1 Iei sipwene niwin non ach we uruo ngeni Amalekaia me ekkewe ra suno fiti i ngeni non ewe fonu pon; pun, nengeni, a fen uwei ekkewe ra fiti i, me feita ngeni non ewe fonuen Nifai me nein ekkewe chon Leiman, me a amwasangata ekkewe chon Leiman pwe repwe song ngeni ekkewe aramasen Nifai, ina minne ewe kingen ekkewe chon Leiman a tinano ew porous non unusen ewe fonu, me nein noun kewe aramas meinisin, pwe repwe ioifengeni inisir sefan pwe repwe no maun ngeni ekkewe chon Nifai.

2 Iwe non ewe fansoun pwe nupwen ewe porous a affateno me neir ra fokkun nuokus; ewer, ra nuokus ar repwe enetipengawa ewe king, me ra pwan nuokus ar repwe no maun ngeni ekkewe chon Nifai ren ar nuokus ika epwe poutuno manauer. Iwe non ewe fansoun pwe rese, are ewe kon watten kinikinin me neir rese, aneasochisi ewe annuk an ewe king.

3 Iwe non ewe fansoun pwe ewe king a song pokiten ar aneasonap; iei minne a ngeni Amalekaia ewe nemenem won ewe kinikinin noun kewe sounfiu minne ra aneasochis ngeni an kewe annuk, me annuku ngeni i pwe epwe feino me echimwer pwe repwe apisekir ren pisekin maun.

4 Iei nengeni, iei ewe mochen an Amalekaia; pun i emon mwan mi fokkun nikatuputup an epwe fori mi ngaw iei minne a wanong ewe kokkot non netipan pwe epwe etetiwa ewe kingen ekkewe chon Leiman seni ewe nenien mwottun king.

5 Iwe iei a fen angei ewe nemenem won ekkewe kinikinin ekkewe chon Leiman ekkewe ra chen me ren ewe king; iwe a achocho pwe epwe angei ewe chen me ren ekkewe ir rese aneasochis; iei minne a feino ngeni ewe neni minne a iteni Onita, pun ikewe ekkewe chon Leiman meinisin ra suno ie; pun ra kuna ekkewe sounfiu ra feito, me, ra ekieki pwe repwe feito pwe repwe nireno, iei minne ra suno ngeni Onita, ngeni ewe nenien pisekin maun.

6 Iwe ra fen finata emon mwan pwe epwe emon nour king me emon sou emmwen me wor, pun ra fen awesano non ar ekiek ren ew affatenon ekiek pwe resap nom fan nemenem ar repwe no ungeni ekkewe chon Nifai.

7 Iwe non ewe fansoun pwe ra ionfengeni inisir won unungen ewe chuk minne a iteni Antipas, ne monneta ngeni maun.

8 Iei esap an Amalekaia kokkot pwe epwe maun ngeni ir anongonong won ekkewe annuk an ewe king; nge nengeni, iei an kokkot pwe epwe chen me ren ekkewe sounfiun ekkewe chon Leiman, pwe i epwe tongeni enenia pwisin inisin non nemenem me etetiwa ewe king seni an ewe nenien mwottun king me angei ewe nemenem won ewe muu.

9 Iwe nengeni, non ewe fansoun pwe a annuku noun kewe sounfiu pwe repwe aueta imwer kewe imw mangaku non ewe nemonun chuk minne a arap ngeni ewe chuk Antipas.

10 Iwe non ewe fansoun pwe nupwen a pwin a tinano emon chon kuno mi monomon ngeni ewe chuk Antipas, a mochen pwe ewe sou emmwenin ekkewe ra nom won ewe chuk, itan Lionti, pwe i epwe feitiw ngeni nepopun ewe chuk, pun a mochen epwe kapas ngeni i.

11 Iwe non ewe fansoun pwe nupwen Lionti a angei ewe porous i ese pwaracho ne feitiw ngeni nepopun ewe chuk. Iwe non ewe fansoun pwe Amalekaia a titino sefan ewe aruwen fansoun, a mochen i epwe feitiw. Iwe non ewe fansoun pwe Lionti ese feitiw; iwe a titino sefan ewe aunungatin fansoun.

12 Iwe non ewe fansoun pwe nupwen Amalekaia a kuna pwe ese tongeni pesei an Lionti epwe feitiw seni ewe chuk, a feita ngeni ewe chuk, arap ngeni an Lionti ewe nenien asoso; iwe a titino sefan ewe aruwanun fansoun an we porous ngeni Lionti, a mochen pwe i epwe feitiw, me pwe i epwe uwei noun kewe chon mas repwe fiti i.

13 Iwe non ewe fansoun pwe nupwen Lionti a feitiw fiti noun kewe chon mas ngeni Amalekaia, pwe Amalekaia a mochen i epwe feitiw fiti noun kewe sounfiu non fansoun nepwin, me rokopwanieno ekkewe mwan non ar kewe nenien asoso won ir ekkewe ewe king a fen ngeni i nemenem wor, me i epwe fangereta ngeni non poun Lionti, ika i epwe fori i (Amalekaia) emon aruwen sou emmwen won unusen ekkewe sounfiu.

14 Iwe non ewe fansoun pwe Lionti a feitiw fiti noun kewe mwan me rokopwanieno ekkewe mwan noun Amalekaia, pwe me mwen ar neno atun wunungachin ewe ran repwe rokopwanino me ren ekkewe sounfiun Lionti.

15 Iwe non ewe fansoun pwe nupwen ra kuna pwe ra rokopwanino, ra sio ngeni Amalekaia pwe i epwe mut ngeni ir repwe choni pwir kewe, pwe resap tongeni ninnino. Iei ewe fokkun mettoch minne Amalekaia a mochen.

16 Iwe non ewe fansoun pwe a fangeta noun kewe mwan, mi ungeni ekkewe annuk an ewe king. Iei ewe mettoch Amalekaia a mochen, pwe i epwe tongeni awesano an kewe kokkot ne atetiwa ewe king seni an ewe nenien mwottun king.

17 Iei ewe eereni me nein ekkewe chon Leiman, ika nour we sou emmwen mi nap a ninnino, pwe repwe finata ewe aruwen sou emmwen pwe epwe nour sou emmwen mi nap.

18 Iwe non ewe fansoun pwe Amalekaia a annuku pwe emon me nein noun kewe chon angang epwe ngeni Lionti poison ekis me ekis, iwe i a mano.

19 Iei, nupwen Lionti a mano, ekkewe chon Leiman ra finata Amalekaia pwe epwe nour sou emmwen me nour sou emmwenin sounfiu.

20 Iwe non ewe fansoun pwe Amalekaia a fetan fiti noun kewe sounfiu (pun i a angei an kewe mochen) ngeni ewe fonuen Nifai, ngeni ewe teninimwen Nifai, ina ewe teninimw mi auchea.

21 Iwe ewe king a feiniu pwe epwe churi i fiti noun kewe chon mas, pun a ekieki pwe Amalekaia a fen apwonueta an kewe annuk, me pwe Amalekaia a ionfengeni fokkun watten mwichen sounfiu pwe repwe no ungeni ekkewe chon Nifai ne maun.

22 Nge nengeni, nupwen ewe king a feiniu pwe epwe churi i Amalekaia a annuku pwe noun kewe chon angang repwe feino me churi ewe king. Iwe ra feino me chappetiw me mwen ewe king, usun ita repwe asufonu i pokiten an tekia.

23 Iwe non ewe fansoun pwe ewe king a eitieu poun pwe epwe auetar, usun ewe eereni an ekkewe chon Leiman, usun ew esisinen kinamwe, minne eereni ra fen angei seni ekkewe chon Nifai.

24 Iwe non ewe fansoun pwe nupwen a aueta ewe aewin seni ewe puun, nengeni a pwosu ewe king ngeni ngasangasan; iwe a turuno ngeni ewe puun.

25 Iei ekkewe chon angang noun ewe king ra su; iwe ekkewe chon angang noun Amalekaia ra puchoruu, ra apasa:

26 Nengeni, ekkewe chon angang noun ewe king ra pwosu i ngeni ngasangasan, iwe i a fen turuno iwe ra su; nengeni, feito me kuna.

27 Iwe non ewe fansoun pwe Amalekaia a annuku pwe noun kewe sounfiu repwe karisino me kuna met a fis ngeni ewe king; iwe nupwen ra feino ngeni ewe neni, me kuna ewe king a koneno non chan, Amalekaia a tipen song, me apasa: Ion chok a tongei ewe king, mut ngeni i epwe feino, me tapweno noun kewe chon angang pwe repwe nireno.

28 Iwe non ewe fansoun pwe meinisin ekkewe ra tongei ewe king, nupwen ra rongorong ekkei kapas, ra feino me tapwei ekkewe chon angang noun kewe king.

29 Iei nupwen ekkewe chon angang noun ewe king ra kuna ew mwichen sounfiu a tapweno mwirir, ra nuokus sefan, me suno ngeni non ewe fonu pon, me feito ngeni ewe fonuen Saraemla me choni ekkewe aramasen Ammon.

30 Iwe ewe mwichen sounfiu minne a tapwer a niwin sefan, mwirin ar tapwer non namotmwan; iwe iei Amalekaia, ren an chofona, a angei netipen ekkewe aramas.

31 Iwe non ewe fansoun non ewe soran a tonong non ewe teninimwen Nifai fiti noun kewe sounfiu, me nemenano ewe teninimw.

32 Iwe non ewe fansoun pwe ewe kiwin, nupwen a rong pwe ewe king a ninnino—pun Amalekaia a tinano emon chon kuno ngeni ewe kiwin ne esinengeni i pwe ewe king a fen ninnino me ren noun kewe chon angang, pwe i a fen tapwer fiti noun mwichen sounfiu, nge a namotmwan, iwe ra fen tiweno.

33 Iei minne, nupwen ewe kiwin a angei ei porous a titino ngeni Amalekaia, a mochen i pwe epwe mut ngeni manauen ekkewe aramasen ewe teninimw; me a pwan mochen i epwe feito ren; iwe a pwan mochen pwe i epwe uwei ngeni i chon pwarata pwe repwe pwarata usun manon ewe king.

34 Iwe non ewe fansoun pwe Amalekaia a uwei ewe pwan chok chon angang ewe a nieno ewe king, me ir meinisin ekkewe ra nom ren, me feino ngeni ewe kiwin, ngeni ewe neni ikewe a mwommot ie; iwe ir meinisin ra pwarata ngeni i pwe ewe king a ninnino me ren pwisin noun kewe chon angang; me ra pwan apasa: Ra fen suno; met ei ese pwarata usur? Iwe iei ra amenemenochu ewe kiwin usun manon ewe king.

35 Iwe non ewe fansoun pwe Amalekaia a kutta chen me ren ewe kiwin, iwe a angei i pwe punuwan; iwe iei me ren an chofona, me ren aninisin noun kewe chon angang mi nikatuputup, a angei ewe muu; ewer i a ketiw pwe emon king non unusen ewe fonu, me nein ekkewe aramasen chon Leiman meinisin, ekkewe ra masoueni ekkewe chon Leiman me ekkewe chon Lemuel me ekkewe chon Ishmael, me ekkewe chon rikino seni ekkewe chon Nifai meinisin, seni muun Nifai we feitiw ngeni ewe fansoun.

36 Iei ekkei chon rikino, a wor rer ewe pwan chok aurour me ewe pwan chok weweochun ekkewe chon Nifai, ewer, ra fen aurour me non ewe pwan chok mirit usun ewe Samon, nge inamo, mi sokkono ar repwe aporousa, ese nangatam seni ar we rikino ra pochokununo me aucho, me ra kon mwacho, ngaw me orochongaw nap seni ekkewe chon Leiman—ketiwenong me non ekkewe eereni an ekkewe chon Leiman; mutata inisir ngeni chipwang, me sokopaten mocheisou meinisin; ewer, ra unusen monnukano ewe Samon ar Kot.