1 Jacobpaj nishcacuna, Nefipaj huauqui, caicunata pai nirca Nefipa llactapuracunaman:

2 Riqui, ñuca juyashca huauquicuna, ñuca Jacob Diosmanda ordenai tucushca caimanda, Achil cayashca paipa achil laya, achil ajllai tucushcani ñuca huauqui Nefimanda, pitami quiquinguna ricushcanguichi shuj jatun mandaj nacashpa shuj huacaichij shina, pai ricuriaimanda, riqui yachanchimi ñuca quiquingunaman ashtacapacha cuzascunata parlashcanimi.

3 Shina cashpapash, ñuca quiquingunaman cutinbash parlani; ñuca quiquingunapa alma alicachun munani. Ari, ninanda cangunamanda preocuparini; cangunamandallata yachanguichi shina cashcata. Ñuca cutin yarichishcani cangunata tucui shunguhuan; ñuca cangunaman ñuca taitapa nishcacunata yachachishcani; ñuca cangunaman tucui cuzascunamanda parlashcani caicuna ña quilcashca, cai alpa pacha rurashcamandapacha.

4 Cunanga, riqui, ñuca parlagrini cangunaman imacunami can, imacunami shamugrin; shina caimanda, ñuca ricusha cangunaman Isaías nishcacunata. Cai nishcacunami ñuca huauqui munarca ñuca cangunaman parlachun. Ñuca cangunaman parlani cangunapa ali cachun, cangunapa Diospaj shutita yachajuchun jatunyachichunbash.

5 Cunanga, nishcacuna maijanmi ñuca ricugrini Isaías parlashca tucui Israelpaj huasimanda; shina caimanda, caicunaca cangunapapashmi imallapaj ali canguna canguichi Israelpaj huasimanda. Tianmi ashtaca cuzascuna Isaías parlashca chaicuna imallapaj ali can cangunapa, Israelpaj huasimanda canguna caimanda.

6 Cunanga, nishcacunaca caicunami: Apunchij Diosca shina nin: Riqui, ñuca jahuayachisha ñuca maquita Gentilcunaman, banderata llactapuracunaman vichai ricuchisha; paicuna paicunapa churicunata paicunapaj rigracunapi apamunga, paicunapa ushicunapash paicunapa rigra jahuacunapi pushamunga.

7 Jatun Mandajcuna paicunapa ricuriaj taitacunashna canga, paicuna Jatun Mandaj huarmicuna paicunapaj chuchuchij mamacunashna canga; paicuna urai cumuringa quiquinbaman paicunapa ñavicunahuan alpaman, lambinga alpata quiquingunapa chaquicunamanda; quiquinguna yachajgringichi ñuca Apunchij cajta; chaimanda paicunaca ñucata shuyajcuna na pingai tucungachu.

8 Cunan ñuca, Jacob ashata cai nishcacunamanda parlangapa munani. Riqui, Apunchij ricuchirca ñucaman Jerusalénpi cashcacunaca, maimandami ñucanchi shamurcanchi, ña huañuchi tucurca huatashca shina apai tucurcapash.

9 Shina cashpapash, Apunchij ricuchirca ñucaman paicuna ñacutin tigramujgrijta. Pai ricuchihuarcapashmi ñucaman Apunchij Dios, Israelpaj Achil, paipacha paicunaman aichapi ricurimujrin; pai ricurimushca jipa, paicuna paita astinga chacatangapashmi, imashnami Ángelpaj shimi nishcacuna paimi caita ñucaman parlarca.

10 Jipaman paicuna paicunapa shungucunata shinlliyachirca Israelpaj Achilta na cazujcuna tucurca, riqui, ricushpa chasquichinacuna Israelpaj Achilmanda paicunapa jahuaman shamugrinmi. Punlla shamungami paicuna chugrichi tucugrin llaquichi tucugrin.

11 Caimanda, paicuna caiman chaiman apai tucushca jipa, ángel shinami nirca, ashtacacuna aichapi llaquichi tucunga, huañuchun na saquingachu, fielcunapaj achil mañaicunamanda; paicuna calpachi tucushca canga, chugrichi tucushca, millanayai tucushcapash; shina cashpapash, Apunchij paicunata llaquingami, chaimanda imaura paicuna shamujpi yachajungapa paicunapaj Jatun Causachijmanda, paicuna tucuilla cutin paicunapa chasquina alpacunaman tandachi tucunga.

12 Gentilcuna achilyachishcami can, paicunamanda Achil villachij quilcarca; riqui shina paicuna juchamanda arrepentirijpica na Siónhuan macanajujpica, paicunamanda na tandanajujpi chai jatun millanayaipash iglesiaman, paicuna quishpichi tucunga; Apunchij Diosca pactachinmi paipa conveniocunata maijan pai rurashca paipa huahuacunahuan; caimandami Achil villachij cai cuzascunata quilcashca.

13 Chaimanda, picuna Siónhuan macanajujpi Apunchijpahuan conveniocunata rurashcacuna lambinga alpata paicunapa chaquicunamanda; Apunchijpaj llactapuracuna na pingai tucungachu. Apunchijpaj llactapuracuna paita shuyajcuna canmi, paicuna Mesíaspaj shamuita shuyanajunra.

14 Riqui, Achil villachij nishca shina, Mesías callaringami cutin cati tandachita paicunata; shina caimanda, pai ricuringami paicunaman ushaipi jatun achil jatunyachipipash, tucuchingacaman paicunapa ña ricunayachijcunata, imaura chai punlla shamujpi paicuna paipi cringami; nipita paica na tucuchingachu paipi crijcunata.

15 Paicuna na paipi crijta tucuchishca canga, rupaihuan, ushashca tamiahuan, ushashca alpa chujchuihuan, yahuar jicharihuan, tauca unguicunahuan, ushashca yarjaicunahuanbash. Paicuna yachangami Apunchijca Diosmi, Israelpaj Achil.

16 Macanajuipi japishcata quichunallachu jatun ushaita charimanda, tucui ali huatashca shinata cacharingallachu?

17 Apunchijca shina nin: Huatashca shinacunapash ushai charicunamanda quichushca canga, manllanayai macanajuipi japishcata cacharingallami; Tucui ushaihuan Dios cacharingami paipa conveniopa llactapuracunata. Apunchijca shina nin: Ñuca fiñashami maijan quiquingunahuan fiñajta.

18 Ñuca quiquinda llaquichijcunata micuchishami, paicunapaj aichacunahuanllata; paicuna paicunapa yahuarhuanllata mishqui vinohuanshna machangami; tucui aichacuna yachangami Ñuca Apunchij cani quiquinba Jatun Quishpichij, quiquinba Jatun Causachij, Jacobpaj Shinlli.