1 Thiab nim no kuv, Nifais, tsis muaj cuab kav sau tas txhua yam tsav uas tau raug qhia nyob hauv kuv cov neeg; thiab kuv los tsis muaj zog hauv kev sau ntawv, li uas hais lus; vim thaum ib tug neeg hais lus los ntawm tus Vaj Ntsuj Plig Dawb Huv lub hwj chim, lub hwj chim ntawm tus Vaj Ntsuj Plig Dawb Huv yuav coj nws mus rau hauv noob neej tej siab.

2 Tiam sis saib seb, muaj coob leej uas tau ua lawv tej siab tawv qhwb qhawv rau tus Ntsuj Plig Dawb Huv, xwv kom nws tsis muaj chaw nyob rau hauv lawv; yog li ntawd, lawv tau muab ntau yam pov tseg cov uas tau muab sau cia thiab suav tias yog tej yam uas tsis muaj nuj nqis.

3 Tiam sis kuv, Nifais, tau sau tej uas kuv tau sau, thiab kuv suav tias yog tej uas muaj nuj nqis heev, thiab qhov tseem ceeb rau kuv cov neeg. Vim kuv thov Vajtswv tsis tu ncua li rau lawv thaum nruab hnub, thiab hmo ntuj kuv tej kua muag tau ntxaum kuv lub tog hauv ncoo, vim yog lawv; thiab kuv quaj thov rau kuv tus Vajtswv nyob hauv txoj kev ntseeg, thiab kuv paub tias nws yuav hnov kuv lub suab quaj.

4 Thiab kuv paub tias tus Tswv uas yog Vajtswv yuav tshwj kuv tej kev thov Vajtswv tseg cia foom koob hmoov rau kuv cov neeg. Thiab tej lus uas kuv tau sau nyob hauv txoj kev qaug zog yuav raug ua kom muaj zog rau lawv; vim nws yuav yaum kom lawv ua zoo; nws qhia rau lawv paub txog lawv tej yawg koob; thiab nws qhia txog Yexus, thiab yaum lawv los ntseeg hauv nws, thiab ntseeg kom mus txog thaum kawg, uas yog txoj sia nyob mus ib txhis.

5 Thiab nws hais hnyav tawm tsam kev txhaum, raws li txoj kev tseeb meej ntawm qhov tseeb; yog li ntawd, tsis muaj neeg yuav npau taws rau tej lus uas kuv tau sau cia lawm tsuas ntshai nws yog dab tus ntsuj plig li xwb.

6 Kuv qhuas hauv txoj kev tseeb meej; kuv qhuas hauv txoj kev tseeb; kuv qhuas hauv kuv tus Yexus, vim nws tau txhiv kuv tus ntsuj plig dim ntawm ntuj txiag teb tsaus.

7 Kuv muaj siab hlub pub rau kuv cov neeg, thiab muaj txoj kev ntseeg heev hauv Khetos tias nyaj kuv yuav ntsib ntau tus ntsuj plig uas tsis muaj qhov ceb nyob ntawm nws lub rooj txiav txim.

8 Kuv muaj kev siab hlub rau cov Neeg Yudais—kuv hais tias cov Neeg Yudais, rau qhov kuv hais txog cov neeg uas kuv tawm ntawm lawv tuaj.

9 Kuv kuj muaj kev siab hlub rau Lwm Haiv Neeg. Tiam sis saib seb, tsis muaj ib yam no uas kuv cia siab rau tsuas yog lawv yuav rov sib raug zoo rau Khetos xwb, thiab nkag mus rau hauv lub rooj vag nqaim, thiab mus rau hauv txoj kev ti uas coj tau rau txoj sia, thiab rau siab ntso taug txoj kev mus kom txog thaum hnub sim siab kawg.

10 Thiab nim no, kuv cov mi kwv tij uas kuv hlub es, thiab nrog rau cov Neeg Yudais, thiab tag nrho nej sawv daws uas nyob hauv qab ntuj no, cia li mloog tej lus no thiab ntseeg Khetos; thiab yog nej tsis ntseeg tej lus no los cia li ntseeg Khetos. Thiab yog nej yuav ntseeg Khetos ces nej yeej yuav ntseeg tej lus no, vim lawv yog Khetos tej lus, thiab nws tau muab lawv rau kuv; thiab lawv qhia neeg txhua tus tias kom lawv yuav tsum ua zoo.

11 Thiab yog tias lawv tsis yog Khetos tej lus, nej sim txiav txim seb—vim Khetos yuav qhia rau nej, nrog lub hwj chim thiab lub yeeb koob loj, hais tias lawv yog nws tej lus, thaum ntawm hnub kawg; thiab nej thiab kuv yuav sawv tim ntsej tim muag ntawm nws lub rooj txiav txim; thiab nej yuav paub tias kuv twb tau raug nws txib kom sau tej xwm no, yog hais tias txhob suav kuv txoj kev qaug zog.

12 Thiab kuv thov Leej Txiv los ntawm Khetos lub npe kom peb coob leej, yog tias tsis tag nrho, yuav raug dim mus nyob hauv nws lub nceeg vaj hnub tseem ceeb thiab hnub kawg ntawd.

13 Thiab nim no, kuv cov kwv tij uas kuv hlub es, sawv daws txhua tus uas yog tsev neeg Ixayees, thiab tag nrho nej sawv daws hauv qab ntuj no, kuv hais rau nej ib yam li lub suab ntawm ib tug uas hu tawm hauv av tuaj: Mus zoo txog thaum hnub tseem ceeb ntawd yuav los.

14 Thiab nej cov uas yuav tsis xav txais Vajtswv txoj kev zoo, thiab saib taus cov Neeg Yudais tej lus thiab, thiab kuv tej lus, thiab cov lus uas tseem yuav tawm ntawm Vajtswv tus Me Nyuam Yaj lub qhov ncauj los, saib seb, kuv hais ib los lus sib ncaim kav ib txhis rau nej, vim tej lus no yuav rau txim rau nej thaum txog hnub kawg.

15 Vim yam uas kuv zwm nyob hauv ntiaj teb no, yuav raug coj los mus tawm tsam nej nyob rau ntawm lub rooj txiav txim; vim tus Tswv tau txib kuv li no, thiab kuv yuav tsum ua raws li. Amees.