1 Iei ikkei ekkewe kapas minne Amulek a afanafana ngeni ekkewe aramas ir mi nom non ewe fonuen Ammonaia, a apasa:

2 Ngang Amulek; ngang ewe noun Kitona, ewe noun Ishmael, ewe a mwirimwirin Aminatai; iwe ina i ewe pwan chok Aminatai ewe a awewei ewe mak minne a nom won tittin ewe temple, minne a makketiw me ren autun poun Kot.

3 Iwe Aminatai i emon mwirimwirin Nifai, ewe noun Liai, ewe a tou seni ewe fonuen Jerusalem, ewe emon mwirimwirin Manasseh, ewe noun Joseph ewe a amömöno non Egypt me ren poun pwin kewe.

4 Iwe nengeni, ngang pwan emon mwan mi itefouno me nein meinisin ekkewe ir mi sineiei; ewer, iwe nengeni, a chommong ai einang me chiechiei, me ua pwan angei chommong pisekisek me ren poun ai angang weires.

5 Nge inamo, mwirin ekkei meinisin, esamo kon fen watte ai sinei usun ekkewe eerenien ewe Samon, me an kewe monomon me manaman mi amwarar. Ua apasa esemo mwo kon fen watte ai sinei usun ekkei mettoch; nge nengeni, ua muan, pun ua fen kuna chommongun an monomon me an manaman mi amwarar; ewer, pwan mwo non tumunun manauen ekkei aramas.

6 Nge inamo, ua fen apochokunano netipei, pun ua fen kokko chommong fansoun me use rongorong; iei minne ua sinei usun ekkei mettoch, nge inamo use mochen sinei; iei minne ua no fetan ne ungeni Kot, non fofforungawen netipei, pwan mwo tori ewe aruwanun ranin ei efisuwen maram, ewe a nom non ewe engonun ierin muun ekkewe sou apung.

7 Nupwen ai sai pwe upwe churi emon aramasei mi arap ngeniei, nengeni emon chon nangin ewe Samon a pwato ngeniei me apasa: Amulek, niwin ngeni imwom, pun kopwe amwongoni emon soufosun ewe Samon; ewer, emon mwan mi fel, i emon mwan mi kefinita me ren Kot; pun i a fen echikipin chommong ran pokiten tipisin ekkei aramas, iwe i a echik, iwe kopwe etiwa i non imwom we me amwongoni, iwe i epwe efeiochuk me imwom we; iwe ewe feiochun ewe Samon epwe nonnom wom me imwom we.

8 Iwe non ewe fansoun pwe ua aneasochisi mongungun ewe chon nang, me niwin ngeni imwei we. Iwe nupwen ua feino ngeni ena neni ua kuna ewe mwan usun ewe chon ngang a apasa ngeniei: Kopwe etiwanong non imwom—iwe nengeni ina i ei pwan chok mwan ewe a fen kapas ngenikemi usun ekkewe mettochun Kot.

9 Iwe ewe chon nang a apasa ngeniei i emon mwan mi fel; iei minne ua sinei i emon mwan mi fel pokiten a fen affateno me ren emon chon nangin Kot.

10 Iwe pwan, ngang mi sinei pwe ekkewe mettoch usun minne i a fen pwarata ir mi ennet; pun nengeni ua apasa ngenikemi, pwe usun ewe Samon mi manau, iwe a pwan tinato noun chon nang pwe epwe fori ekkei mettoch repwe pwano ngeniei; iwe ei a fori nupwen ei Alma a nonnom non imwei.

11 Pun nengeni, i a fen efeiochu imwei, i a fen efeiochuei, me nei kewe fefin, me nei semirit, me semei me aramasei kewe; ewer, pwan mwo einangei kewe i a fen efeiochur, iwe ewe feiochun ewe Samon a nonnom wom anongonong won ekkewe kapas minne i a apasa.

12 Iwe iei, nupwen Amulek a fen apasa ekkei kapas ekkewe aramas ra poputa ne ingeno, ra kuna pwe a nap seni emon chok chon pwarata ekkewe ra pwarata usun ekkewe mettoch usun minne ra fen etipisi ngeni ir, me pwan usun ekkewe mettoch minne repwe feito, anongonong won ewe ngunun osini minne a nom rer.

13 Nge inamo, mi wor ekkoch me neir ekkewe ra ekieki pwe repwe etittinar, pwe ita ren ar kokkot mi nikatuputup repwe tongeni sarer non ar kapas, pwe repwe tongeni kunokun pisekin pwarata ar repwe ungeni ir, pwe repwe tongeni uweireno ngeni ekkewe sou apung pwe repwe tongeni kapung anongonong won ewe annuk, me pwe repwe tongeni ninnino are katurunong non kanapus, anongonong won ekkewe atai annuk minne repwe tongeni forireta are pisekin pwarata ne ungeni ir.

14 Iei ir ekkewe mwan ra achocho ar repwe nireno, ir ekkewe sou annuk, ekkewe ir mi kamo are kefinita me ren ekkewe aramas pwe repwe anganga ewe annuk atun ar fansoun kapung, are atun ekkewe kapungun atai annuk an ekkewe aramas me mwen ekkewe sou apung.

15 Iei ekkei sou annuk ir mi tipachem non ekkewe angang me nikatuputupen ekkewe aramas; iwe ei a fis pwe epwe atufichir pwe repwe tongeni angoch non ar kewe angang.

16 Iwe non ewe fansoun pwe ra poputa ne etittina Amulek, pwe ren ewe popun repwe tongeni fori pwe epwe osokkano an kewe kapas, are ungeni ekkewe kapas minne epwe apasa.

17 Iei rese sinei pwe Amulek a tongeni sinei usun ar kokkot. Nge non ewe fansoun nupwen ra poputa ne etittina, a weweiti ar ekiek, iwe a apasa ngeni ir: O ami ei tappin aramas mi ngaw me tipeforea, ami sou annuk me nikatuputup, pun oua forata nongonongen ewe tefin; pun oua forata ekkewe sar me pisekin tuf pwe repwe sarei ekkewe mi fel noun Kot.

18 Oua forata kokkot pwe oupwe angawano ekkewe aanen wenechar, me oupwe watiw ewe songen Kot won mokuremi, pwan mwo ngeni unusen kiteterinon ekkei aramas.

19 Ewer, Mosaia a fen apasaochu, i nouch we amuchunon king, nupwen an ewe epwene fangeta ewe muu, pokiten ese wor emon epwe wata won, a fori pwe ekkei aramas repwe emmwen me ren pwisin mongungur—ewer, a fen apasaochu pwe ika ewe fansoun epwe feito pwe mongungun ekkei aramas epwe finata angangangaw, pwe ina, ika ewe fansoun epwe feito pwe ekkei aramas repwe turunong non atai annuk, repwe mwukono ngeni kiteter.

20 Iwe iei ua apasa ngenikemi ewe Samon a apunguochu ami kewe angangangaw; i a afanafanoch ngeni ekkei aramas, me ren mongungun noun kewe chon nang: Oupwe aier, aier, pun ewe muun nang a arapeto.

21 Ewer, a afanafanoch, me ren mongungun noun kewe chon nang pwe: Upwe feitiw nein nei kewe aramas, fiti pungoch me wenechar non pei.

22 Ewer, iwe ua apasa ngenikemi pwe ika esap ren iotekin ekkewe mi tupwon, ekkewe ra nom non ewe fonu iei, iwe oupwene fen chu ren unusen kiteter iei; nge inamo esap ren noter, usun ekkewe aramas non ekkewe ranin Noah, nge epwe ren nengita, me ren samau, me ewe ketinas.

23 Nge iei pokiten iotekin ekkewe mi tupwon ina oua manau; iwe iei minne, ika oupwe aturau ekkewe mi tupwon me neimi iwe ewe Samon esap chiwen amwochu poun; nge non an song mi pochokun i epwe tou ungenikemi; iwe oupwe ninni me ren nengita, me ren samau, me ren ewe ketinas; iwe ewe fansoun a arapeto tiwenon chok ika oupwe aier.

24 Iwe iei non ewe fansoun pwe ekkewe aramas ra kon song ren Amulek, iwe ra puchoruu, me apasa: Ei mwan a kapas mi ngaw usun ach kewe annuk minne ir mi pung, me nouch kewe sou annuk mi mirit ekkewe sia fen finireta.

25 Nge Amulek a eitieu poun, me a puchor non pochokun ngeni ir, a apasa: O ami ei tappin aramas mi ngaw me tipeforea, pwata Setan a fen kamwochuno won netipemi? Pwata oupwe mutata inisimi ngeni i pwe i epwe tongeni wor an pochokun womi, an epwe achunnano mesemi, pwe ousap weweiti ekkewe kapas minne ra fen affateno, anongonong won ennetir?

26 Pun nengeni, ua fen pwarata pwe upwe ungeni ami annuk? Ouse wewe; oua apasa pwe ua fen kapas ai ungeni ami annuk; nge usamo, nge ua fen kapas non aninisin ami annuk, tori ami kapung.

27 Iwe iei nengeni, ua apasa ngenikemi, pwe ewe nongonongen kiteterinon ekkei aramas a poputa ne foruta me ren ekkewe mettoch ese wenechar an noumi kewe sou annuk me noumi kewe sou apung.

28 Iwe iei non ewe fansoun pwe nupwen Amulek a fen apasa ekkei kapas ekkewe aramas ra puchoruu ne ungeni, ra apasa: Iei am aua sinei pwe ei mwan i emon noun ewe tefin, pun i a fen chofona ngenikich; pun i a fen kapas ne ungeni ach we annuk. Iwe iei a apasa pwe i eseamo kapas an epwe ungeni.

29 Iwe pwan, i a kapas mi ngaw usun nouch kewe sou annuk, me nouch kewe sou apung.

30 Iwe non ewe fansoun pwe ekkewe sou annuk ra wanong non netiper pwe repwe chechemeni ekkei mettoch ar repwe ungeni ir.

31 Iwe mi wor emon me neir ewe itan Siesrom. Iei i ewe akkaewin a etipisi Amulek me Alma, i emon me nein ekkewe mi fokkun tipachem me neir, a watte angangen moni a fori me nein ekkewe aramas.

32 Iei ewe kokkot an ekkewe sou annuk pwe repwe pisekisekino; iwe ra pisekisekino anongonong won ar angang.