1 Tan natan, si Jacob sinalita to so saray dakel ni a beñgatla ed saray totook ed saman a panaon; angaman ontan saraya labat a beñgatla so ginawak a nisulat, lapu ed saraya a beñgatla ya insulat ko so masarag la ed siak.

2 Tan natan siak, Nephi, isulat ko ni so arum ed saray salita nen Isaias, lapu ed say kamareruak manliket ed saray salita to. Tan iyolibay ko so saray salita to ed saray totook, tan saraya so ipasabik ed amin ya anak ko, lapu ed tua ya anengneng to so Mananundon ko, angan siñga say impakanengneng ko ed sikato.

3 Tan si agik, a Jacob, anengneng to met a siñga say impakanengneng ko ed sikato; dia ed ontan, ipasabik so saray salita ed saray anak ko pian paneknekan ko ed sikara a saray salitak so tua. Dia ed ontan, dia ed panamegley na salita na talora, inkuan na Dios, iletneg ko so salitak. Manwari ya ontan, say Dios mañgibaki na dakel ni a tasi, tan paneknekan to ya amin so salita to.

4 Nia, say kamareruak maliket ed pañgipaneknek ko ed saray totook nipaakar ed katuaan na isabi nen Cristo; lapu ed, dia ed saya a pamaakaran so inkiiter na gangan ed si Moises; tan amin a beñgatla a niiter a nanlapu ed Dios manlapu ed gapo na mundo, ed too, saraya so mañgipatnag ed sikato.

5 Tan ontan met say kamareruak manliket ed saray paknaan na Katawan a ginawa to ed saray ama tayo; on, say kamareruak manliket ed gracia to, tan dia ed kaptekan to, tan pakapanyari, tan panañgasi ed baleg tan andi-angaan a plano na kilalaban ed patey.

6 Tan say kamareruak manliket ed pañgipaneknek ko ed saray totook likud ed si Cristo so onsabi amin a totoo so nabalang.

7 Tan sano angapo si Cristo angapo so Dios; tan sano angapo so Dios angapo tayo met, lapu ed angapo met so impamalsa. Balet wala so Dios, tan sikato si Cristo, tan sikato so onsabi ed pakagnap na dili a panaon to.

8 Tan natan isulat ko so pigara a salita nen Isaias, pian siopaman ed saray totook so makanengneng ed saraya a salita manliket so saray puso ra tan mangayaga ra onkana ed amin a totoo. Natan saraya so salita, tan saraya so ipareng yo ed inkasikayo tan ontan met ed amin a too.