1 Im ālikin men kein kar jiron̄ļo̧k Alma im Amulek n̄an ilo̧k jān jikin kwelo̧k eo; im raar ilo̧k, im itok em̧ool n̄an āneen Sidom; im lo, ijo raar lo aolep armej ro raar diwōjļo̧k jān āneen ^aAmmōnaia, ro kar ^bkadiwōjļo̧k er im kade er, kōnke raar tōmak ilo naan ko an Alma.

2 Im raar bwebwenato n̄an er aolep men ko raar waļo̧k n̄an ^akōrā ro pāleer im ro nejier, im barāinwōt kōn er makmake, im kōn ^bkajoor in lo̧mo̧o̧ren eo aerro.

3 Im barāinwōt Ziezrom eaar babu ilo nan̄inmej ilo Sidom, kōn juon bwil ekajoor, eo eaar waļo̧k jān en̄taan ko reļļap ilo ļōmņak eo an kōn ^anana eo an, bwe eaar kōtmāne bwe Alma im Amulek raar mej, im eaar kōtmāne bwe kar m̧an er kōnke nana eo an. Im jero̧wiwi in eļap, im elōn̄ jero̧wiwi ko an jet, raar pād ilo ļōmņak eo an m̧ae iien eaar metak otem metak, im eaar jab lo aenōm̧m̧an; kōn menin eaar jino bwil kōn juon māāņāņ ekōmālle.

4 Kiiō, ke eaar ron̄ bwe Alma im Amulek raar pād ilo āneen Sidom, būruōn eaar jino peran; im eaar jilkinļo̧k juon āneen ejidimkij n̄an er, im kōņaan ren itok n̄an ippān.

5 Im ālikin men kein raar ilo̧k ippān ilo m̧ōkaj, eo̧ron̄e ennaan eo eaar jilkinļo̧k n̄an er; im raar ilo̧k n̄an m̧weo im̧ōn Ziezrom; im raar lo e ioon jikin an babu, enan̄inmej, im kar kanooj m̧ōjņo̧ kōn juon piba ebwil; im ļōmņak eo an eaar barāinwōt jab lo aenōm̧m̧an kōnke nana ko an; im ke eaar lo er eaar erļo̧keļo̧k pein, im akweļap n̄an er bwe ren kōmour e.

6 Im ālikin men kein Alma eaar ba n̄an e, kabwijere e kōn pein: Kwōj ^atōmak ke ilo kajoor an Kraist n̄an lo̧mo̧o̧r?

7 Im eaar uwaak im ba: Aaet, ij tōmak aolep naan ko kwaar katakin.

8 Im Alma eaar ba: Eļan̄n̄e kwōj tōmak ilo pinmuur eo an Kraist kwo m̧aron̄ in ^amour.

9 Im eba: Aaet, ij tōmak ekkar n̄an naan ko am̧.

10 Innām Alma eaar kūr n̄an Irooj, im ba: O Irooj am Anij, kwōn tūriam̧okake armej in, im ^akōmour e ekkar n̄an tōmak eo an eo ej ilo Kraist.

11 Im ke Alma eaar ba naan kein, Ziezrom eaar ^ajutak ioon neen, im jino in etetal; im men eaar kōm̧m̧an n̄an bwilōn̄ eļap an aolep armej ro; im jeļā kake men in eaar itok iaolepān āneen Sidom.

12 Im Alma eaar peptaiji Ziezrom n̄an Irooj, im eaar jino jān iien eo m̧aanļo̧k n̄an kwaļo̧k naan n̄an armej ro.

13 Im Alma eaar kajutak juon im̧ōn jar ilo āneen Sidom, im kōjenolo̧k pris im rikaki ro ilo āneo, n̄an peptaij n̄an Irooj jabdewōt ekōņaan peptaij.

14 Im ālikin men kein er raar lōn̄; bwe raar im̧welel tok jān aolep peļaakin āneo Sidom, im kar peptaij.

15 A kōn armej ro ilo āneen Ammōnaia, raar pād wōt ilo aer pen bōro im armej ekijn̄en̄e kōnwaer; im raar ukeļo̧k jaab jān jero̧wiwi ko aer, im watōk bwe aolep kajoor an Alma im Amulek ej itok jān devil; bwe raar en laajrak eo an ^aNior, im jab tōmak ilo ukeļo̧k jān jero̧wiwi ko aer.

16 Im ālikin men kein Alma im Amulek, kōnke Amulek eaar ^akaarmejjete aolep an gold, im silver, im mennin aorōk ko an, ko raar pād ilo āneen Ammōnaia, kōn naan eo an Anij, bwe kōnke kar ^bjab bōk e jān ro jeram̧ im barāinwōt jemān im ro nukwin;

17 Kōn menin, ālikin Alma eaar kajutak kabun̄ eo ilo Sidom, eaar lo juon ^abōbrae eļap, aaet, eaar lo bwe armej ro raar bōbrae er kōn juwa in burueer, im kar jino ^bkōttāik er im̧aan Anij, im kar jino kuktok ippān doon ilo jikin jar ko aer n̄an ^ckabun̄-jar n̄an Anij im̧aan lokatok ko, ^dekkōl im jar iien otemjej, bwe ren maron̄ lo lo̧mo̧o̧r jān Setan, im jān ^emej, im jān ko̧kkure—

18 Kiiō āinwōt iaar ba, Alma ke eaar lo aolep men kein, kōn menin eaar bōk Amulek im ilo̧k n̄an āneen Zaraemla, im bōkļo̧k e n̄an m̧weo im̧ōn make, im kar jipan̄e ilo en̄taan ko an, im kar kōkajoor e ilo Irooj.

19 Im āindein eaar jem̧ļo̧k iiō eo kein kajon̄oul in iien tōl an riekajet ro ioon armej in Nipai.