1 Áádóó Jesus hastóí bikééʼ naazínę́ę áyidííniid éí bááh dóó chʼil naʼatłʼoʼii bitooʼ łaʼ wóshdę́ę́ʼ.

2 Dóó bááh dóó chʼil naʼatłʼoʼii bitooʼ haʼaakaigo, áłah jílínę́ę hachʼįʼ haadzííʼ niʼgóó dinohbįįh hodííniid.

3 Dóó akééʼ naazíinii bááh dóó chʼil naʼatłʼoʼii ndeizhką́ąʼgo, bááhą́ą néidiiʼą́ dóó ałtsʼáyiiztiʼ dóó yikʼi sodoolzin; dóó bikééʼ naazínę́ę yaa yiiznil dóó daohsą́ yidííniid.

4 Dóó daʼiiyą́ą́ʼ dóó yee hwiih daazlį́įʼgo, áłah jílínę́ę bááh baa dadoohkááł yidííniid.

5 Dóó áłah jílínę́ę daʼiiyą́ą́ʼ dóó yee hwiih daazlį́įʼgo, akééʼ naazíinii kwíídííniid: Jó nihitahdóó tʼááłáʼí bee deesįįł, dóó éí bááh yikʼi sońdílzįįh dóó ałtsʼánéítih dooleeł dóó shisodizin bá hooghan ńdeidiiláhígíí, dashoosdląądígíí dóó shízhiʼ binahjįʼ tó bee dadoolzį́łígíí, yaa neikaah dooleeł.

6 Dóó díí éí tʼáá áłahjįʼ ádaahtʼį́ béédaohłniih dooleeł, shí íishłaagi átʼéego, díí bááh kʼínítiʼígíí dóó bá sodeeszinígíí dóó nihitah sékánę́ęgi átʼéego ádaʼołʼį́į doo.

7 Dóó díigi ádaʼołʼį́į doo shitsʼíís, nihichʼįʼ ííshją́ą́ íishłaago danółʼínę́ę, béédaohłniihgo. Dóó díí éí binahjįʼ aTaaʼ bichʼįʼ tʼáá aaníí tʼáá áłahjįʼ shéédaohłniihígíí bééhózin dooleeł. Dóó tʼáá áłahjįʼ shéédaohłniihgo shiiʼSizíinii nihił dahólǫ́ǫ doo.

8 Áádóó kódííniidgo, akééʼ naazíinii yichʼįʼ haadzííʼ bąąh haʼíízhahí chʼil naʼatłʼoʼii bitooʼ biiʼígíí dadoohdlį́į́ł, dóó áłah nilínígíí bitaadoohkaał áko łaʼ deidoodlį́į́ł.

9 Áádóó yidaʼiilaa, dóó dayoodlą́ą́ʼ dóó yee hwiih daazlį́į́ʼ; dóó áłah jílínę́ę yitaadeizką́, dóó dayoodlą́ą́ʼ, dóó yee hwiih daazlį́į́ʼ.

10 Dóó akééʼ naazíinii díí ałtso ádayiilaago, Jesus bichʼįʼ hanáánáádzííʼ: Díí ádaoohłaaígíí binahjįʼ nihikʼihojídlíi dooleeł, háálá díí shibeehazʼáanii éí bidaʼohłéehgo, dóó aTaaʼ bichʼįʼ ííshjání ádaʼdoołyaa éí shibeehazʼáanii nihaa níláhígíí bidaʼiilʼį́į doo dadooniid.

11 Dóó díí éí beʼiinaʼ łahgo áńdayiidlaaígíí dóó shízhiʼ binahjįʼ tó bee daalzį́ʼígíí tʼáá áłahjįʼ bá kódaʼohłʼį́į doo; dóó shidił, shidił nihá deeznaʼą́ą, béédaohłniihgo á kódaʼohłʼį́į doo, ákogo aTaaʼ tʼáá áłahjįʼ shéédaohłniihígíí bichʼįʼ ííshjání áńdaʼdoołʼįįh dooleeł. Tʼáá áłahjįʼ shéédaohłniihgo shiiʼSizíinii nihił dahólǫ́ǫ dooleeł.

12 Dóó beehazʼáanii nihaa nishłé áko díí tʼáadoo leʼé kódaʼohłʼį́į dooleeł. Dóó tʼáá áłahjįʼ kódaʼohłʼį́įgo éí nihikʼihojídlíi dooleeł, háálá shitseʼ éí bikáaʼgi jiztłʼin dooleeł.

13 Ndi tʼáá háiida díí yiláahgo dóó tʼáá biʼohgo áyiilaaígíí éí shitseʼ doo bikááʼ jiztłʼin da, ndi éí éí séí bikáaʼgi jiztłʼin; áádóó ahoʼniiłtą́ągo, dóó tó dááląądgo, dóó deeyolgo, dóó dah ndabiiłhango, éí ndoołdas, dóó chʼį́įdiitah bee dáádílkał éí há ąą átʼé.

14 Éí bąą shibeehazʼáanii bikʼeh dahonołʼį́įgo éí nihikʼihojídlíi doo, éí éí aTaaʼ baa díílééł shidííniidígíí átʼé.

15 Tʼáá aaníí, tʼáá aaníigo, ánihidishní, hadaʼohsííd dóó tʼáá áłahjįʼ sodadołzin, háálá éí chʼį́įdii beʼiiníziinii nihidínóotah, dóó nihił ndoodiłii yóó ánihidoolííł.

16 Dóó shí nihitahgóó sodeeszinígi átʼéego nihídóʼ shisodizin bá hooghan góneʼ sodadołzingo, shidineʼé bitahgóó iiná łahgo áńdayiidlaaígíí dóó shízhiʼ binahjįʼ tó bee daalzį́ʼígíí. Jó shí éí adinídíín nishłį́; shí éí nihinááł iʼiishłaa.

17 Áádóó Jesus díí saad bikééʼ naazíinii ałtso yee yichʼįʼ haadzíiʼgo, áłah nilíinii yichʼįʼgo nínááhaayá dóó yichʼįʼ haadzííʼ:

18 Jó, tʼáá aaníí, tʼáá aaníigo, ánihidishní, hadaʼohsííd dóó tʼáá áłahjįʼ sodadołzin háálá éí danihídíʼnóotah; háálá Satan beʼiiníziinii éí nihinízin, tłʼoh naadą́ą́ʼ biyáázh yildééh nahalingo atsʼánihidoołtééł.

19 Éí bąą tʼáá áłahjįʼ shízhiʼ binahjįʼ aTaaʼ bichʼįʼ sodadołzin;

20 Dóó haʼátʼííshį́į́ shízhiʼ binahjįʼ aTaaʼ bíínóhkeedgo, tʼáá ákótʼéego, tʼáá aaníí shaa doolyééł nohsingo, jó éí nihaa doolyééł.

21 Nihaʼáłchíní bił aTaaʼ bichʼįʼ sodadołzin, tʼáá áłahjįʼ shízhiʼ binahjįʼ, áko niheʼesdzáán dóó nihadaʼáłchíní bikʼidahojidoodliił.

22 Jó áádóó, tʼáá áłahjįʼ áłah nádleeh doo; áłah ńdaahdleehgo háíshį́į́ diné nihaa níyáago tʼáadoo bichʼįʼ aa danohchįʼí, ndi bíniʼ nihaahakai tʼáadoo bichʼįʼ aa danohchįʼí.

23 Ndi bá sodadołzin, dóó doo éí yíwohjįʼ dabididoohniił da; dóó tʼáá ahą́ą́h nihaa ńdaakahgo éí aTaaʼ bichʼįʼ, shízhiʼ binahjįʼ, bá sodadołzin doo.

24 Éí bąą, niheʼadinídíín wódahgo bił dah díílnih áko nihookááʼ dineʼé bá adinídíín dooleeł. Jó, shí éí adinídíín nishłį́ áko éí bił dah díílnih doo—nihinááł áshłaa yę́ę. Jó nihił bééhózin aTaaʼ bichʼįʼ sodeeszin, dóó tʼáá ánółtso danihíínáał.

25 Dóó nihił bééhózin doo éí łaʼ yíwohdi nihidííniid da, ndi tʼóó wóshdę́ę́ʼ shaa hohkááh nihidííniid, áko baa nihiyiʼ ákodínóohsį́į́ł dóó yidoołtsééł; áko índa nihookááʼ dineʼé bichʼįʼ kódaahtʼį́į dooleeł; dóó tʼáá háiida díí beehazʼáanii doo biʼjiilaaígíí éí bíniʼdii hodíʼnóotah.

26 Dóó kʼad díí Jesus saad yee haadzíiʼgo, akééʼ naazíinii náyiizláʼą́ą náánéinééłʼį́įgo, dóó kóyidííniid:

27 Jó tʼáá aaníí, tʼáá aaníigo, ánihidishní, beehazʼáanii łaʼ nihaa náánishłé, dóó índa shiTaaʼ bichʼįʼ ńdeeshdááł áko náánáłaʼ beehazʼáanii shaa ayeesyáhą́ą bidaʼdeeshłííł.

28 Jó dóó kʼad, díí éí beehazʼáanii nihaa nishłé, éí baa dadoohkáałgo, tʼáá háiida nihił bééhózingo bąąhági átʼéii yee ádąąh dahastʼą́ągo éí díí shitsʼíís dóó shidił bee bééhániihii tʼáadoo tʼóó bíniʼ deiyání dóó deidlání dooleeł.

29 Háálá háíshį́į́ bąąhági átʼéii yee ádąąh dahastʼánígíí shitsʼíís dóó shidił bee bééhániihii yiyííyą́ąʼgo dóó yoodlą́ąʼgo éí atsʼíís dóó iiʼsizíinii doo yáʼátʼééhgóó ádihodidooltʼih; éí bąą diné ádąąh dahastʼą́ągo nihił bééhózingo shitsʼíís dóó shidił bee bééhániihii bichʼįʼ baa nohchįʼ dooleeł.

30 Ákótʼée ndi, doo nihitahdóó chʼídínóohłchéeł da, ndi tʼóó ndanohtin doo dóó aTaaʼ bichʼįʼ, shízhiʼ binahjįʼ, bá sodadołzin dooleeł; dóó beʼiinaʼ łahgo áyiilaago dóó shízhiʼ binahjįʼ tó bee yilzį́įʼgo, índa wóshdę́ę́ʼ bididoohniił, dóó shitsʼíís dóó shidił bee bééhániihii baa doohkááł.

31 Ndi doo beʼiinaʼ łahgo ánáyiidlaagóó éí shidineʼé doo bitah wóltaʼ da dooleeł, áko shidineʼé doo yidoołchxǫǫł da, jó háálá shidibé bééhasin, haa néelą́ʼígíí bééhózin.

32 Ákótʼée ndi, sodizin bá dahooghandóó éí doo chʼídínóohłchéeł da, éí doodago sodizin yah náhdááhgóó, ákódaatʼéhígíí éí tʼáá áłahjįʼ ndanohtin; háálá doo éí nihił bééhózin da ndi éí háadida ńdoodááł beʼiinaʼ łahgo ánáyiidlaago, dóó tʼáá aaníí átʼį́įgo shaa doogááł, áádóó hadaałtʼé áńdadeeshdlííł; dóó nihí éí nihinahjįʼ hasdáh náádzáa doo.

33 Éí bąą, díí bee nihichʼįʼ haasdzíʼígíí bikʼeh dahonołʼį́ áko doo nihihodidootʼih da; háálá hóyéeʼgi nahojíleʼ aTaaʼ nahjįʼ kóhwiiłʼįįh.

34 Dóó díí beehazʼáanii nihichʼįʼ kwíishłaa ałghadaʼdohtʼáahgo biniinaa. Dóó nihikʼijinishdlíi doo dóó doo ałghadaʼdohtʼááhgóó.

35 Dóó kʼad éí aTaaʼ bichʼįʼ déyá, biniiyéii hólǫ́ǫgo bąą aTaaʼ bichʼįʼ déyá nihá yáʼátʼééh doo biniiyé.

36 Áádóó Jesus díí ałtso saad yee haadzíiʼgo, bikééʼ naazíinii náyiizláʼą́ą bílaʼ yee yídadeelchid, tʼááłáʼí nízinígo, ałtso yídadeelchid ndi, dóó yídadilchidgo yichʼįʼ hahasdzííʼ.

37 Dóó áłah jílínę́ę éí díí saad yee haadzíʼígíí tʼáadoo daazhdiiztsʼą́ą da, éí bąą doo baa dahojilneʼ da; ndi akééʼ naazíinii éí adziilii bee Iiʼsizį́ Diyinii aa haalyéhígíí nihitaizlá daaníigo yaa dahalneʼ. Dóó shí eí kodóó díí haneʼ tʼáá aaníí átʼéego nihił ííshją́ą́ ádeeshłííł.

38 Áádóó Jesus ałtso yídadeelchidgo, kʼos niʼnikeeldoh áłah jílínę́ę ałtso hakéstiʼgo áko Jesus doo tʼáadoo dajiiłtsą́ą da.

39 Dóó kʼos ałtso hoł yaa niildohgo, éí hatsʼą́ą́ʼ níyá, dóó yáʼąąsh gódei dah ńdiidzá. Dóó akééʼ naazíinii éí yáʼąąsh gódei anáádzáá dayiiłtsą́ dóó daaníigo yaa dahalneʼ.