1 Eri kedekedeo, mwurinte Amelekaia eh alehdier wehio, e ahpw tepida kamwakid mohngiong en Mehn Leimen kan en uhwong aramas en Nihpai kan; ei, e idihada aramas akan me pahn kin koasoiong Mehn Leimen kan sang pohn arail wasahn doulik kan, oh uhwong Mehn Nihpai kan.

2 Oh met e kamwakidadahr mohngiongirail kan en uhwong Mehn Nihpai kan, kahrehda ni imwin keisek duwaun sounpar en mwehin sounkopwung kan, eh koasoandi suwed kan pweidahr, ei, e wialahr nanmwarki en Mehn Leimen kan, oh e pil songosong en kaunda sahpw koaros, ei, aramas koaros me mi nan sahpwo, Mehn Nihpai kan oh pil Mehn Leimen kan.

3 Eri e kapwaiada eh koasoandio, pwe e kahrehiong mohngiong en Mehn Leimen kan en keptakaila oh e karotongeirailla, oh kamwakidada nan kapehdirail kan en lingeringerda, lao e kapokonepenehr pokon kalaimwun ehu pwe re en kohla mahweniong Mehn Nihpai kan.

4 Pwehki uwen tohtohn nah aramas akan, e koasoakoasoane en kalowehdi Mehn Nihpai kan oh kaliduweirailla.

5 Oh met e idiadahr Mehn Soram kan en wia kaun lapalap en sounpei kan, pwehki irail me keieun wehwehki kehlail en Mehn Nihpai kan, oh wasahn arail rukula kan, oh wasa me keieu luwet nan arail kahnihmw kan; eri e idihiraildahr en wia kaun lapalap en nah karis en sounpei kan.

6 Kedekedeo irail ahpw kahrehda neirail sounpei kan, oh karis kohla nan sapwtehno kohlahng nan sahpw en Saraemla.

7 Eri kedekedeo nindokon Amelekaia wie kalakalaudehla eh manaman sang ni widing oh mwersuwed, a Moronai, e wie kaukaunopada lamalam en aramas akan en loalopwoat ong Kauno arail Koht.

8 Ei, e wie kakehlakahla karis en Mehn Nihpai kan, oh kaukauwada kehl tikitik kei, de wasa me re kak rukula ie; re koasoakehda pwehl pwe en kapilpene nah karis en sounpei kan, oh pil wiewiahda kehl takai pwe en kapilirailpene, kapilpene arail kahnihmw kan oh irepen sapwarail kan; ei, kapilpene sahpwo pwon.

9 Oh arail kehl me keieu luwet kan e kin kihong pali laud en nah ohl akan; oh met e wiahda kehl kehlail oh kakehlakahla sahpwo me Mehn Nihpai kan sapweniki.

10 Oh met e wie kaukaunop pwe en utung arail mour saledek, sapwarail kan, arail pwoud kan, oh neirail seri kan, oh arail popohl, oh irail en kin momour pwehki Kauno arail Koht, oh pwe re en kak dadaurete soangen doadoahko me arail imwintihti kan kin nda doadoahk en aramas Kristian.

11 Oh Moronai wia ohl roson oh kehlail men; e wia ohl me audaudki kupwurokong unsek; ei, ohl emen me sohte pereniki kamaramas; ohl men me palingene kin perenki mour saledek oh mour maiau, oh saledek en rie kan sang pahn kehnaudek oh mour en lidu;

12 Ei, ohl me eh mohngiong kin direkihla kalahngan ong eh Koht, pwehki pai oh kupwuramwahu tohto me e ketikihong sapwellime aramas akan; ohl me kin doadoahk laud mehlel ong ni kamwahupen nah aramas akan oh pereparail.

13 Ei, oh ih ohl emen me tengeteng nan eh pwoson Krais, oh e kahukilahr me e pahn doare nah aramas akan, eh pwung kan, oh eh wehi, oh pil eh pelien lamalam, mehndahte ma pein ntah kerkihla.

14 Met Mehn Nihpai kan alehdier kaweid me re pahn pein doareirailsang ar imwintihti kan, oh ma mie anahnepen kakerehdi nta, ihme re pahn wia; ei, re pil alehdi kaweid me re sohte mwahn pahn tapihada mahwen, ei, dehr ngapkihda kedlahs ihte ma re pahn pelian ar imwintihti, oh ihte ma e pahn doarehla pein arail mour kan.

15 Oh met iei arail pwoson, ma re pahn wia met Koht pahn kapaiairailda nan sahpwo, eri met wehwehki, ma re pahn loalopwoatohng kapwaiada kosonned en Koht akan e pahn ketin kapaiairailda nan sahpwo; ei, e pahn ketin kaparkin irail ma re anahne sopohla, de kaunopada ong mahwen, nin duwen keperpen arail kahpwal;

16 Oh pil, me Koht pahn ketin kasalehiong irail wasa re pahn kohla ie pwe re en kak pein doare irail sang arail imwintihti kan, oh sang ar pahn wia met, Kauno kin ketin doareirailla; oh iei met en Moronai pwoson, oh e kin perenki nan eh mohngiong; kaidehn kakerehdi nta ahpw wiewia mwahu, pwe en doandoare nah aramas akan, ei, pwe en kapwaiada sapwellimen Koht kosonned akan, ei, oh liksang wiewia suwed kan.

17 Ei, mehlel, mehlel I ndaiong kumwail, ma aramas koaros sangete mahs kohdo, oh sang met kohla, pahn duwehte Moronai, kilang, manaman en ehl pahn rerrada kohkohlahte; ei, mohngiong en aramas akan sohte pahn mi pahn manaman en tepilo.

18 Kilang, ih ohl emen me duwehte Amon, sapwellimen Mosaia pwutako, iei, oh pil sapwellimen Mosaia pwutak teiko, ei, oh pil Alma oh pil nah pwutak ko, pwe irail koaros ohl en Koht kei.

19 Eri kilang, Ileman oh rie ko pil wiewia doadoahk katapan duwehte Moronai; pwe re kalohki mahsen en Koht, oh re papidaisihala aramas koaros me koluhla oh men rong arail padahk kan.

20 Oh met re kohwei, oh aramas akan karakarahkala pwehki ar padahk kan, kahrehda irail kenikenla mehlel rehn Kauno, iei, erein sounpar pahieu re piseksang mahwen oh pingiping kan nanpwungarail.

21 Ahpw, nin duwen ei koasoiaier, ni imwin kaeisek duwaun sounpar, ei, mehndahte ar ahneki popohl nanpwungarail, re idihdiong pelian riarail, Mehn Leimen kan, ahpw ni ar sohte inangih.

22 Ei, oh ni mehlel, arail mahweniong Mehn Leimen kan sohte uhdi erein sounpar tohto, mehndahte ar sohte inangih.

23 Eri, irail pahtoukihla ar pahn mahweniong Mehn Leimen kan, pwehki irail sohte perenki kakerehdi nta; ei, oh kaidehn ihte met—irail pil pahtouhla pwehki irail me kahrehda me riarail tohto kohkohsang pohn sampah wet kohlahng nan sampah soutuko, ni ar sohte onopadahng tuhwong ar Koht.

24 Ahpw, irail sohte kak mweidala arail mour kan, pwehki arail pwoud kan oh neirail seri kan pahn kamakamala ni tiahk suwed pahn irail akan me wia kisehrail mahs, ei, oh kahngohdiong arail mwomwohdiso, oh kohkohsang irail oh kohlahng kamwomwirailla sang ni ar iangala Mehn Leimen ko.

25 Ei, re sohte kakohng riarail ko en perenki kakerehdi ntahn Mehn Nihpai kan ma miehte aramas akan me kin kapwaiada sapwellimen Koht kosonned akan, pwe Kauno ketin inoukidahr ma re pahn kapwaiada sapwellime kosonned akan re pahn pweida nan sahpwo.