Taeka, aika koreaki ao a taekinaki naba, irouia ana aomata te Atua aika tabu ngkana a kairaki iroun te Tamnei ae Raoiroi. Ikotakin boki aika tabu aika bwainaki ao ni katabuaki n te Ekaretia ngkai kanoana bon te Baibara, Ana Boki Moomon, Reirei ao Berita aika Tabu, Bwaeao ae Bati Bona. Iesu ao taan korea te Nu Tetemanti a taekinna bwa boki n te O Tetemanti bon koroboki aika tabu (Mat. 22:29 ; Ioane 5:39 ; 2Tim. 3:15 ; 2Bet. 1:20–21 ). Tara naba Bairean Aron Taia n Riki n te abentekiti.
Tiaki a bue nanora i nanora, ngke E kabwara nanon koroboki aika tabu nakoira, Ruka 24:32 .
Kam ukeuke ni koroboki aika tabu; bwa kam taku bwa e reke te maiu ae akea tokina iroumi mai iai: ao bon ngaia are kakoaua i bukiu, Ioane 5:39 .
Ana taeka Kristo a na tuangko bwaai ni kabane aika ko riai ni karaoi, 2Nib. 32:3 .
Ni kabane ake a kairaki bwa ana kakoauai koroboki aika tabu a nene ma ni matoatoa i nanon te onimaki, Erem. 15:7–8 .
Aomata a kairua iai bwa a kaiangatoa ma koroboki aika tabu ao aki ota iai, R&B 10:63 .
Taeka aikai tiaki mai irouia aomata ke mai iroun te aomata, ma bon mai irou, R&B 18:34–36 .
Otinakon Ana Boki Moomon e kakoaua nakon te aonaba bwa koroboki aika tabu a bon koaua, R&B 20:2, 8–12 .
Kam na riai ni kabanei ami tai ni kamatebwaii koroboki aika tabu, R&B 26:1 .
E anga koroboki aika tabu ibukin reiakinaia Aomata aika Itiaki, R&B 33:16 .
E anga koroboki aika tabu nakon kamaiuaia naake I a tia n rineia, R&B 35:20 .
Reirei tuan au euangkerio, ake i nanon te Baibara ao Ana Boki Moomon, R&B 42:12 .
Au tua ni kaineti ma bwaai aikai ake a kaotaki n au koroboki aika tabu, R&B 42:28 .
Bwaai nako are a na taekinna ngkana a kairaki iroun te Tamnei are Raoiroi bon koroboki aika tabu, R&B 68:4 .
Koroboki aika tabu ake a bua
A bati koroboki aika tabu ake a taekinaki ni booki aika tabu ae akea ngkai iroura, ao mai i buakoia bon booki aikai ao taan korei: te berita ae tabu (Otin. 24:7 ), ana buaka te Uea (WI 21:14 ). Iatia (Iotua 10:13 ; 2Tamu. 1:18 ), ana mwakuri Toromon (1Uea 11:41 ), Tamuera te tia mamata (1Rong. 29:29 ), Natan te burabeti (2Rong. 9:29 ), Temaia te burabeti (2Rong. 12:15 ), Ito te burabeti (2Rong. 13:22 ), Ieu (2Rong. 20:34 ), aia taetae taan mamata (2Rong. 33:19 ). Enoka (Iuta 1:14 ), ao aia taeka Tinoki, Neum, ao Tinoti (1Nib. 19:10 ). Tinoti (Iakobwa 5:1 ), Tinoki ao Eteati (Erem. 8:20 ), ao te boki ni kauring (Mote 6:5 ); ao reeta nakoia I-Korinto (1Korin. 5:9 ), nakoia I-Ebeto (Ebeto 3:3 ), mai Raorikeia (Koro. 4:16 ), ao mai Iuta (Iuta 1:3 ).
A na kateimatoaki koroboki aika tabu
Ti riai n anai rekooti aikai bwa ti aonga ni kateimatoai iai taeka ake a tia n taekinaki irouia burabeti, 1Nib. 3:19–20 .
N na kawakini bwaatua aikai, Iakob. 1:3 .
Bwaai aikai ake a tia ni kawakinaki ma ni kateimatoaki ni bain te Atua, Mot. 1:5 .
Kaawakin raoi bwaai aika a tabu aikai, Aram. 37:47 .
Kakawakin koroboki aika tabu
Ko na wareka te tua aei i mataia Iteraera ni kabaneia, TK 31:10–13 .
E na tai nako bokin te tua aei mai i nanon wiim, Iotua 1:8 .
Moan te raoiroi ana tua te Uea, ao e kamaiua te tamnei, TAre. 19:7 .
Bon bwaean waeu am taeka, TAre. 119:105 .
A kaotioti ibukiu koroboki aika tabu, Ioane 5:39 .
E anganaki te aba te koroboki ae tabu ni kabanea iroun te Atua ao e manena nakon te reirei, 2Tim. 3:15–16 .
I kabootaui kanoan koroboki aika a tabu ni kabane nakon maiura, bwa ti aonga n raka man reireinaki iai, 1Nib. 19:23 .
E kimwareirei tamneiu ni koroboki aika tabu, 2Nib. 4:15–16 .
Ti kakorakoraira ni koroboki, n anai nanoia natira, ao tarira naba, bwa a na kakoaua Kristo, 2Nib. 25:23 .
A ukoukora nanon koroboki aika tabu ao a aki manga ongo n ana taeka nako te aomata ae buakaka aio, Iakob. 7:23 (Aram. 14:1 ).
Ngke arona bwa akea bwaatua aikai, ti na tia n rinanon te aki ataibwai, Mot. 1:2–7 .
A bon tia n ukoukouri koroboki aika tabu ma nanomwakaia, bwa aonga n ataa ana taeka te Atua, Aram. 17:2–3 .
A kawakinaki koroboki aika tabu ibukin kairaia aomata nakon te kamaiuaki, Aram. 37:1–19 (2Nib. 3:15 ).
Ana taeka te Atua e na kaira ana aomata Kristo, Erem. 3:29 .
Bwaai nako are a na taekinna ngkana a kairaki iroun te Tamnei ae Raoiroi a na riki bwa koroboki aika tabu ao mwaakan te Atua nakon te kamaiuaki, R&B 68:4 .
Boretiia bwaninin au koroboki aika tabu ibukin katean au Ekaretia ao ni katauraoia au botanaomata, R&B 104:58–59 .
Te taetae ni burabeti ibukin rokon koroboki aika tabu
Iai boki riki tabeua ake a na reke, 1Nib. 13:39 .
Kam na tai taku bwa a bane au taeka ni kabane i nanon te Baibara, 2Nib. 29:10–14 .
Taua ni kamatoa ana euangkerio Kristo, are e na kateaki imatami n rekoti are a na roko, Moom. 7:8–9 .
E na kakabwaiaki ane e kaota te bwai aio, Moom. 8:16 .
Koroi bwaai aikai ao N na kaoti n oi au tai, Ita 3:27 (Ita 4:7 ).