Ana Boki Moomon

Teuana mai buakon bookin booki aika tabu ake aua are a butimwaeaki iroun Ana Ekaretia Iesu Kristo ibukiia Aika Itiaki ni Boong aika Kaitira. Bon kakimototoan rongorongoia kaain America ake ngkoa iroun te burabeti n taai ake ngkoa ae arana Moomon. E koreaki bwa e na kakoaua ae Iesu bon te Kristo. Ni kaineti ma te rongorongo aei, te Burabeti Iotebwa Timiti, are e rairia man ana bwai n tituaraoi ao mwaakan te Atua, e taku, “I tuangiia mataniwiin te ekaretia bwa Ana Boki Moomon bon te kabanea n eti mai buakon booki nako n te aonaba, ao bon kingin aan ara ekaretia, ao te aomata e na kaania riki te Atua man irirakin nanon reirei ake i nanona, nakon taian boki riki tabeua.” (tara te kabwarabwara i moan Ana Boki Moomon).

Ana Boki Moomon bon rongorongon aia aaro tenikoraki botanaomata ake a mwaing man aban Europe ao Atia nakon aban America. Koraki aikai a kairaki irouia burabeti ake a tau mwiin rongorongon aia aaro ao maiuia i aon bwaatua aika karaoaki man biiti. Ana Boki Moomon e taekina kawarakiia aomata n aban Amerika iroun Iesu Kristo i mwin Mangautina. Uabubua te ririki te rau i mwin rokon Kristo arei.

Moronaai, te kabanea ni burabeti-tia tau mwiin rongorongo irouia Nibwaite, e kaini kakimototoan rongorongoia botanaomata aikai ao e karabai ni uakaan ma 421 I.K. N te 1823, Moronaai are e tia ni mangauti e kawara Iotebwa Timiti ao rimwi riki e anganna rongorongon ngkoa aika tabu aikai bwa a na rairaki ao ni kaotaki nakon te aonaba bwa teuana riki kakoauaan taekan Iesu Kristo.