Wóltaʼii 25
Naaki Góneʼ Náánádáhígíí, ádaa hodzódlí yee ahadaʼdeestʼáanii dóó bąąhági átʼéii yaa deíkáahii éí tsehégod dookʼą́ą́ł nahalingo adahididookʼą́ą́ł—Elijah éí tʼah doo tʼáá íiyisíí báhádzid iiłkááh góneʼ ńdoodááł—Malachi 4 bił ahąąh naaʼnil. Díí éiyá Jesus náádiidzá dóó bikééʼdóó 34gi nahalzhiishgo yihahą́ądą́ą́ʼ ádahóótʼįįd.
1 Jó háálá, bichʼįʼ yoołkááł éí bijį́ bááh bighan biiʼ kǫʼígi átʼéego hodinóogah; dóó ádaa dahaʼniihii, aooʼ, dóó bąąhági átʼéii yaa deíkááhą́ą, tsehégod ndahalin doo; dóó éí bijį́ bíiníłką́ągo ałtso adahididookʼą́ą́ł, ní Tʼáá ałtsoní biBóhólníihii, áko bikétłʼóól dóó bitsʼáozʼá ndi doo łaʼ doodzih da.
2 Ndi nihí shízhiʼ béédaałdzidii, Yáʼátʼéehii biYeʼ bitʼaʼ nádziihgo ńdidooʼnah, dóó náás doohkah dóó dínóohsééł béégashii yáázh hóneʼé sizį́ nahalingo.
3 Dóó bąąhági ádáátʼíinii bikʼi ndoohkah; háálá éí nihikétłʼáahdi łeeshchʼih dooleeł éí bijį́ ákwíishłaago, ní Tʼáá ałtsoní biBóhólníihii.
4 Moses, shinaalʼaʼí, bibeehazʼáanii béédaohłniih, Horebdi Israel tʼáá ńtʼę́ę́ʼ bee bichʼįʼ haasdzíʼę́ę, bee ná hazʼáanii dóó ándahwiitʼaahii.
5 Jó, Elijah Diyin God yá halneʼii nihichʼįʼ deeshʼaał tʼah doo Bóhólníihii bí íiyisíí báhádzidgo haiłkaahígíí tʼáá bichʼįʼdi.
6 Dóó éí azhéʼé baʼáłchíní yił łáʼí ńdadoodleeł, dóó áłchíní bizhéʼé yił łáʼí ńdadoodleeł, háálá deeshááł dóó nahasdzáán ayóó yéigo bá hadeesdzih.