1 Im kiiō ālikin men kein ilo allōn̄ eo kein kajon̄ouljuon in iiō kajon̄oulruwatimjuon, ilo raan eo kein kajon̄oul in allōn̄ eo, jarin tariņae ko an riLeman ro kar lo er rej jibadekļo̧k āneen Ammōnaia.

2 Im lo, jikin kwelo̧k eo kar bar kalōke, im Moronai eaar door juon jarin tariņae iturin tōrerein ko an jikin kwelo̧k eo, im raar jolōn̄ļo̧k bwidej eo ipeļaakin n̄an jālitake er jān m̧ade ko im dekā ko an riLeman ro; bwe lo, raar ire kōn dekā ko im m̧ade ko.

3 Lo, ij ba bwe jikin kwelo̧k in ^aAmmōnaia kar bar kalōke. Ij ba n̄an kom̧, aaet, bwe kar bar kalōke m̧ōttan; im kōnke riLeman ro raar ko̧kkure e juon iien m̧okta kōnke jero̧wiwi an armej ro, raar kōtmāne bwe en naaj kar bar mennin rakim pidodo n̄an er.

4 A lo, ekōjkan an ļap kar kōrraat eo aer; bwe lo, riNipai ro raar kūbwij lōn̄tak ejoujik in bwidej ipeļaakier, eo eaar kanooj utiej bwe riLeman ro raar jamin juļo̧k dekā ko buier im m̧ade ko aer ņae er bwe en maron̄ wōr an̄ier, im rej jamin kar itok ioer ijello̧kun wōt n̄e eaar ilo ijo jikin aer deļo̧n̄.

5 Kiiō ilo iien in kapen utiej ro an riLeman ro raar bwilōn̄ otem bwilōn̄, kōnke mālōtlōt eo an riNipai ro ilo kōpooj jikin koņe ko aer.

6 Kiiō ritōl ro an riLeman ro raar ļōmņak, kōnke jon̄an ļap eo in oraer, aaet, raar ļōmņak bwe renaaj pidodo n̄an aer itok ioer āinwōt raar kōm̧m̧an m̧okta; aaet, im raar barāinwōt kōpooj er kōn kein tōrak ko, im kōn dipil ko, im raar barāinwōt kōpooj er kōn balle in kil ko, aaet, balle ko rekanooj mijel n̄an kalbubuuk aer keelwaan.

7 Im kōnke āindein aer kar pojak raar ļōmņak bwe renaaj aikuj kar pidodo aer anjo̧ ioon im likūt ro jeir im jatier n̄an ine eddo in kōm̧akoko, ak m̧ane im to̧o̧reļo̧k er ekkar n̄an aer kōņaan.

8 A lo, n̄an aer bwilōn̄ eļap, raar ^apojak n̄an er, ilo juon wāween jan̄in kar jeļā kake ilubwiljin ro nejin Liai. Kiiō raar pojak n̄an riLeman ro, n̄an pata ilo̧kan wāween katakin ko an Moronai.

9 Im ālikin men kein, riLeman ro, ak riAmalikaia ro, raar bwilōn̄ otem bwilōn̄ ilo wāween aer m̧aanjāppopo n̄an tariņae.

10 Kiiō, eļan̄n̄e kiin̄ Amalikaia eaar wanlaļļo̧k jān ^aāneen Nipai, im jeban jarin tariņae eo an, bōlen emaron̄ kar kōm̧m̧an bwe riLeman ro ren jodiki riNipai ro ilo jikin kwelo̧k Ammōnaia; bwe lo, eaar jab kaorōk bōtōktōkin armej ro an.

11 A lo, Amalikaia eaar jab wanlaļļo̧k n̄an kōpata. Im lo, kapen utiej ro an raar ekkōl im jab tariņaeik riNipai ro ilo jikin kwelo̧k Ammōnaia, bwe Moronai eaar ukōt wāween kajeikiki jerbal ko ilubwiljin riNipai ro, jon̄an raar kōrraat kōnke jikin koņe ko aer im raar jab maron̄ itok ioer.

12 Kōn menin raar jenlikļo̧k ilo āne jem̧aden eo, im kar bōk kāām eo aer im ilo̧k n̄an āneen Noa, kōnke raar ļōmņak bwe eaar ijo tokālik em̧m̧antata remaron̄ kar itok ņae riNipai ro.

13 Bwe raar jab jeļā ke Moronai eaar kapenļo̧k, ak kar bar ekkal ^ame in ko, bwe aolep jikin kwelo̧k ilo aolepān āneo ipeļaakin ijo; kōn menin, raar etal n̄an āneen Noa kōn juon jibadbad epen; aaet, kapen utiej ro aer raar wōnm̧aantak im bōk juon kanejnej bwe renaaj ko̧kkure armej in jikin kwelo̧k en.

14 A lo, n̄an aer bwilōn̄ eļap, jikin kwelo̧k Noa, eo eaar m̧okta juon jikin em̧ōjņo̧, kiiō eaar, jān wāween ko an Moronai, erom epen, aaet, em̧ool n̄an eļļā jān kajoor an jikin kwelo̧k Ammōnaia.

15 Im kiiō, lo, en̄in eaar mālōtlōt ilo Moronai; bwe eaar ļōmņak bwe renaaj mijake jikin kwelo̧k Ammōnaia; im āinwōt jikin kwelo̧k Noa eaar m̧okta kar m̧ōttan eo em̧ōjņo̧tata ilo āneo, kōn menin rekar etal n̄an jikin eo n̄an pata; im āindein eaar ekkar n̄an kōņaan ko an.

16 Im lo, Moronai eaar jitōn̄ Liai n̄an kapen eutiej ioon em̧m̧aan ro ilo jikin kwelo̧k eo; im eaar ^aejja Liai eo wōt eo eaar tariņae ippān riLeman ro ilo kom̧laļ eo iturear in reba Sidon.

17 Im kiiō lo ālikin men kein, bwe ke riLeman ro raar lo bwe Liai eaar tōl jikin kwelo̧k eo raar bar kōrraat, bwe raar mijak otem mijak Liai; mekarta kapen utiej ro aer raar kallim̧ur n̄an juon kanejnej n̄an kōm̧m̧alijar ņae jikin kwelo̧k eo; kōn menin, raar bōklōn̄tak jarin tariņae ko aer.

18 Kiiō lo, riLeman ro raar jab maron̄ deļo̧n̄eļo̧k me in ko ko aer jān jabdewōt bar iaļ ijello̧kun wōt deļo̧n̄ļo̧k eo, kōnke utiejen kappe eo kar julōn̄ļo̧k, im m̧wilaļ in ro̧n̄ ko kar kūbwiji ipeļaakin ijo, ijello̧kun wōt iturin deļo̧n̄ļo̧k eo.

19 Im āindein riNipai ro raar pojak n̄an ko̧kkure aolep ro renaaj kajjion̄ in tallōn̄ n̄an deļo̧n̄e me eo jān jabdewōt bar iaļ, jān kadkad kōn dekā im wākar er kōn m̧ade.

20 Āindein raar pojak, aaet, juon ānbwinnin em̧m̧aan ro aer rekajoortata, kōn jāje ko aer im buwat ko aer, n̄an jolaļļo̧k jabdewōt eo enaaj kajjion̄ in wanlōn̄ļo̧k ilo jikin koņe eo aer iturin jikin deļo̧n̄ļo̧k eo; im āindein raar pojak n̄an jojomare er make ņae riLeman ro.

21 Im ālikin men kein kapen ro an riLeman ro raar bōk lōn̄tak jarin tariņae ko aer im̧aan jikin deļo̧n̄ eo, im kar jino aitwerōk ippān riNipai ro, n̄an tōparļo̧k jikin koņe eo aer; a lo, kar iuunlikļo̧k er jān iien n̄an iien, jon̄an rekar m̧an er kōn ko̧kkure eļap.

22 Kiiō ke raar lo bwe raar jab maron̄ bōk kajoor ioon riNipai ro jān to eo, raar jino kūbwij laļļo̧k kappe in bwidej ko aer bwe ren maron̄ bōk to eo n̄an jarin tariņae ko aer, bwe ren maron̄ āinwōt juon ilo ire eo; a lo, ilo kajjion̄ kein kar bōkļo̧k er jān dekā ko im m̧ade ko kar juļo̧k n̄an er; im ijello̧kun kanni ro̧n̄ ko jān jolaļļo̧k kappe in bwidej ko, rekar obrak ilo ebwe jon̄an kōn rimej ro aer im ānbwin ko rekinejnej.

23 Āindein riNipai ro aer aolep kajoor ioon rikōjdat ro aer; im āindein riLeman ro raar kajjion̄ n̄an ko̧kkure riNipai ro m̧ae iien kapen utiej ro aer raar aolep mej; aaet, im eļapļo̧k jān juon to̧ujin in riLeman ro kar m̧ane er; ak, ilo ijo rājet, eaar ejjeļo̧k juon armej in riNipai ro kar m̧ane.

24 Eaar wōr enan̄in lemn̄oul ro raar ikkinejnej, ro raar jedmatmat n̄an m̧ade ko an riLeman ro kōn jikin ļe eo, ak rekar libobo kōn kein kōttōrak ko aer, im dipil ko aer, im penjān bar ko aer, jon̄an kinej ko aer raar pād ioon neer, ko elōn̄ iaer raar kanooj eļap.

25 Im ālikin men kein, ke riLeman ro raar lo bwe kapen utiej ro aer kar m̧an er aolep raar koļo̧k ilo āne jem̧aden eo. Im ālikin men kein raar ro̧o̧l n̄an āneen Nipai, n̄an kōjjeļāik kiin̄ eo aer, Amalikaia, eo eaar riNipai jān ļotak, kōn jorrāān eo eļap aer.

26 Im ālikin men kein eaar illu otem illu ippān armej ro an, kōnke eaar jab bōk kōņaan ko an ioon riNipai ro; eaar jab likūt er ilo ine eddo in kōm̧akoko.

27 Aaet, eaar kanooj illu otem illu, im eaar ^akanejneje Anij, im barāinwōt Moronai, im ^bkallim̧ur kōn juon kanejnej bwe enaaj ilim bōtōktōkin; im men in kōnke Moronai eaar kōjparok kien ko an Anij ilo kōpooj jokane eo an armej ro an.

28 Im ālikin men kein, bwe ilo ijo turājet, armej in Nipai raar ^akam̧m̧oolol Irooj aer Anij, kōnke An kajoor emake wōt ilo lo̧mo̧o̧ren er jān pein rikōjdat ro aer.

29 Im āindein eaar jem̧ļo̧k iiō kajon̄oulruwatimjuon in iien tōl an riekajet ro ioon armej in Nipai.

30 Aaet, im eaar wōr wōt aenōm̧m̧an ilubwiljier, im kanooj jeraam̧m̧an otem jeraam̧m̧an ilo kabun̄ eo kōn aer pokake im tiljek ko rekar liļo̧k n̄an naan eo an Anij, eo kar kabun̄bun̄ļo̧k n̄an er jān Hilamōn, im Siblon, im Koriantōn, im Ammōn im ļōm̧aro jein im jatin, aaet, im jān aolep ro raar ekkapit ilo ^alaajrak ekwōjarjar an Anij, im kar peptaij n̄an ukeļo̧k, im jilkinļo̧k er n̄an kwaļo̧k naan ilubwiljin armej ro.