taian tirika, ma kunnikai aika a uraura, ma rinen aika a raoiroi rarangakia, ma kunnikai aika a kakawaki, ma kabekaau, bon maten nanon te ekaretia ae korakora man ribaki aio.

9 Ao ibukin kamoamoakia n te aonaba ao a tiringiia naba ana aomata aika itiaki te Atua, ao a kairia nakon te tautoronaki.

10 Ao e koro bukina bwa ngke I taraia ao I a noori raan aika a mwaiti; ao a karaureia Tientaire ma kanoaia tariu.

11 Ao e koro bukina bwa e taku te anera nakoiu: Nooria bwa a na taonaki kanoaia tarim n unin te Atua.

12 Ao I a taraia ao I a noora te mwaane temanna i buakoia Tientaire, are e karaureaki ma kanoaia tariu n raan aika mwaiti; ao I a noora Tamnein te Atua, bwa e ruo n ninia te mwaane aio; ao e a waaki nako n riaon raan aika a mwaiti, nakoia kanoan tariu, ake a mena i aon te aba ni berita.

13 Ao e koro bukina bwa I noora Tamnein te Atua, bwa e mwakuri i aoia Tientaire ake tabemwaang; ao a otinako man te tautaekanaki, riaon raan aika mwaiti.

14 Ao e koro bukina bwa I a nooriia Tientaire ni mwaitia aika a uanao i aon te aba ni berita; ao I a noora naba unin te Atua, ae e mena i aoia kanoaia tariu; ao a kamaenakoaki imataia Tientaire ao a oreaki irouia.

15 Ao I a noora Tamnein te Uea, ao e mena i aoia Tientaire, ao a rikirake aroia ao a ana te aba bwa abaia ni bwaibwai; ao I nooria bwa a mainaina, ao a rang n tamaroa man tikiraoi, n ai aroia au botanaomata i mwaain tiringakia.

16 Ao e koro bukina bwa Ngai ae Nibwaai, I a nooriia Tientaire ake a tia n otinako man te tautaekanaki ni karinanoia imatan te Uea; ao e a mena mwaakan te Uea irouia.

17 Ao I a nooria bwa a botaki tinaia Tientaire i aon marawa ao i aon te aba naba, bwa a na buakaniia.

18 Ao I nooriia bwa e mena mwaakan te Atua irouia, ao e mena naba unin te Atua i aoia ni kabane ake a botaki bwa a na buakaniia.

19 Ao Ngai ae Nibwaai, I a nooriia bwa Tientaire ake a otinako man te tautaekanaki a kamaiuaki ni mwaakan te Atua mai nanon baia aaba nako ake tabeua.

20 Ao e koro bukina bwa Ngai ae Nibwaai, I a nooria naba bwa a rikirake i aon te aba; ao I a noora te boki, ao e uotaki i buakoia.

21 Ao e taku te anera nakoiu: Ko ataa nanon te boki?

22 Ao I taku nakoina: I aki ataia.

23 Ao e taku: Nooria e otinako mai nanon wiin te Iutaia. Ao Ngai, ae Nibwaai, I a bon nooria; ao e taku nakoiu: Te boki are ko nooria bon te rongorongoia Iutaia, are kanoana bon taekan ana berita aika tabu te Uea, are e a tia ni karaoi nakoia kaain te bata are Iteraera; ao iai naba i nanona taekan aia taeka ni burabeti burabeti aika tabu; ao bon te rongorongo ae titebo ma taian koroboki aika a koreaki i aon taian bwaatua aika buraati, ma aki rangi ni mwaiti; ma e ngae n anne, bon iai i nanona ana berita aika tabu te Uea, ake e a tia ni karaoia nakoia kaain te bata are Iteraera; mangaia ae, a bon rangi ni bongana ibukiia Tientaire.

24 Ao e taku ana anera te Uea nakoiu: Ko a tia n noora te boki are otinako mai wiin te Iutaia; ao ngkana e otinako mai wiin te Iutaia, kanoana bon taekan ana euangkerio ae e bwanin te Uea, are a kakoaua abotoro ake tengaun ma uoman; ao a kakoaua n aron te koaua are e mena iroun Ana Tiibu te Teei te Atua.

25 Mangaia ae, bwaai aikai a otinako mai irouia Iutaia n te aro ae e itiaki nakoia Tientaire, n aiaron te koaua are i nanon te Atua.

26 Ao ngke a tia ni waaki nako i nanon baia ana abotoro te Tiibu te Teei ake tengaun ma uoman, mai irouia Iutaia nakoia Tientaire, ao ko na noora iai katean te ekaretia are e korakora ma n ribaki, ae moan te ribaki riki nakoia ekaretia riki tabeua; bwa noria, a tia ni buuti man ana euangkerio te Tiibu te Teei mwakoro aika a mwaiti aika a matata ma ni kakawaki; ao a mwaiti naba ana berita aika tabu te Uea ake a tia ni buutaki.

27 Ao a karaoi bwaai aikai ni kabane bwa aonga ni kabwaouai kawain te Uea aika a eti, bwa a aonga ni kamatakiaki mataia ma ni kamatoai nanoia natia aomata.

28 Mangaia ae, ko kona n nooria bwa ngke e a tia te boki aio n ri nanon bain te ekaretia ae korakora man ribaki, ao a mwaiti bwaai aika a maataata ma ni kakawaki ake a tia n anaaki mai nanona, are bon ana boki Ana Tiibu te Teei te Atua.

29 Ao ngke a tia ni buutaki bwaai aika a maataata ma ni kakawaki aikai ao e a roko n abaia nako Tientaire; ao ngke e a tia n roko n abaia nako Tientaire, eng, n riaon naba marawa aika a mwaiti ake ko a tia n noori ma Tientaire ake a tia n otinako man te tautoronaki, ko nooria—bwa ngkai a mwaiti bwaai aika a maataata ma ni kakawaki ake a tia ni buutaki mai nanon te boki aio, aika a mataata ibukin ootaia natiia aomata, n aron te maataata are e reke mai iroun Ana Tiibu te Teei te Atua—ao ibukin bwaai aikai ake a tia n anaaki mai nanon ana euangkerio te Tiibu te Teei, ao a mwaiti aika a tatanako, eng, n te aro are e roko mwaakan Tatan ae korakora i aoia.

30 E ngae n anne, ko a tia n noria bwa Tientaire ake a tia n otinako man te tautoronaki, ao n tabekaki rake ni mwaakan te Atua i aoia aba nako, i aon te aba are e rine i aoia aba nako, are bon te aba are e a tia ni berita n ae tabu te Uea ae te Atua nakon tamam bwa a na kona kanoana ni karikiia bwa abaia ni bwaibwai; mangaia ae ko noria bwa e bon aki kona te Uea ae te Atua ni kariaia Tientaire bwa a na tiringia ni kabane kanoam ake a irengan, ake a mena i buakoia kanoaia tarim.

31 E aki naba kona ni kariaia ae Tientaire a na kona n tiringia kanoaia tarim.

32 E aki naba kariaia te Uea ae te Atua bwa a na tiku Tientaire i nanon te aro ni mataki, are ko a tia n nooria bwa a mena i nanona, ngkai a tia n anaaki kanoan ana euangkerio te Tiibu te Teei aika a mataata ma ni kakawaki ake a tauaki iroun te ekaretia ae ribaki, are ko noora kateana.

33 Mangaia ae e taku Ana Tiibu te Teei te Atua: N na nanoangaia Tientaire, ma ni kawaria nikiraia kaain te bata are Iteraera n te motikitaeka ae korakora.

34 Ao e koro bukina bwa e taetae ana anera te Uea nakoiu, ni kangai: Taraia, e taku ana Tiibu te Teei te Atua, i mwin ae I tia ni kawariia nikiraia kaain te bata are Iteraera—ao nikiraia ae I taekinia aio bon kanoan tamam—mangaia ae, i mwin ae I tia ni kawaria n tain te motikitaeka, ao n tiringia ni baia Tientaire, ao i mwin ae e korakora bebei nakoia Tientaire, ngkai e a tia n anaaki mwakoron ana euangkerio te Tiibu te Teei aika rang ni mataata ma ni kakawaki are a tia n tauaki iroun te ekaretia ae ribaki, are bon tinaia kabekaau, e taku te Tiibu te Teei—N na bon nanoangaia Tientaire n te bong arei, n te aro are N na kaoti nakoia, n oin mwaakau, angiin au euangkerio, are e na mataata ma ni kakawaki, e taku te Tiibu te Teei.

35 Bwa nooria, e taku te Tiibu te Teei: N na kaotai nakoia kanoam, ao a na koroi bwaai aika a mwaiti ake N na reireinia, aika a na mataata ma ni kakawaki; ao i mwin kamaunanakoia kanoam, ao a na kerikaaki n aia aki onimaki, ao kanoaia naba tarim, nooria, a na karabaki bwaai aikai, ao a na kaokaki nakoia Tientaire, rinanon ana bwaintituaraoi ao mwaakan te Tiibu te Teei.

36 Ao inanoia e na bon koreaki au euangkerio, e taku te Tiibu te Teei, ao au bwaa ma au kamaiu.

37 A na kakabwaiaki ake a ukoukora kaokan au Tion n te bong arei, bwa a na reke irouia ana bwaintituaraoi ma mwaakan te Tamnei ae Raoiroi; ao ngkana a teimatoa ni karokoa te toki ao ana uotaki rake n te kabanea ni bong, ao a na kamaiuaki i nanon abanuean te Tiibu te Teei ae e aki totoki; ao ake a tataekina te rau, eng, taekan te kimwareirei, a na koro raoi tamaroaia ngkana a tei i aon te maunga.

38 Ao e koro bukina bwa I a nooriia nikiraia kanoaia tariu, ao ana boki naba Ana Tiibu te Teei te Atua, are e otinako mai nanon wiin te Iutaia, ao e a reke irouia Tientaire ao ni buti nakoia nikiraia kanoaia tariu.

39 Ao ngke e a tia n reke irouia ao I a noori boki riki tabeua, ake a reke nakoia mai irouia Tientaire man mwaakan te Tiibu te Teei, ibukin anakin nanoia Tientaire ao nikiraia kanoaia tariu, ao Iutaia naba ake a maenako i aon te aonaba, bwa aia rongorongo burabeti ao abotoro ake tengaun ma uoman a bon koaua.

40 Ao e taetae te anera nakoiu, ni kangai: Taian kabanea n rongorongo aikai, ake ko a tia n noori i buakoia Tientaire, a na kaota koauan are te moan, ake mai irouia ana abotoro ake tengaun ma uoman te Tiibu te Teei, ao a na kaoti naba bwaai aika a mataata ma ni kakawaki ake a tia n anaaki mai irouia; ao a na kaotaki nakoia reeti, neewe, ao aomata nako bwa Ana Tiibu te Teei te Atua bon Natin te Tama ae Akea Tokina, ao bon te Tia Kamaiua te aonaba; ao a na riai n nakoina aomata ni kabane, bwa ngkana aki ao a na aki kona ni kamaiuaki.

41 Ao a na riai n roko n aron taian taeka ake a na taekinaki mai wiin te Tiibu te Teei; ao ana taeka te Tiibu te Teei e na kaotaki i nanon aia rongorongo kanoam, ao i nanon naba aia rongorongo ana abotoro ake tengaun ma uoman te Tiibu te Teei; mangaia ae a na uaia n riki bwa ti teuana; bwa bon ti temanna te Atua ao ti temanna te Tia Kawakin Tiibu i aon te aonaba ni kabuta.

42 Ao ane e na roko te tai are e na kaota rabwatana iai nakoia aaba nako, nakoia Iutaia ao nakoia naba Tientaire; ao ngkana e tia ni kaoti nakoia Iutaia ao nakoia naba Tientaire, ao e na kaoti nakoia Tientaire ao nakoia naba Iutaia, ao ake a kabanea na riki n rimoa, ao ake a rimoa a na kabane.