1 Ndien idahaemi, ndima nditɔ eka mi iren, ami mmokot mme ŋkpɔ emi man mbufo efiɔk kabaŋa mme ediomi Jehovah emi enye okodiomide ye ofuri ufɔk Israel—

2 Emi enye eketiŋde ɔnɔ mme Jew, ke inua mme ndisana prophet esie, tɔŋɔ ke eritɔŋɔ ka, tɔŋɔ ke emana ye emana, tutu ini edi ete efiak enim mmɔ ke itie ke ata ufɔk Abasi ye otu Abasi; ke ini editaŋde mmɔ ika ufɔk ke mme isɔŋ inyene mmɔ, enyuŋ esiak mmɔ ke kpukpru mme isɔŋ eŋwɔŋɔ mmɔ.

3 Sese, ndima nditɔ eka mi iren, ami ntiŋ mme ŋkpɔ emi nnɔ mbufo man mbufo ekop inemesit, enyuŋ emenede ibuot mbufo ke nsinsi, ke ntak mme edidiɔŋ emi Jehovah Abasi edinɔde nditɔ mbufo.

4 Koro ami mmefiɔk nte ke mbufo emetim eyom, ediwak mbufo, ndifiɔk mme ŋkpɔ emi edidide; ke ntre ami mmefiɔk nte ke mbufo emefiɔk ete ke obukidem nnyin ana nte eyemede onyuŋ akpa; edi, ke obukidem nnyin ke nnyin idikut Abasi.

5 Iŋ, ami mmefiɔk nte ke mbufo emefiɔk ete ke obukidem ke enye ediwut mbon edude ke Jerusalem idem esie, emi nnyin iketode idi; koro ɔfɔn ete enye odu ye mmɔ; koro ɔfɔn ye akwa Andibot ete enye ayak idem esie edidu ke idak owo ke obukidem, nnyuŋ mkpa nnɔ kpukpru owo, man kpukpru owo ekpedu ke idak esie.

6 Koro nte mkpa odude ye kpukpru owo, man anam uduak mbɔm akwa Andibot osu, ana nte odudu eriset ke mkpa odu, ndien ana nte eriset ke mkpa edi ɔnɔ mme owo ke ntak iduɔ; ndien iduɔ edi ke ntak ndudue; ndien ke ntak mme owo ɔkɔduɔde ema esibe mmɔ esio ke iso Jehovah.

7 Ke ntre, ana nte edi anana utit usio-isop—ke mibɔhɔke ete ke enye edi anana utit usio-isop mbiara emi idisineke se midikemeke ndibiara. Ke ntre, akpa ubiere ikpe emi ekedide ebine mme owo akana nte odu uwem eke midikemeke ndibiara. Ndien edieke edide ntre, obukidem emi akpana nte ana ke isɔŋ abiara onyuŋ ataha ɔnyɔŋ aka isɔŋ esie, man edifiak eset.

8 O ifiɔk Abasi, mbɔm ye mfɔn esie! Koro sese, edieke owo midisetke aba ana nte ukpɔŋ nnyin odu ke idak angel oro emi ɔkɔduɔde ke iso Nsinsi Abasi, onyuŋ akabade edi satan, man edifiak adaha ada.

9 Ndien mme spirit nnyin ekpekabade etie nte enye, ndien nnyin ikabade idi mme satan, idi mme angel inɔ satan, man esio ke iso Abasi nnyin, ndien idu ye ete mme nsu, ke ukut, nte idem esie; iŋ, inɔ enye emi akabiaŋade akpa ete ye eka nnyin, emi ekenamde idem esie oforo angel uŋwana, onyuŋ edemede nditɔ owo ɔnɔ mme ebuana ŋkari uwot owo ye kpukpru utɔ mme ndedibe utom ekim.

10 O didie ke mfɔn-ido Abasi nnyin okpon, emi anamde usuŋ ɔnɔ nnyin ibɔhɔ ke ubɔk idiɔk unam emi; iŋ, unam oro, mkpa ye hell, emi ami nkotde mkpa obukidem; ŋko ye mkpa spirit.

11 Ndien ke ntak usuŋ ubɔhɔ Abasi nnyin, Edisana Abasi Israel, mkpa emi, emi ami nketiŋde mbaŋa, emi edide eke midibehe ifep, ayasana akpa mkpa esie ayak; mkpa emi edide udi.

12 Ndien mkpa emi ami nketiŋde mbaŋa, emi edide mkpa eke spirit, ayasana akpa mkpa esie ayak; mkpa eke spirit emi edi hell; ke ntre, mkpa ye hell ena esana mme akpa mkpa mmɔ eyak, ndien hell ana nte asana mbon nkpɔkɔbi spirit esie ayak, ŋko udi ana nte asana mbon nkpɔkɔbi esie ke obukidem ayak, ndien eyefiak enim mme idem ye mme spirit mme owo ke itie mmɔ kiet kiet; ndien oto ke odudu eriset ke mkpa Edisana Abasi Israel.

13 O didie ke uduak Abasi nnyin okpon! Koro ke usuŋ efen, paradise Abasi ana asana mme spirit ndinen owo ayak, udi onyuŋ asana idem ndinen owo ayak; ndien efiak enim spirit ye obukidem ke itie mmɔ, ndien kpukpru owo ekabade edi emi midikemeke ndibiara aba, inyuŋ ikemeke ndikpa, ndien mmɔ edi mme odu uwem ukpɔŋ, enyene ifiɔk emi ɔfɔnde ama nte nnyin ke obukidem, ibɔhɔke ete ke ifiɔk nnyin ɔyɔfɔn ama.

14 Ke ntre, nnyin iyenyene ifiɔk emi ɔfɔnde ama kabaŋa kpukpru ndudue nnyin, ye ndedehe ido nnyin, ye iferi nnyin; ndien mme ndinen owo eyenyene mfɔn-mma ifiɔk ebaŋa inemesit mmɔ, ye edinen ido mmɔ, koro esinede edisana ido, iŋ, kpa ɔfɔŋ edinen ido.

15 Ndien eyedikem ete ke ini kpukpru owo ema ekebe ke akpa mkpa emi eduk ke uwem, kadaŋa nte mmɔ ekabade edi se mikemeke ndikpa, ana nte mmɔ eda ke itie ikpe Edisana Abasi Israel; ndien ke ubiere ikpe edidi, do ke edibiere ikpe inɔ mmɔ nte asaŋade ye edisana ubiere ikpe Abasi.

16 Ndien ke akpanikɔ, ma uwem Jehovah, koro Jehovah Abasi ɔdɔhɔ ntre, ndien edi nsinsi ikɔ esie, emi mikemeke ndibe mfep, ete ke mmɔ emi edide ndinen eyeka iso edi ndinen, ndien mmɔ emi edide ndedehe eyeka iso edi ndedehe; ke ntre, mmɔ emi edide ndedehe edi eke satan ye mme angel esie; ndien mmɔ eyeka ke nsinsi ikaŋ, emi enimde enɔ mmɔ; ndien ndutuhɔ mmɔ edi nte mkpɔdiɔhɔ ikaŋ ye brimstone, emi edeme esie ɔdɔkde ke nsinsi ye ke nsinsi inyuŋ inyeneke utit.

17 O akwa ye edinen ikpe Abasi nnyin! Koro enye anam kpukpru mme ikɔ esie, ndien mmɔ eto inua esie ewɔrɔ, ndien ana nte mbet esie osu.

18 Edi, sese, mme ndinen owo, mme ndisana owo Edisana Abasi Israel, mmɔ emi ebuɔtde idem ke Edisana Abasi Israel, mmɔ emi eyɔde mme cross ererimbot, enyuŋ esin ke ntak but esie, mmɔ eyeda obio ubɔŋ Abasi enyene, emi ekenimde enɔ mmɔ tɔŋɔ ke eritɔŋɔ ererimbot, ndien idaresit mmɔ eyeyɔhɔ ke nsinsi.

19 O mkpoŋkan mbɔm Abasi nnyin, Edisana Abasi Israel! Koro enye anamde mme ndisana owo esie ebɔhɔ idiɔk unam oro satan, ye mkpa, ye hell, ye mkpɔdiɔhɔ ikaŋ ye brimstone oro, emi edide nsinsi ndutuhɔ.

20 O ata edisana Abasi nnyin! Koro enye ɔfiɔkde kpukpru ŋkpɔ, ndien ŋkpɔ ndomokiet iduhe ibɔhɔke ke enye ɔfiɔk.

21 Ndien enye edi ererimbot man enye anyaŋa kpukpru owo edieke mmɔ edikpaŋde utɔŋ inɔ ikɔ esie; koro sese, enye ɔyɔ mme ubiak ofuri owo, iŋ, mme ubiak kpukpru odu uwem ŋkpɔ, iren owo ye iban mbiba, ye nditɔ-ɔwɔŋ, emi etode ubon Adam.

22 Ndien enye ɔyɔ emi man eriset ke mkpa ekpenyene ufɔn ɔnɔ kpukpru owo, man kpukpru owo ekpeda ke iso esie ke akamba ye usen ubiere ikpe.

23 Ndien enye ɔnɔ kpukpru owo uyo ete yak ekabade esit, enyuŋ ena baptism ke enyiŋ esie, enyene mbuɔtidem emi ɔfɔnde ama ke Edisana Abasi Israel, midihe ntre owo idinyaŋake mmɔ ke obio ubɔŋ Abasi.

24 Ndien edieke mmɔ midikabakede esit inyuŋ ibuɔtidem ke enyiŋ esie, inyuŋ ina baptism ke enyiŋ esie, inyuŋ ime tutu esim utit, mmɔ eyenyene ubiom ikpe; koro Jehovah Abasi, Edisana Abasi Israel, ɔdɔhɔ ntre.

25 Ke ntre, enye ɔnɔ mbet; koro ke ini owo minɔhɔ mbet ufen iduhe; ndien ke ini ufen miduhe ubiom ikpe iduhe; ndien ke ini ubiom ikpe miduhe mme mbɔm Edisana Abasi Israel enyene unen ke idem mmɔ, ke ntak usio-isop; koro enam mmɔ ebɔhɔ ke odudu esie.

26 Koro usio-isop ekem ye se edinen ikpe esie oyomde kabaŋa kpukpru mbon emi owo minɔhɔ mmɔ mbet, man enam mmɔ ebɔhɔ idiɔk unam oro, mkpa ye hell, ye satan, ye mkpɔdiɔhɔ ikaŋ ye brimstone, emi edide anana utit ndutuhɔ; ndien efiak enim mmɔ ke itie Abasi oro emi ɔkɔnɔde mmɔ ibifik, emi edide Edisana Abasi Israel.

27 Edi ɔyɔdiɔk ɔnɔ owo emi ɔnɔde mbet, iŋ, emi enyenede kpukpru mme mbet Abasi, nte nnyin, ye emi eduede mmɔ, ye emi abiatde mme usen udomo esie, koro itie esie ɔdiɔk eti eti!

28 O ŋkari uduak idiɔk owo oro! O ŋtaŋidem, ye mme mmem idem, ye ndisime mme owo! Ke ini mmɔ ebɔde ukpep-ŋkpɔ mmɔ ekere ete ke mmimɔ imifiɔk ŋkpɔ, ndien mmɔ ikpaŋke utɔŋ inɔ item Abasi, ke ntak oro mmɔ ekpɔnɔde enye enim, ekere ete ke mmimɔ imifiɔk ke idem mmimɔ, ke ntre, ifiɔk mmɔ edi ndisime inyuŋ idoroke mmɔ. Ndien mmɔ eyetak.

29 Edi ndibɔ ukpep-ŋkpɔ ɔfɔn edieke mmɔ ekpaŋde utɔŋ enɔ mme item Abasi.

30 Edi ɔyɔdiɔk ɔnɔ mme owo enyene ŋkpɔ, emi enyenede ŋkpɔ kabaŋa ŋkpɔ ererimbot. Koro ke ntak mmɔ enyenede ŋkpɔ mmɔ ese mme ubuene ke ndek, enyuŋ ekɔbɔ mme suŋ-suŋ owo, ndien esit mmɔ odu ke mme inyene mmɔ; ke ntre, mme inyene mmɔ edi Abasi mmɔ. Ndien sese, inyene mmɔ ayatak ye mmɔ ŋko.

31 Ndien eyediɔk ɔnɔ mme inan emi midikopke ŋkpɔ; koro mmɔ eyetak.

32 Ɔyɔdiɔk ɔnɔ mme nnan emi midikwe usuŋ; koro mmɔ eyetak ŋko.

33 Ɔyɔdiɔk ɔnɔ mmɔ emi minaŋa mbobi ke esit, koro ifiɔk ukwaŋ-ŋkpɔ mmɔ eyemia mmɔ ke akpatre usen.

34 Ɔyɔdiɔk ɔnɔ osu-nsu, koro eyetop enye esin ke hell.

35 Ɔyɔdiɔk ɔnɔ owot owo emi okoide okoi owot, koro enye eyekpa.

36 Ɔyɔdiɔk ɔnɔ mmɔ emi enamde mme use, koro eyetop mmɔ esin ke hell.

37 Iŋ, ɔyɔdiɔk ɔnɔ kpukpru mmɔ emi ekponode ndem, koro satan kpukpru mme andidiɔk enemde esit ke mmɔ.

38 Ndien, ke akpatre, ɔyɔdiɔk ɔnɔ kpukpru mbon emi ekpade ke mme idiɔk ŋkpɔ mmɔ; koro mmɔ eyefiak ebine Abasi, enyuŋ ese iso esie, enyuŋ etak ke mme idiɔk ŋkpɔ mmɔ.

39 O, edima nditɔ eka mi iren, eti idiɔk odude ke ndidue Edisana Abasi oro, ŋko ye idiɔk odude ke ndiyak idem nnɔ mme etabi owo ŋkari. Eti, ete ke ndidu ke obukidem edi mkpa, ndien ke ndidu ke spirit edi uwem nsinsi.

40 O, edima nditɔ eka mi iren, ekpaŋutɔŋ enɔ mme ikɔ mi. Eti odudu Edisana Abasi Israel. Ekudɔhɔ ete ke ami ntiŋ mme mkpɔsɔŋ ŋkpɔ nnɔ mbufo; koro edieke mbufo enamde ntre, mbufo eyesuŋi akpanikɔ; koro ami ntiŋ mme ikɔ Andibot mbufo. Ami mmɔfiɔk nte ke mme ikɔ akpanikɔ ɔsɔŋ ɔnɔ kpukpru se misanake; edi ndinen owo ifeheke mmɔ, koro mmɔ ema akpanikɔ ndien idem inyeke mmɔ.

41 O ndien, ndima nditɔ eka mi, edi ebine Jehovah, Ata Edisana. Eti ete ke mme usuŋ esie edi nnen nnen. Sese, usuŋ owo edi mfafaha, edi enye ana nnen nnen ke iso esie, ndien andikpeme inua otop edi Edisana Abasi Israel; ndien enye idaha eyen-ufɔk do; ndien usuŋ efen iduhe do ke mibɔhɔke ke edi ke inua otop; koro owo ikemeke ndibiaŋa enye, koro Jehovah Abasi edi enyiŋ esie.

42 Ndien owo ekededi emi ɔkɔŋde, enye ke enye ediberede inɔ; ndien mme ɔfiɔk-ŋkpɔ, ye mbon emi ebɔde ukpep-ŋkpɔ, ye mmɔ emi enyenede ŋkpɔ, emi etaŋde idem ke ntak ukpep-ŋkpɔ mmɔ, ye ifiɔk mmɔ, ye inyene mmɔ—iŋ, mmɔ edi mmɔ emi enye esede ke ndek; ndien ibɔhɔke ete ke mmɔ eyetop mme ŋkpɔ emi eduɔk, enyuŋ eda idem mmɔ nte ndisime ke iso Abasi, enyuŋ esuhɔre edi ke ntɔtuŋɔ nsuhɔre-idem, enye idiberekede inɔ mmɔ.

43 Edi eyedip mmɔ mme ŋkpɔ mme ɔfiɔk ŋkpɔ ye mbon ɔniɔŋ ke nsinsi—iŋ, inemesit oro emi enimde enɔ mme ndisana owo.

44 O, ndima nditɔ eka mi iren, eti mme ikɔ mi. Sese, ami mmosioŋo mme ɔfɔŋ mi, nnyuŋ nkeŋ mmɔ ke iso mbufo; ami mbeŋe Abasi erinyaŋa mi nte enye ɔduŋɔde mi ye enyin esie emi okutde kpukpru ŋkpɔ; ke ntre, mbufo eyefiɔk ke akpatre usen, ke ini edibiere ikpe inɔ kpukpru owo kabaŋa mme utom mmɔ, ete ke Abasi Israel ama etie ntiense ete ke ami mma nyek mme ukwaŋ-ŋkpɔ mbufo nsio ke ukpɔŋ mi, ndien ke ami ndi edisana ke iso esie, ndien ke ami ŋkamake iyip mbufo.

45 O, edima nditɔ eka mi iren, esioŋo idem ekpɔŋ mme idiɔk ŋkpɔ mbufo; ekibi mme nkpɔkɔbi owo emi etim ɔbɔpde mbufo; edi ebine Abasi oro emi edide itiat erinyaŋa mbufo.

46 Ebeŋe ukpɔŋ mbufo enɔ ediye usen oro emi edinamde edinen ikpe inɔ mme ndinen owo, kpa usen ubiere ikpe, man mbufo ekufiak edem ye ɔkpɔsɔŋ ndik; man mbufo ekuti akwa ndudue mbufo ke mfɔn-mma, nnyuŋ mfiori: Ndisana, ndisana edi mme ubiere ikpe fo, O Jehovah Abasi Ibom—edi ami mmefiɔk ndudue mi; ami mmedue mbet fo, ndien mme ndudue mi edi ekim; ndien satan ada mi enyene, man ami ndu ke ɔkpɔsɔŋ ukut esie.

47 Edi sese, nditɔ eka mi iren, ndi ɔfɔn ete ami ndemede mbufo kabaŋa mme idiɔk emi? Ndi ami nyanuak ukpɔŋ mbufo edieke esit mbufo misanake? Ndi ami nyenam aŋwaŋa mbufo nte asaŋade ye iŋwaŋ-iŋwaŋ akpanikɔ edieke mbufo mikpinyeneke idiɔkŋkpɔ?

48 Sese, edieke mbufo ekpesanade ami mkpetiŋ edisana ŋkpɔ nnɔ mbufo; edi nte mbufo misanake, ndien mbufo ese mi nte andikpep, ɔfɔn ete ke ana ami ŋkpep mbufo mbaŋa mme utip idiɔk ŋkpɔ.

49 Sese, ukpɔŋ mi asua idiɔk ŋkpɔ, ndien esit mi enem abaŋa edinen ido; ndien ami nyetoro edisana enyiŋ Abasi mi.

50 Edi, nditɔ eka mi iren, kpukpru mbufo emi itɔŋ asatde, mbufo edi ke mme mmɔŋ; ye owo eke minyeneke okuk, edi edidep enyuŋ edia; iŋ, edi edidep wine ye mmɔŋ-eba idige ke okuk inyuŋ idige ke ekɔm urua.

51 Ke ntre, ekubiat okuk ke se minyeneke ufɔn, ye utom mbufo ke se miyuhɔke. Etim ekpaŋ-utɔŋ enɔ mi, enyuŋ eti mme ikɔ emi ami ntiŋde; enyuŋ edi etiene Edisana Abasi Israel, enyuŋ ebuana ke enye emi miditakke, minyuŋ ikemeke ndibiara, enyuŋ eyak ukpɔŋ mbufo enem esit ke isek.

52 Sese, ndima nditɔ eka mi iren, eti mme ikɔ Abasi mbufo; ebɔŋ akam enɔ enye kpukpru ini ke uwemeyo, enyuŋ etoro edisana enyiŋ esie ke okoneyo. Eyak esit mbufo edara.

53 Ndien sese didie ke mme ediomi Jehovah ekpon, ndien didie ke usuhɔre esie kabaŋa nditɔ owo; ndien ke ntak odudu esie, ye mfɔn ye mbɔm, enye ɔŋwɔŋɔ ɔnɔ nnyin ete ke owo idisoboke ubon nnyin ofuri ofuri, ke obukidem, edi ete ke enye eyetim mmɔ enim; ndien ke mme emana iso mmɔ eyedi ndinen ŋkɔk ɔnɔ ufɔk Israel.

54 Ndien idahaemi, nditɔ eka mi iren, ami nyetiŋ ediwak efen nnɔ mbufo; edi ke ŋkpɔŋ nyetiŋ nnɔ mbufo mme nyɔhɔ nsuhɔ ikɔ mi. Amen.