1 ’E i teienei, e’ita e ti’a iā’u, ia Nephi, ’ia pāpa’i i te mau mea ato’a i ha’api’ihia i rotopū i tō’u ra mau ta’ata ; e’ita ho’i au i te mea pūai i te pāpa’i mai tā’u i pūai i te a’o ; nō te mea ’ia parau te ta’ata nā roto i te mana o te Vārua Maita’i, nā te mana o te Vārua Maita’i e fa’atae i taua parau ra i te ’ā’au o te mau tamari’i a te ta’ata nei.

2 Inaha rā, e rave rahi te ta’ata i fa’a’eta’eta i tō rātou ’ā’au i te Vārua Mo’a, ’e ’aore tōna e vāhi i roto ia rātou ra, nō reira, ’ua fa’aru’e mai rātou i te mau mea e rave rahi tei pāpa’ihia ra, ’e ’ua fa’ariro ho’i rātou i te reira ’ei mea faufa’a ’ore.

3 ’Āre’a rā, ’ua pāpa’i au, ’o Nephi, i te mau parau tā’u i pāpa’i ra, ’e tē fa’ariro nei ho’i au i te reira ’ei mea faufa’a rahi roa i tō’u ra mau ta’ata. ’E ’ua pure tāmau noa ho’i au nō rātou i te ao, ’e tē fa’ararirari noa nei ho’i tō’u roimata i tō’u turu’a nō rātou i te ru’i ; ’e tē ti’aoro noa ra vau i tō’u Atua ma te fa’aro’o, ’e ’ua ’ite ho’i au ē, e fa’aro’o mai ’oia i tā’u ra ti’aorora’a.

4 ’E ’ua ’ite ho’i au ē, e ha’amo’a mai te Fatu te Atua i tā’u ra mau pure nō te maita’i o tō’u ra mau ta’ata. ’E te mau parau tā’u i pāpa’i ma te paruparu ra, e ha’apūaihia ïa nō rātou ; nō te mea e ha’api’i atu te reira ia rātou ’ia rave i te maita’i ; e fa’a’ite ho’i ia rātou i te parau nō tō rātou ra mau metua ; e paraparau ho’i te reira nō ni’a ia Iesu, ’e e ha’api’i ho’i te reira ia rātou ’ia ti’aturi iāna, ’e ’ia fa’aitoito ē tae noa atu i te hope’a, ’oia te ora mure ’ore ra.

5 ’E ’ua pāto’i pūai ho’i te reira i te hara, mai te au i te pāpū o te parau mau ra ; nō reira, ’aita roa e ta’ata e riri mai i te mau parau tā’u i pāpa’i, maori rā ’ua uruhia ’oia e te vārua o te diabolo ra.

6 Tē ’oa’oa nei au i te parau pāpū ; tē ’oa’oa nei au i te parau mau ; ’e tē ’oa’oa nei au ia Iesu, nō te mea ’ua fa’aora ’oia i tō’u vārua mai hade mai.

7 ’Ua here au i tō’u nūna’a, ’e tē vai nei tō’u fa’aro’o rahi i te Mesia, ’e e fārerei au i te mau vārua pōra’o ’ore e rave rahi i tāna ra vāhi ha’avāra’a.

8 ’Ua here au i te ’āti Iuda—ua parau vau ē, e ’āti Iuda, nō te mea ’o te fenua ïa nō reira mai au.

9 ’Ua here ato’a vau i te mau ’Ētene. Inaha rā, e ’ore au e ti’aturi i te hō’ē nō rātou, maori rā ’ia ’āfaro rātou i te Mesia, ’e ’ia tomo ho’i nā roto i te ’ūputa oaoa ’e ’ia haere nā te ’ē’a piriha’o ē tae atu ai i te ora ra, ’e ’ia haere tāmau noa ho’i nā taua ’ē’a ra ē tae atu ai i te hope’a nō te pu’e mahana o te orara’a nei.

10 ’E i teienei, e tō’u mau taea’e here, ’e te ’āti Iuda ato’a, e tō te mau hope’a ato’a o te fenua nei, ’a fa’aro’o mai na i teie nei mau parau, ’e ’a ti’aturi ho’i i te Mesia ; ’e ’ia ’ore ’outou e ti’aturi i teie nei mau parau, ’a ti’aturi i te Mesia. ’E ’ia ti’aturi ’outou i te Mesia ra, e ti’aturi ato’a ïa ’outou i teie nei mau parau, nō te mea, e mau parau teie nā te Mesia, ’e ’ua hōro’a mai ’oia i te reira iā’u nei ; ’e tē ha’api’i nei ho’i te reira i te ta’ata ato’a ’ia rave i te maita’i.

11 ’E ’āhiri e ’ere te reira i te mau parau nā te Mesia ra, ’a ha’avā ’outou i te reira—nō te mea e fa’a’ite mai te Mesia ia ’outou, nā roto i te mana ’e te hanahana rahi, ’e nāna iho teie mau parau, ’ia tae i te mahana hope’a ra ; ’e e ti’a atu ho’i ’outou ’e ’o vau ato’a te mata i te mata i mua i tāna ha’avāra’a ; ’e i reira ’outou e ’ite ai ē, ’ua fa’auehia vau e ana ’ia pāpa’i i teie mau mea nei, noa atu ā tō’u nei paruparu.

12 ’E tē pure nei au i te Metua nā roto i te i’oa o te Mesia, ’ia fa’aorahia e rave rahi o tātou, ’e ’aore rā tātou pā’āto’a, i roto i tōna ra bāsileia i taua mahana rahi e mahana hope’a ato’a ra.

13 ’E i teienei, e tō’u mau taea’e here, ’o ’outou pā’āto’a nō te ’utuāfare o ’Īserā’ela, ’e tō te mau hope’a ato’a ho’i o te fenua nei, tē paraparau atu nei au ia ’outou mai te reo o te tahi i te pi’ira’a mai raro mai i te repo ra : ’A pārahi ’outou ē tae noa atu i taua mahana rahi ra.

14 ’E ’outou ’o tē ’ore e hina’aro i te maita’i o te Atua, ’o tē ’ore e ti’aturi i te mau parau a te mau ’āti Iuda ra, ’e i tā’u nei ho’i mau parau, ’e i te mau parau ho’i e tae mai nō roto mai i te vaha o te ’Ārenio a te Atua ra, inaha, e parau atu vau ia ’outou, ’a haere rā ’outou ē a muri noa atu, ’e e fa’ahapa ho’i teie nei mau parau ia ’outou i te mahana hope’a ra.

15 ’E te mau mea ho’i tā’u e tā’ati i te fenua nei, e fa’aho’ihia mai ïa nō te fa’ahapa ia ’outou i te taime nō te ha’avāra’a ; ’ua nā reira mai ho’i te Fatu i te fa’aue mai iā’u ra, ’e ’ia ha’apa’o vau i te reira e ti’a ai. ’Āmene.