Pene 5
’Ua amuamu Saria ia Lehi—’Ua ’oa’oa rāua i te ho’ira’a mai tā rāua mau tamari’i tamāroa—’Ua pūpū atu rāua i te mau tusia—Tei roto i te mau ’api veo te mau pāpa’ira’a a Mose ’e tā te mau peropheta—Tē fa’a’ite ra teie mau ’api e hua’ai ’o Lehi nō Iosepha—’Ua tohu Lehi nō ni’a i tōna hua’ai ’e te fa’ahereherera’ahia o te mau ’api. Fātata 600–592 H.M.
1 ’E i muri a’era, ’ia tae atu ra mātou i raro i roto i te mēdēbara i tō mātou ra metua tāne, inaha, ’ua ’ī roa ihora ’oia i te ’oa’oa, ’e ’ua ’oa’oa roa ato’a ho’i tō’u metua vahine ra ’o Saria, i ’oto na ho’i ’oia nō mātou.
2 I mana’o na ho’i ’oia ē ’ua pohe mātou i roto i te mēdēbara ; ’e ’ua amuamu ato’a atu ho’i ’oia i tō’u metua tāne, i te paraura’a atu iāna ē, e ta’ata ’ite ’ōrama ’oia ; i te nā-’ō-ra’a ē : Inaha, ’ua arata’i mai ’oe ia mātou mai te fenua o tō tātou ’āi’a ra, ’e ’ua pohe tā’u mau tamari’i tamāroa, ’e e pohe ho’i tātou i te mēdēbara nei.
3 ’E i nā reira ho’i tō’u metua vahine i te amuamu atu i tō’u ra metua tāne.
4 ’E i muri a’era, ’ua parau atu ra tō’u metua tāne iāna, i te nā-’ō-ra’a ē : ’Ua ’ite ho’i au ē, e ta’ata ’ite ’ōrama vau ; ’āhiri ’aita vau i ’ite na i te mau mea a te Atua nā roto i te ’ōrama ra, ’aita ïa vau e ’ite i te maita’i o te Atua, ’āre’a rā ’ua pārahi ïa vau i Ierusalema, ’e ’ua pohe ïa vau ’e tō’u ra mau taea’e ato’a.
5 Inaha rā, ’ua roa’a iā’u te hō’ē fenua i fafauhia ra, ’e tē ’oa’oa nei au i te reira ; ’oia ïa, ’e ’ua ’ite ho’i au ē, e fa’aora te Fatu i tā’u mau tamari’i tamāroa i te rima o Labana ra, ’e e arata’i fa’ahou mai ’oia ia rātou i raro ia taua i te mēdēbara nei.
6 ’E i nā reira ho’i tō’u metua tāne ra ’o Lehi i te tāmāhanahana atu i tō’u ra metua vahine ia Saria, nō ni’a ia mātou, ’a haere ai mātou nā te mēdēbara i ni’a, i te fenua nō Ierusalema, ’ia roa’a mai te pāpa’a parau nō te mau ’āti Iuda.
7 ’E i tō mātou ho’ira’a atu i te ti’ahapa o tō’u ra metua tāne, inaha ’ua ’ī ihora rāua i te ’oa’oa, ’e ’ua tāmāhanahanahia tō’u metua vahine.
8 ’E ’ua parau ihora ’oia, nā ’ō ihora : I teienei, ’ua ’ite pāpū vau ē, ’ua fa’aue mai te Fatu i tā’u tāne ’ia haere ’ē atu i roto i te mēdēbara ; ’oia ïa, ’e ’ua ’ite pāpū ato’a ho’i au ē, ’ua pāruru mai te Fatu i tā’u mau tamari’i tamāroa, ’e ’ua fa’aora ho’i ia rātou i te rima o Labana ra, ’e ’ua hōro’a mai ho’i i te mana ia rātou, ’ia ti’a ia rātou ’ia rave i te mea tā te Fatu i fa’aue mai ia rātou ra. ’E i nā reira ho’i ’oia i te paraura’a.
9 ’E i muri a’era, ’ua ’oa’oa roa rāua, ’e ’ua pūpū atu ra ho’i rāua i te tusia ’e te mau tusia tāauahi i te Fatu ra ; ’e ’ua ha’amāuruuru atu ra ho’i rāua i te Atua nō ’Īserā’ela.
10 ’E i muri iho i tō rāua ha’amāuruurura’a i te Atua nō ’Īserā’ela, ’ua rave ihora tō’u metua tāne ra, ’o Lehi, i te mau pāpa’a parau i ’ō’otihia i ni’a i te mau ’api veo ra, ’e ’ua tai’o māite ihora ’oia mai te ha’amatara’a mai.
11 ’E ’ua ’ite a’era ’oia ē, tei roto i te reira te mau buka e pae a Mose, ’o tei fa’a’ite mai i te ’ā’amu nō te hāmanira’ahia o te ao nei, ’e ’oia ato’a o Adamu ’e Eva, tō tātou nā metua mātāmua.
12 ’E ’oia ato’a te pāpa’a parau nō te mau ’āti Iuda mai te mātāmua mai ā, ē tae roa mai i te ha’amatara’a nō te fa’aterera’a a Zedekia, te ari’i nō Iuda.
13 ’E ’oia ato’a te mau tohura’a a te mau peropheta mo’a, mai te mātāmua mai ā, ē tae roa mai i te ha’amatara’a nō te fa’aterera’a a Zedekia ; ’e ’oia ato’a e rave rahi mau tohura’a ’o tei parauhia e te vaha o Ieremia.
14 ’E i muri a’era, ’ua ’ite ato’a atu ra tō’u metua tāne o Lehi ē, tei ni’a iho i te mau ’api veo te tuatāpapara’a tupuna o tōna ra mau metua ; nō reira ’ua ’ite ’oia ē, e hua’ai ’oia nō Iosepha ; ’oia ho’i, ’o Iosepha te tamaiti a Iakoba, ’o tei ho’ohia i ’Aiphiti ra, ’e ’o tei fa’aorahia e te rima o te Fatu, ’ia ti’a iāna ’ia fa’aora i tōna ra metua tāne ia Iakoba, ’e tōna ’utuāfare pā’āto’a i te pohe o’e ra.
15 ’E ’ua arata’i-ato’a-hia rātou i rāpae i te tītīra’a ’e i rāpae i te fenua nō ’Aiphiti, e taua iho Atua ra ’o tei fa’aora ia rātou.
16 E mea nā reira i ’itehia mai ai i tō’u metua tāne, ia Lehi, te tuatāpapara’a tupuna o tōna ra mau metua. E hua’ai ato’a Labana nō Iosepha, nō reira ho’i ’oia ’e tōna mau metua i tāpe’a ai i taua mau pāpa’a parau ra.
17 ’E i teienei, i te ’itera’a tō’u metua tāne i teie mau mea ato’a, ’ua ’ī ihora ’oia i te Vārua, ’e ’ua ha’amata ihora i te tohu nō ni’a i tōna hua’ai, i te nā-’ō-ra’a ē—
18 E tae ho’i teie mau ’api veo i tō te mau nūna’a ato’a, ’e te mau ’ōpū ato’a, ’e te mau reo ato’a, ’e te mau ta’ata ato’a nō tōna ra hua’ai.
19 Nō reira, ’ua parau ’oia ē, e ’ore roa teie mau ’api veo e mou ; ’e e ’ore ho’i e mohimohi nō te maoro o te vaira’a. ’E ’ua tohu ’oia e rave rahi atu ā mau mea nō ni’a i tōna hua’ai.
20 ’E i muri a’era, ’ua ha’apa’o vau e tō’u metua tāne i te mau fa’auera’a tā te Fatu i fa’aue mai ia māua ē tae roa mai i taua taime ra.
21 ’E ’ua roa’a mai ia mātou te mau pāpa’a parau tā te Fatu i fa’aue mai ia mātou ; ’e ’ua tai’o ihora mātou i te reira ’e ’ua ’ite ho’i mātou ē, e mea hina’aro-rahi-hia te reira ; ’oia ïa, e mea faufa’a rahi ho’i te reira ia mātou, ’e nō reira ho’i i ti’a ai ia mātou ’ia fa’aherehere i te mau fa’auera’a a te Fatu nō tā mātou mau tamari’i.
22 Nō reira, ’ia au i tō te Fatu ra pa’ari, e mea ti’a roa ia mātou ’ia hōpoi atu i te reira nā muri ia mātou, ’a tere ai mātou nā roto i te mēdēbara e tae atu ai i te fenua i fafauhia ra.