1 Idahaemi ami, Nephi, ntiŋ mbaŋa mme ikɔ emi ami ŋwetde, emi eketiŋde ke inua Isaiah. Koro sese, Isaiah ama etiŋ ediwak ŋkpɔ emi ɔkɔsɔŋde ediwak ikɔt mi ndifiɔk; koro mmɔ ikifiɔkke ibaŋa nte etiŋde nte prophet eke mme Jew.

2 Koro ami, Nephi, ŋkekpepke mmɔ ediwak ŋkpɔ kabaŋa edu mme Jew; koro mme utom mmɔ ekedi mme utom ekim, ndien mme edinam mmɔ ekedi mme mbubiam edinam.

3 Ke ntre, ami ŋwet nnɔ ikɔt mi, nnɔ kpukpru mmɔ emi edibɔde mme ŋkpɔ emi ami ŋwetde ke ini emi ama ebe, man mmɔ efiɔk mme ubiere ikpe Abasi, ete mmɔ edi enɔ kpukpru idut, nte asaŋade ye ikɔ emi enye eketiŋde.

4 Ke ntre, ekpaŋutɔŋ, O ikɔt mi, emi edide eke ufɔk Israel, enyuŋ ekpaŋutɔŋ enɔ mme ikɔ mi; koro okposuk edi nte ke mme ikɔ Isaiah iŋwaŋake mbufo, edi mmɔ eŋwaŋa kpukpru mmɔ emi eyɔhɔde ye spirit prophecy. Edi ami nnɔ mbufo prophecy, nte asaŋade ye spirit emi odude ke ami; ke ntre ami nyetiŋ nte prophet ntiene nte aŋwaŋde mi emi okodude ye ami tɔŋɔ ke ini emi ami ŋkɔwɔrɔde ke Jerusalem ye ete mi; koro sese, ukpɔŋ mi enem esit ke ndinam aŋwaŋa ikɔt mi, man mmɔ ekpep-ŋkpɔ.

5 Iŋ, ukpɔŋ mi enem esit ke mme ikɔ Isaiah, koro ami ŋkɔwɔrɔ ke Jerusalem, ndien enyin mi okut mme ŋkpɔ mme Jew, ndien ami mɔfiɔk nte ke mme ŋkpɔ mme prophet aŋwaŋa mme Jew, ndien mbon efen iduhe emi mme ŋkpɔ emi eketiŋde enɔ mme Jew aŋwaŋade mmɔ nte mme Jew, ibɔhɔke ete ke ekpep mmɔ ke usuŋ unam ŋkpɔ mme Jew.

6 Edi sese, ami, Nephi, mkpepke nditɔ mi mbaŋa usuŋ mme Jew; edi sese, ami, ke idem mi, moduŋ ke Jerusalem, ke ntre ami mɔfiɔk kabaŋa mme obio oro ŋkanare; ndien ami mma ŋtiŋ nnɔ nditɔ mi kabaŋa mme ubiere ikpe Abasi, emi ekesude ke ufɔt mme Jew, nnɔ nditɔ mi, nte asaŋade ye kpukpru se Isaiah eketiŋde, ndien ami ŋwetke mmɔ.

7 Edi sese, ami nyaka iso ye prophecy mi, nte aŋwaŋade mi; emi ami mfiɔkde nte ke owo ndomo kiet ikemeke ndidue; edi, ke mme usen emi mme prophecy Isaiah edisude mme owo eyefiɔk ke akpanikɔ, ke mme ini emi mmɔ edisude.

8 Ke ntre, mmɔ enyene ufɔn enɔ nditɔ owo, edi enye emi ekerede ke mmɔ inyeneke ufɔn, mmɔ akpan-akpan ke ami nditiŋ nnɔ, nyuŋ nnim mme ikɔ emi nnɔ ikɔt mi ikpɔŋ; koro ami mɔfiɔk nte ke mmɔ eyenyene akamba ufɔn enɔ mmɔ ke mme akpatre usen; koro ke usen oro ke mmɔ ediŋwaŋa mmɔ; ke ntre, ke ufɔn mmɔ ke ami ŋwet.

9 Ndien nte ema ekesobo emana kiet ke otu mme Jew ke ntak mme ukwaŋ-ŋkpɔ, kpa ntre ke esobo mmɔ tɔŋɔ ke emana ye emana nte ekemde ye mme ukwaŋ-ŋkpɔ mmɔ; ndien akananam owo isoboke mmɔ ndomo kiet ibɔhɔke mme prophet Jehovah ema etetiŋ ebaŋa mmɔ.

10 Ke ntre, ema etiŋ enɔ mmɔ kabaŋa nsobo emi anade nte esim mmɔ, usɔp-usɔp ke ini ete mi ama ɔkɔkpɔŋ Jerusalem; edi, mmɔ esɔŋ esit mmɔ; ndien nte asaŋade ye prophecy mi ema esobo mmɔ, ibɔhɔke edi mbio emi eketaŋde ewɔrɔ nte mbon ŋkpɔkɔbi eka Babylon.

11 Ndien idahaemi emi ami ntiŋ ke ntak spirit emi odude ke ami. Ndien okposuk edi ŋte ke ema etaŋ mmɔ ewɔrɔ mmɔ eyefiak enyɔŋ edi, enyuŋ enyene isɔŋ Jerusalem; ke ntre, eyefiak enim mmɔ ke itie isɔŋ inyene mmɔ.

12 Edi, sese, mmɔ eyenyene mme ekɔŋ, ye mme etop ekɔŋ; ndien ke ini usen edide ete Ikpɔŋ-ikpɔŋ Eyen emi Ete Obonde, iŋ, kpa Ete eke enyɔŋ ye isɔŋ, ayayarare idem esie ɔnɔ mmɔ ke obukidem, sese, mmɔ eyesin enye, ke ntak mme ukwaŋ-ŋkpɔ mmɔ, ye isɔŋesit mmɔ, ye nsɔŋ-ibuot mmɔ.

13 Sese, mmɔ eyewot enye ke cross; ndien ke ema ekenim enye ke udi ke ufaŋ usen ita enye eyeset ke mkpa, ye usɔbɔ ke mme mba esie; ndien kpukpru mmɔ emi ebuɔtde idem ke enyiŋ esie eyebɔ erinyaŋa ke obio ubɔŋ Abasi. Ke ntre, ukpɔŋ mi adaresit nditiŋ nte prophet kabaŋa enye, koro ami mokut usen esie, ndien esit mi onyuŋ emenede edisana enyiŋ esie.

14 Ndien sese eyedikem ete ke ini Messiah ama eset ke mkpa, onyuŋ ayarare idem esie ɔnɔ ikɔt esie, ɔnɔ ediwak emi edibuɔtde idem ke enyiŋ esie, sese, eyefiak esobo Jerusalem; koro ɔyɔdɔdiɔk ɔnɔ mmɔ emi ediŋwanade ye Abasi ye mbon ufɔk Abasi esie.

15 Ke ntre, eyesuan mme Jew ke kpukpru idut; iŋ, ndien ŋko eyesobo Babylon; ke ntre, mme idut efen eyesuan mme Jew.

16 Ndien ke ini ema ekesuan mmɔ, ndien Jehovah Abasi ada mme idut efen amia mmɔ ke ufaŋ ediwak emana, iŋ, kpa tɔŋɔ ke emana ye emana tutu enam mmɔ enyime ndibuɔt idem ke Christ, Eyen Abasi, ye usio-isop, emi edide anana utit ɔnɔ ofuri ubon owo—ndien ke ini usen oro edidide emi mmɔ edibuɔtde idem ke Christ, enyuŋ ekpono Ete ke enyiŋ esie, ye edisana esit ye ubɔk emi mideheke, inyuŋ ibetke Messiah efen, ndien, ke ini oro, usen eyedi ete ke ɔfɔn ete ana mmɔ ebuɔtidem ke mme ŋkpɔ emi.

17 Ndien Jehovah ɔyɔtɔŋɔ ntak esin ubɔk esie ndifiak nnim ikɔt esie nsio ke edisop ye itie iduɔ mmɔ. Ke ntre, enye ayanam utibe ye mkpaidem utom ke ufɔt nditɔ owo.

18 Ke ntre, enye ayada mme ikɔ esie ɔsɔk mmɔ, mme ikɔ emi edibierede ikpe inɔ mmɔ ke akpatre usen, koro mmɔ ke edinɔ mmɔ man enam mmɔ enim ke Messiah akpanikɔ, emi mmɔ ekesinde; ndinyuŋ nnam mmɔ enim ete yak mmɔ ekubet Messiah efen aba, koro efen ididihe, ibɔhɔke edi nsu-nsu Messiah emi edibiaŋde mme owo; koro Messiah kiet ikpɔŋ ke mme prophet eketiŋ ebaŋa, ndien Messiah oro edi enye emi anade nte mme Jew esin.

19 Koro nte asaŋade ye mme ikɔ mme prophet, Messiah oro eyedi ke isua ikie itiokiet tɔŋɔ ke ini emi ete mi ɔkɔkpɔŋde Jerusalem; ndien nte asaŋade ye mme ikɔ mme prophet, ŋko ye ikɔ angel Abasi, enyiŋ esie edidi Jesus Christ, Eyen Abasi.

20 Ndien idahaemi, nditɔ eka mi iren, ami metiŋ iŋwaŋ-iŋwaŋ man mbufo ekudue. Ndien nte Jehovah Abasi odude uwem emi akadade Israel ɔdɔk ɔwɔrɔ ke isɔŋ Egypt, onyuŋ ɔnɔ Moses odudu ete enye ɔsɔbɔ mme idut ke ini mme idiɔk uruk ikɔt ɔkɔkɔŋde mmɔ, edieke mmɔ edisede uruk ikɔt emi enye ekemenede ke iso mmɔ, onyuŋ ɔnɔ enye odudu ete enye amia itiat ndien mmɔŋ ɔwɔrɔ edi; iŋ, sese ami ndɔhɔ mbufo, nte ke mme ŋkpɔ emi edi akpanikɔ, ndien nte Jehovah Abasi odude uwem, enyiŋ efen iduhe emi enɔde ke idak heaven ibɔhɔke edi Jesus Christ emi, emi ami ntiŋde mbaŋa, emi owo ekemede ndibɔ erinyaŋa.

21 Ke ntre, ke ntak emi ke Jehovah Abasi ɔŋwɔŋɔ ɔnɔ mi ete ke mme ŋkpɔ emi ami ŋwetde ke eyekpeme enyuŋ etim enim, enyuŋ eyak enɔ ubon mi, tɔŋɔ ke emana ye emana, man eŋwɔŋɔ oro osu ɔnɔ Joseph, ete ke ubon esie iditakke tutu amama kadaŋa ini emi ererimbot osuk odude.

22 Ke ntre, mme ŋkpɔ emi eyedu tɔŋɔ ke emana ye emana kadaŋa ini emi ererimbot osuk odude; ndien mmɔ ke edinɔ nte asaŋade ye uduak ye ekikere Abasi; ndien eyebiere ikpe enɔ mme idut emi edinyenede mmɔ nte asaŋade ye mme ikɔ emi ewetde.

23 Koro nnyin itiŋ enyin iwet, man inam nditɔ nnyin, ŋko ye nditɔ ete nnyin, ebuɔtidem ke Christ, enyuŋ ekpe emem ye Abasi; koro nnyin imifiɔk ite ke edi ke mfɔn ke enyaŋa nnyin, ke nnyin ima inam kpukpru ŋkpɔ emi ikemede.

24 Ndien, okposuk edi ke nnyin ibuɔtidem ke Christ, nnyin inim ibet Moses, inyuŋ itiŋ enyin ise Christ, tutu ibet edisu.

25 Koro, ke ntak emi ke ekenɔ mbet; ke ntre mbet akabare akpa ɔnɔ nnyin, ndien enam nnyin idu uwem ke Christ ke ntak mbuɔtidem nnyin; edi nnyin inim mbet ke ntak ibet.

26 Ndien nnyin itiŋ ibaŋa Christ, nnyin idaresit ke Christ, nnyiŋ ikwɔrɔ ibaŋa Christ nnyin itiŋ nte prophet ibaŋa Christ, ndien nnyin iwet nte asaŋde ye mme prophecy nnyin, man nditɔ nnyin efiɔk ebiet emi mmɔ enade nte eyom erifen ebaŋa mme idiɔk ŋkpɔ mmɔ.

27 Ke ntre, nnyin itiŋ ibaŋa mbet man nditɔ nnyin efiɔk nte mbet akpade; ndien mmɔ, ke efiɔkde nte mbet akpade, ekeme ndiyom uwem oro emi odude ke Christ, enyuŋ efiɔk ntak emi ekenɔde mbet. Ndien ke ini mbet ama osu ke Christ, man mmɔ ekusɔŋ esit mmɔ ye enye ke ini anade nte emen mbet efep.

28 Ndien idahaemi sese, ikɔt mi, mbufo edi mbon nsɔŋ obot itɔŋ; ke ntre, ami ntiŋ iŋwaŋ iŋwaŋ nnɔ mbufo, man mbufo edidɔhɔ ke iŋwaŋake. Ndien mme ikɔ emi ami ntiŋde eyeda nte ikɔ ntiense ebaŋa mbufo; koro mmɔ ekem ke ndikpep owo ekededi nnen nnen usuŋ; koro nnen nnen usuŋ edi ndibuɔt idem ke Christ unyuŋ ukaŋke enye; koro ke ekaŋde enye mbufo nko emekaŋ mme prophet ye mbet.

29 Ndien idahaemi sese, ami ndɔhɔ mbufo nte ke nnen nnen usuŋ edi ndibuɔt idem ke Christ, ndien ukaŋke enye; ndien Christ edi Edisana Owo Israel; ke ntre ana nte mbufo esuk ibuot ke iso esie, enyuŋ ekpono enye ye ofuri ukeme mbufo, ekikere, ye odudu, ye ofuri ukpɔŋ mbufo; ndien edieke mbufo enamde emi owo ikemeke ndibin mbufo nsio.

30 Ndien, kadaŋa ini nte enye ɔfɔnde, ana nte mbufo enim mme edinam ye mme edinam Abasi tutu mbet osu emi ekenɔde Moses.